بسم الله الرحمن الرحيم
الكلام ال هكتبه النهارده لن يكون على هوى أغلب الطلاب و لكنّه الحق
الكلام دا مهم جداً و ياريت ال يقرا الكلام يكمله للآخر
فكرة الثانويه العامه عندنا فكره سيئه من بدايتها و التعليم غلط جداً و طريقة الإمتحان غلط و ان كل واحد يدخل الكليه بسبب المجموع ال جابه بس غلط غلط غلط
بس المشكله فين ؟
المشكله اني بدخل الثانويه العامه و انا عارف النظام دا من البدايه و برتضيه لنفسي و اعيش فيه و اجي ف النهايه الوم الدوله
هي الدوله فعلاً عليها الكثير من اللوم على عدم تصويب طريقة التعليم بس الحاجات ال زي دي محتاجه ناس بيفهموا في التخطيط و أكيد الأستاذ سيسي بتاع انتو نور عينينا و مسافة السكه اكيد ميفهمش في التخطيط
الحاجات ال زي دي هتاخد سنوات عدة
بس ال عاوز اقوله
الطالب بيدخل الإمتحان لو لقاه سهل و حل كويس بيطلع طاير من الفرحه
لو لقاه صعب او طويل يطلع يسب للوزارة و المستشار ال وضع الإمتحان
يا حبيبي انت وهو وهي ماهو دا كله مترتب ع بعضه
انت استفدت ايه ان الإمتحان جه سهل و انت حليت كويس
بس خد في بالك انك مش انت بس ال حليت كويس لأ دا في ناس كتيييييير حلت كويس عشان الإمتحان سهل
و بالتأكيد مش هينفع كلكم تدخلوا طب و هندسه يعني !
فبالتالي تلاقي نفسك جايب مجموع كبير و ملحقتش هندسه او طب فتقول المشكله في الوزاره
لأ اعذرني المشكله المرادي فيك انت
انت ال مبتبصش للمشهد من بره و بتاخد كادر واحد من الصوره و تعمله زوم و تشوف مصلحتك فيه بشكل مؤقت
مبتبصش لقدام
و على النقيض الإمتحان لو جه صعب تطلع تشتم للوزير و نفس المستشار تاني :d و تطالب انهم يحذفوا بعض الأسئله من الامتحان "الأسئله الصعبه طبعاً" ال هي المفروض تفرق الطالب الشاطر عن المتوسط
او ال فاهم عن ال حافظ
و بالتالي ترجع تاني الدرجات تزيد فالتنسيق يرفع
ال عاوز اقوله ان في علاقه بين الامتحانات و التنسيق
ومينفعش اننا نتجاهلها
الإمتحانات جت سهله و انت جيبت مجموع كبير التنسيق هيرفع
الإمتحانات جت صعبه و انت جيبت مجموع قليل التنسيق هيقل
بس انت محتاج انك تفكر بس مش اكتر
انا لسه قاري تعليق من أب مكلوم على بنته ال ملحقتش المرحله الأولى عشان كانت جايبه 96.12% و المرحله الأولى خدت من 96.34%
و بيقول طيب ليه منزلتوش المرحله الأولى ل 96%
انا متفهم احساسه و الله كأب خايف ع بنته و ع تعبه هو نفسه معاها
بس اصل دي مش بطاطس هنفاصل فيها
الكليات ليها حد اقصى للإستيعاب و زودوه مره واحده سنة الثوره ال هي الدفعه بتاعتي
بس مش هينفع كل سنه تزيد
يعني يا فرحة امي بيا لو دخلت كلية طب و في الآخر من كترة العدد اترفع عننا التكليف و ماشتغلتش و ممعاييش فلوس افتح عياده
يافرحتها بيا وانا قاعد جنبها في البيت أقلملها الباميه!
عندنا في هندسة في قسم حاسبات
المعيد بتاعنا واحن ف اعدادي كان بيقولنا ان رئيسة القسم رافضه تاخد في القسم اكتر من 60 طالب بس!!
في وسط كليه عدد الدفعة بتاعتها بيوصل ل 2000 طالب احياناً و هي 10 اقسام
يعني بتاخد حوالي 3% بس من طلبة الكليه
فبيسألوها ليه بتاخدي العدد القليل جداً دا من الطلبه ؟
بترد عليهم بتقولهم انها خايفه ييجي يوم من الايام طالب يتخرج من القسم و ميلاقيش شغل فيلوم و يكره القسم ال دخله و ال هي بتنتميله طبعاً
فعاوزه عدد تكون ضامنه ان سوق العمل هيقبله كاملاً و كله يشتغل شغل مرتاح
ال عاوز اقوله في النهايه
نظام التعليم فاشل
نظام التعليم بيبرز ال حفظ اكتر من ال فهم
و دي حقيقه يعني
بس احن كلنا ارتضينا بالنظام دا قبل دخولنا له
منجيش بعد ما لقينا ان مجهودنا لم يؤهلنا لما تمنينا نروح نبدأ نرفض دلوقتي ف نظام التعليم!
متأخر جداً يعني الموقف ال بتاخده دلوقتي
دلوقتي المفروض تشوف حلول بديله
إبدأ بدل ما تشوف المجتمع شايف ايه الكليات الافضل
لأ شوف انت جواك ايه الحاجه ال بتميل ليها
انا مثلاً دخلت هندسه و كان نفسي ادخل اقتصاد و علوم سياسيه او اعلام
و كنت جايب مجموعهم عربي و لغات كمان
بس أهلي رفضوا
وبعدين بعد مادخلت هندسه
قولت ياريتني اصريت عليهم و دخلت الكليه ال انا حاسس اني هبدع فيها بجد
شوف نفسك أصلح في ايه و اشتغل فيه
فكر بإيجابيه
متسيبش نظام التعليم يحبطك و يحولك من طالب متفائل صالح لواحد كل آماله في الدنيا ضاعت
رب صدفة خير من ألف معاد

جالك هندسه وانت من علمي وكنت عاوز سياسه _كنت دخلت ادبي احسن_

كلامك صح بس المشكلة في التعليم يعني انا جايب مجموع عالي معرفش استهله ولا لا يعني انا كنت نفسي الامتحانات تيجي صعبة عشان لما ادخل كلية كويسة ابقي استحقها اما انا شايف كله جايب زي بعضه وفي ناس انظلمت

جالك هندسه وانت من علمي وكنت عاوز سياسه _كنت دخلت ادبي احسن_
لأ بس اقتصاد و علوم سياسيه و إعلام بيقبلوا من علمي عادي بس بمجموع أعلى
يعني اقتصاد و علوم سياسيه كانت واخده من 97% تقريباً و اعلام من 95% في حين إن اعلام في ادبي كانت واخده من 92.5% ع ما اذكر
انا كنت داخل علمي عشان مش هنفع في ادبي ماعرفش احفظ تاريخ و بتاع وكده مش اكتر

كلامك صح بس المشكلة في التعليم يعني انا جايب مجموع عالي معرفش استهله ولا لا يعني انا كنت نفسي الامتحانات تيجي صعبة عشان لما ادخل كلية كويسة ابقي استحقها اما انا شايف كله جايب زي بعضه وفي ناس انظلمت
اولاً الف مبروك ليك و ربنا ينولك ال ف بالك يارب
انا بتفق معاك في كلامك كله
بس احمد ربنا على نعمته و اشتغل على نفسك عشان تحقق ال عاوزه بإذن الله
ربنا يكتبلك التوفيق و الجميع بإذن الله

كل واحد بياخد نصيبه ف الآخر وانا والله راضيه بنصيبى
بس بيصعب عليا تعبى ومزاكرتى مش اكتر..
وفى الاخر ربنا بيقدم ال فيه الخيرر..
وفعلا زى ما انت قولت افرض دخلت كليه عاليه ومنفعتش فيها اصلا..ربــــنا يسهل

كل واحد بياخد نصيبه ف الآخر وانا والله راضيه بنصيبى
بس بيصعب عليا تعبى ومزاكرتى مش اكتر..
وفى الاخر ربنا بيقدم ال فيه الخيرر..
وفعلا زى ما انت قولت افرض دخلت كليه عاليه ومنفعتش فيها اصلا..ربــــنا يسهل
انا متفهم دا والله
بس المشكله ان اغلبنا عواطفه بتسيطر عليه و يحلل الموقف بشكل مش دقيق
و دا سبب كتابتي للموضوع مش اكتر
و ربنا يعينك يارب و يوفقك لكل خير بإذن الله ويعوضك بما هو افضل