رقم محمول ... الرئيس ..!!؟ [الأرشيف] - بوابة الثانوية العامة المصرية

مشاهدة النسخة كاملة : رقم محمول ... الرئيس ..!!؟

Mohamed_AmeesH

11-08-2008, 11:49 PM

رقم محمول ... الرئيس ..!!؟

أشارت مجموعة منتقاة من خبراء الترويج والعلاقات العامة علي أحد الرؤساء العرب أن يقوم بنشر رقم تليفونه المحمول في جميع وسائل الإعلام لتحسين صورة الرئيس وزيادة شعبيته والتي أظهرت إستطلاعات الرأي أنها في تآكل مستمر ....وافق الرئيس علي مضض وعلي أمل أن يحدث التواصل المطلوب بينه وبين أفراد الشعب ويتعرف بنفسه علي مشاكلهم وسبب عدم رضائهم عنه رغم مخاوفه الشديدة من كثرة التليفونات وإمكانية تعرضه لمكالمات غير لائقة من مغرضين ومندسين بين صفوف هذا الشعب المدهش المطاوع المسالم المهاود ... بمجرد أن وافق الرئيس تم عمل حملة إعلانية ضخمة وغير مسبوقة في طول البلاد وعرضها للإعلان عن الرقم ... وتم كتابة الرقم علي لوحات مضيئة عملاقة أعلي العمارات والمباني الحكومية

وقد صيغت الدعاية بعبارات جذابة وشيقة ...منها :

((إتصل برقم الرئيس ..وإنت وأهلك تهيص .... ))
((إتصل بالرئيس ... يكون لك خير ونيس ....))

ولم تنس الدعاية المرأة في هذه الحملة فكان منها ما يقول :

(( إتصلي بالرئيس .... وبكره يجيلك العريس .... ))

وكان للأطفال أمل الغد أيضاً نصيب فكتبت لهم إعلانات تقول :

(( كلموا عمو الريس .... قبل ما يموت ويفيص ))

هذا خلاف الإعلانات التليفزيونية والكليبات المثيرة التي رصد لها ملايين الجنيهات حتي تخرج الحملة بصورة مشرفة ووطنية ....
وتم الإتـفاق أن يسمع المتصل أغنية بدل سماع الجرس عن طريق خدمات (( الكول تون )) قبل أن يرد عليه الرئيس أغنية :
آآآلو الريس فين ... الريس هنا ...هنا هو ... أقولوا مين بيكلموا ...

وذلك لأن هذه الأغنية سهلة وتوحي أن الرئيس قريب ومتواصل مع شعبه ...
وكان الخلاف حول المكالمة هل تكون مجانية أم لا ..وتم حسم الموضوع بأن تكون هناك رسوم لزيادة الدخل وتنمية الموارد ودفع عجلة الإنتاج وعمل ودعم مشاريع الصرف الصحي والمياة وعمل نهضة تنموية مستقبلية ...

جاءت ساعة الصفر .... وبدأت الخدمة ... وتلقي الرئيس عدة مكالمات :

المكالمه الاولى

- ألو ....
- أيون ...
- إنت الريس ...
- أيون يا حبيبي ... إيه مشكلتك ....
- أنا ياريس دخلت قسم شرطة أعمل محضر قام الظباط والمخبرين ضربوني علي قفايا وجابوا ساعة رقمية وقعدوا يشوف من حيضربني أكتر علي قفايا في الدقيقة وما خلصوش إلا لما ظابط المباحث عمل رقم قياسي وضربني 80 قفا في الدقيقة لغاية ما قفايا ورم ونظري ضعف ... يرضيك كده ياريس وأنا ولا مجرم ولا حاجة أنا رايح أشتكي وأعمل محضر في الجيران ...
- بص يا مواطن ... إحنا كلنا في خدمة الوطن.. والشعب في خدمة الشرطة ..لما يكون ظابط بيحميك ويحمي أولادك إيده بردانة شوية وعايز يدفيها ويسخنها في قفاك ده يزعلك ... لازم تضحي شوية علشان الوطن ...!!
- شكراً ياريس ..ربنا يخليك لنا ويخليك للوطن ... ؟

المكالمة الثانية :

- ألو
- أيون
- الريس معايا شخصياً
- أيون ... قول يا مواطن ... إيه مشكلتك ...
- أنا ياريس وغيري ملايين ساكنين في المقابر وتحت الكباري وفي عشش في ال ...في ال
- أسكت ..إتكلم عن نفسك بس يا مواطن بلاش تعميم ... إنت عايز تعمل لي تنظيم علي التليفون؟ فاهم.. ولا أفهمك بطريقتي ...
- فاهم فاهم يا ريس ...
- كمل يا مواطن ...
- نفسي في شقة من إللي بتتوزع علي لاعيبة الكورة والعقود إللي بتتوزع وبنشوف تصاويرها في التلفيزيون...
- واضح يا مواطن إنك مش متعلم ومش فاهم حاجة ... تسكينك في المقابر إنت وغيرك ده له حكمة عظيمة ..
إنت عارف إن الدين بيأمرنا بزيارتها للموعظة والإعتبار من آن لأخر لكي نعرف أنها دنيا فانية ...
وإنت محظوظ كل يوم وكل ساعة بتتعظ ... ده إنت تحمد ربنا إننا لم نأخذ منك ضريبة إتعاظ .... !!
- طب ما تيجي ياريس تتعظ عندنا شوية ...
- إخرس ... يا ..(....)
دببببب ...
وتم غلق الخط ...

المكالمة الثالثة :

- ألو ....
- أيون
- الريس حبيبنا معانا ....
- أيون أيوه كده ....إيه مشكلتك يا حبيبي ...؟؟
- أنا ياريس شاب عندي 29 سنه ومتخرج بقالي 9 سنين ومش لاقي شغل ..ولسة بآخد مصروفي من والدي وقاعد علي القهوة طول اليوم ... نفسي أشتغل ياريس ...
- أنت غريب قوي يا مواطن ... مش تحمد ربنا إننا مريحينك ..عايز تروح للشقي برجليك ... وبعدين مالها قعدة القهوة ... إتعلم منها حاجة تفيدك ...ممكن تبقي بطل شطرنج زي كسباروف وساعتها تعرف إن جلوسك علي القهوة كان مصلحة ...
- ياريس عايز أكون نفسي ...
- ما تكونها يا حبيبي حد حايشك ...؟!!
- أكونها إزاي من غير شغل ..؟؟
- إيه يا مواطن أنا ماسك أعصابي ... إنت عايز البلد تكون ملايين من الناس.. إحنا فاضيلنك ولا إيه..؟؟ إحنا عندنا عيال بنكونها برضه .... خلي أبوك يكونك يا مواطن ...
دبببب ...وتم غلق الخط ....

المكالمه الرابعه.

- ألو ..صباح الخير ياريسنا يا جميل ...
- ألوووووووووو...صباح الجمال ... أيوه يا شابة .. إيه مشكلتك وأنا أحلها لكي في فمتوثانية ...
- أنا يا ريس عانس ... وصلت لسن 35 ومش لاقية عريس ... نفسي أتجوز زي البنات كلها ويبقي عندي بيت وأسمع كلمة ماما ....
- هههههه ... إنت تحمدي ربنا ...جواز إيه وقرف إيه ...خلفة وطبيخ وواحد متخلف ينكد عليكي ومسئولية ... خليكي كده ....
- ياريس ... نفسي أحب وأتحب ....
- يا مواطنة ... حب الوطن كفاية عليكي ....
- يعني أتجوز الوطن وأجيب منه عيال ..!!!
- يوووه ... إنت مش عجبك كلامي طيب ...
دبببب .. وإنتهت المكالمة ....

وأخيراً ... حد عايز الرقم يطلب ويجرب ..... يتصل بيا أويكتب لي...وأنا مش هاديه الرقم طبعا ....

بشرط يقول حيقول للريس بتاعه إيه لو كلمه في التليفون ...!!! ؟؟؟

( لؤلؤة الإسلام )

11-08-2008, 11:54 PM

ههههههههههه ... الموضوع حلو أوي .. بس متهيألي ان الريس وراه حاجات أهم من الشعب بكتييييييير ..
زمانه فشرم بيصيف و لا فأي ...... !!

_GUIDE_

11-08-2008, 11:55 PM

بشرط يقول حيقول للريس بتاعه إيه لو كلمه في التليفون ...!!! ؟؟؟

هو الرئيس عنده موبيل
ده بسم الله ماشاء الله
موبينيل نصها بتاعة علاء ابنه
ده غير المصرية للاتصالات
بس عمتا لو كلمته
هكلمه واقوله اتقى الله ان الناس تعبانه
طبعا هيكون الكلام
من كارت ميناتل
ومن بره محافظتى :D

sanaa65

12-08-2008, 12:00 AM

حرام عليهم بصراحه مايحدث فى البلد من غلاء وضغط معيشه وطابور العيش وامتحانات كادر المعلمين فوقوا بقى يالى مش حاسين بينا انت ناس فوق واحنا تحت حسوا بينا شويه انا ح اذاكر علشان امتحن ولا ابحث عن لقمه عيشى تعرفوا تقولوا كيف تحل هذه المعادله

Dr.Nobel

12-08-2008, 12:03 AM

حلو الموضوع

وانا لو كلمته هاقوله انى من اول ماتولدت مشوفتش ريس غيره في امل انى اشوف حد تانى ولا لا؟

شكرا علي الموضوع

dr.saeed

12-08-2008, 12:06 AM

موضوع جميل بجد

Hamset_Etab

12-08-2008, 12:15 AM

أحمد2025

12-08-2008, 12:16 AM

هو الريس فى دماغة الشعب ياجماعة
انا لو كلته
هقولة
انا عزمك على فرح ابنى بعد30 سنة ان شاء الله
ياريت تشرفنا ياحبيبنا

Mohamed_AmeesH

12-08-2008, 12:22 AM

ههههههههههه ... الموضوع حلو أوي .. بس متهيألي ان الريس وراه حاجات أهم من الشعب بكتييييييير ..
زمانه فشرم بيصيف و لا فأي ...... !!
ههههههه

مرسيه ع المرور

Mohamed_AmeesH

12-08-2008, 12:24 AM

هو الرئيس عنده موبيل
ده بسم الله ماشاء الله
موبينيل نصها بتاعة علاء ابنه
ده غير المصرية للاتصالات
بس عمتا لو كلمته
هكلمه واقوله اتقى الله ان الناس تعبانه
طبعا هيكون الكلام
من كارت ميناتل
ومن بره محافظتى :D

كلام جميل

مرسه على المرور

***star***

12-08-2008, 12:27 AM

ياااااه انتو بتتكلمو عن الريس ...ده مفيش احسن منه... دا هو اللي مصيت مصر ادام كل الدول التانيه....الناس كلها والحمد لله شبعانين ومحدش محتاج اي حاجه خالص ....... يارب الريس يشوف رسالتي دي علشان بجد همووووووووت وابقي دبلوماسي

Mohamed_AmeesH

12-08-2008, 12:29 AM

Mohamed_AmeesH

12-08-2008, 12:33 AM

حلو الموضوع

وانا لو كلمته هاقوله انى من اول ماتولدت مشوفتش ريس غيره في امل انى اشوف حد تانى ولا لا؟

شكرا علي الموضوع

مرسيه ع المرور

Mohamed_AmeesH

12-08-2008, 12:34 AM

موضوع جميل بجد

الاجمل مرور حضرتك يا دكتور

Mohamed_AmeesH

12-08-2008, 12:35 AM

والله موضوع تحفه
انا بقا لو كلمت الريس هقوله ربنا يخليك لينا يا ريس:cool:
بجد مش حرمنا من حاجه عيش وموكلنا شقق ومسكنا مدارس ومعلمنا:D
انا الحمد لله مش ناقصنى حاجه خالص غير حاجه بسيطه جدا انى اتعامل كانسانه فى بلدى ده كلاب امريكا بتتعامل احسن مننا:mad:
هههههههههههههههههههه

احلى كلام والله

بس ياترى هتجيبى الجرأه والشجاعه منين ان تقولى له كده

مرسيه ع المرور

Mohamed_AmeesH

12-08-2008, 12:37 AM

هو الريس فى دماغة الشعب ياجماعة
انا لو كلته
هقولة
انا عزمك على فرح ابنى بعد30 سنة ان شاء الله
ياريت تشرفنا ياحبيبنا

هههههههههههههه

وياترى هتعزمنا احنا كمان ولا موش هيبقى عندكم اكل

مرسيه على المرور يا احمد

Mohamed_AmeesH

12-08-2008, 12:39 AM

أحمد2025

12-08-2008, 12:43 AM

هههههههههههههه

وياترى هتعزمنا احنا كمان ولا موش هيبقى عندكم اكل

مرسيه على المرور يا احمد

ياباشا هتكونوا انتم موتوا
والريس مخلل
ههههههههههه
وانا اقدر برضه معزمش المنتدى على الفرح
شكرا على التوبيك مرة اخرى

Mohamed_AmeesH

12-08-2008, 12:52 AM

ياباشا هتكونوا انتم موتوا
والريس مخلل
ههههههههههه
وانا اقدر برضه معزمش المنتدى على الفرح
شكرا على التوبيك مرة اخرى

اوكى يا جميل

مرسيه مره اخرى ع المرور

الرهينه

12-08-2008, 12:53 AM

ايه يا ولاد الحلاوه دى ماحنا طلعت عيشتنا زى الفل اهى انتوا بس اللى عايزين تعملوا مشاكل ع الفاضى:(

إمكانية تعرضه لمكالمات غير لائقة من مغرضين ومندسين بين صفوف هذا الشعب المدهش المطاوع المسالم المهاود

اهههههههها ساعتها ممكن يبلغ عنه مباحث التليفونات:rolleyes: .. بس كده هزار انت بتجيب فى سيرة القله المندسه :mad:

بس انا مش هتسرع انا هرنله وهو يتصل :D او اقولك هبعتله كلمنى :D .. بس ياترى هو فودافون ولا مونابيل ولا ايه :confused:

المهم لما يتصل هطلب منه اجيب امتياز فى عين شمس :( اصلى نفسى اجيبها ومش بحب الغش:D

اوووووووه نسيت اشكرك على الموضوع الرائع ده
ويارب تكلم الريس;)

Monier

12-08-2008, 12:55 AM

انا لو كلمته هقوله
لو مره زارك يوم امير دايسه عصيته فى الجروح قلبك كسير ضمه وسير خايف تضيع لو يوم تبوح لو مره زارك يوم ملك قوله البلاد مبتشتكيش غير روحنا متلاقيش مطلوب حياه مطلوب نعيش
واقفل السكه واخد اهلى واهرب من البد

Mohamed_AmeesH

12-08-2008, 01:22 AM

ايه يا ولاد الحلاوه دى ماحنا طلعت عيشتنا زى الفل اهى انتوا بس اللى عايزين تعملوا مشاكل ع الفاضى:(

اهههههههها ساعتها ممكن يبلغ عنه مباحث التليفونات:rolleyes: .. بس كده هزار انت بتجيب فى سيرة القله المندسه :mad:

بس انا مش هتسرع انا هرنله وهو يتصل :D او اقولك هبعتله كلمنى :D .. بس ياترى هو فودافون ولا مونابيل ولا ايه :confused:

المهم لما يتصل هطلب منه اجيب امتياز فى عين شمس :( اصلى نفسى اجيبها ومش بحب الغش:D

اوووووووه نسيت اشكرك على الموضوع الرائع ده
ويارب تكلم الريس;)

ههههههههههههههههه مرسيه على مرور

حضرتك الجميل ده

بورسعيدى

12-08-2008, 01:51 AM

موضوع رائع بجد

شكرا لك على الموضوع

خليك معايه انا هاتصل بالريس حالا

تررن تررن

تررن تررن

تررن تررن

ايون

سعاده الريس الى معايه ؟

ايوه يا مواطن هو بعينه وودانه الكبيرة وشفايفه الغليظه

ازيك ياريس

الحمد لله يامواطن

عامل ايه ياريس ازيك كده ؟

الحمد لله

طب وكده ؟؟

انت هاتهزر معايه يا مواطن ؟

ابدا ابدا ياريس بس حبيت اطم.....

الرئيس مقاطعا ....... خش فى الموضوع

انا متلعثم اصلى ... اصلى ملبوخ ومش مصدق ومش عارف اكلمك عن ايه والا ايه والا ايه ؟؟؟؟

يا ابنى خلصنى هو انا فاضيلك ؟؟ انا ودانى كبرت اكتر ما هيه كبيره اصلا ....... اوووووووووووفففففف

معلش يا ريس انا آسف اصل الحكاية وما فيها

هو انت لسة حاتحكى حكايات ؟؟

انت ياض يامواطن

نعم ياريس

هاتدخل فى الموضوع والا ابعت اجيبك من قفاك ؟؟

قفايه .... وهو قفايا هايستحمل ايه والا ايه ؟؟؟

طب وعلى ايه بس انا ياريس حبيت اقول لك انى مبسوط جدا وسعيد جدا برياستك وسياستك الحكيمه

وبادعى لك من كل قلبى ان ربنا يطول فى عمرك كمان وكمان وكمااااان لغايه ما نموت احنا علشان تتبسط

لان اكيد احنا كتير وسعادتك شايل همومنا كلنا ومش عارف تعمل حاجه

فلما نموت كلنا هاتقدر تشتغل وتفوق وتنتج وتبدأ بتنفيذ الوعود التى وعتنا بها من حوالى 25/30 سنة

اصلى بصراحه من كتر الوعود انا نسيتها خلاص

والله يا ابنى وانا كمان من كتر الوعود نسيتها كلها

بس بينى وبينك يا مواكن لما بتكون فى انتخابات بافتكر الوعود واقولها تانى للشعب العبيط

والغريب يامواطن ان الشعب بيسدقنى تانى

هى هى هى هى هى مش باقول لك شعب عبيط

عايز عاجه تانى يا مواطن ؟

انا مضطر اقفل علشان موبايلى عايز يتشحن

سلام

بيباى ياريس

Mohamed_AmeesH

12-08-2008, 01:55 AM

الرهينه

12-08-2008, 01:59 AM

الضوء الشارد

12-08-2008, 02:00 AM

والله شكلنا هنتمسك ............... فى البلد الجبن سيد الأخلاق بلاش الريس......... انا ماستحملش اقلام المخبرين .... وهاعترف من اول قلم

واحـد من النــاس

12-08-2008, 02:05 AM

بس ياترى هو فودافون ولا مونابيل ولا ايه :confused:

ام نبيل ايه بس يا جيجو :D

بجد موضوع جميل جدا

وحلوة اوووي المكالمة دي يا أستاذ بورسعيدي :D

Mohamed_AmeesH

12-08-2008, 02:07 AM

Mohamed_AmeesH

12-08-2008, 02:13 AM

والله شكلنا هنتمسك ............... فى البلد الجبن سيد الأخلاق بلاش الريس......... انا ماستحملش اقلام المخبرين .... وهاعترف من اول قلم

ههههههههههههههههههه

احذر من اقلام المخبرين

مرسيه ع المرور

Mohamed_AmeesH

12-08-2008, 02:16 AM

ام نبيل ايه بس يا جيجو :D

بجد موضوع جميل جدا

وحلوة اوووي المكالمة دي يا أستاذ بورسعيدي :D

الاجمل مرور حضرتك يا جميل

الضوء الشارد

12-08-2008, 03:38 AM

ههههههههههههههههههه

احذر من اقلام المخبرين

مرسيه ع المرور

شكرا على ذوقك بس خلى بالك على نفسك وماتمشيش لوحدك هههههههههه

شهدالجنة

12-08-2008, 03:52 AM

لا جامد جدااااااااااااا جزاك الله الف خير

sedik

12-08-2008, 11:53 AM

بسم الله الرحمن الرحيم
اما بعد:
فان كلامك بهذه الطريقه انما يعكس
انك تعيش فى بلد يتمتع بالديمقراطيه
وهذه الحقوق كفلها لجميع المواطنين
سياده الرئيس (رضى الله عنه وارضاه)

اما انا لو جالى رقم تليفون الريس ف هقولوا
البلد بخير حال والحمد لله
مفيش طوابير على العيش

(لانه مبقاش موجود)

مفيش غلاء ولا حاجه اطلاقا

(محدش بيفكر يشتري حاجه لان الاغلبيه معدمين)

وكفايه كده بقا علشان الكلام ميتقلش وحاجات تاني

واخر كلمتين هقولهم

ربنا يعينك ربنا يحميك

Mohamed_AmeesH

12-08-2008, 11:55 AM

لا جامد جدااااااااااااا جزاك الله الف خير
جزانا واياكم

sedik

12-08-2008, 11:56 AM

Golden Eagle

12-08-2008, 12:15 PM

أنا و الله مش عارف أقوله إيه
هوا بيستعبط ولا حاجة ؟
مش عارف أن ما فيش واحد في الشعب طايقه
شباب إتولد و مات و الريس هوه لسه ما إتغيرش
أنا حاسس أن الموت أحسن من الحاله اللي هو عايش فيها
تحس أنه ملزق لو كحيت في وشه يتكسر علي ميت حته
غير ان الشعب كارهه
و كل اللي ممكن أقوله أن ربنا موجود

بندق__2007

12-08-2008, 12:50 PM

ميرسى على الموضوع

بجد حلو هادف و جميل

و انا بقى اتصلت بالريس من زمااااااان و المكالمة متسجلة عندى

و ده نص المكالمة :

- ترررررن ترررررررن
- ألو .... سيادة الريس شخصيا
- أيوة يا عم .... ما انا غلطان أصلا انى رقم موبايلى مع الخلق كلها و دينى لأغيره
- براحة علينا يا ريس
- براحة و لا بالقوى انت هتصاحبنى ... اخلص
- والله انا يا ريس واحد من الناس المطحونة اللى ......
- ليه يا بنى هو انت من عيلة الحبوب ؟ مطحون ليه .... ما تتكلم عدل يا مواطن ما تزهقنيش
- طالما خلقك ضاق كدة يا ريس ما تسيبنا و تمشى .
- و اسيبكوا ليه .. الاقى فين شعب اهطل زيكو
اغلى الحاجة يشترى .. اسرقه يسكت .. ابوظله التعليم يتعلم .... اعيشه فى رعب يتكتم
بالذمة يا مواطن هلاقى شعب زى ده فين احكمه
- ايوة يا ريس بس انت بقالك كتيييييييييييييييير ..........
- إنت هتقر عليا يا ________
- الله و ليه الغلط يا ريس بس دا انا بحبك
- قول مشكلتك و انجز ... جاتكوا القرف
- انا يا ريس مش عارف اعيش و لا عارف اتعلم و لا أكل و لا عارف اشرب و لا عارف اشتغل ولا عارف اتجوز
- مش عارف تعيش و ده مقصود عشان ما تعيشش كتير و ذنوبك تكتر
مش عارف تتعلم عشان العلم نور و النور كهربا و الكهربا خطر على حياتك يا مواطن
مش عارف تأكل و ده برده لسبب و زى ما الحكمة اللى بتقول " صوموا تصحوا "
- حكمة ؟؟؟
- اخرس ما تقاطعنيش خلينى اكمل
- كمل يا ريس
-ولا عارف تشرب ده كويس لأن المياة انا ملوثها فأحسن لك ما تشربش و مش عارف تشتغل بلا وجع دماغ
عندك انا اهو بشتغل ؟ و عايش و زى العسل العيب فيكوا
اما مش عارف تتجوز دى نعمة يا مواطن لا تجيلك ست تقولك القراءة للجميع و لا مسك الواد بعدك
و لا حقوق المرأة و كل يوم تطلع تجيبها من مؤتمر فى بلد شكل دى حاجة بقت تقرف ..
- هو انا اللى بشتكى و لا انت اللى بتشتكى يا جدع يا شيخ روح ربنا ....... دببببببببب

و اتفقل الخط

Mohamed_AmeesH

12-08-2008, 02:25 PM

Mohamed_AmeesH

12-08-2008, 02:27 PM

Mohamed_AmeesH

12-08-2008, 02:28 PM

sedik

12-08-2008, 05:05 PM

ويعينك ويحميك انتا كمان

مرسيه ع المرور

لو انت تقصد اللى انا اقصده
فلك المثل
ربنا يعينك ويحميك

طبيب عالمى قادم

12-08-2008, 05:17 PM

ايه ده كله لهو الرئيس وحش ولا ايه

وفاء البحر

12-08-2008, 05:26 PM

الو سياده الريس
ايوه انا سيادته
ههه وايه يعني :D
انتي بتقولي ايه:mad:
بس بس متتحمقش اوي كده هو انا لسه قلت حاجه:p
يلا صدعيني
من عنيه انت تامر
ايه يا راجل اللي انت منيله في البلد ده
ايه ؟؟ في ايه;);)
لا ابدا مفيش حاجه:mad: خد عندك يا سيدي:mad:
حوارات ......لقاءات وفي الاخر يلا سلامات
قمه عربيه .......ولقمه هنيه وفي الاخر كله ملوخيه
قال ايه:cool:
استعدادات وتجهيزات وبنزرع اراضي:)
:mad::mad:امال ليه محدش راضي:mad::mad:
تنظيم اسره................والعيشه مره
ومفيش حاجه بتتنفذ
واحنا اتخنقنا ومش قادرين نتنفس
تعليم هباب .............. وامتحانات من بره الكتاب
صحه نيله...................وقال ايه العيشه جميله
امن مفيش..................ازاي متسالنيش
عداله كله كلام فاضي
ولو مش مصدقني اسال سياده القاضي
امل......... تفاؤل............. نجاح............ اشياء ملهاش وجود
اندفنت واكلها الدود
ياس .......تشاؤم...........فشل.............موجود بلا حدود
الاطفال جاعوا
ولشباب ضاعو
وانتوا برضه مش حسين
حسبي الله ونعم الوكيل

حسبي الله ونعم الوكيل

حسبي الله ونعم الوكيل

حسبي الله ونعم الوكيل

ربنا يخدك يلا
تصبح علي نقاله

وبعد ده كله اكتشف انه قفل السماعه من ول كلمه واتاريني كنت بكلم نفسي
هو ده حال الشعب المصري ماشي يكلم نفسه

Mohamed_AmeesH

12-08-2008, 06:46 PM

Mohamed_AmeesH

12-08-2008, 09:31 PM

انا لو اتكلم هتكلم واقول

ادهوووووووووونى انااااااااااااااااااااااا

انا هاخد الرقم كل يوم الصبح اعكسوا وبالليل اتصل اقوله نكته والعصر اتصل اقوله فزوره

وكل شويه هابعتلوا رساله عااااااجل تم القبض على علاء مبارك وجمال مبارك هاخليه يجرى على الاقسام

والله حررررررررررررررررررررررررررررررررررررررررررررررررر رررررررررررررررررررررررررررررررررررررررررررررررررر رررررام

_ELDALY_

19-08-2008, 10:24 AM

موضوع فعلا جميل

thedreamer33

19-08-2008, 03:25 PM

يا لذييييييييييييييييييييذ يارايق

nrady69

19-08-2008, 03:51 PM

احنا شعب جبان غير قادر على ابداء رأيه
صراحة - الكل ساهم فى هذا الجبن الاذلى
الاب -الام -المدرسة-الحكومة- لقمة العيش
وغيرها 000000
دليل كلامى
اتحدى أى شخص من المشاركين فى هذا الموضوع
أن يكتب بياناته وسيرته الحقيقية
ولكن عندما يكون الموضوع بلا ضوابط ولا رقيب (الا الله)
عندئذ أنفلت الحبل على غاربه
مع أشد أسفى ولكن تلك هى الحقيقة

muhammad shehata

19-08-2008, 06:45 PM

الراجل اللي كاتب الموضوع ده دماغه عاليه قوي الظاهر واخد حبوب الشجاعة ربنا يسترها عليه فكرتني بكليلة و دمنه

muhammad shehata

19-08-2008, 06:47 PM

الراجل اللي كاتب الموضوع ده دماغه عاليه الظاهر أنه واخد حبوب الشجاعة ربنا يسترها عليه

muhammad shehata

19-08-2008, 06:48 PM

الراجل اللي كاتب الموضوع ده دماغه عاليه الظاهر أنه واخد حبوب الشجاعة ربنا يسترها عليه