السلام عليكم ورحمة الله وبركاته

أنا مأجل 3 مواد في ثالثة ثانوي من السنه اللي فاتت

فيزياء و رياضة 2 و عربي

وعايزكوا تساعدوني في تنظيم وقتي في المذاكرة زي أنام كام ساعه في اليوم من الساعه كام إلى كام و أنام الظهر ولا لأ ؟ والمفروض أذاكر كام ساعه في اليوم لو عندي في اليوم ده درس أو لو ماكنش عندي في اليوم ده درس المفروض ساعات المذاكرة تتراوح من كام إلى كام ؟ عشان أنا ناوي أقفل ال 3 مواد دول

وأخد أوقات راحة قد أيه بين كل مدة و مدة في المذاكرة !!!!

و أبتدي أذاكر مواد أيه و أحل من كتب أيه ؟؟؟

وأخد أوقات راحة كام ساعه في اليوم؟؟ و أعمل أيه في أوقات الراحة ديه ؟؟

ولو حقعد على الكمبيوتر أشوف مواقع ثانوية عامة أقعد كام ساعه ؟؟؟

وذلك علماً بأني حيكون عندي دروس في أربعة أيام في الأسبوع بس للثلاث مواد

وكمان أنا السنه ديه منازل مش عندي مدرسة يعني و كمان معنديش صحاب و مش بخرج بره البيت كتير

ودرجاتي
عربي1 : 27.5
إنجليزي1: 23.5
فرنسي: 48.5
رياضيات1: 47.5
كيمياء: 43.5

إنجليزي2: 23.5
إقتصاد وإحصاء: 42.5

يجب ان تنظم وقتك وتصلى الصلوات فى مواعيدها وتعمل خطة وتمارس الرياضة كل صباح حتى تقوى بدنك وعليك بثلاث اشياء الاكل الكويس والنوم الكويس والمذاكرة الكويسة وطبعا تعطى ربك حقه اولا فان نظمت بين هؤلاء الثلاثة تكن من الاوائل باذن الله

شكراشكراشكراشكراشكراشكرا

بص ياباشا

انا الحمدلله داخل كليه فنون جميله اللى كنت بعمله اول حاجه

كانت الصلاه ودى حاجه اساسيه وبدال انتا منازل يبقى الصلاه فى الجامع

خلصنا من الصلاه والحمدلله

تعال اوقات النوم
اوقات النوم بتبقى 6 او 7 ساعات وساعتين راحه فى اليوم ياعنى عندك 8 او 9 ساعات فى اليوم ضايعين نوم وشويه تلكيع

نيجى للفطار والغداء والعشاء حياخدوا كلهم ساعه ونص بالكثير

يبقى احنا عندنا 11 ساعه قول كل يوم عندك درس والدرس ساعتين وساعه رايح وجى يبقى 3 او 4 ساعات ضيعين

يبقى اتبقى لينا 7 ساعات

السبع ساعات دى تتقسم ازاى

العربى ساعتين كل يوم

والرياضه ساعتين

والفيزياء 3 ساعات

وكده جدوللك تمام ده اللى كنت بعمله وخلباللك انا كمان كنت منازل
بس الحوار ده لو منفعش ممعاك فى اول يومين حاول تغيره لان تفكيرى غير تفكيرك وكل انسان بيختلف عن الاخر

شكراً لك يا محمد جبار
بس أنا مش عارف ليه حاسس أن 7 ساعات مذاكرة في اليوم قليلة شوية !!!!!!!

استنانى هعملك جدول مذاكرة وهحطهولك فى مرفق بس قولى على مواعيد دروسك علشان اظبط مواعيد مذاكرتك معاه

وربنا يوفقك بس قولى الاول هتمشى على الجدول ولا هعملو وهتبدا فية شوية وبعد كده تزهق وتسيبة

انا عايز اقولك حاجة بس ياريت تفهمنى

اولا الحماس اللى موجود فيك دة اكيد مش هيفضل لحد الدراسة وحتى لو فضل لحد الدراسة اخرك شهرين وهتتنفخ من الجدول اللى انت عاملة يعنى كل يوم هتقعد تغير فية حاجة لحد ما تلاقية كلة باظ
انا معاك ان تنظيم الوقت شىء ضرورى بس صدقنى مش هينفع كل يوم نفس الجدول انت ممكن تنظم اليوم بيومة على حسب ظروفك مثلا امتحان فيزياء او تعبان شوية لقدر الله او اى حاجة
اهم حاجة انك تسال نفسك انت كويس فى المواد دى ولا لا وخلى دة مقياسك مش عدد ساعات المذاكرة هى اللى مقياس يعنى يوم ما تلاقى نفسك كويس وحاسس انك م ناقصك حاجة مش عيب انك تخرج او تروح تلعب اى حاجة
ويوم ما تلاقى نفسك حاجات ناقصاك تقعد لحد ما تخلصها حتى لو منمتش

هو دة اللى كنت انا بعملة والحمد لله دخلت صيدلة

وبجد لو عايز اى حاجة فى اى مادة خصوصا الفيزياء انا ممكن اساعد انا جبت 48