السلام عليكم ورحمة الله وبركاته

داخل أولى طب ؟؟؟؟؟؟؟؟؟؟؟؟

اقرأ معايا عشان تحب الكليه من قلبك

ستجد هنل كل ما يدور ببالك من أسئله

لأني عارف ان كل اللي داخل الكليه لأول مره بيبقى تايه

والمفاجاه ان اي مصطلح طبي هتلاقي معناه بالعربي

وده طبعا خاص بالقصر العيني اولا ثم باقي كليات الطب في الجمهوريه

تكمله لموضوع انس

ولا تنسوني من الدعاء






منقووووووول للامانه


على فكره انا قبل ما اقرأ الموضوع ده كنت قربت اكره الكليه من كلام الناس
لكن بعد ما قرأته سبحان الله
بقيت عايز أروح الكليه بكره من شوقي وحبي ليها
بجد موضوع رائع بس عايز مشاركاتكم

نظام الدراسة بكلية طب قصر العيني – الفرقة الأولى
-------------------------

كلية طب قصر العيني هي إحدى كليات الطب العريقة والشهيرة في جمهورية مصر العربية ، ولعلها أيضا أكبر وأشهر مدرسة للطب في العالم العربي والأفريقي..

فعلا يا جماعة ، دي حقيقة ، وهتكتشفوها بنفسكم لما تدخلوا الكلية..

أول ما تروحوا الكلية إن شاء الله بعد موال مكتب التنسيق دة ، هيدوكو دليل الكلية ، ودة بقى بيحتوي على كل المعلومات اللي انتو عايزينها واللي مش عايزينها عن جامعة القاهرة عموما وعن كلية طب قصر العيني خصوصا..

المهم..

أحب أقولكم إن نظام الكلية فعلا رائع ولو فهمتوه صح قبل ما تبدأوا ، دة هيسهل عليكم كتيييييير..

احنا هنا هنتكلم عن الفرقة الأولى..

هتدرس إن شاء الله أربعة مواد أساسية وهي:

الفسيولوجي: (علم وظائف الأعضاء) ودة عليه 250 درجة

الأناتومي: (علم التشريح) ودة عليه برضه 250 درجة

الهستولوجي: (علم دراسة الأنسجة) ودة عليه 150 درجة

البيو كمستري: (علم الكيمياء الحيوية الطبية) ودة عليه 150 درجة

يعني المجموع كله على بعضه 800 درجة

أقولكو حاجة.. بلاش الأسامي الجامدة دي تخضكو.. الموضوع صدقوني لو جهزتوله صح وفهمتوه هيمشي زي الشعرة في العجين..

على فكرة.. الترم الأول لازم تحصل شوية لخبطة كدة عشان نظام الكلية مختلف أوي عن ثانوي.. يعني اتنقلتوا من الاعتماد على الغير إلى الاعتماد على النفس..

الشاطر بقى اللي يتجاوز المرحلة دي بسرعة ويعرف يتكيف مع الوضع..

بس افرحوا دة فيه خبر حلو أوي..

مش قلتلكوا إن مجموع الدرجات كلها 800 درجة؟

أهو الترم الأول كوووووووووووله عليه 115 درجة بس..

يعني اللي موزعين الدرجات – جزاهم الله خيرا – راعوا حكاية التخبط دي وركزوا معظم الدرجات في الترم الثاني..

بالنسبة للسكاشن (المعامل) فدي حكاية حلوة أوي ونظامها هيعجبكم جدا وهتحبوها جدا جدا..

أصل انتو في ثانوي ما كنتوش بتشوفوا حاجة عملي أدامكم إلا نادرا وكانت كل دراستكم نظرية بحتة.. صح؟

لأ هنا بقى فيه جانب كبير عملي وكل حاجة بتشوفوها.. وبتعملوها..

وطبعا بتمتحنوا فيها..

كل يوم فيه سكشن واحد الساعة 8 صباحا لكن فيه يوم واحد بس بيكون فيه سكشنين واحد الساعة 8 صباحا والتاني الساعة 3 عصرا..

بيني وبينكم السكاشن ما بتبدأش غير الساعة 8 ونص لكن لازم تيجي بدري عشان تكون ملتزم وعشان تضمن مكان كويس..

وأهم حاجة عشان الباب بيتقفل الساعة 8 ونص!

المحاضرات بتبدأ الساعة 12 ظهرا وبتنتهي 3 عصرا..

يعني كل يوم 3 محاضرات كل محاضرة منهم ساعة..

كل واحد هيكون ليه رقم جلوس محدد.. وعلى أساسه هيكون ليك مدرج انت تابع ليه..

والمدرجات كلها (باستثناء مدرج أ ومدرج ب) موجودة في مركز تطوير التعليم الطبي ودة مبنى كبير وجميل (حقيقة يعني)..

مدرج أ ومدرج ب موجودين برة المركز وهما أكثر المدرجات اتساعا..

طبعا برضه على حسب رقم جلوسك هتكون تبع مجموعة محددة..

يعني على سبيل المثال: من 849 إلى 950 دول بيمثلوا مجموعة 7

يبقى لو انت 849 أو 950 أو بين الرقمين دول تبقى ضمن مجموعة 7

طبعا لازم تعرف كويس انت تبع مجموعة إيه عشان دة مهم في تحديد المدرج والسكشن اللي انت تبعهم..

جدول المحاضرات ما تقلقش خالص هتلاقي نفسك ماسكه أول ما تدخل الكلية ما تعرفش جالك منين.. فيه مليون مصدر هيديهولك..

حاجة بقى بيني وبينكم..

حكاية انك تبع مجموعة معينة دي تفرض عليك السكشن بس لكن ما تفرضش عليك المدرج..

بمعنى إنك لازم تحضر في السكشن اللي انت تبعه لأن فيه غياب وبيتاخد علطول (مفيش هزار ف الموضوع دة).. فيه ناس اتحرمت من امتحاناتهم أدامي عشان تجاوزوا نسبة الغياب عن السكاشن..

لكن جوة المدرجات مفيش غياب بيتاخد.. وبالتالي انت حر تحضر مع الدكتور اللي انت عاوزه في المدرج اللي انت عاوزه..

كلامي لحد دلوقت مفهوم؟

طب كويس...

فيه حركة بقى الدكاترة بيعملوها عشان يجبروك انك تحضر معاهم في المدرج بتاعهم..

مش بياخدوا الغياب لأن الأعداد كبيييييييييرة جدا طبعا..

لكن بيعملوا حاجة تانية..

هقولكوا على الحركة دي بعدين..

لسة يا جماعة الكلام ما خلصش..

أنا لسة عندي كلام كتييييييييير..

أنا بس عايز مشاركات معايا عشان نكمل بحماس كدة........

فهل من مجيب؟؟؟؟؟؟؟؟

الموضوع جميل
شكرا ليك
وكمان فرصة حلوة ان الواحد يتعرف على نظام الكلية علشان ميحسش انه تايه ومش فاهم حاجة فى حاجة
جزاك الله خيرا

شكرا لأستاذنا الاستاذ/ صوت الحق

على تثبيت الموضوع

بسم الله الرحمن الرحيم


تابع : نظام الدراسة بكلية طب قصر العيني – الفرقة الأولى



-------------------------


إزيكو يا جماعة..

يااااااااااا رب تكونوا بخير ومتفائلين كدة..

أهم حاجة التفاؤل..

احنا كنا المرة اللي فاتت وقفنا على رقم الجلوس والمجموعة اللي انت تبعها والمدرجات والسكاشن وكلام من دة... صح؟

كويس..

دلوقتي المفروض نتكلم عن المواد اللي هتدرسوها والمذاكرة بقى..

أول سؤال بينط في دماغ أي واحد داخل كلية عموما: هو أنا مش خلصت من الثانوية العامة وعذابها؟ هو أنا مش من حقي أرتاح شوية؟؟

ويا حبذا لو كان داخل كلية الطب زي حضراتكم كدة.. تلاقيه بيقول: هو أرف في ثانوي وأرف في الكلية؟ مش كفاية جبت 97% ولا 98% ولا 99%؟ دة أنا اتطحنت عقبال ما جبتها.. عايز أرتاح شوية بقى..

معلش بقى عندي رد مباشر:

لو عايز ترتاح وتطنش دور على كلية تانية..

كلية طب قصر العيني فعلا حلوة وجميلة ونظامها كويس ولكن مفيش ياما ارحميني..

أول ما تدخل هتترزع تلت أربع خمس سكاشن يعرفوك إن الله حق وإنك مش داخل تلعب – عكس كل الكليات اللي خلقها ربنا –

فعلا يا جماعة الموضوع محتاج اجتهاد شديد..

وأنا ههون عليك الاجتهاد دة بسؤال بسيط:

ترضى بعد كل المجهود اللي انت بذلته في ثانوي دة.. بعد المذاكرة المستمرة بلا ملل ولا كلل.. بعد الدروس الخصوصية والمشاوير رايح جاي رايح جاي.. بعد ما والدك ووالدتك – أعزهما الله – داقوا المر عشان يوفرولك احتياجاتك في ثانوي.. بعد ما عينيك اتمققت من كتر المذاكرة.. بعد ما دماغك بقت قربت تنفجر..

ترضى بعد كل دة تخش الكلية و – لا قدر الله – تفشل فيها؟

ترضاها لنفسك ولأهلك ولكل الناس اللي بيحبوك؟؟

لأ طبعا..

عشان كدة لازم يا جماعة تاخدوا عهد على نفسكم تشدوا حيلكم جاااااااااامد عشان صدقوني دة هينفعكم أدام..

المهم..

هو احنا ما قلناش صحيح إيه الطريقة اللي الدكاترة بيعملوها عشان يجبروك تحضر معاهم؟

أبدا.. حاجة بسيطة.. بيعملوا Shock Exams

يعني امتحانات مفاجئة..

حضرتك مثلا تبع مدرج 7 ولكن عايز تحضر محاضرة الأناتومي مع دكتور (س) في مدرج 5

ساعتها يقوم الدكتور اللي في مدرج 7 قايل للطلبة اللي في المدرج معاه: كل واحد يطلع ورقة عشان فيه امتحان..

وطبعا الامتحانات دي بتبقى بالأسامي المتسجلة في المدرج..

وعليها درجاااااااااااااااات...

ورطة... صح؟

بس ما تقلقش خالص..

أولا: لأن موضوع الامتحان المفاجئ دة بيتعرف قبلها بأسبوع على الأقل..

يعني لا مفاجئ ولا يحزنون...

ثانيا: لأن مجرد ما بيقول الدكتور: طلعوا ورقة فيه الامتحانات بتلاقي الرسايل (الإس إم إس) عمالة تروح وتيجي وفي ظرف 5 دقايق هتلاقي المدرج اتملا وكله قاعد يمتحن..

عشان الدرجاااااااااااااااات..

المهم..

أظن دلوقتي بنسن سناننا..

وسامع واحد منكو بيصرخ:

أنا هذاااااااااااااااااااااكر.. أنا هقطع الدنياااااااااااااااااااااااااااااا...

حيث كدة بقى نبدأ في المواد الأربعة اللي هتدرسوهم وهقولكم إن شاء الله على نظام رائع هتدعولي بعده خمس ست دعوات كدة......

ولكن لنا في هذا لقاء آخر........

مستني مشاركاتكم

عشان اكمل غدا
ان شاء الله

عزمت فأنجزت و كتبت فأوجزت
جزاك الله كل خير يا دكتور محمد .... فعلا موضوع مهم و مفيد و مستنيين التكملة ان شاء الله

عزمت فأنجزت و كتبت فأوجزت
جزاك الله كل خير يا دكتور محمد .... فعلا موضوع مهم و مفيد و مستنيين التكملة ان شاء الله

شكرا يا دكتور على المعلومات دى
ومستنياك بكرة باذن الله

بسم الله الرحمن الرحيم

جزاك الله كل خير يا دكتور محمد على الموضوع المفيد و الأكثر من رائع
وانا مع تثبيت الموضوع

على فكره انا قبل ما اقرأ الموضوع ده كنت قربت اكره الكليه من كلام الناس

وانا والله بدأت اكره الكلية من الكلام اللى بيتقال.

وبجد عرفت معلومات لم اسمع بها من قبل , شكرا على الأفادة وعلى مجهودك

طبعا مستنى التكملة للموضوع الرائع ;) ....................

شكرا على الردود يا دكاتره

وان شاء الله هنكمل سويا

جميل يادكتور محمد
بس المواعيد اللى انت حاططها دى
مواعيد السنادى وللا ايه؟

لأ.. دي مواعيد السنة اللي فاتت لكن أنا سمعت كذا مرة إن المواعيد دي ثابتة بالنسبة لسنة أولى..

وربنا يكرمنا إن شاء الله..

شكرا جزيلا يا دكتور

بعد اذن حضراتكم
كان عندى استفسار بسيط

بالنسبة للمدينة الجامعية ..هى بعيدة عن الكلية ولا قريبة ؟؟
يعنى بروح منها الكلية بمواصلة ولا مشى عادى ؟؟

بالنسبة لمواعيد المحاضرات والسكاشن والكلام ده كله هل بتتأخر بعد العصر مثلا ؟؟

استفسار لذيذ بقى بعد اذنكم بالنسبة للانشطة فى الكلية
هل سهل الاشتراك فى اسرة معينة او انا اكون اسرة ولا ده بيكون صعب ؟؟

بالنسبة للمدينة الجامعية فأنا ما دخلتهاش قبل كدة.. لكن اللي أعرفه إنها قريبة جدا.. كان زمايلي بييجو منها في خمس دقايق..

ثالثا: بالنسبة للمواعيد فالميعاد المعتاد لنهاية اليوم الدراسي هو الساعة 3 عصرا..

ولكن دة بيتغير في يومين..

لما بيكون فيه سكشن بعد آخر محاضرة ويوم واحد في الأسبوع وبيعد حوالي ساعة أو ساعة ونص..

ولما بيكون فيه محاضرة لغة إنجليزية - مادة غير مضافة للمجموع - ودي برضه بتعد ساعة واحدة ويوم واحد فقط في الأسبوع..

رابعا: بالنسبة للمشاركة في الأنشطة واتحاد الطلبة فأنا مكنتش مهتم بكدة..

لكن اللي أعرفه إن فيه حرية كبيييييييييرة في كليتنا وإن الاشتراك في الأنشطة والأسر والكلام دة سهل جدا للي عايز..

بس نصيحة يا دكتورة الأفضل التركيز في الدراسة لأن الحاجات دي ممكن تشغلك..

بالنسبة للانخابات أعتقد إنها نزيهة جدا......

تابع :نظام الدراسة بكلية طب قصر العيني – الفرقة الأولى

-------------------------

الدراسة على فكرة هتكون كلها باللغة الإنجليزية..

بس ما تخلوش الحكاية دي تقلقكو خالص.. الدكاترة بيراعوا الموضوع دة وبيحاولوا يخلوا معظم كلامهم واضح وبالعربي..

لكن فيه بجد نصيحة مهمة أوي..

هتلاقوا لما تبدأوا الكلية إن شاء الله قواميس المصطلحات الطبية بدأت تنزل في المكتبات – أو ممكن تنزل من دلوقتي لازم تتابعوا – ودي بقى بتكتبلك المصطلح الطبي اللاتيني وجنبه معناه بالعربي..

فعلا وعن تجربة لازم تجيبوا القاموس دة أول ما ينزل عشان هيساعدكم جامد..

المادة الأولى

الأناتومي (علم التشريح)


علم التشريح هو أكتر حاجة في الكلية هتحسسك إنك دخلت طب..

طبعا..

لأنه بيتكلم عن جسم الإنسان وتركيبه بالتفصيل..

حضراتكم إن شاء الله هتدرسوا في سنة أولى على مدار السنة كلها ما يلي:

1) أساسات علم التشريح Basics of Anatomy

2) الطرف العلوي (الذرعان) Upper Limb

3) الطرف السفلي (الرجلان) Lower Limb

4) الصدر Thorax

5) علم الأجنة Embryology

طبعا فيه دكاترة متميزين ومشهورين جدا في الأناتومي عندنا في الكلية.. أهمهم دكتور مدحت ودكتور إيهاب ودكتور سامح دوس..

لو سمعت إن فيه واحد من دول نزل مدرج كذا عشان يشرح لازم تروح.. وبدري عشان تلحق مكان..

الأعداد بتبقى مهولة ولو ما لحقتش مكان هتقف.. ومش هتعرف تركز..

عن تجربة شخصية فمفيش أفضل من الدكتور مدحت.. هو الألفى بلا منازع...

بص ما تعملش زي الناس الهابلة – اللي أنا كنت واحد منهم للأسف – اللي بيركزوا في المدرج بتاعهم زي ما يكون اتكتبلهم في القدر وما بيدوروش على دكاترة في مدرجات تانية..

دة نظام غلط..

الصح إنك تكون زي النحلة.. تخلص المحاضرة في المدرج الفلاني وتطير على المحاضرة اللي بعدها في المدرج العلاني.. وهكذا..

المهم تحضر مع الدكاترة المتميزين..

مثلا سمعت إن دكتور مدحت هيبدأ شرح الأبر لمب (الطرف العلوي) في المدرج الفلاني.. لازم تروح فورا وتحضر معاه..

حقيقي يا جماعة فيه دكاترة في الكلية زي الدهب بيفهموك كل حاجة ويشربوك الطب شرب.. المهم إنك تسعى وتدور وتجتهد.. وأكيد ربنا هيكرمك..

بالنسبة لسكشن الأناتومي.. فدة بقى المشرحة..

ونبي يا جدعان بلاش حكاية مشرحة........ وقلبي..... آآآه..... ويااااااااي...... ويعععع... والحاجات التافهة دي.. والله ما ليها وقت في كليتنا..

جمد قلبك كدة واعرف إن الحي أبقى من الميت وإن المشرحة دي اتعملت مخصوص عشان تفهمك كل حاجة عن جسم البني آدم عملي.. على جسم بني آدم تاني.. لأن الدراسة العملية لا بد منها..

المناظر الغريبة اللي شفتها بقى في الأول دي مش عايزكوا تعملوها..

مثلا، آنسة منكمشة وشها أبيض مركونة على جنب وخايفة تقرب من الجثة أحسن تاكلها ولا حاجة.. المعيد بيعد جنب الجثة علطول وانتو بتتلمو حواليه.. اللي بقى يعد بعيد زي الآنسة دي هيبقى خسر كل حاجة.. لا هيشوف حاجة ولا هيستفيد حاجة..

محتاجين انتو بقى تجيبوا جوانتيات وآلة اسبها فورسبس عشان تشوفوا بيها اللي انتو عايزينه.. صدقوني الحاجات دي ضرورية جدا.. ما تصدقوش الناس اللي بيقولولكوا ما تجيبوهاش.. لازم تكون معاكو من أول يوم.......

وأنا هعملكوا مقارنة سريعة جدا بين آنستين شفتهم لما دخلت المشرحة..

الأولى: أول يوم نخش على الجثث واحنا عمالين نقدم رجل ونأخر التانية والمعيدين مغطيين الجثث عشان ما نتخضش......

فوجئنا بطالبة معانا داخلة من وسطنا زي الصاروخ وهي لابسة الجوانتي وماسكة الفورسبس وراحت داخلة على جثة منهم.. وهوب.. كشفت الغطا اللي عليها وقعدت تتفرج وتشوف وتشيل وتحط..

صدقوني الآنسة دي أثارت إعجابي جدا.. لسببين:

إن هي قضت على خوفها تماما من أول مرة بحركة مباشرة.. يعني عودت نفسها على الموضوع بالإكراه.. والسبب التاني إنها خدت على المشرحة والفورمالين والجثث وكل الكلام دة قبلنا بفترة.. وبالتالي استفادتها كادت أكتر بكتيييييييييير..

الآنسة التانية: دخلت كمشانة زينا.. عادي يعني.. وشها أبيض.. برضه عادي.. دايخة.. طبيعي.. عينيها بتحرقها.. برضه طبيعي..

لكن اللي يفرس ومش طبيعي إنها قعدت بعيييييييييييييد جدا عن الجثة وبالتالي بعيد جدا عن المعيد اللي بيشرح.. فما طلعتش بأي حاجة..

لأ وإيه.. فضلت على الحال دة حوالي شهر قبل ما تتعود على الوضع شوية.. شوف بقى ضيعت من نفسها أد إيه وادت فرصة لزمايلها يتقدموا عليها إزاي..

المهم..

احضر السكاااااااااشن كلها وبانتظام.. عشان غيابك وعشان استفادتك..

والمحاضرات تحضرها مع الدكاترة اللي بتفهم منهم..

ماشي الحال؟؟

بالنسبة للكتب.. فكتب قسم التشريح اللي بتنزل في المكتبات كويسة جدا وشرحها جميل بأمانة.. يعني تشتريها وتذاكر منها فعلا حلوة..

هو أنا ما قلتلكوش إن الكتب بتشتروها في الكلية؟

آه مش زي ثانوي بيوزعوها في المدرسة.. لأ.. هنا حضرتك بتروح المكتبة الفلانية وتسأل عن مثلا كتاب التشريح بتاع القسم.. تدفع وتستلم..

فيه هنا نصيحة لازم تفتكروها كويس أوي......

فيه كتب أطلس (رسومات تشريح يعني) بينزلها دكتور فوزي جاب الله فيها رسومات أكتر من رائعة هتشربك المنهج شرب.. دي لازم تجيبها..

بالنسبة للمكتبات صحيح هتلاقي مكتبة اسمها مكتبة العالمية لتصوير المستندات دي هتلاقي فيها ورق مهم هتحتاجه – زي ما هقلكوا بعدين إن شاء الله – وكمان تصور منها أي حاجة محتاج تصورها..

جوة شوية بقى جنب النادي بتاع الكلية هتلاقي مجموعة من المكتبات فيها كل الكتب الطبية اللي تحلم بيها...

تلخيص لكل نصائحي لتغطية الأناتومي:
بالنسبة للعملي:
1) حضور السكاشن بانتظام والتركيز فيها.

2) فيه جزء خاص بالعظام (Bones) أنصحكوا إن العظام دي تشتروها أو تأجروها من الكلية أو لو فيه حد تعرفوه في سنة تانية يديهالكوا.. لأنها فعلا مهمة جدا.. لأن كل حاجة بتشوفوها وتشتغلوا عليها كتير لحد ما تزهقوا منها.. إلا العظام.. دي بتشوفوها مرة واحدة بس وبعد كدة ما تطلعش تاني لحد.. والمشكلة إن امتحانات العملي بتجيب العظام أدامك ويسألك عليها.. وطبعا لو حضرتك ما شفتهاش غير مرة واحدة – زي ما محسوبكو عمل – مش هتعرف تجاوب أسئلتها خالص.. عشان كدة لااااااااااااازم تتصرفوا في الموضوع دة.. مهم جدااااااااااااااااااااا....

3) التركيييييييييييييز الشديد في امتحان العملي وسرعة التفكير وكتابة الأجوبة لأن نظامه جامد شوية.. لو عايزيني أشرحهولكو أنا تحت أمركو..

4) شراء جوانتيات وفورسبس بشري من أول يوم.

5) الجرأة في التعامل مع الجثث داخل المشرحة.. صدقوني الأكثر جرأة وسرعة في التعامل مع الموقف هو اللي هينجح أكتر من الباقيين.. يعني التكيف السرييييييييع مع الموقف مهم جدااااااااااااااا....

6) التركيز مع المعيد اللي بيشرح واسترجاعه في أي حاجة يتسلقها بسرعة.. وما تتكسفش وانت بتقوله: عيد دي من فضلك عشان ما فهمتهاش.. لأن دة حقك.

7) بعد ما المعيد يخلص تخش على الجثة مع زمايلك وانت لابس الجوانتي وماسك الفورسبس وتشوف كل حاجة بمنتهى منتهى منتهى الوضوح لأن دة هيفيدك جدا.

8) لو فيه حاجة مش واضحة ناقشها مع زمايلك لحد ما تفهمها.. ولو لقيت حد منهم فاهم حاجة انت مش فاهمها كويس.. لازم تجيبه يوضحهالك على الجثة لحد ما تفهمها كويس.. وانت برضه لو فاهم حاجة فهمهاله.. الكلية كدة.

9) لو لقيت زميل ليك وقف يشرح ليكو ما تتريأش عليه واسمع منه وركز معاه.. ساعات والله هيفهمك حاجات يعجز المعيدين نفسهم انهم يفهموهالك.

10) من الآخر لازم تبقى لمض ومفتح وروش وما تسيبش حاجة تعدي من غير ما تشوفها كويس جدا.

11) نصيحة مهمة قالهالنا دكتور مدحت – الله يكرمه – إنك لازم تتنقّل بين الجثث.. ما تشوفش على جثة واحدة بس.. لأ.. دة انت تلف وتروح وتيجي وتتفرج على اللي اتشرحلك على كووووووووووووول الجثث.. ومش في مشرحتك بس.. لأ.. فيه عندنا مشرحتين.. (أ) و (ب).. تشوف الجثث اللي في الاتنين..
دة هيديك خبرة كبيرة جدا عشان امتحانات العملي..

12) اهتم قبل امتحان العملي بالمراجعة الشاملة مع زمايلك على الجثة.. يعني مثلا لو هتمتحنو على الثوراكس (الصدر).. لازم تراجع كوووووووول حتة في صدر الجثة وتشوف كل حاجة بمنتهى الوضوح وتحفظ شكلها ومكانها صم.

بالنسبة للنظري:

1) أولا تجهز نفسك من الأجازة كدة بشوية ملفات أناتومي حلوة تنزلها على الجهاز.. شوية صور وتحابيش كدة.. هتلاقيها ع المنتدى..

2) الحضور مع أفضل الدكاترة المتاحين.. تروحلهم بدري عشان تلاقي مكان تعد.. ولو رحت متأخر تقف.. المهم تحضر معاهم عشان تفهم..
اوعى تغلط زيي وتحضر مع دكتور مش فاهم منه بحجة إن المدرج فاضي وانت ما بتحبش الزحمة والخنقة.. لأن كله في النهاية هيضرك انت...

3) تجيب كتب الأطلس بتاعة د/ فوزي جاب الله.... هام جدا.........

4) تذاااااااااااكر كويس.. وأظن أنا وضحتلكوا الحكاية دي قبل كدة.

5) لو ليك استفسار اسأل عن حاجة اسمها Office hour ودي عبارة عن أوقات معينة بيتفرغ فيها الدكاترة للإجابة عن أسئلة الطلبة في مكاتبهم بقسم التشريح.. وتروح تسأل.. اوعى تطنش.. اللي بيتطنش ما بيرجعش.. وما بيتعوضش..

بصوا بقى لو فيه أي استفسار عن الأناتومي (التشريح) أنا تحت أمركو...

قبل ما أتنقل على الفسيولوجي (علم وظائف الأعضاء) لأنه موضوع طوييييييييييييل.....

في انتظار آراءكم واستفساراتكم..

جميل جدا الشرح الوافى ده يا دكتور
بجد هاستفيد كتير وخاصة من اسماء الدكاترة والمكتبات والكلام ده كله
بجد حضرتك شوقتنى اكتر للكلية نفسى اروحها دلوقتى حالا

بالنسبة للورق والكتب اللى بينزل بيبقى سهل الحصول عليها ولا لازم انا اللى اسأل وأدور واتابع باستمرار

بس سؤال بيلح عليا
دلوقتى انا عارف طبعا ان الكلية محتاجة مذاكرة وتركيز
بالنسبة للمذاكرة مطلوبة من اول يوم اخد فيه محاضرات ؟؟

وبالنسبة للمكتبة هل اقدر اذاكر فيها ولا لأ
لان المدينة طبعا صعب ان الواحد يركز فيها
استفسار بعد اذن حضرتك يا دكتور

بالنسبة للتقسيمات اللى بتعملها الكلية للمدرجات والسكاشن والكلام ده كله
هى بتبقى بترتيب الحروف الأبجدية ؟؟
يعنى لو مثلا حرف النون هيدرس فى المدرجات والسكاشن الأخيرة ..؟؟
وهل مواعيد محاضرات وسكاشن كل مجموعة بيختلف كتيير عن مواعيد المجموعة التانية
يعنى حضرتك مثلا قولت انا دلوقتى حضرت فى مجموعتى مافيش مانع احضر فى مدرج تانى طيب المواعيد بتكون مناسبة لكده يعنى متقاربه من بعضها ولا مختلفة كتيير ؟؟

بالنسبة للكتب هى بتنزل بدرى ولا بتتأخر ؟؟

اولا:أرقام الجلوس بيتم وضعها فعلا تبعا لترتيب الحروف الأبجدية.. يعني ما أنا مثلا كنت حرف الميم.. كنت رقم 849 وكنت في آخر مجموعة 7
يعني حضرتك هتكون فعلا في المجموعات الأخرانية بس دة ملوش أي تأثير وما ينتجش عنه أي مشاكل..
ما تقلقش........

ثانيا: بالنسبة للسكاشن فحضرتك لازم تحضر في السكشن اللي انتي تبعه.. وهتتقيد بمواعيد معينة ما ينفعش تتغير.. السكاشن كدة..

لكن المحاضرات لأ.. فيه جدول محاضرات كبييييير بينزل وبيوضح الجدول بتاع كل مدرج كويس جدا..

مثلا لو افترضنا إن عندك محاضرة أناتومي في مدرج 7 مع دكتور (س) وفيه في نفس الوقت محاضرة أناتومي لدكتور انتي عايزاه في مدرج 5

تقدر ببساطة تحضري في مدرج 5

وعلى فكرة فيه تنسيق كبير جدا بين المدرجات بحيث إن نفس المادة بتتاخد في نفس الوقت في مدرجين أو أكثر عشان تبقى فيه حرية أكبر..

ثالثا: بالنسبة للكتب فطبعا مش هتنزل من أول يوم.. يعني لازم تبدأ في حضور المحاضرات.. 4 أو 5 محاضرات كدة وبعدين هتلاقي الكتاب نزل..

أحسن حاجة تسجل كل حاجة من الدكتور في ورق أثناء الشرح سواء الكتاب موجود ولا لأ..
دة هيساعدك كتيييييييييييييييير...

رابعا: مفيش حاجة سهلة يا دكتور.. الورق بينزل لكن ما بيندهش ويقول أنا نزلت.. أكيد لازم تلف وتسأل.. معلش لازم نزرع عشان نحصد...

خامسا: آه.. المذاكرة مطلوبة من أول يوم.. بس ما تشدش جامد.. يعني لو أخدت حاجة بسيطة ذاكرها واقفل الكتاب..

دة في الأول بس لحد ما تلاقي إنك أخدت كذا محاضرة فراجعي آخر واحدة وبعدين اعملي مراجعة شاملة على كوووووووووله..

سادسا: المكتبة آه طبعا ذاكر فيها.. الجو بيبقى هادئ جدا ومشجع على المذاكرة..

بداية شكرا جزيلا يا دكتور على التوضيح
بس بصراحة انا برده قلقان
دايما الحروف الأخيرة بتتظلم فى جداول الامتحانات مثلا وفى المدرجات اللى هاندرس فيها

وفعلا زى ما حضرتك قولت لازم تزرع عشان تحصد
ربنا معانا


سؤال أخير قبل ما حضرتك تبدأ فى المادة التانية

بالنسبة للدكاترة ...!!

بيتعاملوا مع الطلبة ازاى ؟؟
*** بقى وكده ولا فيه هدوء شوية فى المعاملة ؟؟

وبالنسبة ل office hour هل من السهل على اى طالب انه يحضرها ؟؟

أولا: أحب أؤكد لحضرتك إن الأرقام الأخيرة زيها زي الأولى لا يوجد فرق أو ظلم..

وحضرتك هتتأكد من كدة بنفسك بعد دخول الكلية..

ثانيا: الدكاترة مش ممكن يتعاملوا ب***.. خلاص حضراتكم ما عنتوش صغيرين..

بالعكس تماما، معظم الدكاترة خاصة المشهورين منهم ليهم أسلوب رائع ولذيذ في الشرح والتعامل مع الطلبة.. زي ما يكونوا أولادهم بالظبط.. يعني بيهزروا ويضحكوا ويخلوا جو المحاضرة أكثر من رائع..

دي فعلا من أهم المميزات اللي لاحظتها في كليتنا...
ثالثا: بالنسبة للأوفيس آور طبعا من حق أي طالب إنه يحضرها بس يسأل على الميعاد والمكان ويروح بدري شوية عشان يعرف يسأل براحته..

والدكاترة متعاونين جداااااااااا....

موضوعات وأسئلة طويلة ولذيذة وجميلة طرحها دكتور المستقبل
وهي كالتالي:
بسم الله الرحمن الرحيم

السؤال الاول:ما الفرق بين المحاضرة والسكشن؟وايهما افضل؟

السؤال الثاني: كيف يمكن التعامل مع الدكاترة والمعيدين في الجامعة؟

السؤال الثالث :ماهو امتحان الشفوي(الذي يهابه الجميع)؟وهل هذا حقيقة ؟وكيف يمكن التصرف فيه؟وهل يجب الحضور ببدلة؟

السؤال الرابع:هل الامتحانات في الجامعة اصعب أم في الثانوية العامة؟

السؤال الحامس: سمعت ان كلية الطب تكثر بها الدروس فهل من تاضروري اخذ دروس في الجامعة؟وهل هي ضرورية للتفوق للحصول غلي مراكز متقدمة علي مستوي الدفعة؟

السؤال السادس : كيف اصل لمركز متقدم علي مستوى الدفعة؟(مهم جدا )

السؤال السابع:هل الواسطة موجودة داخل الكلية ؟وما مدي تاثيرها علي الطلاب الاخرين ؟

السؤال الثامن :هل يعطي الدكاترة للطلبة حقوقهم ام يظلمونهم ؟

السؤال التاسع:كيف يمكن تكوين صداقات داخل اسوار الجامعة

السؤال العاشر:ماهي نظم المذاكرة في كلية الطب؟وهل تختلف كثيرا عن الثانوية العامة

السؤال الحادي عشر:هل الانجليزي صعب داخل الكلية؟

السؤال الثاني عشر :ماذا افعل في يومي الاول في الجامعة؟وماذا اتصرف؟

السؤال الثالث عشر:حتما اي كلية تعتمد علي الحفظ والفهم معا فهل تعتمد كلية الطب علي الحفظ اكثر من الفهم؟ولا النظام ازاي؟

السؤال الرابع عشر:هل توجد امتحانات نصف العام في كل المواد ام في مواد معينة ام ماذا ؟وهل توجد اجازة نصف عام وهل يأخدها الطلاب ام انها مثل الثانوية العامة توجد علي الورق فقط ولايأخذها الطلاب ام ماذا؟

السؤال الخامس العشر:كيف اهيئ نفسي معنويا لدخول الكلية؟

أولا:أهلا وسهلا بيك يا دكتور ويا رب تحقق في الكلية كل أمنياتك ورغباتك وطموحاتك...

ثانيا:بالنسبة لأسئلتك فهي بجد بجد رائعة.. لدرجة إن المفروض أخصص لكل سؤال منهم موضوع كامل.. لكن هحاول أجاوبك بإيجاز يا بوحميد...

الفرق بين المحاضرة والسكشن
المحاضرة يا بوحميد تمثل الدراسة النظرية.. اللي انت بتمتحن عليهاامتحانات التحريري... زيها زي أي درس اتشرحلك في الثانوي.. لكن جوالمحاضرات طبعا بيختلف كتير عن جو دروس ثانوي.. بتبقى اللغة مختلفةوالكمية أكبر نوعا ما..

إنما السكشن دة المعمل.. المكان اللي بتشوف وتنفذ فيه شغلك العملي.. يعنيمثلا تجارب كيميائية.. مشاهدة جسم الإنسان وفحصه.. عينات أنسجة تحتالميكروسكوب.. تجارب طبية لدراسة أعضاء الجسم.. وهكذا..

وطبعا يا بوحميد ما ينفعش نقارن بين المحاضرة والسكشن.. لأن الاتنين لاغنى عنهم.. وكل منهم بيقوم بدور هام.. مفيش دكتور ناجح بدون الدراسةالنظرية والعملية معا....

التعامل مع الدكاترة والمعيدين
السؤال دة اتكرر كتير أوي..
يا جماعة أنا حاسس إنكو فاكرين إن الدكتور دة بعبع.. وإنه بيزعق وبيتنرفز بسرعة وبيشخط ويهزق أي حد.. و و و....
لأ خالص..
الدكاترة بيتعاملوا مع الطلبة بمنتهى الاحترام والتقدير.. وبيعاملوكو فعلا كدة لأنكم ناس كبار عارفين مصلحتكم..
ولو حد حاول يلخبط نظام المدرج أو يهرج بيقوم الدكتور يخرجه برة بكل هدوء.. ونادر جدا أما يتسحب من حد الكارنيه حتى لو عمل إيه.....
التعامل في منتهى الاحترام....

بالنسبة للمعيدين فأنت هتلاقيهم قريبين من سنك ومعظمهم هاديين وطيبين ومحترمين إلى أقصى الحدود..

من الآخر كل شيء في الكلية بيمشي بهدوء واحترام سواء طلبة أو هيئة تدريس أو إدارة...

الامتحان الشفوي
دة امتحان في آخر السنة لكل مادة.. بتقعد أدام الدكاترة ويسألوك شوية أسئلة..

حكاية الخوف والرهبة فدي مش في محلها إلى حد كبير لأن معظم الدكاترةبيكونوا عايزين مصلحة الطالب اللي أدامهم.. وما بيصدقوا يقول حاجة عشانيحطوله درجة كويسة.. ومع ابتسامة حلوة كدة كل الرهبة هتزول يا بوحميد..

ولكن اللي أسمعه - وما شفتوش إطلاقا - إن فيه قلة قليلة من الدكاترة بيحبوا يعقدوا الطلبة وبيرزلوا بالأسئلة جامد..
لكن حتى دول بيحطوا درجات حلوة برضه!
ما تقلقش خالص......

أهم حاجة تكون واثق في الله وفي نفسك وفي معلوماتك.. الأسئلة معظمها سهلوواضح وصريح جدا.. فلو حضرتك حافظت على أعصابك وجاوبت بهدوء هتاخد درجاتك كااااااااااملة..

ومش لازم خاااااالص تحضر ببدلة مش شرط.. لكن البعض بيبالغ في التأنق عشان يدي انطباع حلو للدكتور.. بس المهم الاجابات يا بوحميد!

هجاوب باقي أسئلة حضرتك حالا

السؤال الرابع:هل الامتحانات في الجامعة اصعب أم في الثانوية العامة؟
شوف يا بوحميد..
الفرق بين الجامعة والمدرسة كالفرق بين السماء والأرض.. كل شيء مختلف.. من أول لغة الدراسة.. مرورا بنظام الدراسة والمواعيد والحضور لحد الامتحانات.. كل شيء مختلف...

لكن القاعدة العامة إن اللي مذاكر كل حاجة صح وعامل اللي عليه.. والأهم اللي فاهم نظام الكلية صح.. هو دة اللي هيقفل الامتحانات وهيرتب ع الدفعة..

حكاية صعبة ولا سهلة دي بقى بتبقى تبع تساهيل ربنا.. المهم تعمل اللي عليك.......

السؤال الحامس: سمعت ان كلية الطب تكثر بها الدروس فهل من تاضروري اخذ دروس في الجامعة؟وهل هي ضرورية للتفوق للحصول غلي مراكز متقدمة علي مستوي الدفعة؟
الحقيقة اللي سمعته دة مظبوط..

المذاكرة والحضور والاجتهاد كل دة كويس.. ولكن ممكن بعض الأحيان تكون الدروس أقوى تأثيرا من دة كله....

لعدة أسباب.. أهمها إنك بتحضر مع دكتور واحد متميز باستمرار ودة ما بيحصلش ف الكلية.. وبيفهمك كل حااااااااجة كويس جدا.. وبيأكدلك على الأسئلة المهمة المتكررة.. بيشربك المنهج شرب في الدرس يعني..

عشان كدة لو كنت ميسر الحال فالأفضل تتجه للدروس...

بس بالإصرار والعزيمة والاجتهاد.. أكيد برضه ربنا هيكرمك......
السؤال السادس : كيف اصل لمركز متقدم علي مستوى الدفعة؟(مهم جدا )
دة بقى هعمله بإذن الله موضوع مستقل..
السؤال السابع:هل الواسطة موجودة داخل الكلية ؟وما مدي تاثيرها علي الطلاب الاخرين ؟
الواسطة موجودة في كوووووووول حتة..

وطبعا تأثيرها الأول والوحيد هو الضرر والتدمير.. لكن صدقني اللي ربنا معاه ما يهموش حد ولا حاجة.. قرب بس من ربنا واعمل اللي عليك..
وبلاش تفكر في الحكاية دي لأنها هتمخولك..
السؤال الثامن :هل يعطي الدكاترة للطلبة حقوقهم ام يظلمونهم ؟
على حد علمي..
وبشكل عام..

معظم الدكاترة ما بيحبوش يظلموا حد في التصحيح.. وبيقفوا جنب الطلبة بجد في كل المواقف....

معظمهم بجد جدعان جدا........
السؤال التاسع:كيف يمكن تكوين صداقات داخل اسوار الجامعة
انت وشطارتك بقى يا بوحميد..

خليك كدة اجتماعي.. اتكلم مع دة ودردش مع دة وخد وادي لأن دة هينفعك جدا...

السؤال العاشر:ماهي نظم المذاكرة في كلية الطب؟وهل تختلف كثيرا عن الثانوية العامة
برضه بإذن الله هتكلم عن الموضوع دة.. يا إما هنا يا إما في موضوع منفصل...
تابعونا....
السؤال الحادي عشر:هل الانجليزي صعب داخل الكلية؟
لأ خالص...

وهتتعود عليه بسرعة جدا...

بس نصيحة بقولها دايما...

اشترى قاموس المصطلحات الطبية من إحدى مكتبات الكلية.. هيفيدك جدا.........
السؤال الثاني عشر :ماذا افعل في يومي الاول في الجامعة؟وماذا اتصرف؟
ولا أي حاجة..

حضرتك هتخش زي الباشا.. وتحضر كام محاضرة عمي.. وتاخد ع الناس والجو.. وتتكيف أكتر مع الكلية..

وكله بعد كدة هيمشىىىىىىىى....
السؤال الثالث عشر:حتما اي كلية تعتمد علي الحفظ والفهم معا فهل تعتمد كلية الطب علي الحفظ اكثر من الفهم؟ولا النظام ازاي؟
حقيقة سؤال كويس جدا..

بص.. عندنا.. أساس الحفظ إنك تفهم.. فلو فهمت هتحفظ.. ولو ما فهمتش مش هتعرف تحفظ...

ولو ما فهمتش وحشرت الكلام في دماغك هتلاقيه طااااااااااااار كل شوية..

يعني: افهم عشان الحفظ ييجي...

لكن بلا شك طبعا نسبة الحفظ كبييييييرة جدا....
السؤال الرابع عشر:هل توجد امتحانات نصف العام في كل المواد ام في مواد معينة ام ماذا ؟وهل توجد اجازة نصف عام وهل يأخدها الطلاب ام انها مثل الثانوية العامة توجد علي الورق فقط ولايأخذها الطلاب ام ماذا؟
امتحانات نصف العام تكون في كل المواد..

والأجازة موجودة والحمد لله..

تقدر تعيش حياتك فيها (مش على الورق)...

أو تراجع وتذاكر!!!! (على الورق)....
السؤال الخامس العشر:كيف اهيئ نفسي معنويا لدخول الكلية؟
مهمة أوي التهيئة المعنوية دي يا بوحميد...

أولا: تؤمن بقضاء الله وقدره وإن الخيرة فيما اختاره الله.. يعني تقتنع بنصيبك....

ثانيا: تصر على إن مجهود ثانوي دة كووووووله ما يضيعش هدر.. وإنك لازم بإذن الله تتفوق مهما كانت الظروف.. هتلاقي نفسك بقيت أسد...

ثالثا: تعرف إنك هتواجه مصاعب ومتاعب كتيييييييييير في الكلية لأنها محتاجة تعب جامد.. وتجهز نفسك لكدة نفسيا...

فلو واجهت المصاعب دي هتهون عليك..

ولو ما واجهتهاش هتكون مستعد لكل شيء...

وربنا معاك...

في انتظار المزيد يا دكتور

السلام عليكم
1-ممكن توضيح اكتر لاسلوب امتحانات العملى
اناكنت متخيل ان امتحان الشفوى بيكون محتاج تركيز اعلى من العملى
وان امتحان العملى بيكون اسهل كتير
2-معامل التحاليل ممكن تفيدنا؟؟؟؟؟
يعنى لو روحت اتدرب ف معمل ف الاجازه ....ده هايفيدنى ف الدراسه؟؟؟؟
3-هل فى محاضرات او سكاشن بتتلغى؟؟؟؟
4-الدراسه حتبدأ بجد من اول يوم؟؟خاصة ان العيد حايكون فاضل عليه يمكن 10 ايام...



لكم منى جزيل الشكر

امتحان العملي

بصي يا دكتورة.. امتحان العملي أكيد بيختلف من مادة للتانية.. يعني مثلا في التشريح بيكون مطلوب منك تتعرفي على أماكن معينة على العظام أو الجثث وتجاوبي بعض الأسئلة عنها..
في الفسيولوجي بيكون مطلوب منك تجاوبي بعض الأسئلة عن تجارب على أعضاء الجسم.. وتعملي تجربة واحدة منهم بنفسك وتدوني نتائجها..
في البيو بيكون فيه عينتين كيميائيتين مطلوب منك التعرف عليهم بإجراء عدة تجارب كيميائية وتسجيل التجارب دي على الورق.....
في الهستولوجي بيكون عبارة عن شرائح أنسجة بتشوفيها إما على آلة العرض (البروجيكتور) وإما تحت الميكروسكوب.. بتتعرفي على الشريحة وتكتبي بياناتها وتجاوبي على الأسئلة......

بشكل عام تعتبر امتحانات العملي في منتهى الوضوح والسهولة.. دي حقيقة بجد...

امتحان الشفوي

والله والله مفيش أي داعي للقلق منه.. مش عارف ليه الكل بيبقى بيموت وهو داخل ع الدكتور كأنه هي***ه ولا حاجة...
دول الغالبية العظمى من دكاترتنا بيتمنوا إن الطالب يجاوب على السؤال إن شاالله نص إجابة عشان يدوله الدرجة.. وبيبتسموله وبيضحكوله وبيهزروا معاه وبيخلوه في أحسن وضع وحال......
والله ما تقلقوا نفسكم وخلوا ثقتكم كبيرة في الله وفي أنفسكم ومذاكرتكم.......

بشكل عام بقى الاتنين محتاجين تركيز..
وعشان أوضح لحضرتك الموضوع أنا هكتب موضوع كامل عن امتحان عملي التشريح.....
بالنسبه لموضوع معامل التحاليل ولا ليه اى علاقه بشغلنا

احنا مطالبين فى كل التحاليل الكيميائيه تقريبا بالنسب الطبيعيه

و دى بنعرفها فى كل ماده لما يجى الكلام عن النسبه دى

و فى اغلب الاحيان معامل التحاليل بتكتب النسبه الطبيعيه جنب النتيجه


لكن

فيه حاجات تانيه مهمه

زى مثلا الوقوف فى الصيدليه
بعد سنه تالته علشان تتعرفى على الادويه و الاسماء التجاريه ليها

او مثلا تقفى فى استقبال اى مستشفى
اعتقد دى بعد سنه رابعه

المطلوب دلوقتى ان حضراتكم

تريحوا اعصابكم

و تروقوا دماغكم
و ان شاء الله هتكون اجمل سنوات حياتكم على الاطلاق هى سنوات طب قصر العينى
بالنسبة للمحاضرات والسكاشن فهي ما بتتلغيش إلا للضرورة القصوى.. والقصوى جدا...
الدكاترة بيكونوا متمسكين إنهم يوصلوا المعلومة للطالب أكتر من الطالب نفسه.. وبيستغلوا كل لحظة في المحاضرة وبيزعلوا أوي لو دقيقة عدت من غير شغل...

نفس الكلام بالنسبة للسكاشن...
من الاخر هتلاقي حضرتك جو من الإلتزام حواليكي في كل شيء..

أفتكر في مرة إن كانت فيه ندوة في الكلية عاملها د/ حاتم الجبلي وزير الصحة.. وقالولنا لازم تحضروا الندوة..
بس على مين..
كان فيه ساعتها محاضرة للدكتور مدحت..
هو راح ع المدرج واحنا بدأنا نتسرسب واحد واحد لحد ما ملينا المدرج.......

الالتزام هو السمة الأساسية يا دكتورة

بالنسبة للدراسة فهي جدية إلى حد كبير من أول يوم.. ولو إن الكمية بتكون طبعا مش كبيرة ولكن مرحلة التكيف اللي بتمروا بيها بتخلي كل شيء صعب لأول عدة أسابيع ف الدراسة..
على الرغم إن الكلام نفسه بيكون سهل والكمية ما بتكونش كبيرة..

وفي انتظار المزيد يا دكتور

امتحان عملي التشريح بكلية طب قصر العيني – الفرقة الأولى

نظام امتحان عملي التشريح نظام جيد جدا..

ولكن كأي نظام آخر أكيد له عيوبه ومميزاته..

الامتحان دة بيتعمل في نص السنة وفي آخر السنة..

حضراتكم بتدخلو المشرحة وبتقعدو كلكم وفي إيد كل واحد منكم ورقة إجابة بتتوزع عليه قبل ما يدخل..

بتكون المشرحة مقسمة على هيئة 4 صفوف بحيث إن كل صف يبدأ بكرسي وأدام الكرسي دة من 6 إلى 10 ترابيزات مترتبة كلها أدام بعض...

وعلى كل ترابيزة عينة..

إما عظمة معينة من جسم الإنسان وإما جزء معين من أجزائه.. ذراع مثلا..

ما حدش يقوللي بقى الخوف والأرف والكلام دة.. ما احنا اتفقنا إن كل دة هيزول تماما مع التعود بإذن الله..

أول 4 بيدخلوا بيقعدوا على الـ 4 كراسي.. ووراهم بيقعد الطلبة اللي جايين بعدهم..

كل طالب بيسيب الكرسي بتاعه ويقف أدام أول ترابيزة يفحص العينة اللي أدامه ويشوف الورقة اللي متثبتة على الترابيزة واللي فيها الأسئلة وبعدين يجاوب في ورقة الإجابة..
وفي نفس الوقت بيدخل طالب جديد من الطلبة اللي قاعدين ورا عشان يقعد على الكرسي اللي هو سابه..

ولما يخلص الوقت بينادي أحد المعيدين: Move

هنا لازم الطالب اللي قدام أول ترابيزة يسيبها ويروح للترابيزة التانية.. والطالب اللي وراه وقاعد على الكرسي لازم يسيبه ويقف مكانه قدام أول ترابيزة...

وهكذا لحد ما تخلص كل الترابيزات......

النظام كويس والأسئلة واضحة وسهلة ولكن العامل الوحيد اللي ممكن يكون ضدك هو الوقت.....

لازم تتعرف على العينة وتقرأ الأسئلة وتجاوب عليها بسرعة..

عشان كدة الموضوع بيبقى محتاج تركيز عالي وتوفيق كبير..

يا ريت أكون قدرت أوصل لكم الموقف..

هدفي بس إنكو تعرفو إن لازم يكون مخكو معاكو وشغال كويس في امتحان العملي..

والأهم إنكو تكونو شفتو العينات والعظام والجثث كويس جدا قبل امتحان العملي..

وربنا معاكو.........

ياللا سلاااااااااااااااااااااااااام

أسيبكم تقرؤوا السابق

وبعدين سأكمل لاحقا باذن الله

مستني ردودكم

ان شاء الموضوع القادم عن الفسيولوجي

سلاااااااااااااااااااااااااااااااااااااااااااااااا ااااااام والى لقاء قادم ان شاء الله

شكرا على هذة المعلومات

جزاك الله كل خير يا دكتور محمد على هذه المعلومات الرائعة والمفيدة
فى انتظار الباقى

السكاشن مختلطة ؟؟

سؤال برىء


أولا: أهلا بحضرتك مرة تانية.. ومشاركاتك كانت وهتفضل بإذن الله منورانا...


بالنسبة للسؤال................
طبعا سؤال بريء..

بس أنا بس مستغرب إن الحكاية دي شاغلة بال ناس كتير من اللي داخلين الكلية..

حكاية الاختلاط دي مقلقاهم.......

شوفي يا دكتورة..

لو حضرتك دخلتي السكاشن هتلاقي طلبة وطالبات من كل نوع..

اختلاف تام في العادات والتقاليد والقيم والأخلاق والالتزام وما إلى آخره..

ولكن فيه حقيقة واحدة بتفرض نفسها..

إن الإنسان المصر على الالتزام بالقيم والأخلاق بيفرض التزامه دة على كل اللي بيتعامل معاه..

السكاشن مختلطة؟؟؟

آه.. مهو الاختلاط بقى ظاهرة عااااااااامة في المجتمع.. خلاص بقى حقيقة لازم نتعامل معاها..

السكاشن مختلطة؟؟؟؟

آه.. لكن أؤكد لك إنك هتلاقي البنات واخدين ركن وقاعدين مع بعض.. والولاد نفس الكلام..

السكاشن مختلطة؟؟؟؟؟؟

آه.. لكن الاحترام هو الصفة السائدة في المكان والتعامل ما بيكونش إلا في إطار من القيم والأخلاق...

السكاشن مختلطة؟؟؟؟؟؟؟؟؟؟؟؟؟

آه.. يعني من الآخر اللي عايز يعمل اللي يرضي ربنا هيعمله.. وبمنتهى السهولة..

وطالما الاحترام مغلف الجو العام وطلب العلم هو الصفة السائدة يبقى كله هيبقى تمام...

يا رب أكون قدرت أوصلك المعنى لأن الموضوع دة اتكرر أكتر من مرة......

وفعلا بجد أنا تحت أمركو وباستنى استفساراتكو..

عندى استفسار يا دكاترة بعد اذن حضراتكم

انا سمعت عن المجموع التراكمى اللى على اساسه يبقى التعيين (ده لو فيه تكليف لينا يعنى ..!!!)

المهم

انا بس عايزة اعرف هو بيتحسب من تقدير اى سنة ؟؟

هل هو بيتحسب من تقديرات السنين كلها ولا من بداية سنة معينة ؟؟


وسؤال بقى عشان اطمن ياريت لو حد يعرف التكليف فعلا هايتلغى ولا كان مجرد كلام ..!!

المجموع التراكمي بيتحسب من أول لحظة تدخلي فيها الكلية.. يعني بدون مبالغة أي امتحان بتمتحنيه - وما أكثرها - بتأثر في المجموع التراكمي..

ما أنا لما جبت جيد السنة اللي فاتت قالولي خلاص يا حبيبي راح عليك التعيين..

يلا... بلاش نقلب المواجع......

يعني المجموع التراكمي ناتج عن تقديرات كووووووووول السنين.. من أول سنة أولى..

بالنسبة لحكاية التكليف

كنت عايز أطنشها عشان ما يبقاش فينا من زعل..

بس يلا..

في ندوة عملها الدكتور حاتم الجبلي وزير الصحة في مركز المؤتمرات بالكلية السنة اللي فاتت.. قال إن أعداد طلبة الطب في مصر زادت بشكل مستفز وملفت للنظر.. وإن مش ممكن كل دول يتعينوا في كليات بعد التخرج.. وعلى كل منهم أن يبحث عن نفسه بنفسه..

ولكن أعلن إن هو مسئول عن تعيين كل خريج حتى دفعة 2014 بإذن الله.. والدفعة دي هي دفعتي.. الدفعة اللي قبلكوا علطول..

ولكن دة مش معناه إنكو مش هتتعينو أو إن التكليف بتاعكوا اتلغى.. أولا لأن الظروف ممكن تختلف من لحظة للتانية.. وممكن ييجي وزير تاني.. وممكن تحصل حاجات كتييييييييير..

المهم إن غالبا بإذن الله الموضوع دة هيتحسم تماما خلال السنة الجاية..

تابع :نظام الدراسة بكلية طب قصر العيني – الفرقة الأولى

-------------------------



المادة الثانية

الفسيولوجي (علم وظائف الأعضاء)


مادة الفسيولوجي من المواد المحببة جدا لكل الطلبة..

دة لأنها مادة جميلة بتكلمك في حاجات انت عايز تعرفها.. وهتتشوق كل يوم أكتر من اللي قبله في إنك تعرف عنها أكتر وأكتر......

منهج الفسيولوجي للفرقة الأولى يشمل:

1) مقدمة Introduction to Physiology

2) الجهاز العصبي اللاإرادي Autonomic Nervous System

3) الأعصاب والعضلات Nerve and Muscle

4) الدم Blood

5) التنفس Respiration

6) الدورة الدموية Circulation

وطبعا هذه الأقسام موزعة على الترمين.. يعني بتمتحن امتحان ترم أول على اللي انت أخدته.. وفي آخر السنة بتمتحن امتحان على كوووووووووول المنهج..

طبعا واضح إن الفسيولوجي مادة ضخمة وكبيرة جدا..

لكن ممتعة جدا جدا جداااااااااااااااااااااااا..

هنتفق دلوقت اتفاق لا غنى عنه أبدا..

أي حد عنده كمبيوتر من حضراتكم – بلا شك أكيد فيه – لازم يجيب محاضرات دكتور ناجي ودكتور ألبيرت..

الدكتورين دول بيعملوا محاضرات مشتركة مع بعض في منتهى منتهى الجمال لا غنى عنها أبدا..

وبإذن الله في أقرب فرصة هتنزل المحاضرات دي على المنتدى للفرقة الأولى...

المحاضرات دي هتشربك أكتر من 95% من المنهج..

الـ 5% اللي وقعت دي ما بتكونش بسبب عيب في الدكتورين ولكن غالبا بسبب عيوب التسجيل وعدم نقاء الصوت..

هتقولولي طب وهما ما بيدوش محاضرات في الكلية؟

هقولكم لأ للأسف..

طبعا ممكن ميسري الحال ياخدوا معاهم درس برة الكلية ودة اكيد هيبقى أفضل من مجرد السمع...

المهم إن الـ 5% اللي هتقع دي بقى ممكن تعوضها بالحضور مع الدكاترة المتوفرين بالكلية..

أفضل الدكاترة دول من وجهة نظري الدكتورة هدى لشرح المقدمة والجهاز العصبي اللاإرادي والدكتورة منى عبد العزيز لشرح الدم..

المهم إن المحاضرات اللي قلتلك عليها تجيبها قبل بدء الدراسة...

خد بالك بقى إن معظم الفسيولوجي بيعتمد على الفهم.. يعني تركز مع الشرح جدا وتحط كل مخك في اللي بيتقالك..

فيه نظام أسئلة MCQ أو الاختيار من متعدد يسود أسئلة امتحان نصف العام وبيلعب أولا وأخيرا على وتر الفهم..

مهم جدا تتابعو في المكتبات الكتب اللي بتنزل باستمرار.. وكتب الأسئلة تشتروها وتحلوا كل جزء تسمعوا محاضراته وتفهموه.. دة هيسهل عليكم كتيييييير..

وربنا معاكو..

لسة الفسيولوجي ما خلصش..

هنتكلم عن نظام امتحان النظري والعملي شوية لأن دة مهم جدا.....

لينا لقاء قريب إن شاء الله...

وفي انتظار استفساراتكم..

بجد جميل جدا ومعلومات مفيدة جدا
جزاك الله خيرا يا دكتور

اخيرا دخلنا فى الفسيولوجي
فى انتظار الباقى

جزاك الله خيراااااااااااااااااااااااا على هذه المعلومات المفيده جدااااااااااااااااااا

بالنسبة لاسئلة ال Mcq عايزة بس اعرف نظامها فى القاهرة ايه ؟؟


طب ما هي المحاضرات ممكن تجيبيها على شرايط..

وتسمعيها على أي تسجيل عادي..

المهم بس تجيبي المحاضرات على سيديهات أو أي وسيلة تانية وموضوع نقلها دة مش هيبقى مشكلة إن شاء الله..

وممكن جدا تستفسري عن الموضوع دة من زميلاتك رواد المدينة وطبعا هتلاقي أكتر من حل بإذن الله..

وبكدة نضمن الـ 95%

النسبة للـ MCQ لو خدتيها بالحفظ ممكن تحلي ربعها أو تلتها على أقصى تقدير صح.. والباقي غلط..

لأن عندنا في طب القاهرة بيبقى التركيز كله منصب على الفهم والأسئلة فعلا محتاجة واحد فاااااااااهم كل كلمة قبل ما يكون حافظ...

دة حتى بينزلوا كتاب مليان أسئلة إم سي كيو قبل الامتحان وبيجيبوا منه أسئلة كتير..

الناس اللي فاهمين صح ما كانوش بياخدوا بالهم إن السؤال دة شافوه قبل كدة........

لأنهم اعتمدوا على الفهم وتشغيل الدماغ...

معايا؟

تابع :نظام الدراسة بكلية طب قصر العيني – الفرقة الأولى

-------------------------

بالنسبة لامتحان نظري الفسيولوجي لنصف العام فدة بيكون فعلا مكافأة لكل واحد ذاكر وفهم كويس..

دة لأن الامتحان بيكون كله عبارة عن أسئلة MCQ أو اختيار من متعدد وبالتالي يعتمد زي ما قلنا قبل كدة على الفهم..

مطلوب جدا أثناء امتحان النظري وأثناء إجابة أسئلة الاختيارات بالذات.. مطلوب التركيز الشديد والتأني..

على فكرة الوقت بيكون مناسب جدا.. كافي للتفكير بهدوء وكذا مرة قبل الإجابة وكمان كافي للمراجعة بعد الإجابة..

من الآخر فعلا امتحان نص السنة بيبقى هدية..

في امتحان النظري آخر السنة بتبدأ أسئلة تانية تدخل في الموضوع.. أهمها أسئلة المقال وأسئلة حل المشكلات Problem Solving والمسائل..

يكفي إنك تركز مع الدكتور ناجي وألبيرت في الشرح وتفهم منهم كويس.. وتذاكر حلو.. وتتمرن بحل شوية أسئلة..

على فكرة الدكاترة بيأكدولك على الأسئلة اللي تنفع مقال واللي تنفع إم سي كيو واللي تنفع مسائل حسابية وهكذا.. ما تقلقش..

بالمناسبة المفروض تجيب آلة حاسبة لأن في الفسيولوجي بتكون فيه مسائل حسابية وشوية قوانين كدة.. بتتكتب في كتاب النظري والدكاترة بيشرحوها وبعدين بتتراجع في كتاب العملي مع ربطها بشوية تجارب..

بينزل كتاب خاص بعملي الفسيولوجي.. دة بيحتوي على كل تجارب الفسيولوجي بخطواتها ومشاهداتها واستنتاجاتها وبيكون معاها شوية أسئلة..

أهه أسئلة امتحان العملي بتكون جاية من الكتاب دة بالظبط..

عشان كدة نصيحتي ليكم إنكم تحلوا كل أسئلة كتاب العملي....

طبعا إحنا اتفقنا إن حضور السكاشن لا غنى عنه.. أي سكشن حضرتك بتغيبه ما بيتعوضش وبتدفع تمنه غالي..

عارف ليه؟

لأن فيه تجربة بتتشرح أو بتتعمل في كل سكشن.. فلو حضرتك غبت سكشن فسيولوجي.. أولا بتتاخد غياب.. ثانيا بيضيع منك شرح التجربة (وعلى فكرة كتير من معيدين الفسيولوجي على مستوى عال جدا وخسارة ما تحضرلهمش).. ثالثا ممكن تحصل المصيبة الحقيقية..
إن التجربة تتعمل وتتنفذ وحضرتك مش موجود.. ساعتها انت مش هتشوف حاجة ولا هتعمل حاجة.. ولو جتلك التجربة دي في الامتحان هتضطر تسيبها فاضية أو تحل غلط....

عشان كدة غياب السكاشن ممنوووووووووووووووع..

اللهم قد بلغت اللهم فاشهد...

المهم..

فيه تجارب حلوة أوي هتستفيد منها جدا..

أهمها تعيين فصائل الدم عمليا.. وقياس ضغط الدم..

هتحس لما تتعلم دول إنك بقيت دكتور صحيح..

خصوصا لما تجيب جهاز الضغط إن شاء الله وتلاقي الهتافات من حواليك.. دكتور أنا حاسس إني دايخ تعال قيس لي الضغط........... وبعدين.. ربنا يكرمك..

في امتحان العملي أولا بتاخد ورقة إجابة وتخش على ترابيزة محطوط عليها عدة تجارب اتعملت خلاص.. وهتلاقي ورقة ملزوقة ومكتوب عليها الأسئلة.. زي مثلا حجم العينة دي كام.. هي النسبة دي طبيعية ولا لأة.. وكدة يعني..

وبعدين بتخش على تجربة أخيرة..

دي بقى مش بتشوفها لكن بتعملها من الألف إلى الياء..

ولما تخلص التجربة مطلوب منك فقط تكتب النتيجة النهائية..

يعني لو كانت عن فصائل الدم تكتب إن الفصيلة طلعت مثلا O negative

المفروض بعد كدة تمشي...... صح؟؟

لأ.. فيه حاجة لازم تعرفها..

بعد امتحان العملي بتقعد أدام دكتور وبيسألك سؤال شفوي أو اتنين ع السريع كدة..

دة مش انتقام والله.. بالعكس.. دول بس بيهيئوك لامتحان الشفوي عشان ما تصطدمش بيه آخر السنة..

ولو اتلخبطت أو اتبرجلت أو كدة هتلاقيهم هما بيساعدوك وبيبتسمولك وبيشجعوك.. لحد ما تجاوب وتاخد درجتك وتمشي...

مش قلتلكم إن الثقة بالنفس والتركيز مطلوبين جدا؟

فيه مراجعة عامة بينزلها د/ ناجي وألبيرت على كتاب العملي كله هتلاقيها هنا ع المنتدى.. دي فعلا هامة جدا.....

ولنا لقاء جديد...

في انتظار استفساراتكم......

بالنسبة لامتحانات الشفوى عليها أد ايه ؟؟
الواحد طبعا هايبقى داخل خايف وقلقان مهما كان واثق من نفسه او مركز أكيد هايرتبك أول مرة ومش هايقدر يقول كل اللى عنده وده طبعا هايأثر على ترتيب معلوماته واجابته
فياترى بيبقى عليه درجة كبيرة ولا ايه نظامه بالظبط ...؟؟

بالنسبة لامتحانات الشفوي .. في اول سنين الكلية الدرجات بتبقي قليلة بالنسبة للسنين بعد كدة
يعني محدش يحمل هم لجنة شفوي ب 15 درجة مثلا خاااااااالص
لو حد قلقان من الشفوي يفتكر ان بعد كدة في النسا امتحان اخر السنة الشفوي لوحدة ب 150 درجة وفي يوم واحد وغير الاطفال..الامتحان 200 درجة برضه في يوم واحد

يعني مفيش داعي للقلق خااااااالص من امتحان ب 15 او حتي 30 نمرة

وربنا يوفقكم جميعا

تابع :نظام الدراسة بكلية طب قصر العيني – الفرقة الأولى

-------------------------



المادة الثالثة

البيو كمستري (علم الكيمياء الحيوية الطبية)




علم الكيمياء الحيوية الطبية ضرورة لا بد منها عند دراسة الطب..

ببساطة، لأن العلم دة هو أساس دراسة مجال الصيدلة وتحضير الأدوية..

فجسم الإنسان بيتكون من مجموعة من الأجهزة والأعضاء اللي بيدرسها علم التشريح..
وفيه وظائف بتقوم بيها الأعضاء دي مع التكامل بين كل هذه الوظائف ودة مجال علم الفسيولوجي..
كمان تتم داخل جسم الإنسان باستمرار مجموعات ضخمة من التفاعلات الكيميائية.. فعمليات تنفس الخلايا وتبادل الغازات والدورة الدموية وحرق الغذاء وهضمه.. كل دة – وغيره كتيييييير – ما هو إلا تفاعلات كيميائية..

أنا واحد من الناس ما كنتش مقتنع أبدا بالكيمياء في كلية الطب.. وكنت حاسس إنها مش هتنفعنا إطلاقا.. ولكن اكتشفت إنها مفيدة مفيدة مفيدة إلى أقصى درجة..

أهم حاجة تقتنع بأهمية اللي انت بتدرسه عشان تقبل عليه بحب وتنسوا بقى أيام الثانوي أما كنا بندرس إعراب وفلسفة واقتصاد وحاجات مالهاش أي علاقة بكليتنا دلوقت..

يلا.. ما علينا.. بلاش نقلب في اللي فات..

المهم..

لو عايز تفهم الكيمياء وتحبها وتستمتع بيها.. مفيش غير الدكتور رشيد..

هو فعلا عبقري الكيمياء الحيوية في كليتنا بلا منازع..

وهو شخصية فريدة رائعة عشان كدة هتكلم عنه أدام بإذن الله..

مطلوب من حضرتك حاجة من الاتنين:

إما إنك تجيب محاضرات الدكتور رشيد وتسمعها.. وهتلاقي المحاضرات ع المنتدى مش هتروح بعيد يعني..

وإما إنك تحضر مع الدكتور رشيد في الكلية..

آه.. بيعمل محاضرات كل سنة لأولى ولتانية كمان..

بس المحاضرات دي بتكون قبل أول سكشن.. بتبدأ الساعة 7 إلا ربع وتنتهي الساعة 8 وبعدها علطول تطير على السكشن..

وبيعملها 3 أيام في الأسبوع..

أعتقد إن المواعيد دي مش هتتغير السنة الجاية ولو حصل هيكون تغيير طفيف..

الدكتور رشيد بيشرح من كتاب خاص بيه.. بينزل في المكتبات كتابين للدكتور رشيد.. واحد للشرح التفصيلي والآخر للتوضيح..

أهه كتاب التوضيح دة هو اللي بيشرح منه دكتور رشيد..

لو عندك المحاضرات في البيت ع الكمبيوتر أو التسجيل أو غيره، ما عليك غير إنك تمسك الكتاب زي الباشا وتمشي مع الدكتور..

ولو هتحضر معاه في الكلية جيب الكتاب معاك..

بس نصيحة لازم تجيب الكتاب.. فيه ناس كانوا بيعتمدوا على إن الدكتور رشيد بيجيب الكتاب معاه ويعرض صفحاته مع تكبيرها على البروجكتور ويشرح عليها.. وبالتالي كانوا بيقولوا نجيب الكتاب معانا ليه..

لأ انت بقى خليك ناصح وهات معاك الكتاب عشان تدون فيه أي ملحوظة الدكتور يقولها ويا حبذا لو جبت معاك شوية ورق تكتب فيهم الملحوظات دي براحتك..

ومع محاضرات الدكتور رشيد هتكون ضمنت كل منهج النظري تماما بإذن الله..

بس فيه حاجة مهمة..

البيو من أكتر المواد اللي بتتنسي بسرعة.. يعني سريعة التبخر.. محتاجة مراجعة مستمرة.. وتلخيصها باسلوب لذيذ إن أمكن.. وعلى حسب برضه طريقة مذاكرتك..

اللي أنا متأكد منه إن كل واحد ليه طريقة مذاكرته.. وإن مفيش طريقة معينة هي اللي بتوصل للتفوق بس.. لأن كل واحد ليه طريقته..

ولكن فيه أساسيات لازم نتبعها.. وهي دي اللي عملت المواضيع دي عشانها..

بالنسبة للعملي فدة ممتع وجميل جدا.. وبجد والله مضمون جدا جدا..

أكتر حاجة في الكلية ممكن تجيب فيها الدرجة النهائية وانت مغمض هي عملي البيو..

هي عبارة عن مجموعة من التجارب الكيميائية.. بنستخدمها عشان نتعرف على عينة معينة.. قد تكون العينة دي سكريات ونشويات.. قد تكون دهنيات.. قد تكون بروتينات..

من أحلى الأمور في سكشن البيو واللي هيخليك ما تزهقش منه أبدا إنه متنوع.. أولا هو سكشن واحد في الأسبوع..

أسبوع بتدخل تقعد مع زملائك كلهم في هيئة صفوف.. وأدام كل مجموعة بتبقى فيه شاشة عرض كبيرة..

المعيد بيقف أدامكو كلكو ويبدأ في الشرح وهو شغال على كمبيوتر..

بيتعرض على الشاشات الكبيرة كل اللي بيعمله المعيد على الكمبيوتر..

وسيلة تكنولوجية جيدة للتعلم بصراحة.. شرائح باوربوينت عبارة عن كلام وصور وأفلام فيديو قصيرة (Animations) يتم عرضها بأسلوب شيق وجميل..

الأمور دي بتخرجك من جو الكتب وتدخلك في عالم الكمبيوتر والألوان الجميلة..

وفيه حاجة مهمة جدا..

منهج البيو يعتمد في جانب كبير منه على التخيل والقدرة على تصور الأحداث.. يقولك كذا قرب من كذا وبعدين لزق في كذا وبعدين خرج كذا وبعدين اتحررت طاقة بمقدار كذا وبعدين دة جه مكان كذا..........

أهي بقى الـ Animations دي هتساعدك جدا لأنها بتجسم كل حاجة أدامك وبتوريك اللي بيحصل أدام عينيك بألوان واضحة وأسلوب شيق..

بدال بقى ما تمقق عينيك في الكتب..

وبرضه ع المنتدى هتلاقي مجموعة كبيرة من الأنيميشنز توضحلك أهم الأمور..

في السكشن التالي يبدأوا بقى يشرحولك التجارب اللي في المنهج.. تجربة كذا بنستخدمها عشان كذا وبنعرف بيها كذا وبنعملها بالطريقة الفلانية.. لو طلع كذا تبقى العينة كذا ولو طلع كذا تبقى العينة كذا..

يعني بنشغل نظام الاستبعاد..

مثلا في السكريات والنشويات بتكون فيه 6 عينات..

بتعمل الأول تجربة لو طلعت نتيجتها سلبية تستبعد عينة منهم ويبقى أدامك 5

وتعمل تجربة كمان فتستبعد واحدة كمان ويبقى أدامك 4

وهكذا لحد ما توصل للعينة المطلوبة..

هو دة نظام السكيم Scheme

ما عليك غير إنك تحفظ التجارب بتتعمل إزاي وتعملها بإيديك كذا مرة عشان تتعود عليها.. وبعدين هيجيبولك آخر السنة عينة عشان تتعرف عليها..

حاجة سهلة وتاااااااااااااااااااااااااااافهة جدا والله العظيم..

أكتر حاجة هتحسسك إن الكلية سهلة..

مش كنت قلتلكم على مكتبة العالمية لتصوير المستندات قبل كدة؟

المكتبة دي هتلاقي فيها السكيم اللي هتحتاجه في امتحان العملي وكمان بينزل فيها ورق لشرح محاضرات دكتور ناجي وألبيرت بتوع الفسيولوجي..

لو حسيت بالحاجة ليهم روح جيبهم..

واتفقنا على حاجة برضه قبل كدة إياك تنساها..

الفهم هو الأساس.. تفهم الأول وبعدين الحفظ هييجي مع المذاكرة..

عشان دكاترتنا بيحبوا يركزوا على الفهم جدا في امتحاناتهم خاصة امتحانات نص السنة...

وفي امتحان الشفوي مش هزود عن اللي قلته قبل كدة..

الاستعانة بالله والتوكل عليه.. المذاكرة الجيدة.. الهدوء والثقة بالنفس..

يعني صدقوني مادة البيو إلى حد كبير سهلة ومضمونة لكن للي هيعرف النظام صح ويتبع النصائح اللي قلتهالكو ويشد حيله جااااااااامد..

وربنا معاكو كلكم ياااااااااااا رب..

ولنا لقاء آخر..

وفي انتظار استفساراتكم...

سلااااااااااام دلوقت

وان شاء الله هنكمل في لقاء قادم

بس بالله عليكم اللي يستفيد من الموضوع

يدعوا لي ان ربنا يوفقني في الكليه

ويدعوا لكاتب الموضوع د/ محمد فخري

مع السلامه

جزاك الله كل خير يا دكتور محمد
وربنا يوفقك ويوفقنا فى الكلية
فى انتظار الباقى

جزاك الله خيرا يا دكتور
ويارب يوفقك ويوفقنا فى الكلية دى
باين عليها فعلا زى مابيقولوا كلية النفس الطويل
ربنا يوفقنا
ومستنياك تكمل باذن الله
شكرا

شكرا يا دكتور على الموضوع القيم .... و منتظرين المزيد

اوك

شكرا على الردود

هأكمل ان شاء الله

جـــــــــــــزاك الله خيرا و اعانك على خدمة اخوانك و زملائك ان شـــاء الله

الدروس في الكلية

1) هل هي منتشرة؟
للأسف آه.. كتير جدا من الدفعة بياخدوا دروس.. ولكن دة بيكتر في مواد معينة زي الأناتومي والفسيولوجي..
ممكن على أول السنة ما تلاقيش كتير لكن الأعداد بتزيد تدريجيا بشكل رهيب..

2) إيه نظامها؟
أي دكتور بيدي درس لازم يشرح للطلبة حرفيا زي كتاب القسم.. يعني لو نزل ورق للطلبة بيكون الورق دة نسخة طبق الأصل من كتاب القسم.. لأن الامتحان بييجي من الكتاب دة..(كتاب القسم )

ولكن شوية تعديل وتنظيم وتنقيط وترقيم بيحولوا الكتاب دة لملازم وورق!

كووووووووووووول الامتحانات لازم تيجي من كتب الأقسام.. لازم..

3) كتب الأقسام هي الكتب الأساسية ويجب شراؤها عند نزولها بالمكتبات..

نظام شرحها بكل أمانة متميز جدا ولكن بتكون محتاجة نوع من التنظيم مش أكتر..

ممكن تعملي لنفسك شوية تلخيصات منظمة بخطك وأسلوبك من كتب القسم إن أمكن..

بس نصيحة ما تشتتيش نفسك وحاولي تذاكري من مصدر واحد فقط.. والأفضل طبعا كتب الأقسام..

وموضوع عناد الدكاترة دة مش موجود إطلاقا لأن الدكاترة المتميزين خلاص اتعرفوا وبقوا أمر واقع..

ودكاترة طب قصر العيني من أفضل الدكاترة علما وخلقا..

يا رب أكون قدرت أفيدك..

شكرا يا دكتور اكرم على المرور الجميل ده

وهذا واجبنا يا بني

سلاااااااااااااااااااااام

يا جماعه على فكره الموضوع منقول من موقع ( اسمه مش هاقدر اقول عشان مخالف لقوانين المنتدى )

واللي كاتبه طالب داخل سنه تانيه اسمه محمد فخري ( هو برضو ناقله تقريبا )

انا فقط واسطه بنقله وكل ما ينزل جديد هاكتبه

وكل ما هلاقي حاجه جديه في اي موقع هجيبها لكم عشان كلنا نستفيد


سلاااااااااااااااااااااااااااااااااااااااااااااااا م

تابع : نظام الدراسة بكلية طب قصر العيني – الفرقة الأولى

-------------------------


المادة الرابعة

الهستولوجي (علم الأنسجة)



شهد الناس كلهم إن الهستولوجي هو أسهل وأتفه مادة في كلية الطب..

بداية لازم تعرف إن علم الهستولوجي بيكلمك عن دراسة الأنسجة..

زي ما حضرتك عرفت قبل كدة فإن جسم الإنسان يتركب من أجهزة.. والأجهزة من أعضاء.. والأعضاء من أنسجة.. والأنسجة من خلايا..

أهه علم الهستولوجي بيوضحلك أنسجة الجسم وأنواعها وأماكن انتشارها ووظائفها وكدة.. وفيه قسم جواه بيتكلم عن الخلايا بكل أنواعها..

هو الهستولوجي على الرغم من تفاهته إلا أنه رخم وتقيل على القلب حبتين..

يعني مش هتحبه زي باقي المواد (مهو برضه لازم حاجة تتخنق منها ف الكلية)..

لكن حضرتك هتحفظ وتسجل في دماغك البيانات زي الكمبيوتر..

يتضمن كتاب الهستولوجي بتاع القسم أجزاء عديدة منها:

1) علم دراسة الخلايا Cytology

2) علم الجينات والوراثة Cytogenetics

3) النسيج الطلائي Epithelial Tissue

4) النسيج الضام Connective Tissue

5) الدم Blood

6) الغضاريف والعظام Cartilages and Bones

7) النسيج اللمفاوي Lymphatic Tissue

8) الجلد Skin

الأمور دي حضرتك بتدرسها من الناحية المجهرية البحتة.. يعني شكل الخلايا والأنسجة تحت الميكروسكوب..

وبيكون عندك حاجتين لازم تعرفهم كويس وهيقرفوك بيهم طووووووول السنة..

- صورة تحت الميكروسكوب الإلكتروني EM picture

- صورة تحت الميكروسكوب الضوئي LM picture

وكل عينة لازم تعرف شكلها تحت الاتنين كويس..

وبعدين فيه صبغات معينة بنستخدمها.. ممكن الصبغات دي تلائم عينات معينة وعينات تانية لأ.. وممكن عينة تظهر تحت الصبغة دي كويس وتحت صبغة تانية تبان باهتة ومش واضحة..

عشان كدة لازم تحفظ أسماء الصبغات اللي بنستخدمها مع كل عينة..

على فكرة حضرتك ما بتحطش أي صبغات ولا بتجهز أي عينات.. كل حاجة بتكون جاهزة في المعمل وما عليك غير إنك تتفرج..

فيه بقى كلام مهم........

الهستولوجي ممكن يتذاكر من كتاب القسم من غير اعتماد على شرح أي دكتور..

بس الطريقة دي هتخلي حاجات كتيييييييير ما تبقاش واضحة ومش هتفهمها خصوصا إنك لسة ما خدتش ع الإنجليزي..

المهم إن من الأفضل حضور محاضرات الهستولوجي بانتظام في الكلية..

بالنسبة لميسري الحال فالأحسن ياخدوا درس فيه..

وبالنسبة للباقي فمفيش حل غير الحضور مع أفضل الدكاترة المتاحين في الكلية..

أفضل الناس اللي ممكن يفهموك هستولوجي على الإطلاق الدكتورة جيهان..

تليها مباشرة الدكتورة داليا..

لو نزلوا المدرجات يشرحوا فيها هتلاقي كووول الكلية بتحضر معاهم وهيكون الازدحام رهييييييييييب ولازم توصل بدري عشان تلاقي مكان..

المهم إنك تحاول تجيب المعلومة بأي طريقة..

وبكل صراحة فيه مجموعة كبييييييييرة من دكاترة الهستولوجي في كليتنا ما بيعرفوش حتى يفهموا نفسهم حاجة.. ولازم تتجنب الحضور معاهم قدر المستطاع..

لكن بشكل عام حضرتك هتلاقي الهستولوجي ماشي لوحده أصلا خصوصا لما تحضر السكاشن بانتظام وتركز مع المعيد اللي هيشرحلك بهدوء وبطء وهيراجعلك على كل نقطة..

وخصوصا كمان مع Office Hour اللي لازم تستفيد منها كويس جدا وتستوضح فيها كل شيء انت مش فاهمه كويس..

عرفت كدة قواعد مذاكرة الهستولوجي هتبقى إيه؟؟؟

تحضر مع أفضل الدكاترة المتاحين..

تذاكر أول بأول وتلخص الأمور الغير واضحة في كتاب القسم إن أمكن..

وتسأل عن أي شيء يقف أدامك...

بالنسبة للعملي فحضرتك المفروض تشتري إن شاء الله كتاب العملي..

ودة كتاب فيه شرح مبسط مختصر مع صفحات فاضية كتيييييييير تسمح لحضرتك برسم كل العينات والشرائح..

وطبعا مش كلنا غاويين رسم لدرجة إننا نرسم الحاجات دي لوحدنا..

لأ.. اطمن..

بينزل كتاب أطلس الهستولوجي المصور.. ودة بيحتوي على صور عالية الجودة والجمال لكل شرائح ورسومات المنهج..

ومع كل سكشن بتنقل شوية عينات من الأطلس لكتاب العملي بتاعك..

وطبعا هتحتاج ألوان.. عامل السكشن بيبيعها ما تقلقش..

ما حدّش يفكر يطنش أي رسومات في كتاب العملي بتاع الهستولوجي..

وبالمناسبة لازم معيد الفسيولوجي يوقعلك في كتاب عملي الفسيولوجي كل سكشن..

وكمان كتاب عملي البيو لازم المعيدين يوقعوا فيه ويدوك تقييم Grade

ما حدش ينسى يرسم.. وما حدش ينسى يخلي المعيدين يوقعوله..

لأن الحاجات دي عليها درجاااااااااااااااااااااااااااااااااااااااااا اات..

أظن واضح؟

كويس...

ناقص امتحان الشفوي في آخر السنة..

الغالبية العظمى من دكاترة الهستولوجي (حوالي 95%) من الجنس اللطيف.. وبالتالي هتلاقي عندهم طيبة جاية طبعا من غريزة الأمومة..

وبالتالي هيريحوك جدا بإذن الله في امتحان الشفوي خصوصا من ناحية الدرجات..

في امتحان شفوي الهستولوجي بيدخل 3 طلبة مع بعض للدكتورة (حسب ترتيب أرقام الجلوس) وبيقعدوا أدامها..

وفي هدوء وبساطة تبدأ تسأل الأول سؤال.. وبعدين تسأل التاني سؤال.. وبعدين التالت سؤال.. وهكذا..

بفرض إن واحد ما عرفش يجاوب بتستنى عليه شوية عشان يفكر.. لو خلاص مش عارف بتسمح لواحد من الاتنين التانيين إنهم يجاوبوا..

المهم إن التلاتة بيخرجوا من عند الدكتورة بعد ما تكون قيمت كل واحد تمااااااام..

أفتكر إن موقف غريب حصل ليا أنا واتنين زمايلي في الامتحان دة..

إحنا مش آخر ناس في الدفعة.. وأرقام جلوسنا مش آخر الأرقام..

وعلى الرغم من كدة ندهوا لكل الناس.. اللي قبلنا.. واللي بعدنا..

وطنشونا احنا تماما..

واتركنا وقت طوييييييييييييييييييييييييل..

وحسينا إن كل حاجة ذاكرناها طارت مع الريح.. لدرجة إني كنت هكسر السكشن اللي ركنونا جواه واتخانقت مع العامل أكتر من مرة..

ولما قررت – بعض ما فاض بيا الكيل – إني أطلع على رئيسة القسم لقيتهم بيقولولنا تعالوا امتحنو !!!

يا سلااااااااااااااااااااااااااااااااااااااااام. ..

إيه الهدوء والبرود دة!

دخلنا للدكتورة واحنا متحطمين وأعصابنا بايظة وقربنا نعيط خلاص..

لقيناها أم لينا بكل معنى الكلمة.. الوجه الطيب.. الكلمة الحسنة.. المعاملة الرائعة.. الابتسامة الحلوة..

وقدرت إنها ترجعلنا ثقتنا بنفسنا وبقينا أحسن من الأول.. ربنا يكرمها..

المهم قعدت تسألنا كدة ببساطة كأنها بتدردش معانا.. وكل اللي عنده معلومة عن السؤال كان بيقولها..

سألتنا في المنهج كله تقريبا وجاوبناها كويس واتبسطت مننا جدا..

وخرجنا من عندها واحنا بندعيلها ومازلت بدعيلها لحد دلوقت..

عشان كدة صدقني.. مش الشفوي اللي يقلق في الهستولوجي..

لكن العملي هو اللي ممكن يقلق شوية..

ليه؟

في امتحان العملي بتدخل مجموعة كبيرة من الطلبة جوة السكشن وبتتوزع على كل واحد ورقة فيها خمس أقسام.. وكل قسم فيه خمس أماكن فاضية..

يعني 25 سؤال..

بتتعرض أدامك على البروجكتور 5 شرائح وكل شريحة عليها 5 أسئلة..

كتير من الشرائح بتبقى جاية من الأطلس وانتو متعودين عليها..

لكن بعضها بتكونوا حضراتكم ما شفتهوش قبل دة إطلاقا..

طب نتصرف معاهم إزاي؟؟

فيه طريقتين..

إما عن طريق الإنترنت وتنزيل شرائح هستولوجي وكل ما فيه توضيح للمنهج..

وإما عن طريق المكتبة.. تديهم الكارنيه وتطلب منهم أطلس هستولوجي كويس وتقعد تبص على صوره والبيانات اللي عليها وتقارنها بصور الأطلس..

مرة على مرة هتبقى ضمنت الشرائح دي في جيبك بإذن الله..

بعد كدة بيدخلوكو على مجموعة كبيرة من الميكروسكوبات وحضرتك بتبص على بعض الشرائح اللي تحت الميكروسكوبات دي.. ولازم خلال وقت معين – وقصير على فكرة – تتعرف على الشريحة وتكتب تعليق Comment عليها..

يعني اتعرفت عليها إزاي يعني..

الموضوع محتاج تمرين كتير شوية وإنك تكون شفت الشرائح مرات عديييييييييييييدة عشان تقدر تجاوب بالسرعة المطلوبة..

صدقوني بس لو حرصتم على النصائح دي..

وجهزتوا لكل حاجة صح..

كل شيء هيبقى تمااااااااااااااااااااااااااااااااااااااااام. .



كدة أبقى خلصت الأربع مواد..

بس لسة عندي كلام تاني!!!

لو زهقتو مني قولولي عشان ما أتقلش عليكم..

اتفقنا؟

زهقنا؟ لا طبعا
جزاك الله خيرا
ويارب يوفقك ويوفقنا وتكون ايامنا فى القصر العينى احلى ايام حياتنا
كمل يا دكتور

لو زهقتو مني قولولي عشان ما أتقلش عليكم..

اتفقنا؟

هنزهقأ من ايه دا الموضوع جميل ولديد جدا
ربنا يوفقق ويوفقنا فى القصر العينى
منتظرين الكلام المتبقى
انا الحقيقة مكنتش اعرف حاجه عن الموضوع دا خالص
وجزاك الله كل خير يا دكتور محمد

كلامك بصراحة ما يتزهقش منه

ايه يا دكتور محمد انت ماكملتش ليه بقالك 3 ايام
فى انتظار التكملة

تابع :نظام الدراسة بكلية طب قصر العيني – الفرقة الأولى



-------------------------





*شخصيات بارزة ورائعة ومتميزة في كلية طب قصر العيني*






الدكتور مدحت







فيه شخصيات يا جماعة لما تتعاملو معاها لازم تحبوها وتحترموها وتقدروها.. وممكن كمان من كتر إعجابكو بيها تخلوها مثل أعلى ليكو في حياتكم..



من أهم الشخصيات دي الدكتور مدحت..



كمقدمة عنه، هو راجل طويل أنيق وسيم، شعره أبيض إلا القليل، دايما بيحسس الكل انه مرتاح ومبسوط بغض النظر عن حالته النفسية ودايما ابتسامته لا تفارق شفتيه..



شخصية ترتاحلها لله في لله أول ما عينك تشوفها.. أسلوب أكتر من رائع في الكلام والتعامل والاحترام.. حتى في الهزار بيكون في قمة الاحترام..



أما عن مادته – الأناتومي – فهو عملاق التشريح بلا منازع.. فاهم كل حرف في مادته والأهم إنه بقدر يفهمك كل حرف كويس جدا جدا..



لأ دة مش بيكتفي بكدة بس.. دة بيشربلك المنهج شرب.. يحدد لك الأسئلة المهمة.. دة مثلا ينفع ييجي مقال.. دة مهم في الإم سي كيو.. وهكذا..



محاضرته أول ما تبدأ تلاقي الكل كأن على رؤوسهم الطير.. لازم الكل يسمعله بإعجاب وتقدير..



وهتلاقي نفسك – لا إراديا – مأخوذ ومشدود لأسلوب شرحه الأكتر من رائع.. وإنك فعلا بجد مش عايز المحاضرة تخلص.. نفسك إنه يفضل يشرح لحد بكرة.. وبدون أي نوع من الملل..



شوقتكو إنكو تشوفوه.. صح؟؟



هو أكيد هينزل ليكو إن شاء الله في بعض المحاضرات.. ولكن ما أضمنش طبعا إنه ينزل في المنهج كله..



عشان كدة لو ما لقيتوش الدكتور مدحت أكيد هتكون فيه بدائل.. أهمها الدكتور إيهاب.. وهو هيكون إلى حد كبير بديل فعال لدكتور مدحت..



طب لو ما لقيناش د/ إيهاب كمان؟؟؟



هتبدأ بقى الأقاويل تتردد عن دكاترة كويسين.. واحد يقول أنا سمعت إن دكتور كذا كويس وبيدي في مدرج كذا.. والتاني يقول لأ دة دكتور كذا أحسن....



ما توجعش دماغك.. دور على دكتور سامح دوس..



لو ما لقيتوش كمان يبقى شوف أحسن المتوفرين واحضر معاه...



نظام محاضرة الدكتور مدحت

طبعا قبل ما الدكتور يدخل المدرج بيكون مليان على عينه.. على عينه بمعنى الكلمة.. عشان كدة لازم تيجي بدري عشان تلحق مكان إن شالله تقف فيه..



يدخل د/ مدحت مع ابتسامة واسعة جميلة ويتكلم مع الطلبة وهو رايح ناحية منصة الشرح.. يطلع عليها ويمسك الميكروفون..



هو من الدكاترة اللي مش مؤمنين بنظام البروجكتور (شاشات العرض) لكن مؤمن أكتر بالطباشير.. عشان كدة بيجيب معاه طباشير بألوان مختلفة.. أبيض وأصفر وأزرق وأحمر..



أول ما يدخل بيمسك الميكروفون ويضربه ضربتين براحة.. أو ينفخ فيه عشان يتأكد إنه شغال.. وبعدين يقول "ش ش ش ش"...



عشان الكل يسكت..



وبعدين يقول كلمة مشهورة جدا في بداية كل محاضرة "يلا يا ولاد"..



بيقولها بسرعة جدا لدرجة إن ودانك مش هتلقطها أول مرة.. هتسمعها "ألا يا ولاد"..



ومع خبطتين ونفختين وهشتين كمان تلاقي المدرج بدأ يسكت.. وينتبه..



طريقة شرحه تخليك فعلا منتبه معاه تماما.. جذابة وجميلة.. ما تقدرش تسرح في أي حاجة طول ما هو بيشرح..



فيه كلمة مشهورة جدا جدا عندنا في الكلية بيقولها د/ مدحت.. لدرجة إن البعض خد الكلمة دي وحطها في قصائد وأبيات شعر..



وممكن تشوف قصيدة "جمهورية القصر العيني" على المنتدى..



الكلمة دي هي: "إحنا في طب قصر العيني (نهيمنّ عشقا) بكذا"



أول ما تسمع نهيمن عشقا على جزء معين من المنهج.. اعرف انه مهم..



ولو الحكاية وصلت لـ (نهيمن عشقا معشوقا) يبقى أكيد الجزء دة جاي ف الامتحان..



مواقف مع الدكتور مدحت

1) كان مرة منهمك جدا ف الشرح.. وكلنا مركزين معاه.. وواحدة رزلة من الطلبة حطت الموبايل بتاعها على منصة الشرح جنب الميكروفون من غير ما تعمله سايلانت..



وفجأة، بدال ما سامعين صوت دكتور مدحت لقينا نفسنا سامعين "نانسي عجرم".. لأ وإيه "آه ونص"..



طبعا الموبايل رنّ والبنت صاحبته كانت في قمة الإحراج وقامت علطول عشان تقفله لكن د/ مدحت سبقها ومسك الموبايل..



كلنا كنا غرقانين في الضحك..



وبنظرة إعجاب مع ابتسامة كدة مسك د/ مدحت الموبايل ( ونانسي عجرم لسة بتغني) وراح اتنهد كدة وهز راسه وقال تعليق ساخر وبعدين رجع الموبايل لصاحبته..



وكلنا غرقنا في الضحك لأكتر من دقيقتين ومش قادرين نسكت..



2) "هرميك بالطباشير"..



كلمة شهيرة برضه لدكتور مدحت.. لما واحد يكون بيرزل شوية يقوم ينقي طباشيرة صغيرة خالص وبعدين يرميها عليه.. كنوع من التحذير يعني.. هتسكت.. ولا أرميك بالطباشير؟؟؟



3) "علمناهم الشحاتة"..



لما دخلنا في المنهج جامد.. وبدأنا نفهم الموضوعات كويس.. ييجي د/ مدحت يشرح حاجة من قبل كدة.. وبعدين يعكس مثلا اليمين مكان الشمال أو يقول اسم عصب غلط من استعجاله في الشرح..



احنا طبعا ما بنسكتش..



كلنا في نفس واحد (كأننا أبو العريف): لأ يا دكتور.. المفروض كذا..



فيبتسم ابتسامة ساخرة مريرة كدة ويضحك ويقول: "هه.. علمناهم الشحاتة"..



بصراحة مش فاكر مواقف تانية دلوقت.. لكن أكيد فيه كتير..



لما أفتكر حاجة جديدة أبقى أحكيهالكو..



تلخيص الكلام عن د/ مدحت إن الراجل دة عملة نادرة مفيش زيها اتنين..



ربنا يكرمه ويكرمنا...


__________________

طيب جميل جدا
كدا بتشوقنا للكليه
جزاك الله كل خير على الموضوع الرااااااااااااااااااااااائع

بارك الله فيك يا ميدوا

وجزاك من الخير مثله

وربنا يوفقنا جميعا

بارك الله فيك يا ميدوا

وجزاك من الخير مثله

وربنا يوفقنا جميعا

امين يا رب العالمين

جزاك الله خيرا يا دكتور

ايه يا محمد مفيش جديد ولا ايه
طيب تسمح لو اى حد عنده معلومات جديدة يضفها

اه طبعا يا د / ميدو اتفضل

وهو ده كلام ده زي بيتك

يا داكترة مش فاهمة حاجة اول يوم ده هنذاكر منين

الكتب بتاعة القسم بتنزل بعدين ؟

والمحضرات مش هنفهمها لدرجة اننا نكتب ورا الدكتور؟

فى حاجة كمان بجد اجيب القاموس والحجات دى أبل الدراسة ؟

ارجوا الاجابة وجزاكم الله كل خير

شكرا جداااااااااااا يا دكتور
الصراحة الموضوع كله من اول صفحة لاخر صفحة شيق و مفيد جدااا
اه....... الصراحة نسيت اعرفكم من جمال الموضوع
اني (ان شاء الله ) داخلة اولى طب قصر العيني
وانا معاكم و مسنية تكمل الموضوع

يا داكترة مش فاهمة حاجة اول يوم ده هنذاكر منين

الكتب بتاعة القسم بتنزل بعدين ؟

والمحضرات مش هنفهمها لدرجة اننا نكتب ورا الدكتور؟

فى حاجة كمان بجد اجيب القاموس والحجات دى أبل الدراسة ؟

ارجوا الاجابة وجزاكم الله كل خير


انا اللى اعرفة ان الكتب بتتاخر شويه على ما تنزل
بس اليومين اللى بتتاخر فيها بيكونوا اول ايام
وبعدين الاسبوع الاول هيكون فى رمضان يعنى ما دخلناش فى الجد
يعنى ممكن نكتب ورا الدكتور مفيش مشكلة

فى حاجة كمان بجد اجيب القاموس والحجات دى أبل الدراسة ؟
القاموس مهم شويه بس مش اوى
يعنى ممكن نجيبه قبل الدراسة او فى الدراسة
اما البالطو والادوات التانيه
فهى مش مهم فى الاول لان السكاشن بتبدا تانى اسبوع من الدراسة

ولو فى اى سؤال انا فى الخدمة

اه طبعا يا د / ميدو اتفضل

وهو ده كلام ده زي بيتك


انا مش قصدى انا ,
قصدى اى حد عاوز يضيف معلومة او يسال سوال

وبعدين فينك يا دوك مسمعتش صوتك من زمان
كل سنة وانت طيب

هو الدراسة حتبدأ جد في الاسبوع اللي في رمضان
ارجو الرد عشان انا متغربة ومحتارة اسافر اقبل ولا بعد العيد

هو الدراسة حتبدأ جد في الاسبوع اللي في رمضان
ارجو الرد عشان انا متغربة ومحتارة اسافر اقبل ولا بعد العيد

قال الدكتور هاني هلال وزير التعليم العالي والبحث العلمي إن العام الجامعي الجديد سيبدأ يوم 20 سبتمبر القادم واشار الي ان موعد الدراسة يتم تحديده من خلال اللائحة التنفيذية لقانون تنظيم الجامعات في الاسبوع الثالث من سبتمبر.. وأننا نأمل في السنوات القادمة أن تبدأ الدراسة السبت الأول من سبتمبر.

http://www.masrawy.com/News/Egypt/Politics/2008/august/6/learning.aspx

شكرااااااااااااااااااا يا د/%medo% (http://www.thanwya.com/vb/member.php?u=61664)

ازيكم يا دكاتره

ايه يا دكتور ميدو انا اهو يا عم انتم اللي محدش شايفكم ولا انت ولا مازن ولا اكرم
وعلى العموم كل عام انت بخير وانت الى الله اقرب يا د/ ميدو

وبالنسبه للدراسه زي ما قال ميدو 21 /9 ان شاء الله

وبالنسبه للاخت المتغربه scorpion-200200

لو هتسكني مدينه جامعيه هي هتبدا بعد اسبوعين او تلاته تقريبا زي ما قالو ا

لكن في طلبه وطالبات كتير بيسكنوا في بيت شباب القاهره امام الكليه مباشرة
هي البنات بتسكن ب 8,5 كل يوم بس في حجز للعشرة ايام على بعضهم يعني 85 جنيه
اما الشباب ب 12,5

وشكرا لكم

وكل عام انتم بخير وعافيه وانتم الى الله اقرب

شكرااااااااااااااااااا يا د/%medo% (http://www.thanwya.com/vb/member.php?u=61664)

العفو
لا شكر على واجب

ازيكم يا دكاتره

ايه يا دكتور ميدو انا اهو يا عم انتم اللي محدش شايفكم ولا انت ولا مازن ولا اكرم
وعلى العموم كل عام انت بخير وانت الى الله اقرب يا د/ ميدو

وبالنسبه للدراسه زي ما قال ميدو 21 /9 ان شاء الله

وبالنسبه للاخت المتغربه scorpion-200200

لو هتسكني مدينه جامعيه هي هتبدا بعد اسبوعين او تلاته تقريبا زي ما قالو ا

لكن في طلبه وطالبات كتير بيسكنوا في بيت شباب القاهره امام الكليه مباشرة
هي البنات بتسكن ب 8,5 كل يوم بس في حجز للعشرة ايام على بعضهم يعني 85 جنيه
اما الشباب ب 12,5

وشكرا لكم

وكل عام انتم بخير وعافيه وانتم الى الله اقرب


كل سنة وانت طيب يا محمد
حلوة اوى معلومة بيت شباب القاهرة
ممكن شوية تفاصيل

وبالنسبه للدراسه زي ما قال ميدو 21 /9 ان شاء الله

هيبقى ان شاء الله يوم 21 لان يوم 20 هيبقى السبت
واحنا عندنا فى طب القاهرة السبت اجازة

يا ميدو باشا التفاصيل

الاسم : بيت شباب القاهره

العنوان : شارع عبد العزيز ال سعود امام القصر العيني (تسال وهم يدلوك )

الاشتراك : عاملين اشتراك او حجز للعشرة ايام اللي قبل العيد من 20 /9 الى 29 /9
سعر الحجز او الاشتراك 125 شاملا السحور

الشروط : يكون معاك كارت عضويه وده بتطلعه من عندهم ب 10 جنيه

كمان خاصيتين كده : انك ممكن تسكن يوم بيوم فيه عادي جدا وممكن اي حد يسكن مش شرط طلبه

نظام السكن : غرفه كبيره بها 6 اسرره كل سريرين فوق بعض يعني 6 طلاب في الغرفه الواحد بس مريه وهادئه وينفع تذاكر فيها

اتمنى اكون قلت كل التفاصيل

السلام عليكم

يا ميدو باشا التفاصيل

الاسم : بيت شباب القاهره

العنوان : شارع عبد العزيز ال سعود امام القصر العيني (تسال وهم يدلوك )

الاشتراك : عاملين اشتراك او حجز للعشرة ايام اللي قبل العيد من 20 /9 الى 29 /9
سعر الحجز او الاشتراك 125 شاملا السحور

الشروط : يكون معاك كارت عضويه وده بتطلعه من عندهم ب 10 جنيه

كمان خاصيتين كده : انك ممكن تسكن يوم بيوم فيه عادي جدا وممكن اي حد يسكن مش شرط طلبه

نظام السكن : غرفه كبيره بها 6 اسرره كل سريرين فوق بعض يعني 6 طلاب في الغرفه الواحد بس مريه وهادئه وينفع تذاكر فيها

اتمنى اكون قلت كل التفاصيل

السلام عليكم



جزاكم الله كل خير على التفاصيل
شكلك نويت تحجز العشرة ايام اللى قبل العيد

اه نويت وحجزت من زمان

يا عم ميدو فينك انت ومازن

اه نويت وحجزت من زمان

يا عم ميدو فينك انت ومازن


كل سنة وانتم طيبين الدراسة بدات
والحمد لله مشيين 100 %
وانا والمحب لرسول الله ومازن بنشوف بعض دايما فى الكلية
والحمد لله

شكرا علي التوضيح يا دكتور انا لسه في اولي ثانوي بس امنيتي ادخل طب وانت حببتني اكتر فيه

ممكن اى محاضرات باوربينت autonomic nervous system

انا خفت مووووت

انا خفت مووووت

ليه كدا بس

انا الحمد لله رايح اولي طب القاهره والف شكر علي الموضوع الرائع جدا جدا جدا يا دك

اخوي الكريم الجامد جدا محب لرسول الله اشكرك من كل قلبي علي المجهود الفظيع ده ...... انا مش ف القصر العيني انا داخل جامعة m.u.s.t و اللي عرفتو ان عظم الاساتذة من عين شمس والقصر العيني ..... زي دكتور فوزي جاب الله ودكتور صلاح عيد فانا عاوز اسألك اية المكتبات اللي بتبيع الكتب بتاعت الكلية عشان اجيبها و اذاكر منها ويا ريت العنوان باتفصيل عشان انا اسيوطي ..

وانا ان شاء الله رايح اولى طب القاهرة وبجد عجبني الموضوع جعله الله في ميزان حسناتك

الموضوع دة بجد شيق جدا وافادنا وغير وجهة النظر عن الكلية

شكرا بجد مكنش هنقدر نواصل الحماس من غير الموضوع دة

يعنى انا كدا افرح ولا ايه بيدينى ايهاب اناتومى الحمد لله بس بجد كلهم زى الفل
وحسن عيسى فسيولوجى رئيس القسم الحمد لله وزكريا عبد الحميد هستولوجى وم فاكرة بتاع البايو بس كلهم الحمد لله كزيسين
بس سؤال ممكن يكون عبيط
انا اعرف دكاترة المجموعات التانية منييييييييييين
يعنى انا مثلا مدرج أ اعرف باقى الدكاترة ازاى لانى معرفش حد خالص ف الكلية دى
شكرا ع الموضوع جدا

نظام الدراسة بكلية طب قصر العيني – الفرقة الأولى

-------------------------


كلية طب قصر العيني هي إحدى كليات الطب العريقة والشهيرة في جمهورية مصر العربية ، ولعلها أيضا أكبر وأشهر مدرسة للطب في العالم العربي والأفريقي..

فعلا يا جماعة ، دي حقيقة ، وهتكتشفوها بنفسكم لما تدخلوا الكلية..

أول ما تروحوا الكلية إن شاء الله بعد موال مكتب التنسيق دة ، هيدوكو دليل الكلية ، ودة بقى بيحتوي على كل المعلومات اللي انتو عايزينها واللي مش عايزينها عن جامعة القاهرة عموما وعن كلية طب قصر العيني خصوصا..

المهم..

أحب أقولكم إن نظام الكلية فعلا رائع ولو فهمتوه صح قبل ما تبدأوا ، دة هيسهل عليكم كتيييييير..

احنا هنا هنتكلم عن الفرقة الأولى..

هتدرس إن شاء الله أربعة مواد أساسية وهي:

الفسيولوجي: (علم وظائف الأعضاء) ودة عليه 250 درجة

الأناتومي: (علم التشريح) ودة عليه برضه 250 درجة

الهستولوجي: (علم دراسة الأنسجة) ودة عليه 150 درجة

البيو كمستري: (علم الكيمياء الحيوية الطبية) ودة عليه 150 درجة

يعني المجموع كله على بعضه 800 درجة

أقولكو حاجة.. بلاش الأسامي الجامدة دي تخضكو.. الموضوع صدقوني لو جهزتوله صح وفهمتوه هيمشي زي الشعرة في العجين..

على فكرة.. الترم الأول لازم تحصل شوية لخبطة كدة عشان نظام الكلية مختلف أوي عن ثانوي.. يعني اتنقلتوا من الاعتماد على الغير إلى الاعتماد على النفس..

الشاطر بقى اللي يتجاوز المرحلة دي بسرعة ويعرف يتكيف مع الوضع..

بس افرحوا دة فيه خبر حلو أوي..

مش قلتلكوا إن مجموع الدرجات كلها 800 درجة؟

أهو الترم الأول كوووووووووووله عليه 115 درجة بس..

يعني اللي موزعين الدرجات – جزاهم الله خيرا – راعوا حكاية التخبط دي وركزوا معظم الدرجات في الترم الثاني..

بالنسبة للسكاشن (المعامل) فدي حكاية حلوة أوي ونظامها هيعجبكم جدا وهتحبوها جدا جدا..

أصل انتو في ثانوي ما كنتوش بتشوفوا حاجة عملي أدامكم إلا نادرا وكانت كل دراستكم نظرية بحتة.. صح؟

لأ هنا بقى فيه جانب كبير عملي وكل حاجة بتشوفوها.. وبتعملوها..

وطبعا بتمتحنوا فيها..

كل يوم فيه سكشن واحد الساعة 8 صباحا لكن فيه يوم واحد بس بيكون فيه سكشنين واحد الساعة 8 صباحا والتاني الساعة 3 عصرا..

بيني وبينكم السكاشن ما بتبدأش غير الساعة 8 ونص لكن لازم تيجي بدري عشان تكون ملتزم وعشان تضمن مكان كويس..

وأهم حاجة عشان الباب بيتقفل الساعة 8 ونص!

المحاضرات بتبدأ الساعة 12 ظهرا وبتنتهي 3 عصرا..

يعني كل يوم 3 محاضرات كل محاضرة منهم ساعة..

كل واحد هيكون ليه رقم جلوس محدد.. وعلى أساسه هيكون ليك مدرج انت تابع ليه..

والمدرجات كلها (باستثناء مدرج أ ومدرج ب) موجودة في مركز تطوير التعليم الطبي ودة مبنى كبير وجميل (حقيقة يعني)..

مدرج أ ومدرج ب موجودين برة المركز وهما أكثر المدرجات اتساعا..

طبعا برضه على حسب رقم جلوسك هتكون تبع مجموعة محددة..

يعني على سبيل المثال: من 849 إلى 950 دول بيمثلوا مجموعة 7

يبقى لو انت 849 أو 950 أو بين الرقمين دول تبقى ضمن مجموعة 7

طبعا لازم تعرف كويس انت تبع مجموعة إيه عشان دة مهم في تحديد المدرج والسكشن اللي انت تبعهم..

جدول المحاضرات ما تقلقش خالص هتلاقي نفسك ماسكه أول ما تدخل الكلية ما تعرفش جالك منين.. فيه مليون مصدر هيديهولك..

حاجة بقى بيني وبينكم..

حكاية انك تبع مجموعة معينة دي تفرض عليك السكشن بس لكن ما تفرضش عليك المدرج..

بمعنى إنك لازم تحضر في السكشن اللي انت تبعه لأن فيه غياب وبيتاخد علطول (مفيش هزار ف الموضوع دة).. فيه ناس اتحرمت من امتحاناتهم أدامي عشان تجاوزوا نسبة الغياب عن السكاشن..

لكن جوة المدرجات مفيش غياب بيتاخد.. وبالتالي انت حر تحضر مع الدكتور اللي انت عاوزه في المدرج اللي انت عاوزه..

كلامي لحد دلوقت مفهوم؟

طب كويس...

فيه حركة بقى الدكاترة بيعملوها عشان يجبروك انك تحضر معاهم في المدرج بتاعهم..

مش بياخدوا الغياب لأن الأعداد كبيييييييييرة جدا طبعا..

لكن بيعملوا حاجة تانية..

هقولكوا على الحركة دي بعدين..

لسة يا جماعة الكلام ما خلصش..

أنا لسة عندي كلام كتييييييييير..

أنا بس عايز مشاركات معايا عشان نكمل بحماس كدة........

فهل من مجيب؟؟؟؟؟؟؟؟
وحكاية تنظيم الوقت والدروس

http://i43.tinypic.com/24xp84n.jpg



هانى وقع فى البير
قصدى
شادى نام على السرير
يوووووووه
قصدى
هابى نيو يير
ههههههههههههههه
كل سنه وانتو طيبين جميعا
وان شاء الله يكون عام سعيد علينا
ان شاء الله
يارب يكون وش السعد والنجاح السنة دى
بأذن الله
ياريت اكون احسن صديق ليكو بأذن الله
وكل سنه وانتو طيبين

http://www.alltalaba.com/board/style_emoticons/default/blowup.gif

http://s5.tinypic.com/2qsw5fc.jpg
مستشار محمود نصار

http://s5.tinypic.com/2qsw5fc.jpg

جميل اوى انا للاسف مش فى القصر العينى السنه دى بس ان شاء الله هحول من الزقازيق فى سنه تانيه وادخل القصر العينى

السلام عليكم يا د/محمد....
اولا انا فى ثانوى حاليا.. وكنت مره كده بدردش مع دكتور اعرفه فقال كلام..نصه الاتى:
(بص يا احمد انتا بتدرس 6 سنين و يبقا اسمك مشروع دكتور اما تنجح او لا قدر الله......
و السنه السابعه بتبقا كعب داير على معظم الاقسام ::باختصار مرمطه:: و السنه السابعه دى هى المهم لو معلمتش نفسك بنفسك يبقى عمرك مهتتعلم حاجه)
و اضاف لكده ان الواحد لو ربنا كرمه وبقا معيد ده بقا بيشوف الويييييييييييييل و الذل اللى محدش شافه لدرجه انه مبيبقاش فاضى ياكل لكن بعد ميخلص الماستر بتاعه يبقا ابواب الحظ اتفتحتله(ولكن هذا ليس سهل المنال) ايه بقا نصائح حضرتك الاول علشان ادخل طب ؟؟؟؟
وثانيا علشان اتخرج منها جراح قلب جامد كده زى د/مجدى يعقوب؟؟؟

مبالغ انا صح؟؟؟؟؟؟؟
لكن فى حكمه بتقول
ChallengeYourSelf ....NothingIsImpossible

السلام عليكم
بعد اذن حضرتك يا دكتور انا كان ليا سؤال بس مالوش علاقه بالموضوع
الناس اللى هيا بتشتغل على الامراض الجديده و الادويه و كده(اقصد اللى بيبقوا فى المستقبل علماء)
دول بياخدوا الطريق ده ازاى؟؟؟

موضوع رائع و جميل و افادنى بمعلومات عن الكليه اللى نفسى ادخلها ....
بس انا كان ليا سؤال محيرنى...
هو ليه كل دكتور بيتخرج من كلية الطب بيفتح عياده و اخره لما بيقول انا اكتفيت يعمل دكتوراه و دمتم
يعنى مبنسمعش عن حد فى مصر بيشتغل خبير طبى او مثلا باحث او دكتور جامعى متفرغ للبحث او دكاتره بتشتغل على امراض و بيحاولو يحللوها و يكتشفو لها علاجات .... و الحاجات اللى تفرح دى
فلو الحاجات دى موجوده فعلا ياريت حد يفرحنى علشان الامل يرجعلى تانى....
انا اسف على الظره التشائميه دى بس مبلغ علمى ان دى الحقيقه

جزاك الله كل خير

ليه ماخدش جائزة نوبل في الطب؟

ميرسي بجدددددددد

ربنا يسهل دراستك و يحفظ موضوع مفيييييد


ادعووولي ادخل طب القاهرهـ !!!!!!!

الله يباركلك و يريح قلبك و يوفقك بإذن الله , والله حببتنا فى الكلية كتيييييير

رائع بارك الله فى مجهودك

والله انا مهما قولت مش هقدر اوفيك حقك من الشكر

جزاك الله خيرا يا اخى

ربنا يكرمك ويوفقك

موضوع رائع بجد

شكرا على المعلومات القيمة انا هدخل طب عين شمس ان شاء اللة فهيكون فى اختلاف بينها و ين القصر العينى في المعلومات دى؟

بجد اعجز عن الشكر ............... جزاك الله خيرا كثيرا وبارك فيك ورفع بهذا العمل الرااااااااااااااائع قدرك ............

في انتظار جديدكم

جزاك الله خيراااااااااا

انا مش دكتور ولكن الموضوع شيق جدا جدا وجزاك الله كل خير

جزاك الله كل خير بس انا مش لاقيه قناه فرسان القصر على اليوتيوب
ممكن تحط الرابط هنا؟
معلش سؤال تانى
انا دلوقتى فى اجازه . ابدا اعمل ايه علشان استعد لسنه اولى طب؟