الحياة الجامعية [الأرشيف] - بوابة الثانوية العامة المصرية

Hanoda

08-10-2008, 10:10 PM

السلام عليكم ورحمة الله وبركاته

ازيكو ياجماعة عاملين ايه
اتمني تكونوا بخير دائما

انا هند اولي تجارة الشعبة المتميزة مجموعة ب

عايزة اعرف وجهة نظركم في الحياة الجامعية يعني ازاي الواحد يستقبل الحياة الجامعية ويتعامل معاها اكيد طبعا تختلف كتير عن المرحلة الثانوية

انا بقيت اكره الكلية جدا وبحس بملل فظيع فيها مش قادرة اتأقلم مع الكلية والناس اللي فيها تتخيلو اني لحد دلوقتي متعرفتش علي اي حد في الكلية

اصحابي كلهم في الجامعة بس مش عارفة اقابلهم
وكمان مش عارفة اكون صداقة جديدة والسبب اني انطوائية مش بعرف اختلط بالناس بسرعة وده عاملي مشكلة كبيرة جدا في الدراسة والمذاكرة مش عارفة اذاكر خالص المحاضرات مش بكتبها كلها وبعدين انا من اول السنة مروحتش الجامعة غير 4 ايام بس لاني مش لقيه حاجة تشجعني اني اروح
احنا اخدنا حاجات كتيير ولحد دلوقتي عمري ماجربت اني افتح الكشكول اذاكر الكام محاضرة اللي انا كتبتهم وكمان كل ده هيفرق معايا في الامتحان لاني لازم اجيب جيد جدا عشان اكمل في المجموعة المتميزة بس انا حاسة باحباط شديد وملل واكتئاب ولو جبت مقبول يبقي كويس بس انا تعبت وماما تعبت عشان ادخل الشعبة المتميزة وجبت واسطة ودخلت بس اخاف اني مااكملش فيها

مفيش ولايوم رحت فيه الكلية وحصلتلي حاجة كويسة
المهم اني مش عارفة اعمل ايه لكن ياريت حد يفيدني
ازاى اتأقلم مع الحياة الجامعية
ازاي اذاكر
ازاي اعمل صداقة جديدة

اجوكم اللي يقدر يفيدني مايبخلش بالرد
جعله الله في ميزان حسناتكم

wanda

08-10-2008, 10:41 PM

بصى افيدك فى المذاكرة اقرى المحاضرة بعد متخلص وبما ان لسة مفيش كتب فمش هتذكرى من الكتاب

لما تاخدى الكتاب اقرى فيه بقية المحاضرة لان الدكتور مش بيقول كل اللى فى الكتاب انتى تكملى بقى

والمحاسبة والرياضة حلى عليهم كتير لو فى تطبيقات وافهميهم كويس لانهم اهم حاجة واصعب حاجة

والسلوكية متسيبهاش امسحيها من دلوقتى محاضرة محاضرة هاتى اللى فاتك واقريه مفهمتهوش روحى للدكتور او

خلى اى حد يفهمك..

اما بقى بخصوص التأقلم مع الجامعه انا كنت داخلة اول يوم معرفش حد خالص وكونت لفيت فى الجامعه كلها لوحدى
جيت معا اخويا وسابنى ملطوعه قومت لفيت فى الجامعه وقعدت على سلالم كتير كل اما اشوف سلم اقعد عليه وكل قعده سلم بلاقى اللى قاعدين برة دول نفس مجموعتى .. كلمة تجر كلمة هوب اتعرفنا على بعض..
ارقام موبيلات علشان نعرف نلاقى بعض تانى.. فبصى انتى اكيد بتقعدى جمب ناس مش لوحدك حولى تتكلمى معاهم
تساليهم على اى سؤال هتتعرفى عليهم كلهم وعددكوا قليل مش زينا الف وقربنا على الالفين هههههههه :d

,اكيد لو اتصحبتى على حد هتعرفى تتأقلمى وتحب الجامعه انا بعد 4 ايام من مرواحى الجامعه صدفت اصحابى اللى فى ثانوى معايا صدفة والله .. وحسيت بجو الجامعه وبقيت بحب اروحها..

فحولى زى مبقولك الاول تتعرفى على زمايل واصحاب جداد وانتى مش هتتعبى خالص..

يا رب اكون افدتك بحاجة .. تقبلى مرورى

ا

Hanoda

09-10-2008, 12:51 AM

minerva

09-10-2008, 10:24 AM

ازيك يا هنوده انا قعدت ادور عليكى كتير بس معرفتش الاققيقى خالص وطبعا دلوقتى عرفت السبب ان انتى مكنتيش بتنزلى اصلا

ع فكره انا كنت زيك كده فى الاول كنت مش طايقه الجامعه خالص

بس دلوقتى الحمد لله انا بقيت بكره يوم الاجازه

وعايزه اقوللك انا الناس معانا فى المجموعه لذيذه جدا وهتلاقى نفسك بتتصحبى عليهم لوحدك واحنا دلوقتى كلنا اصحاب
اما بخصوص المحاضرات فانتى لازم تيجى علشان عندنا امتحان الشهر الجاى وانا مش عارفه انتى حضرتى محاضرت د \ البشبيشى ولا لأ بس هو وضح كل حاجه

وبجد د \ هشام بتاع الاداره دخل فى الجد وشرح حاجات كتير مهمه بس هو د كويس جدا احنا فضلنا وقفين معاه بعد المحاضره بتاع ساعه تانيه وكان بيجاوب ع كل الاسئله اللى احنا سألنهاله سواء فى المنهج او اى حاجه تانيه

فلو مفهمتيش اى حاجه ابقى اسأليه

بالنسبه للموارد بقه فانا بحضر كل المحاضرات بس الدكتور بترغى كتير اوى وكلنا بنهنج منها :blush:بس برده كلنا بنحضر وكل واحد يكتب شويه :d بس طبعا لا غنى عن الملازم بس اما نشوف الكتب الاول يمكن نفهم حاجه :confused:

فرسان الحق

09-10-2008, 11:05 PM

انا مشكلتى مشكلة المذاكره و كنت انطوائى شويه و لكنى بدات اعرف ناس كتير بطريقة انى اتكلم مع اللى بيبقوا قاعدين جامبى فى المحاضره و لكنى و مش عارف ليه بدات اكسل انى احضر المحاضرات اصل انا كل ما محاضره تخلص بعدها بكام يوم انسى كل اللى قاله الدكتور و مش عارف اذاكر حاسس انى مكسل مع انى داخل و نسى انى ادخل المجموعه المتميزه بتاعته تجارة المنصوره مع ان فى بعض الناس اللى اكبر منى فى تجاره بيقوللى انهم بيجيبوا تقديرات عاليه و بالرغم من كده ما سمعوش عن حاجه اسمها المجموعه المتميزه فانا مش عارف النظام ده فى تجاره المنصوره و لا لا ياريت حد يفدنى
المهم باذن الله ربنا هيشرح قلوبنا و هيوفقنا و هيفك كل كرب مسلم و مسلمه و لكن ده محتاج اننا نقرب من ربنا اكتر و ربنا يوفقنا كلنا

ahmed610

10-10-2008, 12:39 AM

انا بقيت اكره الكلية جدا وبحس بملل فظيع فيها مش قادرة اتأقلم مع الكلية والناس اللي فيها تتخيلو اني لحد دلوقتي

لية بس كدة يا هند حد يبقى فى الشعبة المميزة ويقول كدة بردة
ازاى اتأقلم مع الحياة الجامعية
ازاي اذاكر
ازاي اعمل صداقة جديدة
التأقلم وتكوين الصداقات بييجى مع الوقت اما المذاكرة بقى فمعرفش بالظبط المذاكرة فى الجامعة بتبقى ازاى بس اكيد محتاجة مجهود والتزام عشان تقدرى تجيبى تقدير انا شخصيا محتار فى حكاية المذاكرة دى خصوصا انى تجارة انجليزى وحتة الغة دى تعبانى شوية
كنت عايز اسألك انتو كام واحد فى الشعبة المميزة وموعيدكم بتبدأ من الساعة كام ولا ملكوش مواعيد معينة

فرسان الحق

10-10-2008, 01:32 AM

هو العامل الرئيسى للقدره على المذاكره بشكل ممتاز ان الواحد تبقى حالته المزاجيه كويسه و مفيش حاجه شاغله فكره
لو المشكله دى اتحلت هيبقى اثر المذاكره فوق الممتاز

minerva

10-10-2008, 02:04 AM

هو العامل الرئيسى للقدره على المذاكره بشكل ممتاز ان الواحد تبقى حالته المزاجيه كويسه و مفيش حاجه شاغله فكره
لو المشكله دى اتحلت هيبقى اثر المذاكره فوق الممتاز

عندك حق فعلا والاهم من كده ان الواحد يبقى عنده هدف و يا جماعه ابقوا اسألو الناس اللى اكبر منا اكيد هيقدروا يفدونا انا شخصيا بعمل كده

وان شاء الله اما الكتب هتنزل هتحل كتير وبلاش الاكتئاب ده :bosyht9:

رونالدينهوو

10-10-2008, 02:08 AM

انا كويس بصاحب نصف نص يعنى برده مش ليا اصحاب كتير
برده ناس كانوا معايه فى الثانوى بس مش مصاحبهم قوى
وبرده حسيت بملل الجامعة والله بس هعمل ايه الخيرة فيما اختارة الله
بسى حكاية الكتابة دى انا مبكتبش لانى بخرج من المحاضرة الاقيها مستنيانى فى المكتبة
لييييه
فيه طلبة تبع المكتبة خطهم كويس بيكتبوا ورا الدكتور
وبيودوها المكتبة نطلع نلاقى كل حاجة تمام
بس
انتى شدى حيلك صاحبى علشان تشجعك انى انتى تروحى الجامعة علشان نحبى تروحيها
والله انا بحاول اعمل كده

minerva

10-10-2008, 02:15 AM

[quote=ahmed610;823407]انا بقيت اكره الكلية جدا وبحس بملل فظيع فيها مش قادرة اتأقلم مع الكلية والناس اللي فيها تتخيلو اني لحد دلوقتي

لية بس كدة يا هند حد يبقى فى الشعبة المميزة ويقول كدة بردة
ازاى اتأقلم مع الحياة الجامعية
ازاي اذاكر
ازاي اعمل صداقة جديدة
التأقلم وتكوين الصداقات بييجى مع الوقت اما المذاكرة بقى فمعرفش بالظبط المذاكرة فى الجامعة بتبقى ازاى بس اكيد محتاجة مجهود والتزام عشان تقدرى تجيبى تقدير انا شخصيا محتار فى حكاية المذاكرة دى خصوصا انى تجارة انجليزى وحتة الغة دى تعبانى شوية
كنت عايز اسألك انتو كام واحد فى الشعبة المميزة وموعيدكم بتبدأ من الساعة كام ولا ملكوش مواعيد معينة

[/quot

يااحمد انت (ى) لغبتنى انت ولد ولا بنت :d وع العموم انا هقولك احنا عددنا 200 وبنتقسم لمجموعتين A _B

وكل مجموعه فيها 100 بس معتقدش ان عدد اللى بيحضروا 100 متهيقلى اقل و بالنسبه للمواعيد بقى فاحنا

اكتر يوم عندنا بدرى بيبدأ الساعه 11 واكتر يوم متأخر بيبقى الساعه 6 ونصف وبعدين حد يبقى فى انجلش

ويسأل ع المتميزه واكيد اتوا كمان عندكو امتحان الشهر الجاى فركز فى المذاكره وربنا يوفقنا كلنا ان شاء الله

ahmed610

10-10-2008, 02:02 PM

amirab2008

11-10-2008, 12:35 PM

على فكرة لو أحمد فهمى اللى بيديك مانجمنت يا احمد يبقى ممكن يأجلوا
لأنوا من أول السنة بيقول كدة و مش بيعمل حاجة
و على فكرة الميد تيرم فى شهر واحد
الإمتحان بتاع الشهر اللى جاى ده إمتحان تمهيدى و عليه اعمال سنة

ahmed610

11-10-2008, 01:36 PM

احمد فهمى قالنا على الامتحان دة من قبل العيد بس هو كل شوية يأجلو وبالنسبة للميد تيرم مفتكرش هيبقى فى شهر واحد لان دكتورة امال قالتلنا ان امتحان اخر الترم هيبقى فى 17 واحد تقريبا او قبل كدة كمان اما امتحان الميد تيرم قالت هيبقى من 9 الى 13 نوفمبر ......ياريت يا اميرة لو احمد فهمى امتحنكو ابقى قوليلى الامتحان شكلة اية ... انا مش عارف الامتحان هيبقى على شابتر 1 بس ولا لا اصل عندنا دخل فى شابتر 6 و5

amirab2008

11-10-2008, 01:44 PM

بص هو ممتحناش لسة و الله
بس أحنا كل مرة لما ياجل يقولنا الكويز حيبقى لحد ما أخدنا
بس هو فى ورق مانجمنت كويس فى مكتبه نور
أنا جبته عشان أشوف أنا ماشية صح و لا غلط فى التلخيص و الحمد لله لقيت الموضوع تمام فأنت هاته

أما للإمتحانات فأنا فى ناس قالولى إن الميد تيرم فى شهر 1

و كنت أعرف واحدة بتقولى إننا فى تجارة إنجلش بنمتحن 3 مرات فى السنة مش مرتين زى باقى الكليات
بس أنا عايزة أتأكد من الحوار ده

a_2007

11-10-2008, 06:15 PM

فرسان الحق

11-10-2008, 08:09 PM

عندك حق فعلا والاهم من كده ان الواحد يبقى عنده هدف و يا جماعه ابقوا اسألو الناس اللى اكبر منا اكيد هيقدروا يفدونا انا شخصيا بعمل كده

وان شاء الله اما الكتب هتنزل هتحل كتير وبلاش الاكتئاب ده :bosyht9:
مظبوط كل الكلام ده و انا محدد هدفى من اول ما جالى فى التنسيق كلية تجاره
حددت هدفى القريب ان انا اجيب تقدير جيد جدا
و هدفى البعيد انى ابقى سمسار بورصه
و لو متحققش هدفى القريب مش هيبقى عائق لهدفى البعيد
و لو معرفتش احقق هدفى البعيد هختار البديل انى اشتغل محاسب فى اى شركه و طبعا اول نوع من الشركات اللى هروح اسال فيها شركات البترول
حد هيسالنى انا بحط كذا بديل ليه ما احط هدف و خلاص
علشان ما اوصلش لحالة الاكتئاب لما محققش هدفى الاول

فرسان الحق

11-10-2008, 08:29 PM

يا جماعه احنا نسينا شئ مهم قوى و انا اول واحد فيكم نسيت الامر ده.........

ان احنا المفروض نعتمد على ربنا فقط و منعمدش على صاحب يساعدنا و نتوكل على الله

و لكن قولوا لى انتم ما لكم مكتابين ليه ده احنا لسه فى الاول لسه مخدناش حاجه فى المنهج قوى يعنى

لكن شعوركم بالقلق ده مبشر خير :d انكم باذن الله نويين تحققوا كويس فى الكليه و يبقى ليكم مكانه

و بخصوص الناس اللى كرهوا الجامعه يا شباب لو انتم عايزين حاجه تشجعكم انكم تنزلوا الكليه اشتركوا فى

انشطه انا اشتركت فى الصحافه و الجيم اللى فى مبنى تجاره و ناوى بائن الله اشترك فى الجواله

انا النهارده كان عندى اول اجتماع فى الصحافه علشان نحدد خطة العمل اتعرفت على الناس اللى معايا و لقيت

ناس كويسه قوى منهم واحد اسمه محمود الشاعر بصراحه انا اعجبت بشخصيته قوى و عنده موهبه فى الشعر

هو فى تانيه تجاره و عرفت اتنين زيه برده و معاه فى تانيه تجاره و واحد معايا فى تجاره انتساب شخصيته برده

كويسه و مش من نوع بتاع يا مصلحتى و واحده فى تانيه تجاره عندها شخصيه طموحه و مثقفه و كلهم عندهم

موهبه فى كتابة الشعر بامانه بهرتنى

minerva

11-10-2008, 09:57 PM

يااحمد انت (ى) لغبتنى انت ولد ولا بنت ههههههههه احمد بنت ازاى يعنى اكيد ولد
واكيد اتوا كمان عندكو امتحان الشهر الجاى قصدك الميد تيرم اة للأسف دة احنا عندنا امتحان مانجمينت الاسبوع الجاى عشان اعمال السنة بصراحة انا مش متعود على الامتحانات الكتير دى ايام الثانوى كنا بنمتحن اخر السنة وخلاص ..ركزى انتى فى المذاكرة وان شاء اللة كلنا نجيب تقديرات حلوة ........ وشكر لردك

معلش يا احمد الموضوع لف معايا شويه تقريبا قرات وانا نايمه :d صحيح عندك حق ازاى احمد وبنت مش ركبه

خالص ليك عندى سورى ياعم :blush:

فرسان الحق

11-10-2008, 09:59 PM

على فكرة يافرسان الجحيم انا كمان تجارة المنصورة سنه اولى ياريت نبقى نساعد بعض عشان انا محتاسه جدااا وكارهه الجامعه خالص ومش لاقيه اصحاب جادعين الكل عايزك عشان مصلحته وخلاص ابقى رد عليا عشان نبقى نساعد بعض
انا موافق و لكن ياريت توضحى لى ازاى اقدر اساعدك؟
على فكره ياريت ما تياسيش كده انت بالتاكيد هتلاقى بنات كتييييييييره جدا كوسيين و مش من نوع يا مصلحتى
و فيه منهم ما هيكمل معاكى فى حياتك و هتضلى على صله بيهم باذن الله انتى لسه فى اول السنه
و متكرهيش الكليه كده لانك لو كرهتيها مش حتحقيقى ذاتك فيها
ابشرى خير ان شاء الله انا مر عليا ناس كانوا متوترين و متشامين و فى الاخر فجئوا كل الناس و حققوا حاجات عظيمه انتى مسيرك مع الوقت و مسيرنا كلنا عقلنا هيتفهم وضع الجامعه و هنبقى فولا شمعه منوره ان شاء الله و مين يسمع ممكن انتى نلاقيكى بعد التخرج بقيتى معيده فى الكليه:oو بتحضرى درسات عليا كمان

فرسان الحق

11-10-2008, 10:06 PM

يااحمد انت (ى) لغبتنى انت ولد ولا بنت ههههههههه احمد بنت ازاى يعنى اكيد ولد
واكيد اتوا كمان عندكو امتحان الشهر الجاى قصدك الميد تيرم اة للأسف دة احنا عندنا امتحان مانجمينت الاسبوع الجاى عشان اعمال السنة بصراحة انا مش متعود على الامتحانات الكتير دى ايام الثانوى كنا بنمتحن اخر السنة وخلاص ..ركزى انتى فى المذاكرة وان شاء اللة كلنا نجيب تقديرات حلوة ........ وشكر لردك
معلش يا برنس اصل انت كنت كتبت فى ردك الاول مش قادرة بالتاء المربوطه فده اللى لخبط الناس اللى فى المنتدى
و لكن ان شاء الله يا سيدى
و ياريت اتعرف بيك و اعرف انك منين؟

minerva

11-10-2008, 10:12 PM

لا ده مش هو يا فرسان اللى كاتب مش قادره دا هو عامل اقتباس من هند ورادد عليه

فرسان الحق

11-10-2008, 10:17 PM

اه فهمت خلاص مخدتش بالى

zikas rou2a

13-10-2008, 08:50 PM

ازيك ياهوندا طبعا انا مش لاقي حاجه تانيه اقولهالك زمايلنا كلنا قالو كل حاجه ماسبوش حاجه مقلوهاش ويارب كلامهم يفيدك...ومش عايزك تتخنقي من جو الجامعه وكده انا كنت كده بس ابتديت اخد عليها..علي فكره انا كان المفروض اخش مجموعه متميزه انا جايب 90 بس بصراحه مكنتش اعرف موضوع التجاره المتميزه دي..بس مش مشكله اهو النصيب بقي...المهم ربنا يوفقك ويوفق جميع الطلبه.....انتي تعرفي حد من مجموعه ج هنا في المنتدي؟ اكيد لاء:stickjo4:

Hanoda

14-10-2008, 01:01 AM

ميرسي ليكو ياجماعة علي الكلام اللي انتو قولتوه
وانا فعلا بدأت اتأقلم علي الجامعة
ومن بعد العيد مافوتش ولا محاضرة
انتو شجعتوني وريحتوني بكلامكم ده
ميرسي ليكو مرة تانية
:078111rg3::):078111rg3::):078111rg3::):av4056bb7j p3::078111rg3::):078111rg3::):078111rg3::)

TAREK KEWAN

24-10-2008, 08:31 PM

انا فى اولى تجاره english جامعة المنصور واعتقد انها اصعب من تجاره عربى بس والله مفيش احلى من المذاكره ولا فى اسهل منها

اما تيجى تذاكر متفتكرش ان كل حاجه حفظ وتحفظ وخلاص لا لا لا لا كلية تجاره عاوزه اللى بيفهم وبعد كده يحفظ

والله لو اتمدت ان انت تفهم قبل ماتحفظ هتلاقى كل حاجه سهله

عن نفسى انا بعمل كده واللى يحس انه مش فاهم حاجه يروح للدكتور فى الغرفه بتاعته او يروح للمعيد واكيد هيفهمه

انا بتمنى نبقى اصحاب على العموم لو حبيتوا تلاقونى هتلاقونى على طول عند مدرج عساف