ارجو المساعدة [الأرشيف] - بوابة الثانوية العامة المصرية

Mohamed_Hamza

28-04-2016, 09:23 PM

انا مش من الاساتذة الكرام بس..
الفالق دا اسهل حاجة في الجيولوجيا
بصي في اسئلة الفالق دي بيكون فيه حائط علوي وحائط سفلي، ولو العلوي نازل لتحت يبقى فالق عادي، ولو طالع لفوق يبقى فالق معكوس.

وعشان تعرفي نوع الفالق العادي من المعكوس لازم حاجتين:

1-تحددي الحائط العلوي من السفلي:
بتشوفي مين اللي مايل على التاني، كأنه ساند عليه مثلا او مش عارف اقولهالك ازاي، استني

2-تحددي العلوي دا طالع ولا نازل، يعني مستواه مرتفع عن الحائط السفلي ولا منخفض
لو منخفض او نازل عن الحائط السفلي يبقى عادي
لو مرتفع او طالع فوق الحائط السفلي يبقى معكوس

بصي كدا

https://farm2.staticflickr.com/1632/26632797291_dc9d2a265f_b.jpg

في الرسمة اللي فوق الكتلة اللي ع اليمين (الحائط) مميل او ساند على الحائط الشمال، يبقى الي ع اليمين دا الحائط العلوي واللي ع الشمال دا السفلي.. كدا حددنا اول حاجة.
وهنلاقي ان العلوي دا نازل لتحت بالنسبة للتاني، كدا حددنا الحاجتين، الحائط العلوي نازل.. يبقى دا فالق عادي.

في الرسمة اللي تحت الكتلة اللي ع اليمين (الحائط) مميل او ساند على الحائط الشمال، يبقى الي ع اليمين دا الحائط العلوي بردو واللي ع الشمال دا السفلي.. كدا حددنا اول حاجة.
وهنلاقي ان العلوي دا طالع لفوق بالنسبة للتاني، كدا حددنا الحاجتين، الحائط العلوي طالع. يبقى دا فالق معكوس.

ماتخلطيش بين كلمة( علوي او سفلي) وكلمة (نازل او طالع)
العلوي دا مش مقصود بيه الارتفاع دا مقصود بيه اللي مايل ع التاني اكتر

ممكن تحفظيها كدا : علوي نازل عادي طالع معكوس
اوممكن تاخدي اول حرفين من "طالع" و"معكوس" وتربطي بينهم بكلمة مثلا زي "طامع"، ودي هتجيب التانية.
او بأي طريقة تخترعيها.

مش عارف تقصدي ايه انهي قطاعات بالظبط، صوري الرسمة الي واقفة قدامك وربنا يقدرنا ونحاول نساعدك بإذن الله.