انتي أم مين فينا يامصر.. ولا تكونيش ام الدنيا كلها [الأرشيف]

مشاهدة النسخة كاملة : انتي أم مين فينا يامصر.. ولا تكونيش ام الدنيا كلها

Dr.ahmed91

24-08-2008, 10:46 AM

مصر .. الحب المستحيل
ليه دايما احنا متحاملين على مصر !! ليه كل ما نتكلم عن بلدنا نقول دي بلد بنت ستين وتستاهل الحرق وامته الواحد يهج بره في أي حته !! بجد ليه كل ما نيجي نعرض حاجه نقوم جايبين الجانب الوحش في مصر !!

هو في أصلا جانب حلو في مصر ؟؟

السؤال ده سألته في نفسي بعد ما قرأت تعليق لطالبة في باب الكاميرا الشقيه بتقول انتوا ليه متحاملين على مصر وكل شوية تجيبوا صور عن الوحش اللي فيها !! مصر فيها حاجات كتير حلوه ..

كلامها ده بصراحه خلاني افكر مع نفسي كتير .. ياترى أنا باحب مصر أساساً !! خطر في بالي حسين فهمي في فيلم مافيا وهو بيقول لأحمد السقا انت مش بتحب امك عشان هي أجمل واحد في الدنيا انت بتحبها عشان هي أمك ..

كلام منطقي بصراحة .. بس هي قاسية قوي علينا .. الفقر وحش .. قلة القيمة وحشه .. الجوع وحش .. كسرة النفس وحشه .. قاسيه مش كده !!

بس لحظة يا جماعه احنا كده بنخلط الأوراق زي ما بيقولوا .. مين اللي قاسي بالضبط !!

مصر !!

لا والله ..

البلد دي كلها خير وطيبه .. كل ما ابص في وشوش الناس اللي راكبين معايا الاوتوبيس الصبح باقعد اتخيل حكاية كل واحد فيهم .. بابص في عنين واحد شكله موظف حكومة وباحس انه فرحان عشان النهارضه آخر الشهر والقبض على وشك .. فرحان بال400 جنيه اللي هياخدهم وبالنسباله دول حل كل همومه ..

بابص في عنين الفلاحة اللي شايله طشت الجبنة المتغطي وهي مستنيه محطتها عشان تنزل تبيع طول اليوم عشان 9 جنيه مكسب ولا حاجه..

اتنين بيتخانقوا مع بعض بعد شوية يصالحوا بعض وولا أكنهم كانوا بيشتموا بعض من شوية ..

شعبنا طيب .. وبلدنا جميله ..

يمكن النظام قاسي علينا شويه .. بس بلدنا ملهاش ذنب .. مصر دي غلبانه قوي والله .. عامله زي الست اللي ورثت من جوزها شيء وشويات وقام واحد اتجوزها وحرم ولادها الصغار من خير أبوهم ..

هتفضل برضو أمهم غلبانه ..

باغمض عيني وباحلم .. لو جا يوم ومشيت الحكومة دي وجت حكومة تانيه محترمه جدا وبتراعي ربنا فينا وبتنفذ شرعه .. وبقينا أغنيا وتعليمنا بقى زي أمريكا وبندرس اللي بنحبه وسوقنا رخيص ويوم ما افكر اتجوز اشتري التلاجه أم 4000 جنيه ام شاشه ديجيتال دي واشتري شقه في الحته اللي نفسي اسكن فيها و يبقى عندي عربيه حلوه وشوارع واسعه وجميله وأسره مطمن على مستقبلها وابقى باقول اللي انا عايزه للحكومة وهمه يسمعلولي ويعملوا على حل مشاكلي ..

http://img.alibaba.com/photo/10863374/LG_Internet_Refrigerator_GR_D267DTU.jpg
تلاجه دي مش دولاب!

مصر يا جماعه تحققلنا كل ده .. بجد والله .. خير مصر يعيشنا أحسن من كده كمان .. انا يمكن غلبان وآخري التلاجه ام اربعه باب زي الولا تامر اللي بيحلقلي اللي فاكر ان الريس بياكل كل يوم فراخ !

مش عارف !! حاسس ان مشاعري داخله في بعضيها .. أحب مصر ولا اكرهها ..

الغريب ان الحاجات اللي بتخنق الواحد وتاعباه بتتحول مع الواقت لمظاهر محببه للنفس !

زي الأوتوبيس .. والبشر اللي فيه .. والناس اللي بتوسع لبعضها والكومسري اللي بينادي قدام فاضي ياجماعه كواجب وطني والشاب الجدع اللي بيقوم للست العجوزه ويقولها اتفضلي يا حاجه .. والأجمل بقى الناس اللي بيمدولك إيدهم وانت بتجري ورا الاوتوبيس عشان تركب .. حاجات حلوه .. بتخلينا نبتسم بمراره على طريقة هم يضحك ..

http://img87.imageshack.us/img87/633/ahly1vx4.jpg

تامر الحلاق .. و الناس اللي بيبقوا قاعدين وبيتكلموا في كل حاجه في الدنيا وهمه لا يفقهوا شيء في أي شيء أساسا .. وعم حسين اللي بيحلق في ساعة وربع و بيحاول يقنعنا من ست سنين ان صدام ماكانش لازم يدخل الكويت قبل ما يكون مجهز النووي ومُصِر على إن عاصفة الصحراء هي رياح الخماسين اللي بتيجي كل سنة !

و عم أحمد الغفير بتاع المنطقة اللي عنده 60 سنة اللي بينام من الساعه 10 بالليل قبل ما اختي الصغيره حتى ما تنام وعمر ما في جريمة حصلت في المنطقة بالرغم من ان عم احمد ده لو حد عطس فيه هيتوفى !

الناس الطيبه اللي برغم الفقر وغلاء المعيشه بتقف تنكت في طابور العيش .. العيال اللي مزوغين من المدرسة في إيمان تام إن التعليم عملية غير مجديه وان المستقبل دي كلمة خرافية وان كل حاجه حاضر والماضي ده في الأغاني بس !

النفوس الطيبه برغم الغلاء .. النفوس الكريمه برغم الذل .. الناس الشقيانه عشان ملاليم .. أهالينا اللي بيشقوا عشان بشوفنا احسن منهم ..

العيون اللي بتجري ورا ابو تريكه في الشاشه لإنه بالنسبالهم البهجة الوحيده في حياتهم والحاجه الوحيده اللي بتحسسهم بكرامتهم وبحبهم لبلدهم ..

منظر الغروب على البحر والموج بيضرب في الصخر ويطير عالي وماينساناش من لفحة ميه أكنه بيقلنا انا بحركو انا حته منكم زي ماانتوا حته مني ..

منظر الصعايده بجلاليبهم وهمه ماشيين في عزة وفخر أكنهم كلهم عُمَد .. مولودين بحب الأرض والموت عشانها ..

منظر القناة الخامسه وهي بتوش ومش فاهم ايه البرنامج اللي شغال ده واذا كان اللي بيقدمه واحد ولا واحده وايميلهم اللي عالياهو ..

منظر الأب اللي واخد عياله آخر الأسبوع بيفسحهم والفرحة في عيونهم وبيتنططوا وبيلعبوا معاه كورة وهو برغم الهم اللي فوق دماغه كله بيلعب معاهم وأكنهم الحاجه الوحيده في الدنيا !

مصر حلوه عشان هي مصر ..

حكمها فرعون وكانت مصر ..

حكمها عمرو بن العاص وكانت برضو مصر ..

فهمت لاول مره في حياتي معنى ان مصر دي قلب كبير بيضمنا ..

مهما لفينا في الدنيا .. مالناش غير بلدنا تلمنا ..

مهما كانت قاسيه ..

ومعفنه ..

كريم العيسوي

Tawfeek Yahia

24-08-2008, 10:48 AM

باختصار ..... مصر ام الدنيا بس فيها حاجات كتييير بايظه من زمااان اولها الحكومه

وفاء البحر

24-08-2008, 11:00 AM

اولا شكرا ع الموضوع
ثانيا هي كلمه وهفضل ارددها
العيب مش فيكي يا بلدي
العيب في اللي فيكي
اللي عيش يا ياخد ورافض يديكي
معلشي يا بلدي ما تزعليش
لا......لا.... ميهمكيش
ما اهو اصل العيب مش فيكي
العيب في اللي عامل حاميكي
وهو اصلا ما يستاهلكيش

وعلي راي عبد المنعم مدبولي في فيلم عايز حقي
بعد ما تبيع يا عواد لف الدنيا بحالها ولو لقيت حضن ذي حضن مصر ابقي بيع يا عواد

biob

24-08-2008, 01:29 PM

Dr.ahmed91

24-08-2008, 01:39 PM

بحبك يا مصر

ولكن....

toka nabil

24-08-2008, 10:09 PM

بجد الموضوع حلو اوى يا Dr

وعرفت تعبر عن مصر فعلا

msamido

25-08-2008, 11:50 AM

FRANKENSTEIN

25-08-2008, 12:10 PM

مش عايز حد بس يفتكر انى بنى ادم استسلامى أو انهزامى أو حتى محبط
اتفقنا ؟؟

مصر يعنى ايه ؟
ومش قصدى المعنى الحرفى ؟
مصر يعنى أرض ؟؟
يعنى شعب ؟؟
يعنى حكومة ؟؟
يعنى أهلى وناسى واصحابى وحبايبى ؟
يعنى ماضى وحاضر ومستقبل ؟
مصر هى أمى ؟؟

مصر ولا حاجه
ايوه ولا حاجه
يعنى ايه مصر أرض ؟؟
طيب ما هى أمريكا أرض وهولندا أرض وكندا أرض واستراليا أرض ايه يعنى اللى يخلى مصر هى الأرض اللى مفيش زيها فى العالم كلها أراضى

مصر يعنى شعب ؟؟
شعب جاهل ومتخلف شعب سلبى شعب راضى باللى بيحصله وعايش ولا همه غير نفسه شعب نسى الإسلام شعب طيب بالفطرة شعب جدعنته نصها منظرة شعب ميعرفش يعنى ثقافة شعب لما اتسأل بعض الناس فيه عن القرية الذكية قالهم دى قرية سياحية فى شرم الشيخ وانا روحتها ونزلت الميه والميه كانت جميلة جدا
شعب فيه العبر

مصر يعنى حكومة ؟؟
مش هتكلم

يعنى أهلى وناسى واصحابى وحبايبى ؟

اتمنى لو فى يوم اخدهم كلهم وامشى منها ونشوف لنا مكان تانى بيعرف يعنى ايه أدمية بيعرف يقدر كلمة انسان

يعنى ماضى وحاضر ومستقبل ؟

ماضى مش عايز افتكر منه حاجه وحاضر منيل بستين نيلة ومستقبل مش باينله ملامح

مصر هى أمى ؟؟
أمى فى البيت ومعرفش ليا أم تانيه غيرها

معلش انا جوايا كلام كتيييييييييير بس مش مجمع أفكار ومش عايز اطول عليكم

انا مش انهزامى ولا استسلامى ولا محبط
انا شاب مصرى
للاسف مصرى
.
.
هههههههههههههههههه
يمكن بجد عندك حق يا محمد ف حاجات كتير :D
احنا شعب سلبي ومتواكل و وعنده كميه ضخمه من اللامبالاه والتواكل
بس مظنش ان فيه شعب ف العالم معندوش عيوب
صحيح احنا عيوبنا مبالغ فيها حبتين
بس عادي يعني
ممكن تتصلح
مش ف سنة او ف اتنين او حتي عشره
لان الموضوع مش تغيير كرسي ولا رجل كنبة :D
الموضوع اخلاقيات وسلوكيات جيل بالكامل
عايزه تتعدل ابتداء منمرحله الطفوله
مناهج تعليمية عايزه تتطور صح
دوله زي البرازيل كمثال
ابتدت مرحله التنمية معانا ف نفس الوقت
حاليا شوف الديون اللي ع مصر كمان والديون اللي للبرازيل كام
او دوله زي اليابان
بصراحه تعتبر احسن نموذج ف التنمية البشرية حصل ف تاريخ العالم
يالا مش مشكله
زي ما قال بلزاك ...الوطنية هي ايمانك بأن بلدك اسمي من باقي البلدان فقط لانك ولدت فيه

the black rose

25-08-2008, 12:14 PM

انت صح
و انا راى كدة برضوا

العيب مش فيكى يا مصر
العيب فى اللى بيحكموكى
ربنا يهديهم

أحمد بلما

25-08-2008, 01:32 PM

احنا لما بنبقي متحاملين علي مصر فحنا اكيد ما نقصدش الأرض أو الماء أو الصحراء المصرية ( دي تضاريس موجودة بكل أصقاع الدنيا) و انما بنغضب من النظام اللي بيحكم مصر (حيث الظلم والقهر و التجويع و التخلف الذريع بصرف النظر عن أي شئ ممكن نسميه تقدم في مصر لأن الحقيقة هي أننا بنرجع لورا و متوهمين بالحضارة و المدنية الحديثة) و كذلك من عناصر كتيييييييييييرة من شعب مصر ( اللي بيقبل هذا القهر و هذا الظلم و هذا التخلف اللي بيعانيه علي مدار 56 سنة من أيام عبد الناصر و حتي هذه الساعة) ؛ فإحنا لما نقول اننا بنكره مصر (مثلا) يبقي بنكره نظام حكمها أو شعبها و ليس معني ذلك اطلاقا كراهية أرضها أو نيلها ومن هنا فكراهية الوطن شئ عادي ماهوش ذنب

أحمد2025

25-08-2008, 03:37 PM

احنا بنحب مصر ياجماعة
بس مش بنحب العالم اللى مسكنها
ومسيطرين عليها
ديكتاتورية هتلر
فده بيخلينا نفتكر اننا مش بنحب مصر

msamido

25-08-2008, 04:15 PM

هههههههههههههههههه
يمكن بجد عندك حق يا محمد ف حاجات كتير :D
احنا شعب سلبي ومتواكل و وعنده كميه ضخمه من اللامبالاه والتواكل
بس مظنش ان فيه شعب ف العالم معندوش عيوب
صحيح احنا عيوبنا مبالغ فيها حبتين
بس عادي يعني
ممكن تتصلح
مش ف سنة او ف اتنين او حتي عشره
لان الموضوع مش تغيير كرسي ولا رجل كنبة :D
الموضوع اخلاقيات وسلوكيات جيل بالكامل
عايزه تتعدل ابتداء منمرحله الطفوله
مناهج تعليمية عايزه تتطور صح
دوله زي البرازيل كمثال
ابتدت مرحله التنمية معانا ف نفس الوقت
حاليا شوف الديون اللي ع مصر كمان والديون اللي للبرازيل كام
او دوله زي اليابان
بصراحه تعتبر احسن نموذج ف التنمية البشرية حصل ف تاريخ العالم
يالا مش مشكله
زي ما قال بلزاك ...الوطنية هي ايمانك بأن بلدك اسمي من باقي البلدان فقط لانك ولدت فيه

تعرف انى قعدت سنة كاملة أفكر فى إزاى ممكن يكون التغيير ده
ازاى نشوف حل للشعب
ازاى نغير الدنيا بتاعتنا دى ونطلع جيل مختلف بفكر مختلف وعقليات مختلفة وسلوكيات مختلفة
سنة كاملة هى طول فترة الجيش بتاعى بفكر فى الموضوع ده والنهاية عارف وصلت لإيه ؟؟
هى دى مصر يا عبلة
عارف نظرية البيضة ولا الفرخة ؟؟
بالظبط هى دى مشكلتنا لان علشان نعمل تغيير لازم نجيب ناس عندها ثقافة التغيير وعلشان تجيب ناس عندها ثقافة التغيير لازم تغير وتجيب ناس من صغرهم تديهم الثقافة دى وعلشان تجيب ناس من صغرهم تديهم الثقافة دى لازم يكون عندك ثقافة التغيير وعلشان يكون عندك ثقافة التغيير لازم نجيب ناس عندها ثقافة التغيير وعلشان نجيب ناس عندها ثقافة التغيير لازم نربى جيل من صغرة على الثقافة دى وعلشان نربى جيل من صغرة على الثقافة دى لازم يكون احنا عندنا ثقافة التغيير وبما اننا مش عندنا وفاقد الشئ لا يعطيه فاحنا عايزين ناس عندها ثقافة التغيير وعلشان نجيب ناس عندها ثقافة التغيير لازم نربى جيل من صغرة على الثقافة دى وعلشان نربى جيل من صغرة على الثقافة دى لازم نجيب ناس عندها ثقافة التغيير وهكذا وهكذا وهكذا .. ... إلخ إلخ إلخ

فهمت المشكلة فين ؟؟؟
لو مفهمتش من كلامى يبقى عندك حق انا نفسى مش فاهم
.
.
.

بنت ازهريه

25-08-2008, 04:41 PM

موضوع حساس اووووووووووووى وجاى فى المنطقه اللى بتوجع
تقدروا تقولولى ازاى واحد عنده سبع اولاد يعيش بخمسه واربعين جنيه طول الشهر
ربنا يتولانا ويتولى جميع المصريين اللى الحكومه دى ماصه دمهم
يلا كال واحد منه لله
سلام عليكم

سما نت

25-08-2008, 05:16 PM

على فكره مصر طول عمرها ام الدنيا وفيها حاجات كتير والى ميعرفش قيمتها يبقى متغربش الى اتغرب بره بلده هوه الى عارف قيمه مصر ومصر فيه خير مش فى اى حته تانيه بس احنا يجماعه الى مش عرفين نحافظ عليها احنا الى خلينا مصر فى كده وبجد لو مرجعناش مصر زى الاول يبقى زمن الصرين انتهى للابد انا اسف لو كلامى مضياقكم بس دى راى انا وده الى انا بشوفه بعينى

dr YARA_RG

25-08-2008, 05:40 PM

انا مع حضرتك في اللي بتقوله
احنا دايما ظالمين مصر
يلا ع العموم جزاك الله خير

!!!دمعة حزن!!!

25-08-2008, 05:53 PM

مصر حلوه عشان هي مصر ..

حكمها فرعون وكانت مصر ..

حكمها عمرو بن العاص وكانت برضو مصر ..

فهمت لاول مره في حياتي معنى ان مصر دي قلب كبير بيضمنا ..

مهما لفينا في الدنيا .. مالناش غير بلدنا تلمنا ..

مهما كانت قاسيه ..

ومعفنه ..

بحبك يابلدى

world angel

25-08-2008, 06:27 PM

والله مصر بصراحة بلد حلوة وجميلة جدا
بس بصراحة حياتكم صعبة شوية وهيا بلدجميلة والناس اللى فيها اجمل

الشويحى2

25-08-2008, 06:31 PM

ما رأى الجميع لو مسك الحكم والحكومة الأخوان المسلمون
بعيداً عن التعصب او السياسة البحتة
أو أى شىء آخر
هل هتبقى الدنيا حلوة فى مصر

الشويحى2

25-08-2008, 06:34 PM

أن معك فى أن مصر طول عمرها ام الدنيا وفيها حاجات كتير خير مش فى اى حته تانيه بس احنا يجماعه الى مش عرفين نحافظ عليها احنا الى خلينا مصر فى كده وبجد لو مرجعناش مصر زى الاول يبقى زمن الصرين انتهى للابد انا اسف لو كلامى مضياقكم بس دى راى انا وده الى انا بشوفه بعينى

وفاء البحر

25-08-2008, 08:50 PM

ما رأى الجميع لو مسك الحكم والحكومة الأخوان المسلمون
بعيداً عن التعصب او السياسة البحتة
أو أى شىء آخر
هل هتبقى الدنيا حلوة فى مصر

انا مش مع ان الاخوان يمسكوا الحكم لانهم عايزين يحكموا البلد بطريقه معتقدش انها تنفع دلوقتي

أحمد بلما

25-08-2008, 10:25 PM

انا مش مع ان الاخوان يمسكوا الحكم لانهم عايزين يحكموا البلد بطريقه معتقدش انها تنفع دلوقتي

بجد حرام عليك ..
لما ناس عايزين يحكموا البلد طبقا لكتاب الله وسنة رسوله ده ماينفعش دلوقتي ؟؟؟؟؟؟؟؟
بصراحة ارجع وأقول ان عندك حق ، احنا مالناش غير الانظمة الفاسدة اللي لا تعرف دين ولا عقيدة عشان تحكمنا زي دلوقتي ، وهو ربنا صب غضبه علينا من شوية!!!!!!!!!!

Dr.Cheetah

09-09-2009, 10:30 AM

ولا ام الدنيا ولا حاجة انا بكره البلد دي ونفسي اهج منها اول ماخد الشهادة انشا الله حتي اشتغل دكتور ف اسرائيل

محمد.كوم1992

09-09-2009, 01:32 PM

يا جماعه انا مش عهارف انتوا ايه رايكوا فى الموضوع ده
بس الكلمه بتاعه مصر ام الدنيا دى جايبالنا التهزيق
مره اخويا احمد بيحكيلى لما كان فى ليبيا
كان قاعد مع واحد تونسى وقاله لو مصر ام الدنيا
يبقى تونس ابوها
راح اخويا سكعه بالالم على خلقته
وانتوا طبعا فاهمين
انا فعلا اؤكد الكلام ده
في واحد صاحبي فلسطيني عايش في ليبيا
اول ما اقوله مصر ام الدنيا يقعد يتريق ويقول دي اسطوانات حمضانة انتوا بتقولها والكلام الي احنا عارفينوه ده
بس انا مش عارف ليه هما متغاظين منها كده
يمكن عشان الدولة الوحيدة الي اتذكرت في القرآن 5 مرات صراحة ولا يمكن عشان الرسول كان بيحبها ووصى الصحابة بيها ولا يمكن عشانسيدنا يوسف كان عايش فيها وقال ادخلو مصر إن شاء الله آمنين
ولا يمكن عشان هل الكبيرة في المنطقة ف ع طول تحت طغط وع طول اي حاجة بتحصل الكل بيجري عليها وعاوز مساعدتها ولا يمكن عشان وعشان وعشان................................
يا جماعة مصر ام الدنيا غصب عن اي حد
والبلد دي مفيش احسن منها
وفيها خيرات مش موجودة ف اي حتة ف العالم
طيب ما نسأل نفسنا سؤال كده
ليه الدول التانية مقدرة قيمة البلد دي اكتر مننا
اكيد عشان لها قيمة كبيرة
بس احنا مش عارفين نستغل خيراتها
عارفين دخل مصر القومي كله من قناة السويس والسياحة بس
من في بقى الحاجات التانية الي لو احنا استغلناها هنبقى اغنى دولة ف العالم
و3/4 الدخل ده بيروح ع الجيش والباقي بقى زي ما انتو عارفين تعليم وصحة و............
بذمتكم في دولة احسن من دي
للاسف محدش يقدر يجاوب
فكروا كويس قبل ما تجاوبوا
اسف ع الاطالة

محمد.كوم1992

09-09-2009, 01:40 PM

ولا ام الدنيا ولا حاجة انا بكره البلد دي ونفسي اهج منها اول ماخد الشهادة انشا الله حتي اشتغل دكتور ف اسرائيل
بذمتك في حد يقدر يقول الكلام ده
يا عم روح دور كده ف اي حتة ف العالم حد يقول الي انت بتقوله ده
او يقول الكلام ده ع البلد الي هو اتربى فيها وعاش فيها وشرب من النيل بتاعها
معتقدش حد عاقل ممكن يقول الكلام ده
مع كل الاحترام ليك
بس يا ريت تفكر الاول قبل ما ترد
وبعدين انت قولت كلمة صعبة اوووووووووووووي
زعلتنا كلنا منك
تروح تشتغل في اسرائيل
يا راجل تروح تشتغل في ارض العدو الاول لوطنك و دينك
سواء كنت مسلم او مسيحي
يا ريت تفكر الاول وتراجع نفسك مرة واتنين وتلاتة واكيد هتلاقي نفسك اتسرعت شوية في الكلام ده
ويا ريت تقرأ القرآن كده وتسأل نفسك ليه مصر اتذكرت ف القرآن 5 مرات صراحة وهيا طبعا الدولة الوحيدة الي اتذكرت ف القرآن اسال نفسك السؤال ده وجاوب
وليه الرسول صلى الله عليه وسلم قال_فيما معناه_ ان خير جنود الارض هما المصريين
ما تسأل نفسك كده
انا مستني ردك

Dr.Cheetah

09-09-2009, 02:23 PM

بذمتك في حد يقدر يقول الكلام ده
يا عم روح دور كده ف اي حتة ف العالم حد يقول الي انت بتقوله ده
او يقول الكلام ده ع البلد الي هو اتربى فيها وعاش فيها وشرب من النيل بتاعها
معتقدش حد عاقل ممكن يقول الكلام ده
مع كل الاحترام ليك
بس يا ريت تفكر الاول قبل ما ترد
وبعدين انت قولت كلمة صعبة اوووووووووووووي
زعلتنا كلنا منك
تروح تشتغل في اسرائيل
يا راجل تروح تشتغل في ارض العدو الاول لوطنك و دينك
سواء كنت مسلم او مسيحي
يا ريت تفكر الاول وتراجع نفسك مرة واتنين وتلاتة واكيد هتلاقي نفسك اتسرعت شوية في الكلام ده
ويا ريت تقرأ القرآن كده وتسأل نفسك ليه مصر اتذكرت ف القرآن 5 مرات صراحة وهيا طبعا الدولة الوحيدة الي اتذكرت ف القرآن اسال نفسك السؤال ده وجاوب
وليه الرسول صلى الله عليه وسلم قال_فيما معناه_ ان خير جنود الارض هما المصريين
ما تسأل نفسك كده
انا مستني ردك

انا بكره اسرائيل لأنهم يهود و محتلين ارضنا لكن احترمها ككيان يحترم العلماء و يهتم بالعلم وبعدين مش قصدي المعني الحرفي للجملة انا قصدي اشتغل ف ابعد حتة .... بعدين انا كرهت البلد الزفت ثانوية عامة والظلم اللي انا شوفتو ف التصحيح وان انا امنيتي اما اخد الشهادة هسافر امريكا او استراليا واخد الجنسية و ارتاح من البلد دي اليي انا بكرهههههههههههههها ... ومش هحبها ابدا

محمد.كوم1992

09-09-2009, 02:28 PM

Dr.Cheetah

09-09-2009, 02:35 PM

صدقني امريكا مش هتكون مستنياك وهتكون ف انتظارك هناك
مفيش احسن من البلد دي
والاحسن تشوف نستقبلك هنا معجبكش الشغل هنا وحسيت انك اتظلمت ساعتها ابقى هاجر او سافر زي ما انت عاز
لكن متخسرش بلدك الاول
دي مجرد نصيحة من اخ ليك
ممكن تقبلها وممكن لأ
بس يا ريت تفكر الاول قبل ما تاخد القرار
واتمنى ليك التوفيق

طبعا مقدر كلامك يا حبيبي والله بس انتا مش مصدق كم الخنقة اللي انا كنت فيها اما تأقي ان ليك 10 درجات وماتخدهومش ......... وبعدين انا عارف امريكا الشغل فيها ضعف هنا ف التعب لكن بلد محترمة تقدر العلم والعلماء انا واحدة قريبتي عايشة هناك هخليها تشوفلي شغل اما اخد شهادة لسا 6 سنين ممكن حاجات كتير تتغير لكن اللي مش هيتغير اني لا يمكن هحبها بعد اللي عملتو فيا :abdoog8:
وطبعا انا عارف ان اللي مالوش خير ف بلدو مالوش خير ف اي حتة بس ............

محمد.كوم1992

09-09-2009, 02:39 PM

بص انا دلوقتي خلاص عرفت السبب
بس اقسملك بالله انك مش لوحدك الي اتظلمت وده وارد جداااا
وعسى ان تكرهوا شيئا وهو خيرا لكم
والله انا ليا ناس اصحابي مظلومين بــ 10درجات واكتر كمان ومفيش في بوقهم غير كلمة واحدة بس

الحمد لله
البلد ملهاش ذنب ف حاجة زي دي
بس إن شاء الله ربنا يوفقك للي يحبه ويرضاه ليك
ولو ليك مستقبل في بلدك هتقعد هنا وربنا يوفقك
ولو ليك مستقبل افضل في اي بلد تاني برضو ربنا هيوفقك هناك
ربنا معانا كلنا

Dr.Cheetah

09-09-2009, 02:51 PM

thequeenlove

09-09-2009, 04:19 PM

بجد بجد
التوبيك جميل جداا
وبجد خلانى افكر تانى
( اصل انا كمان كنت متعقدة من مصر شوية )
بجد مصر بلد جميلة جدا بس عايزة اعادة حسابات
لكل حاجة فيها
ويوم ما هيحصل كدة بجد حالها هيتصلح اوى
وابقى اقعد مع تامر دة وفهمه
وربنا يعينك وتجيب التلاجة :d

I promise you

09-09-2009, 04:50 PM

مين مش بحب مصر
بس بدل فيها الكلب وشوية الكلاب اللى حوالية
يبقى لازم أكرهها غصب عنى
لا مستقبل ولا أمل ولا أى حاجة فى البلد دى
على رأى عبد الرحمن يوسف
فى الغرب يسعون لرفع مستوى الفرد
وهنا يسعون لرفع مستوى فرد !!
أنا عمرى ما حبيت مصر
ولا حبيت العرب المرة
لا شعب ولا دولة ولا حكومة
فيها إية يتحب حد يقلى
مصر فيها إية يتحب ؟؟؟!!!

Hamset_Etab

09-09-2009, 07:46 PM

ولا ام الدنيا ولا حاجة انا بكره البلد دي ونفسي اهج منها اول ماخد الشهادة انشا الله حتي اشتغل دكتور ف اسرائيل
لا بقى مصر ام الدنيا بشهاده الجميع
مصر دى مش مجرد بلد عايش فيها
مصر دى عباره عن ناس طيبه ، اهل وقرايب وجيران عشت معاهم عمرك كله
ما اظنش انك هتلاقى فى امريكا اللى لقيته فى مصر
بس ممكن تلاقى فى امريكا اللى افتقدته مصر من ناحيه العلم زى ما بتقول .... بس عمرك ما هتلاقى الفرحه فى عيون الناس يوم ما تفرح لعمل انجزته، ولا هتلاقى ناس زعلانه لزعلك وومكن تزعل عليك اكتر من نفسك
ان كنت اتظلمت فربنا مش بيسيب مظلوم
ويااااااامه غيرك اتظلموا بس معملوش زيك كده عشان ده مقدر ومكتوب

جعلتني مهندسا

09-09-2009, 08:23 PM

شمس الدقهلية

09-09-2009, 11:00 PM

مصــــــــــــــر أحلى بلد ف الدنيا

هى فعلا أم وأعظم أم بس للأسف عندها ولاد كتييييييييييييييييييييييييييير للأسف عاقين وجاحدين

بينكروا فضلها ومش حاسين بيها ولا عاوزين يدوها حتى لما تتعب ماحدش يدعيلها ولا يرعاها

دول بيتمنوا يفارقوها ويروحوا بلاد الحرية مع إنهم ياعينى غلابه فاكرين الحياه ورديه والبساط أحمدى

وبيعموا عينهم عن الحقيقة

أنا آسفـــــــــــــــــه ياأمى ويارب يقدرنى أرد لك وأديكى لأنى لازم أديكى يامصر وياريت أوفى ولو بجزء من الدين

yomna1993

09-09-2009, 11:45 PM

بحب مصر طبعا
انت قولتها (انا بحب امي عشان هي امي مش عشان هي اجمل ام في العالم) صح جدا طبعا
حتى لو كانت امي دي فيها صفات وحشة و قاسية و دميمة هحبها
مع ان مصر بقى مش وحشة خالص ....عشان اصلا الي فيها هم الي مخلينها قاسية
احنا الي مخلينها دميمة
احنا الي مخلينها وحشة
عشان بقى كل واحد عايز مصلحته سواء كان الشعب او الرئيس او الحكومة او ..او...
و مبقاش حد يتقي ربنا في عمله ونسينا الضمير الا من رحم ربي
يمكن معظمنا بيقول بنشتغل بس مبنلاقيش مقابل
لا لو كل واحد جه ع نفسه شوية وخلى عنده ضمير و اتقى ربنا شوية
و لو حبينا مصر بجد قبل ما نحب نفسنا هنقدر عليها و هنخليها اجمل بلد في الدنيا
انا دايما حاطة الاجزامبل ده في دماغي الصين كانت افقر بلد في العالم في الموارد الطبيعية و البشرية لغاية فترة قريبة جدا ..دلوقتي شيفين هيعاملة ازاي؟!
السر في كده هو حب البلد بجد حتى لو مكانش في مقابل في الاول بس هنلاقي بعد كده
زي الارض البور هنفضل نصلح فيها و نزرعها و نصبر لما نحصد مشنرمي طوبتها و نحرقها و نلعنها
ربنا يبارك في حضرتك بجد موضوع جميل جدا و احساس رائع
معلش طولت بس عشان الموضوع بجد يستاهل

Dr. R KH

10-09-2009, 12:47 AM

فعلا البلد دي كلها خير و طيبة و اللي ماتغربش مش هيحس بالكلام ده أوي
بجد شعب مصر من أحسن الشعوب هو أكيد فيه عيوب بس عيوبه أرحم من عيوب شعوب كتييييييييير
أنا كل سنة بسافر حوالي شهرين و أنا رايحة بكون مش طايقة البلد باللي فيها بس بعد يومين مصر بتوحشني أوي كل حاجة فيها بتوحشني أرضها شعبها جوها خناقات المواصلات كل حاجة
يعني م الاخر كده بروح اخدلي جرعة حب و أرجع:dوأنا دلوقتي باخد الجرعة دي ادعولي أرجع بأه

محمد.كوم1992

10-09-2009, 02:30 AM

sympathique

10-09-2009, 03:59 AM

انا بحب مصر

بس مش هعلق على حاجة

لاننا كلنا عارفين اللى فيها

Dr.Cheetah

10-09-2009, 07:51 AM

انا عاوز اوجه سؤال لكل الي دخل الوضوع
لو في حرب دلوقتي هتقوم بين مصر واسرائيل
يا ترى احنا هنعمل ايه
يا ترى هنسيب البلد ونهج
ولا روح الوطنية هتصحى ونرجع لأيام عبد الناصر وسعد زغلول
والي انا واثق منه ان روح الوطنية هتشتعل والكل ساعتها هيعرف قيمة الوطن
شكراااااااااا جزيلا لكل الي قال بحب مصر
وياريت الي قال انه بيكرهها يراجع نفسه ويفكر
اللهم انصرنا ع القوم الكافرين

لأ طبعا هدافع عنها عشان ربنا والرسول امرونا بكدا وكمان عشان هي مهما حصل بلدي اللي عشت فيها واصحابي واهلي فيها .... بس ؛؛؛؛؛ هوا بس لو واحد كلنا عارفينو حل عن سمانا كل حاجة هتبقي حلوة

محمد.كوم1992

10-09-2009, 04:23 PM

لأ طبعا هدافع عنها عشان ربنا والرسول امرونا بكدا وكمان عشان هي مهما حصل بلدي اللي عشت فيها واصحابي واهلي فيها .... بس ؛؛؛؛؛ هوا بس لو واحد كلنا عارفينو حل عن سمانا كل حاجة هتبقي حلوة
:022yb4::022yb4::022yb4::022yb4::022yb4::022yb4::0 22yb4:
هو ده الكلام المظبوط
الله ينور عليك:friendsxs3:
احم احم
ربنا يستر:o

riham_eg

11-09-2009, 12:34 AM

حكمها فرعون وكانت مصر ..

حكمها عمرو بن العاص وكانت برضو مصر
بص الموضوع جميل جدا
وهما دول اكتر كلام عجبنى وحسسنى بالامل
طول عمرى بفكر اول ما اتخرج ولو جتلى فرصه انى اسافر بره هسافر من غير تفكير بس لما تفكر هتلاقى الكلام ده مش جاى من فراغ
لما تلاقى نفسك بتتعامل كمواطن درجه تانيه او تالته وانت فى بلدك واجانب وعرب بيتعملوا احسن منك كتييييييييييييييييييييييييييييييير ويجدوا حقهم تالت ومتلت وهما اصلا ملهمش حق يعنى مثلا لو شفت مشاجره بين واحد مصرى وواحد غير مصرى ووصل الموضوع للشرطه شوف مين هيتشال على كفوف الراحه ومين هيطل عينه ويدخل الحبس ويعض فيه ويتعذب عشان ارهابى وبيعمل عمليات ارهابيه فى بلدهحتى لو كان هو هو المصرى غلطهم واحد ومش هقول ان المصرى مش غلطان
واكيد كلكم فاكرين موضوع المطار
والله انا بفكر فى حاجات كتييييييييييييييييييييير اوى حلوه لمصر
بس لما بخرج وبروح مصلحه حكوميه اول حاجه بفكر فيها هى السفر بره مصراخر حاجه كنت رايحه اختم ورقه من مصلحه حكوميه عشان اوديها لمحافظه تانيه لمدينة الطلبه وكان الموضوع ده يوم التلات
قالولى الموظفين هنا مش بيجوا غير يوم الاحد ولازم بعد كده تخدى ختم النسر من مكان تانى
يعنى يكون التقديم قفل والحمدلله وخد من دا كتيييييييييييييييييييييييييييييييير

سيف عبد العظيم

15-09-2009, 12:35 AM

انتى السبب عاوز اعرف الثلاجه دى موجوده هنا فى مصر

وثانيا \

موضوعك غايه فى الروعه ؟؟؟؟؟؟؟؟؟؟؟؟؟؟؟؟؟؟؟؟؟

تقبلى مرورى

محمد.كوم1992

23-09-2009, 04:47 PM

تنشيط
الموضوع ده جميل بجد

عاشقة النبى 22

24-09-2009, 02:05 AM

بجد ان مش عندى كلام اقولة ولا شهادة لمصر اشهدلها بها بعد ذكرها فى القرآن الكريم 5 مرات ايوة 5 مرات ومش عندى حاجة تعبر عن مكانتها اكتر من كلام حبيبنا رسول الله(صلى الله عليه وسلم) عليها
دى شعب مصر نسب وصهر لرسول الله (صلى الله عليه وسلم)
دى السيدة هاجر ام العرب مصرية
دى مصر بلد الامان بشهادة القرآن (ادخلوا مصر ان شاء الله آمنين)
دى رسول الله(صلى الله عليه وسلم) اوصى اصحابه انهم يصتوصوا باهل مصر خيراً واحنا اصلاً مش مصتوصين بنفسنا خير
احنا اللى جرأنا الناس علينا يشتمونا ويبهدلونا لان احنا اصلاًمبهدلين نفسنا ومبهدلين بلدنا معانا
يا جماعة ليه بنقول هنج ونسيبها؛ هنسيبها لمين؟! للى نفسهم فيها و مش طايلينها ؟!هنسلملهم بايدينا دا بدل منعليها ونبنيها ونعمرها !!!!
عايزين نهج ونسيبها ؟؟؟؟؟؟؟
ياجماعة مصر ماتستهالش مننا من ولادها الظلم دة:bosyht9:
ياجماعة لو مش احنا ولادها حافظنا عليها من غيرنا هيحميها ويحافظ عليها:(
يا جماعة فوقوا قبل متفوقنا الحروب
ياجماة دى حب الوطن سنة عن رسولنا( صلى الله عليه وسلم)
يامسلمين دى اهل مكة اخرجوا الرسول(صلى الله عليه وسلم) من ارضه وبيته ووطنه ورغم كدة قال(صلى الله عليه وسلم) عند خروجه منها :والله انك لأحب بلاد الله الى قلبى ولولا ان قومك اخرجونى منك ما خرجت)
واحنا محدش اخرجنا واحنا اللى عايزين نخرج منها:blush:
واكيد انتوا سمعتوا الكلمات دى قبل كدة (دور جواك تلقاها هى الصحبة وهى الاهل ،عشرة بلدى بتبقى نسينها على البال مش سهل ،يمكن ناسى لانك فيها مش وحشاك ولاغبت عليها، لكن لكن لما تتغرب وتسيبها تقول فى الدنيا مفيش بعديها ،وانت غبت بحنيلها وانسى الدنيا واجيلها ،وان جيت انسى تفكرنى بمليون ذكرى قلبى شايلها غالية بلدنا علينا وهتفضل فى عنينا ):078111rg3:

محمد.كوم1992

24-09-2009, 02:36 AM

ا/توفيق عزت

21-12-2009, 10:27 PM

اسأل مجرب

أنا مصري مولود في مصر تحديدا في شارع الحمام

وعشت 10 سنين بره مصر

يعني السعودية واليمن والامارات

يعني أكتر من نص عمري قضيته براها

وربنا ما يوري حد منكم معنى الغربة

بجد مصر دي أمي

وأنا لاأقبل من أي حد مهما كان أن يتكلم عن أمي بالطريقة دي

أستغفر الله العظيم

ربنا يهديكم
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــ
حضرتك بتقول انك اعدادى هندسة يعنى سنك حوالى من 19 : 25 سنة تقريبا
و عشت 10 سنوات فى السعودية و الامارات و اليمن يعنى مع والدك ووالدتك و اخواتك
اكتر و اجمل فلوس و اكل و مصاريف و اجهزة و كل حاجة جميلة
و بتستغرب ليه اللى عايشين جوة مصر كارهينها و عاوزين يهجوا منها
انا عشت فى سلطنة عمان من 30/6/2000 الى 30/6/2002 - اجمل سنتين فى حياتى
انا سنى 50 سنة
و الحمد لله ال 48 سنة اللى عشتهم فى مصر لم ارى فيهم الا كل شر من البشر
مصر فيها خير يكفى 90 مليون و ليس 80 فقط
الخيبة خيبة ضمير و احساس و كل المعانى الجميلة
لو حكيت لك قصة حياتى ..... حا تنتحر ....... بلاش
اتفرج على هذا الفيلم القصير
http://www.4shared.com/file/87266340/c671d764/shere_baladna_amanaaa.html

محمد.فوكس

22-12-2009, 05:30 AM

الحكومات الفاسدة هتزول و هتبقى مصر.
على فكرة حب الوطن عبادة.
احنا مش بنشتم البلد .. احنا يمكن بنقول مصر ..بس قصدنا الدولة..يمكن بنتضايق لان اخلاق الناس في الشارع بقت وحشة.
بس اسأل الكابر عن وقت حرب 73 مثلا .. انا سمعت ان الجريمة قلت بشكل كبير جدا..مفيش محاضر شرطة .. الناس عاملت بعض كويس جدا.
المشكلة ان الدولة و المسئولين عايزين يكسبوا حب الناس فيقولو مصر و دي ممكن تخلي الناس تكره مصر مخصوص عشانهم.
لما يلزقو اسم مصر بالريس..مفي ناس مش عايزة الريس ده..و لما يلزقو اسم مصر بابن الريس ابن الريس اكيد في ناس بتكره و مش عايزاه...هم كده بيظلموا مصر.
يمكن في ظروف وحشة بتعدي علينا .. بس زي ما قلت كل ده هيزول و مصر هي اللي هتفضل.
يعني انا لما بلاقي حد مش مصري بيشتم الريس برد عليه و بوقفه عند حده .. لاني عارف انه قصده يهين مصر مش الريس بشخصه.
و مدام بتغير على بلدك يبقى اكيد بتحبها و اعتقد اي حاجة وشحة تتقال على مصر بتستفزنا كلنا.

سمر2000

24-12-2009, 01:05 AM

الاستاذ اللى نفسه يروح اسرائيل انا باصلى الفجر وهادعيلك يحققلك اللى تتمناه وعمرك ما تعتبها تانى ورينى هتعمل ايه يا شاطر

miss heba

27-12-2009, 09:04 PM

يا جماعة مصر أم الدنيا ولا مرات أبوها المهم هى بلدنا ولازم نحبها زى ما هيا وإن كان على اللى فيها فهما منا ولازم نفتكر قول الله عز وجل " إن الله لا يغير ما بقوم حتى يغيروا ما بأنفسهم" وأنا من الآخر بحب بلدى لأن الفكرة مش هى مقدملنا إيه ولكن هى وطنى مش هنلاقى أبدا بلد تانية أحلى منها حتى لو فيها كل حاجة غلط فما تفكروش البلاد التانية جلوة ومية مية لكن أكيد فيها الحلو والوحش ومتزعلش يا dr فالحاجة اللى ما تقدرش تموتك تبقى تقويك وصدقنى مفيش أحلى منها

Observer

27-12-2009, 09:23 PM

لما هى مصر امى وبتعمل فيا كدة
أمال لو كانت مرات ابويا كانت عملت فيا ايييييييييه :mad:

eng mostafa mahmoud

27-12-2009, 09:49 PM

مشكورررررررررررررررررررررر

أ/رضا عطيه

20-02-2010, 01:43 AM

دلو كان حبى للبلد دى عيب يبقى أنامن ســاسى لراسى عيوب
ولاعمرى ظلمت خلق الله =ولا ببكى أبدا على اللـبن المسكوب
وبالطيابه اللى بتحسبوهــا خيابه = بقيت للناس ودود ومحبوب
ولاعمرى فى مره عملت ديب ليقينى إن ربنا------- -رب قلوب
واللى يكره حضن أمه - يبقى ياويله من غضبها ومن المكتــوب
ما هيعرف أبدا طريق ربنا وما هيرضى عنه المولى مهما يتوب
إرجع لرشدك وصون ياعم وطنك ومفيش عاقل يتباهى بالذنوب
حب بلدك ياعمنا لذاتها وخليك دايما- عنتر وبلاش تبقى شيبوب
كل اللى تملكه بس تعيط وتلم الناس حواليك وفاكر نفسك موهوب
كل مصرى وأنا أولهم بقضيهاكلام -والأفعال سوده بلون الخروب
وأم الدنيا مابخلت عنا - يوم بخيرها من أكل طيب وأحلى مشروب
اللى لوث النيل مين ---غيرأنا وأنت وكل المصلحين اللى فى النقد شغالين
واللى سرق الأراضى مين غير مصريين مفسديين وربناالمنتقم قولوا أمين
وعشان نحررها من العدا دفعنا من الشهدا--- ملايين -من أولادها الطيبين
إيه ذنب البلد تتبرأ منها وكل حصاها ورمالها علينا غضــبانين ومتحمليين
نعيب الزمان والعيب فينا ونسىء للبراءة وفى خيرهامنعمين وكمان ناقمين
الله يكون فى عونك ياغاليه وأم الدنيا ع اللى جرى واللى هيجرىليوم الدين
ومشكور على عرض الموضوع يادكتور

a7med_sale7

20-02-2010, 04:08 AM

دايما فى الحلو وفى غير الحلو

أ/رضا عطيه

06-03-2010, 03:31 AM

وجهت سؤالى للعقلاء فلم أجد هم ؟
لعل المانع خير ---
ياعالم أنا قلبى مفتوح لكل الناس اللى عايشه فيه
وكمان صدرى مفتوح لو حتى تفكر تطلق النار عليه
وانت ياأبو صوت مبحوح فاضل لك إيه راح تبكى عليه
اتكلم ويلا اتعلم تقول وتنقد وتسأل إزاى وإمتى وليه
دا انت المستقبل والأمل لوطن عظمته فى كل مافيه
واللى رافض يعلق على كلامى فتعظيم سلام وتحيه ليه
الوطن بينا يصبح واحه ومن غيرنا ساحه تلعب الديابه فيه
والضوء الأخضر صبح واضح للحرية - وياريت نتمسك بيه
ونبطل نواح فى المسا والصباح ونشيل همنا ونتغطى بيه
راح اللى راح والفجر لاح بينادينا وزمن الصمت قضينا عليه
والفضل يرجع لصاحب الفضل وكل من له دور يشكر عليه

وشكرا للجميع