السلام عليكم ورحمة الله وبركاته
اولا الموضوع منقول لافادة طلبة اولى طب المنصورة
والموضوع عبارة عن نصايح بيقدمها طلبة اكبر مننا وكل واحد بيقول شوية نصايح انا نقلتهلكم وشوفوا اللى يفيدكم ويرفع المعنويات (ياريت )ثانيا لو حضرتك طالب اولى طب مش شرط المنصورة فممكن بردوا تستفيد منها (مع مراعات اسماء المكتبات وهكذا ) ونرجوا ان تعم الافادة الجميع
الاول لطلبه سنه اولى اجمل تهنئه مننا ونورتوا الكليه
لو اتكلمنا عن طلبه طب المنصوره بصفه خاصه
ونبدا معاهم من من اول يوم فى الكليه
طبعا قبلها المفروض تنزلوا الكليه علشان تعرفوا الجدول ومواعيدكم والحاجات دى
طبعا هتحاولوا تنقلوا الجدول من شباك الشؤن لانكم لسه طيبين وعلى نياتكم وهتكون محاوله فاشله لانكم مش هتفهموا حاجه
وبعد م هتتعقدوا هتلاقوا الجدول فى المكتبه العلميه فمن الاول رحوا عليها على طول
بعد كده الجدول هتلتزموا بمواعيد المحاضرات بس لان مفيش سكاشن اول السنه يعنى مفيش بالطو وطبعا دى اول صدمه بالنسبه لسنه اولى اللى نفسهم يشتالوا البالطو وكل الناس اللى فى الشارع تعرف انهم دكاتره_متقلقوش انتوا اللى هترموا بعد كده_
وبمناسبه البالطو فى اماكن كتير بيتباع فيها زى مكتبه الاصيل ومركز النيل فى الجلاء
نرجع تانى للكليه و لاول يوم
فى الغالب بيكون اربع محاضرات وطبعا محدش بيبقى فاهم حاجه دى طبيعى جداااااا
وهتروحوا علشان تذاكروا وطبعا ده مستحيل من غير قاموس
فى قاموس اسمه الرائد دى كويس اوى وبيتشرى من مكتبه الاصيل برده او من العلميه
بالنسبه بقى لنظام الدراسه فى سنه اولى وتانيه زيها اربع مواد
اناتومى_تشريح_ ودى ماده 250 درجه طبعا من اسمها واضح هى بتتكلم عن ايه عن تركيب جسم الانسان من اول عضم وعضلات واورده وشراين واعضاء واماكنها وعلاقتها ببعضها
فيسيولوجى 250 درجه برده ودى ماده who and why? يعنى كل وظيفه من الوظائف الحيويه بتم ازاى وليه بالطريقه دى بالذات

بيو 150 ودى ماده سهله ودرجاتها مضمونه فى اولى ودى بتتكلم عن كيميا جسمنا المركبات المهمه والعناصر اللى الجسم محتاجها
وهستولوجى 150ودى اسهل ودى بتتكلم عن تركيب الانسجه وفيها رسومات وياريت من الاول تذاكروا النظرى من الرسم بيسهلها كتير
طبعا المذاكره بتكون من المذكرات اللى بتتباع فى المكتبات او السناتر اللى فيها كورسات
وبالنسبه للكورسات فانا شخصيا شايفه انها مضره مش مفيده لو حكمت تبقى مرجعات فى الاخر بتكون افيد
هتلاقوا حاجه فى الكليه كده اسمها متحف التشريح دى بيبقى فيه جارات متشغلوش بالكم بيها خالص دلوقتى بنمتحن عليها عملى اخر السنه
بالنسبه للامتحانات فمفيش عندنا امتحان ترم بس فى اعمال سنه ودى بتكون MCQ يعنى اسئله اختيار من متعدد بيكون ليها كتاب لوحده بتذاكروا منه احيانا الامتحان مش بيخرج عن الكتاب واحيان تانيه بيكون من النظرى بس فى المجمل بيكون سهل ومعظم الناس بتجيب درجات حلوه فيه وعليه 20 %
وامتحان اخر السنه دى بيبقى Written وبيكون عليه نص درجات الماده
باقى الدرجات بتكون فى امتحان العملى اللى هو قبل النظرى فى كل المواد ما عدا التشريح
وفى الشفوى وفى درجات على الشيت اللى فى اخر كتاب العملى
وكده خلصت الامتحانات وخلصت السنه نتمنى انها تكون سنه جميله بالنسبه لكم لان اكيد صعب حد فينا ينسى سنه اولى طب

وبالنسبة لجدول المحاضرات ممكن الحصول علية من موقع كلية الطب على الإنترنت
http://www.mans.edu.eg/FacMed/arabic (http://www.mans.edu.eg/FacMed/arabic)


أما ما سأبدأ به الآن ما هى المذاكرة الصحيحة من وجهة نظرك يا طالب الفرقة الأولى ؟؟


المذاكرة الصحيحة

المذاكرة الصحيحة هى نظرة شاملة على الدرس والعناصر والعناوين وفهم ما تحت العناوين وليس حفظة من أول مرة إلا بعض مايحتاج حفظة مثل القوانين وغيرها من الأشياء التى ستقابلها فى الكلية


المواد

فسيولوجى ........ماده فهم وحفظ عناوين وعوامل وليه وايه زى ما الدكاترة قالو قبل كدا
تشريح...............حفظ ورسم وتخيل
هستولوجى ........رسم وحفظ
كيمياء ...............structures



مصيدة الطب

عندما تأخذ محاضرة سواء فهمتها أو لم تفهمها وخد بالك من دى أوى لابد أن تذاكرها بعد عودتك للبيت مباشرة حتى لا تقع فى مصيدة كلية الطب وهى تراكم الدروس.


بعض قواعد المذاكرة من وجهة نظرى

أولا أن تذاكر الدرس ثلاث مرات بنسبة 70 % أفضل من أن تذاكرة مرة واحده بنسبة 100%.

ثانيا اعرف الدرس وعدد صفحاته وعناوينه وما إلى آخرة من هذه الأشياء.

ثالثا اقرأ الدرس قراءة جرايد لا تقف عند موضوع أو كلمه يعنى من الآخر فهم عام للدرس

رابعا اقرأ الدرس الآن بتأنى وبسرعة متوسطة وحدد العناوين وما شبه ولا سيما إذا كنت ممن يحب تلوين العناوين واستخدام الأقلام الفسفور فهذه فرصتك .



الحفظ

يدعى بعض الطلبة أنه لا يستطيع الحفظ وأنه يفهم فقط وهذا إدعاء خاطئ وأرجو من طالب أولى ألا يذكره أبدا وتذكر أنه لولا الحفظ فى سنين التعليم الأساسى المنصرمة ما أتيت إلى هنا .

ولمزيد من الفهم المذاكرة ثلاثة أشياء فهم ثم حفظ ثم مراجعة إذا تخليت عن واحده فيهم فقد تخليت عنهم كلهم واعلم أن أهم مرحلة هى المراجعة ولها موضوع آخر


الحفظ يكون كالآتى


العناوين......أهم شئ


العناوين الجانبية


العناوين الفرعية


لب الدرس


ولك عندى نصيحة يمكنك أن تكتب ملخص ما ذاكرته فى ورقة صغيرة وتعلقها على الحائط فهى أشبه بمراجعة يومية وكلما دخلت غرفتك أو خرجت منها اقرأ هذه الورقة .

وأخير ا تذكر هذه الكلمة أو اكتبها على كراستك فحتما سترجع وتقرأها أنا أعدك بذلك

"كن شجاعا فى مواجهة متاعبك وتأكد أنه توجد دائما فرصة لإصلاح الأخطاء مهما تعقدت "


واعلم أيضا أن الجهد المبذول تسعة أعشار النجاح والعقبة الملازمة للطبيعة البشرية هى ذلك التفاوت العظيم بين قدرة المرء على تصور الآمال وبين قدرته وقوة عزيمته على تحقيقها .

وفى النهاية أرجو أن يستفيد طلبة الفرقة الأولى مما قلته وأن يضع هذا الكلام الذى يقال فى هذا الموضوع موضع الجد حتى لا يقع فيما وقعنا فيه ولا عذر لكم بعد أن أعطاكم الأعضاء حبرتهم فى الكلية والسلام عليكم ورحمة الله وبركاته

طبعا الجدول انت بتدخل على موقعا لكلية وبتختار شئون التعليم والطلاب وبتختار بعدها شئون طلابية وبعيدين دراسية وبتختار بعدها جدول المحاضرات بس الجدول الموجود فى الموقع حاليا مكتوب عليه 2007/2008
مش المفروض ينزلوا جدول 2008/2009 دا اللى ضراحة لسه معرفوش

[quote]ونقول شوية اسئلة واجوبة ونبدا بالسؤال المعتاد
ناخد دروس فى الكلية ولا منخدش واانا هنقلكم كام راى
اولا اهلا بيك يادوك في طب المنصورة
ثانيا بالنسبة لسؤالك
من وجهي نظري ان الدروس وسيلة للمذكره مش اكتر
هيبس بتسهلك المضوع اللي بتذكره وبتوصهلوك بطريقه هتخليك مش تاخد وقت كتيير في مذكرته
ممكن انت لو ركزت في مذكرتك تعوض الدرس
واكيد طبعا فيشرح في الجامعه ممكن يساعدك علي المذكره
بس معظم الدروس بتضيع وقت كتييير جدا
رائ الشخصي ان الوقت اللي انت بتضيعه في الدرس ممكننستغله كمذكره في البيت
.................................................. .................................................. .................

لا مش شرط انك لازم تاخد دروس
بس الدروس بتزيد من فهمك للمواضيع على المستوى العملى
وبيتزيد من سهوله الحفظ والاستذكار على المستوى الدراسي

مش ضرورى انك تاخد دروس بس ده بترجع للحاله النفسيه
ياعنى فيه ناس لازم يفهم علشان يعرف يذاكر
او الناس اللى غاويه الفهم ....وده يبقى لازم ياخد دروس

وناس اخرى ممكن تذاكر و تقدر تفهم نفسها المواضيع من خلال
قراءه الموضوع....

ملاحظه اخيره خلى بالك الدروس حاجه زي الادمان لو بدات فيها
مش هاتعرف تسيبها تانى ... وهاتتعود عليها

والدروس مش عيب ولا حاجه لان اغلب الدفعه بتاخد دروس ...
وده شي طبيعي عندنا فى كليه الطب

اتمنى اكون افدت
وفعلا كلمة ان الدروس ادمان سمعتها من ناس كتير اوى بيقولوا هتبدا دروس يبقى مش هتخلص
.................................................. .................................................. .........................................
وانا نصيحتي لطلبه لسنه اولي

انهم يزاكروا من اول يوم وميحاولوش ان حاجه تتراكم عليهم

طبعا هيلاقوا صعوبات كتير في الاول وخاصه اللغه

بس الموضوع ده مش بيطول يعني بالتعود كل شئ بيبقي تمام

ويحاولو بقدر الامكان انهم يحضروا ويفهموا المحاضرات

حتي لو طلعم بكلمه واحده مش مهم في الاول كده بس

المهم ان الوقت ميضعش

وطبعا السكاشن دي مهمه جداااااا دي كمان اهم من المحاضرات

يعني اللي مش هتفهموه في المحاضرات هتفهموه ان شاء الله من السكاشن

وربنا يوفقكم كلكم/quote]

يا تذاكرو قوى وتحفظو قوى وترتبو يا هتجيبو التقدير الشعبى وتتعقدوا
وساعتها يا حلوين هتتعينو فى آخر بلاد المسلمين وتقعو ومحدش يسمى عليكم

اتعلمو من اللى قبلكم واللى ناوى يزاكر كويس ربنا يوفقه ويعينه
واللى مش ناوى يزاكر بجد يستحسن يحول أى كليه تانيه يلاقى نفسه فيها
لازم كل واحد ميشكش فى قدراته ميقلش انه بقى غبى من بعد ما دخل الكليه لان ده اكبر غلطه ما تحاولش تفتكر ان انت الوحيد اللى مش شافهم وباقى اللى قاعدين فلهمين لان الحال من بعضه بس كمان لازم تذاكر وتجبر نفسك انك تفهم الموضوع الى فى ايدك بالعافيه وصدقنى هتنجح


وطبعا كان فى اراء ونصايح محبطة وانا لم انقلها لان الموضوع مش ناقص اساسا:o:o
وطبعا اللى كان الردود دى دكاترة تانين اكبر منناواسال الله يجزيهم خير الجزاء على مجهودهم
ويتبع قريبا ان شاء الله

ابدأ كلامى ببسم الله
اولا : نظام الدراسه فى الكليه ...........
احنا فى طب بندرس ست سنوات وبعدها بيكون عندنا سنه امتياز
عندنا اول 3 سنين دراسه بتكون دراسه اكاديميه هتقولوا ليا يعنى ايه دى؟؟؟http://www.majdah.com/vb/images/smilies/ma%20(28).gif
اقولكم يعنى بندرس فيها فى الكليه كلها فى الكليه مش بنروح فيها المستشفيات خالص كل دراستنا فى الكليه محاضرات وسكاشن
سنه اولى وتانيه بندرس فيهم نفس المواد
بندرس فيهم
" فسيولوجى...وده بندرس فيه وظائف الجسم البشرى وازاى بيشتغل وايه النظريات اللى بتيأيد نظام شغله ده"
"تشريح...وزى ما باين من اسمه بندرس فيه تكوين جسم الانسان "
تالت مادة بقى هى
" الهستولوجى ... وده بندرس فيه تركيب خلايا جسم الانسان تحت الميكروسكوب "
اما اخر ماده هى
" الكيمياء الحيويه ... ودى بندرس فيها التفاعلات الكيمائيه اللى بتحصل داخل جسم الانسان اثناء الهضم ,انتاج الطاقه ,اثناء نموه وتكوين DNA"
بكده تكون خلصت اول سنتين فى حياتك
درست فيهم كل حاجه عن جسم الانسان ...بس لاحظ الانسان ده طبيعى سليم معافى لا يعانى من الامراض
يعنى بتدرس الطبيعى الاول

بعد كده فى سنه تالته بقى بتاخد فيها كل الامراض اللى ممكن تصيب الانسان ودى فى ماده الباثولوجى او علم الامراض
طيب هنسيب الانسان ده كده مريض ......لأ لازم نعالجه ......يبقى نعالجه فى ماده الفارماكولوجى او علم الادويه
طب ايه اللى ممكن يسبب للانسان ده الامراض http://www.majdah.com/vb/images/smilies/ma%20(28).gif
يبقى هندرس باراسيتولوجى وماكرو
وبعد ما تخلص سنه ثالثه بقى اقول انك ممكن تكون دكتور بس ينقصك ازاى تعرف تحدد الامراض دى وتشخصها
ودى اللى هتتعلمه فى ال3 سنين اللى بعد كده
واللى بنقول عليهم سنوات الدراسه الاكلينيكيه
وفيهم بناخد محاضرات فى الكليه وروندات فى المستشفيات بنشوف فيها الحالات وبنعرف ازاى نعالجها
مش هتكلم كتير على سنه 4و5و6 لان معلوماتى عنهم مش كتير ولانها كمان مش هتفيد طالب سنه اولى كتير
كده يكون طالب سنه اولى عرف نظام الدراسه فى الكليه
وعرف ايه اللى هيدرسه
بعد كده هجاوب على السؤال اللى بعده ................
ايه اللى مطلوب منى اعمله عشان احضر نفسى لدخول الكليه وازاى اقدر اقلل فترة التوهان اللى لازم ولابد تحصل لكل طلاب سنه اولى؟؟؟

لنا عوده ان شاء الله للاجابه عن هذا السؤال.........
ارجو ان الموضوع ده يعجبكم كلكم واقدر بيه افيد كل اللى محتاج مساعده
فى انتظار اسئله الجميع وفى انتظار مشاركه الجميع
اسفه للاطاله

موضوع جميل
جزاكى الله خيرا يا دكتورة
ربنا يسهل فى طب المنصورة دة

ربنا ما يجيب إحباط وندم إن شاء الله :)

جزاكم الله خيرا على مروركم الطيب

ايه المطلوب منى علشان احضر للكلية او اقلل فترة التوهان اللى لازك ولابد يمر بها طلاب اولى ؟؟؟؟؟؟
اول حاجه مطلوب منك تعملها قبل كل حاجه
انك تكون واثق فى اختيار ربنا ليك لدخولك الكليه دى
وتعرف ان كل ميسر لما خلق لك وان مفيش كليه تانيه ممكن تنفعك غيرها
خليك واثق فى نفسك واثق فى ربك واثق فى قدراتك

تانى حاجه مطلوبه منك انك تحاول تثقف نفسك ........هتقولى طب ازاى اعمل كده يعنى اعمل ايه ؟؟؟؟؟؟؟؟؟؟؟؟؟؟؟
اقولك .... الدراسه عندنا فى الكليه دراسه باللغه الانجليزيه طب ما تحاول تقرا كتب انجليزى Improve your language
هتقولى يعنى تقصدى كتب طبيه انجليزى يعنى ولا ايه ؟؟
هقللك ل كتب طبيه مش هتفهم منها حاجه ... لان اصلا المصطلحات الطبيه اصلا مش انجليزى دى لاتينى
علشان كده حاول تصلح من لغتك الانجليزيه العاديه علشان تفهم الشرح والكلام العادى اما اللغه الاتينى دى
فهوه ده السبب اللى خلانى اعمل الموضوع ده ............
هبتدى معاكم واحده واحده فى المصطلحات الطبيه اللى ممكن تقابلكم فى اول دراستكم والكلمات الطبيه الانجليزيه اللى هتكون صعبه عليكم او ممرتش عليكم قبل كده
نقول بسم الله الرحمن الرحيم ونبدأ
regions of humen body
back>>>>>>>>>>الظهر
Trunk>>>>>>>>>الجزع"الصدر والبطن"
Thorax>>>>>>>>الصدر
abdomen>>>>>>>البطن
pharynx>>>>>>>البلعوم
Larynx>>>>>>>>الحنجرة
Limbs>>>>>>>>>الاطراف " يعنى الذراعين او الرجلين"
arm>>>>>>>>>>ذراع

cell>>>>>>>>>>خليه
tissue>>>>>>>>نسيج
organs>>>>>>>اعضاء
systems>>>>>>اجهزة
muscle>>>>>>>عضله
nerve>>>>>>> عصب

mid>>>>>>>> منتصف
anterior>>>>> امام
posterior>>>>وراء
para>>>>>> بجوار
upper>>>>>فوق
lower>>>>>تحت
axis>>>>>>محور

sub>>>>>>تحت
cutaneus>>>> الجلد
subcutaneus>>>>>تحت الجلد
myo>>>>>>> عضله
cardium>>>>>>القلب
myocardium>>>>> عضله القلب

دى بعض الكلمات اللى انا لقيتها دلوقنى.... هدور على المزيد واكيد هنزلها لكم

بجد والله كلام جميل جدا

جزاكم الله خيرا
http://www.megashare.com/478266
دى محاضرة للدكتور حسام بيشرح فيها ازاى تذاكر فسيولوجى

شكرا جزيلا على المعلومات الطيبة
بس السؤال
هنذاكر ازاى من اول يوم وهما ما شاء الله فى العشر الاواخر من رمضان؟

هو فعلا الموضوع ده صعب بس اللى بسمعوا ان اول اسبوع مش بيبقى فيه كورسات خالص حتى المحاضرات ممكن تبقى قليلة بس الله اعلم

هنذاكر ازاى من اول يوم وهما ما شاء الله فى العشر الاواخر من رمضان؟

هو الحكايه دى محتاجه شويه تعب
يعنى ممكن الواحد لو خد المحاضره من 9 ل 1 الضهر تقريبا عشان مفيش سكاشن
فلو الواحد رجع نام شويه و بدا مذاكره كده شويه و المهم يخلص قبل الفطار
بس و الحكايه فى الاول مش حتحتاج اكتر من كده
بس المهم ان الواحد ينجز
ميضيعش الوقت فى الترجمه للحاجات
او انه يقعد فى الصفحه مش مذاكره ترجمه
و الكلام اللى بنسمعه من الطلبه الكبار

يعنى و اهو الواحد بيحاول و ان شاء الله ربنا ييسر

فى رعايه الله