كيف تصبح شحاتا محترفا !!!! [الأرشيف] - بوابة الثانوية العامة المصرية

مشاهدة النسخة كاملة : كيف تصبح شحاتا محترفا !!!!

COoL HEaRT

20-09-2008, 05:38 PM

بسم الله الرحمن الرحيم

http://up5.m5zn.com/photos/00263/d58dvghzh73o.jpg (http://up5.m5zn.com/photos/00263/d58dvghzh73o.jpg)

هبدا الموضوع ع طول

كلنا عارفين ان احنا واحنا فى لايام المفترجه دى بتزيد ظاهره الشحاته بشكل غير طبيعى واكتر من المعتاد

هتلاقى كل شويه حد بيرن الجرس او يوقفك وانت ماشي وبيقلك (( كل سنه وانت طيب او حسنه قليله تمنع بلاوى كتيره او هنيالك يا فاعل الخير والثواب او حسنه لله
او مثلا لو واحد راجل وعاه مراته طبعا المتسوله المحترفه تقلك حسنه لله ربنا يخليلك الست ))
كانها بتشترط تدينى الحسنه الى هى الفلوس ربنا يخليهالك
اما لو جربت انك مش تديها هتلاقى نظره حقد غريبه كانها بتقول ربنا يخدك انت وهى

:)

والجميل فى الموضوع انه عمره ميطلب الفلوس لنفسه دايما يقول حسنه لله

تقريبا وده التعريف اللى سائد عند معظم الناس ان الشحاته عمل من لا عمل له

بالتالى ان مفهوم بعض الناس عنها انها وظيفه اصلا .. ودى كارثه فى حد ذاتها

ونتيجه لكده هنلاقى عدد الشحاتين متزايد جداا

وقريب بئا نسمع عن نقابه الشحاتين زى نقابه الممثلين والمحامين وغيرهم
لانهم خلاص مثلوا طبقه كبيره فى المجتمع

وبم ان الوعى عند الشحاتين زاد.. بردو الشعب عارف انهم بينصبوا عليهم وبالتالى هنلاحظ اعراض معظم الناس عن اعطاء الحسنه
لان كل اللى فى دماغهم ان الشحات عاوز الفلوس عشان يدفع فاتوره الموبايل ع اساس انه خط كمان مش كارت حتى

وطبعا لكل شحات الاستايل الخاص بيه مش اى حاجه;)

والجزء اللى جاى عن فنون جديده قراته من شويه يعنى مش كلامى

على اعتبار ان الشحاتة فن مش مجرد مهنة ـ شريفة ـ طبعا .. كام مشهد حصلو اثبتو ان لكل مهنة فيها ابطالها

المشهد الاول:
راجل في سن الاربعين لابس جلبية بيضة وعمة وواقف في نص الشارع قريب من ابو ربيع في منطقة بولكلى ومعاه رغيف عيش فاضي وماعرفش لييه مغطي بيه عينه وبصوت شبه عالي ونظرة استعطاف للناس اللي في الشارع ... وبيقول : والنبي ربع جنييه اجيب فلفلاااية وبتكرار والحاح ... وقف واحد من الناس اللي ماشية وطلع جنيه... وقالو : خد يا عم روح هاتلك 4 فلافلات ولا تعمل في نفسك كدة
اخد منه الجنيه بعد ما دعاله من الدعاوي المحفوظة اياها ... وبعد ما الراجل اتدور ومكمل سكته
بيلتفت وراه لقى نفس الشخص بينادي تاني وبيقول والنبي ربع جنيه اجيب فلفلااية .. بصلو في نظرة تعجب
رد عليه الشحات وقالوا مافهاش حاجة لما يبقو خمس فلافلات
:d

المشهد التاني :
راجل لابس بنطلون وقميص من بتوع الموظفين شكله في التلاتينات
وقفني في نص الشارع وقالى: ممكن كلمه لو سمحت
ايوة
معلش هعطلك شوية بس لكن فعلا انا مضطر اقول كدة وانت شكلك طيب ومش عارف ايه وهتفهمني

قلتله : اتفضل
قاللي : انا من المنصورة ونزلت هنا اسكندرية عشان اتتطمن على واحد قريبي واصيف يومين , وابتسم ابتسامه بلهاء مافهمتهاش وبعد كدة اتسرقت مني فلوسي ومعييش فلوس ارجع المنصورة تاني ...
والمطلوب مني ؟؟
انا عايز 2 جنيه بس عشان اقطع تذكرة وارجع بلدي ... انا عارف ان الاسكندرانية جدعان وانت شكلك اجدعهم....
مممممم
ماعرفش لييه طلعت 2 جنيه من جيبي وقلتله اتفضل ومشيت قبل مادعي وينافق والكلام ده
بعد يومين لقيت نفس الشخص ده جاي قدامي بهدوم متغيرة ـ افتكرته جاي يرجعلي فلوس ـ ووقفني بنفس الطريقة وبدأ يتكلم
... انا من طنطا ونزلت هنا اسكندرية................................
فكرت اني اقوله هات ال 2 جنيه بتوعي بس لقيت حل اسهل اني اسيبه وامش بعد ماشتمته في سري
:rolleyes:

المشهد الثالث:
شاب في اواخر العشرينات تقريبا شكله متبهدل ودقنه مش محلوقة
وقفني بعد السلام عليكم وقالي ينفع اطلب طلب صغير
اتفضل
لا مؤاخة يعني ياخويا انا عايز اطلب منك خمسة وتلاتين قرش:d ـ نسى يقول فقط لا غير ــ لو مافيهاش مانع
فكرت مع نفسي : طب اشمعنا 35 بالظبط وياترى لو اديته نص جنيه هيرجعلي الباقي
قلتله : مش فاهم
قاللي : خمسة وتلاتين قرش مش هيخسروا معاك يعني ;)
دورت في جيبي وطلعت نص جنيه واديتهوله وكان منظري فعلا اني مستني منه باقي
اخد النص جنيه وحطه في جيبه وقالي تشكر يخويا... يبقالك..^_^ واختفى
يمكن في يوم من الايام واحد من دول يبقى وزير مالية او رئيس وزراء:lol:
ــــــــــــــــــــــــــــــــــــــــــــــــــ ـــــــــــــــــــــــــــــــــــــــــــــ

طبعا الامثله اللى ذكرها شخص ما:) امثال بريئه اووى بيطلبوا مبالغ صغيره:)

فى ناس بيفرضوا عليك تدفع كام ..دايما اقولها شحات وعاوز جبنه رومى مش بيبص ع اده

و ااااه لو ادلته اقل من اللى طلبه هتلاقيه ايه يا استاذ هو احنا بنشحت;)

حصلت معايا مره واحده جايه بتطلب منى ادتلها اللى معايا ساعتها كان هاين عليها تدينى قلمين لولا انى حلفت انى مش معايا غيرهم

طبعا انا مش هبله انى ادلها اصلا بس كن لواحدى فى الشارع وخفت لتضربنى:d

بس لو ركزنا شويه هنلاقى السن بتاعهم 20 او 30 او 40

يعنى الناس دى ممكن تشتغل مش سنهم كبير ع الشغل بس هنقول ايه

بدام فى طريقه اسهل من انه يدور ع وظيفه تحافظ ع كرامته

*=*=*=*=*=*
وما نيل المطالب بالتمنى ولكن تاخد الدنيا شحاااااااااته

طبعا الموضوع متجمع من كذا حته شويه اتكلم حبه انقل المهم يعجبكوا وخلاص.... سلامى للجميع :d

the black rose

20-09-2008, 05:51 PM

COoL HEaRT

20-09-2008, 06:22 PM

اقلك على مشهد لسة حاصل امبارح
كانوا فى ناس قاعدين فى الدور الارضى
و فاتحين الشباك
قامت واحدة نطتلهم تقولهم حسنة لله
قاللوها ربنا يسهلك
قالتلهم ده لربنا و شوية من الحوارات و الزن اللى انتوا عارفينه
قاموا قفلوا الشباك راحت زقت الشباك
و قالتلهم بقى تقفلوا الشباك فى وشى
اخر ما زهقوا واحدة قامتلها و قالتلها مش هنديكى
برده مسكتتش
راحت قالتللها ايه رايك نقسم اللى انتى لمتيه من الصبح
قالتلها انا لسة نازلة هههه

شوفتى هما واخدنها تجارة
خصوصا فى رمضان
ده بيبقى فى ناس محتاجين جدا و ميطلبوش ابدا
عندهم عفة

وللاسف بيحصل الاسوا ..ياريتها جت ع الشباك اللى اتزق او الزن او او ده كويس انها مشتمتش

فعلا الموضوع قلب بتجاره ومبقتش شحاته عشان واحده تستر نفسها

بقت قله زوق لازم تحلفى انك دفعتيلها اللى معاكى شعان تصدق بجد بقت حاجه صعبه

وبستغرب ان مفيش اى اجاراء بيتخذ ضدهم

فعلا الحكومه هتعمل ايه ولا ايه هتسرق الشعب ولا هتنصب علينا ولا هتاد بالها من الشحاتين

بس تعرفى اهو كله ابتزاز اللى الحكومه بتعمله فينا او اللى شعب بيعمله فى نفسه

منوره يا شيرين :)

MohammeD el_SadaT

20-09-2008, 06:28 PM

فيه موضوع
لـ
!! who cares !! (http://www.thanwya.com/vb/member.php?u=73454)
بيتكم عن نفس النقطه دى بالضبط هجيب ردى من هناك إقتباس بس يارب ألاقى الموضوع
الحمد لله لقيته
بصى هو فعلاً الموضوع ده محير جداااااً
الشخص اللى قدامك بيبقى قادر وعاقل يعنى يقدر يشتغل ومع ذلك بيفضل " الشحاته "
ليه الله وأعلم هل لأنا طريقه سهله جداااً للحصول على المال
ولا هو مجبر على فى ذلك لأسباب لا يعلمها إلا الله

يعنى أنا فيه مواقف حصلت قدامى كتير
منها
إحنا عندنا أرض زريعين فيها " عنب " فى موسم الجمع بتلاقى ناس الله وأعلم هما منين بنات صبيان حريم ورجاله بيلفو على الأراضى بيطلوبو المساعه
فالشغل فى الجمع بيبقى عباره عن أولاد بيقصو العنب والبناط بتشله تطلعه بره
الشغل حوالى 2 ساعه بيخدو فيهم من 10ل 15 جنيه
هو يعتبر مش شغل أد ما هو تسليه

المهم
واحده جت تسأل " تشحت يعنى " فراحت ماما قايللها تعالى إشتغلى مع البنات اللى بيشتغلو وأنا بدى للبنت منهم 15 جنيه فى الساعتين دول هديكى إنتى 30 راحت البنت راده عليها بكل بجاحه 30 جنيه إيه ياأم 30 جنيه إنتى دا أنا أعملهم فى نص ساعه خلى فلوسك فى جيبك وراحت ماشيه

وحده تانيه ونفس الموقف
بس دى بقه ماما مقلتلهاش تعالى إشتغلى وأديكى الأجر مضاعف ماما لقت الست شايله عيل صغير على كتفها والواد هيموت من الحر فبتقولها مش حرام عليكى اللى إنتى بتعمليه ده والواد ممكن يموت فيها
راحت الست معيطه وقالت والله غصب عنى أنا لو بإيدى أشتغل وآكل بكرامتى ولا أعمل كده هو إنتى فاكره سهل على الواحده مننا اللى هى بتعمله ده ياحجه واللى الناس تعمله فينا والشباب اللى بيطمع فينا وما إلى ذلك
فماما بتقولها وإنتى إيه جبرك على كده
قالت أنا متجوزه واحد متجوز عليا 3 مخلف من كل واحده فينا قورتت عيال ومسرحنا كلنا اللى ترجع فى اليوم معاها أقل من 100 جنيه بيكسر عضمها
فبتقلها وإنتى إيه جابرك على العيشه معاه قالتلها ولادى ولو إطلقت مش هيسبنى فى حالى

وحكاوى من دى كتير من دى حصلت قدامى لو حكيت مش هخلص
فدلوقتى ياترى الناس دى فعلاً مذنبه ولا ضحيه المجتمع والظروف الله وأعلم

** ضي القمر **

20-09-2008, 06:43 PM

:d
وما نيل المطالب بالتمنى ولكن تاخد الدنيا شحاااااااااته

حلوة دى يا ياسو
بخصوص بقى الشاحتين
فأنا اصلا بترعب منهم ومش عارفة ليه
بس بخاف منهم بجد
كان دايما كل ما امشى انا وماما
الاقى واحدة بتقولها
والنبى يا ابلة تهت وفلوسى ضاعت وعايزة ارجع للعيال
وماما تديها
وكل يوم على ده مامازهقت قالت ليها هو انتى تايه على طول ؟؟؟:mellow:
قالتلها ياابلة مهو الواد عايز موبايل اجيبله منين يعنى:huh:
وليكى بقى تتخيلى الموقف

marwa.m

20-09-2008, 06:43 PM

انا فى الاول كانت عندى حالة مرضية بحيث ان اى حد يطلب حاجة لله بديهالة ودة الحمد لله كويس لحد محصلتلى حاجة كدة

كنت رايحة امتحان الفيزيا بتاع 1 ثانوى
وطبعا كان الوقت بدرى اوى
لقيت واحدة معاها بنتها بتقولى انها خرجت من البيت ونسيت فلوسها ولازم تروح مكان معين دلوقتى حالا
اديتها الى هية عايزاة وقلت عشان ربنا يكرمنى فى الامتحان

وعدى الموضوع
وبعديها بسنة لقيتها بردة وكان معاها بنتها وقالتلى نفس الكلام

اكيد بتقولوا ازاى افتكرتها
لانى يوم الامتحان حليت حلو اوى وجبت الدرجة النهائية وقلت سعتها ربنا كرمنى عشان سعدتها
عشان كدة صورتها فضلت فى دماغى
الى غريب فى الموضوع ان انا اديتها فلوس تانى
لانى مقدرش اكسفها او اقولها انتى كدابة
ومن سعتها بقيت احاول اخد بالى من الناس دى

وميرسى على الموضوع الجميل دة

COoL HEaRT

20-09-2008, 06:47 PM

فيه موضوع
لـ
!! who cares !! (http://www.thanwya.com/vb/member.php?u=73454)
بيتكلم عن نفس النقطه دى بالضبط هجيب ردى من هناك إقتباس بس يارب ألاقى الموضوع
الحمد لله لقيته

فينك يا who cares ماعلينا ...
كويس انك لقيته :)...
بس معتقدش انهم ضحايا او العدد الاقل منهم بقى ضحيه
ه بس الناس لعادت تصدق ده ولا ده ..
محدش عاد بيثق فى اى حد ..
بس المشكله ان بجد فى ناس محتاجه ..
فى فلوس فى مصر
ع فكره مصر مش دوله فقيره
بلد دخلها كويس
هو حالنا مصورلنا ان احنا بلد فقيره
لو جينا حسبناها شفت فى برنامج لعمرو اديب حسب اللى بيدخلنا من القناه مثلا
لقى ان الدخل كويس بس جزء كبير من الفلوس بيروح فى حته مش معروفه
اكيد احنا عارفينها هى جيوب الناس اللى ماسكين البلد .. رجال الحكومه الافاضل
.. مصر لسه قريب باعته قمح لدوله فقيره دوله من الدول بتاعت المجاعات
طيب فيها الخير بس مش ياكلو الشعب الاول ..
فى تصرفات غريبه بتحصل تحسسك انك دوله غنيه
بالرغم من شريحه الفقرا كبيره
ليه مثلا ميكنش فى مؤسسه تدرس حالات الناس اللى تتقدملها وتساعدها او حاجه زى كده
اهو الشحاتين اللى واخدنها وظيفه وبينصبوا علينا هيدوروا ع طريق تانى
واللى محتاج فعلا هياخد
مشكور ع ردك يا محمد :d

بنوته مسلمه

20-09-2008, 06:48 PM

COoL HEaRT

20-09-2008, 06:54 PM

:d
حلوة دى يا ياسو

ربنا يخليكى بس انا لقتها:d بكره احطها فى التوكيع ;)
بخصوص بقى الشاحتين
فأنا اصلا بترعب منهم ومش عارفة ليه
بس بخاف منهم بجد
كان دايما كل ما امشى انا وماما
الاقى واحدة بتقولها
والنبى يا ابلة تهت وفلوسى ضاعت وعايزة ارجع للعيال
وماما تديها
وكل يوم على ده مامازهقت قالت ليها هو انتى تايه على طول ؟؟؟:mellow:
قالتلها ياابلة مهو الواد عايز موبايل اجيبله منين يعنى:huh:
وليكى بقى تتخيلى الموقف

هههههههههههههههههههههه

موبايل ..شايل موبايل وعامل استايل بالزمه ده كلام .. والله احنا شعب كميل :d

مهو حاليا بقى الموبايل من الاساسيات والضروريات الحياتيه زى الميه الشرب

ع راى طه حسين الموبايل كالهواء والماء
:)

كل المعايير اتغيرت بشكل غريب

تعرفى ان الشحاته امتدت للمنتديات :d

هتلاقى الموضوع فى اخره او حتى فى العنوان

كلمه ماتشبه بالله عليك رد عليا احلفك بايه متطلع من غير مترد

واضح ان الظاهره امتدت حتى هنا

marwa.m

20-09-2008, 06:55 PM

هههههههههههههههههههههه

اكيد بتقولوا الهبله دي بتضحك علي ايه
بصراحه رد مروه ضحكني اوي
المهم بقي ان الحاجات دي منتشره جداااااااااااااااا
ولو مش اديتي للشحات ده اللي عاوزه بيشتم ويدعي عليكي
عالم زبااااااااااااااااااله
بس برده الله اعلم بالاسباب
دمتم بكل الود

وشغلانه حلوه يا ياسو

هههههة
انا والله يوم ما رجعت البيت وحكيتلهم شبعت تريقة

يلا بس كويس انى ضحكتك

يعنى كنت هعمل اية

- اتخانق معاها والم الشارع عليا ويعالم يمكن تضربنى اصلها كانت ماشاء الله طول بعرض

رحت مدياها الفلوس ومشيت اكلم نفسى

بنوته مسلمه

20-09-2008, 07:02 PM

[quote=marwa 2008;785222]هههههة
انا والله يوم ما رجعت البيت وحكيتلهم شبعت تريقة

يلا بس كويس انى ضحكتك

يعنى كنت هعمل اية

- اتخانق معاها والم الشارع عليا ويعالم يمكن تضربنى اصلها كانت ماشاء الله طول بعرض

رحت مدياها الفلوس ومشيت اكلم نفسى
[/quote

هههههههههههههه
اتجننتي كمان ؟
يعيني عليكي
مش معاكي 5 جنيه اشتري مورو
ليا ولترافل

COoL HEaRT

20-09-2008, 07:07 PM

بنوته مسلمه

20-09-2008, 07:07 PM

هههههههههههههههههههههه

موبايل ..شايل موبايل وعامل استايل بالزمه ده كلام .. والله احنا شعب كميل :d

مهو حاليا بقى الموبايل من الاساسيات والضروريات الحياتيه زى الميه الشرب

ع راى طه حسين الموبايل كالهواء والماء
:)

كل المعايير اتغيرت بشكل غريب

تعرفى ان الشحاته امتدت للمنتديات :d

هتلاقى الموضوع فى اخره او حتى فى العنوان

كلمه ماتشبه بالله عليك رد عليا احلفك بايه متطلع من غير مترد

واضح ان الظاهره امتدت حتى هنا

تصدقي يا ياسو
بس مش بعبرهم
وحشه انا مش كده

ايا تمشي من غير ما تديي 5 جنيه انتي كمان
والله شغلانه ميه ميه

COoL HEaRT

20-09-2008, 07:11 PM

هههههههههههههههههههههه

اكيد بتقولوا الهبله دي بتضحك علي ايه
بصراحه رد مروه ضحكني اوي
المهم بقي ان الحاجات دي منتشره جداااااااااااااااا
ولو مش اديتي للشحات ده اللي عاوزه بيشتم ويدعي عليكي
عالم زبااااااااااااااااااله
بس برده الله اعلم بالاسباب
دمتم بكل الود
وشغلانه حلوه يا ياسو

اه شغلانه جامده هجيزلك معايا ع الرصيف اللى جنب كوك دور ;)

والله فعلا ربنا اعلم بالاسباب بس اى اسباب تخليك تدوس ع كرامتك

مش عارف :huh:

marwa.m

20-09-2008, 07:23 PM

بعيدا عن الهبل بتاعى الى فوق عايزة اقول حاجة

احنا ممكن نعمل حاجة

بدل مانشوف اى حد فى الشارع يطلب مننا حاجة نديهالة

نو دى الزكاة لاى جمعية خيرية وهما يتصرفوا ومش عارفة
الناس بيكسلوا يعملوا كدة لية :mellow:

..Just Stop

20-09-2008, 09:22 PM

ههههههههه
شحات ومد اديه
يا محسنين الغرام لله:d

موضوع كويس يا سو والله
الظاهرة الغريبة القريبة المريبة ال..:d.. موجودة من زمان فى مجتمعنا المصرى بالذات
عادى جدا
احسن من الوظيفة الحكومية بعشروميييت مرة :d
فلوس بتيجى بالساهل
بس الشحاتين دول بينقسمو الى
قسم محتاج ولا يستطيع ان يسد حاجته الا بهذه الطريقة
قسم مش محتاج بس واخدها هواية
قسم محتاج بس قادر انه يسد احتياجاته ( بس الكسل بقا نقول ايه ) وطنش تعيش
هنا بقا يجى دور لجان الزكاة بنلاقى سيارات وطائرات وبواخر ودرجات وكاروو كمان:d يجى يقول لجنة زكاة لمن اراد ان يزكى
وكلام كتير كدا
المشكلة بقا ان الناس فى الاخر تقول الناس دول نصابين يا حاج اوعو تصدقوهم
وبكدا الزكاة مش هتروح لاصحابها الحقيقين

بس انتى نسيتى نوع يا ياسمينة:d
احد انواع الدليفرى
فى المنطقة اللى انا ساكن فيها
تلاقى الشحات من دول جاى وعاه شكارتين فاضيين يلف على البيوت بيت بيت وشقة شقة وياخد اللى فيه النصيب:d
بيخرج من منطقتنا محمل بكل ما تشتهيه الانفس من ارز وبورجر وهوت ميكس ( فى جمصة ):d
دا اغرب نوع انا قابلته لانه مش بيمشى غير لما ياخد الحسنة بتاعته:d
الموضوع طويل جدا ويطول شرحه
ويا هنيالك يا فاعل الخير والثواب عند الله
حسنة قليلة تمنع بلاوى كتيرة وصلى على رسول الله:d
شكلى هشتغل معاهم وانا اللى هنشأ نقابة الشحاتين:d

شكرا على الموضوع يا سو
ودمتم فى رعاية الله

Prof.Dr/A.T.M

21-09-2008, 12:25 AM

هههههههههههه
حلوة قوى يا سمسم
ده انتى شكلك تعبتى فى نقل الموضوع
االواحد مش يروح المدرسة بكرة ويذاكر الكلام بتاعك ده ويبقى ليه مستقبل رائع
تسلم ايديكي على الموضوع

ENG:3assoma

21-09-2008, 02:22 AM

نفس الموقف اللي مروه حكته فوق حصل معايا انا وواحد صاحبي من 3 ايام , كنا راجعين من درس فوصلت صاحبي لحد البيت وقابلنا واحد قال انه عاوز يسافر حالا لأنه معزوم على الفطار في الشرقيه وانا من المنصوره ومحفظته اتسرقت " بصراحه كان لابس شيك" , صاحبي قاله انا معرفش المشوار بكام قاله 10 جنيه . اداله الفلوس "طلع المشوار ارخص بكتير من كده" , وروحت انا كمان البيت لاقيته قدام بيتي وبيقول لأخويا نفس الكلام بالصدفه لاقيت صاحبي كان راجع جري ورايا علشان نسة حاجه معايا "ساكنين في نفس الشارع" , احنا لاقينا الراجل والله مسبناهوش الا لما اخدنا منه الـ10 جنيه وفضحناه في الشارع .
"حسبي الله ونعم الوكيل"

COoL HEaRT

21-09-2008, 03:28 AM

ههههههههه
شحات ومد اديه
يا محسنين الغرام لله:d
روح حته تانيه تشحت انت هتيجى موضوعى :p
موضوع كويس يا سو والله
طبعا :p
الظاهرة الغريبة القريبة المريبة ال..:d.. موجودة من زمان فى مجتمعنا المصرى بالذات
عادى جدا
احسن من الوظيفة الحكومية بعشروميييت مرة
:d
طبعا انت هتاخد فلوس بالهبل من غير متتعب نفسك وتدور ع وظيفه الحكومه
اللى مش هتاكلك حاجه

فلوس بتيجى بالساهل
بس الشحاتين دول بينقسمو الى
قسم محتاج ولا يستطيع ان يسد حاجته الا بهذه الطريقة
قسم مش محتاج بس واخدها هواية
قسم محتاج بس قادر انه يسد احتياجاته ( بس الكسل بقا نقول ايه ) وطنش تعيش

طنش تعيش ده مبداى فى الحياه محدش يجيب السيره
بس فعلا التصنيف سليم
هم كده
بس اخر نوعين كتروا اووى

هنا بقا يجى دور لجان الزكاة بنلاقى سيارات وطائرات وبواخر ودرجات وكاروو كمان:d يجى يقول لجنة زكاة لمن اراد ان يزكى
وكلام كتير كدا
المشكلة بقا ان الناس فى الاخر تقول الناس دول نصابين يا حاج اوعو تصدقوهم
وبكدا الزكاة مش هتروح لاصحابها الحقيقين

انا بقول كده لان الواحد مش ضامن حاجه يديها للشخص فى ايده بس هتعرف منين انه مش نصاب حلقه مفرغه

بس انتى نسيتى نوع يا ياسمينة:d
احد انواع الدليفرى
فى المنطقة اللى انا ساكن فيها
تلاقى الشحات من دول جاى وعاه شكارتين فاضيين يلف على البيوت بيت بيت وشقة شقة وياخد اللى فيه النصيب:d
بيخرج من منطقتنا محمل بكل ما تشتهيه الانفس من ارز وبورجر وهوت ميكس ( فى جمصة ):d
دا اغرب نوع انا قابلته لانه مش بيمشى غير لما ياخد الحسنة بتاعته:d
الموضوع طويل جدا ويطول شرحه
ويا هنيالك يا فاعل الخير والثواب عند الله
حسنة قليلة تمنع بلاوى كتيرة وصلى على رسول الله:d
شكلى هشتغل معاهم وانا اللى هنشأ نقابة الشحاتين:d

ههههههههههه اهو منك مهندش ومؤسس نقابه كمان ;)

شكرا على الموضوع يا سو
ودمتم فى رعاية الله

العفو ..شكرا ع ردك اللى نور الموضوع يا بشمهندس

ومتشكرين ع اضافه الديلفرى

^_^

COoL HEaRT

21-09-2008, 03:39 AM

هههههههههههه
حلوة قوى يا سمسم
ده انتى شكلك تعبتى فى نقل الموضوع

يختى ع حبه تاليف هبل كده من ده ع ده ;)

االواحد مش يروح المدرسة بكرة ويذاكر الكلام بتاعك ده ويبقى ليه مستقبل رائع
تسلم ايديكي على الموضوع

تسلمى انتى ع المرور ..ههههههههههه بس بالنوسبه للمستقبل فروحى زاكرى افيدلك ;) وبعدين محمود هيعمل نقابه هنا خلصى دراسه وتعالى :d

COoL HEaRT

21-09-2008, 03:43 AM

JusT DreaM

21-09-2008, 05:08 PM

حلو اوي الموضوع ياياسو
تسلم ايديكي
بس كل دي طرق شحاته تقليدية قديمة
انتي مشوفتيش الطرق الجديده اللي بتحصل معانا
الشحاته بالمراسلة:d:d
هحكيها بعدين عشان كل اللي كتبته اتمسح ومفيش ايدين اكتب تاني:(:(
ليا عوده عشان اشرح احدث صيحات الشحاته:lol:

COoL HEaRT

21-09-2008, 06:25 PM

Prof.Dr/A.T.M

21-09-2008, 06:50 PM

تسلمى انتى ع المرور ..ههههههههههه بس بالنوسبه للمستقبل فروحى زاكرى افيدلك ;) وبعدين محمود هيعمل نقابه هنا خلصى دراسه وتعالى :d

ههههههه
طيب ايه لازمتها المذاكرة ووجع القلب
انضمن للنقابة على طول

بورسعيدى

22-09-2008, 04:43 AM

موضوع جميل وشامل

وكلها مواقف حقيقية بتحصل

واكيد سبب انتشارها نسبة الفقر والبطاله الزائدة

شكرا لك على عرضك الجميل لجميع مدارس النشل .... أ أ أ اقصد مدارس التسول

COoL HEaRT

22-09-2008, 08:52 AM

موضوع جميل وشامل

وكلها مواقف حقيقية بتحصل

واكيد سبب انتشارها نسبة الفقر والبطاله الزائدة

شكرا لك على عرضك الجميل لجميع مدارس النشل .... أ أ أ اقصد مدارس التسول

مدارس النشل :)
تسميه مظبوطه ..
هى ممكن يوكن سببها البطاله او الفقر
بس مش بردو اى حد مش لاقى شغلانه
يروح يشحت:)
كنا هنلاقى تلت تربع البلد فى الشارع
فى كذا وسيله الواحد يدور ع شغل
زى الامثله اللى قالها السادات
اول مثال اهى رفضت الطريق الكويس لانها لاقيه طريق بالرغم انه اهانه ليها بس
هى فضلته للاستسهال
والمثال التانى بيوضح وجه نظر حضرتك ..
مرورك نور الموضوع يا استاذ بورسعيدى

طـفـلـة الامـس

22-09-2008, 09:29 PM

انا برده حصل معايا الاف المواقف كده
لسة النهاردة وانا راجعة من الكلية واحدة نادت عليا فانا وقفت فالمهم قالتلى عايزة جنيه اهم حاجة انها تحدد عشان علاج امى
قلتلها المهم انك تكونى صادقة فى كلامك فقالتلى والله ربنا اعلم وكده يعنى
عشان انا سمعت انك لما تدى لحد فلوس لازم تنصحيه وتقوليله انه ماينفعش وكده وانا مش بقدر اعمل كده
فربنا يبقى شهيد على كلمتها دى يوم القيامة لانه سبحانه وتعالى اعلم بما فى قلبها
موقف تانى وانا راجعة من درس الكيمياء السنة اللى فاتت
كنت ماشية انا وبنت كانت فى سنة تالتة وواحدة صحبتى وكنت ماشية من على الطرف على طريق السيارات
فالمهم كان فى ولدين راكبين موتسيكل شدوا الشنطة من ايدى
انا بقيت واقفة مذهولة ومش بنطق
كانت الشنطة فيها موبايل وحوالى تلاتين جنيه ومذكرات الدرس واسكتشات
البرود بقى ان ماما اتصلت من موبايل اختى فرد عليها وقالها حاجاتها رميتها خلاص
وقعدت يطلب من موبايلى
فطلب بنت عمتى
المهم ان بنت عمتى دى فى كلية خاصة فى 6 اكتوبر يعنى مش قاعدة مع عمتو
اتصل قالها انا صاحبها ونست حاجاتها معايا فقعدت تقوله ده موبايل بنت خالى وكده واتصلت بعمتو فى البيت فهى فهمت بقى واتصلت بينا
يعنى كان يوم عالمى
بجاحة مافيش بعد كده
ربنا يستر علينا فى الزمن ده
شكرا يا بنوتة عالموضوع

COoL HEaRT

23-09-2008, 12:23 AM

zizo2_2

24-09-2008, 04:16 AM

والله دراسة هايلة ومتقنة في انواع الشحاتة
انا برده حصلي موقف في يوم من الايام بس كنت انا الشحات فيه
الكلام ده كان سنة 1997 وكنت رايح بلد جنبنا انا واتنين من اصحابي ومكنش في موبايلات ساعتها الا قلة ومكنش معايا موبايل

المهم احنا رحنا قضينا طلبنا وواحنا رايحين نركب من الموقف لبلدنا بدور على الفلوس ملقتهاش لقيتها وقعت
واحد هيقولي حد من اصحابك يدفع الاجرة هقوله للاسف مكنش معاهم فلوس لان انا اللي واخدهم معايا

وقفنا في الموقف نبص لبعض ونضحك طب هنروح ازاي
احنا كنا في شبين وبين شبين وعندنا اكتر من 32 كيلو يعني صعب نمشي
قعدنا جنب راجل بتاع كاسيت مش عارفين نعمل ايه
عمالين نبص لبعض ونضحك ونتريا على بعض موقف غريب وكان اول مرة يحصل فواحد واقف سمعنا واحنا بنتكلم فقام جاي لوحده قال انتم رايحين فين قلناله احنا رايحين فين قال انا رايح نفس البلد اركبوا معايا وانا هدفعلكم الاجرة انبسطنا اوي وعلى الفور قبلنا وركبنا معاه ودفعلنا الاجرة
لكن المشكلة اللي بعد كدة من البلد اللي هننزل فيها لبلدنا اصل مفيش من شبين لبلدنا مباشر
نزلنا الموقف وندهت على الراجل اللي دفعلنا ده وقلتله احنا من بلد تانية وعايزين نروح ولو سمحت ادينا اسمك وعنوانك واحنا هنردلك الفلوس طبعارفض بشدة انه ياخد الفلوس مننا او يدينا عنوانه
الراجل مشكور ادانا الاجرة وروحنا لبلدنا وكان في خمسون قرشا زيادة اشترينا بيها لب تاني يوم

COoL HEaRT

24-09-2008, 11:08 AM

والله دراسة هايلة ومتقنة في انواع الشحاتة

بركات جوجل
:)
بس الواحد بيشوف امثله غريبه
اللى عاجبنى التجميعه

انا برده حصلي موقف في يوم من الايام بس كنت انا الشحات فيه
الكلام ده كان سنة 1997 وكنت رايح بلد جنبنا انا واتنين من اصحابي ومكنش في موبايلات ساعتها الا قلة ومكنش معايا موبايل

المهم احنا رحنا قضينا طلبنا وواحنا رايحين نركب من الموقف لبلدنا بدور على الفلوس ملقتهاش لقيتها وقعت
واحد هيقولي حد من اصحابك يدفع الاجرة هقوله للاسف مكنش معاهم فلوس لان انا اللي واخدهم معايا

وقفنا في الموقف نبص لبعض ونضحك طب هنروح ازاي
احنا كنا في شبين وبين شبين وعندنا اكتر من 32 كيلو يعني صعب نمشي
قعدنا جنب راجل بتاع كاسيت مش عارفين نعمل ايه
عمالين نبص لبعض ونضحك ونتريا على بعض موقف غريب وكان اول مرة يحصل فواحد واقف سمعنا واحنا بنتكلم فقام جاي لوحده قال انتم رايحين فين قلناله احنا رايحين فين قال انا رايح نفس البلد اركبوا معايا وانا هدفعلكم الاجرة انبسطنا اوي وعلى الفور قبلنا وركبنا معاه ودفعلنا الاجرة
لكن المشكلة اللي بعد كدة من البلد اللي هننزل فيها لبلدنا اصل مفيش من شبين لبلدنا مباشر
نزلنا الموقف وندهت على الراجل اللي دفعلنا ده وقلتله احنا من بلد تانية وعايزين نروح ولو سمحت ادينا اسمك وعنوانك واحنا هنردلك الفلوس طبعارفض بشدة انه ياخد الفلوس مننا او يدينا عنوانه
الراجل مشكور ادانا الاجرة وروحنا لبلدنا وكان في خمسون قرشا زيادة اشترينا بيها لب تاني يوم

هههههههههههههه

ده ايه الموقف ده

المشكله يا زيزو انكم شحاته لسبب عابر السبيل وكنت محتاج فعادى

اما اللى من غير سبب دول بيبقوا حاجه صعبه جداااا لان حت انتو مش طلبتوا :)

الراجل ادالكو وانتو مطلبتوش

بس ربنا يكرم عم الحاج ده:d

فى ناس كويسه بجد وممكن تساعد بس مين اللى يستاهل المساعده:)

منور الموضوع بجد رد واقعى :d

COoL HEaRT

24-09-2008, 11:15 AM

د/ ماجدولين

24-09-2008, 11:58 AM

http://img223.imageshack.us/img223/6941/rollingyq0.gif http://img223.imageshack.us/img223/6941/rollingyq0.gif http://img223.imageshack.us/img223/6941/rollingyq0.gifhttp://img223.imageshack.us/img223/6941/rollingyq0.gif
يااااااة يا بنوتة
دة أنتى على كدة تاخدى دكتوراة مع مرتبة الشرف فى اساليب الشحاتة
وأنا اللى كنت فاكرة نفسى فاهمة الشحاتين
اتارينى طلعت عبيطةhttp://img523.imageshack.us/img523/7294/sugarwarez004ry3.gif
الواحد يا ما هيشوف بجد
الموضوع والله كويس جدااااااااااااااااااا
على فكرة
بالرغم انى مش بحب المواضيع الطويلة إلا انى مش قدرت امسك نفسى من ساعة ما قريت أول كلمة فى التوبيك دة وللأسف أعرف ناس كتييييير حصلهم مواقف مشابهة
وأنا هبقى أفكر فى الموضوع دة وانزلة ع الجهازعشان
الزمن غدااااااااااااار

http://img72.imageshack.us/img72/8832/n52825552237336041609kx5.jpg
ميرسى ع التوبيك يا قمر
وانا مش هطلعك كدة من المولد بلا حمص;);)
أنا بردوا بحس وبفهم اللى بين السطور:cool:^_^
خدى يا بنتى ومتكسفيش
http://img91.imageshack.us/img91/4025/227qa3.gif

COoL HEaRT

24-09-2008, 06:48 PM

elkingahmedtito

27-09-2008, 08:25 AM

هههههههههه موضوع جامد جدا يا بنوته وتسلى على مواضيعك الجامده

COoL HEaRT

27-09-2008, 08:43 AM

هههههههههه موضوع جامد جدا يا بنوته وتسلمى على مواضيعك الجامده

:) تسلم انت لمرورك وردك

عاشقـــ الانمى ـــة

27-09-2008, 10:15 AM

يا بنتى دلوقتى ال عايز بجد يكسب بجد يعنى يشتغل شحات اه والله
فكرك ال بيمدوا ايديهم دول محتاجين
لا دى بس شغلتهم عشان يكسبوا
المحتاج بجد بيبقى عنده عزة وكرامة وعمره ميمد ايده لحد

COoL HEaRT

27-09-2008, 05:32 PM

يا بنتى دلوقتى ال عايز بجد يكسب بجد يعنى يشتغل شحات اه والله
فكرك ال بيمدوا ايديهم دول محتاجين
لا دى بس شغلتهم عشان يكسبوا
المحتاج بجد بيبقى عنده عزة وكرامة وعمره ميمد ايده لحد

بالظبط ... المحتاج بيبقى عنده عزه او مش المحتاج الانسان المفروض يكون كده

منوره يا جميل الموضوع