بسم الله الرحمن الرحيم



اولا احب اني اعرفكم بهدف الموضوع
معظم الطلبة وخاصة الجادين منهم بيتمنوا انهم يجيبوا امتياز "ومنهم اللي بيتمنى انه يرتب على دفعته"
عشان كده هاقول بعض النصايح اللي تساعد الواحد على انه يجيب امتياز واتمنى ان الكل يستفيد بيها والكل يجيب امتياز
قولوا آمين
.............................................
قبل اما اقولكم النصايح يا ريت نجدد النية
احنا عايزين نجيب امتياز ليه؟؟؟؟
في 100 سبب كلهم بيصبوا في اتجاه واحد هو طاعة الله
يعني انت ممكن تكون عايز تجيب امتياز عشان تفرح اهلك


او يمكن عايز ترتب على الدفعة عشان تقدر بعد كده تكون معيد في الجامعة ثم دكتور تعلم الطلبة "وده له اجر كبير جدا"
الحديث الشريف بيقول"إذا مات الإنسان انقطع عمله الا من ثلاث علم ينتفع به أو صدقة تجري له أو ولد صالح يدعوا له "
وممكن نكون عايزين حاجة اكبر من كده
اننا نبقى علماء وباحثين نفيد العالم كله باكتشاف علاج لامراض كتيرة نحصد جوائز تكتب باسم عالم او عالمة مسلمين

خلاص جددنا النية
نبدا بالنصيحة الأولى:


"لوعايز تمشي ميل قرر انك تمشي 100 ميل عشان توصل"

لو انك عايز تجيب امتياز وحاولت انك تجيب امتياز
للاسف مش هاتقدر لان العقبات اللي هتقف ادامك ممكن تكون اقوى منك وتعرقلك عن طريقك للامتياز
يبقى تحدد هدفك واللي لازم يكون اقرب ما يكون للكمال وفي حالتنا هدفنا مش اننا نجيب امتياز" لان في 100 طالب بيجيبوا امتياز كل سنة"
هدفنا هو اننا نحقق ترتيب خلال ال5 الاوائل
ولو نقدر ان احنا نقفل مواد نقفلها
الموضوع ده مش مستحيل
ودكتور علياء "بتاعة الاورجانيك"اما كانت طالبة قفلت الاورجانيك بتاعة تانية"و ما ادراكم يعني ايه اورجانيك تانية"
يبقى نتفق مع بعض لو عايزين نجيب امتياز نعمل حسابنا اننا نقفل كل مادة نقدر نقفلها و ما نسيبش درجة تقع من ايدينا

النصيحة التانية:
"حب المذاكرة والمذاكرة هتحبك"
كتير مننا بيشتكي من مشكلة النسيان ومشكلة انه بيزهق من الجلوس على المكتب فترات طويلة ومشكلة انه مش قادر يفهم في المحاضرات ومشاكل كتير اوي ما تتعدش
اقدر اقولكم ان الناس اللي بتجيب الامتياز المشاكل دي ما بقتش تجيلهم وبقوا محصنين منها تفتكروا ليه؟؟

بالظبط لانهم بيحبوا المذاكرة انت لو بتحب المعلومة المعلومة هتحبك وعمرها ما هتسيبك
انما اما تاخد المعلومة وانت باصصلها من فوق لتحت يبقى توقع انها تستنى اول فرصة عشان تطفش منك
هنا نتفق اننا نحب المذاكرة والا ما نطلبش منها حاجة
بس المشكلة ان في ناس ربنا خلقهم ما بيحبوش المذاكرة او مابيقدروش يقعدوا على المكتب كتير و في معظم الاحيان بنكون بنحب مواد ونكره مواد ونلاقي نفسنا جايبين امتيازات كتير ما عدا في المواد اللي ما بنحبهاش يبقى نفقد الامل؟؟؟؟؟
لا وباقولها بعلو صوتي لا
في طرق كتير نخلينا نحب المذاكرة او نحب المواد اللي ما بنحبهاش
اول طريقة"الايحاء":-
كل يوم قبل اما ننام نعد نقول في نفسنا "انا بحب المذاكرة وبحب العقاقير(مثلا)"بتاع 10 مرات وبصدق
الطريقة التانية "اقناع الذات":-
اقنع نفسك انك مالكش في اي حاجة في الدنيا ولا بتفهم في اي شيء الا المذاكرة وانها هي املك الوحيد في الحياة وان الكورة و السياسة والموضة والافلام كلها اعداءك اللي بتبعدك عن حبك الاول و الاخير كلية صيدلة
الطريقة التالتة"حب مدرس المادة":-
لو استخدمت الطريقتين اللي فاتوا في انك تحب دكتور المادة "ده لو انت ما بتحبوش"هيدوك نفس النتيجة
اما لو ان الدكتور بتاع المادة انت فعلا بتحبه غالبا هتلاقي نفسك بتحب المادة دي وبتجيب فيها امتياز
و ذكر مثال على كده الاناليتيكال في الترم الاول في اولى حديث
كانت دكتور سماح بتدي كل المجموعات وفعلا كانت نتيجة الاناليتيكال هي احسن النتايج
مثال تاني السيوتيكال تالتة دكتور سمير المغازي كان له نفس التاثير
وعشان الحب ما يوصلش لمرحلة الفتور حاول انك تستغل وقت فراغك في التعمق في المادة وانك تفكر وتسال نفسك عن كل حاجة جت منين وازاي وايه السبب؟
ده كان الجزء الروحاني في طريقنا
والقاكم مع الجزء التاني

(منقوووووووووووووووووووووووووووووووول

السلام عليكم ورحمة الله وبركاته،،


دلوقتي خلاص احنا حبينا المذاكرة وعايزين فعلا نرتب على الدفعة ومش اي ترتيب ومستعدين نعمل اي حاجة عشان نحقق الهدف ده

نخش على النصيحة التالتة:
"تنظيم الوقت"

كتير مننا بيشتكي انه ما بيقدرش يتابع مع الدكاترة مع انه بيحاول يذاكر اول باول لكنه مش ملاحق وده غالبا بيخلينا قاعدين في المحاضرات ومش فاهمين"ده لان معظم الكلام في المحاضرات بيكون مبني على اللي قبله"
يبقى من الكلام ده نقدر نقول ان من اسباب تحقيق الامتياز انك ما تخشش محاضرة الا اما تكون مذاكر اللي قبلها وعشان نضمن ده لازم ننظم وقتنا بجدول اسبوعي للمذاكرة يتناسب مع جدول المحاضرات والسكاشن
اذا كنت تعرف تعمل جدول يبقى ما فيش مشكلة اما لو كنت ما بتعرفش فدي فكرة عامة عن كيفية عمل جدول
اول حاجة بتحدد من خلال جدول المحاضرات والسكاشن الاوقات اللي ممكن تذاكر فيها "عادة بيكون من ضمنها يوم او يومين فاضيين تماما"
بعد كده بتحدد ايه محتاج يتذاكر وامتى
من النصايح الحلوة في وضع جدول
1 -انك ما تخليش يوم الجمعة راحة وخللي يوم الخميس لو فيه محاضرات او سكاشن راحة
2-اعمل حسابك دايما ان الوقت ممكن مايكفيش بانك تحط وقت احتياطي
3-ما تخليش وقت المذاكرة يظلم وقت النوم لانك هتلاقي نفسك بتنام اكتر من الاول
4-حاول انك تستغل اليوم الفاضي اسوا استغلال وماتخليش دقيقة تروح فيه على الفاضي وفي طريقة تخليك توصل ل10 ساعات مذاكرة صافي او 13 من الناحية النظرية
انك تصحى على الفجر وتصلي وتبدا مذاكرة 5:30 او6:00
تحاول تستجمع عزيمتك وتقاوم وتستمر في المذاكرة متواصل لحد الساعة 10:00"هتقدر لو انت فعلا بتحب المذاكرة"
بعدها تاخد راحة نص ساعة تفطر فيها وتكمل لحد الظهر
بعد ما تصلي الظهر "هاتكون خدتلك بتاع نص ساعة ممكن نعتبرها راحة"تكمل مذاكرة لحد الغدا او العصر ايهما اقرب
بعد الغدا او العصر تكمل مذاكرة لحد المغرب وبرده بعد المغرب تكمل مذاكرة لحد العشا
وبعد العشا تتعشى وتنام
لوحسبتها هتلاقي عدد ساعات المذاكرة في حدود 13 ساعة
خد بالك ان مع كل صلاة انت بتريح يعني الجدول مش ناقصه الراحة ولا حاجة
بس برده خد بالك ان الموضوع ده مش هتحتاجه طول السنة اد ما هتحتاجه في الفترة اللي قبل الامتحانات
لكن لو لقيت نفسك متاخر في الجدول الاسبوعي بتاعك ابقى ارفع حالة انذار ونفذ الفكرة دي
5-لا تؤجل عمل الاسبوع ده للاسبوع اللي بعده لكن ممكن تؤجل عمل اليوم الى الغد بشرط ما يكونش الغد ده فيه محاضرات

(منقووووووووووووووووووول)

نكمل النصايح
احنا دلوقتي خلاص عملنا جدول للمذاكرة ما يخرش المياه و هنبدأ مذاكرة
النصيحة الرابعة:
"عايز تبقى كفء ,ارفع كفاءتك"
حد فاهم حاجة؟؟؟؟
اشرح لكم معناها ايه الجملة دي
اولا يعني ايه كفاءة؟
كفاءة الشيء هي النسبة بين ما يدخل الشيء وما يخرج منه
يعني كفاءة اي جهاز كهربي هي النسبة بين الكهرباء اللي دخلته والطاقة اللي انتجها وعادة بيكون الرقم اقل من الواحد الصحيح
الانسان "بالنسبة لموضوع المذاكرة" كذلك له كفاءة وهي النسبة بين المعلومات اللي ذاكرها والمعلومات اللي يقدر يطلعها في الامتحان
الكمبيوتر كفاءته بتساوي الواحد الصحيح لكن الانسان ربنا ميزه بالعقل فالنسبة دي بتزيد عن الواحد الصحيح عند الانسانو ده بيكون بالاستنتاج و التحليل
لكن في بعض المواد كفاءة الانسان فيها بتكون قليلة بالذات المواد اللي بتعتمد على الحفظ المطلق زي العقاقير لانها ما بتحتاجش استنتاج كتير وفي مواد لو كفاءة الانسان فيها تساوت مع الواحد الصحيح يسقط زي الرياضيات والاورجانيك
كده احنا فهمنا يعني ايه كفاءة طاب ازاي نرفع كفاءتنا

كل واحد فينا ليه كفاءة مختلفة عن التاني ده لان كل واحد فينا مختلف عن التاني في درجة ذكاؤه و في قدرته على الحفظ"واضح من كلامي ان العوامل اللي بيتوقف عليها كفاءة شخص في المذاكرة هي ذكاؤه وقدرته على الحفظ"
يبقى لو قدرنا نرفع من ذكاءنا وقدرتنا على الحفظ هنوصل للي احنا عايزينه
اولا ازاي نرفع ذكاءنا:
الذكاء صفة ثابتة في الانسان ماينفعش انها تزيد لكن خبرات الانسان اما بتزيد بيبان الانسان كانه ذكي"وبيتقال عليه حكيم"
كل اللي فات ده رغي مالوش لازمة واللي جاي دلوقتي هو المفيد
اما تذاكر حاجة ما يكفيش انك فهمتها
لازم تفهم كل حاجة جات منين بعد كده تخيل نفسك دكتور بيعصر واحد في الشفوي هيساله ايه؟ ويا ترى الاجابات الصحيحة للاسئلة دي ايه؟
وما فيش مانع انك تعد تجرب حاجات ممتعة
يعني مثلا الاورجانيك بتاعة الترم الاول سنة اولى حاول انك تألف تحويلات مستحيلة وتحاول بكل مجهودك انك تحلها
الفيزيكال برده بتاعة الترم الاول سنة اولى بعد ما تحل مسالة حاول تشيل معطى من المعطيات وتحط معطى تاني بحيث تكون المسالة ممكن تتحل بس على مرحلتين و تحاول تحلها
كل اللعب ده بيخليك مستعد لاي صدمة و حتى لو انت مش ذكي كفاية هتكون على الاقل متوقع حاجة زي كده فما تتخضش او تخاف لان من الحاجات اللي بتضيع درجات الخوف في لجنة الامتحان وبالتالي فقدان التركيز والقدرة على التفكير بشكل علمي ومنطقي

ثانيا ازاي نرفع قدرتنا على الحفظ:
معروف ان التكرار بيعلم الشطار
دي طريقة سهلة جدا ومضمونة في الحفظ بس بتستهلك وقت طويل
وبمرور الزمن الواحد بينسى
ثبت " من وجهة نظري"ان الانسان بينسى الكلام اللي مالوش ايحاء بالنسبة له في حين ان الاكلام اللي له ايحاء بيؤثر في شخصيته وبيكون جزء منها

عادة الاجزاء اللي بتتنسي بسهولة وبسرعة هي الاجزاء المملة في المنهج في الحالة دي لازم نخليها ممتعة
المرة دي مش بانك تقنع نفسك لا باللعب
ارخم مادة مرت بينا هي العقاقير كلها حفظ origins A.Cs &uses
و الواحد بعد ما بيحفظ الحاجات دي يلاقيها دخلت تاني في بعضها فييأس
في طريقة للحفظ انا باعتبرها افضل طريقة شفتها
هي التلاعب بالالفاظ
فلو عندك مجموعة usesعايز تحفظهم تعمل ايه؟
تحول كل واحدة فيهم لكلمة معينة تعبر عن المعنى emolient anti- rheumatic analgesic زي كده يعني وتاخد اول حرف من كل كلمة تحطهم في كلمة جديدة يعني هنا عندنا e a&rلاحظ اننا اخدنا r من anti-rheumaticلاننا اخدناaقبل كده
ال3 حروف دول ممكن تحطهم في كلمة earيعني اذن بعد كده حاول انك تربط بين الاذن واسم ال drug بتاعكو هكذا
بكده يبقى عندك لكل drugكلمةللusesو واحدة A.Cوواحدة لcontraindication
تقدر في اخر السنة تحطهم في جدول هتلاقي ان حفظ الجدول ده يخليك تقدر تحفظ كل الحاجات دي ومن غير ما تلخبط
وفي طرق تانية للحفظزي" الحفظ بالكتابة " و"لحفظ والمراجعة"
وفي مبدا بيقول "نحن نذاكر لكي ننسى وننسى لكي نذاكر فان لم نذاكر لن ننسى وان لم ننسَ لن نذاكر"
وفي طريقة للحفظ اكيدة وهي الحفظ بالنسيان
انك بعد ما تقرا المعلومة تحاول تسمعها "بعد اول قراءة"هتلاقي نفسك ناسي حاجات كتير منها
تروح تبص بصة عليها وترجع تسمع تاني هتلاقي نفسك افتكرت حاجات ونسيت حاجات
ترجع تسمع تاني هتلا قي نفسك نسيت اللي افتكرته قبل كده وافتكرت اللي انت نسيته
تفضل تكرر الموضوع لحد ما تلاقي نفسك جبت الموضوع من اوله لاخره الطريقة دي بتنفع جدا في الفترةاللي قبل الامتحانات لانها سريعة
ثالثا ازاي نقلل الضائع في المذاكرة:
باختصار بعد ما تذاكر وتخلص مذاكرة مادة معينة حاول انك تتخيل نفسك دكتور واقف بيشرح للطلبة المحاضرة دي هاتقول ايه؟"طبعا لو نسيت نقطة في المحاضرة ما فيش مانع انك تبص عليها بصة سريعة"
ده عشان ما تنساش بسرعة


(منقووووووووووووووووووووول)

نكمل نصايحنا
خلاص عرفنا ازاي نحفظ كويس وازاي نذاكر"طبعا اللي له طريقة مريحاه في المذاكرة مالوش دعوة بالكلام بتاع النصيحة الرابعة عشان ميتلخبطش"

النصيحة الخامسة:
"جمع درجات اكتر تجيب مجموع اكبر"
ده مش اعلان لكن دي حقيقة لكن ازاي نجمع درجات؟؟؟
نظريا الوقت اللي بيفصل الطلبة لممتاز وجيد جدا و جيد و مقبول و بيحدد درجة الطالب هو اخر حاجة الطالب بيعملها في السنة الدراسية وهي اجاباته في ورقة الاجابة
يعني لو الطالب حل الامتحان كله صح مفيش حاجة تمنعه من انه يقفل الwrittenحتى لو كان بدأ المذاكرة قبل الامتحانات بشهر واحد بس
لكن زمن المعجزات انتهى من زمان ومستحيل ان الطالب اللي بدأ يذاكر من اول السنة يتساوى مع طالب بدأ يذاكر قبل الامتحانات
يبقى لو بدأت تجمع في درجات "المعلومات بتتحول في ورقة الاجابة لدرجات"من أول السنة هتجمع درجات اكتر من اللي بيبدأوا في اخر السنة
بس مش هو ده بس المقصود بالنصيحة دي

طاب لو اتنين عملوا الكلام اللي باقول عليه ده بس واحد فيهم كان خبيث شوية كان بيلقط الكلام اللي الدكتور ما بيمليهوش عشان يستفيد منه
كل الدكاترة بيشرحوا بعد كده بيملوا لكن بالملاحظة هتلاقوا انهم اثناء الشرح بيقولوا كلام مفيد جدا بينسوا يقولوه اما ييجوا يملوا وللاسف بييجي الكلام ده في الامتحان وبيؤثر في النتيجة يبقى ندونه ولا لأ؟
وممكن تكون اخبث واخبث واي سؤال الدكتور يساله في وسط المحاضرة تدونه لانه عادة بييجي بالنص في الامتحان
وممكن تكون اخبث برده واي زميل يقوم يسال سؤال ذكي او مفيد تنتبه له ولو السؤال يستحق اكتبه
كل الكلام ده اسمه تجميع في معلومات تتحول في النهاية لدرجات
من الاخر متبقاش قاعد في المحاضرة مشغول باي حاجة غير انك تشتغل رادار للدرجات اللي بتتحدف في الهوا
كمان في بعض الاحيان انت او اللي قاعد جنبك يقول ملاحظة حلوة جدا تعجبك برده ما تسيبهاش واكتبها لاننا بشر وبننسى انما الورق ما بينساش
بس ممكن تسال انا هلحق اكتب كل ده ازاي؟
الموضوع بسيط مش مفروض انك تكتب جمل كاملة مفيدة تعبر عن الحاجات اللي بتلقطها المهم انك تكتب كلمات اما تبص عليها تفهم المعلومة"وخد بالك انك ما تختصرش زيادة عن اللزوم عشان تقدر تفهم انت كاتب ايه؟!!!!!!"

(منقوووووووووووووووووووووول)

انا يا شباب نزلت الكلام ده لانه عجبنى
و اتمنى انكم تستفيدوا من الموضوع ده
لان الكلام ده منقول عن طالب زينا
يعنى انشاء الله مش صعب يتنفذ
و ارجوكم تقوللى رايكم فى الموضوع
و لا تنسونى من صالحى دعاؤكم

نصائح اكثر من رائعة جزاكى الله خيرا
وربنا يوفقنا كلنا ونحقق امالنا فى الكلية ونجيب تقديرات عالية

جزاكى الله خيرا على المرور يا دكتورة سارة و ربنا يوفقنا كلنا
و كل سنة و انتم و جميع الامة الاسلامية بخير

:):):) شكرا يا فارما جيرل ع النصايح دى و ربنا يوفقك و يوفقنا جميعا.. :):):)

جزاك الله خيرا يا دكتور اكرم على المرور
و يارب نطبقها انشاء الله عشان تكون الاستفادة حقيقية
و ربنا يوفقنا كلنا

شكرا جزيلا على هذه النصائح الرائعة يا pharma girl
وربنا يوفقنا جميعا
تحياتى,

جزاك الله خيرا دكتور ميدو
و ربنا يوفقنا كلنا

نصائح جميلة بجد
شكرا شكرا شكرا
وربنا يوفقنا كلنا

الله يخليكى الموضوع غاية فى الجمال وارجوكى اكملى

جزاكى الله خيرا pharma girl
بجد موضوع جميييل
و اكتر حاجة عجبتنى الجدول بتاع تنظيم الوقت
و دا عادة انا بعمله و عاملة فيه حساب كل فتفوتة ..يعنى ممكن تلاقى خانة فيه اسمها خناق مع اختى:d..عادى بعمل حساب الوقت اللى هيضيع
اما طرق المذاكرة العجيبة دى فهى بردو معايا..يعنى ممكن يكون حد بيسمعلى و يسالنى سؤال محترم يلاقينى بكل ابتهاج قلت(ايوة..دى نظرية الشبشب) و اكمل تسميع:d
دى اثار الثانوية ..وربنا يستر على اثار صيدلة
اثابكى الله
و ربنا يوفقنا جميعا ان شاء الله:)

نصايح جامدة بجد وربنا يوفقك ويوفقنا للعمل بمثل هذه النصائح الغالية وبكرر شكرى مرة تانيةوعلى فكرة أنا طب بس النصايح دى هتفدنى كتير وشكرا للمرة التالتة ونرجو المزيد

جزاكم الله خيرا على ردودكم الجميلة
انا بحد فرحانة انى افدتكم
و يارب كلنا نطبقها و نطلع من الاوائل كلنا
و تكون نيتنا اننا بنعمل حاجة للاسلام و بنرضى ربنا
و ربنا يوفقنا جميعا
قولوا امين

حلوه جدا النصايح دى
انا كنت عايزه اعرف حضرتك فى سنه كام وفى صيدله ايه
لوصيدله اسكندريه يبقى لازم اشوفك
علشان يبقى ليا ضهر فى الكليه:d
عجبتنى اوى حكايه انى وانا نايمه افضل اقول انا بحب المذاكره
هو كده اه ممكن احبها بس اكيد هتتجنن بعد كام يوم:d

جزاكى الله خيرا و الحمد لله انا النصايح عجبتك
انا انشاء الله دخلة اعدادى صيدلة
بس للاسف اظلمت فى التصحيح و رايحة فى اقاليم بس ممكن انشاء الله السنة الجية نتقابل
لان انا من اسكندرية
ممكن تقوللى انتى كمان فى سنة كام
و على فكرة حكاية انك تكررى قبل ما تنامى الكلام ده صح مية فى المية
و ربنا يوفقنا جميعا

ميرسى للنصايح
وكل سنه وانتى طيبه

و انتى طيبة
و جزاكى الله خيرا على المرور

thanks pharma girl
important advices
peace

جزاك الله خيرا

بجد نصايح جميلة
رغم اني مش صيدلة بس استفدت جدا
جزيت خيرا

جزاك الله خيرا

جزاكم الله خيرا على مروركم
و ربنا يوفقنا جميعا

جزاك اله خيرا على هذا الموضوع الجميل والنصائح الرائعة و ان شاء الله هحاول اطبقها عندي في طب وربنا يوفقك و رمضان كريم:d:lol:

جزاك الله خيرا على المرور
و ربنا يوفقنا كلنا

نصايح رووووووووووووعة بجد

شكرا يافارما جيرل وبجد بتعملي مواضيع جميلة ومفيدة اوى كمان

جزاك الله خيرا د.نوبل
و ربنا يوفقك

جزاكى الله خيرا أختى الكريمة
موضوع كويس بجد.....بارك الله فيكى:)
ولو أنة لطلبة صيدلة عشان العقاقير وكدة
ألا أنى استفدت منة بجد وأكيد ان شاء الله هنحتاجة فى الفارما بتاعة تالتة;)
أما يا عمرى بخصوص تجميع الدرجات فى المحاضرة
فى حد قالى أن احنا ممكن نسجل المحاضرة ع ام بى ثرى أو ام بى فور:d
ونسمع المحاضرة بقى فى المترو أو المواصلات
وفى المحاضرة ننتبة لكلام الدكتور:)
شكرا ليكى بجد
كلام راااااااااائع
وبأمانة يستاهل التثبيت

جزاك الله خيرا على كلامك الرائع
و ربنا يكرمك و نشوفك دكتورة كبيرة انتى و جميع زمايلنا فى المنتدى
و ربنا يوفقنا كلنا

السلام عليكم
جزاكى الله خير الجزاء عنا
انا رايحه تالته طب جبت امتيازين بس ع السن
النصايح جميله يارب استفيد منها واجيب امتياز عالى

جزاكى الله خيرا يا دكتورة على المرور

جزاكي الله كل خير
بصراحة نصايح مفيدة جدا رغم اني مش صيدلة بس افدتني

جزاكى الله خيرا على المرور

شكرا جزيلا ليكي يا pharma girl وتفيدينا كمان وكمان

فعلا النصايح دى جميلة وافادت لكثير
واتمنى المزيد

شكراااااااااااااااااااااااااااااااااااااااااااا علي النصائح

شكرا جزيلا ليكي يا pharma girl وتفيدينا كمان وكمان

فعلا النصايح دى جميلة وافادت لكثير
واتمنى المزيد

شكراااااااااااااااااااااااااااااااااااااااااااا علي النصائح

جزاكم الله خيرا و ربنا يوفقكم و يوفقنا