مشاهدة النسخة كاملة : كارت حرية


كركركوكو
16-08-2008, 03:14 PM
بص يا عم..
من حقك تختار..
ملك أو كتابة..
ولو ف نص الليل..
حد جرك من قفاك..
قول له بقلب جامد..
فين إذن النيابة..
وطالما كده كده بتتسرق..
يبقي ع الأقل تعرف..
مين همّ أفراد العصابة..
إنت بس..
إشحن حرية..
كارت من أبو عشرة..
أو عشرين..
أو خمسين أو مية..
تلاقي قلبك بقي زي الحديد..
وقادر تفوت من أي بوابة..
وتغني للصبح..
وتقول ع الربابة..
بس خللي بالك..
لو رصيدك خلص..
أو انتهت الصلاحية..
ها تتغير العيشة..
وهاتعرف إن الدنيا كدابة..
بنت كدابة..
وها تفتكر كل اللي راح..
وتقول الله يرحمك يامه..
ويرحمك بقي يابا..
لا هاتلاقي عيش وملح..
ولا أصحاب..
ولا أهل..
ولا قانون..
ولا نقابة..
ساعتها بس هاتعرف تفرق..
بين العصافير والديابة..
وإن الكلام الحلو..
والغنا الجميل..
كان مجرد سحابة..
وإنك لسه برضه الواد..
إبن الناس الغلابة..
وإن لسه فيه خوف..
ورصاص..
وعسكر..
ودبابة..
علي فكرة مش دايما
الأسد الجدع النبيل..
بيبقي هو ملك الغابة..

كتب علي سلامة ١٦/٨/٢٠٠٨

أحمـدنجـم
17-08-2008, 02:49 PM
وانا هشحن كرت بمليون كلمة شكر ليك على تلك القصيدة الرائعة التي امتعتني بصدق

كركركوكو
17-08-2008, 02:57 PM
وانا هشحن كرت بمليون كلمة شكر ليك على تلك القصيدة الرائعة التي امتعتني بصدق

يشرفني دائما مرورك
ويشرفني ايضا ان نكون اصدقاء
وطبعا علي سلامه لايختلف عليه احد
جزاكم الله خيرا علي المرور العطر

أحمـدنجـم
06-10-2008, 01:43 PM
ياجماعة اقروا القصيدة دي رائعة مش عارف ليه اتنست؟

msamido
06-10-2008, 03:43 PM
القصيدة جميله جدا جدا

وعلى فكره على سلامه ليه موضوع فى الركن الأدبى فيه قصايد كتير أوى ليه
.
.

كركركوكو
30-10-2008, 11:04 PM
جزاكم الله كل الخير
مشكورين علي المرور

أحمد حافظ جلال
30-10-2008, 11:23 PM
بارك الله فيك قصيدة جميلة حقا

sunsero2000
30-10-2008, 11:27 PM
الله عليك وعلى كلامك الحلو وننظر المزيد