الكمساري

شعر/ سمير الأمير

--------------------


يا كمساري شرق الدلتا
انا معايا ياواد ابونيه
ففز قوم من ع الشلته
الكمسارية بتقعد ليه؟

تقطع تذاكر والا تسوق
ركز بقي يصلح حالك
الدنيا زحمة ف يوم السوق
مال الحكومة ماهوش مالك

ظنك حتاخد باﻷسباب
من غير "أدب" من غير حيله
قاعد تناكف في الركاب
اياك فاكرهم ترحيله ؟

يا كمساري خليك معقول
الهيئة مش هي الهيئة
وكل حاجه وليها اصول
وقاعدتك هنا مش لايقة

الرغي غير "الحدوته"
فتح بقي علي صندوقك
ده لو التذاكر ع النوته
يبقي " اﻷدب " قلة زوقك

مش كل شرق الدلتا صفير
في السكة كله بيتكعبل
واللي بيركب للتحرير
فجأة بينزل ف ابو زعبل

*******

لو كنت بتحب بلادك
دفع ولادك أجرتهم
مرعوب قوي منحسادك
إمشي عدل حتسكتهم

وما تتفقش مع السواق
يبرم علي الناس المساكين
ع الكوبري يعطل قبل بولاق
ويقول معادتش معايا بنزين

ساعتها برضه الناس حتقوم
وحتمشي تدعيلك بالستر
ويقولوا ده الكمساري مظلوم
والله كتر خيره يامصر

سهله قوي تاكل الركاب
بلسان ينقط حنيه
تعمل بتاخد باﻷسباب
عشان يكونلك شعبيه

خلينا نرجع للأول
بينها سرحت بينا
فيه ناس هنا غاوية تأول
ممكن ف داهية تودينا

فيه كمسارية كتير قبليك
باعو ا الكاوتش وجابوا قديم
بعد الايجار سكنوا ف تمليك
والشركة راحت ف ابو مليم

اتوبيس وطن و وطن غلبان
و اللي بيحصلعلي عينه
والكمساري لو كان انسان
ما كانش رهنه لداينينه !


****

الكمساري مهنة باشا
لو بس يخلص ف النيه
وما يصاحبش الهباشه
ولا يتفق مع حراميه

ما يتخانقش مع الركاب
و لا يكشر للعاجزين
ولا ينفعلش بدون اسباب
ويسب بالملة وبالدين

الكمساري لو كان شاعر
حيلاقي ميت الف قصيدة
وكل راكب بمشاعر
وكل يوم فكرة جديدة

والكمساري لو كان قصاص
حيلاقي ملايين الحكايات
يشوف ويسمع وجع الناس
رجاله كانوا او ستات

الكمساري لوكان محبوب
صفارته تبقي كمان ورباب
ويبقي ف الاتوبيس مهيوب
وكلمته نشيد الركاب

الكمساري قائد جماهير
لو بس يفهمها كويس
ولو ضمن حق التعبير
يجوز قوي ينفع ريس !

جمييله جدا جدا

فكرة رائعة

الأصدقاء شمس الليالى وسيناوى كبير أنتما الأجمل