كشف أحمد صقر - ناشط متخصص في الشأن الاقتصادي - مفاجأة كبيرة عن أزمة الدولار وبخاصة بعد ارتفاعه إلى 12 جنيه في مدة وجيزة جدًا . وقال "صقر" في تدوينة عبر حسابه الشخصي على موقع "فيس بوك": "مينفعش الدولار يطّلع ١٧٥ قرش في ٤٨ ساعه برة أي تدخل أو قرارات من الجهات الرسمية ، واللي بيحصل ده مالوش دعوة الجنيه ضعيف ولا الاقتصاد بيعاني ..مفيش توصيف لده في الاقتصاد غير مصطلح واحد ان السوق دخل في مرحله (الذعر) اللي لو موقفتش هاتبقي كورة تلج فوق قدرة أي حكومة مصرية خليجية أوروبية أمريكانية روسية تقدر علي صدها.. آه الجنيه ضعيف والاقتصاد بعافية والسياحة واقفة وقناة السويس محققتش أي عائد من المليارات اللي اتصرفت وبنصرف غلط وبنفرض ضرائب علي الغلابة بس والتصدير بيكح قصدير وفي ١٦٠٠ مصري من الديناصورات الجدد اللي للأسف هاتلاقى منهم كتير من مويدي السيسي كمان.. بس من يونيو ٢٠١٥ لحد الآن اشتروا عقارات بمليار و٣٠٠ مليون دولار في دبي .. وأكيد مشتروهومش بالكريدت كارد يعني ..١٥ مليار جنيه تخيل لو كان تم ضخهم للاستثمار محليا كانوا عملوا ايه؟ .. تخيل ١٦٠٠ مصري من اللي مصدعينا بالتضخية علشان الوطن ومأكلين الشعب تبن يا تري جابوا فلوسهم منين وطلعوها بره ازاي و (فشــ...) كام مليون مصري مزنوق ومحشور جوه البلد في اقل من ١٢ شهر ؟" بحسب تعبيره . وأضاف: "ده اللي في دبى بس .. مجبناش سيره عقارات إسبانيا و انجلترا و أمريكا وجزر الهونولولو وكمان العقار فى دبى متوقع موجة تصحيحية عنيفة خلال السنتين الجايين قبل الاكسبو سيتى .. يعنى اللى اشترى مراحش لسوق آمن أصلًا" وتابع: "دلوقتى التاجر اللي عنده بضاعة علي الرف مبقاش عارف يسعرها ازاي واللي بيشتري مبقاش عارف بكرة هايبقي معاه يكفي حاجته الأساسية ولا لا ...المشكله أن مفيش حد خلاص عنده قدره فضلا عّن الشجاعه أنه يشد فرامل و يقول هي مش جزرة وقطمها جحش و البنك الدولي مش ربنا علشان ننفذله روشتة هاتجيب اجل اللي بينفذوها ولا المستثمر الخليجيى لازم يشترى البلد برخص التراب فانطربقها على دماغ اللى فيها" .. مضيفًا: "الغشومية آخرتها طين والأرقام مبتكدبش ..واحتكار السياسة والاقتصاد نهايته معروفة بس محدش بيتعلم .. واللى نفع فى 2011 علشان 60% من اقتصادنا غير رسمى مش ضرورى ينفع ويفضل ساند البلد فى 2017 لان حتى الاقتصاد غير الرسمى كمان واخد مفك جنب عينه خلاص" حسب وصفه. واستدرك: "فى حلول لوقف الذعر على فكرة و فى كمان حلول تدعم الاقتصاد بس مشكلتنا فى فساد السياسات و تبعية الارادة.. بس أي حل يحصل ازاي والاثر النفسى (بيفشــ..) البورصات و بيوقع أسهم شركات راسخة على الارض ...فما بالك تأثيره على عملة واحنا عايشين فى بلد رئيسها بيقول عليها شبه دولة و محافظ كفر الشيخ بيدعو الحماهير لختمة قران على البلد". وأنهى كلامه قائلًا: "على العموم اللى أوله رقص قدام اللجان آخرته بالطو بكمام ..ربنا يرحم الغلابة اللي لا عندهم فلوس يطلعوها بره ولا معاهم حتي اللي يكفيهم اكل وعلاج لآخر الشهر" حسب تعبيره.

اقرأ المقال الاصلى فى المصريون : http://almesryoon.com/%D8%AF%D9%81%D8%AA%D8%B1-%D8%A3%D8%AD%D9%88%D8%A7%D9%84-%D8%A7%D9%84%D9%88%D8%B7%D9%86/907162-%D9%85%D9%81%D8%A7%D8%AC%D8%A3%D8%A9-%D9%85%D8%AF%D9%88%D9%8A%D8%A9-%D8%AD%D9%88%D9%84-%D8%A3%D8%B2%D9%85%D8%A9-%D8%A7%D9%84%D8%AF%D9%88%D9%84%D8%A7%D8%B1