المصرى اللى كان فصيح [الأرشيف] - بوابة الثانوية العامة المصرية

Samir Elamir

07-10-2016, 01:54 PM

المصرى اللى كان فصيح
شعر/ سمير الأمير

خيبته العجب عجبان منه
سنين عجاف حشت سنه
سبع تلاف داهيه تجنه
وتبهدله وتشل اديه
**
بيقولوا كان فى الشكوى فصيح
وفى النكت قارح وقبيح
اصبح يخاف من همس الريح
والعسكرى مدد ف عنيه
**
من عهد مينا لأخينا
ابو بدله سوده مخلينا
تايهين وناسيين أسامينا
قولى اسمك ايه؟؟
**
خايف يقول يطلع مطلوب
فى القسم ياخد بالمركوب
ويموت فطيس ابن المنهوب
والحق يطلع برضه عليه!!
**
وكلنا شرح صاحبنا
متعكزين على مصايبنا
وكل فرعون يركبنا
ويسوقنا ويدلدل رجليه
**
واتارى مصر دى موروثه/ مش محروسه
ملناش لا طور ابن جاموسه
ولا حتى حتة فسفوسه
واحنا اللى زارعين الكوسه
فى الموكوسه
و ياكلها البيه !!!!
------------------
من ديوان كلام بالصدفةوبالقصد - الهيئة المصرية العامة للكتاب 2013