لو سمحتوا انا عايزه أسأل انا مدرسه هل ينفع اكتب عذر عن تكملة اليوم الدراسى وامضى فى دفتر الحضور الساعه 8 واكتب فى العذر انه تم الانصراف الساعه 8ودقيقه ولو حصل المفروض يكتب ايه فى الملاحظات فى دفتر الحضور والانصراف لأن اليوم ده حصل فيه مشكله واحتمال أتحول للتحقيق وهل ده مسؤليتى ولا مسؤلية الاداريه بس لأن عهدتها هى

لا يجوز كتابة اي كلام من هذا في دفتر الحضور والانصراف والمصرح بكتابته فقط كلمات اعتيادي او مرضي او اسم المدرسة في حالة الندب لبعض الايام او منتدب لاعمال الامتحانات او تدريب لكن هناك دفتر 68 يقيد فيه الاجازات والتأخير والاذن

كلام ا.توفيق مظبوط ..بالاضافة لان الاذن بيكون ساعتين ف اليوم مش م اول دقيقة بعد الامضا وبيتحسب ع انه نص يوم عارضة يعنى يومين اذن يعملو يوم عارضة

طيب لو سمحتوا فى دفتر الحضور لو اكتب انى أخذت عذر فى خانة الملاحظات الملاحظات دى تبقى مسؤليتى ولا مسؤلية الاداريه لأن الدفتر عهدتها هى

لو كتبتى بخطك هتبقى مسئولية مشتركة ع المدير والادارى وحضرتك والجزاء الاكبر فيها هيكون لحضرتك لانهم ف التحقيق ممكن يخلو مسئوليتهم ويقولو اى كلام ينقذهم

اولا اللي حضرتك عايزة تعمليه ده تهرب من المسئولية و عيب عليك كده فى الشهر الكريم انك تهربي من المسئولية
ثانيا الدفتر مسئولية الادارية و لكن لو كتبتي اي حاجة غير التوقيع ممكن تعملك محضر و تتحولي شئون قانونية و تتعاقبي عليها
ثالثا يا ريت تحكي المشكلة و احنا بعون الله هنفكر معاكي ايه اللي ممكن تقوليه فى التحقيق و تخرجي منها باقل ما يمكن من اضرار
و على فكرة اخوكي اتحول شئون قانونية و نيابة ادارية و اتطلب للشهادة كتير و الحمد لله خرجت باقل الاضرار
انما عمر الهروب ما كان الحل
رابعا لو المشكلة ما ينفعش تتحكي على الملأ ابعتيهالي على الخاص و انا تحت امرك

طيب أولا اشكركم على اهتمامكم بمشكلتى المشكله كبيرة من الاول احنا 4 مدرسين واداريه وعامل فى مدرسة اسمها ألفصل الواحدوانا أصغر مدرسه وهما الأربعه ب يحضروا بعض فى دفتر الحضور فى أثناء غيابهم لأن بينهم مصالح مشتركه وانا لو جيت فى يوم وحصل ظرف وغبت يغيبونى لأن الاداريه بطلب منى فلوس تخصمها من المرتب بحجة تصوير ورق وكده انا كنت بدفع على طول وبعدين لما لقيتهم هم بيغيبونى ويحضروا نفسهم رفضت ادفع و***ها مش من حقك بالذات أنها بتخصم بالعشرة وعشرين جنيه وبعدين الاداريه جت وغيبتنى فى اخر يوم اجازه عرضه ليا بالرغم أنهم كانوا غايبين قبلها بيوم وحضرتهم فاتنرفزت عليها وزعقت لها وقلت لها انتى مش من حقك تغيبى ده من حق المديرة وبس و***ها لو مديتى ايدك ع الدفتر تانى وغيبتنى انا هقطعلك ايدك وبعدين جيت بعدها وقلتلها معلش انا كنت زهقانه ولو انتى غلطى فى انا مسامح اكى ولو انا غلط فيكى متزعليش لأن فى ناس قالولى أنها عندها القلب ومعلش راضيها المهم راضيتها أدام الناس فقالتلى لو عايزانى اسامحك انقلى من المدرسه والمديرة قالتلى إنقلى لأن احنا مش عايزين معانا وهما كمان قالولى كده فأنا قلتلها مش ه نقل والكلام ده حصل أدام الناس ف راحت النيابه الاداريه وعملت شكوى وكتبت حاجات انا معملتهاش وقالت انى ضربتها وقلتلها ألفاظ وحشه والا ربع مدرسين راحوا شهدوا وقالوا انى شتمتها بس اعتذرتلها وانا المحققه استجوبتنى وانا قلتلها محصلش وأنكر ت وقدمتلها ورقه انى عملت عذر ومختومه بختم المدرسه لأنهم كانوا بيرموا الختم فى كل حته وانا عملت حساب الغدر وختمت أوراق كتير من المدرسه زمان عشان لو احتجت لها اطلعها وقتها بس طبعا مقلتيش الكلام ده ادام المحققه ولا هما يعرفوا اصلا وقلت للمحققه هما عملوا التمثيليه دى عشان عايزة انقل ويجيبوا مدرسه قريبتهم بدالى وجبت شهود انهم قالولى إنقلى أدام هم عشان مش عايزينك معانا وبعدها المديرة قالتلى انا هقبض القبض بتاعك وأخصم منه الفلوس واديكى الباقى وامضى بدالك ولو مش عاجبك متقبضيش فأنا عندى مشكلتين اول حاجه ازاى أثبت العذر فى دفتر الحضور لانى قدمته فى النيابه الاداريه عشان أثبت انى مكنتش موجوده فى اليوم ده ولا اسكت وخلاص والدفتر مش مسؤليتى تانى مشكله لو المديرة نفذت التهديد وقبضت بدالى ومضت أقبض القبض وهو ناقص ولا اشتكى فين واعمل ايه

اولا ما كنتش احب انك تكتبي على الملأ انك معاكي اوراق على بياض مختومة و لو تقدري تعدلي البوست بسرعة عدليه
ثانيا فيه نقطتين مهمين
1- العذر اللي قدمتيه للنيابة الادارية ده يدينك لان الختم لازم يكون معاه توقيع المديرة و طبعا لما يتعرض عليها هتقول ده مزور و ده مش توقيعي
2- موضوع ان المديرة تقبض بدالك و بدون توقيعك فده مستحيل لانك ممكن تدخليها السجن بسبب كده ، الا المرتب
تتقدمي بعدة شكاوي للنيابة الادارية و للرقابة الادارية و للمحافظ ممكن تعملي تلغراف متظلم بالباب و تدخلي تعرضي عليه شكواك من عدم صرف المرتب و فيه جهات اخرى لو قدمتي شكوى ليها ممكن مش تشيلي مديرة المدرسة بس ده ممكن تشيلي القيادات الاعلى منها بس دي احتفظ بها لنفسي عشان ما اكشفش ورقي كله و على فكرة انا شلت ناس كتير قبل كده

ختاما يا ريت نبعد عن الشر و نغنيله و تشوفي مدرسة احسن لان مدارس الفصل الواحد دي فيها تجاوزات كتيرة

طيب أكلم حضرتك عالخاص ازاى

طيب اعمل ايه بقى انا شكلى عكيت الدنيا