مشاهدة النسخة كاملة : خناقات رمضان (مسلسل كوميدى جدااااا )
بورسعيدى 06-09-2008, 05:29 AM خناقات رمضان
كل سنه وأنتم طيبين الموضوع فكرته تتلخص فى كلمتين وهو كيف تعيش الأسرة المصريه شهر رمضان الكريم سنتناول الموضوع فى شكل حكايات رمضانيه كومديه تسلوا بها صيامكم وتروحوا بها عن أنفسكم وتضحكوا فى نفس الوقت بدون أن نغرز فى أى مواضيع سياسيه أو أقتصاديه أو بلاء أزرق من أللى بنشوفوه اليومين دول حنشوف تخاريف الصيام بتعمل أيه فى الأنسان المصرى خفيف الظل
ولما عجبنى الموضوع حبيت اجيبه لكم بمناسبة رمضان
وكل سنة وانتم طيبين
منتظر رأيكم ونبدأ غدا ( ان شاء الله )
هنا الفقي 06-09-2008, 05:42 AM بدون ما تاخد راينا يا بورسعيدي باشا المفروض تكون واثق من انك دايما مبدع وبتمتعنا بابداعاتك الجميلة دي على طول
يللا منتظرين بقى
( لؤلؤة الإسلام ) 06-09-2008, 05:46 AM أكيد ما فيش كلام يعني .. يللا حضرتك مستني إيه ... !!
C A N D Y 06-09-2008, 06:08 AM اكيد فكرة هايلة كالعادة..و انا فكرت فيها بس مش عن رمضان..عن حاجة تانية ..عامة مستنيين و اكيد هتكون متميزة
واحـد من النــاس 06-09-2008, 06:48 AM ليا سؤال بس يا أستاذ بورسعيدي
يعني ايه تخاريف الصيام ؟؟؟؟؟؟
Hamset_Etab 06-09-2008, 08:16 AM منتظرينك ان شاء الله
اوركيديا 06-09-2008, 12:35 PM اكيد منتظرين حضرتك
و الحمد لله ان حضرتك اخيرا رجعت تحط مواضيع تانى
فى رعايه الله
..حدوتة.. 06-09-2008, 02:23 PM ايه ياعم هى فين الخناقات يلا بسرعة
MohammeD el_SadaT 06-09-2008, 02:52 PM أكيد طبعاً منتظرين يا أستاذنا
بس ياريت بقه حضرتك اللى متتأخرش علينا
msamido 06-09-2008, 02:55 PM ضيفونى على قائمة الإنتظار
يلا يا استاذ بورسعيدى
براءة 06-09-2008, 03:16 PM فى الانتظار
اكيد هتبقي حاجة متميزة جدا كالعادة :)
Dr.Nobel 06-09-2008, 05:10 PM فكرة جميلة جدا ياستاذ بورسعيدي
ومستني
Ra2oF 06-09-2008, 05:22 PM فكرة رائعة يا استاذ مجدي و متابعينك ان شاء الله
COoL HEaRT 07-09-2008, 12:53 AM جميل يا استاذ بورسعيدى ومستنيين
Dr.diamond 07-09-2008, 01:00 AM فى انتظار حضرتك:)
بورسعيدى 07-09-2008, 04:56 AM كل سنه وانتم طيبين وموعدنا الان مع الحلقة الاولى
أول رمضان( 1)
كل سنه وأنت طيب يا متولى
متولى : وأنت طيبه يا تفيده
تفيده : الحمد للله أن رمضان جه السنه دى أول الشهر وفرصة نعزم أهل عروسة أبنك وولادك البنات وأزواجهم وعيالهم وتبقى لمه واحده ونخلص من الهم ده
متولى: بس كده العدد حيبقى كتير قوى مش عارف أنتى حتكفى الجيش ده كله منين
لو قدرتى تجهزى أكل ليهم حتوفرى مكان ياخدهم أزاى ماتخديهم على مرتين
تفيده : بالذمه ده كلام ..فرصة ياراجل ونخلص وعزومه تفوت ولا حد يموت
متولى : أنتى ياستى أنت مش كنت عامله عزومه زى دى الشهر أللى فات وجبتى نسايب أبنك كلهم بربطة المعلم وفضلتى تعملى فى أكل ثلاث أيام لحد ما أتهديتى وقعدتى أسبوع فى السرير أنتى ما بتحرميش !!
تفيده : لازم يا متولى نظهر قدام نسايب أبنك ونعرفهم أن أبننا طالع من بيت عز وشبعان
متولى : بيت عز بيت فقر ما يفرقش معايا..بقول أيه هى نصيبه وألا أكتر يا ريتك تعزميهم فى أى مطعم ونخلص
تفيده : يا حومتى أكيد عايز تفضحنا ..هم نسايب الواد لما عازمونا كان فى بيتهم ولا كان فى مطعم
متولى : هى مرة واحدة وأنتى رديتى العزومه عشر مرات
تفيده : ده أول شهر رمضان يمر على خطوبة الجدع..حرام عليك
متولى : جوازه مقندله واقفه عليا بخسارة وياريت العروسه عليها الطلا..أنا مش عارف الواد أبنك أطس فى نظره مش عارف ينقى بنت حلوة كده تشرح القلب
تفيده : الواد ما خدش حاجه من أبوه أللى نقى على الفرازه ( تشاور على نفسها )
جمال ودلال وعيله وقيمه وسيما.. زغرط فى عيبك يامتولى
متولى : يظهر أن الواد طالع لخاله متجوز واحد صاحبه ..حاجة تقرف النصيبه الواد شكله حلو ووسيم ومركزه كويس ومش ناقصه حاجه ..عجبت ليك يازمن الوحشين ليهم حظ وناس ليهم تفيده
(تفيده تقف فى وضع الأستعداد للرد على متولى لتبدأ أول خناقه فى رمضان كما هو المعتاد فى كل سنة )
تفيده : أيه أيه ياخويا قعد عدل وأتكلم عوج ياسى متولى ..ألله يرحم ما وفقتش عليك ألا ما بعد أختك حفيت لحد ما أمى وافقت.... نسينا خلاص كانت البوسه
فى أيدينا رطل ..ده أحنا الخطاب كنا بنزيحهم من قدام باب شقتنا بالكوم ..حتنسى لما
قومت أختك من على الغسيل من ساعة ماشفتنى وجبتها بتاكسى علشان تكلم المرحومه أمى ورفضناك
متولى : كنت عيل وما عرفش طولة لسانك ..وبعدين حافظه المووايل دى أكتر من تلاتين سنه وبا سمعها وأنا ساكت ..ما أنا كنت فى شبابى ..البنات فى حتتنا تتمنى منى ولو نظره وكانوا بالطوابير برضه
تفيده : حوش حوش عنيك الزرقاء وشعرك الأصفر يادون جوان عصرك وأوانك
كنتى فين يا لأ لما قلت أنا آه أه أه
متولى : ياريتك كنت قولتى لأه وخلصتينى من جنانك
تفيده : مخى الوسخ ونصيبى المقندل أللى لمنى عليك
متولى : أسكتى أسكتى أنت والله ما عرفه حاجه ده أنا بتعاكس لحد دلوقتى وليه معجبين
تفيده : بلا نيله غيرش الست المكعبره اللى معاك فى الشغل ..دى بتضحك عليك علشان ترقيها
متولى : لمى الموضوع وبلاش شغل بولاق والشويتين بتوعك أحسن أحلف يمين بفركشة العزومه
تفيده : أيوه كده أظهر على حقيقتك أنت ما صدقت علشان ما تعملش العزومه أنا خبزاك وعجناك لما تكون مش عايز تنفذ حاجة.. تولع خناقة من بتوعك أنما على جثتى يامتولى العزومه دى ياأنا يا أنت لما نشوف كلام مين يمشى
( يدخل محمود من باب الشقه )
محمود : أيه ياماما فيه أيه يا بابا صوتكم جايب لآخر الشارع
تفيده : تعالى شوف عمايل أبوك قال أيه عايز يحلف يمين أنه ما يعملش العزومه
محمود : أنا عزمت الناس ثالث يوم رمضان أقول لهم أيه دلوقتى
متولى : فالح يا خويا ..أيدك ياسيدى شارك فى النصيبه دى
محمود : برضه حتاخد منى فلوس ياحاج ..ما أنت عارف البير وغطاه المرتب والحوافز والسهر كله فى أقساط العفش والجمعيه.. منين أجيب فلوس للعزايم
متولى : قول لأمك تلمها شويه علشان عايزه تتمنظر قدام نسايبك
تفيده : كل ده علشان أعمل لكم قيمه فى وسط الناس
محمود : خلاص يا جماعة صلوا على النبى دى أيام مفترجه مش عايزين تزعلوا من بعض ياالله ياكتاكيت بوسوا على دماغ بعض
تفيده : مش عايزه ولا يبوس على دماغى ولا أبوس على دماغه أهئ أهئ أهئ
متولى : خلاص ياتفيده حقك عليا..بس أنتى أللى أبتديتى الأول
تفيده : قولت أيه يعنى ولآ قولت أيه
متولى : ولا قولتى ولا عدتى وآدى راسك أهه
تفيده : كل سنه وأنت طيب يامتولى
متولى : كل سنه وأنتى طيبه ياتفيده
محمود : أيوه كده أضحكوا بقى ..ربنا يخليكم لى
تفيده ومتولى ( فى نفس واحد ) : ويخليك لينا ياحبيبى
انتوا لسة قاعدين
الحلقة الاولى خلصت خلاص
يارب تكون عجبتكم
وموعدنا غدا ان شاء الله مع الحلقة الجديده
msamido 07-09-2008, 11:35 AM كما عودتنا دائما
بدايتها جامدة ومنتظرين المزيد ان شاء الله
.
.
COoL HEaRT 07-09-2008, 12:10 PM لا بدايه حلوه جداا بس مشكله فعلا موضوع العزومات وتلاقى امه لا اله الا الله فى البيت وهيصه يعنى ممكن يكون فى عزومه بس متلاقيش مصر كلها جنبك ع السفره .... معاك يا استاذ بورسعيدى ومنتظرين الباقى
Nogha 07-09-2008, 12:24 PM ههههههههه
حلوووووووة اوى و فى انتظار الباقى ..........
Dr.diamond 07-09-2008, 04:49 PM حلوه جدا أستاذ بورسعيدى
فى انتظار باقى الحلقات
JusT DreaM 07-09-2008, 04:56 PM جميلة جدا الحلقة الاولى
وفي انتظار باقى الحلقات
Mohamed_AmeesH 07-09-2008, 04:59 PM لما البدايه كده
امال بعد كده ايه بقى
بجد
بدايه جميله جداااااا وشيقه
كمل فى انتظار باقى حلقاتك
وعلى فكره انا لسه شايف الموضوع دلوقتى علشان كده رديت بس ماردتشى قبل كده
بس على العموم هى فكره جميله جدااااااااااااااا
فى انتظار باقى الحلقات ........................
انا عارف جيت متأخره شويه يلا موش اشكال
ahmed2845 07-09-2008, 05:16 PM موضوع جميل جداا يا استاذ بورسعيدى
ياريت تكمل بقية الحلقات :)
lover rose 08-09-2008, 12:09 AM شكرا على الحلقه الاولى دى هتولع فى التانيه اكيد
الشفق الباكي 08-09-2008, 12:33 AM جامده اوى اوى
واجمل حاجه موضوع ياكتاكيت دا
بورسعيدى 08-09-2008, 02:43 AM الحلقة رقم (2)
التحضير للعزومــــــــة
تفيده : خد يا متولى أبقى أبعت الفراش بتاعك يجيب لنا الطلبات دى
متولى ينظر فى ورقة الطلبات ويصرخ
متولى : أيه أللى كاتباه ده كرنبتين و4 كيلو لحمه وخمس فرخات ولفتين رقاق
كله كوم والكرنبتين دول كوم..بذمتك ودينك أحطهم أزاى فى عربية المصلحة وأطلع بيه أزاى العمارة أنت عايزه تفضحينى يا تفيده حرام عليكى الواحد صايم ومش عايز أتخانق
تفيده : أتخانق يا متولى أصلك مش صايم لوحدك ..مش عايز تجيبهم خلاص أجيبهم أنا بس أبعت لى عربية المصلحة بعد ماتوصل وأنا حتصرف
متولى : الله يخزيك ياشيطان ..حاضر بس أوعى تدوخى السواق وترجعيه عشرين مره حرام عليكى الراجل برضه صايم والشوارع زحمه
تفيده : أقصر الشر يا متولى وأطلع على شغلك وأبعت لى السواق أول ماتوصل
(متولى يلعنها فى سره ويلعن العزومه ويتذكر أنه صايم فيتمالك أعصابه ولا يرد على تفيده )
تفيده : بتقول حاجة يامتولى
متولى : ما بقولش ..وينزل من البيت وهو ساخط ويبدأ أول يوم صيام فى رمضان
( يقابل متولى أبنته المتزوجه على السلم وهى تسحب أولادها الثلاثة وخلفها البواب يحمل شنطه كبيرة وسره فوق رأسه ملفوفه فى ملاية سرير )
متولى : أيه.. خير ياصفاء يا بنتى جوزك غضبك تانى
صفاء : غضبانه ومش غضبانه
متولى : فزورة من فوازير رمضان دى
صفاء : أبدا الغسالة عطلت والأستاذ مش عايز يجيب حد يصلحها وعلى الحال ده بقلنا أسبوع أخدت هدومى وهدوم العيال وسيبت له هدومه وقلت أغسلهم عند ماما وأفطر معاكم النهارده
متولى : وجوزك عارف
صفاء : أيوه عارف وحيروح يفطر عند أمه وحياخد غسيله معاه
متولى وهو يجز على أسنانه :أهلا... أشوف أيه حكايتك لما أرجع
-**-
يعود متولى من عمله ويقوم السائق بحمل الطلبات إلى المطبخ تحت أشراف الست تفيدة وهى تراجع على جميع المشتريات وتبدى ملا حظاتها للسائق ومتولى ينفخ من الغيظ
تفيده : الكرنب دبلان ومفضى من الورق ..ضحكوا عليك يأسطى فوزى
فوزى :مفيش كرنب فى السوق يامدام أنا جيبت دول بالعافيه
تفيده : يعنى ما تنفعش ترجعهم وتجيب أتنين كويسين
يتدخل متولى : لأ مش حيرجعهم ياتفيده...لآ حيرجعهم يا متولى ..مش حيرجعهم ..لأ حيرجعهم
فوزى : بس خلاص ..ينعل أبو الكرنب وسنينه أنا حاخد الكرنب لمراتى فى البيت
وآدى حق الكرنبتين ..وأنا مش جايب طلبات تأنى أنا شغلتى من البيت للشغل والمأموريات
متولى : عاجبك كده يا ست تفيدة خليتى الواد الجربوع نطق.. يوجه كلامه لفوزى
أنت نسيت نفسك لولا أنا عينتك فى المصلحة كان زمانك لسه قاعد بعسليه فى الشارع ..أخص عليك جنس نمرود
فوزى : مش قصدى يامتولى بيه أنا من تعبى الست طلعت أفلاسى روح وتعالى وتعالى وروح وفى الأخر مش عاجبها وناسيه أننى صايم
متولى : أمشى روح يا فوزى وما تورنيش وشك ..لينا حسابنا بكرة فى الشغل
فوزى يشوح بيده ويضرب كف على كف وينصرف
بورسعيدى 08-09-2008, 02:48 AM السلام عليكم ورحمة الله وبركاته
شكرا لكم جميعا على مروركم الكريم ومشاركاتكم الجميله
انا آسف جدا انى مش هاقدر اقوم بالرد على كل مشاركه نظرا لديق الوقت
وياريت تسامحونى لانى بارجع من العمل متأخر وبيكون الوقت المتبقى على السحور واذان الفجر قليل جدا
كل سنة وانتم طيبين
ونلتقى دائما على حب وود وسعاده
ولكن تأكدوا جميعا اننى وسط مشاركاتكم باكون فى اسعد اوقاتى
اوركيديا 08-09-2008, 05:31 AM جميله قوى يا استاذ بورسعيدى
و اكيد عاذرين حضرتك
و مستنين الباقى
فى رعايه الله
zizo2_2 08-09-2008, 05:48 AM يا عم بورسعيدي لازم ترد على مشاركتي مخصوص :p
هو انا اي حد
هههههههههههههههههه
بجد انت رائع
في انتظار جديدك لنستشنشق روعة وجمال مواضيع بورسعيدي
Dr.diamond 08-09-2008, 12:10 PM شكرا استاذ بورسعيدى عاليوميات الجميله دى
متابعين معاك باذن الله
lover rose 08-09-2008, 04:06 PM بصراحه حلقاتك عسل خالص
مستنيه التالته بقى
مقولتليش هما كام حلقه؟؟؟!!!
mannon the moon 08-09-2008, 04:11 PM جميل اوي
انا متابعه معاكوا
msamido 08-09-2008, 04:15 PM فى انتظار باقى الحلقات
وكان الله فى العون يا استاذ بورسعيدى
.
.
بورسعيدى 09-09-2008, 02:54 AM (3)
صفاء عدوة التكنولوجيا
صفاء : بابا ..بابا أصحى أصحى المدفع ضرب ياله علشان تفطر
متولى : أنا صحيت أهه ..صوت مين أللى بره بيتكلم مع أخوكى
صفاء وهى مرتبكه : ده ددد هشام جوزى لسه جاى دلوقتى
متولى : وأيه أللى جابه بسلامته
صفاء : أبدا أصله لقى الميه عند مامته مقطوعه فراحت عند بنتها دينا
متولى : أبتدينا ياله ربنا يقوينا على عاميلك وعمايل سى هشام بتاعك
( بعد الفطار يجلس هشام أمام متولى لتناول الشاى )
متولى : أيه حكاية الغسالة بتاعتكم أللى كل شويه بتعطل دى
هشام : صفاء هى السبب ياعمى ؟؟
( تخرج صفاء من الحجرة المجاورة وهى مندفعة كالصاروخ وتمسك بياقة قميص هشام )..أنا قولت لك ألف مرة مش أنا السبب ..أنا ما دخلتش جوه الغساله علشان تبووظ هى أللى ماركتها زباله ..وكل الناس بتشتكى منها
(هشام يتخلص من قبضة يد صفاء وهو يرد عليها فى عند طفولى )..أيوه أنتى أللى بوظتيها
يزداد صراخ صفاء وتكاد تفتك بهشام لولا تدخل متولى
متولى : طيب نعرف من هشام أزاى صفاء بوظت الغساله
صفاء : ماتقولش يابابا أنى بوظت الغساله هئ هئ هئ
هشام : الغساله بتا عتنا فول أوتومتيك بتغسل 5كجم فقط من الغسيل ..ينفع ياعمى نحط فيها غسيل وزنه 10 كيلو
متولى : لآ ما ينفعش
صفاء ( وهى تصرخ ) : يا مفترى يا ظالم أنا بحط فيها 10 كيلو
هشام : بلاش أنا... فاكره المهندس أللى جه يصلحها آخر مرة قاللك أيه ..قالك الرحمه يا مدام ماتقرصيش على الغساله
صفاء : ده صاحبك وأنت أللى ملقنه بالكلام ده ..وقعد يشكر فى ماركة الغساله كأنه أنت أللى بتتكلم ..ما كلش أنا من شغل الأونطه بتاعك
هشام : أنا بتاع الأونطه يا عدوة التكنولوجيا
متولى : بس انت وهي سيبين بيتكم وجيين تتخانقوا هنا ..حرام عليكم أرحمونا
أسمع يا هشام أتصرف بيع الغساله القديمه وحطها مقدمه لغساله جديده بالقسط
وبلاش البهدلة دى
هشام يطرق إلى الأرض فى خجل : أنا مش عارف أقول لك ياعمى ..
متولى : قول يا حبيبى ما تكسفش ..أصلك وش كسوف قوى
هشام : الحقيقة ياعمى عايز حضرتك تدفع لنا المقدمه وعلينا أحنا الأقساط
متولى : يابنى ما قولتلك بيع القديمه وحط فلوسها مقدمه
هشام : ما هو أنا بعتها
متولى : وبعدين
هشام : ولا قبلين ..بنتك ضيعت فلوسها فى البيت
متولى : خد البنت دى بعيالها وماتورنيش وشكم يانصابين يا أعداء التكنولوجبا
دى تانى غسالة أشتريها وتانى تليفزيون وتانى مكنسه
هشام وصفاء : أنت البركة ياحج ويجعله عامر http://www.haridy.com/ib/images/smilies/old.gif
Dr.Nobel 09-09-2008, 03:04 AM هههههههههههههههههههه
جميلة اوى الحلقات بالذات الحلقة التالتة دي
ههههههههه
شكرا لحضرتك
ومستني الباقي
msamido 09-09-2008, 12:59 PM ههههههههههههههه
شكله بيتثبت ؟
.
.
اوركيديا 09-09-2008, 02:33 PM حلوه بجد الحلقات
و متابعين حضرتك على طول
فى رعايه الله
Dr.diamond 09-09-2008, 02:40 PM حلوه جدا استاذ بورسعيدى
متابعين مع حضرتك
happ_cat7 09-09-2008, 05:11 PM اولا احب انك تتقبل مروري
وبجد كان نفسي اشترك معاك قبل ماتنزل بالحلقة الاولي بس انا اسفة لسه جديدة بقي
لكن بجد الموضوع حلو اوي
والحلقة الاولي جميلة اوي
وياريت تكملنا باقي الحلقات
احنا مش هنستعجل عليك
براحتك خالص
عاوزينك بقي تبدعلنا وتحط اجمل حلقات
انا عارفة ان الموضوع ده هيكسر اادنيا
وشكرا تاني ليك عالموضوع
وربنا يوفقك
وتقبل مروري
بورسعيدى 09-09-2008, 11:30 PM شكرا لكم على المرور والتعقيب والاعجاب
اليله ان شاء الله انزل الحلقة الجديده
ZAHIMR 10-09-2008, 01:23 AM هههههههههههههههههههههههه
حلوة اوى والله
دايما مواضيعك جامدة بارك الله فيك
ومستنين المزيد والاحسن
ZAHIMR 10-09-2008, 01:30 AM ههههههههههههههههههههههههههههه
ههههههههههههههههههههههههه
التالتة جامدة مووووووووووووووووووووووووووووت
بورسعيدى 10-09-2008, 04:47 AM (4)
حريقه فى المنور
النهارده حر قوى والناس صايمه وكل من عنده تكييف فتحه على الآخر ليستمتع بالنسمات البارده التى تعينه على تحمل الصيام وزاد ضجيج الأجهزة بعد أن فتح عبد الصابور أفندى تكييفه العتيق فغطى صوته الجبار على باقى المكيفات الدليكاه
ذات الصوت الهادئ ..وأغلقت النوافذ بشدة من باقى الجيران أحتجاجا على هذا الصوت المزعج وكأنه وابور زلط يهز جدران العمارة
وفجأة يتصاعد الدخان ولهيب النيران وأصوات الأستغاثة من شقة عبد الصابور
تفيده : ألحق يامتولى العمارة حتولع أجرى شيل ولاد بنتك وأنزل الشارع
متولى : أستنى ياتفيده أملئ كام حلة ميه ندلقهم على النار يمكن تطفيها وأنزلى أنتى والعيال على الشارع يارب أستر
يتكاتف السكان ويقوموا بقذف الماء على التكييف الجبار المشتعل وكل ما تسمع صوت تش تش يتبعها شتيمه ودعاء الله يخرب بيتك يا عبد الصابور
أحد السكان المشتركين فى الأطفاء ..أتصلوا بالمطافى ياجماعة
واحد آخر : فيه حد فى الشقة
جار ثالث يسكن فى آخر دور : أنا شايف من عندى عبد الصابور وعياله واقف عمال يلطم فى الشارع
جاره رابعة بعد أن تقذف المياة : الله يخرب بيتك خراب مستعجل يا عبد الصابور أنت ومراتك ..مش عايزين يسمعوا الكلام كل ما نقول لهم شوفوا حل للتكييف المقرف ده ده بيطلع شرار ودخان يردوا بسفالة وقلة أدب ..يارب يولعوا معاه ونخلص منهم
جار الدور الأخير : الحمد لله المطافى وصلت
تقوم المطافى بأخماد الحريق بعد أن ألتهم نصف شقة عبد الصابور أفندى ويقوموا بأخلاء السكان الذين تجمعوا فى مدخل العمارةيريدون أن يفتكوا بعبد الصابور وزوجته أثناء أخذ الأقوال لتقفيل المحضر
الضابط : هل هذا الحريق بفعل فاعل
عبد الصابور : أيوه ياباشا بفعل فاعل
الضابط وهو مندهش : تتهم مين يكون حرق لك التكييف
عبد الصابور : أتهم كل السكان أللى بتطل شبابيكها على المنور
الضابط : أكلم كلام معقول ياراجل أنته أنت بتتهم أكتر من عشرين ساكن بالحريق المتعمد ودى جنايه حنحولك أنت وهمه على النيابه ركز معايا مين أللى تعتقد يكون هو السبب فى الحريق
عبد الصابور :الأستاذ متولى أللى ساكن فوقيه والحاج فتحى ومدام جورجيت
الضابط : السكان بيقولوا أن التكييف بتاعك بايظ وكان بيطلع شرار وأنهم نبهوك أكتر من مره علشان تصلحه
عبد الصبور : ما حصلش ..كان كل همهم أن التكييف بتاعى صوته عالى ماهو كل التكييفات عامله دوشه هى جت على تكييفى ..أكيد ياباشا واحد من التلاته حدف عليه حاجة ولعته
الضابط : حاجة زى أيه يعنى
عبد الصابور : جاز ولآ بنزين ولا ورقه مولعة أو ميه تسببت فى ماس كهربى
الضابط : حيبان الكلام ده بعد فحص اللجنه الفنيه
أغلق المحضر فى ساعته وتاريخ وتشمع شقة المدعو عبد الصبور شبيطه لحين حضور اللجنه الفنيه للمعاينه
يحضر المذكورين إلى قسم الشرطه لأستكمال المحضر
السكان :الله يخرب بيتك يا عبد الصابور..أكتر ما تخرب
متولى : ممكن ياحضرة الضابط نيجى بعد الفطار ده فاضل عليه ربع ساعة
الضابط : أوكيه ما فيش مانع
متولى : ياله ياعبد الصبور هات العيال ولم حاجتك وتعالى أفطر معانا
عبد الصبور : لالالالا متشكر قوى ياأستاذ متولى
متولى : ما تفتكرش أنى خايف من الكلمتين الخايبين أللى كتبتهم فى المحضر..علشان كده أنا أنا باأدعيك للفطار ..قوم ياراجل من الشارع
دى عشرة 30 سنه مايصحش
( ينظر عبد الصبور إلى زوجته وفى عينه تساؤل ..أيه رأيك ؟؟ فتشير له فى الخفاء بالموافقه )
عبد الصبور : أن ماكنتش تحلف يا متولى بيه ..أنما بالمناسبه أنتم طابخين أيه على الفطار النهارده ؟؟؟؟؟
ملكة العرب 10-09-2008, 06:01 AM شكرااااا ليك
msamido 10-09-2008, 02:16 PM يا سلام عليه
والله شكل متولى ده راجل أخلاق
لسه بيتهمه ويعزمه على الفطار
بنجدد الشكر يا استاذ بورسعيدى مع كل حلقة
بس ايه حكاية الإعادة دى ؟؟؟
.
.
ahmedyousry 10-09-2008, 02:32 PM ههههههههه ....موضوع جميل ومتابعنكو فى باقى الحلقات ان شاء الله
معهد اسكندريه 10-09-2008, 02:49 PM بجد قصه جااااااااااااااااااامده
ننتظر الجزء الثانى
باااااااااااااااااااااااى
بورسعيدى 10-09-2008, 08:48 PM شكرااااا ليك
العفو
شكرا للمرور والمتابعه
يا سلام عليه
والله شكل متولى ده راجل أخلاق
لسه بيتهمه ويعزمه على الفطار
بنجدد الشكر يا استاذ بورسعيدى مع كل حلقة
بس ايه حكاية الإعادة دى ؟؟؟
.
.
ونجدد الترحيب بيك يا بطل
كل سنه وانت طيب
حكايه الاعاده دى لان الموضوع اتنقل وحبيت انزل اعاده بـــ حلقة واحده فى الركن العام علشان الاعضاء تعرف المكان الجديد للموضوع ووضعت الرابط لكن الاعاده هى كمان اتنقلت
انا كنت عايز اريحكم من البحث عن المسلسل لكن بقا تقول ايه
ايييييييييييييييه
على العموم نورتنى يا ميدو
.
.
:p
بجد قصه جااااااااااااااااااامده
ننتظر الجزء الثانى
باااااااااااااااااااااااى
والجزء التانى جاى اليله ان شاء الله
بااااى
themoondream 10-09-2008, 09:27 PM ههههههههههههههههههههههههههههههههههههههههههه
انا طول ما انا بقرأ الموضوع ما بطلتش ضحك
ميرسى على المسلسل الروعة ده
انا ان شاء الله هتابعه ( هو يستاهل )
كل المسلسلات اللي على التلفزيون كئيبة
هى دى الحاجات الحلوة
بورسعيدى 10-09-2008, 11:41 PM الحمد لله ان الحكايه عجبتك
وحالا انزل الحلقة الجديده
بورسعيدى 10-09-2008, 11:45 PM الحمد لله ان الحكايه عجبتك
وحالا انزل الحقلة الجديده
بورسعيدى 10-09-2008, 11:47 PM تفيده : الراجل ومراته يتهمونا بأننا حرقنا تكييفهم وتيجى أنت تعزمهم على الفطار
ده أنا هاين عليا أحطلهم سم هارى ونخلص منهم
متولى : قلبك أبيض يا تفيده ..لو عاملنا الناس بمعاملتهم الدنيا حينعدم فيها الخير
وما تنسيش أن أحنا فى شهر رمضان شهر الخير والرحمه ومش تفيده بنت حسب الله أللى تعمل كده ..قومى جهزى الأكل ..وحسك عينك يبان عليكى أنك متضايقه منهم..لأنك حتضيعى الثواب
تفيده : حاضر حا قوم أخدهم بالبوس والأحضان..ده أنت راجل غريب !!
متولى : تفيده أتلمى مش عايزين نفرج علينا الناس
تفيده : ياعالم حتجنن فيه حد فى الزمن ده يعمل كده ..وكمان الراجل أللى أسمه عبد الصبور ما صدق وعمال يحول ****يبه قدام باب شقتنا أحنا ناقصين كركبه
وأهى دقنى أهيه لو أتنقل من هنا
متولى : ما تكبريش الموضوع كلها بكره بالكتير ويفتح شقته
تفيده : موت ياحمار ده يوم الحكومه بسنه
( تدخل عائلة عبد الصبور من باب الشقة وكل واحد يحمل فوق كتفه شنطه أوسره أو جهاز كهربى )
تفيده : أستنوا هنا رايحين فين حطوا حاجتكم بره لحد ما تفطروا ..أنما قوللى ياست أم مجدى أنتم لحقتم تلموا حاجتكم أزاى وتحطوها فى شنط والدنيا مولعه
أم مجدى : يا ختى ده أحنا سايبين حالنا ومالنا كله فى الشقه ده غير أللى أتحرق
تفيده : أيه ده أتنين تليفزيون بالرسيفر والطبق وبتقولى مالحقناش نلم حاجة..(تفيده وهى تتهكم عليهم ) طب كفايه تليفزيون واحد وكنتوا جيبتوا مكانه
التلاجه ولا الغساله
أم مجدى : التليفزيون الصغير ده أبيض وأسود ... بتاع عبد الصبور مايقدرش يستغنى عنه ممكن يطلقنى أويرمينا كلنا فى النار بس ما يسبوش ..التلاجه كانت أول حاجة طلعناها لأنها جديدة وعليها أقساط.. الغسالة ولعت لوحدها ربنا ما يوريكى يا حبيبتى
تفيده : حبيبتك (فى سرها ربنا يهدك ) الله يسامحك يا متولى هى الجبانه نا قصة ميتين..أقعدى أنتى وعيالك هنا لحد ما حط لكم الفطار..الصبر من عندك يارب
مجدى : تنت ..ممكن بيبسى مع الفطار
تفيده : حاضر ياروح تنت ..طالع تنك زى أبوك
مجدى : ريحة أكلكم حلوة قوى ممكن أعرف أنتم طابخين أيه على الفطار
تفيده : المدفع هيضرب وحتعرف ؟؟ ( تتكم البلاوى
أم مجدى : أيه ياواد أللى بتقوله ده ..تنت ريحة أكلكم حلوة ..هى أمك ريحة أكلها وحشة ولا أيه يالى ما بيتمرش فيكم أنت وأبوك
مجدى : أسكتى ياماما خلى الطابق مستور ..ده كويس أن أحنا عايشين ..أحنا جالنا حول من شويه ولا الحساسيه أللى على صدرنا عايزه تروح
أم مجدى : أمشى تك مشش..ياريتكم كنتم ولعتم وخلصت منكم
(تفيدة من الداخل وهى سامعة الحوار فترفع يديها للسماء: يارب ..
يجتمع الكل على مائدة الأفطار.. متولى وزوجته وأولاده ..وعائلة عبد الصبور
محمود : حتعمل أيه فى المحضر يا أستاذ عبد الصبور
عبدالصبور( وهو يأكل بشراهه):الله أكلك حلو قوى ياست تفيده ناولينى سلطانية الطرشى من عندك
تفيده وهى فى قمة غيظها : خد ماطرح مايسرى( يهرى فى سرها ) يعنى ماجاوبتش يا عبد الصابور أفندى حتعمل أيه؟؟
عبد الصبور : العمل عمل ربنا
عائلة متولى فى نفس واحد : بتقول أيه ؟؟
عبد الصبور يتوقف عن مضغ الطعام ويبلع ريقه : قصدى طب أتهم مين يعنى
متولى : مش لازم تتهم حد قضاء وقدر ياأخى دى عايزه فقاقه
عبد الصبور : أمال مين يدفع تعويض الحاجات أللى أتحرقت ؟؟؟
متولى : عوضك على الله يا سيدى وكفايه أن ربنا نجاك أنت وعيالك
عبد الصبور : أنا عندى أقتراح ..بما أنك يا متولى يا خويا رئيس أتحاد الملاك
ياريتك تعمل أجتماع للسكان وتقدروا التلفيات وتدفعوها أنتم وأنا راضى بالتقسيط
وأروح القسم وأتنازل عن المحضر
متولى : مش حندفع حاجة وخلى المحضر ينفعك ..ثم يقوم غاضبا من على الأكل
عبد الصبور : دى أكلتك ضعيفه قوى أنت صايم طول النهار
متولى : نفس أتسدت
عبد الصبور: فيه حد ياكل الأكل الطعم ده ونفسه تتسد أقعد ياراجل ده زى بيتكم هههههه...ههههههه
وبعدين ياسيدى ما تزعلش أنا بأضحك معاك لو أصر الضابط على متهم حاكتب أسم أم مجدى وأسم الواد التحش ده ..المهم أنك ماتزعلش
أم مجدى : والله ياعبد الصبور حاروح القسم وأحكى ليهم حكاية التكييف أللى شاريه حته حته من وكالة البلح أخليهم ياخدوك ويخلصونا منك
تفيده : أحسن برضه
عبد الصبور يضحك ضحكه بلهاء : الحلو أيه ياحاجه تفيده ؟؟
تفيده : كفايه عليك شاى سادة ..قوموا بقى علشان عايزين نلم السفرة
عبد الصبور وهو يتكلم بجديه : خلاص يامتولى ياخويا أنا رايح أتنازل عن المحضر وعوضنا على الله ..الحلو بقه ياحاجه تفيده
تفيده: أمرنا للله حطى الكنافه قدامه يا صفاء ..
ZAHIMR 11-09-2008, 03:07 AM هههههههههههههههههههه
يتنازل عن المحضر عشان كنافة ههههههههههههههه
بصراحة راجل طفس
حكاية جميلة جدا جدا
ياستاذ بور سعيدى
بارك الله قيك
aquavia 11-09-2008, 03:55 AM بصراحة هى القصة حلوة بس شديدة اللهجة
يا ريت تخف لهجتها شوية
msamido 11-09-2008, 10:14 AM هههههههههههههههههههه
جامدة جدااا الحلقة دى يا استاذ مجدى
..
بورسعيدى 12-09-2008, 03:00 AM العزومه
تفبده: أسمع يامتولى الراجل اللزقه هو ومراته وعياله مش حيسبونا فى حالنا وبكره عزومة نسايب أبنك المكان مش حيكفى ولا حنلاقى كراسى نقعدهم عليها
متولى : والعمل يا تفيده
تفيده : أنا بأقول تتصل بالمعلم عطوه بتاع الفراشه يبعث لينا دستين كراسى وكام ترابيزه وطقم سرقيس زى ما عملنا يوم خطوبة زينات وياريت فرع نور وكشافين وسورة كل أعوذ برب الفلق وحنفرش قدام باب الشقه أو نعمل العزومه فوق السطوح
متولى يضرب بكفيه فوق رأسه : فراشه يا تفيده أنتى عامله عزومه ولآ فرح أنتى عايزه تجننينى ياست أنتى
تفيده : طب أتصرف أنت
متولى : ما ينفعش ناكل على دفعتين تلاته وأللى ياكل يقوم
تفيده : أنت عايز تفضحنا مع نسايب الواد مش كفايه النصيبه السوداء أللى جايبهلنا عبد الصبور وأولاده
متولى يمسك رأسه وهو يستسلم : للله الأمر من قبل ومن بعد ..يبقى بالمرة أعزمى أختى عائشه أللى ساكنه جنبنا مش معقول تشوف الكهارب والفراشه ومنعزمهاش
تفبده : وماله يا خويا علشان خاطرك ..رغم أنك عارف مابتنزليش من زور
علشان الورد ينسقى العليق
متولى : مش عايز مشاكل ياتفيده مع أختى وعيالها
تفيده : أنا ماليش دعوه بيها بس ياريت هى تلم لسانها ..وبعدين أيدك على 500 جنيه كمان علشان حنزود الأكل لأختك وضيفك المحترم عبد الصبور أفندى وأنجاله
متولى : آه يادماغى ..كفايه ياتفيده أحسن ضغطى على
تفيده : سلامتك من الضغط ياأبو محمود يا غالى وربنا يجعله عامـــــــــــر
يصل المعازيم بالتتابع قبل المدفع بربع ساعة..
عائلة سحر خطيبة محمود وأخواتها البنات ووالدها الأستاذ وهدان ووالدتها مدام أنتصار ويكون فى أستقبالهم محمود وتفيده على باب الشقة ويصحب محمود سحر من يدها ويتجه بها ناحية البراندة
تتلقى تفيده الزيارة ( علبة حلويات أو كنافة فى الغالب ) من مدام أنتصار وهى تقول: ما كنش له لازمه تتعبى نفسك يا حبيبتى ..كفايه مجيتك
أنتصار : يانهار تبقى عامله الحفلة الكبيرة دى وما تبعتيش آجى آسعدك أنا والبنات
مالكيش حق يا تفيده يا حبيبتى
ويضرب مدفع الأفطار ويندفع المعازيم على السفرة الضخمه التى أعدتها تفيده ( حتتك بتتك )
يقف عم متولى ليدعو المعازيم لصلاة المغرب ولكن ما من مجيب فيشق صيامه بتمرات قليله ويشرب جرعة ماء وهو يقول فى نفسه :فعلا ساعة البطون تتوه العقول وأن للله وأن إليه راجعون ثم يترك الجمع ليصلى
وعندما فرغ من صلاته كانت السفرة بما عليها من مأكولات قد نسفت عن آخرها
تفيده : أقعد يامتولى أنا شايله لك فطورك
متولى : فيكى الخير يا تفيده أنك فكرانى
عبد الصبور :سفرة دايما ياراجل يا طيب ..حاجة أكسترا بجد
متولى : مش خلاص يا عبده الحكومه فتحت لك الشقة من ساعة الظهر
عبد الصبور : الحاجة تفيده بقه مسكت فينا لنفطر معاكم
تفيده فى دهشه : أنا ..أنا
متولى : خلاص ياستى ..أنت نورتنا ياعبده
تجلس زوجة عبد الصبور فى ركن وبجوارها أبنها مجدى وهم ينمون على المعازيم والأكل
أم مجدى : كلت كويس ياواد أنت وأخواتك
مجدى : أنا على أخرى ..بس ماعرفتش آكل من طبق العكاوى أللى فى آخر السفرة
فيه تلات بنات أخوات سحر خلصوا عليه
أم مجدى :يا خبتك كنت قمت جبته منهم ..كنت قلت لى وأنا سحبتهولك
مجدى : هوه أنتى كنت فاضيه ياماما ..عماله تفصفصى وتناولى لأخواتى ولبابا ونسيانى...ماما ..ماما هى مين فيهم عروسة محمود
أم مجدى : أللى واقفه جنب حماتها وفاتحه ضبها على آخره
مجدى : ياليله سوده دى شبه عائشه الكيلانى ياماما
أم مجدى : سد ..سد أحسن أمها جايه ناحيتنا..ياله نقوم كفايه كده
مجدى : أستنى شويه شايف أزايز حاجه ساقعة بيوزعوها هناك
أم مجدى : قوم يافالح هات لنا خمس أزايز خلينا نهضم أحسن الأكله كبست قوى
( تنفض العزومه ويجلس متولى وتفيده فى منتصف الغرفه وقد تهاوى كل منهم على كرسى من شدة التعب )
متولى : أستريحتى ياتفيدة عملتى أللى فى دماغك
تفيدة : بس بذمتك يا متولى مش شرفتك شوف الأكل أتمسح كله من حلاوته وطعامته..تعيش وتعزم ودايما مفتوح بحسك فى الدنيا
متولى : الحمد للله أنتهت على خير وكفايه بقى خلينا نعرف نكمل بقية الشهر
تفيده : حماة أبنك عايزه ترد العزومه وطلبت منى أحدد لها يوم الأسبوع الجاى
متولى : كفايه كفايه حرام عليكى أنا لا عايز أعزم ولآ أتعزم أرحمينى ..خدى أبنك وروحى أنتى مالكوش دعوه بيه أنا فى عرضك
msamido 12-09-2008, 10:02 PM بيت مصرى فعلااااااااا
شكرا استاذ مجدى
.
.
بورسعيدى 13-09-2008, 03:06 AM الحلقة الى جايه علشان خاطر عيون ميدووو
لانه اكتر واحد مواظب الى متابعة المسلسل
بورسعيدى 13-09-2008, 03:09 AM أنفجار زوج مع مدفع الأفطار
أنطلق الآن مدفع الأفطار ..أذان المغرب حسب التوقيت المحلى لمدينة القاهرة بصوت الشيخ...
بوم×طاخ... بوم ×طاخ بوم بوم بوم ..يالهوتى يالهوتى ..ألحقونا ياناس.. بوم طاخ
دب وصريخ وصوات وهبد.. ورزع ومع كل هبده وكل رزعه صوت حريمى يطلب الأستغاثه ألحقونا ياناس حيموتنا المجرم أبن ..أبن...وأبن ..آى آى أوه ..يالهوى
تفيده: ألحق يامتولى ده صوت( حسنيه) أللى فوقنا الواد جوزها المجرم بيضربها ..بسرعة يا متولى دى زى بنتك برضه ويتيمه ومالهاش حد يوقف الوحش ده عنها
متولى : الواد ده غبى ومش عايز يجيبها البر ..وهى بنت مستفزه مش عايزه تتلم
والعيال ضايعة بينهم ..ربنا يستر
تفيده : بسرعة يامتولى أطلع له قبل ما يموت البنت ..يا حبيبتى يابنتى ..الخبط والضرب ده كأنه فى جسمى أنا (تفيده أغرورقت عينيها بالدموع ) ..رجاله عايزه الحرق..لو بنتى كنت علقته من رجليه وعرفت أزاى أربيه ..علشان يتيمه ومالهاش حد ..أخص عليه راجل ناقص مابسرعة يامتولى أنت بتدور على أيه هناك شبشبك أهه
محمود : أطلع معاك يابابا
متولى منزعجا : أوعى تطلع أنت بالذات
محمود : قصدى أن الواد ده يمكن يقل أدبه معاك
متولى : مالكش دعوة أنت أنا بأعرف أتصرف معاه ..مش عايز مشاكل
****
يصعد متولى درجات السلم بسرعه فيجد حسنيه بملابس البيت وتجلس على سلمه الدرج وتحتضن طفلتيها والدماء تنزف من فمها وأنفها وهم يرتعشون من الرعب والخوف والألم والضياع منظر مأسوى ..وقد أغلق زوجها الباب بعد أن طردهم خارج الشقة وقد ألتف حولهم بعض الجيران وهم يحاولون أسعاف الأم وتهدئة الأطفال وآخرين يدقون على الباب ليفتح الزوج لتعود زوجته وأولاده إلى الداخل ..ولايستجيب لهم ويصرخ بأنه سيقتلهم جميعا لو دخلوا الشقه
حسنيه أطلبوا لى بوليس النجده أطلبوا لى الأسعاف..تتحمس السيدات وحياتك يابنتى من أول بوكس وصرخة أنا أتصلت ببوليس النجدة لأنى أنا عارفه غباوة جوزك ..ربنا على المفترى الظالم يبهدلكم فى الأيام المفترجه دى منه للله
جاره أخرى أشد حماسا : يفتح هوه بس الباب وأنا أقطعه بسنانى دول
متولى : خلاص ياجماعة لو سمحتم كل واحد يدخل شقته يفطر وأنا حتصرف
وأنتى يا حسنيه قومى أتسندى معايا ننزل تحت عندنا تفطرى مع خالتك تفيده
على ماشوف أيه حكاية جوزك ده ..الواد ده أتجنن ولآ أيه..قومى يابنتى هاتى عنك البنت الصغيرة
يدخل متولى شقته وهو يقود ركب( حسنيه) الحزين لتناول الأفطار المنصوب على السفرة الذى لم تمتد إليه يد
تفيده ( وهى تبكى وتحتضن حسنيه): تعالى يابنتى ياحبيبتى..(فتجهش حسنيه بالبكاء فيرتفع صريخ طفلتيها مشاركة من هن لبكاء أمهم)
محمود : خديها ياماما جوه تغسل دماغها وتشوفى لها أى حاجة للكدمات أللى فى وشها والدم أللى بينزل من مناخيرها وخدى العيال دى معاكم هدوهم ..لآحول ولا قوة ألا بالله
(وبعد فترة تعود تفيده ومعها حسنيه وأولادها لتشارك عم متولى أفطاره وهى مضمدة الجراح مكسورة الجناح )
لكن هناك سؤال يطرح نفسة
ايه سبب الخناقة ؟؟
هذا ما سنعرفة فى الحلقة القادمه
msamido 13-09-2008, 03:30 PM فين الفاصل الإعلانى يا أستاذ مجدى
مبقاش ينفع مسلسل من غير فاصل إعلانى اليومين دول
صدقنى لو فتحت باب الإعلانات هتكسب كتييير
شكرا للحلقة يا استاذى وحضرتك عارف أى حاجه منك تستحق المتابعة .
.
.
بورسعيدى 14-09-2008, 02:20 AM عشت لى وعاش مرورك الكريم
حالا الحلقة الجديدة
بورسعيدى 14-09-2008, 02:51 AM أيه سبب الخناقه ؟؟
متولى : أحكى لى يابنتى سبب الخناقة لأعرف مين فيكم الغلطان
حسنيه وهى تمسح دموعها : أنت عارف ياعم الحاج أن( شوقى )خريج كلية التربيه الرياضيه وبيشتغل معايا فى نفس المدرسة مدرس ألعاب والماهية بتاعته صغيرة بالمقارنه بباقى المدرسين فبيشتغل بعد المدرسه فى نادى الزمالك بيدرب فريق الناشئين تحت 16 سنه لكرة اليد ..فشل أنه يعمل فرقة تقدر تنافس فى دورى الناشئين فأقالوه وخيروه بين الطرد أو يعمل كأدارى
متولى : لحد كده كويس الراجل بيجرى على أكل عيشه
حسنيه : قلنا رزقنا كده والحمد للله ..لحد مافى يوم ما طلعلتوش شمس واحد صاحبه فى النادى فى فريق الملاكمه كبرها فى دماغه أنه ممكن يتدرب معاهم وينضم للفريق ومستقبل الألعاب الفرديه مضمون وخاصة أنه جسمه جامد وزى الحيطه ينفع فى اللعبه دى وتسكت حسنيه وهى تمسح الدم الذى سال من أنفها
متولى : كويس وبعدين فين سبب الخناقة ؟؟
حسنيه : ما أنا جيالك أهه ياحاج..فضل شوقى يتدرب مع الفريق وكل ليله أشتغله ممرضه أفضل أعالج فى جروحه وكدماته ومش كده وبس يقوم كل يوم الصبح يشرب لبن العيال ويأكل فطارنا قال أيه بيغذى نفسه ..قلت يا بنت سيبيه ياريت يكون بفايده
متولى : مالوش حق ..بس أنتى أصيله يا حسنيه
حسنيه : جائت أجازة الصيف فكل يوم يأخذنا أنا والعيال معاه النادى وهو بيتدرب
ومنها فرصة العيال تلعب وتتهوى وكنت شايفه المدرب دايخ معاه وهو بيوجهه أن يسمع تعليماته لكن مافيش فايده..لحد ما دخل الدورة الصيفيه للأقاليم
وقعدنا نتفرج عليه كل ليله وهو بينضرب ويخسر ونرجع نربط فى وشه ودماغه من الأصابات والكدمات أللى ملئت جتته الحقيقه كان صعبان عليا أللى بيعمله فى نفسه أنما تقول أيه مخه زى الجزمه القديمه لحد أمبارح كان عنده ماتش مع بطل المنوفيه ..جدع أيده زى المرزبه هاراه ضرب والمدرب عمال يصرخ فيه أرفع أيديك ياشوقى ..أبعد عنه ياشوقى ..أحمى وشك ..يمين شمال ومفيش فايده الواد المنوفى بهدله..ماطقتش أللى بيحصل والماتش شغال نطيت جنب الحلقه وقعدت أشجعه غطى وشك ياشوقى أضرب ياشوقى أرفع أيدك زى مالمدرب كان بيقوله
المتفرجين قعدوا يضحكوا وينادوا عليه أسمع كلام مراتك ياشوقى ..شوقى ساب الماتش وقعد يشتم فيه وفى المتفرجين وهوب الواد المنوفى خده كام ضربه فى وشه على نوك أوت على خطافيه شمال على مستقيمه يمين لبست فى وشه ..وألاقى شوقى ده بيلف حولين نفسه ويسقط على أرضية الحلقة مغمى عليه قمت راقعه بالصوت وطلعت على الحلقه أطمن عليه..المهم فوقوه وجه المدرب وطبطب عليه
وقاله شوف لك يابنى لعبه غير دى, يكون أحسن لو مسكت غرفةالملابس
متولى : لو الحال كده يابنتى يبقى المدرب له حق ..كملى
حسنيه : سندته ومعايا العيال ووقفنا تاكسى من قدام النادى علشان نروح..يقوم سواق التاكسى يزود الطين بله لما شاف وش شوقى شوارع كلها مقبات
سائق التاكسى :الله الله خير ياأستاذ أيه أللى عمل فى وشك كده
حسنيه : حادثه يا خويا حادثة..سوق وسيب الجدع فى حاله
سائق التاكسى (يسكت قليلا ثم يعاود النظر إليه وهو غير مصدق) حادثه مش ممكن تكون حادثه منظرها خناقه ...بس حالتك وحشه قوى
شوقى : سوق يا أسطى وخليك فى حالك
سائق التاكسى يعاود النظر لشوقى وهو يقول :لوعايز أطلع على قسم الشرطه أو المستشفى أنا تحت أمرك منظرك كده واخد علقه جامده
شوقى يصرخ فى السائق : أقف هنا يا جزمه قلت لك مالكش دعوة طب خد..وبعزم مافيه من غضب وغيظ يضرب سائق التاكسى بوكس يرميه خارج السيارة
يجرى السائق ويفتح الشنطه ويستخرج حديدة الخناقات بتاعة السواقين ويضرب شوقى واحده فى دماغه ..أصوت والعيال تصرخ أتلمت الناس وخدونا على القسم ..الضابط كان أبن حلال وأصطلحنا وروحنا أنا وهو والعيال فى البوكس لحد البيت لأن الضابط طلع زملكاوى
متولى وهو يضحك : شر البليه ما يضحك وبعدين ياحسنيه أيه أللى هيجه تانى ساعة الفطار
حسنية وهى تبتسم فى خبث : أبدا والله ياعم متولى ..أنا حطيت الفطار على السفرة
فبص مالقاش غير حتت لحمه وشوية شوربة خضار
فقال لى فين الكبده والكلاوى والأكل المخصوص بتاعى ..فقلت له خلاص ياشوقى كل أللى قدامك لحد ماصحتك تتحسن..قال لى قصدك ايه ؟
ياحسنيه ..قلت له فضها سيرة يا شوقى من الملاكمه خلينا نربى العيال بدل البهدله وقلة القيمه وكل يوم علقة ..أنا قلت كده ياعم الحاج وعينك ماتشوف ألا النور قلب علينا السفره وجرى ورايا يضرب فيه بالبونيات لحد ماكسرنى ولولا أنا كنت بارفع أيدى وأحمى وشى كان زمانه موتنى لحد ما قربت على باب الشقه قمت فتحاه ونفذت بجلدى.. العيال تصرخ فرماهم بره ..أنا كده غلطانه ياحاج
متولى : غلطانه طبعا يا حسنيه ..لأنك لم تراعى الحاله النفسيه أللى بيمر بيها جوزك وكا ن أفضل أنك تقفى جنبه وتواسيه بعد الماتش وعلقة التاكسى
حسنيه : يعنى أنا الحق عليه أنى خايفه عليه ..ده بيبقى صعبان عليا وهو راجع كل ليله مضروب ووشه وارم ويمشى بمنظره ده قدام الناس والعيال وترجع تقول لى أنى غلطانه
متولى :معلش يا بنتى أنا حطلع أشوف جوزك وربنا يسهل نصالحكم على بعض
بس مش عايزك تتكلمى خالص لحد ما تعدى الأمور على خير
حسنيه : أللى تشوفه ياعمى
aquavia 14-09-2008, 03:29 AM مش عارف مين اللى غلطان شوقى لا حسنية؟
حاجة تحير فعلا
شكرا على الحلقة
msamido 14-09-2008, 11:20 AM ستاااااااااااااات مصرية
هنعمل ايه ؟
يا عم ارفع أيدك وغطى وشك أفهم بقى ...
شكرا يا استاذنا
.
.
مس رانيا حسن 15-09-2008, 01:49 PM مشكور استاذ مجدى جميله فعلا
msamido 21-09-2008, 05:03 PM إيه يا استاذنا انت فييين
.
.
|