بسم الله الرحمن الرحيم
السلام عليكم ورحمة الله وبركاته




ماتخافوش

مش هنتكلم عن قصة الممثل إياه ومهندسة الديكور إياها
لأننا عارفين إن الموضوع ده قتل واتشنق وغرق بحثا
وفي الآخر
تبقى الحال على ما هي عليها
لسه الممثل بيمثل ومزاجه في السحاب
ولسه المهندسة دايرة ببنتها على البرامج والتليفزيونات
لسه والدَي الممثل فخورين بابنهم إنه طلع راجل ابن راجل!
لسه والدَي المهندسة فخورين بأن بنتهم طالعة شجاعة في وجهة نظرهم

مالنا ياعم احنا ومال الناس دول
احنا بس عاوزين ندردش في جزئية تانية
نرجع بقى لقضية الممثل والمهندسة!
مفيش اشتغالة ولا حاجة احنا هناخد منهم حاجة بس ونرجع على طول..

قول لنا كده
إيه أول انطباع جالك لما عرفت بالقضية دي أو باللي زيها
واللي زيها كثيرا..
يعني قصص العلاقات غير الشرعية بين الرجل والمرأة أصبحت للأسف أكتر من الهم على القلب
احنا بنتخيل إن 90 % منكم بيصب كل لعناته وغضبه دايما على البنت
وبعدين ييجي دور الراجل..
مع إن في الأصل وفي الشريعة وفي القانون
الاتنين يتحملوا نفس الخطأ وليهم نفس الوزر
يعني لو اللي عملوه ده يتقسم على اتنين بالظبط
مفيش حد أحسن ولا أوحش من حد..
طيب ليه بقى الانطباع الأولي الفوري المباشر دايما بيكون
"البنت هي اللي غلطانة"

الرأي ده مش بيكون في قضية من القضايا دي وبس
لأ الأمثلة كتير
وف جوه بيوتنا




يعني مثلا
دايما تلاقي لو حصل – لاقدر الله يعني- خلاف بين والدك ووالدتك
تلاقي– غالبا يعني- اللي بيصالحهم على بعض أول ما يتكلم يقول "بس إنت اللي غلطانة برضه يا فوزية.. ازاي تزعلي سي عبد العال!"
وكأن سي عبد العال ده نبي جاي من السما
لا بيغلط ولا بيقول كلام وحش
وكأن الست فوزية دي
معجونة بمية عفاريت وماشية تقول "خناق للبيع!"
مع إن المفروض والأصل
إننا نسمع لدَه ولدِه
ونقرر..
مش ناخد القرار عمياني كده ونطلع الست هي اللي غلطانة لمجرد إنها ست

بلاش دي..
لما مثلا مثلا الشر بره وبعيد يحصل وتخطب سيادتك بنت أمورة حلوة- احنا بنتكلم على الولاد هنا- وبعدين الشر بره وبعيد برضه يحصل خلافات ما بينكم فتنفصلوا..
الأمور بتبقى عادية خالص للولد..
يروح ويخطب واحدة تانية وتالتة ورابعة ويسيب دي يروح على دي.. طريقه سريع ومافيهوش أي مشاكل..
لكن البنت بقى.. لأ اوعى حاسب.. ممنوع الاقتراب أو التصوير
الناس تتعامل معاها على إنها موبوءة.. وممكن يطلع عليها كلام وحش
ولو حصل مثلا وجه واحد راجل يخطب بنت كانت مخطوبة قبل كده
تلاقي صاحبه يحذره ويقول له
"فكر يا بني..دي كانت مخطوبة.. إنت ضامن اللي خاطبها قبل كده عمل معاها إيه؟"
يا سلام..!!
"طيب ما إنت كنت خاطب قبل كده هو حد ضامن خطيبتك عملت معاك إيه برضه؟!"
مش الغلط هنا هو اللي هنا ولا مؤاخذة؟
يبقى ليه الكيل بمكيالين زي ما أمريكا ما بتعمل مع إسرائيل وفلسطين؟
خلينا نعترف بإن ده بيحصل أحيانا.. وأحيانا كتير كمان..
وخلينا نعترف بإن السبب في ده هو إننا اتربينا على كده
اتربينا على إن كلمة "بنت" مالهاش معنى تاني غير الخطيئة!


ده حتى يا جدع تلاقيهم في الأفلام اللي بتتكلم عن التار ولاّ العار و"الكل كليلة!"
بيروحوا يطخوا البنت في "جَلْبها" عشان بتحب الواد حسانين وغلطت معاه.. ويسيبوا حسانين عايش ومزاجه فل الفل!

المشكلة بقى إن الجو المفزع ده قسم البنات لثلاث شرائح- أو هكذا نظن يعني-
شريحة رقم واحد: بتخاف من اللي بيحصل وتكش جوه نفسها وتكتئب وتزعل
شريحة رقم اتنين: بتقاوم اللي بيحصل وبتكسر كل الحواجز.. بالبلدي يعني بتطيح فيها.. والحياة معاها بتبقى لارج خالص
شريحة رقم تلاتة: وهي للأسف شريحة قليلة.. اللي بتعرف تقاوم بشكل طبيعي غير مبالغ فيه.. بتحافظ على نفسها وعلى أنوثتها وفي نفس الوقت لا توصم نفسها بالخطيئة.


السؤال هنا يا حضرات
كيف يمكن أن نقاوم انتشار الشريحة رقم واحد والشريحة رقم اتنين؟ وكيف نشجع الشريحة رقم تلاتة؟
اختر الإجابة الصحيحة مابين الأقواس "مفيش أقواس؟!".. طيب

منقووووول
موضوع عجبنى حبيت أنقله لكم وأحب أشوف أرائكم

معاك
بس الراجل هو اللى بيتعب من الشغل والست قاعده مرتاحه تعد الطلبات والمواضيع المقرفه ومستنياه على أحر من الجمر عشان تعكنن عليه
مش عشان تنسيه تعبه . بس مش كله

موضوع حيوي فعلا يا مورننج

وانا معاكي في موضوع الخطوبه ده فعلا بيحصل لكن مش دايما لما يكون في خلافات بين الزوج والزوجه الناس بتقول للست انتي الغلطانه مش دايما ده بيحصل علي فكره

بس النظره دي كانت مش لان الخطيئه دائما امرأه لاأن المرأه هي التي تستحق ان يحافظ عليها اكثر فهي كزجاج جميل يحمل من الزخارف ما يشد انتباه الجميع فيحاولون الوصول اليه بشتي الطرق ولكن اذا شوب جماله اي شئ يعزف عنه الجميع

هي دي البنت علشان كده مطلوب منها تحافظ اوي علي نفسها وتصون نفسها بشتي السبل لتبقي علي حالها دره جميله مصونه فتظل تبهر العيون


شكرا للموضوع

فعلا ............ الراجل مش عليه غلط لأن دايما الست على راى الأستاذ جمعة هى اللى بتعكنن عليه وهو جاى تعبان من الشغل
بس قوليلى يا ترى قضية زى اللى انتى بتقوليها دى ممكن تأثر على مين اكتر ........ دا أكيد على مهندسة الديكور اللى أصبحت زى النار على العلم دلوقتى ...... ومفيش واحد فى مصر الا لازم يعرفها ........ بعدها ممكن الراجل يعيش حياته عادى ....... انما الست لا زم اكيد هتحس بحاجة ناقصة لأن هى زى ما قال زميلنا زى الزجاج من اقل خبطة ممكن يتكسر ومفيش حد يبصله بعد كده .....................
عرفت ليه بقى الست هى اللى بتشتال الخطيئة

شكرااا ليكم جميعا على المشاركة

Originally posted by أحمد ضبش@Apr 26 2006, 09:26 AM

فعلا ............ الراجل مش عليه غلط لأن دايما الست على راى الأستاذ جمعة هى اللى بتعكنن عليه وهو جاى تعبان من الشغل
بس قوليلى يا ترى قضية زى اللى انتى بتقوليها دى ممكن تأثر على مين اكتر ........ دا أكيد على مهندسة الديكور اللى أصبحت زى النار على العلم دلوقتى ...... ومفيش واحد فى مصر الا لازم يعرفها ........ بعدها ممكن الراجل يعيش حياته عادى ....... انما الست لا زم اكيد هتحس بحاجة ناقصة لأن هى زى ما قال زميلنا زى الزجاج من اقل خبطة ممكن يتكسر ومفيش حد يبصله بعد كده .....................
* * * * * * * * * * عرفت ليه بقى الست هى اللى بتشتال الخطيئة
100022



مين قال ان الراجل مش عليه غلط؟؟؟
المفروض ان الغلط بينقسم على الآتنين مش على المرأة لوحدها
وزى ما ذكرت انه فيه بعض الآزواج بيكونوا راجعين تعبانين من الشغل وزوجاتهم بتتعكنن عليهم حسب تعبيرك فيه بردوه زوجات بتتعب طول النهار فى شغل البيت وتربية الآطفال وأزاجهم بيكونوا عايشين حياتهم خارج البيت زى ماهم عايزين

عايزة أقول انه زى ما المرأة بتغلط الرجل بردوه بيغلط
بس المشكلة اللى بيعرضها الموضوع هى سياسة الكيل بمكيالين يعنى يحكم على المرأة ويسيب الرجل حر يعمل اللى هو عايزه


عجبنى رأيك يا ميدو يا نصير المرأة

شكرااا ليكم جميعا على المشاركة مرة تانية

ههههههههه نصير المرأه مره واحده

شكرا يا مورننج بس انا مش كده فعلا لكن بقول رأيي بصراحه وبحياديه بدون تعصب

شكرا للموضوع مره تانيه

وكنت عايز اعلق علي جزء في ردك الاخير


بس المشكلة اللى بيعرضها الموضوع هى سياسة الكيل بمكيالين يعنى يحكم على المرأة ويسيب الرجل حر يعمل اللى هو عايزه

ده مش بسبب انحياز للرجل او لان الراجل يغلط زي ما هو عايز لكن الست لااا

ده لان دي مقومات الرجل يعني مثلا عندك الراجل ينفع يتجوز وهو متجوز " مثني وثلاث ورباع " لكن الست لاأأ وده طبعا محدش يقدر يقول انه في ظلم للمرأه والسبب معروف
وكمان لان المرأة زي ما قلت بالظبط زي لؤلؤة بتكون جميله اوي اوي طول ما هي في حالتها سليمه " يعني مرأه بدون اخطاء " لكن بمجرد انها تنكسر " تغلط " يعزف عنها الناس يبقي لازم هي تحافظ علي نفسها ولاننا كرجال بنخاف عليكن جدا " اختي , والدتي , بنتي , خطيبتي او زوجتي ... إلخ" فلازم نحافظ عليكم مش عارف ليه انتن بتبقوا شايفين ان ده تزمت او تدخل في حرياتكم الشخصيه لكن هو بالفعل من دافع الخوف عليكم

وشكراااااااااااا

اولا برافو علي الموضوع
الست في امكانها ان تكون ست جديده كل يوم ويبقو الاتنين كويسين جدا بس مفيش حد يزعل كل ده في ايد الست قبل الراجل لان ممكن الست تخلي الراجل ما يشوفش الا هيا وده لازم لان الراجل بيجي تعبان ونفسه يرتاح فلازم يلاقي جو غير الجو المعتاد عليه حتي لا يسبب له احباط والم وغيره من الاشياء النفسيه


بس برده الراجل بكلمه حلوه ممكن يخلي الست في ايده زي العجينه بس فين الي يفهم ومين الي يسمع

نحنو في زمن الي يعرف يسيطر ويتحكم ليه كل ده رغم لا حياه بدون رجل ولا حياه بدون امراه كلهك واحد كيان وشخص واحد

البيت من غير ست والله زي القبر والبيت من غير راجل زي البيت الي من غير جدران ولا سقف يحميه زيه زي الارض البور

لازم الاتنين مع بعض يحبو بعض ويخافو علي بعض وشكرا لكم علي الاستماع والمتابعه رغم اني طولت عليكم


سلام