يا عم سيبك
------------ شعر \ سمير الأمير
--------------------------------

كل الأغانى ضيعت صوتك
وما عادش حل
غير إنك تبوس موتك

لو كان غُنا بيستر
كان ستر عرضك
عريان فى أرضك
وكل المفضوحين بيدنسوا ملكوتك
يا عم مين يشترى دم الشهيد بالحق ؟
مين غاوى يركب سنين الذُل ويخاوى
شياطين بلاد الكُره على قوتك
ويشق قلبك شق؟

اطلع مظاهره الصبح إيه يعنى؟
مدام حترجع تبات مهزوم
أياً ما كان الكلام
عمرك ما تسمع غير صدى صوتك
يا عم مين له فى الزمان ده لزوم ؟
مين اللى سامع أنات عذاب
المضروبين بالرصاص والمضروبين بالشوم
والمضروبين بفتاوى مضروبه
وشيوخ عرايس مصنوعين ألغاز
على عين يهود العرب وبياعين الجاز
لاعنين أبو النهر لو كدب الصحرا
أو حرض الأنبياء يقروا آيات الطمى والثورة
أو مجد العورة\ أداة الشهوة والإنبات
يا عم سيبك
ما أنبله الإنحطاط !
ما أشجعه التسليم !
ما أوضحه هذا الغموض اللئيم!