كلية التجاره [الأرشيف] - بوابة الثانوية العامة المصرية

vampire1188

16-08-2008, 01:03 PM

هيا عايزالها شوية مجهود مش اكتر بس ..

حاولي تشدي حيلك شوية في السنة الاولانية بالذات .. عشان دي زي مابيقولوا كدا عنق الزجاجة

بالنسبة للترم الاول .. حاولي تطلعي صافي بأي طريقة ومش مهم التقدير

وفي الترم التاني .. حاولي تلعبي على الجيد جدا ..

فالبتالي الترم التاني هايشيل الترم الاول .. وتطلعي صافي وتبقي جايبه جيد على الاقل

دي استراتيجية كويسه في تجارة .. ممكن تعديكي من اول سنة على بال ماتبقي اكتشفتي طريقة التعامل بقي

بس هوا عموما .. مذاكرة طول السنة في الكلية دي ملهاش لازمة نهائيا ..

كل اللي انتي تعمليه .. انك اثناء الدراسة تتابعي المحاضرات وتعرفي انتي عليكي ايه وليكي ايه ..

والدكتور حذف ايه وهبب ايه .. بس .. بعد كدا بقي قبل الامتحانات بشهر ونص كدا .. ابدأي بقي دحي

ودحي جامد .. زي الثانوية العامة كدا

وحاولي بقدر الامكان تبقي سوسة .. بمعني انك ماتعمليش فيها فونط قدام زمايلك وتقولي انا راجعت شابتر كذا النهارده

وذاكرت لحد كدا .. وتعيشي في دور المصلح الاجتماعي .. لا فكك من دا كله خالص !!

اهم حاجة .. انتي وبس .. ونفضي للباقي لإنهم مش هاينفعوكي بعد الدراسة .. لا ولاد ولا بنات ..

خديها نصيحة مني .. اهم حاجة في الكلية دي .. التقدير فقط لا غير .. ولو تعرفي تبقي من النوع اللي بيجري ورا الدكاترة

يبقي شئ كويس برده ..

وربنا معاكي

wanda

16-08-2008, 01:50 PM

كويس معانا خبير هنا
شكررا على المعلومات الجامده ديه
وربنا يكرمك

vampire1188

16-08-2008, 01:58 PM

ميغسي ميغسي مدام واندا

wanda

16-08-2008, 02:04 PM

سورى ممكن تعدل ردك وانا اسفه انى بتكلم معاك

vampire1188

16-08-2008, 02:14 PM

اعدل ردي ؟! ..

حد كلمها دي ؟! .. كل دا عشان قولتلك مدام واندا ؟!

انسه واندا ياستي .. ولا تزعلي ..

وعادي ماتأسفيش ولا حاجة .. مش عايزة تردي ماترديش .. انتي مش مغصوبة على حاجة يعني

وعموما .. سوري ياستي .. معا اني ماعرفش على ايه .. بس سوري وخلاص

wanda

16-08-2008, 04:04 PM

انا مش مغصوبه طبعا
بس الكلام ليه حدود
وبعدين مش معنى انى اتكلمت
ورديت على كلامك انك تعملنى كده
ممكن تكون بتهزر معرفش نيتك بس كلامى كان واضح
ومش عارف تتاسف على ايه انا مطلبتش غير انك تعدل ردك وبس

!DreAmeR!

16-08-2008, 04:17 PM

خلاص يا وندا خلاص يا فامبير يا جماعة مش كانت كلمة اتقالت يعنى انا بتا سف بالنيابة عنه يا ستى انا اسف

wanda

16-08-2008, 04:23 PM

متتاسفش اصلى كل اللى قولته انه يغير الرد
بس مقولتش حاجة تانيه وانا معرفش نيته ايه يا خالد
وبعدين انا ممكن ببساطه اطلب من الادارة حذف الرد كله
بس ..

!DreAmeR!

16-08-2008, 04:33 PM

معلش خلاص هو مش كان قصدة حاجة معش عشان خاطرى انا اعتبرية اخوكى الكبير

wanda

16-08-2008, 04:39 PM

مفيهاش حاجة انه يغير ردة
انا معرفش نيته ايه وهو طبعا اخويا الكبير
بس يغير ردة بردك
وشكرا يا خالد على زوقك

!DreAmeR!

16-08-2008, 04:43 PM

عادى انت ز اختى برضه وفرفشى بقى كده خلاص الموضوع اتقفل اوك
ربنا معاكى انا برضه رايح اولى تجارة انتظام بس الزقازيق

wanda

16-08-2008, 04:55 PM

ولا كأن حاجة حصلت والموضوع مقفوله ولو عايز الردود تتشال اوك
مفيش مانع؟؟
وربنا يوفقك

gygy_love 2008

16-08-2008, 05:25 PM

vampire1188

17-08-2008, 01:46 PM

موضوع ايه يا انسه wanda ؟!!

انتي بتعملي مشكلة من لا مشكلة ؟!

قولتلك اسف .. ولو ان الموضوع اصلا مش يستحق اسف اوي ..

بس اهو لتاني مرة بقولك اسف اهو قدام الناس كلها .. دا مجرد كنت بهزر .. ماعرفش انتي قفشتي قوي كدا ليه ؟

واعتبريني مش موجود اصلا !!

اما لنسبة للايميل .. فأظن ان المنتدي مش هايحط خاصية تبقي متاحة للجميع .. وفي نفس الوقت تبقي ممنوعة !!

ما البشر كلللللهم حاطين ايميلاتهم .. وكدا كدا دا شئ اختياري ..

يعني براحتي احطه او محطوش .. مش سيادتك اللي هاتقوليلي احطه ولا لأ ..

ومعا ذلك .. انا بحترمك وبحترم جميع الاعضاء اللي في المنتدي دا ..

ولو انا مش بحترمهم .. ماكنتش دخلت وتابعت اصلا ..

واسف على الازعاج ..

vampire1188

17-08-2008, 01:50 PM

بجد شكررااااااااا على اهتمامك بيا معلومات او مذكرات بديها واحياني بيكون على حساب وقتى انا والله ومتستغربش انا كده والله

العفو يا جيجي .. احنا في المنتدي دا كل واحد بيساهم باللي يقدر عليه

واللي عارف حاجة بيقول اللي مايعرفش ..

وانتي اساسا كدا كدا هاتعرفي دا كله .. بس زي مابيقولوا كدا استفيد من خبرة اللي قبلك

عشان ماتقعش في الغلط ..

واي حاجة انتي عايزاها عن كلية التجارة او معلومات او مواد او اي شئ ..

انا موجود .. وفيه برده العضوه 3ola تقريبا موجوده .. وفيه nada

يعني في ناس كتير .. مش هايتقصر عليا انا بس

اي حاجة احنا في الخدمة ..

وربنا معاكي ويوفقك في الكلية المخنقة دي ! :p

!DreAmeR!

17-08-2008, 01:55 PM

vampire1188

17-08-2008, 01:58 PM

خلاص يا جماعة الموضوع تقفل ومش لازم نعطى الموضوع اكتر من حقة وخلاص نور قفلت الموضوع وكل حاجة انتهت اوك فامبير

خلاص اتس اوكي يا عم خالد ..

مافيش اي حاجة .. الموضوع عدى

!DreAmeR!

17-08-2008, 02:53 PM

اوك ثانكس يا مان

gygy_love 2008

17-08-2008, 07:36 PM

ربنا معانا ويوفقنا كلنا

wanda

17-08-2008, 08:19 PM

الموضوع عدى يا عم من زمان
معلش اصلى مكنتش فاهمة نيتك طالما نيتك سليمة متتاسفش
وقولى نور عادى من غير القاب اوك
وانا مش بقول حاجة بس ديه قوانين المنتدى
وانا مليش دعوة بس لازم انى احزر اى حد علشان انا مكونش غلطانه
وانت انسان محترم وانا مقفشتيش بس مش واخدة على كده
وخلاص
وانتوا حريين تعملوا اللى تعملوة
بس ديه قوانين وده لينك القوانين

http://www.thanwya.com/vb/showthread.php?t=29810
فيه ممنوع كتابه ايميلات فى الردود ولا لاءولا انا غلطانه لو غلطانه قولى غلطانه
ونو بروبلم انت على فكرة اللى كبرت الموضوع
وانا بردى كبرته اكتر والموضوع منتهى ومش هنفتحة تانى
لو اضيقت منى او زعلت من كلامى نو بروبلم بردك
وانا مش هقول اسفه علشان متخدهاش بحساسية
بس هقول عملت دليت للموضوع واتمسح كانه مش موجود اصلا فى مخى
يلا سلام

ميدو الرومانسي2010

18-08-2008, 11:46 AM

هااااااااااااااااي wanda متزعليش اكيد vampire بيهزر والله وانا اسف كلنا يا جماعه كليه واحده وكلنا زمايل مينفعش نزعل من بعض

ميدو الرومانسي2010

18-08-2008, 11:48 AM

هااااااااااااااااااي نور اي خدمه اقدر اعملهاااااا

vampire1188

18-08-2008, 01:19 PM

خلاص ياستي مافيش مشكلة والموضوع منتهي .. وماحدش زعلان من التاني

اما بخصوص الايميلات .. فانتي برده فهمتي غلط !!

المنتدي مانع وضع الايميلات اللي بتبقي في الردود .. لكن اني احط الايميل في البروفايل بتاعي دا مش ممنوع

وماظنش اني حطيت ايميل في اي رد من ردودي قبل كدا .. وانا عارف القوانين كويس سواء في المنتدي دا او اي منتدي تاني

وماتنسيش اتفاقنا .. وردة خضرا وتيشيرت اصفر .. هاااااااااا !!

wanda

18-08-2008, 04:23 PM

مقولنا معنديش تيشيرت اصفر
بس هعملك باى هههههههه
قدم مدرج العيوطى طبعا:p
لاء يا ميدو ثنكس بس عايزاك تجبلى وردة خضرا هههههه
اه صحيح يا جماعه محدش يعرف الدراسه بتاعت الجامعه امتى
علشان اروح ادفع المصاريف واعمل الكارنيه؟؟؟
بعد العيد ولا هتبدى قبل العيد واحنا هنستهبل ونروح بعد العيد:D

vampire1188

18-08-2008, 05:34 PM

لا والله .. مالييش دعوة .. اتصرفي في اي تيشيرت وخلاص

الدراسة ياستي هاتبدأ رسمي 20 سبتمبر .. عاااادي جدا

الدراسة الفعلية بقي.. بتبدأ من بعد العيد طبعا

بس زي مانتي مش عارفه ان الاسبوع الاول دا بيبقي بتاع التعارف

اما عن المصاريف والكارنيه .. فعادي .. المصاريف بتدفع في اول السنة مش شرط دلوقتي يعني

بس اه قبل مانسي عشان ماتتسوحيش في الاول وانتي داخلة الجامعة

في اول يوم تيجي فيه الجامعة .. اوعي تنسي بطاقة الترشيح بتاعتك .. واي اثبات شخصية معاه

ان شا الله حتى كان كارنيه تامين صحي .. والله بتكلم بجد .. عشان ماتتسوحيش وترجعي

wanda

18-08-2008, 08:42 PM

ان شاء الله مش هتسوح انا المرة اللى فاتت واللى قبلها دخلت من غير حاجة
اصل اللى انت متعرفهوش انى ممكن ادخل من غير حاجة علشان عارفينى على الباب
بس من باب المترو وبس معرفش ادخل من اى باب تانى
بس انا مش معايا بطاقه ترشيح ولا حتى كارنيه بس معايا بطاقه تحقيق الشخصيه
وهى مش مكتوب عليها انى فكليه تجارة ولا حاجة ينفع ولا لاء ؟؟؟

vampire1188

18-08-2008, 09:33 PM

لا طبعا ماينفعش .. واساسا مش هاتعرفي تخشي الجامعة من غير بطاقة الترشيح

وكمان مش هاتعرفي تطلعي الكارنيه من غيره .. ولا حتى تدفعي المصاريف من غيره

انا كمان مش عارف انتي قدمتي ازاي اصلا في الكلية من غير بطاقة الترشيح دي !!

اهم حاجة بطاقة الترشيح تكون معاكي اول يوم .. عشان بيقفشوا جامد في جميع البوابات بتاعة الجامعة

من اول مترو مرورا بتجارة فاداب فالباب الرئيسي

اهم حاجة يكون معاكي بطاقة الترشيح .. وبطاقتك الشخصية .. وكدا تخشي وانتي كوول اوي

اما غير كدا .. هاتتذلي بقي من باب لباب !! وكل واحد يقولك الباب التاني .. وانتي هاتبقي اول يوم ومش ناقصة !!

wanda

18-08-2008, 09:56 PM

مهما اخدوا بطاقه الترشيح فى التقديم
اعمل ايه بقى اطلع واحدة تانيه يعنى ؟؟؟
ولما دخلت دخلت مع اخويا وحتى اخويا دخلت من غير كارنيه
هو اعمل ايه يعنى معرفش بطاقه الترشيح بتاعتى لسه ممكن تطبع تانى ولا لاء ؟؟

vampire1188

18-08-2008, 10:13 PM

والله انا مش عارف بقي ايه النظام الغريب دا ..

بس اكيد يعني مش هاتبقي مفتوحة سداح مداح كدا اول السنة !!

السنة اللي فاتت عاملونا على هذا الاساس .. وكنت مهدد والله اني ارجع البيت اول يوم

بسبب اني ماكانش معايا غير جواب الترشيح وبس .. ومكتانش معايا اثبات شخصية .. ماكنتش لسه طلعت البطاقة

مش عشان صغير .. عشان كنت مكسل اعملها .. حاكم انا عارف دماغكوا !!

بس الحمدلله ربنا رزقني بجاري كان رايح معايا اتصرف ودخلني اول يوم والحمدلله

اما عن ان اخوكي دخل معاكي عشان تقدمي فدا عادي

في الاجازة بيدخلوا اي حد طالما كان داخل الصبح .. لكن لو عدت الساعة 2 الظهر .. بيقفشوا بقي ..

في اي باب من الابوب سواء مترو او تجارة او اداب

بس عموما انيل باب يتدخل منه بجد .. هوا الباب الرئيسي !! ..

او ماعكيش الكارنيه او نسيتيه في يوم وعايزة تخشي من الرئيسي يستحسن تلفي من اي باب تاني

لإني مش هايدخلك .. والله لو حطيتيله 100 جنيه .. برده مش هايدخلك ..

انا قولتلك خبرتي .. وانتي حرة

بس تقريبا انتي المفروض كنتي تاخدي بطاقة الترشيح تاني .. مش تسيبيهالهم

مش عارف بقي .. ايه النظام في الحالة دي .. I don't know ..

wanda

19-08-2008, 12:28 AM

اوك يا فامبير انا هاحول اطلع واحدة جديدة وربنا يستر

!DreAmeR!

19-08-2008, 01:14 PM

فامبير البطاقة تنفع لوحدها ولا لازم بطاقة الترشيح معاها

ميدو الرومانسي2010

20-08-2008, 08:05 AM

يا عم انتا وهي خلاص

vampire1188

20-08-2008, 03:32 PM

لازم بطاقة الترشيح .. واي اثبات شخصية ..

عشان في اول يوم دايما السكيوريتي بتوع الجامعة بيغتتوا جامد ..

عشان الجامعة بتبقي زحمة في اليوم دا جامد

فمنعا لنظام الغتاته دا .. حاول تجيب اي اثبات وتخلص نفسك

wanda

20-08-2008, 04:58 PM

كويس كده انا طبعت بطاقه ترشيح جديدة
على الله يبقالهم حجة تانيه
وكمان مطلعه البطاقه الشخصيه من زمان وهخودها ان شاء الله معايا

بس اللى مطلعوش بطاقه شخصيه لسه يجيبوا معاهم ايه
شهادة الميلاد مثلا ؟؟!!

vampire1188

20-08-2008, 05:12 PM

هههههههههههه .. اتريقي اتريقي !!

انا مالي .. مسيركوا تمروا باول يوم وتشوفوا بنفسكوا

wanda

21-08-2008, 09:55 PM

مش بتريق والله
هما زميلى مطلعوش بطاقه
يدخلوا ببطاقه الترشيح وايه معاها
ولا بطاقه الترشيح كفايه ؟؟!!

ميدو الرومانسي2010

21-08-2008, 09:55 PM

هاااااااااااااااااااااااااي wanda

wanda

21-08-2008, 09:58 PM

ازيك يا ميدو عامل ايه هو انت فى تجارة القاهرة معانا ؟؟!!

ميدو الرومانسي2010

21-08-2008, 10:07 PM

wanda لازم تصوري البطاقه وشهلدة الميلاد عند التقديم

ميدو الرومانسي2010

21-08-2008, 10:13 PM

لسوء الحظ لا يا wanda لان انا تجاره الزقازيق بس احنا لازم نكون اصدقاء ولا ايه رايك

ميدو الرومانسي2010

21-08-2008, 10:18 PM

فينك يا واندا وايه رايك

super_adam888

21-08-2008, 11:03 PM

المفروض هي مركز هام جدا في المجتمع لانها تشكل هيكل العمل في جميع المجالات وهو الجزء الاداري المحاسبي الذي يمكن بفشله تفشل مؤسسة او تنجح بعمل هذا النظام

لكن المشكلة ان هذا المركز في مصر يخلو تماما من اي نوع من انواع النظام
لكن اتمنى ان تكوني انتي من قائدي شعلة التغيير داخل هذا النظام

wanda

21-08-2008, 11:21 PM

اوك يا ميدو واحنا صحاب واخوات طبعااا

انا مصورتش حاجة محدش قالى اهئ اعمل ايه دلوقتى

vampire1188

22-08-2008, 04:04 PM

يا سبحان الله ..

عشان تعرفي بس اني مابقولكيش كلام في الهوا !!

مش هاتعرفي قيمة كلامي دا . الا اما تخشي اول يوم وتشوفي الناس اللي زيك متسوحين ..

ساعتها هاتحمدي ربنا وتفتكريني !!!

wanda

23-08-2008, 01:00 AM

هفتكرك بالخير ديما بس والله انا معرفش حكايه التصوير ديه
طب البطاقه وطلعنا غيرها وشهادة الميلاد مهمة ولا ايه ؟؟!!

vampire1188

23-08-2008, 01:22 AM

لا مهمة ولا حاجة

هاتعملي ايه بيها اصلا ؟

نفضي .. هيا بطاقة الترشيح وبطاقتك وارزعيها في وش بتاع الامن

لو عاند معاكي شوطي فيه .. ولا يهمك .. عشان ساعات بيستظرفوا شوية

wanda

23-08-2008, 02:10 AM

اشوط؟؟!! انت شويه تقولى قومى اتجرئى وزعقى لو حد رغى وراكى
وشويه تقولى اشوط ؟؟!!!!!لاء ان شاء الله خير تفائل خير

vampire1188

23-08-2008, 02:50 AM

لا والله عادي .. هما فعلا بيخنقوا ساعات

بس عادي قضيها الناس لبعضيها !!

انا مرة قبل كدا منعوني اخش .. قال ايه عشان احمد نظيف جوا !!

wanda

23-08-2008, 08:26 PM

احمد نظيف بلا نيله افتكر حاجة عدل وان شاء الله
هتعلم التشرط واشوط وازعق ولا يهمك :D

LA STELLA

24-08-2008, 05:59 PM

يا واندا
تعليقا ع حكاية البطاقة الشخصية اللى اصحابك مش معاهم دى

انا لسة مطلعة البطاقة من قريب لانى مكملة 16 مبقاليش كتير بس
وبتطلع فى وقت بسيط جدااااااااا

دا انا وصلتنى لحد البيت :d

خليهم يمشوا فى الاجراءات يعنى
مش هيخسروا شىء :)
مسيرهم هيطلعوها فى يوم من الايام يعنى مش هيمشوا بدون اثبات شخصية كدة!!!!!

wanda

24-08-2008, 06:23 PM

هههههههههه مهموا عايزين يطلعوها لما يدخلوا الجامعه
علشان يتكتب عليها كليه مش عارفه ايه ؟؟!!
هما حرين انا قولتلهم وهما حرين

LA STELLA

24-08-2008, 06:33 PM

هههههههههه مهموا عايزين يطلعوها لما يدخلوا الجامعه
علشان يتكتب عليها كليه مش عارفه ايه ؟؟!!
هما حرين انا قولتلهم وهما حرين
اه عارفة النظام دا
ما انا مكتوبة طالبة
انا لسة مستلمااها مبقاليش شهر ومتأ:دة ان اصحابك دول اكبر منى فى السن وبفروق توصل لسنة كمان!!!:)
بس هتلاقى اللى هيدخل جامعة
ويقول لك لما اتخرج عشان يتكتب عليها موظف فى مش عارف فين

خليهم بقى بدماغهم دى
هما هيمشوا معلقين البطاقة ولا حاجة كل مصر تشوفها ؟؟

هما حرين فعلا :)

wanda

24-08-2008, 07:49 PM

على رأيك والله ما فرقت يعنى ايه يتكتب كليه تجارة بلا نيله
طالبه احسن علشن الواحد يحس انه لسه صغير هههههه

vampire1188

24-08-2008, 09:12 PM

نعععععععععععم .. تتتعمل في يوم ؟!!

حرام عليكي بجد يا هبة !!

وربنا حرام !! .. دانا طلع عيني عشان اعملها .. والله العظيم تلاته عملتها في اسبوع

عمرك شوفتي حد عمل بطاقته في اسبوع ؟!! .. حرااااااااااااام !!

اما حكاية بقي انها تطلع عشان يتكتب فيها تجارة .. فدي فعلا ليها مميزات

مميزات في ان مثلا مثلا مثلا يعني .. لو لاقدر الله اتسحب منك الكارنيه ولا حاجة

تعرفي تخشي الجامعة بالبطاقة الشخصية دي .. لإنها هايبقي مكتوب عليها فعلا تجارة القاهرة

فيه حاجة تانية برده .. وهيا حكاية التدريب اثناء فترات الاجازة ..

دا طبعا بالنسبة لكليتنا الجميلة تجارة !! .. وهى انك اما بتروحي حتة كويسه

موبينيل .. بنك مصر .. سوسيته جنرال .. اي حاجة من دول ..

عشان تعملي لنفسك الـ Id كارد بتاعتك هناك .. واللي انتي اساسا ماينفعيش تمشي من غيرها هناك

بيحتاجوا البطاقة .. ويكون مكتوب عليها تجارة القاهرة او اسم كليتك على الاقل

الو مش مكتوب بقي .. بتحتاجي انك تروحي الكلية وتاخدي شهادة اثبات قيد وتقعدي بقي تلفي مابين شئون الطلبة للخزنة ومن الخزنة لشئون الطلبة وتروحي لشباك البريد عشان تجيبي طوابع .. ولسه على بال ماتتعمل على الكمبيوتر .. يعني بتاخد وقت شوية

دا غير انها بـ 10 جنيه ..

والله براحتكوا بقي .. بس هي فعلا ليها ميزة انه يبقي مكتوب عليها اسم كليتك

بس عشان تعمليها من كليتك .. بتدفعي 5 جنيه في الخزنة عشان تتختم من الكلية والموظفين يمضوهالك

يعني كدا كدا بتدفعي .. مافيش حاجة في البلد دي تمشي ببلاش ابدا !!

wanda

24-08-2008, 11:34 PM

انا عملتها من زمان بابا واحدة زميلى ضابط بدرجة عقيد
عمالهالى وجاتلى لحد البيت هقول لاء لو هحتاج البتاع ده هعملها اكيد مش هحتاجة يعنى
مش فاهمة ايه لزمته

LA STELLA

25-08-2008, 12:47 AM

a_2007

25-08-2008, 04:04 AM

هاى ياجماعه انا هنا من فترة بس اول مرة ادخل القسم ده انا كمان تجارة واستفادت من كلامكم جدااااااااا
كنت عايزة اقولكم كل سنه وانتم طيبين ورمضان كريم يارب وياريت تقبلونى صاحبتكم

!DreAmeR!

25-08-2008, 10:16 AM

هاى ياجماعه انا هنا من فترة بس اول مرة ادخل القسم ده انا كمان تجارة واستفادت من كلامكم جدااااااااا
كنت عايزة اقولكم كل سنه وانتم طيبين ورمضان كريم يارب وياريت تقبلونى صاحبتكم

اهلا بيكى اختنا الكريمة فى المنتدى ويارب يكون ليكى مشاركات فعالة معانا

vampire1188

25-08-2008, 04:37 PM

انا قلت فى يوم بردو ؟؟

اه بتطلع فى اسبوع واتنين
ومش بتزيد

بس اقصد الفترة مش مستاهلة !!

فترة مش مستاهلة ؟!

ههههههههه

سيادتك انا عشان اعملها عملتها في اسبوع بحاله .. كنت كل يوم اروح السجل المدني عشان اعلمها ويتطلعلي حاجة تخليني اجي اليوم اللي بعده

وبعد مالحمدلله اتصورت .. قالولي تعالي بعد اسبوعين .. روحت بعد اسبوعين قالولي لسه ماطلعتش !!

حاجة بيئة والله !! .. بلد اعوذ بالله عليها ..

vampire1188

25-08-2008, 04:41 PM

هاى ياجماعه انا هنا من فترة بس اول مرة ادخل القسم ده انا كمان تجارة واستفادت من كلامكم جدااااااااا
كنت عايزة اقولكم كل سنه وانتم طيبين ورمضان كريم يارب وياريت تقبلونى صاحبتكم

وانتي طيبة يا a_2007 ..

واكيد يعني صاحبتنا طالما انتي داخلة الموضوع

ماهو الموضوع طبيعي معمول لتجارة القاهرة .. فاكيد لازم تكون عضوة فيه

الا اذا بقي كنتي مش تجارة القاهرة ...

wanda

25-08-2008, 05:00 PM

ِكلها تجارة المنصورة ورمضان كريم وانتى طبعا منورنا
واكيد اصحاب

ميدو الرومانسي2010

25-08-2008, 09:02 PM

ايه اخبارك يا واندااااا

ميدو الرومانسي2010

25-08-2008, 09:12 PM

يا بخت اللي في تجاره القاهره والله بجد

ميدو الرومانسي2010

25-08-2008, 09:14 PM

ممكن اتعرف علي اي حد في تجاره القاهره

a_2007

26-08-2008, 12:02 AM

LA STELLA

26-08-2008, 12:45 PM

فترة مش مستاهلة ؟!

ههههههههه

سيادتك انا عشان اعملها عملتها في اسبوع بحاله .. كنت كل يوم اروح السجل المدني عشان اعلمها ويتطلعلي حاجة تخليني اجي اليوم اللي بعده

وبعد مالحمدلله اتصورت .. قالولي تعالي بعد اسبوعين .. روحت بعد اسبوعين قالولي لسه ماطلعتش !!

حاجة بيئة والله !! .. بلد اعوذ بالله عليها ..
كل يوم ليه ؟
انا رحت مرة واحدة بس ادتهم كل الورق المطلوب واتصورت
وجت لى بعد اسبوعين بالضبط ع البيت
======
شكلك اتبهدلت بسبب البطاقة ، ربنا يعينك
=======

CoMMaNdo

26-08-2008, 12:51 PM

كل يوم ليه ؟
انا رحت مرة واحدة بس ادتهم كل الورق المطلوب واتصورت
وجت لى بعد اسبوعين بالضبط ع البيت
======
شكلك اتبهدلت بسبب البطاقة ، ربنا يعينك
=======

كمان جاتلك على البيت
دا ايه دا
هههههههههه
بصراحه انا زى فايبر
روحت اربع ايام ورا بعض وكل واحد يبعتنى مشوار هنا وهنا
و كل يوم الاقى فيه حاجه
وروحت عشان اجيبها بعد اسبوعين قالو تعالا بعد اسبوع ما علينا بس جبتها الحمد لله

wanda

26-08-2008, 04:16 PM

ايه ده انا عملتها بعد اسبوع واحد بس استلمتها
وكان القسم فاضى خالص اصلى روحت فى وقت
كان المكان بتاع البطاقه مهوى وطبعا مش حظ
بابا زميلتى قالى تعليلى فى اليوم ده
وبعد اسبوع بالضبط جاتلى على البيت

قسم الجيزة على فكرة اللى على البحر

vampire1188

26-08-2008, 04:47 PM

انا فعلا تجارة المنصورة وميرسيى ليكم كتير بس ايه النظام مش هتقبلنىvampire يا صاحبتكم ولا ايه
ان
عض عالموم انا بشكرك انت بالذات شكر خاص لانى استفدت منك بمعلومات رائعه عن كليتنا المصون وبالمرة يعنى انت سنه كام
وعملت ايه فى اول سنه يامان

لا اكيد طبعا نقبلك .. سواء بقي كنتي منصورة ولا قاهرة ولا ان شالله حتى فرع مدغشقر !!

والعفو ياستي على كلامك دا .. بس دا شئ عادي كل واحد في المنتدي دا بيحاول دي خبراته للي بعد منه

عشان الفايدة تعم .. وانا ماعملتش حاجة يعني .. انا مجرد بنبه بس مش اكتر .. لكن انتوا مسيركوا هاتمروا بكدا

اما عن انا في سنة كام .. انا طالع تانية

السنة اللي فاتت تقدري تقولي جيد .. بس ماتفكرنيش عشان انا مش ناقص خنقة

كفاية اللي انا فيه والنبي ..

وعلى فكرة انا اعرف ناس برده داخله معاكي تجارة المنصورة .. بس انجليش مش عربي

على العموم .. مرحبا بيكي في تجارة .. ويارب تكون سنة حلوة عليكي وع الجميع

وكل سنة وانتي طيبة ..

vampire1188

26-08-2008, 05:01 PM

كل يوم ليه ؟
انا رحت مرة واحدة بس ادتهم كل الورق المطلوب واتصورت
وجت لى بعد اسبوعين بالضبط ع البيت
======
شكلك اتبهدلت بسبب البطاقة ، ربنا يعينك
=======

اتبهدلت ؟!!

انا هاقولك يا ستي تفصيليا ايه اللي حصل ..

اليوم الاول .. روحت عشان اجيب الاستمارة

اليوم التاني .. روحت بالاستمارة معايا وهيا مملية .. وانا داخل اكتشفت انهم عايزين شهادة الميلاد معاها

خرجت .. ووقفت في طابور ساعة الا ربع عشان اطلعها .. طلعتها فعلا .. وبكدا يكون اليوم طار

اليوم الثالث .. روحت بالاستمارة وشهادة الميلاد .. ودخلتلهم .. ايه يا جدعان مش هانخلص بقي ولا ايه ؟

لا ازااااي ؟!! .. فين ختم النسر .. مافيش .. روح اعتمدها من كليتك ..

بكدا يوم طار

اليوم الرابع .. روحت الصبح بدري .. اعتمدتها ودفعت 5 جنيه علي الحكاية دي .. وروحت للسجل المدني تاني

ها يا جماعة .. ميه ميه كدا ومتظبطة ..

لا ازااااي ؟!! .. فين الضامن ؟! .. لازم يكونلك ضامن .. ماهو يا جدعان الكلية اهي معتمداها

لا ماينفعش .. لازم الضامن باباك او مامتك او عم خالة اللي جابو ابوك !!

كدا يوم طار

اليوم الخامس .. جيبت بابا .. ها يا جماعة خلاص كدا ؟ ..

لا ازاي ؟! .. الاعتماد بتاع الكلية معمول بتاريخ يومين فاتوا .. ممكن تكون سيادتك اترفت من الكلية خلال اليومين دول بس عشان خاطر الراجل الطيب اللي معاك هانعديهالك !!

طب مش هانتصور بقي ولا ايه ؟ .. لا سيادتك تيجي بكره الصبح بدري عشان تتصور عشان الماكنه قفلت

كدا يوم طار

اليوم السادس .. ها يا جدعان .. عايزين نتصور بقي ..

لا معلش اصل الماكنه باظت .. تعالي بكره !!

اه يا ولاد الناس المحترمة .. يوم طار ..

اليوم السابع .. روحت يا ولاد الناس الكويسة لو ماتصورتش وربنا هاولعلكوا فيها !!

اتصورت اخيرا .. وخدت الوصل .. وتعالالنا يا عم الحاج بعد اسبوعين

اروح بعد اسبوعين .. يقولولي لسه ماطلعتش .. اه يا ولاد اللذينة !!

معا العلم ان انا كنت عاملها اساسا مضطر .. فن ساعتها كانت الشريحة بتاعة الموبايل عندي اتحرقت

فعشان اطلع شريحة عليها .. لازم البطاقة تكون معاها .. عشان كدا كنت عايز اطلعها باي طريقة

وانتي تقوليلي شكلك اتبهدلت ؟!! .. انا طلع عين .. ولا بلاش

خلينا كويسين احسن ..

فعلا .. بلد طوابير بصحيح !!

wanda

26-08-2008, 08:17 PM

كنت اشتريت واحدة جديد
ليه كل ده بس قسم الجيزة بيخلص بسرعه فى يوم واحد
وبعد اسبوع تستلمها انت شكلك عملتها فى العباسيه

bat_man2010

26-08-2008, 08:20 PM

السلام عليكم

wanda

26-08-2008, 09:11 PM

وعليكم السلام هو انت معانا فى تجارة القاهرة واسمك ايه وفى سنه كام ؟

CoMMaNdo

26-08-2008, 09:15 PM

كملت يلا كل يوم يجيلكو واحد
ماشيه معاكو ايه ميه ميه
اوعدنا يارب
شكلى هاحول تجاره
ههههههههههه

wanda

26-08-2008, 09:18 PM

على ايه ديه كله كام يوم وندخل الجامعه
ومش هتلقى حد يعرف حد
هتحسدنا على ايه يعنى عاتى يا عم

ahmed610

26-08-2008, 10:12 PM

السلام عليكم ازيكم يا شباب على فكرة انتو مجموعة حلوة اوى وانا معاكم فى تجارة القاهرة واحتمال ابقى تجارة انجلش ادعولى

wanda

27-08-2008, 12:13 PM

ربنا معاك ...

vampire1188

27-08-2008, 01:06 PM

كنت اشتريت واحدة جديد
ليه كل ده بس قسم الجيزة بيخلص بسرعه فى يوم واحد
وبعد اسبوع تستلمها انت شكلك عملتها فى العباسيه

عباسية ايه بس يا wnada !!

انا عملتها في السجل المدني بتاع بولاق عشان كان جنب الجامعة فبخلص بسرعة

لكن وحياتك عندي .. انا بيتهيألي لو كنت عملتها في السجل المدني بتاع الهرم

كنت خلصت ..

المفروض يغيره يافطة السجل المدني .. ويخلوها .. السجق المدنى !!

vampire1188

27-08-2008, 01:08 PM

كملت يلا كل يوم يجيلكو واحد
ماشيه معاكو ايه ميه ميه
اوعدنا يارب
شكلى هاحول تجاره
ههههههههههه

اقعد انتا نق فيها وبس ..

ناس حقودية صحيح !!

:mad:

wanda

27-08-2008, 07:00 PM

انت هتقولى على بولاق هو انت مخرجتش على المستشفى عدل
ولا خرجت سليم هههههههههه
لا يا عم قسم الجيزة ارحم بكتير على الاقل تحس ان انتا كده
فى مكان هدى مفيهوش حد غير انت والموظف اللى بيعملك البطاقه
واللى بيصورك والباقى بقى كل واحد فى حاله هو فيه طابور فيه حوالى 10
عقبال ميروحوا يصوروا ويجبوا ويكملوا ورقهم ويكتبوا اللى يككتبوه
هيعرفوا يسلم ورقهم ويخلصوا بسرعه انا قعدت هناك مجرد 1 ومشيت

vampire1188

27-08-2008, 07:58 PM

ماهو انا بقي نفسي اعرف 1 دي ترمز لإيه ؟

ساعة ؟ .. ولا يوم ؟ ... ولا اسبوع ؟؟؟

انا معايا ترمز لإسبوع .. بليز اوعي تقولي يوم عشان ماتجيليش علة فوق العلة اللي انا فيها !!

بعدين انا اما عملتها في بولاق كانت عشان هيا قريبة من الجامعة على طول

يدوبك خطوتين وببقي هناك ..

كنت ممكن اعملها في الهرم وكان هايبقي اسرع .. بس كنت هاتبهدل عشان كانت بعيده عليا شوية

بس ماعلينا .. اهي اتعملت وخلاص ..

Miss_CaR!zma

27-08-2008, 08:20 PM

تجاره كليه جميله فعلا وخصوصا لو تجاره انجلش
بس عيبها انك لو مش هتذاكر بضمير حط فى دماغك عباره" خدعوك فقالوا ان تجاره 4 سنين" وخصوصا لو فى المنصوره حضراتكم

a_2007

27-08-2008, 08:50 PM

ليك كده بس ياهند ده احنا الجيل الجديد اللى داخل تجارة بلاش تعقدونا ياجماعه واكيد تجارة مش هتبقى اصعب من ثانويه عامه واللى شوفناه فيها والسنه دى بالذات ولا ايه رايك ؟؟؟؟؟؟

vampire1188

27-08-2008, 08:57 PM

هند مين ؟! .. اللي اسمه هند يا جماعة يرد احسن انا عارفها دي شرانية !!

لا طبعا .. الثانوية دي شر لابد منه .. اما بالنسبة للجامعة فابتبقي استراتيجية التعامل معاها مختلفة

اختلاف جذري ..

وزي ما Miss Car!sma وحلوة اوي رمز التعجب اللي في النص دا .. جديدة برده !!

ززي ماقالت .. خدعوك فقالوا ان تجارة 4 سنين .. عشان ساعتها مش هاتبقي 4

لإنك بمصطلح الكلية كدا .. هاتدبلري .. يعني هاتاخدي السنة في سنتين

سنة تفهمي فيها وتسقطي .. وسنة تذاكري اللي انتي فهمتيه وتنجحي

عجبي عليك يا زمن !!

Miss_CaR!zma

27-08-2008, 09:28 PM

ماكجيفر

27-08-2008, 09:28 PM

السلام عليكم ... أنا في تالتة كلية التجارة جامعة أسيوط ... وبالنسبالي تجارة صعبة علشان المواد الأدبية اللي فيها وربنا يوفق الجميع يا رب .

vampire1188

27-08-2008, 09:34 PM

على فكره انا مش جديده ولا حاجه
انا بتكلم بناء على خبره سنه فى تجاره انجلش واكتر من 3 سنين فى المنتدى ده
المهم انا مش بعقد حد
تجاره اللى مبيذاكرش فعلا مبيعديش فيها
دى البوينت وانا مش شرانيه على فكره
وللا حضرتك قديم وف يوزر جديد..!?

طب كويس .. شكلك كدا تجارة انجليش تانية

طب كويس والله .. انا اعرف ناس داخلة تجارة انجليش عندك .. بس اولي بقي

ابقي شدي حيلك معاهم والنبي ..

بس انتي اه اوكي انا معاكي في الكلام بتاع ان تجارة لو ماحدش ذاكرلها مش هايعدي

بس الكلام دا انا قولته قبل كدا

والاستراتيجية شرحتها قبل كدا .. واكيد انتي معايا في كدا

Miss_CaR!zma

27-08-2008, 09:37 PM

اكيد ده كلام جميل
وربنا يسهل بس ونعمل بيه كلنا بما فيهم اللى بيتكلموا

vampire1188

27-08-2008, 09:46 PM

قولي يارب .. وياتري انتي عملتي ايه بقي السنة اللي فاتت ؟؟؟

wanda

29-08-2008, 06:16 PM

تجارة انجلش نصها بيبقى دخلينها علشان اسمها وبس
انا قدمت فيها مقبلتش حولت انتساب واحتمال ابقى انتساب اول 3 سنين واحول انتظام بأذن الله
وهى فعلا تجارة بكل تخصصتها عايزة مزاكرة مش عايزة طنش ونفض وكده
بس فى نفس الوقت سهله ومش معنى كده تتركن مذاكرتها لقبل الامتحان

ahmed610

29-08-2008, 06:32 PM

عندك حق يا wanda تجارة انجلش اسمها حلو بس انا مقدم فيها عشان الاقى شغل لما اخلص بس انتى لية حولتى انتساب

vampire1188

29-08-2008, 07:35 PM

معلومة غلط على فكرة يا wanda ..

الناس اللي بتفكر صح .. تخش تجارة انجليش ..بس يمكن البروبليم فيها انها مصاريفها عالية شوية

بس من المتعارف عليه انه فعلا مطلوبة في سوق العمل .. واللي يقول غير كدا يبقي راجل دماغه مش موزونه

تجارة انجليش زي تجارة عربي في المنهج .. لكن اللي بيفرق اللغة ..

وسوق العمل بيفضل تجارة انجليش عن تجارة عربي طبعاً ..

================================================== ==

وانا دي يمكن تاني مرة اشوفك فيها يا احمد .. انتا معانا في تجارة القاهرة ولا ايه ؟؟؟

دودو دلوعة اليكس

29-08-2008, 07:39 PM

هااااااااااااااى يا جماعة انا لسا اول سنة تجارة السنة دى ايه نظامها صعبة ولا ايه وع فكرة انا كنت علمى رياضة بس للاسف دخلت تجارة ولو لم ادخل تجارة لوددت ان ادخلها انا اصلا مش شيفا نفسى غير ف التجارة ههههههههههههههه..بس المشكلة ان فى ناس بتقولى انها صعبة يا ترى التجارة صعبة فعلا ولا ايه!!!!

wanda

29-08-2008, 09:26 PM

صعبه على اللى هينام فى الخط وسهله على اللى هيعرف اللى ليه واللى عليه
ويبص على المادة اول باول

وبالنسبه لتجارة انجلش انا مقبلتش فيها اصلا اساسا
حولت بقى انتساب وبفكر اشوف بس اول سنه وبعدين هكرر ارجع انتظام تانى ولا اكمل انتساب

vampire1188

29-08-2008, 10:39 PM

تقرري ؟!!

احلى حاجة انك بتقولي اشوف اول سنة واقرر ..

تقرري ايه بس .. هوا انتي فاكرة انه بمزاجك

دانتي عشان ترجعي لانتظام تاني اصلا .. لازم تطلعي صافي وتكوني جايبه على الاقل جيد

وغالبا مابتتحققش الا اوبشن واحد فيهم ..

بمعني انك ممكن تجيبي جيد .. وتبقي شايلة مادة

او تطلعي صافي وتجيبي مقبول .. الا اذا كنتي بقي من حزب الدحيحة !! :d

wanda

29-08-2008, 10:43 PM

ان شاء الله مش جيد امتياز والاولى على الدفعه بكر تقول
نور قالت وتفتكرنى بالخير متستقلش بيا يا جدع
وان شاء الله ان ناويها جد مش لعب على طول :d

vampire1188

29-08-2008, 10:45 PM

ههههههههههههههههه

بتفكريني بصاحبتك ريناد !!

برده عندها امل انها تطلع الاولي ع الدفعة ..

خليكوا في احلامكوا الهوائية دي !!

wanda

29-08-2008, 10:52 PM

ما احنا هنذاكر مع بعض
وهتشوف يا فامبير

General

29-08-2008, 10:57 PM

كلية التجارة جامعة القاهرة ™ © Faculty Of Commerce Cairo University © ™ (http://www.thanwya.com/vb/group.php?groupid=12)

حاجة كده عشان الحبايب :d

vampire1188

29-08-2008, 11:50 PM

ههههههههههههههه

عارفه يا wanda بتفكريني بمثل ظريف اوي بيقول ..

جيبتك يا عبد المعين تعني .. لاقيتك يا عبد المعين عايز تتعان !!

وداكمان بيفكرني بمثل تاني بس مش هاقوله حفاظاً على الروح الرياضية اللي لازم تبقي جواكي اول ماتخشي الجامعة

شئ طبيعي ان الروح الرياضية دي تروح اما تخلص اول سنة ..

عموما .. ادي دقني اهي ان اتحقق اللي في بالك .. سواء انتي او ريناد !

وبيني وبينكوا انتوا الاتنين سنة دراسية كاملة .. وادي دقني اهي برده ان حولتي من انتساب

مش احباط .. بس اعتبريه تحدي .. وبيني وبينكوا ..

الايام

ahmed610

30-08-2008, 01:31 AM

اية يا عم vampire عمال تعقد فى الناس لية هما الى بيطلعو اوائل احسن مننا ولا اية هو بالمناسبة الاول على تجارة دة بيبقى جايب كام فى المية تقريبا على فكرة انا معاكم فى تجارة القاهرة واحتمال ادخل انجلش قول يا رب

vampire1188

30-08-2008, 01:45 AM

هههههههههههه .. انا مش بحبط .. بس هوادا الواقع

انتا عشان تجيب جيد جدا بس .. لازملك شوية عوامل تتجمع معا بعض عشان تجيب التقدير دا

اهمهم عاملين لازم يتوافقوا معا بعض

مذاكرتك الجامدة .. وان الدكتور اللي بيديك يكون كويس في تصحيحه

ناس كتيييييييييره جدا بتدح في مادة بس للاسف يكون دكتور المادة دا زبالة ومايديش التقدير المظبوط

دا شئ معروف اوي خاصة في تجارة يعني !!

اما الاول على تجارة فدا بيتحسب بنظام التقدير التراكمي العام

بمعني انك في السنة الواحده المجموع بيبقي من 200 .. اضرب 200 في اربع سنين

يعني المجموع كله من 800 ..

الاول السنه دي بتاع شعبة المحاسبة باعبارها اصعب شعبة يعني .. جايب 735 من 800

وهوا واحد على فكرة مش واحده ..

والاول في دفعة المحاسبة انجليش .. واحده جايبه 741 من 800 ..

شوفت الدح ؟! .. يعني لو قسمتها بالمتوسط هايطلع انها كانت كل سنة بتجيب على الاقل كدا

185 .. يعني 92% .. امتياز ..

شوف بقي انتا هاتيجي في دول .. وقولي ..

ولو عايز جدول الاوائل واوريهولك .. عنيا اجيبهولك ..

wanda

30-08-2008, 07:47 PM

بص يا فامبير هقولك حاجة لوجه الله
الدفعه بتاعت سنه اولى السنه دى
طالعين مطحونين من الثانويه
وعاملين تحدى مع نفسهم وده المعظم
قليل اوووى لما تلاقى حد منفض
ام هند:d

ان شاء الله هنجيب تقدير:p

ومش جيد ولا مقبول ان شاء الله:p

vampire1188

30-08-2008, 08:13 PM

معاكي ربنا و 10 ملايكة يحرسوكي !!

او اقولك .. خدي ندي وعلا في خط الدفاع .. باعتبارهم ملايكة يعني !

قال مطحونين قال .. ماكلنا بنتطحن .. عادي يعني نوبروبليم

سيبك انتي من اللي بيتقال مطحونين ولا مش مطحونين .. الكلية غير الثانوي نهاااااااائي

واما يعدي الشهر الاولاني عليكي في الكلية .. هاتفتكري كلامي وتقولي كان عندك حق ..

وتقعدي انتي وريناد على سلم معهد الليزر تعيطوا لبعض

وتقولوا كان يوم اسود يوم مادخلنا الكلية دي !!

wanda

30-08-2008, 08:19 PM

هههههههههههه
لا انا بقولها من دلوقتى كان يوم اسود لما قدمت فى الكليه ديه
ربنا يستر طبعا الكليه غير الجماعه انا قصدى ان فى كتيرر
كان نفسهم فى حاجة تانيه وامالهم اتحطمت فقالوا
هنثبت نفسنا ان شاء الله ونورى للعالم اننا ننفع فى اى كليه
بس هتبقى ارحم شويه من الرعب اللى كان متربلنا واحنا فى ثانوى :p

vampire1188

30-08-2008, 08:43 PM

حلو التفاؤل دا ..

نوري نفسنا اننا قد اي كلية .. ياسلااااااااااااام

ما احلاه كلام .. كلام موزون وحلو وظريف

بس يقتصر على المنتديات وبس !!

ahmed610

30-08-2008, 09:46 PM

كل سنة وانتم طيبين يا جماعة رمضان يوم الاثنين

دودو دلوعة اليكس

30-08-2008, 10:37 PM

هاااااااااااى ميدو طبعا انت عارفنى ايه اخبارك..وايه اخبار التجارة وان شاء الله التجارة حتعلى بينا احنا هو احنا شوية فى البلد ولا ايه..وكل سنة وانت طيب ورمضان كرييييييييييييييييييييييييييييييم

vampire1188

30-08-2008, 11:21 PM

ميدو هاجر من الموضوع خلاص !!

a_2007

31-08-2008, 01:59 AM

هاى ياجماعه كل سنه وانتم طيببين وعلى فكرة ياواندا انا معاكى جدااااااااااااااااااااااا وان شاء الله هنعمل احلى شغل فى تجارة وربنا مش هيخذلنا لاننا بجد اتبهدلنا وربنا هو اللى عالم باننا تعبنا بجد وان شاء الله خير وهنبقى من الاوائل كمان ونغيظ فامبير يا وانداا

wanda

31-08-2008, 04:30 PM

شوفت بقى يا فامبير مش بحلم ولا حاجة
وكل سنه وانتم طيبين رمضان بكرة :p

vampire1188

31-08-2008, 06:51 PM

وانتي طيبة

بس برده مش هاتعرفي تجيبي التقدير

وادي دقني لو عديتي من انتساب !!

!!!دمعة حزن!!!

31-08-2008, 07:01 PM

حرام عليك يافامبير انا انتساب قول ان شاء الله اجيب تقدير
عشان لما انجح فى تجاره
اصل انا مش اول مره ادخل جامعه

رمضان كريييييييييييييييييييييييييييم

a_2007

31-08-2008, 11:28 PM

رمضان كرييييم ياجماعه وان شاء الله بنا هيكرمنا بالعند فيك يافامبير
ونغيظك انا وواندا هى الاولى فى جامعه القاهرة وانا فى جامعه المنصورة

LA STELLA

31-08-2008, 11:51 PM

رمضان كرييييم ياجماعه وان شاء الله بنا هيكرمنا بالعند فيك يافامبير
ونغيظك انا وواندا هى الاولى فى جامعه القاهرة وانا فى جامعه المنصورة
ان شاء الله ربنا يوفقكم
----
بس هى ليه كل الناس المقبلة على الكليات- مهما كانت الكلية- عندها حماس وتفاؤل بانهم يطلعوا الاوائل مش يجيبو تقديرات وبس الا انا
عندى احساس بانى فاشلة فى الكلية دى ومش ادها !!!!

:d
ربنا يستر
==========
ربنا يزيدكم حماس وتفاؤل ان شاء الله والحماس دا ميضيعش ، لا يزيد ان شاء الله
ويوعدنا احنا كمان :rolleyes:

vampire1188

01-09-2008, 12:40 AM

وحياتكوا عندي ماهاتجيبوا تقديرات .. وانسوا !!

هيا ان شاء الله hkk-happy اللي هاتجيب ! .. وماتسألونيش ليه

احساس مش اكتر ..

الناس الدحيحة بتبان من ردودها .. وانا شايف ان بقية الناس مش باين عليها يعني !

ماتخافيش يا hkk-happy .. انا مش بنق ولا حاجة ..

وكلكوا مقبوووووووول باذن الله ..

وكل سنة وانتوا طيبين ..

LA STELLA

01-09-2008, 12:50 AM

هههههههههه
تصدق ضحكنى الكومنت بتاعك فى وقت الواحد كان شايل هم الدنيا فوقيه

هيا ان شاء الله hkk-happy اللي هاتجيب ! .. وماتسألونيش ليه
آآآآآآآآآآآآآآآآآآآمين

احساس مش اكتر ..
يارب يطلع احساسك صح لانى مرعوبة بجد

الناس الدحيحة بتبان من ردودها ..
دحيحة ؟؟ :d
من اى نوع؟
لو قصدك انى غاوية اقعد ع الكتب واحفظ وادش بنغير ما افهم وكدة فدا مش حقيقى
انا عموما ايام الامتحانات كنت ببقى اون لاين عادى :d

وكما متقفلهاش فى وش اخواتنا كدة
اديهم امل :d
ارفع روحهم المعنوية زى رفعت روحى المعنوية شوية

بلاش احباط :d

وكل سنة وانتوا طيبين ..
وانت طيب وبالصحة والسلامة

vampire1188

01-09-2008, 01:11 AM

احباط ؟؟ ..

مين بينده يا جماعة ؟!

على فكرة يا hkk-happy انا كنت بهزر !!

انتي كمان هاتجيبي مقبول باذن الله ..

والشلة كلها هاتجيب مقبول بعون الله ..

اي حد هنا في الموضوع دا .. اخره كدا جيد ..

وبعدين احنا مش قاعدين معا بعض ؟ .. بيني وبينكوا السنة ..

ولا لأ .. سنة ليه ؟ نروح بعيد ليه ؟ .. بيني وبينكوا نص السنه

اما بالنسبالك يا hkk-happy .. بيني وبينك نتيجة اول كورس تخلصيه ..

ان الـ GPA بتاعك ماتجاوزش الـ 2.5 بوينت .. مابقاش انا !!

wanda

02-09-2008, 08:22 PM

ههههههههههههه
شكلك مضايق اووى ومحبط جدااا
من تجارة يا فامبير
ربنا يكون فى عونك
بس انا باردة ومهما هيحصلى فيها من صعوبة دراسه
او صعوبة تكييف معها
بردو فية امل وتفاؤول :p
انت بس اللى واخدها افش حبها
هتحبك تكرهها تشوطك لبعيد:d

vampire1188

03-09-2008, 11:03 PM

تشوطني ؟ .. دا باعتبار اني كورة بقي ؟!!

على فكرة .. والله العظيم تلاته انا ما بحبطكوا .. بس الكلام دا فعلا اللي انتوا هاتكتشفوه

انتوا لسه مادخلتوش الكلية ولسه ماتعرفوش الدكاترة ولا طرق التعامل ولا كل دا

انتوا كل دا مجرد سمعتوا بس .. او قريتوا شوية معلومات عنها .. سواء مني او من غيري

انا دلوقتي حاليا .. كل اللي يهمني في الامر .. اني ببص لما بعد التخرج

مصيبة تجارة .. انها لا تتوقف على انها تجارة بس .. لازم تبقي تجارة ومشتملاتها ..

بمعني انك بالبكالريوس بتاعك دا .. تروح تشتغل سواق تاكسي على رأي اخويا !!

صراحة .. كلامه صح في ظل الوضع الحالي اللي احنا فيه دا

عشان تلاقي شغل معقول .. ولاحظوا كلمة معقول دي .. لازم يبقي معاك على الاقل

كام كورس انجليش .. على كام كورس محاسبة .. على كام دبلومة ادارة .. على كام دبلومة في الـ hr

على كام كورس في الشبكات .. طبعا دا غير شهادة الـ icdl اللي هيا بتبقي زيها زي شهادة التخرج معاك !!

كل داااااااااا .. وياعاااااااالم هاتشتغل ولا لأ ..

انتي لسه داخلة جامعة .. كل طموحك في الثانوية العامة انك تخشي كلية حلوة

ربنا رزقك ورماكي في تجارة .. مش هاقولك اكرهييها واشتميها وسبي والعني في اليوم اللي دخلتيه فيها ..

لأ خاااالص .. بس بعد ماتعدي السنة الاولي .. (دا ان عدت) .. هاتكتشفي ان طموحك اتغير .. وبدأتي تبصي للأمام وهاتحسي انك بدأتي تشيلي هم .. تدريجيا لغاية ماتوصلي لرابعة .. هاتحسي انك خلااااااااص على اخرك ..

كل دا وانتي بنت يعني الشغل مش اساسي بالنسبالك .. مابالك بالولد اللي هايتحمل المسئولية ..

انا يمكن اكون محبط شوية .. بس ممكن يكون احباطي وصلكم غلط ..

حاجة اخيرة اقولها ..

امشي على مبدأيين في الكلية دي .. وانتي ربنا يوفقك ويوفقنا احنا كمان ..

1- التقدير ثم التقدير ثم التقدير ثم التقدير ..
2- اي كورس خلقه ربنا وقع في طريقك خديه .. بس يكون كورس حاسه انه هايفيدك ..

كفاية كدا بقي .. عشان انا فعلا احبطت دلوقتي وربنا !!

wanda

03-09-2008, 11:18 PM

مهو ده صح
مفيش حد بيشتغل بعد ميخلص اربع سنين الكليه

لازم كورسات ودراسات ولغاة تانيه وثالثه علشان ينفع

وشكرا على ردك الطويييييييييييييييييل اوووى :d

vampire1188

03-09-2008, 11:22 PM

طويييييييييل ؟! .. لو عايزاه نقصره ..

ولو عايزة .. مانردش خاااااااااالص

wanda

03-09-2008, 11:53 PM

مش قصدى انا قصدى ان ردودك
بتعجبنى اووى ووبصراحة بكون عايزة اقلدك
ومبعرفش اطول ف الرد :d

sseess

04-09-2008, 12:01 AM

هاااااااااااى وند انتى فى جامعة اية

wanda

04-09-2008, 12:05 AM

تجارة القاهرة :d

وانت

vampire1188

04-09-2008, 12:11 AM

تقلديني ؟ .. لا بلاش

خليكي بطبيعتك احسن ..

وبلاش تقلديني .. عشان لو قلدتيني هاتحبطي وهاتحبطي اللي حواليكي

انا دلوقتي بقدر الامكان بحاول اني اقلل من مدي الاحباط اللي سببتهولكوا

ولككن تلك هي الحياة .. وتلك هي كلية التجارة اللي ربنا رزقنا بيها !!

wanda

04-09-2008, 12:18 AM

اوك خلينى

مع انى رغايه فى الطبيعى

مش عارفه هنا مش بعرف اتكلم ليه :p

vampire1188

04-09-2008, 12:25 AM

هههههههههههه .. انا اعرف ان معظم الناس .. بتبقي بربنط في المنتديات والشات ..

اما في الحقيقة فا ياعيني .. تتلاقيهم الكلمة بتطلع منهم زي اللي بيعد فكة شلن !!

بس عادي .. مسيرك هاترغي كتييييييير اوي اوي في الكلية دي ..

bondok fady

04-09-2008, 12:53 PM

ولله انا زيك يا wanda مش بعرف اتكلم اد كده على النت بس فى الحقيقة هتلاقينى بلابنط فى الكلام وبالذات فى السياسة والحروب وخااااصة شغل المخابرات

!DreAmeR!

04-09-2008, 01:18 PM

ايه يا جماعة احنا هنقلبها حروب

كان معكم خالد عبدالعال
نشرة اخبار موقع ثانوية

bondok fady

04-09-2008, 01:33 PM

منى السلام
سيبك من فامبير ده راجل خبره فى مجاله اللى هو الشات اكيد والكتابة اكيد اكيد بيستخدم برنامج انطق وهو يكتب ههههههههههههه

بعدين مش معنه التقيرات فى الجامعة صعبة اووووووى ليه دى حاجة كتير بسمع عنها ان التقديرات صعب وانت بتحلم لو بتفكر ان انت تجيب تقدير حتى ولو مقبول انا بسمع ان هى صعبة برضو بس ليه يعنى مشمعن كده
وبعدين انا ليه اخواتى كلهم اكبر منى 2 فى تجارة واحد خلص والتانى هيخلص السنه دى و1 فى صيدله بس خلص السنه اللى فاتت
اللى خلص فى تجارة بتقدير جيد بس ده كان بيذاكر ومن الناش الدحيحه بس بقاله اربع سنين مخلص وبتاع صيدله خلص بتقدير جيد جدا السنه اللى فاتت من جامعة القاهرة ولله ما بهيس اما الباشا الكبير اللى هو داخل رابعه فدى معقد بابا فى عشته من سنه اولى وهو كل سنه بيطلع بمادتين لحد دلوقتى وبابا مش متعود حد يشيل مواد مننا خالص حتى ان بابا بقى يشك ان هو اساسا مش بيروح الجامعة بس لاقه بيروح
الباقى والدور عليه ان واعوذ بالله من كلمه انا ممكن اخد السنه فى سنتين ويلاته لو عجبك يا فامبيرباشا
المهم انت عامل ايه يافامبير سيبك من اللك ده والى عايزين نعمل موضوع يضم كليات التجارة على مستوى الجمهورية ايه رايك فى الفكرة دى واقولى صحيح كنت عايزاسألك سؤال
هو تجارة القاهرة احسن ولا عين شمس دى رقم واحد
اما رقم 2 هو فى تجارة خارجية فى القاهرة وعين شمس ولا هى بس فى حلوان العزيزة ارجو الرد على عضو انضم مجددا الى حزب المعارضة
سلالالالالالالالالالالام فامبير وwanda

XMTMX2009

04-09-2008, 01:43 PM

ايه ياشباب كله تجارة القاهرة مفيش عين شمس ولا ايه

bondok fady

04-09-2008, 01:45 PM

ياعم لاحروب ولا حاجة انا بس بحب اووووووووووى شغل المخابرات وكنت وما زلت مقدم حربيه ومنتظر النتيجة ادعيلى انت بس انا اقبل ده حتى انا متابع كل ما هو جديدفى عالم المخابرات حتى القصص انا متبعها واوله سلسله رجل المستحيل لنبيل فاروق بتاعت ادهم صبرى ومنى توفيق ونفسى ابعد عن تجارة دى وارفها اللى عقدنى منها فامبير وحزبو ه وعلى فكره فامبير هو اللى خلانى انضم الى الحزب بتاعة اللى مسمياه علالالالالالالا حزب المعارضة والاكتئاب