اولا.................ارحب بيكم جميعا

وياريت اللى داخل علوم المنصورة يدخل هنا ويقولى التقديم امتى فى الكلية وانا مرحلة تانية وعلمى رياضه
وداخل هنا علشان حد يقدر يساعدنى لانى بجد محتاج مسعادتكم جدا وانا دخلت كلية علوم باذن ربنا قبل طبعا قدر التنسيق بس يالا كل اللى يجيبة ربنا كويس ..........................


اولا انا مش عارف حاجة ابدا عن الكلية ممكن حد يقدر يساعدنى ويفهمنى طريقة النظام فى الكلية
وهدعيلة ان شاء الله ان ربنا يوفقة ويزيدة ويقولى طريقة المذاكرة ازاى واية القسم الاحسن اللى اقدر ادخلة واستفيد منة ان شاء الله وفرص عملة تكون كويسة

السلام عليكم..
انا برضه علمي رياضة و مرحلة تانية و جتلي علوم/رياضة المنصورة و أنا اصلا من اسكندرية..
و دبيت مشوار امبارح للمنصورة و الله خمس ساعات رايح و خمس ساعات جاي..
عشان كمان كنت عايز اقدم في المدينة الجامعية عشان لو لا قدر الله معرفتش احول اسكندرية..
المهم بعد المشورة دي قالوا ان التقديم بعد اسبوع..
بس في مشكلة بقى عايزك انت لو تعرف فيها حاجة...و خصوصا بقى لو انت في المنصورة تخطف رجلك للكلية و تسأل على المشكلة دي..
المشكلة دي عشان طويلة فأنا كاتبها في موضوع في منتدى كليه العلوم هنا..
يا ريت تدخل و تشوف الموضوع و تسأل في الكلية عن الموضوع الخطير ده..خصوصا لو انت في المنصورة عشان انا في اسكندرية فصعب اروح تاني الا للشديد القوي..
سلام عليكم..

انا سمعت ان احلى قسم حاسب الى بس دة الى انا اعرفة انا اصلا مش فاهمة حاجة من الكلية دى انا كمان علوم المنصورة ربنا يوفقنا جميعا

والله انا كمان دخلت القسم دة ومرتاحة له جدا الحمد لله بس انا والله مش عارف اى حاجة عن القسم دة خالص غير الا فرص العمل ..............بس ان شاء الله اكيد لما هندخل هنعرف كل حاجة ان شاء الله بس قولى لنت ساكن فى المنصورة اصلا

السلام عليكم ورحمة الله وبركاته
انا طالبة فى كلية علوم وكنت علمى رياضة وداخلة سنة 3 ان شاء الله .دعواتكوا بقى.
أول ما تدخل الكلية مفيش تخصص انما هتبقى قسم رياضة وفيزياء .
بعد كده يبدأ التخصص قدامك اكتر من طريق :
1-كيمياء وفيزياء.
2-فيزياء.
3-رياضيات.
والأقسام 1و2 بتفضل فيهم يعنى مش بتتخصص بعد كده.أما قسم رياضيات العظيم بيبقى ادامك منه طريقين اما تكمل رياضيات أو تدخل احصاء وعلوم الحاسب.
وعلى فكرة اكتر قسم بيبقى فيه طلاب هوه كيمياء وفيزياء وبعدين رياضيات وبعدين فيزياء وفى اقسام الرياضيات قسم احصا وحاسب بياخد اكتر من رياضيات.
يعنى على سبيل المثال فى سنة اولى الدفعة كانت 370 أو 380 طالب.
لما روحنا سنة تانيه منهم حوالى 180دخلوا كيمياء وفيزياء و81 دخلوا رياضيات و15 دخلوا فيزياء.
السنة اللى قبلينا اللى كانوا فى تالته كانوا حوالى 10 طلاب فى قسم رياضيات بس والباقى دخل احصاء وحاسب.
على فكرة الكلية جميلة جدا جدا والدراسة لذيذة اوى المهم تكون حاطط فى دماغك المذاكرة والمذاكرة وبس .وربنا مبيضيعش تعب حد ويدى كل واحد على اد عمله واجتهاده .
نصيحة بقى يا ريت تقبلها بصدر رحب علشان تنجح وتتفوق دايما لما تيجى تسأل اسال اللى اكبر منك من المتفوقين لأنهم هيدو لك أمل وتفاؤل متسألش الطلبة اللى هيبقوا معاك فى الدفعة بس سابقينك بسنة لأن طالب شايل السنة تتخيل يعنى هيقول لك ايه ؟؟؟؟؟؟؟؟؟!!!!ودى كانت غلطة من غلطاتى لكن الحمد لله تفاديتها فى اقرب فرصة وطلعت من اولى بتقدير جيد مرتفع .
نيجى بقى للدراسة:
اتفقنا انك هتبقى قسم رياضة وفيزياء أول سنة هتدرس:
* كيمياء (فرعين عامة وفيزيائة)دول فى الترم الأول وفيه كيمياء عملى يعنى هتدخل المعمل وتشتغل بايدك وهتلبس البالطو الأبيض.
*فيزياء (اربع فروع كهربية وخواص مادة وحرارة وضوء)كل ترم فرعين وبرضه فيه عملى.وفيه دكتور اسمه نبيل قناوى ده دكتور جميل جدا.
*حاسب.
*رياضيات(ديناميكا واستاتيكا وجبر وهندسة مستوية وتفاضل وتكامل ).
كفايه كده انا طولت جدا . على فكرة انا اخت tetoteto
يلا بقى سلام عليكم.

ولازم تذاكر أول بأول وتركز كويس فى المحاضرة فى السكاشن واللى مش تفهمه اسأل فيه على طول متستناش والدكاترة عندنا مش بيكسفوا حد يعنى اللى بيسأل بيجاوبوه وبيشجعوه كمان.
دول كانوا بيتحالوا علينا علشان نطلع لهم الأوض بتاعتهم ونسألهم .

انا عملت بحث على حكاية الساعات المعتمدة ووجدت على منتدى للكلية بتاعتنا ان الأقسام هيه نفسها ولكن تم حذف قسم كيمياء وفيزياء وتم وضع قسمين جديدين هما جيوفيزيقا وفيزياء حيوى .
ودا رابط الموضوعhttp://www.forums.talabaeyes.com/showthread.php?t=17024

اهلا بيكى معانا والله شرفتى الموضوع والمنتدى كلة وبجد كلامك جميل جدا فية نبذة تشجيع بس انا كنت عاوز بس اطلب منك اجوبة لشوية اسئلة اصل بجد اول مرة الاقى حد فى كلية علوم وعلمى رياضة ويارب تنجحى وتتخرجى ان شاء الله السنه دى بتقدير عالى كمان ممكن اعرف بس اية الادوات المطلوبة مننا بالضبط لعلمى رياضة وممكن اعرف احنا نذاكر منين من الكتب الجامعية ولا الملازم واية افضل يعنى وممكن اعرف يعنى بما ان حضرتك فى جامعة المنصورة الملازم بتجاب من اى مكتبة بالضبط ومين افضل الدكاترة اللى اقدر اجبلهم الملازم فى سنة اولى وهكون متشكر لحضرتك بجد

السلام عليكم ورحمة الله وبركاته
بالنسبه للادوات:
فى سنة اولى انا كنت باخد:
* كيمياء فكان مطلوب مننا البالطو الأبيض وماسك وشوية انابيب اختبار ودلوقتى بيطلبوا كمامة وجوانتى بس الحاجات دى بتختلف من قسم لقسم وان شاء الله لما تروح الكلية هتلاقى الحاجات المطلوبة مكتوبة فى ورقة على باب المعمل وانا اشتريتها من الكلية وممكن كمان تشتريها من الجلاء .
*فيزياءكان مطلوب مننا الأدوات الهندسية مسطرة واستيكة وقلم رصاص واّلة حاسبة ضرورى جدا علشان لما تنفذ التجربة هتحتاج تجسب حاجات لازم ليها الألة لأنك بتكتب فى كتاب العملى بالرصاص مش بالجاف.
*رياضيات:اما قسمنا العظيم فمريحنا خالص مش مطلوب مننا ادوات ولا اى حاجة.
نيجى بقى للكتب وطريقة المذاكرة :
انتى بتشتريها من الكلية كان على ايامنا اشترينا الكيمياء(كيمياء عامة وكيمياء فيزيائية وكتاب العملى) ب 110 والفيزياء(خواص مادة وضوء) ب100 والرياضيات (استاتيكا وتفاضل)ب80 واللغة ب25 وبتتحجز من كلية تجارة انجليزىبس مش عارفة بصراحة بيغلوا مع ارتفاع الأسعار ولا لأ:confused:.
بالنسبة للمذاكرة انا عن نفسى كنت بحضر كل المحاضرات وبكتب كل حاجة الدكتور بيقولها واهم من كل ده بفهم اللى بكتبه كويس وكنت اروح البيت ابيضها علطول وده لازم علشان متنساس اللى انتى اخدته فبالتالى كانت مذاكرتى من المحاضرات والسكاشن وبالنسبة للملازم فموجوده بس مكنتش بعتمد عليها وأنصحك انت كمان متعتمدش عليها احسن حاجة الحاجة اللى انت بتكتبها ورا الدكتور لأن الإمتحان بييجى من المحاضرات والسكاشن وادينى قلت لك اهه اللهم بلغت اللهم فأشهد:d.
اقول لك على حكاية دكتور فيزياء اسمه فكرى ريشة كان حكاها لنا
هوه كان بيدى مادة اسمها كهربية وكان بيدى قسم معين فالطلبة كانت بتحضر كتير جدا فى اول السنة الدفعة كلها تقريبا ومع مرور الوقت بدأالعدد يقل لحد اخر محاضرة فكان هوه حل ليهم بعض المسائل وكانت نيته انه يحطها فى الإمتحان فالطلبة أخدت اجازة بعد العملى وقبل امتحان النظرى فكانت فيه ملزمة نزلت فى المكتبات فى الوقت ده لأحد المعيدين فكان كاتب الإمتحان المتوقع وبعدين الدكتور لقاها فعلا نفس المسائل بتاعت اخر محاضرة وهوه نبه على الطلبة اللى حضرت ان محدش يديها لحد فقال انا ادامى حل من اتنين اما الغى الإمتحان لأن الإمتحان انتشر او اكمل وأحاسبهم على الطريقة اللى انا حليت ليهم بها لأن المعيد كان حالل بطريقة تانيةفبالتالى اعرف مين اللى كان حاضر المحاضرة لأن دول اللى كانوا بيواظبوا فلازم يخدوا حقهم .
وبالفعل جه الإمتحان المتوقع بس طريقة الحل كانت بتاعت الدكتور فلما جه يصحح صحح على اساس ان الإجابة اللى هوه كاتبها الصح وبتاعت المعيد هيه اللى خطأ والطالب اللى كان حال بطريقة المعيد اداله صفر وعلم على اجابته وكتب له من اين لك هذا؟؟؟!!!!
الفايدة من القصة انك لازم تتابع المحاضرات كويس والإمتحان مش هيخرج عنها ان شاء الله هى والسكاشن ويا ريت لو تشوف امتحانات السنين اللى فاتت .
ويا ريت متكنش زهقت منى علشان الرغى الكتير بس والله انا قصدى الإفادة فقط لاغير
والسلام ختام

بصراحة يعنى انا مش عارف والله انتى افدينى ازاى يارب يكرمك يارب والله انا داخل الكلية وحاسس انى ليا اخت كبيرة معايا بجد انا مش عارف اقولك اية كلمة شكرا قليلة عليكى بجد انا كنت عاوز بس اعرف جدول المحاضرات بتجبية منين وخلاص واكون متشكر لحضرتك جدا انا متهيالى انك واخدة قسم كيمياء وفيزياء يا ترى بقى هتطلعى اية ان شاء الله علشان ندعيلك كدة وانتى افدينى كويس جدا اصل انا مش عارف حاجة خالص عن الكلية

السلام عليكم ورحمة الله وبركاته
أولا لا شكر على واجب وو أقدر أفيد أكتر أنا مش هتأخر ان شاء الله اذا كان فى استطاعتى.
بالنسبة للجدول بييجى من على موقع الكلية من قسم الخدمات الطلابية وده الرابط بتاعهhttp://www.mans.edu.eg/facscim/english/Tables2008/default.htm بس هوه حاليا لسه منزلش ممكن قبل الدراسة بيوم أو اتنين وتقدر تجيبه من الكلية من المبنى اللى قدام مدرج 1و2 اسال هناك على البوابة التانية بتاعت الكليه اللى فى نصف الكلية التانى لأن فيه تلاته 2 فى حزء وواحد فى الجزء التانى
أنا حاسه انى لخبطك بس بصراحة مش قادرة أوصف لك المكان بالظبط على العموم انت اول ما هتروح الكلية هتعرفه لوحدك.
وعلى فكرة خد بالك مواعيد رمضان غي المواعيد العادية يعنى المحاضرة اللى مدتها ساعتين بتبقى فى حدود ساعة وعشرة وسكاشن الرياضة مش هتخدوها أول اسبوع ويمكن المحاضرات كمان بس انا بقول يمكن لأن أغلب دكاترة الرياضة مش بيدوا محاضرات أول اسبوع.
بالنسبة لمعامل الكيمياء والفيزياء لازم تكون حريص انك تحضرها أول اسبوع لأن عندنا كانوا بياخدوا الغياب من أول اسبوع واللى بيغيب 3أو 4 سكاشن مش بيدخل الإمتحان .
حاجة كمان أول يوم حاول تروح بدرى يعنى الساعة تمانية صباحا تكون موجود فى الكلية ليه بقى؟؟؟؟؟
علشان عميد الكلية بيعمل لقاء للطلبة المستجدين بتوع سنة أولى علشان يفهمهم الأقسام اللى موجودة فى الكلية وتفرعاتها ومجالات العمل المتوفرة لكل قسم وبتستلموا كتاب دليل الطالب وده فيه حاجات كتير كويسة مش بس للسنة الأولى ده هيفيدك فى السنين اللى بعد كده ان شاء الله فيا ريت تحاول تحضر اللقاء ده وهوه غالبا بيكون الساعة تمانية ونص بس طبعا انت هتروح بدرى علشان تسأل على المكان وتتأكد من الوقت وكمان تنقل مواعيد رمضان.
اخيرا بقى انا مش فى قسم كيمياء وفيزياء انا فى قسم احصاء وحاسب ان شاء الله :lol:
ورايحة سنة تالتة مش فى البكالوريوس السنة دى:rolleyes:

ربنا يوفقك ويوفقنا جميعاان شاء الله انابرضة زيك نفس القسم والله انا فرحان جدا ان حضرتك زى ومعايا فى نفس الكلية وبالنسبة للجدول انا هبقى اسال علية فى المكتبات ان شاء الله كمان كام يوم كدة
http://www.mans.edu.eg/maps/emptymaps/science/default.htmودة خريطة الكلية بياعتنا وانا بصراحة مش عارف حاجة خالص فيها غير شئون الطلاب والخزينة يالا قبل ما ادخل الجامعة هروح كدة واتفرج عليها كدة :dوربنا يسهل ان شاء الله وهحاول اروح بدرى :(بصراحة انا مش عارف ازاى بس هحاول انا بحسبك راحة سنة رابعة يالا مفيش مشكلة بس بقولك اية انتى مكنتيش بتجيبى اى ورق خالص يعنى مكنتيش تعرفى اى مكتبة من اللى عند الجامعة بيبيعوا ورق خالص اصل ساعات فية دكاترة شرحهم مش اوى يعنى فبيبقى فية ورق يسهل الموضوع دة


معلش انا اقرفك معايا والله وحاسس انى برغى كتير وبطلب منك حاجات كتير اوى بس انا متاسف والله مش قصدى بس معلش انا مش عارف اى حاجة فى الكلية دى والله ممكن بقى تقوللى اول سنة دى بقى صعبة ولا سهلة اصل فى ناس بتقولى طالما عديت اول سنة يبقى خلاص هتمشى فيها اه بالنسبة لموقع المنتدى اللى ذكرتية ممكنتقوللى ازاى اسجل فية اصل انا سجلت فية بش مش عارف افعل حسابى علشان كدة مش بقدر اشوف اى موضوعات:(

انا مش عارف الخريطة مش بتشتغل لية
http://www.mans.edu.eg/maps/emptymaps/science/default.htm

http://www.mans.edu.eg/maps/emptymaps/science/default.htm

متهيالى الخريطة اشتغلت تمام

السلام عليكم ورحمة الله وبركاته
أنا حاسة بالقلق اللى انت فيه بس ان شاء الله هيروح أول ما تبدأ الدراسة وتتعود عليها وهتحس انك مكنتش تنفع غير فى كلية علوم وإن هيه دى مستقبلك بجد بس اهم حاجة تذاكر كويس وتحاول تفهم كويس كل حاجة وان شاء الله تجيب تقدير كويس والله أنا مكنتش بذاكر فى سنة أولى غير قليل جدا جدا يعنى يمكن قبل الإمتحان بس لأن الوقت جرى منى ومحستش بيه ومكنتش لسه اتعودت على نظام الكلية فانت حاول تتجنب أخطائى دى
بس والله انا كنت بذاكر من المحاضرات بس ويمكن مكنتش ببص للسكاشن أوى بس شفت امتحانات السنين اللى فاتت والحمد لله جبت تقدير جيدم رتفع يعنى انت شد حيلك فى المذاكرة شوية وهتجيب تقدير احسن.
وأول سنة كويسة مش صعبة ولا حاجة.
والورق أصحابى كانوا بيجيبوه من الجلاء فى شارع كده كله مكتبات بس للأسف معرفش اسمه بس متيهيألى ملوش لازمه علشان متلخبتص نفسك بيه انت ممكن اللى مش تفهمه تسأل فيه المعيدين.
وبالنسبه للمنتدى بيبعتوا لك ايميل وفيه رابط لتفعيل حسابك.
وبالنسبة لخريطة الكلية نا بقى كنت بتخيلها يعنى الفراغية كانت بتشتغل:d
ليا اصحاب بيتوهوا فيها لحد دلوقتى ^_^
بس انا متأكدة ان شاء الله هتعرفها كويس ابقى خد جوله فيها أول يوم وهتلاقيها سهلة ان شاء الله
عامة يعنى الدور الأول ده فيه طبعا شئون الطلبة وتقريبا انت دخلته وفيه مدرجات 3،4،5،6،7 وفيه شوية معامل كيمياء والإستراحه وشوة اوض دكاترة جيولوجياء منفيين كده فى جنب وحدهم دايما ضلمة كده واوض الإداريين بس
ونظام الكلية بقى هتلاقيه محدد يعنى المدرجات فوق بعضها والمعامل فوق بعضها والكيمياء عندنا ما شاء الله فى الأربع ادوار تقريبا يعنى الدور الأول فيه كيمياء والتانى جيولوجيا وفيه كيمياء والتالت طبعا قسمنا العزيز قسم رياضيات ومعاه قسم فيزياءوالرابع قسم نبات وحيوان وهتلاقى هناك تعالب وتعابين وحاجات كده متحنطة ومحطوطة فى فترينات ابقى روح اتفرج عليهم.
على فكرة معامل الحاسب فى الدور التالت والرابعبس اغلبهم فى قسم رياضة وعى فكرة فيه معملين فى ادور الرابع مش بتوصلهم كده غير من سلم واحد مع ان الكليه فيها 3 سلالم او اربعة بس المنطقة دى بالذات لازم تمشى قسم رياضة كله لحد متوصل للسلم وهتلاقيهم وتطلع الدور الرابع بيسموها الكوبرى المعلق او القنطرة لو حبت خريطة الدور التالت هتلاقيها الطرقة اللى قدام معمل حاسب 1 والمعامل اللى جنبها لأن الطرقة دى فيها 4معاملبي ففيه معملين فوق دول اللى انا بقول لك عليهم
ولازم تعرف انت فى معمل ايه يعنى بتطلع عند كل معمل وتشوف الورقة اللى ملزوقه عنده وتشوف انت سكشن كام وهتاخد فين
ياه فكرتنى بالكلية بجد وحشتنى أوى مش مصدقه انى هروح يوم السبت اللى جاى:lol:
ربنا يوفقك يا رب كده واسمع انك طلعت من الأوائل يا رب واشوف اسمك منور فى اقايمة بتاعت الأسماء وقدامه امتياز مع انى معرفش اسمك اساسا يعنى
وعقبالى كده يا رب لما اجيب امتياز السنة دى ان شاء الله والسنة اللى جايه كمان واتعين معيدة فى الجامعة يااااااا رب:rolleyes:
كفاية عليك كده
سلام عليكم

وعليكم السلام ورحمة الله وبركاتة

ربنا يخيلك يارب وتجيبى امتياز فى السنتين اللى باقين يارب ويوفقنا جميعا ان شاء الله بالنسبة امتياز فانا مش طماع اوووووووووى كدة المهم اعدى نظيف وخلاص ومجبش مقبول علشان المنظر بس ومنتظرينك تبقى معيدة معانا فى الكلية ونحضرك كدة محاضرات على طوووووووووول دايما بقولك اية انتى بتحاولى تخدى كورسات فى الاجازة مثلا كمبيوتر اولغة او شهادة icdl
على فكرة انا بسمع ان الشهادة دى تافهة جدا ومش حلوة اوى بس لازم تكون معاكى يلا بقى ربنا يسهل انا مبسوط جدا انى دخلت القسم دة

اه المنتدى مش عارف بردة مش بعتوا اى حاجة خالص على الميل

على فكرة كلامك دة بيريحنى نفسيا اووووووووى والله انا من غيرك مكنتش عارف هعمل اية ربنا يخليك لينا يارب ويجزيكى بية ان شاء الله فى الايام المفترجة دى يارب

اه صحيح هو احنا لينا ارقام يعنى متلا من 100الى 200 عندهم متلا محاضرة كذا ولا اية

اية يا محمد ما انا معاك مش كفاية ولا اية

وانا كمان يا محمد انا محمود الجندى اى خدمه فى التجاره انا موجودوبمسى على كل طلبه وطلبات العلوم اللزاز

وبشكر هنا على المسانده الجميله دى مع محمد شوفتو الحلاوهانا بجد بحى كا العلوم على الشعور الجميل

ابو فرج