انا لقيت كلام حلو اوي عن مواد اولى صيدله وحبيت اشاركم معايا والكلام ده منقول من ملتقى طلاب المحروسه بنوته اسمها يقين هي اللي عملاه :p

السلام عليكم ورحمة الله وبركاته

اخوانى وأخواتى خريجى الثانوية العامة
دفعة 2008

اللى اختاروا
كلية الصيدلة
واكتملت فرحتهم بالقبول فيها

أهلاً ومرحباً بكم اخوتى

نورتوا كلية الصيدلة

ونورتوا ساحة صيدلة فى
FreeTalaba

مرحباً يا دكاترة المستقبل

عايزينكم تنسوا الثانوية العامة بتعبها وأحزانها وقلقها وكل حاجة

عايزينكم تبدأوا صفحة جديدة فى كلية جميلة يا صيادلة المستقبل

فى الموضوع ده هنتكلم عن الكلية والمواد والمذاكرة والدكاترة وكل حاجة

وهنستقبل إستفساراتكم وهتلاقونا تحت أمركم فى كل حاجة إن شاء الله

أختكم
يقـيـن
خامسة حديث إن شاء الله السلام عليكم ورحمة الله وبركاته

اخوانى وأخواتى طلبة سنة أولى صيدلة


أهلآآآآآآآآآآآآآ بيكم فى كلية الصيدلة


وأهلآآآآآآآآآآآ بيكم فى ساحتنا


وإن شاء الله تبقوا أحسن وأشطر صيادلة فى الدنيا


ده موضوع خاص بكل ما بتعلق بسنة أولى


جمعت لكم فيه كل الكلام اللى كل الدكاترة قالوه عشان يساعدوكم

جزاهم الله خيراً كثيراً


لكن عشان يكون فيه إستفادة كاملة .. مش عايزاكم تقرأوا الكلام وخلاص على كدة

عايزاكم تناقشونا فى مشاكلكم اللى بتقابلكم وتستفسروا عن كل اللى مش فاهمينه

ماحدش يتردد انه يسأل أى سؤال



احنا هنا عشان نساعدكم


أترككم مع الموضوع وبإنتظار استفساراتكم


إعداد : د / حمزه
د / * حفيدة الصحابة *
د / nahla
د / *الصيدلى المسلم*
د / داوود الأنطاكى
السلام عليكم ورحمة الله وبركاته

شباب سنة أولى - صيدلة القاهرة



أدى المواد بتاعتنا خلال الـ 5 سنين من دليل الطالب



سنة أولى حديث :

تيرم أول

كيمياء فيزيائية وعامة
كيمياء عضوية 1
كيمياء تحليلية 1
نبات ونباتات طبية
تاريخ ومدخل الصيدلة
مبادئ الرياضيات

تيرم تانى

كيمياء فيزيائية
كيمياء عضوية 2
كيمياء تحليلية 2
عقاقير 1
حاسب آلى
محاسبة وإدارة أعمال صيدلية
مصطلحات طبية
سنة تانية حديث :

تيرم أول

كيمياء عضوية 3
كيمياء تحليلية 3
عقاقير 2
صيدلانيات 1
علم التشريح والأنسجة ووظائف الأعضاء

تيرم تانى

كيمياء عضوية 4
تحليل آلى
عقاقير 3
صيدلانيات 2
علم الأمراض والطفيليات
علم نفس

سنة تالتة حديث :

تيرم أول

كيمياء عقاقير 1
ميكروبيولوجيا ومناعة
علم الأدوية 1
كيمياء حيوية 1
صيدلانيات 3

تيرم تانى

كيمياء عقاقير 2
ميكروبيولوجيا طبية
علم الأدوية 2
كيمياء حيوية 2
صيدلة مستشفيات
سنة رابعة حديث :

تيرم أول

علم الأدوية 3 وتفاعلات الأدوية
كيمياء صيدلية 1
كيمياء اكلينيكية وبيولوجيا جزيئية
ممارسة صيدلة وصيدلة مجتمع وتشريعات صيدلية
صحة عامة
التداوى بالأعشاب

تيرم تانى

احصاء وتقييم حيوى
كيمياء صيدلية 2
علم السموم
اسعاف أولى
صيدلانيات 4
صيدلة حيوية وحركية الدواء
سنة خامسة حديث :

تيرم أول

صيدلة صناعية 1
ميكروبيولوجيا صيدلية
صيدلة اكلينيكية
كيمياء صيدلية 3
تسويق واعلام دوائى

تيرم تانى

صيدلة صناعية 2
مراقبة وتأكيد الجودة
تقنية حيوية
نواتج طبيعية ومراقبة جودة
معلومات دوائية

وهنتكلم عن كل مادة بالتفصيل الممل ما تقلقوش خالص إن شاء الله
واللى عنده أى سؤال يتفضل
























والتقديرات فى الكلية كالآتى :

من 85 % فيما فوق ...... ممتاز
من 75 % فيما فوق ...... جيد جدآ
من 65 % فيما فوق ...... جيد
من 60 % فيما فوق ...... مقبول
من 30 % فيما فوق ...... ضعيف
أقل من 30 % فى التحريرى .... ضعيف جدآ

كل مادة هيتحسب تقديرها بالنسب دى
وكذلك التقدير النهائى بتاع التيرم أو السنة كلها برضه بالنسب دى





******************
مرحبا أيها الطلاب المستجدين

- ده موقع الكليه اللي هاتشوفه من عليه النتايج ( من أولها كده ) :
http://www.fopcu.com/Index.htm






















فيه كمان مشكلة هتحسوا بيها وهى تغيير النظام
ده شئ طبيعى ناتج عن التغيير والفرق بين المرحلتين
لكن كل حاجة غريبة لما تتعود عليها بتحس انها عادية جداً


كمان مشكلة الإنجليزى
دى قابلتنا كلنا
وكنا زعلانين أوى ومش عارفين نعمل ايه !!
لكن ماتقلقوش
هتقعدوا تبصوا فى القواميس شوية وبعدين تلاقوا نفسكم بتسمعوا الانجليزى عادى جداً وبتفهموا كل حاجة وانتوا بنفسكم اللى بتستغنوا عن القواميس وده طبعاً نتيجة للتكرار
لإن التكرار بيعلم الشطار
فما بالكم بالمتفوقين اللى جايبين97% فيما فوق ( يعنى مش شطار بس )
والله بعد ما هتتعودوا ع الانجليزى .. لو دكتور دخل وشرح بالعربى هتتضايقوا ( شايفين لدرجة إيه ؟ )

فانتوا ما تخلوش الانجليزى عقبة أدامكم
شوية وهتأخدوا ع المصطلحات وع التعبيرات وهتفهموا معنى كل كلمة

وبرضه ما تددققوش فى الانجليزى أوى وعلى كل كلمة وكل حرف
لان ده مش مادة انجليزى
مثلآ تبص فى الكتاب فتلاقى الصفحة كلها انجليزى فتقول لنفسك أنا مستحيييييييييل هحفظ كل ده
وهو مش المطلوب تحفظ كل ده
هتلاقى فى كل باراجراف فى الصفحة معلومة واحدة هى اللى محتاجينها
وبقية الكلام ده زيادة لزوم تكملة الجملة لغوياً





























كيمياء عضوية

1: ودي شبه الكيميا العضوية بتاعت ثانوية عامه - دي ماده عملية ( ليها عملي يعني)
المحاضرات عموما بتبقى في المدرجات - المدرج بتاع سنة اولى بيبقى غالبا مدرج اسمه رجب فهمي ( اول ماتخش الكليه من الباب الرئيسي هتمشي على طول وانت بزاوية شمال شوية هتلاقي مسجد وهتلاقي جنب المسجد طريق شمال وطريق عاليمين هتخش في اللي عاليمين ده هتلاقي المدرج على يمينك -- ده اللي بتناخده فيه المحاضرات واللي بيتعمل فيه حفل الاستقبال )
ومن الاخر اللي يسأل ميتوهش
المحاضرات ليها فن ممكن اختنا تائبه تتكلم عنها بالتفصيل
بس كل اللي اقدر اقولهولك ان: تحرص على الصفوف الاولى من المدرج -- اقتنع تمام الاقتناع ان الراجل او الست ( غالبا بيبقوا ستات ) اللي بيشرح / بتشرح دي عندها خبره كبيره في مجالها وعندها علم رهيب لازم تستفيد منه ( يعني من خلال تجربتي اني لما اقعد جنب حد عمال يقول في الدكتوره مش كويسه انا بتأثر بالكلام ده ومببقاش عاوز اسمع ---->وبالتالي مبفهمش ---->وبالتالي مبحضرش ------>وبالتالي مبذاكرش ---> ؟؟ )
( اللي اقصده انك تخليك مع الدكتور اللي بيشرح ونفض لأي حد جنبك ) ( الحاجات دي طبعا بنصحك بيها لأني مكنتش بعملها فضرتني جامد )



العملي بتاع الماده دي بيبقى في المعامل / السكاشن - وبتحتاج طبعا بالطو ده اساسي - وهمه بيقولولكم الادوات اللي انتو محتاجينها عشان تشتروها
السكاشن بتبدأ غالبا من الاسبوع التاني
بينزلها جدول فيه توزيعة الدفعه بالارقام

الماده دي عاوزه حضور محاضرات وفهم وحل كتير
مانصحكش بالتنفيض للمحاضرات لانها مهمه
ومانصحكش بحضورها لاني مكنتش بحضرها ( حم حم )
بس بيقولو يعني انها مهمه

الماده دي توزيع الدرجات بتاعها بيبقى كالتالي :
20 شفوي
50 عملي
80 للورقه

المذاكره : في ناس بتقول الكتاب حلو وفي ناس بتقول ورق خالد عمر حلو -- شوف انت من انهي ناس فيهم

بالنسبه للمكتبات اللي بتبيع الورق :
عندك زيروكس : ورقها نضيف وفيها تكييف بس ورقها الى حد ما غالي
الدره : امتازت بالمحاضرات اللي بتكتبها اسرة اسماء وفيها برددو ورق تاني
برنت
اولاد عطيه واخواتها اللي في نفس الشارع

نصيحه مني : خليك اجتماعي ومتتكسفش تسأل حد لأن الناس كلها زيك مش عارفه حاجه
نصيحه تانيه : أي حته فيها زحمه ارشق فيها -- واعرف همه بيعملوا ايه ( لا يعني اقصد انك متكبرش دماغك وفي نفس ذات الوقت متبقاش هيزيتاتنج ( قلقان وخايف وتايه ))
نصيحه كمان : ابعد عن صداقات السوء وعن البنات



**************************

الكيمياء العضوية organic chemistry

* المنهج : طويل شوية لكن مش صعب إن شاء الله

* الكتاب : كويس
ولو عايز تجيب ورق ممكن تجيب ورق د / خالد عمر هيعجبك إن شاء الله
وفى آخر التيرم بينزل كتاب أسئلة لااااااازم تهتموا بيه

* الامتحان النظرى : غالبآ بييجى صعب شوية
بس انت اعمل اللى عليك وربنا هيوفقك
والمادة محتاجة فهم اذن ركز انك تكون فاهم وساعتها هتبقى كل حاجة سهلة إن شاء الله

* شغل العملى : سهل جدآ والوقت بيكفى بس لازم تكمل الكتاب من اللى بتكتبه ورا المعيد فى الشرح اللى قبل السكشن عشان الكتاب عليه درجات

* الامتحان العملى : من الحاجات المضمونة بإذن الله وبيجمع لك درجات مش لازم تخسرها

* الامتحان الشفوى : بتجاوب على الأسئلة اللى الدكتور بيديهالك فى ورقة وبعدين يناقشك فيها
والعملى والشفوى بيعوضوا صعوبة النظرى إن شاء الله



***************************

كيمياء عضوية 1

المادة دى عليها 200 درجة
100 نظرى
70 عملى
30 شفوى

هتلاقوها نسخة طبق الأصل من كيمياء الثانوية العامة ( الألكانات - الألكينات - الألكاينات - الاستر - الايثر .... وهكذا )

لكن الكيمياء العضوية لازم لازم تتفهم
خاصة وان الامتحان مش بييجى سهل إلى حد ما

بس انتوا مش عليكم غير تحضروا المحاضرة وتفهموا
وضرورى جداً جداً تهتموا بكتاب الأسئلة اللى بيسلموه ليكم فى الآخر
كتير من الامتحان بييجى من أسئلة الكتاب ده

يعنى بعد الحضور والفهم عليكم بالحل والتدريب

بما إن المادة من 200 درجة يبقى ليها محاضرتين فى الأسبوع
فتابعوها أول بأول عشان مفيش حاجة تتراكم عليكم

العملى سهل برضه إن شاء الله وعليه 70 درجة ودول مش قليلين فلازم نضمنهم بإذن الله
تهتموا بالحضور وخلوا بالكم ان غياب سكشن واحد بيبقى عليه درجات فما تخسرش درجات ع الفاضى بسبب الغياب

وكمان تسليم كتاب العملى كامل مكتوب فيه الـ Schemes عليه درجات المفروض هى كمان نضمنها

ويتبقى الامتحان العملى وبيبقى سهل إن شاء الله ومش محتاج غير حفظ الـ Schemes والهدوء والتركيز فى الشغل

وآخر حاجة بتكون الشفوى وده على حسب الدكتور اللى هتدخل له
بس غالباً بيعطوك ورقة أو كارت صغير فيه سؤالين أو تلاتة وانت تجاوبهم كتابة وبعدها تروح للدكتور يناقشك فى اللى انت كاتبه

واللى يكون فاهم المنهج ما يخافش من مناقشة الدكتور إن شاء الله طالما فاهم

وآخر نصيحة اهتموا بالكيمياء العضوية لإنها هتستمر معاكم طوال 4 تيرمات فى أولى وتانية ولإن عليها درجات كبيرة وامتحانها مش بييجى سهل زى ما قولنا



*******************

بالنسبة للكمياء العضويةorganic
هى مادة لطيفة جدااو ممتعة و فعلا شبه ثانوى جدا ميزتها ان بيبقى فيها شيت فى اسئلة معظم السكاشن فده بيدرب اوى عالاسئلة لو حلته كله و سئلتو الدكتور او الدكتورة لو فى مشكلة ده هيظبط المادة اوى

اهم نصيحة بجد ...محدش يتوتر خالص يمكن تبقى مش فاهم النظام او حتى مش فاهم حاجة ده عادى و حصلنا كلنا بس لازم كل واحد يكون عنده ثقة فى نفسه انه زى ماكان متفوق فى ثانوى الحمد لله يقدر يتفوق فى الكلية ان شاء الله فخليكو هاديين

و ربنا معانا كلنا و يوفقنا






























كيمياء تحليلة 1

كذلك الكيمياء التحليلة زى العضوية هتفضلوا تأخدوها على مدار 4 تيرمات فى أولى وتانية

عليها 150 درجة
80 نظرى
50 عملى
20 شفوى

والـ 50 بتوع العملى مقسومين 25 للـ Anions و25 للـ Cations

و الكيمياء التحليلة بقى من أسهل المواد اللى هتأخدوها فى الكلية إن شاء الله


بتتكلم عن الـ Anions والـ Cations يعنى برضه كلام أخدناه فى الثانوية العامة الحمد لله


الكتاب حلو جداً ولو حبيتوا تذاكروا منه هتلاقوه مناسب إن شاء الله


العملى سهل جداً جداً إن شاء الله ودرجاته مضمونة بإذن الله وتوزيع درجاته زى ما قولنا فوق


الامتحان النظرى بييجى سهل إن شاء الله وامتحانات قسم الكيمياء التحليلة دايماً بتيجى سهلة إن شاء الله


الشفوى برضه هتدخل لدكتور يعطيك كارت صغير فيه سؤالين أو تلاتة وتجاوبهم كتابة ثم يناقشك فيهم على خفيف

وعلى فكرة المادة دى من ضمن المواد اللى هتحبوها جداً إن شاء الله



*******************

الكيمياء التحليلية Analytical Chemistry

دى بقى أسهل وأجمل وألذ مادة عندكم

* المنهج : سهل أوى ان شاء الله

*الدكاترة : ضرورى جدآ تحضروا لدكتورة سماح لو كانت بتديكم
( شرحها كويس واسلوبها بسيط )
وتكتبوا معاها الANIONS
وبعدها هتدخل د/ نجيبة تديكم الCATIONS
وبعدهم د/جلال يديكم الGRAVIMETRY
ده لو الدكاترة مااتغيروش

* الكتاب : لذيذ أوى وتقدروا تذاكروا منه بسهولة بالذات كتاب ال ANIONS مع محاضرات د/سماح

* العملى : جميل جدآ جدآ وشبه النظرى



































الكيمياء الفيزيائية والعامة Physical And Inorganic Chemistry

المادة دى عليها 150 درجة

دى مادة واحدة بس هى جزأين

الكيمياء الفيزيائية هيدرسها دكتور والكيمياء العامة هيدرسها دكتور تانى

والاتنين أسهل من بعض ان شاء الله



والمادة دى أغلبها أخدناه فى كيمياء الثانوية العامة الحمد لله مع فارق ان الدراسة فى الكلية بالانجليزى

ومشكلة الانجليزى هنتكلم عنها فى موضوع منفصل ان شاء الله

كذلك مصادر المذاكرة هنتكلم عنها فى موضوع منفصل ان شاء الله

بس الكتاب بتاع المادة دى معقول ويتذاكر منه ان شاء الله لو عايزين تذاكروا منه



المادة دى مالهاش عملى ولا شفوى

نظرى فقط


***************************

كيمياء فيزيائية وعامة

المادة دى لذيذة أوى

كيمياء فيزيائية - كيمياء عامة

بس فى حاجة عايزة أنبهكم ليها وهى ان لوخلصتوا الفيزيائية الأول العامة بيبقى وقتها قليل فذاكروها أول بأول واهتموا بيها عشان مفيش حاجة تزنقكم
والعكس برضه
لو خلصتوا العامة الأول اوعوا تتزنقوا فيها وتهملوها





























نبات ونباتات طبية

المادة دى عليها 150 درجة
80 نظرى
50 عملى
20 شفوى

بتتكلم عن النباتات وأجزاء النباتات ( ثمرة - ساق - بذرة - زهرة ... وهكذا )

المادة عايزة حفظ حفظ حفظ



ماحدش يقول مش بعرف أحفظ لإننا كنا بنحفظ فى الثانوية العامة
هو بس ممكن يكون فيه ناس عندها ملكة الحفظ فتحفظ بسهولة وناس بتجد صعوبة فى الحفظ

لكن ممكن نحل المشكلة بالربط .. بالتجميع .. بالتكرار .. بالمذاكرة أول بأول



المادة مش صعبة إن شاء الله لكن عشان الحفظ الناس بتستصعبها شوية
ماحدش يكرهها من الأول عشان ما تصعبش عليه بعد كدة خاصة وان المادة اللى بتتكره مش بيتجاب فيها نتيجة كويسة

استمتعوا بيها
اعتبروها تأمل فى خلق الله
معرفة وزيادة علم بطبيعة النباتات اللى موجودة حوالينا
ثقافة بالنباتات اللى موجودة فى منازلنا زى الثوم - البصل - القرفة - الحلبة - الينسون ... وهكذا



وكل ما تجمع المادة وتربط بين الكلام هتسهل الحفظ على نفسك إن شاء الله



العملى مش صعب لكن محتاج تدريب
درّب إيدك على الشغل ومرة فى مرة هتلاقى نفسك بتتعود وتبقى أحسن لغاية ما ييجى الامتحان تلاقى نفسك كويس جداً ان شاء الله وبتعمل أحسن شغل



الشفوى بتدخل للدكتور ويكون أدامه كذا برطمان فيهم النباتات اللى أخدتوها على مدار التيرم فيطلب منك تتعرف على النبات اللى هيشاور لك عليه وبعد ما تتعرف عليه يسألك عنه كذا سؤال زى مصدره واستخدامه والمادة الفعالة اللى فيه ... وهكذا من الحاجات اللى هتكونوا مذاكرينها فى النظرى إن شاء الله




*******************

النبات والنباتات الطبية botany and medicinal plants

المادة دى صعوبتها مش فى المادة نفسها
انما صعوبتها فى ان المنهج طويل أوى ومحتاج حفظ كتير جدآ
وأعتقد مالهاش غير حل واحد
وهو الحفظ أول بأول وبعد كدة التجميع
يعنى لازم تجمع أفكار المادة فى النهاية على أد ماتقدر
ولازم تحضروا المحاضرات عشان الموضوع يبقى سهل عليكم

الامتحان النظرى مش بييجى صعب إن شا الله
الامتحان العملى ( أهم حاجة انكم تاخدوا بالكم من الوقت لانه بيبقى يا دوبك على الأد ) وبيحتاج مجهود شوية
الامتحان الشفوى : انت بتدخل للدكتور تلاقى ادامه عينات من الحاجات اللى خدتوها
بتتعرف على العينة اللى هيسألك عنها
وبعدين يسألك كام سؤال عنها ( بس مش شرط ممكن يسأل فى حاجة تانية)
والمادة عليها 150 درجة

********************

بالنسبة للنباتات botany

انا هاتكلم عن تجربتى الشخصية معاها ...هى فى اول محاضرات كده هتحس ان الدكاترة بتحكى و بتتكلم و يمكن هتكون فاهم بس مش عارف تزاكر ازاى فنصيحة متحاولش تستنى لحد ما يبقى فى حاجات كتييير عشان المادة دى مش سهل تتزاكر اخر ايام قبل الامتحان فحاولو تركزو اوى فى المحاضرة و تحاولو بسرعة تاخدو notes عن اللى الدكتور بيقولو و بعدين كمل الكلام من الكتاب بس نصيحة هو الكتاب كبير اوى بس لو زاكرت اللى انت كتبت عنه notesبس هيبقى كويس ان شاء الله.....كمان مهم اوى نركز عالمقدمة عشان دى هتفيد جداا و تسهل المادة بعد كده

*********************

ححاول اساعدكم ان شائ الله ..

مادة نبات ونباتات طبية botony
المادة ديه من اسمها كده بتتلكم عن النباتات الطبية
القسم : العقاقير .. مبنى شيك كده في آخر الكلية جنب المسجد
المحاضرات : محاضرتان تقريبا واحدة ساعتين والتانية ساعة
الساكشن : 3 ساعات بس ايه كلهم شغل

نتكلم عن المادة وبعدين العملي ان شاء الله

المادة ظريفة بس محتاجة حفظ شوية ..
بس مختلفة تماما عن جزء النبات اللي كان في احياء ثانوية عامة
الاول حتدرسوا 3\4 الترم كده مقدمة عن علم العقاقير او ال pharmacognosy
المقدمة ديه حتبقى فيها حاجات كتيرة
انواع المواد الفعالة وازاي تكشف عنها وبتسخدم ايه
وتقسيمات كتيرة كده .. بس مهمةجدا
يقيت الترم بقى حيبقى بتتكلموا عن الورق ورق الشجر
ايوة بجد
ايه الورد ديه
وبتطلع ازاي
واجزاءها
وحتدرسوا شوية ورق كده بالتفصيل
(( شكله ومنشأه وظروف زراعته و كيف تكشف عنه كيميائيا و تحت المجهر
والمواد الفعالة و فيما يستخدم))
وبعده كده بقى اخر محاضرة بتبقى taxonomy فكرين اولى ثانوية الاحياء بتاتها كان في جزء بتاع العائلات والتصنيفات الكتيرة ديه ..
حتبقى محاضرة واحدة بس في اخر ترم بس لذيذة وفيها صور

حتذاكروا منين ؟
اناكت بذاكر من الكتاب
بس اسهل طريقة للمذاكرة روح المحاضرة اعد قدام في اول صف او تاني
وتعلم في الكتاب ورا الدكتور اللي بيقولوه ..
لان في سنة اولى الدكاترة بيبقوا ماشين كلمة كلمة من الكتاب

اما العملي ..
ففعلا لو عايزة تاخد ثوبات في الكلية ديه
ادخل السكشن ده بنية التأمل ..
العملى بيبدأ بالبودرة .. بودرة نشوية وغير نشوية وتتفرجوا عليها تحت المجهر
وديه بتقى حلوة وظريفة وسكاشنها ظريفة وفرصة انكم تعرفوا ازاي المادة ديه
العملى فيها نظموا ايه ..
وبعد ما بتخلص بتمتحنوا فيها امتحان عملى
بيجيبول لكم خليط من بودرتين وانتو تفرقوا وتكتبوا ليهم جدول كده حتعرفوه

وبعد كده بتعيشوا بقى من اوراق الاشجار
ويبدأ الشغل ..
حتمسكوا الورق وتخدوا فيها قطعات عرضية وتشيلوا قشرة رفيعة من عليها
وتتفرجوا على الخلايا تحت المجهر
بجد فعلا سبحان الخالق
انا فكرة اني مكنتش مصدقة وانا بشوفها ..
أكانها مرسومة ..
وحتصبغوا الخلايا وحتشوف حاجات ملونة احمر وازرق وبني

بس فعلا علشان العملي معاكم يطلعوا حلو لازم تتدربوا في البيت
مش مشكلة يبقى عندك ميكرسوب
اتدرب ازاي تقطع في الورق
كان في دمتور عندنا في السكشن كان بيقول لنا
جيبوا ورق من اي مكان ودروبوا ايدكم
انا كنت باجيب اي ورقة في بيتنا خس ومرة ورقة بنجر بس كانت حلووووووة اوي
فالاهم انكم تتمرنوا تتمرنوا

































تاريخ ومدخل الصيدلة

المادة دى عليها 100 درجة
ومالهاش شفوى ولا عملى
نظرى فقط

المادة جزأين على كتابين
كتاب بالعربى عن تاريخ الصيدلة
ولكم أن تتخيلوا الجزء ده سهل أد إيه على الأقل عشان بالعربى



وكتاب بالإنجليزى عن مدخل الصيدلة
ومش صعب برضه إن شاء الله
وكلها معلومات بسيطة وسهلة



المشكلة الوحيدة اللى هتقابلكم فى المادة دى هو انكم هتيجوا بعد محاضرتين تلاتة وهتقرروا انكم ما تحضروش تانى ربما لسهولة المادة أو لاحساسكم بالملل فى المحاضرة

بس ده غلط يا دكاترة

لإن المادة مش هتتذاكر على مدار التيرم
ومش هتحتاج منكم غير وقت قليل فى الآخر
اذن لازم تهتموا بالحضور عشان لما تيجوا تذاكروها آخر التيرم ما يكونش دى أول مرة تفتحوا فيها المادة
ولاحظوا كمان ان المادة حفظ والحفظ لازم له التكرار والا هتنسى فىا لامتحان ومش هتعرف تكتب

فنصيحة اهتموا بالحضور وتابعوا المادة ولو قراءة


*******************
مدخل وتاريخ الصيدلة

اوعوا ماتحضروش المحاضرات
أيوة هتحسوا انها مش مهمة
ومش هتحضروا
ومش هتذاكروا المادة
بس هتيجوا اخر التيرم وتتزنقوا أوى
تخيلوا انكم مطالبين ليلة الامتحان انكم تحفظوا حاجات كتيرة أوى
لأ وايه كمان لازم تحفظوها كويس جدآ عشان ماتنسوهاش تانى يوم وانتوا بتجاوبوا فى اللامتحان
وبالنسبة للكتاب فيه حاجات الدكتورة بتطلب منكم انكم تحلوها وتسلموها الكتاب
لازم تحلوها لان الكتاب ده عليه درجات لان طبعآ المادة مالهاش عملى



































مبادئ الرياضيات

المادة دى عليها 100 درجة
مالهاش شفوى ولا عملى
نظرى فقط

اللى بيدرسها دكاترة من كلية الهندسة

ورياضة يعنى مهم فيها الفهم طبعاً طبعاً

يمكن يكون فيها جزء صعب شوية لإننا ما أخدناش رياضة 2 فى ثانوية عامة بما إننا كنا عملى علوم

بس مش مستحيلة يعنى


كلنا عدينا منها وفيه مننا اللى جايب إمتياز وجيد جداً وفيه مننا اللى جاب الدرجة النهائية كمان


فقط اهتموا بالحضور والفهم والحل


والإمتحان بييجى معقول إن شاء الله بس انتبهوا للوقت عشان الوقت مش بيبقى كتير


لو الدنيا قفلت معاكم ولقيتوا نفسكم فعلآ مش فاهمين من المحاضرات هتلاقوا ورق دكتور ايهاب على حلو أوى

أو حتى روحوا احضروا له هتلاقوا شرحه رائع جدآ ما شاء الله









































--------------------



























--------------------




















--------------------

شكرا يا مروة الموضوع الرائع بجد مفيد جدا

جزاكم الله كل خير .وشكرا جدا على نقل الموضوع أنا قرأته فعلا فى ملتقى طلاب المحروسة .

العفو على ايه المهم لو حد لقى اي حاجه يبقى يبعتها


:cool: العفووووووووووووو :cool:

شكرا يا دكتورة مرمر

الأخت الغاليه /مرمر جزيل الشكر لكى على ماسطرته لنا يداكى ،
وبما حواه موضوعك من شرح واف ومفصل لطلاب أولى صيدله فى جامعه القاهره ،


ولكن إسمحى لى بأن أصحح معلومه لكى :-

ذكرتى فى المواد الدراسية لأولى حديث فى الترم الثانى

كيمياء فيزيائيه >> وهى صيدلة فيزيائيه وليست كيمياء :) ، ومعروفه بإسم سيوتكس

وهذه تعتبر أصعب مادة فى سنة أولى ، ودى بجد اللى عايزه شغل من أول يوم ، وبتتقسم كالتالى :-

العملى >> 50 درجة

النظرى >> 100 درجة

يعنى الماده دى مش ليها إمتحان شفوى ، وبصراحه اللى هيدرسها هيحس بصعوبه ، بس اللى هيذاكرها أول بأول هيحس بإنها كويسه ولذلذيه ، والكلام ده عن تجربة شخصيه ،

وطبعآ هتسمعوا وقتها عن الدكتوره سهام ودى رئيسه القسم ومشهوره بأسئلتها الصعبه ، وصعوبه أسئلتها إنها بتجيب كلمات جديده الطلاب مش بيعرفوا ترجمتها ،

وطبعآ اللى عايز يبدأ دروس هيكون الحل مع الدكتور عماد ،
بس نصيحتى بلاش ترهق نفسك وأهلك بالدروس ، ولو حضرت المحاضرات وذكرت كويس هتكون أفضل كتير ....

هو مفيش تشرييييييييييييييييييييييح ضفادع

شكرااااااااا جزيلا انا ان شاء الله حدخل اولى صيدلة القاهره والمعلومات مفيدة فعلا

شكرا يا دكتورة

هو مفيش تشرييييييييييييييييييييييح ضفادع

انا على ماعرف يا فوفووو ان التشريح انشاء الله في تانيه ولو حد يعرف غير كده يبقى يقولنا:eek:

ايوة فى تشريح ضفادع