السلام عليكم و رحمة الله

احم...هو الموضوع دا مش المفروض يبأى هنا اصلا بس انا جيبته و خلاص
دى اغنية كدا كتبتها اختى الصغيرة
بصراحة حماسها هو اللى خلانى اجيبها عشان اعرف رأيكو
و جزء منه الاغنية دى اهو

===========
يوم ما شفتك كان يوم حزنى
كان يوم جرحى
كان يوم اسى لبقيت عمرى
بكيت لما جيت
قلتلى ازاى انا نسيت
لو تعرف اد ايه انا اسيت
عشان يوم اشوفك فيه
و تقوللى عملتلك ايه
كان يوم صحيته...لقيتك مشيت
و عرفت ساعتها...
انك لقيت
حد تانى و قلت يا ريت
ترجع عشان اصارحك
و اقوللك نسيت امتى جرحك
كان لسة جديد
و انا كنت السبب
فى انك نجيت........

=========
دا كان جزء بسيط
و شكلكو مش فهمتو حاجة اصلا :d
هو الموضوع ان دا كان مجروح
و هى وقفت جنبه
و لما حاله اتحسن
سابها و راح لحد تانى
كالعادة:angry2:

عايزة رأيكو بصراحة
و راعو ان سنها صغير:d

برافو
بداية كويسة
ربنا يوفقك

عزيزي الغالي .. اختك عندها كام سنة .. يا ريت نعرف .. وياريت تشجعها اكتر واكتر لان بدايتها فيها خير .. وفيها موهبة واضحة .. ربنا يوفقك ويوفقها يا رب

بداية احب اقولك ان ده مكان الموضوع
وعلى فكره الكتابه دى موهبه مش باسن خالص
انا اول مره كتبت فيها كان فى 2 ابتدائى وكان جميل اوى وماذلت بكتب
اختك محتاجه تشجيع علشان تعرف قيمة اللى بتكتبه حتى تستمر فى كتابتها
وفعلا دى بدايه كويسه ليها.

شكرا يا جماعة على مروركم و تشجيعكم دا
دى طلعت موهوبة من ورايا:d
طيب جزء تانى اهو
===============
و انا شايفة الناس حواليا كل واحد ليه حياته
كل واحد ليه حكاياته
كل واحد مش شايف غير سعادته
و غير نفسه ملهوش و كرامته
لو فكر فى لحظة فى حد غيره
يبأى اتقلبت الدنيا و اتقلب تفكيره
ليه الدنيا مفيهاش احساس
مفيهاش ناس
بيفكرو فى حد قريب منهم
و يسألوهم عن اللى شاغلهم
يمكن فى يوم تحتاجلهم
ولا هو خلاص عشان مبسوط
يبأى تفرح و تقول هموت
من كتر الدحك خلاص
و مش همك اللى جنبك
نسيت لما كنت مكسور
فى يوم سعدك لغاية الهموم
و مهموش نفسه عشان راحتك
و دلوقتى نسيت كل دا و عايش براحتك
الدنيا خلاص انتهت ولا ايه
كل واحد مش عايش غير بس ليه.......
===============

نحن في انتظار الجزء الثالث .. حاول تخليها تقرا شعر كتير بالذات شعر الأغنية والشعر العامي عشان الوزن والموسيقى يتظبطوا اكتر عندها .. ربنا يوفقها .. يا رب