السبت,حزيران 28, 2008
حوار بين اتنين مدرسين
من مدونة إبحار لفهمي إبراهيم


- عايز تاخد الكادر
## طبعا حد طايل ##

- ليه طبعا
## عشان أعيش ##

- ليه هو أنت مش عايش
## برضه الكادر بيدي الواحد هيبه ##

- يابني الكادر ده مش فلوس وبس
## يعني إيه ##

- يعني شغل وبحث وتطوير وإطلاع
وإعداد ومسئولية
## أكتر م المسئولية اللي إحنا شايلينها
دا الواحد بيعمل البدع في الفصل
عشان العيال تفهم ##

- إن شاء الله الوزارة حتخليك تعمل أراجوز !..
وعجين الفلاحة كمان!
## دانا أعمل عجين الفلاحة .. !
والمتحضرة .. ! والهانم ..!
وهيلاري كلينتون ..! وعجين أوباما كمان..!!
بس وحياة أبوك بلاش كونداليزا رايس ##

- ليه ؟؟
## عشان العيش مايتحرقش ..
مش كفاية دم الواحد محروق خلقة ##

- انت عارف لوحتسقط في الامتحان
حايعملوا فيك إيه ؟؟
## حيعملوا إيه يعني ..
ما احنا ياما اتعمل فينا
من الحكومة ومن الوزارة
ومن الوزراء السابقين والحاليين
وإن شاء الله من اللاحقين برضُه
ومن الطلبة و من أولياء الامور
و من عم محمد البقال
والجزار اللي ما بحبش أجيب سيرته ##

- عارف ..اللي حيسقط في اللغة العربية ؟
حايعاقبوه إزاي
## حايحرموه م الميراث يعني ##

- لأ ! حيوقفوه في الطابور لبعد الفسحة
تحت الصاري بتاع العلم
## عشان الطلبة تحييه ##

- تحييه إيه يابني ..
دا عشان الطلبة تتفرج عليه
وتعرف إنه ما بيعرفش عربي
## يعني ما بيعرفش يتكلم ..
قصدك ما بيعرفش يشرح ..
طيب لو سقط في مهارة اللغة والتربوي ..
حيعملوا فيه إيه ؟ ##

- حايوقفوه في الطابور برضُه لغاية الفسحة ..
وبعدين حيلففوه أرض الطابور ..
لحد مايقع مغشيا عليه
ومش حيجيبوا له الإسعاف ..!!
عشان عدد المدرسين يقل..!
## يانهار أسود
طيب لو سقط بالتلاتة..
مهارة اللغة والتربوي و مادة تخصصه ؟ ##

- ده بقي.. حيبقي عبرة العبر
## إزاي ؟؟ ##

- الوزير يابني حيخليه مستريح ..
وحيجيله لحده.. وفي مدرستة كمان !!!
## ده يبقي تكريم بقي ##

- لأ .. لأ .. ياريت
ده حياخد عشرة من الطلبة اللي بيعيدو السنة..
و راسبين للمرة التانية ..وتكون صحتهم كويسة
ويدي كل واحد منهم خرزانة !!!
## عشان إيه كل ده ##

- عشان يمدوا المدرس الراسب علي رجلية
قدام الطلبة..ومش كده وبس !!
دا حيصوروه فيديو ..
و يجيبوه عالهواء مباشرةً ..
نقل مباشر زى الأهلي والزمالك كده
## يانهار أسود ..
دي تبقي فضيحة بجلاجل ياجدعان ##

- برضه كل دة حا يحصل بعد الفسحة
## قصدك يعني بعد مايقف زي التانيين
اللي سقطوا في الكفاءة لحد الفسحة ..
والطلبة تعرف انه سقط بالتلاتة ##

- بالظبط 000
## طب افرض المدرس ده عيان
أو عنده روماتيزم في رجليه ..
أو عنده دوالي ..
أو مابيقدرش يسند طوله .. لا قدَّر الله ؟؟ ##

- ده بقي حياخد حقه بالتمام والكمال ..
الحكاية ما فيهاش خيار وفقوس !
## قصدك إيه ##

- قصدي إن كل واحد حياخد حقه كامل برضُه ..
بس حياخده علي قفاه ..!!
## لا ياعم الوزير بتاعنا طيب وحيساعدنا ..
وحيسد .. ويشيل عننا .. ده جمل يابني ! يعني حمَّال أسيه
وممكن يعمل مش واخد باله .. عشان ننجح بنسبة 99%
عشان الأكاديمية تمشى وتستمر..
والشغل اللي فيها يحلو..
وعشان إحنا مانتكلمش ... لازم حيراعينا ##

- حيراعيك إيه يابني ده امتحان !!
## هو فيه اكبر من الامتحان اللي احنا فيه ده..
ياخوفي ليكونوا عايزين يعملوها بجد ##

- أُمَّال هزار
## علي كده العدد حيبقي محدود جدا ..
لأن كله حيسقط
وينكشف ويبان المستور يا عبد الستار
ويبان المداري ياعبد الباري ##

- طبعا !! انت بتفتكرها لعبة
لأ دى الحكاية جد خالص
## عموما أنا حاخد دروس خصوصية
من دلوقتي
عشان اجيب مجموع100%
وعرفت كمان انهم حيعملوا مذكرات ##

- طب والنبي تقولي حيبيعوها فين
وفي أنهي مكتبة ؟؟؟ وبكام ؟؟؟
وحانعرفوا نجيبوها من ع النت ولاّ لأه
## لا دي حتبقي دكاكيني
عشان اللي حيظبطوه حيودوه محافظة غير محافظته ##

- ده كان زمان يا حبيبي
## امال حيودوه فين ##

- حايحبسوه في أوضة الفيران
## أوضة الفيران بتاعة مدرسته؟؟ ##

- لأ .. اوضة الفيران بتاعة المدرسة اللي جنبهم
## ليه ##

- لان الفيران بتاعة مدرسته واخدة عليه
ومن باب العشرة والعيش والملح
مش حتعمل معاه حاجة !!!
يسدل الستار

ههههههههههههههههههههه

ليتني لم أولد !!

يا ليتني كنت ترابا !

والله حوار رائع وجميل استاذ / فهمى

ويبدو ان فوائد الكادر بدأت ف الظهور

يعني هايظهر شعراء وكتاب ومدونين

يعني ماهوش وحش والله

رب ضارة نافعه

لكن هناك حوار اكثر سخونة بين المعلمين ووزارتهم

لكنه للاسف : حوار الطرشان

بسم الله الرحمن الرحيم

موضوعك اكثر من رائع استاذ فهمي

http://up3.m5zn.com/get-9-2008-92xzfctkixm.gif (http://up3.m5zn.com/showimage-9-2008-92xzfctkixm.gif)



http://up3.m5zn.com/get-9-2008-wxh3flv9cqw.gif (http://up3.m5zn.com/showimage-9-2008-wxh3flv9cqw.gif)

ربنا يكرمك ويكرمنا

بسم الله الرحمن الرحيم






موضوعك اكثر من رائع استاذ فهمي

الأستاذ الفاضل/ محمد كامل فودة
أخجلتني بإمكانياتك الرائعة
إن مجرد مرورك لهو شرف لي
أشكرك وأقدِّرُك وأحييك من الأعماق
_______وكل عام وأنتم بخير ___________

موضوع جميل يستحق التحية

طيب ياستاذ ياعظيم حضرات المدرسات اللى زينا هيتعاقبوا ازاى بالمد بردو والا بايه

مبارك يطالب بالإعداد الجيد لمنظومة التعليم
طالب الرئيس حسني مبارك الحكومة بضرورة الاعداد الجيد لمنظومة تطوير التعليم علي أن يتم الاعداد الجيد للمدرس والمدرسة والمناهج الدراسية قبل تطبيق عملية التطوير حتي تصبح هذه المنظومة شاملة وتحقق الاهداف المرجوة منها.. كما طالب الرئيس مبارك بضرورة شرح المحاور الرئيسية للتطور ومزاياها علي المجتمع قبل بدء التنفيذ عام ..2010 صرح بذلك الدكتور يسري الجمل وزير التربية والتعليم عقب الاجتماع الذي عقده الرئيس مبارك لبحث سياسات تطوير التعليم.

طيب ياستاذ ياعظيم حضرات المدرسات اللى زينا هيتعاقبوا ازاى بالمد بردو والا بايه

والله ياأستاذة /amal_amm
الحكاية دي فاتتني خالص
ولم تخطر علي ذهني علي الإطلاق
تصوري إن أنا دلوقتي محتاس خالص
وحاسس إني مش عارف أرد
وبعدين تأنبيني التانيب المهذب ده كله
وتقوليلي طب يااستاذ ياعظيم المدرسات إزاي يتمدوا
بصراحة والإعتراف بالحق فضيلة انا اتبهدلت ياجدعان
عارفة يا أبلة / amal_amm بصراحة
انت زنقتيني زنقة سودة
وخليتي العرق نازل يشر مني وكسفتيني كسفة منيلة
بس انا دلوقتي دلوقتي لقيتلها حل وسوف أضيفه للحوار
طيب مش أنتن تطالبن بالمساواة
تتمدوا بقي زينا وخلاص
لغاية مانلاقي لها حل
طب إية رايك بقي دلوقتي
هجمت علي الحلول من كل جانب
دي كانت تايهة عني الحكاية دي فين ياجدعان