لخصت اهم اللى بيتقال عن الوقت ومشاكلنا معاه .
---------------------------
1 - نفسى انظم وقتى بس محدش بيساعدنى !!:(
* - اسهل حاجه ان الواحد يلوم غيره ويبرر موقفه ، وانت المسئول الوحيد عن تنظيم وقتك ، وانت اللى تقدر تتحكم فى غيرك او تخلى غيرك يتحكموا فيك
ببساطه تقدر تبدأ فى تنظيم وقتك حسب اولوياتك واى حد يعطلك اعتذرله بكل احترام وخلص اللى وراك الاول وبعدين شوف هو عايز ايه ، ولو معملتش كدا انت هتكون اداه لغيرك يستغلوك لمصالحهم ... فركز على وقتك

2 - انا مشغول ومعنديش وقت انظم وقتى ؟:excl:
*- العقل منطقى برضو وبيحب يبرر الشئ بطريقه منطقيه ، فيقنعك ان تنظيم الوقت هو نفسه مضيعه للوقت ...
رغم ان لو جيت للمنطق هتلاقى ان ساعه فى تخطيطك لاداره الوقت تكفيك عن اربع ساعات عمل !! وربما اكتر حسب ذكاءك ودقتك فى التخطيط
وكمان معنى تنظيم الوقت هو ترتيب الامور حسب اهميتها بحيث انك متنشغلش بحاجه على حساب حاجه تانيه وانك توفر الجهد والادوات اللازمه للعمل من خلال تنظيم الوقت دا
وهنا بقى اللى بيقول انه معندهوش وقت ينظم وقته عامل زى الخباز اللى مكسل يضيع شويه وقت عشان يحل مشكله انخفاض حراره النار ( الفرن)
بحجه انه مشغول .. رغم انه لو عمل كدا الخبز هيتعمل بسرعه وانتاجه هيزيد بس هو حابب يفضل بطئ ولا انه يتعطل شويه عشان يكسب بعدين
فبلاش تحسب الامور بظاهرها وشوفها على المدى البعيد ..

3 - انا مش محتاج انظم وقتى ، الكلام دا للى عنده مشاريع واعمال كبيره !
*- طيب واضح ان فى استهانه بالوقت رغم اننا عارفين انه كالسيف ان لم تقطعه قطعك ...
طيب نحسبها سوا كدا ...
لو نفرض انك بتضيع 20 دقيقه مثلا فى اليوم وشايف انهم مش حاجه عشان تستغلهم ... رغم ان اكيد انت بتضيع معظم وقتك .

نقول 20دقيقه × 7 ايام = 140 دقيقه اسبوعيا ...
140 دقيقه اسبوعيا ×4 = 560 دقيقه فى الشهر
انا مش هكمل بس انت كمل لحد سنه وشوف ال 20 دقيقه هيكونو بمقام كام يوم شغل !
وبعد كل دا مستقل لسه بالدقايق !!
طيب لو قولنا العكس واستغلينا كل يوم فقط 30 دقيقه فى اى شى مفيد
خلال شهر هتكون استغليت حوالى 15 ساعه !!!
وتقدر تعمل فيهم كل اللى تقدر عليه وتطور نفسك وتعمل نقله فى حياتك كل شهر وهكذا
ولو ركزت بجد تعمل معجزات فعلا ،،
يبقى ملكش حق تستقل بالقليل من الوقت لان الوقت قيم حتى ولو كان قليل .

4- انا مش محتاج اكتب هعمل ايه ، واخطط ع ورق ، انا عارف ايه اللى المفروض اعمله !:o
*- خلينا متفقين ان مفيش ذاكره كامله واكيد هتنسى بعض التفاصيل اللى ممكن تكون مهمه فلما تكتب اللى انت عايز تعمله كدا انت بتفيد نفسك
لان كدا ملكش عذر اسمه النسيان
وكمان عقلك كدا مش محتاج يفضل مجهد و فاكر اللى هتعمله
وبالتالى هيكون تركيزه اكتر فى تنفيذ مهامه بكل فاعليه ، فاكتب واشغل عقلك بالتنفيذ اكتر من اى شئ تانى ..

طبعا عارفه ان الكلام مش فيه افاده كبيره لكن الغرض منه تفكر تانى فى وقتك وتشوف علاقتك مع وقتك ايه ، فحاول تركز على اهم شئ فى حياتك ..

وياريت بجد نبطل نشتكى ونحاول ولو مره نشتغل على نفسنا بجد
والله لو اشتكيت من هنا للسنه الجايه مش هتستفاد .. لازم تشتغل بجد على نفسك وحط قدام عينك اللى انت عايزه .. وكمل طريقك ..;)