السلام عليكم ورحمة الله وبركاتة

طبعا هو موقف غريب جدا مكنتش اتوقع انة يحصل داخل الجامعة
احكى لكم

انا وجيجو "الرهينة" رحنا الجامعة مع بعض بس هى راحت على تجارة تخلص شوية حاجات وانا رحت حقوق
احضر المحاضرة واشوف الكتب وبعد ما خلصت جيجو جت لى حقوق واخدتى ورحنا تجارة عندها
اتعرفت على بنات زملاء جيجو بس كانو سنة اولى
وبعدين قلنا نروح نصلى الظهر فى مسجد الكلية
ودخلنا المسجد نصلى وبعد ما خلصنا صلاة ,,,قعدنا شوية فى المسجد
وكل اما نقول يالا نقوم نمشى واحدة منهن تقول لا استنوا شوية لما الساعة تيجى 2
واستنينا حوالى نص ساعة كدة
وفضلنا نتكلم شوية ومن ضمن الكلام بنت حكت لنا عن ان اخوها راح يصلى خرج ملقاش الكوتشى بتاعة :d


وبعدين استعدينا اننا نخرج من المسجد
خرجنا وكل واحدة مننا كانت بتلبس الشوز بتاعها
الا واحدة مننا واقفة ساكتة وفى ذهول وبتقول الشوز بتاعى فييييييييين ؟؟؟؟؟؟؟!!!!:eek::eek:

احنا فضلنا ندور معاها بس مش لاقيناه :mad:
فدخلنا المسجد تانى علشان نسأل البنات "محدش شاف شوز لونة فضى "
بس كانت الاجابة كالاتى "هى اتسرقت هى كمان ولا اية"

اية :eek:
معنى كدة ان فى شوز تانى غير دى ضاعت :(

خرجنا تانى نشوفها برة
اللى لفت نظرنا بقى
ان عدد الشوز اللى برة اقل من عدد البنات اللى داخل المسجد "خاصة ان عدد البنات داخل المسجد قليل يتعد على الاصابع"

المهم معنى كدة ان فى حوالى بنتين كمان الشوز بتاعهم ضاع

احنا نبهنا البنات اللى داخل المسجد يخرجوا يشوفوا الشوز بتاعهم
وفعلا كلهم خرجوا واخدوهم
وطلع ان فى بنت كانت ضحية :( ومش لاقت الشوز بتاعها :(

وكل دة والبنت اللى معانا بتعيطت " ماهى هتروح ازاى يعنى :d"

وفى كام بنت كدة قالوا لنا حاجة "بصراحة قهرتنى وكنت نفسى اضربهم لانهم بجد نرفزونى بس كظمت غيظى"
قالوا لنا ان فى واحدة جت وفضلت تلم فى معظم الكوتشى والشوز وتحطهم فى شنطة :mad:

انا اللى ضايقنى بقى هما
اية السلبية دى
طب ما تروحوا تزعقوا لها ولا تقولوا لها انتى بتاخدى الحاجات دى لية ....
انما دول شافوها وسكتوا :mad:
"كتر خيركم"

المهم

البنت التانية اللى الشوز بتاعها ضاع
كان معاها صديقتها بيتها قريب من الكلية
وبصراحة صديقتها بجد نموذج للكرم والنبل والطيبة ... ربنا يجزيها كل خير
اخدت شبشب من التويلت "الحمام" بتاع المسجد واخدتة هى واديت لصديقتها الشوز بتاعها وقالت لها انا بيتى قريب هروح على طول انما انتى بيتك بعيد ...وفعلا حلو المشكلة وروحوا

انما احنا بقى
كل واحدة فينا بيتها بعيد
وبجد كنا محتارين هنعمل اية معاها ... وكل البنات اقترحوا علينا فكرة الشبشب دى "شرط اننا نرجعة تانى يوم;)"
طبعا احنا فعلا بنتين مننا دخلوا التويلت يشوفوا شبشب شيك كدة :d بس للاسف كل الشباشب حالتها لا تسر بالاضافة انها كبيرة جدا يعنى لو لبستها هتبقى زى اللى لابسة مركب
وفكرنا اننا نروح اى محل ونشترى لها شوز
بس البنت اتصلت بمامتها ومامتها قالت لها انها هتجيب لها شوز وجاية لها "خاصة ان بيتها قريب شوية " وفعلا مامتها جابت لها شوز
ونظرا للتحكمات الامنية فى الكلية ..مامتها معرفتش تدخل الكلية ... فخرجت جيجو وواحدة تانية يجيبوا لها الشوز من مامتها
واحنا فى انتظارهم
كنا قاعدين خارج المسجد تحت ...وكل اما نشوف بنات طالعة فوق ... واحدة مننا قامت بالواجب وبتحذرهم
"يا بنات خدوا الشوز بتاعكم جوة المسجد علشان فى واحدة الشوز بتاعها اتاخد حتى بصوا على رجليها كدة هتلاقوها حافية القدمين:d"

وبعد ما الموضوع اتحل والبنت روحت واحنا مروحين
انا عمالة بضحك اتبعت مثل مصرى بيقول" هم يبكى وهم يضحك"
هو يضحك بجد
وبيكى جدا جدا للدرجة دى وصل بينا الحال
دة احنا فى بيت ربنا الامان كلة المفروض
وغير كدة كمان
احنا فى مسجد كلية يعنى ناس فاهمة وواعية وعلى قدر كبير من علم وعارفة الحلال من الحرام وعارفة التحضر من التخلف

دة احنا اللى المفروض نعمل دراسات ونحل وتقضى على الظاهرة دى ... مش ننقلها للمساجد فى الحرم الجامعى
انا لما روحت وبحكى لماما وبابا واخواتى ...اخويا الصغير قالى "معقول ...حتى الكلية بيحصل فيها كدة؟؟"


تفتكروا اية سبب الظاهرة دى؟؟
واية حل بالنسبة للجامعة علشان نحمى الطلبة من التعرض للموقف دة؟؟
لو صديقك/صديقتك اتعرضت للموقف دة هتعمل /هتعملى اية؟؟
لو حصلت الموقف دة اية هيكون حلك؟؟
تفتكر البنات اللى شافوا اللى اخدت الشوز فى شنط ومشيت وسكتوا ..تفتكر دى سلبية ؟؟
لو انت مكانهم هتعمل اية؟؟


طبعا يا جماعة علشان
طلبة تجارة مش تزعل منى
انا كتبتة هنا "لانى حلفت وقلت لجيهاد والله لاكتبة فى منتدى تجارة"
بالاضافة انى دخلت الجزء التانى من جامعة عين شمس
على هدف انى رايحة كلية تجارة
انا عارفة ان المسجد دة مش بيخص طلبة تجارة فقط
انا كتابتى للموضوع مش بقصد اى اساءة والله :)
...


منتظرة ارأئكم:rolleyes:

نورتي القسم يا فتاة الاسلام ..

معا انك باين عليكي من كلامك انك حقوق مش تجارة .. زي ماستنبطت يعني

اهو ماعلينا .. بصي .. حكاية سرقة الشوز بتاعة الناس وهيا داخلة المساجد دي بقت شئ عادي جدا والله ..

نصيحتي بقي ليكي .. اي مسجد غريب تخشيه ومش واثقه انك حاطة الشوز بتاعك في مكان امين .. حطيه جنبك وانتي بتصلي

وعلى فكرة .. الصلاة بالشوز مش حرام .. دا دي كانت سنة كمان عن النبي صلى الله عليه وسلم .. والكلام دا مثبوت في السنة النوية وعن الصحابة كمان ..

طبعا انا مش بقول ان الشوز تبقي تصلي بيه على طول .. لكن طالما ان المكان اللي انتي فيه نضيف .. خلاص .. اخلعي الشووز بتاعك وصلي ..

نصيحة بقي تانية .. احب انبهها لجميع الناس اللي في تجارة (ولاد / بنات ) : ...

بليز يا جماعة .. ابعدوااااااااااا عن الاخوان المسلمين .. لإن ليهم عيون في كل حتة ..

ومقرهم الاساسي في مسجد تجارة بتاع البنات وبتاع الولاد كمان ..

دى حصلت حاجة اسخن من دى امبارح ف تجارة برده

موبايلات كتيرة اوى اتسرقت

من سنة اولى تجارة

والله صعبوا عليا اوى

يعنى ف اوائل ايام الدراسة ورايحين فرحانين كدا

وموبايلاتهم تتسرق

بجد حاجة صعبة اوى عليهم

انا عن نفسى جربت الحوار ده

اول ترم المحفظة اتسرقت م الشنطة

تانى ترم موبايلى اللى اتسرق وف الامتحانات

خارحة اطمن اهلى ع الموبايل

ملاقتهوش

شوفى الموقف بقى

بجد طمنتينى انتى وجيجو

بس انا دخلت اول يوم واخدت الشوز معايا جوة

اصل احنا فى القاهرة فى فى عين شمس :d

دخلت ملقتش حد جوة غير بنتين كمان

المهم

انا اتسرقت 3 مرات مقولكوش على الموقف

مرة فى العيد اللى فات ده بقى كونت لبسة شراب والموبيل فصل شحن
حالتى كانت وحشة خالص المهم واحد ابن حلال كان معدى ادانى دقيقه موبيل كلمت خالو
بالصدفة طلع بيصلى فى جامع جمبينا جالى بالعربيه واخدنى بس اهم حاجة كونت لبسة شراب وممشيتش حافية :d

ومرة من قريبا ى صلاة الترويح سيبته برة وكان قصاد عينى بيتسرق بس مكنش بايدى حاجة
كونت فى عز الصلاة ومقدرتش اقطع الصلاة علشان اقولها سيبلى حتى فرده اروح بيها :(
روحت بشبشب زنوبة ههههههههههههه كان كبير اووى بس هعمل ايه يعنى اللى يفرسك انها منقبة :((

ومرة فى اول يوم رمضان فى صلاة المغرب اكمنى جاية متاخرة البيت وكونا فى المواصلات انا وماما فصلنينا فى اقرب
جامع المرة دى بقى كونت اساسا مشتريه شوز علشان الجامعه وكده اتسرقت سكت ومتكلمش من سكات كده
طلعت الشوز اللى معايا ولبسته من غير شراب والمصيبه بوظلى رجلى ورجلى كأنها حد داس عليها
وكونت خلاص مش قادة امشى


طب كانوا يعملوا زى فى الفليم اللى بيتظبت فيه احمد حلمى فى السجن يخدوا الجزمة
ويدوبه مكلنه شبشب :d

لا بجد دية مشكلة ومنتشرة كمان نحلها ازاى يعنى كل واحدة وواحد وهو رايح يصلى يعمل حسابه فى شوز احتياطى ولا ايه؟؟!!


وبالرد على فامبير يعنى معنى كده مصليش فى المسجد ؟؟؟؟؟؟؟؟؟؟؟؟

انا هربت منهم كذا مرة اصلا اما اعمل نفسى مش واخدة بالى او مطنشة
او اتحجج باى حاجة وبس انا اساسا اتحذرت منهم كتيرررررررررررررررر

هيا عين شمس فيها ايه
دا فيه حد برضه مسروق منه موبايله قريب
يلهوى ايه دا
مالها القاهرة مفهاش سرقه خالص :d :d

نصيحة لوجه الله تصطحب كل واحدة كيس بلاستيك وتضع الشوز أمامها من باب اعقلها وتوكل وربنا يوفقكم وكل عام وأنتم بخير

انتوا خايفين من ايه يا جماعة ؟؟؟

ما السرقة على قفا مين يشيل ..

انا برده واحده زميلتي السنة اللي فاتت .. راحت التواليت ورجعت تقعد معانا ..

لسه بتفتح شنطتها مالقيتش موبايلها ..

عادي يعني ..

هوا فيه كام منطقة كدا في الجامعة الواحد ينتبه فيهم على حاجته اوي ..

1- زحمة المدرجات اثناء الدخول للمحاضرة والخروج منها

2- Love Street .. يستحسن اساسا ماتروحوش هناك !!

3- التواليتات بتاعة البنات بالذات ..

4- المساجد بتاعة كلية التجارة (الشباب/البنات) ، مسجد كلية سياسة واقتصاد ..

5- ممر حورس اللي عند كلية الحقوق .. حرسوا منه برده جامد ..

6- وانتا قايم من المدرج .. شيك على (جيوبك/شنطتك) كويس اوي ..

7- للبنات فقط .. اوعي تسيبي شنطتك او موبايلك على البينش بتاع المدرج ..

وبالرد على فامبير يعنى معنى كده مصليش فى المسجد ؟؟؟؟؟؟؟؟؟؟؟؟

بصي يا واندا .. مش هاكدب عليكي

بس الاخوان ليهم طريقة خاصة في التعامل معا الناس ..

وهيا طريقة الاحراج .. والتثبيت بالكلام الهادي جدا .. اللي يخليكي مش عارفه تردي عليه

فانتي حاذري منهم .. وحاولي تتجنبيهم .. لو وقعتي في حد فيهم .. ماتناقيشهوش خاصة في الامور الدينية

لإنه هايغلبك هايغلبك.. وانا شخصيا حصلت معايا .. واتفقعت اوي .. لدرجة وصلت فيها اني مشيت وسيبته في عز الكلام !!

وهيا طريقة الاحراج .. والتثبيت بالكلام الهادي جدا .

عندك حق يا فامبير
امبارح كنت بتكلم مع بتاع اسرة النور دا
ماعرفش انه تبع الاخوان
بس كان بيتكلم معانا بطريقه جميله جدا وبادب وبتاع واحترام
وفى الاخر يقولنا معاكو اشرف من طلاب اخوان مسلمين
قلتله فرصه سعيده سلام ياعم
ههههههههههههه

هههههههههههههه.... هم يضحك وهم يبكى فعلا بس انا بضحك لسبب تانى .. هو ان الجزمه بتاعت بابا اتسرقت امبارح راح يصلى التهجد والاحلى ان الجزمه كانت جوه يعنى اتسرقت من جوه الجامع :d اللى بيفكر فى السرقه ده والاهم ان احنا فى ايام مفترجه ومش بيسرقوا من اى مكان ده من بيت الله .. دول هيتحدفوا فى جهنم بجد والله حرام .. عامه ربنا يهدى هنعمل ايه الناس بقت بتاكل فى بعضها

انا بقي الحمد لله لما اتسرق مني شبشب في مسجد جنب البيت والحرامي الله يكرمه كان عنده اخلاق وحط شبشب تاني بداله هو كان مبهدل شوية بس اي حاجة اروح بيها
انا بقي صحبي لما دخل يصلي في المسجد في كلية تجارة الاخوان مسكوه دعكوه في الكلام لحد ما اخده منه نمرة تيلفونه والواد يا عيني من ساعتها حلف انه مش هيدخل يصلي في الكلية دي تاني لاننا سمعنا ان اللي بيدخل في مجموعة الاخوان بيتعلم عليه في امن الدولة

ههههههههههههه .. لالا عادي يا عم

مافيش مشاكل .. بس هوا اساسا ليه اداهم نمرة تليفونه ؟ ..

بص نصيحة لوجه الله .. ماتديش نمرة تليفونك لكل من هب ودب ..

سواء ان كانت بنات معا بنات او شباب معا شباب .. او حتى شباب معا بنات ..

عشان غلط والف غلط .. ماتديش موبايلك الا للي انتا واثق منه اوي

وتكون كمان تعاملت معاه كذا مرة وشوفت مايته ايه .. لكن على طول كدا ؟؟!!!

وبعدين هاقولك على حاجة .. الاخوان اهم سمة فيهم واللي بتميزهم عن اي حد تاني

التنظيم .. سرعة الانتشار .. الدخول من المدخل الديني عشان ماتقدرش تتكلم نص كلمة

انتا خليك في حالك احسن .. وبلاش تندمج معاهم .. لإن هما سكتهم مش كويسه من الاخر ..

بس عموما .. هما ليهم كذا مقر في الجامعة

بس المعقل الاساسي بتاعهم .. هاتتلاقوه عند كلية دار العلوم ..

فروعهم الرئيسية بقي هاتتلاقوها في تجارة وآثار وسياسة واعلام وحقوق

آداب ؟ .. ماينفعش اخوان هناك خااااااااااااالص !!!!!!!!!

ايه ده ده كل الناس اتسرقت امال الواحد المفروض يحس فين بالامان لو محسش ده فى المسجد يعنى !!!!!!! والله فعلا حسبى الله ونعم الوكيل حاجة تقهر بجد
بس على فكرة البنات اللى شافوا البنت دى من نظرى زى ما يكون اشتركوا معاها بالظبط
يالا ربنا يهدى

انا بقي الحمد لله لما اتسرق مني شبشب في مسجد جنب البيت والحرامي الله يكرمه كان عنده اخلاق وحط شبشب تاني بداله هو كان مبهدل شوية بس اي حاجة اروح بيها
انا بقي صحبي لما دخل يصلي في المسجد في كلية تجارة الاخوان مسكوه دعكوه في الكلام لحد ما اخده منه نمرة تيلفونه والواد يا عيني من ساعتها حلف انه مش هيدخل يصلي في الكلية دي تاني لاننا سمعنا ان اللي بيدخل في مجموعة الاخوان بيتعلم عليه في امن الدولة


ههههههههههههههه على فكرة انا سمعت فعلا والله ان كل اسمايهم فى امن الدولة ;)
ربنا مع صاحبك بقا :confused:

طب بس والنبي يا جماعة بدل مانتقفش احنا كمان معاهم !!! :p

بصراحه يا جماعه كدا كل واحد فعلا لازم ياخد كيس معاه زى ما احمد قال لان كدا مافيش امان وبعدين حرام يعنى بجد وليه الانسانه دى تعمل كدا وعلشان ايه تشيل ذنوب وعموما ربنا يهدى الجميع والناس كلها تكون كويسه وتحب بعض علشان يكون فى امان حتى على الاققل فى المسجد

هههههههههههههههههههههههههههههه عندك حق بجد يا vampire

لما فى مسجد الجامعة وبيعملوا كدة امال سابوا اية للناس التانية

انا بردوا زيك متغاظة اووووووووووى من البنات دى ازاى يشوفوهم ويسبوهم

انا مستاء من الحاجات ديه حتى فى الجامعه
بس انا عاجبنى موقف البنت التانيه اللى خدت الشبشب

بس لازم يعملوا لوحه يكتبوا فيها الاداره غير مسؤله عن الامتعه
مع ان الواحد بيتخنق من اللوح اللى زى ديه

هما الاخوان المسلمين دول بيكونوا عايزين ايه يعنى ..؟؟؟

من وجهة نظري اننا لازم نقاطع الاخوان او بالاصح نوريهم الوش الخشب علشان محدش فيهم يفكر يجي يتكلم معانا وحلو جدا موقف البنت اللي اخدت الشبشب بجد ده بيدل على ان المصريين شعب طيب وكريم وربنا يوفقكم بس انا برضه من رايي انا ادارة الجامعة لازم تعمل وقفة اصل هي مش وكالة من غير بواب اذا كان فيه واحد او اتنين واقفين على البوابة اللي بندخل منها الجامعة ليه ادارة الجامعة مش تعمل امن داخلي عند المساجد وعند الحمامات و الاماكن دي ولاهم بس مستنيين لما حد يشتكي ويشتهر بعد كده يعملوا اللازم

يا بسمله هما عايزين شباب ينضم ليهم جديد
وبيركزوا على بتوع اولى وتانيه عشان بيبقوا لسه شبه خام
وبياخدوهم بالهداوه والكلام الجميل والهادى
لغاية مينضموا ليهم ولو حصل دا يبقى خلاص كداا مش هيطلع من الكليه وهيفضل فيها بتاع تسع سنين او اكتر لغاية ميتخرج

ان اول ما نزلت فى الكليه علشان اقدم فى تجاره المنصوره قابلت كذا واحد من الاخوان المسلمين هما ما قلوش لكن انا لاحظت كده من تصرفاتهم و من اهتمامهم فى مساعدتى لكن انا اتكلمت معاهم عادى خالص و بهعد كده الحمد لله مشفتهمش و بائذن مش هشفهم تانى على فكره يا جماعه انا عمرى ما اتسرق منى الشوز بتاعى او حتى الشبشب مع انى بصلى فى مساجد مختلفه :p
لكن انا لغاية دلوقتى و لا صليت فى مسجد الكليه و لا فى مسجد الجامعه حتى و انتم كده خوفتونى ده انا كده هاخد بنصيحة احمد فى الحكايه دى:(