لأ اللى بيحصل ده مش طبيعى !!! أنا قريت شوية جُمل يا جماعة بجد تنحت قدامها !! و بين كل جملة و جملة كان هيجيلى شلل

إليكم الشلل التالى


1-
*** ممكن حب اسكندرانى***
آيوووووووووووه و ماله !! طبعا زى ما انتوا عارفين فيه حب اسكندرانى و حب قاهرى و فيه فلاحى و فيه صعيدى !!! و اذا مشينا بالحدود شوية هنلاقى فيه حب لبنانى و حب امريكانى و صينى و يابانى !!!! و هكذا و مقولكوش بقى ع الحب المريخى !!!!
و برضه فيه حب بالفراخ و حب بالكباب و فيه بالشطة و اللمون !!!!!!! و يا سلام بقى ع الحب بالجبنة !!!
فظييييييييع !!! خصوصا لما بيتقطع عليه طماطم بيبقى مسخرة


2-
*** أنا 75 سنة ممكن أتعرف على ليدى مناسبة***
خمسة وسبعين سنة يخرب بيته و قادر يمسك الموبايل و يبعت مسج ؟؟!!! ما شاء لسه ف عز شبابه برضه !! آه و ماله ممكن تتعرف على كركوبة مناسب
3-
*** ممكن واحدة جميلة للصداقة و الحب و ياريت برضه للسفر ***
آه ممكن طبعا !!! و يا ترى حضرتك عايزها كام سلندر ؟؟؟؟؟؟؟؟؟؟
4-
*** أنا شاب متدين ممكنليدى عندها شقة ***
آه و ماله !! و فيه برضه شقة و عليها ليدى مجانا !!!! و ياترى ايه مواصفات الشقة اللى عايزها ؟؟؟؟؟؟؟؟؟؟؟؟؟؟
5-
*** أنا دلوعة و شبه نانسى عجرم ممكن أتعرف ***
آه و نص !! و ياترى واخدة من نانسى عجرم قفاها و لا كعب رجليها ؟؟؟؟؟؟؟؟
اتدلعى يا اوختى و ماله !! و لما حضرتك أمورة كده امال بتعرضى نفسك ليه ع الشاشة ؟؟؟؟؟ ايه محدش راضى يشترى خلقة نانسى عجرم ؟؟؟ ايه الرجالة بقت بتطس ف نظرها ؟؟؟؟؟؟؟؟؟؟؟؟؟ لأ معندهمش حق
6-
*** أنا ف اعدادى ممكن أتعرف على بنت حلوة ***

هيا جات عليك ؟؟!! و ياترى عايزها ف سنة كام يا حبيبى ؟؟؟؟؟ ابتدائى و لا حضانة ؟؟؟؟؟؟؟ أنا بالشكل ده هيجيلى السكر
7-
***فلانة : أنا نكدية موت ممكن أتعرف على نكدى و ننكد على بعض ***
*** فلان : أنا نكدى مووووت !! و قعتك سودة و نهارك مش باينله لون ***
كان نفسى أمسكهم هما الجوز و انكد على أهاليهم


-8
*** معاكى فلان ممكن أعرف اسمك سنك طلباتك ***
آه و ماله أنا فلانة يا ابنى ... و النبى اطلبلى واحد كباب و اتنين بانيه !!!!
احم احم .. و ياريت لو معاهم جوز حمام
9-
*** أنا عايز بنت للارتباط سمرا أو بيضا أو قمحى ما تفرقش ***
حمرا !!!!!!!!!!!! تاخدها حمرا ؟؟؟؟؟؟؟؟؟؟؟ طب ايه رأيك ف البنفسجى ؟؟؟؟ جديد و منزلش السوق
10 -
*** ممكن واحدة جميلة استايل عشان أحبها ***
آه و ماله !! أنا برضه عايزة بطارية للموبايل بتاعى عشان أنا قربت أهنج !!!!!!
11-
*** أنا سى السيد بدور على أمينة تسمع الكلام و تقول حاضر ***
آه و ماله حاضر يا اخويا !!! بقى حضرتك عايز أمينة ؟؟؟؟
طب غووووووووووووووور يحرقك


12-

*** لو انت بتحبنى بجد ممكن أديلك رقمى !! ***
يا ما شاء !!! انتوا بتحبوا بعض الأول و بعدين تتعرفوا على بعض ؟؟؟؟؟؟؟؟؟؟؟؟
تصدقى ب أنا دلوقتى بس عرفت أهمية السراية الصفرا
13-
*** فلانة : ممكن تعرفنى على نفسك عشان هتبقى حب العمر ***
*** فلان : هحكيلك عن حياتى كلها !!! .. أنا من النهارده ملك قلبك !!!!!! انتى حددى و انا تحت أمرك ***
أشوف فيكم يوم بحق جاه النبى !!! الدماغ دى معجونة من ايه ؟؟؟؟ أنا خلاص هيجيلى شلل !!! ألطم يا اخوانا ؟؟؟؟؟
14 -

***أنا قلبى فاضى .... حد عايزنى أحبه ؟؟؟ ***
أنا مُت خلاص
15 -
فلانة : عرفنى على نفسك يا فلان و ابعت رقمك .. أنا بحبك أوى ، فلان : أنا اللى بحبببببببك أوييييى يا فلانة !! قوليلى صحيح هو انتى حلوة و لا ؟؟؟؟؟؟؟؟لا تعلييييييييق ...... أنا شكلى هموت تانى
ثوانى أموت و ارجعلكم

كلمة أخيرة :
اللى بيحصل ده كتيييييييييير .. شئ لا يقبله ديييين لا قلب و لا عقل ولا منطق .. استهتار و استخفاف بالمشاعر و كذب مالوش نهاية و ضحك ع العقول !!!! و الدهشة انه كل اتنين بينافقوا بعض و الوسيلة الرخيصة ...... الحب !!!!!! مع ان كل كلمة حب غالية أوى .... ايه اللى جرى للناس ؟؟؟؟؟؟ و ايه اللى جرى للمجتمع ؟؟؟؟؟؟؟؟؟؟

حسبنا الله ونعم الوكيل اصحاب القنوات همهم يكسبو وخلاص

باي طريقة

وبعدين حب ازي هوشفها ولاشفته عشان يحبها

دا من ضمن التخلف

ناس فاضيه

انتي تقصدي الشات اللي علي قنوات النيل للدراما والاسره والطفل والشلل دي
يا الله
ارحم شباب المسلمين
قوليلي بقي الشاب من دول بيدفعله كام في القعده دي
بذمتك مش لو راح اتبرع بيهم لبناء مسجد ولا كفالة يتيم ربنا يباركله في ماله وفي صحته
وضاع شباب المسلمين
صحيح مش دول اللي لو لاقدر الله حصلت حرب هما اللي عيقفوا يدافعوا عن البلد
ابقي قابليني
وسلميلي ع الشات وقنوات النيل وكل القنوات
ارحمنا يارب
شكرا ليكي حبيبتي ع الموضوع

شـــــــر البلية ما يضحــــــــــــــك

لا حول ولا قوه الا بالله

انا مش عارف ايه الا يخلى واحد يبعت رسايل بعشرين جنيه فى الهو كله فى الهو طاير انا والله اعرف واحد من الا شغال فى المحطات الفضائية المسوال عن الموضوع بتاع الرسايل بيقولى انا ساعات ببعت رسايل باسماء بنات عشان الناس تبعت امال هشغل خدمة الرسايل ازاى ساعات بيشتم على الاهلى او الزمالك عشان كله يبعت ويقول لا وكلام كتير بيحصل بس كل الا اقدر اقوله لما تشوف الكلام الا بيحصل دة تبقى انت اكيد اكيد فى مصر

زي ما قالت الشاعرة الكبيرة فرح ! ! :

عالم رايقة و فاضية

لو وراهم حاجة مكنش كل واحد قعد متابع ال 24 ساعة قدام قناة زي كده

بس لو أصحاب القنوات دي مش عارفين أن في ناس بالعقل دي

مكنوش هيعملوا حاجة زي دي عشان مش هتمشي

أبسط مثال : قياس نسبة الحب اللي ميلودي

بتلاقي ناس كتير بتبعت مع انهم عارفين أن ده ملوش اي أساس صحيح

نفس النظام في الرسائل دي

كل شاب يدخل يقول يمكن اتعرفلي علي كام واحدة !!

و كل واحدة تدخل تقول ممكن استغفل اي واحد !!

طبعا دي غير السرقات اللي أكيد بتحصل عن طريق الرسائل دي

زي واحدة تقول لواحد اشحنلي عشان اكلمك

لأن المكان ده مش هيبقي فيه بنات غير كده و شباب غير كده

و ربنا يبعدنا عن القنوات دي

اللهم ابعدنا عن شريط رسائل ميلودي و روتانا و من والاهم

و شكرا لطرحك للموضوع

ربنا يشفيهم اكيد حيعملوا مستشفيات ليهم بس ياعيني حالتهم صعبه اووي............ استعفر الله العظيم استفغر الله العظيم ................نقول ايه بس لا تعليق

يابنتى ولا يهمك استحملى اللى يعيش ياما يشوف
شكرا على الموضوع

شكرااااااااااااااا على مروركم

هم يضحك وهم يبكى
على رايك يا سندريللا مش لو راح اتبرع بيهم كان احسن له
ربنا يصلح احوال شباب المسلمين

والله هم يبكي و هم يضحك
و مره قريت مسج مبعوته بيقول فيها ايه"انا عايز بنت تسهر معايا وتقضي ليله معايا"
بجد وقاحه و قلة ادب
انا لما قريت المسج دي اتصدمت
ليها حق ميلودي هيتس تستغنى عن الرسايل دي
و عقبال الباقي
و كمان فيه حاجه لاحظتها بقى في قنوات الأغاني
وقت ما يكون فيه اغنيه دينيه شغاله تلاقي المسجات كلها
"سبحان الله" , "الحمد لله" , "لا اله الا الله"
و اول ما الأغنيه الدينيه تخلص
الهبل يرجع
ربنا يهدي بجد

السلام عليكم ورحمة الله وبركاته

بجد موضوع رائع وجميل

ومش عارف اقول ايه بس

حسبي الله ونعم الوكيل

رسايل بقت مسخرة

يللا سلامي للجميع وعادي بقي كل حاجة بقت عادي

والله توبيك رائع يجيب شلل بجد ونقطة ويرفع الضغط ربنا يهدي

لا املك سوى قول
لا حول ولا قوة الا بالله
شكرا على العرض الرائع

السطحية مع الفراغ يعملو اكتر من كدة

يا آنسه زمورده لو لاحظتى هتلاقى إن الرسائل اللى حضرتك بتتكلمى عليها دى
مش بتكون موجوده غير على قنوات الأغانى والحاجات اللى من هذا القبيل
يعنى من الآخر حاجه حرام فى حرام وضربو الأعور على عينه قال خسرانه خسرانه
ثم إن الرسائل دى مش عجباكى مش تفتحى القناه وتعرضى نفسك لقراءتها
والحرام بين والحلال بين وإجتنبو الشبهات
:)

طبعا شكر ا لحضرتك على مرورك بس دى حاجة انا بعرضها بس

واكيد يعنى مش متعمدة انى اشوفها