السلام عليكم ورحمة الله وبركاته
اولا انا ثانوية عامة نظام حديث وجبت الحمد لله 96.5 والحمد لله متوفر ليا انى ادخل صيدلة او علاج طبيعى
انا قريت عن الكليتين وميالة للعلاج الطبيعى اكتر حاسة ان يعتبر بندرس زى مواد طب شوية
وكمان لاقيت صيدلة حقها مهضوم وده كلام سمعته من خريجيها نفسهم غير كده حتى لو ربنا كرمنى وفتحت صيدلية الشغل ممل شوية لان انا حابة امارس طب مش افتح صيدلية وبس
كنت حابة اجمع منكوا معلومات اكتر عن الكلية قبل ما اكتبها فى الرغبات
اول حاجة انا قريت عن مواد الفرقة الاولى ممتعة جدا بجد تشريح وكيمياء حيوية وغيره مواد لذيذة
طيب ممكن حد يوضحلى ايه المواد الى بندرسها فى السنين الى بعد كده؟
والتخصص بيكون من سنة كام ؟
وهل من حقى انى اشخص ولا مجرد بنفذ كورس علاج ؟
لو تخصصت عظام هكون دكتورة عظام ولا ده حاجة تانية ممكن حد يوضحلى طبيعة القسم ؟
ولو تخصصت مثلا فى قسم تغذية وتخسيس ايه المواد الى بدرسها وهل بعد ما اخلص كده بكون دكتورة ريجيم ؟؟
والتخصص بيكون ليه تنسيق بداخل الكلية ولا انا بختار القسم الى حباه؟
وقسم باطنة ايه المواد الى بندرسها ولو تخصصت فيه ان شاء الله بتكون طبيعة عملى ايه ؟
اسفة انى طولت فى الاسئلة بس ارجوكم حد يجاوبنى لانى محتارة جدا ومحتاجة اجابات على الاسئلة ديه لانى عايزة اكتبها فى الرغبات ان شاء الله

علاج طبيعى ان شاء الله و هقولك كل حاجة حالا

بس الله اعلم لسه التنسيق هيجيبلك ايه ربنا يسهل

اولا المواد الى بندرسها فى سنة أولى 13 مادة ((عارف انهك كتير و اكبر من منهج بشرى فى أولى كمان بكتير)) انت بتدرسى 4 مواد من بشرى :-

تشريح .... مقارب لبشرى جدا جدا جدا ما عدا الاعضاء الداخلية هما بيدرسوها تفصيلا شوية
علم وظائف الاعضاء..... بس برده منهج بشرى اكبر هنا بشوية حلوين
علم الانسجة... و كتابنا فى اولى قد بشرى بالظبط بس الفرق ان دا منهج الهستولوجى كله بتاعنا هما نص منهج و لسه هيكملوا فى تانية
علم الكيمياء الحيوية ... و برده مختصرة شوية

هما مختصرين عشان احنا لسه عندنا مواد كتيييييييير جدا :-
مواد علاج طبيعى زى : علاج كهربى و دى من اشهر مواد الكلية ...Electotherapy و دى عبارة عن علاج بالموجات زى الاشعة تحت الحمراء و فوق البنفسجية و الموجات فوق الصوتية و المغناطيس و الليزر و موجات الصوت و الكهرباء و الكهرباء ليها انواع كتير بس مش جلسة كهرباء بتوجع و تموت هههههههه لا دا عادى ... يعنى من الاخر المادة دى اساسها فيزياء و بعد كدا بندرس تأثير الجهاز على الجسم (فسيولوجى) و بنستفيد من ال(اناتومى او التشريح) انك تعرف المكان الى هتعاجله دا عامل ازاى ...

علاج مائى Hydrotherapy: و دا برده بيدرس اساس فيزيائى و هو عبارة عن دراسة استعمالات الماء فى العلاج زى قاعدة ارشميدس و مبدأ باسكال و غيره فى تخفيف وزن الجسم فى الماء و عمل تمرينات عشان مثلا الناس الى عندهم شلل .... و بتدرس برده تأثير الحرارة و البرودة على الجسم ..

فى مادة ثالثة بنستخدمها عندنا فى العلاج و دى هتاخديها فى تانية لو دخلتى جامعة القاهرة : التمارين العلاجية Therapeutic exercises و دى عبارة عن مادة اسمها تمارين علاجية استخدام التمارين فى العلاج.....

برده من المواد الى هتدرسيها فى تانية (دا على حسب منهج الجامعات الحكومية) : الميكانيكا الحيوية Biomechanics و دى بنطبق قوانين الميكانيكا على الجسم او يعنى بنعرف استجابات الجسم و القوة و المقاومات و دى بتفيدنا جدا عشان نعرف الخلل فين و نعالجه ...

من مواد اولى زى قوانين و اداب المهنة و مبادىء الجودة

مواد من علوم زى : الفيزياء الحيوية Biophysics and Biology .... الاحياء دى بتدرسى فى حاجات بسيطة كدا او معلومات عامة .... انما الفيزياء الحيوية مهمة عشان تفهمى الكترو و هيدرو اكتر

((اصلا معظم كليتنا فيزياء او اساليب العلاج يعنى و من هنا جه اسم علاج طبيعى او علاج فيزياء على اساس ان علم الطبيعة هو الفيزياء))

فى مواد من اداب زى : علم النفس psychology

و كمان هتدرسى كمبيوتر ( ويندوز سفن-وورد-اكسل-بوربوينت-اكسس-انترنت)
و فى كمان اللغة الانجليزية(دى عبارة عن دروس و معلومات عامة و شوية جرامر صغيرين و مصطلحات طبية و سفكس و برفكس عشان تتوقع معنى الكلمة من غير ترجة)

file:///C:/Users/ALX/Desktop/1001395_607268825984743_1110225128_n.jpgfile:///C:/Users/ALX/Desktop/1175298_607268829318076_1553643504_n.jpg

دى مواد الدفعة الأولى

file:///C:/Users/ALX/Desktop/1175298_607268829318076_1553643504_n.jpg

التخصص : دا بتبدأى تدرسى الاقسام من سنة ثالثة و دا على حسب النظام الحديث ((الى هو 6 سنين))
و تقريبا بقت سنين العملى الى هى الشغل فى المستشفيات من سنة ((4)) تقريبا ...

انما عشان تتخصصى بتاخدى الماجستير زى بشرى و بالظبط ... و فى كمان الدكتوراة الفلسفية الى بعد الماجستير ... و عندنا دلوقت شهادة متطبقة من السنة دى اسمها ((الدكتوراة المهنية dpt)) دى بقى بناخدها بعد التخرج و دى على سب اجتهادك الشخصى ((من 2 ل 5 سنين بس المفروض انها بتخلص فى 2))

يعنى مجمل عدد السنين يعتبر 8 سنين انما انت بتاخدى الشهادة دى و انت متوظفة ... و دى بتدليك حق فى((التشخيص و كتابة الروشته)) يعنى دكتور العلاج الطبيعى مميز كدا عن كله لأنه ((بيشخص+بيكتب روشته+بيعالج))

كلية العلاج الطبيعى مش بتحتاج اى معادلة لأننا و بعد تطبيق الدى بى تى معادلين للشهاى الامريكية فممكن تسافر على طول من غير معادلة ... و زى ما قلت التخسيس دا مش قسم دى حاجة كدا بتتاخد زيادة بعد سنين الكلية و انت و مزاجك انما احنا عندنا 6 اقسام الى هما

1- قسم العلوم الأساسية للعلاج الطبيعي:دا بيهتم بدراسة المواد الاساسية زى التشريح و وظائف الاعضاء و باقى مواد طب و علاج كهربى و علم الامراض و غيرها...

2-قسم الميكانيكا الحيوية: بيدرس ميكانيكية الجسم و حركته و استجاباته و كدا ...

و اول قسمين دول مش اقسام تخصص دول بيساعدوا الطالب فى الكلية بس


3-اضطرابات الجهاز العصبي والعضلي وجراحتها(قسم الاعصاب):و دا بيهتم بمشاكل الاعصاب و علاجها زى الشلل النصفى و الرباعى و الرعاش و غيرها و امراض كتير جدا فى الاعصاب ملهاش الا علاج طبيعى

4-قسم العلاج الطبيعى لاضطرابات مراحل النمو والتطور وجراحتها عند الأطفال(قسم الاطفال):و دا بيهتم بعلاج الاعقات الجسدية عند الاطفال بشكل جزئى او كلى

5-قسم العلاج الطبيعى لامراض الجهاز العضلي والحركي وجراحتها(العظام) : مشاكل العظام زى خشونة المفاصل و هشهة العظام و انخلاع الكتف و غيرها كتير ... و مشاكل العظام بعد الجراحة

6-قسم الجراحة و الحروق (التجميل و الجلدية): و دا بيهتم بعلاج مضاعفات بعد الجراحة و بيمنع حدوثها و مشاكل الجلدية بنعالجها بالاشعة فوق البنفسجية او الليزر زى حب الشباب و الصدفية و الاكزيما و غيرها ... غير لو فى حرق و كدا ممكن نعالجه بالليزر التجميلى ...

7-قسم العلاج الطبيعى لامراض النساء والتوليد وجراحتها(قسم النساء و التوليد): و دا مشاكل انقطاع الطمث و اللبن و امراض بعد الولادة او مشاكل بعد الولادة او مثلا الولادة القيصرية دا بتتقطع عضلات البطن فاحنا بنحوش اثر القطع دا و بنمنع تكون الكرش ...

8-قسم العلاج الطبيعي لاضطرابات الجهاز الدوري والتنفسي والمسنين(قسم المسنين و الى داخل تحته البطانة و مشاكل الجهاز التنفسى و الدورى): دا بيعالج امراض التقدم بالسن او بيتابعها و منها السكر و الشغط و حاجات كتير جدا و امراض الجهاز الحركى و غيرها ...

-من افضال اقسام التخصص فى الكلية الاطفال و العظام و الاعصاب .. لأننا بعد كدا بندرس عظام و اعصاب و عضلات بالتفصيل عن بشرى بكتير و هو دا اساس شغلنا (مشاكل الجهاز الحركى) ... و العلاج الطبيع فى تقدم مستمر (احنا المركز ال3 عالميا)

و التخصص بيكون ليه تنسيق ... و بالنسبة لدراسة كل قسم لو دخلتى الكلية ان شاء الله ممكن تسألى فى مكان اسمه (وحدة الجودة) فى الكلية هيقولك على كل حاجة .... فى بعض المشاكل لو ربنا اكرمك و دخلتى الكلية لازم تعرفيها ...

اولا فى بعض المشاكل مع بشرى لاننا بقينا بنشخص و كدا و خاصة مجال الطب الطبيعى الى هو كان وظيفته التشخيص بس ... ممكن العملى ميتطبقش كتير و متدخلوش مشرحة كتير بس ممكن بتروجى تحضرى فى القصر العينى هناك لسه برده مش كل الاجهزة موجودة بسبب ضعف الامكانيات هنا فى مصر (ممكن تروحى تدربى فى مركز خارجى) .... الكلية الطبية زى بشرى و علاج و غيرهم صعبة و عايزه مذاكرة جامد خاصة فى اول سنة و كمان اللغة هتبقى جديدة و كدا .... يعنى اول سنة تشيدى حيلك اوى ... و بوجه عام نظام التعليم فى مصر فى الجامعات (قايم على الحفظ) و حفظت تجيب مجموع للأسف انما الفهم (ليكى و عشان لما تتخرجى تبقى حاجة كويسة) ..... و اخيرا مجال العلاج الطبيعى مشكلته الاساسية انه لسه مش مشهور محدش يعرف ايه العلاج الطبيعى اصلا فى مناطق كتير كل الى عارفينه شوية ياما يقولك طب اعشاب ؟! او تخسيس و دا غلط علاج طبيعى يعنى علاج فيزيائى بنستخدم الحاجات الطبيعة فى العلاج و قوانين الميكانيكا و الفيزياء فى العلاج .... اظن دا كل حاجة عن الكلية و ربنا يوفقك و التنسيق يجى كويس لأن احتمال الكلية تعلى الله اعلم هى فى الاخر حكاية عرض و طلب .... و لو حضرتك ربنا وفقك و دخلتى الكلية ممكن تبقى تتابعى معانا على الفيس بعد رمضان على جروب ... Physical therapy- first division -cairo university (2013 2014) .........و دا هنساعد فيه الدفعة الجديدة و ربنا يوفقكم

انما انا نفسى كنت هدخل صيدلة و فضلت علاج طبيعى ... صيدلة عددهم كتر جدا جدا جدا و معدش ليهم دور غير فتح الصيدلة بس او شركات الادوية ... انما علاج انت ليك مركز عالمى و ممكن تفتح مركزين و بتشخص و تعالج و كل حاجة ... انما زى ما قلت الى ناقص المجال هو الشهرة و برده دى ميز ان عدد خارجين المجال قليل جدا جدا جدا جدا عشان كدا فرص الشغل فى المستشفيات و بره كبيرة جدا ... عدد الخرجين كل سنة بيكون بالكتير 2000 او 2000 و شوية على مستوى الجمهوية كلها طب بشرى القصر العينى دفعة واحدة فيها 1500 تخيلى ؟!

حضرتك اى استفسار تانى اخلى على الجروب الى انا قايل عليه فوق ... و انا اسم الاكونت على الفيس نفس الاسم دا بس ان شاء الله نفتح و نجاوب على كل اسألتكم بعد العيد و ربنا معاكم

شكرررراا جدا بجد انت حببتنى فى الكلية جدا واسفة انى تعبتك وخليتك تكتب كل ده هى فعلا كلية حلوة بس المجال نفسه ناس كتير مش تعرفه

تمام اى حاجة تانية ما دام انت داخلة الكلية احنا ان شاء الله هنكتب كل حاجة عن مواد الكلية و الدراسة و حتى شرح دروس على الجروب الى عندى فى التوقيع ابقى ادخلى على الجروب و ربنا يوفقك

الكلية كويسة ومجال شغلها كويس فمجال تاهيل الاصابات وتاهيل امراض الجهاز العصبى وتاهيل ذوى الاحتياجات الخاصة وكتير من زمايلنا بيشتغل فمجال التخسيس والسمنة والنحافة ...هو كمستقبل كويس جدا ونسا كتير متعرفهاش لانه مجال جديد فمصر وديما الجديد له المستقبل ...بس نصيحة بقى اخوية وبدون اى انحياز انتى ك female صيدلة احسنلك ...لانها مش مرهق بدنيا زى العلاج الطبيعى الا لو اشتغلتى ريب وابقى طمنينا وقوليلنا جالك ايه