فى البدايه مدينه الثقافه والعلوم بتحتوى على معاهد [هندسه - حاسبات - علوم اداريه - خدمه اجتماعيه - اعلام - لغات - اقتصاد ]

انا هتكلم بأختصار عن كل معهد من معاهد مدينه الثقافه والعلوم من حيث الاقسام و شروط القبول وعدد السنين و المصروفات بحيث الى لسه بيفكر هيدخل ايه المعلومات دى تساعده فى تحديد قراره

1- المعهد العالى للهندسه ب 6 اكتوبر "ده اسمه فى موقع التنسيق "

شروط القبول


الثانوية العامة الشعبة الهندسية وما يعادلها من الشهادات العربية والأجنبية

الثانوية الصناعية نظام3 سنوات بحد ادنى 75 % من مجموع المواد النظرية


دبلوم المدارس الصناعية نظام الخمس سنوات و المعاهد الفنية الصناعية بحد ادنى 70% من المجموع الكلي للدرجات
بالنسبه للتنسق فهو بيختلف كل سنه لكنه بيكون ما بين ال 82 و 89 للثانويه العامه السنه الى فاتت 2014 اخد من 87.31

بالنسه لتنسيق الدبلومات والمعاهد انا معنديش معلومات عن
الموضوع ده

بالنسبه للاقسام

1- هندسة التشييد والبناء " مدنى "

2- هندسة الحاسب
3- هندسة الميكاترونيك
4- الهندسة الصناعية

عدد النسن 5 منهم سنه اعدادى والنظام credit hours


المصاريق تقريبا ما بين ال 9 و 10 الاف جنيه فى السنه

الشهاده معادله من المجلس الاعلى للجامعات

2- المعهد العالى لعلوم الحاسب ونظم المعلومات 6 اكتوبر "ده اسمه فى موقع التنسيق "

شروط القبول

- ثانويه عامه علمى رياضه بمجموع بيتغير كل سنه بيكون ما بين 65 - 75 السنه الى فاتت اخد من 65.12
- علمى علوم و ادبى والدبلومات و الازهر بشرط

بشرط استيفاء متطلبات القبول لمعادلة الشهادة من المجلس الأعلى للجامعات وهى ان الطالب يمتحن (فزياء و رياضه1 و رياضه 2 ) فى كليه العلوم وده امتحان بيكون فى شهر 9 او 3 وللطالب الحريه فى انه يختار سنه الامتحان لكنه مش هياخد شهاده التخرج الى بعد الانتهاء من مواد المعادله بالنسبه لطلبه علمى علوم الامتحان بيكون فى الرياضه بس

أقسام المعهد• قسم نظم المعلومات.
• قسم علوم الحاسب.



مدة الدراسة أربع سنوات التخصص من الفرقة الثالثة.


المصاريق تقريبا ما بين ال 5 و 6 الاف جنيه فى السنه


الشهاده معادله من المجلس الاعلى للجامعات

3-المعهد العالي للإعلام وفنون الاتصال بـ 6 أكتوبر "ده اسمه فى موقع التنسيق "

شروط القبول

الثانوية العامة بشعبتيها علمى و ادبى وما يعادلها من الشهادات العربية والأجنبية
المجموع كل سنه بيتغير لكنه بيكون بالنسبه للادبى ما بين 57 و 62 السنه الى فاتت 2014 اخد 57 و بالنسبه للعلمى سنه 2014 اخد من 50 %

أقسام المعهد
الصحافة.
الإذاعة (راديو وتليفزيون)
العلاقات العامة والإعلان


نظام الدراسة
مدة الدراسة أربع سنوات التخصص من الفرقة الثالثة.
المصاريق تقريبا ما بين ال 5 و 6 الاف جنيه فى السنه



4-المعهد العالي للغات بـ 6 أكتوبر"ده اسمه فى موقع التنسيق"

شروط القبول

الثانوية العامة بشعبتيها وما يعادلها من الشهادات العربية والأجنبية. - يشترط للقبول الحصول على 65% للغتين ( الانجليزية – الفرنسية )
التنسيق السنه الى فاتت كان 50 % للعلمى و 50 % للادبى

أقسام المعهد
قسم اللغةالإنجليزية
قسم اللغة الفرنسية
قسم اللغة الألمانية
قسم اللغة الأسبانية


مدة الدراسة أربع سنوات. التخصص من الفرقة الأولى.
المصاريق تقريبا ما بين ال 5 و 6 الاف جنيه فى السنه

5- معهد أكتوبر العالي للاقتصاد "ده اسمه فى موقع التنسيق "

شروط القبول
- الثانوية العامة بشعبتيها وما يعادلها من الشهادات العربية والأجنبية.
- دبلوم المدارس الثانوية التجارية 3 سنوات.
- دبلوم المعاهد الفنية التجارية.

تنسيق السنه الى فاتت 2014 كان 50 % علمى وادبى

أقسام المعهد- شعبة اقتصاد.

- شعبة سياسة

مدة الدراسة أربع سنوات التخصص من الفرقة الثانية.

المصاريق تقريبا ما بين ال 4 و 5 الاف جنيه فى السنه
6-المعهد العالي للعلوم الإداريةبـ 6 أكتوبر "ده اسمه فى موقع التنسيق "
شروط القبول
الثانوية العامة بشعبتيها وما يعادلها من الشهادات العربية والأجنبية. دبلوم الثانوية التجارية نظام 3 سنوات.
تنسيق السنه الى فاتت 2014 , 50% علمى وادبى
أقسام المعهد


- قسم التمويل وإدارة محافظة الأستثمار.

- قسم المحاسبة.

- قسم الإقتصاد.

مدة الدراسة بالمعهد أربع سنوات دراسيةو التخصص من الفرقة الثالثة.

المصاريق تقريبا ما بين ال 4 و 5 الاف جنيه فى السنه

7- المعهد العالي للخدمة الاجتماعية بالسادس من أكتوبر "ده اسمه فى موقع التنسيق "

شروط القبول

-الثانوية العامة بشعبتيه
تنسيق السنه الى قاتت 2014 كان 50 % علمى وادبى
• مدة الدراسة بالمعهد أربع سنوات دراسية.
المصاريق تقريبا 2000 جنيه

دى كانت المعلومات الاساسيه عن كل معهد فى مدينه الثقافه والعلوم

فى نهايه المقال احب اقول مدينه الثقافه والعلوم ممكن تكون ضمن حساباتك لو بتحاول تعمل توازن بين مستوى تعليمى جيد و تكلفه دراسه متوسطه مستوى الدراسه جيد جدا فى هندسه و حاسبات انما باقى المعاهد انا معرفشى النظام لكنها اقل فى المستوى وده بسبب المجموع الضغير الى بتقبله

مستوى النظافه ممتاز جدا

انا هسيب ال contacts بتعتى لو حد حابب يستفسر




Mohamed salah
01117557989
outlook Email : Mohamedslah19@outlook
Gmail: muhamedsalah94@gmail

طيب انا جايبه 74.7 % علمى رياضه ممكن ادخل حاسبات ونظم معلومات فى ثقافه وعلوم ولا صعب ؟؟؟ :(:(

بنسبه 90 % ممكن تلحقى لانه اخد السنه الى فاتت من 65 واعلى سنه اخد كان سنه 2012 من 75 ده بيتوقف على عدد الناس الى هتقدم

ان شاء الله هلحقو :)

ينفع لو جبت تقدير فى المعاهد دى اخد
بعد كدا ماجستير ولا مينفعش

اه ينفع ماجستير ودكتوراه ولو جبت تقدير تتعين معيد

لو سمحت هو المعهد العالي لعلوم الحاسب ونظم المعلومات الدراسه فيه سهله ولا صعبه وانجلش ولا عربي
ارجو الرد بسرعه لانني اسجل رغباتي

لو سمحت هو المعهد العالي لعلوم الحاسب ونظم المعلومات الدراسه فيه سهله ولا صعبه وانجلش ولا عربي
ارجو الرد بسرعه لانني اسجل رغباتي

الدراسه بالانجليزى كل المواد وموضوع السهوله موضوع نسبى لكن بشكل عام نسبه كبيره من الطلبه مش بتقدر تكمل

ينفع لو جبت تقدير فى المعاهد دى اخد
بعد كدا ماجستير ولا مينفعش

اى حد معاه بكالوريوس معترف بى من المجلس الاعلى للجامعات بتقدير جيد او اعلى يقدر يسجل ماجستير والدكتوراة لكن اقسام الكليات الى الطالب حابب يعمل فيهم الماجستير والدكتوراة من حقهم يحطوا معاير قبول تخصهم لكن بشكل عام اه يقدر يعمل ماجستير والدكتوراة

الله يبشرك بالخير

لسه مفيش اخبار عن التنسيق بتاع المعهد طيب ؟؟

هل لو جبت تقدير امتياز في كل سنة وأخدت كرسات في أماكن كويسة يكون تعيني زى اللي أخد كلية !أصل أنا كنت أزهر ومنوعوا النقل للكليات الخاصة متاح المعاهد بس حسبي الله :( ! .. وأيه هيا الكورسات اللازمة لأن حلمي بجد أدخل إعلام وأكون قسم علاقات عامة وإعلان ! ^_^

لسه مفيش اخبار عن التنسيق بتاع المعهد طيب ؟؟

نتيجه المرحله ال 3 ظهرت وحاسبات اخدت من 66 % علمى رياضه 271

هل لو جبت تقدير امتياز في كل سنة وأخدت كرسات في أماكن كويسة يكون تعيني زى اللي أخد كلية !أصل أنا كنت أزهر ومنوعوا النقل للكليات الخاصة متاح المعاهد بس حسبي الله :( ! .. وأيه هيا الكورسات اللازمة لأن حلمي بجد أدخل إعلام وأكون قسم علاقات عامة وإعلان ! ^_^

بالنسبه للسؤال الاول ال courses فى اى مجال هى فى حد ذاتها متعنيش شئ هى مجرد اداه لكسب المعرفه يعنى الاهم هوه تحديد الاولويات وبعد كده موضوع مين احسن حد او فين افضل مكان وايه انسب وقت لل courses فده موضوع سهل جدا , بالنسبه لفكره معهد وانا عارف انها كلمه مش محبوبه فى الوسط بتعنا وكانت بالنسبالى كلمه غير محبوبه ولكن بعيدا عن حب الكلمه او الكره الموضوع الاهم هوه الدرجه العلميه فى مصر فى كيان اسمه المجلس الاعلى للجامعات وده موجود فى حرم جامعه القاهره اى خريج من معهد خاص او جامعه خاصه او درس فى الخارج يقدر يروح ويطلع شهاده لمعادله الشهاده الى حصل عليها بالدرجه العلميه الممنوحه من الجامعات الحكوميه فبالمنطق والقانون اى معهد او جامعه خاصه او جامعه خارج مصر معادل من المجلس الاعلى للجامعات طلابه لديهم نفس الدرجه العليمه الى بيخدها طلاب الجامعات الحكوميه لكن سمعه كليه زى كليه الاعلام جامعه القاهره تختلف عن سمعه اى معهد اعلام اخر حتى مع تساوى الدرجه العلميه ودى ميزه لطالب جامعه القاهره ولازم طالب اى معهد اعلام يكون شاطر عشان ينجح ونفس الكلام على كل الجامعات و المعاهد