مشاهدة النسخة كاملة : يامنه ( عبد الرحمن الأبنودى )


وحيدة شكلى
19-10-2008, 05:53 PM
أحبتى وأخوانى وأخواتى . الأعزاء
اليوم أقدم لكم شاعرنا الكبير
الخال ( عبد الرحمن الأبنودى )
فى قصيدة يحبها الجميع .
( يامنه)

والله وشبت يا عبد الرُّحمان ..

عجّزت يا واد .؟

مُسْرَعْ؟

ميتى وكيف؟

عاد اللي يعجّز في بلاده

غير اللي يعجز ضيف.!!

هلكوك النسوان؟

شفتك مرة في التلفزيون

ومرة .. وروني صورتك في الجورنان

قلت : كبر عبد الرحمان.!!

أمال انا على كده مت بقى لي ميت حول.!!

والله خايفة يا وليدي القعدة لتطول.

مات الشيخ محمود

وماتت فاطنة ابْ قنديل
واتباع كرم ابْ غبّان

وانا لسة حية..

وباين حاحيا كمان وكمان.

عشت كتير.

عشت لحد ماشفتك عجّزت يا عبد الرحمان.

وقالولي قال خَلَّفت

وانت عجوز خلَّفت يا اخوي؟؟

وبنات..!!؟

أمال كنت بتعمل إيه

طيلة العمر اللي فات؟

دلوقت مافقت؟

وجايبهم دِلْوكْ تعمل بيهم إيه؟

على كلٍّ..

أهي ريحة من ريحتك ع الأرض

يونسُّوا بعض.

ماشي يا عبد الرحمان.

أهو عشنا وطلنا منك بصة وشمة.

دلوك بس ما فكرت ف يامنة وقلت: يا عمة؟؟

حبيبي انت يا عبد الرحمان

والله حبيبي .. وتتحب.على قد ماسارقاك الغربة

لكن ليك قلب.

مش زي ولاد الكلب

اللي نسيونا زمان

حلوة مرتك وعويْلاتك

والاّ شبهنا..؟

سميتهم إيه؟

قالولي : آية ونور.

ماعارفشي تجيب لك حتة واد؟

والاّ أقولك :

يعني اللي جبناهم..

نفعونا في الدنيا بإيه؟

غيرشي الانسان مغرور.!!

ولسه يامنة حاتعيش وحاتلبس

لمّا جايب لي قطيفة وكستور؟

كنت اديتهمني فلوس

اشتري للركبه دهان.

آ..با..ي ما مجلّع قوي يا عبد الرحمان.


طب ده انا ليّا ستّ سنين

مزروعة في ظهر الباب

لم طلّوا علينا أحبة ولا أغراب.

خليهم..

ينفعوا

أعملهم أكفان.!!



كرمش وشي

فاكر يامنة وفاكر الوش؟

إوعى تصدقها الدنيا..

غش ف غش.!!

إذا جاك الموت يا وليدي

موت على طول.

اللي اتخطفوا فضلوا أحباب

صاحيين في القلب

كإن ماحدش غاب.

واللي ماتوا حتة حتة


ونشفوا وهم حيين..

حتى سلامو عليكم مش بتعدي

من بره الأعتاب



أول مايجيك الموت .. افتح.

أو ماينادي عليك .. إجلح.

إنت الكسبان.

إوعى تحسبها حساب.!!

بلا واد .. بلا بت..

ده زمن يوم مايصدق .. كداب.!!

سيبها لهم بالحال والمال وانفد
إوعى تبص وراك.الورث تراب

وحيطان الأيام طين

وعيالك بيك مش بيك عايشين..!!

يو.....ه يا رمان..

مشوار طولان

واللي يطوِّله يوم عن يومه يا حبيبي .. حمار

الدوا عاوزاه لوجيعة الركبة

مش لطوالة العمر.

إوعى تصدق ألوانها صفر وحمر


مش كنت جميلة يا واد؟

مش كنت وكنت

وجَدَعَة تخاف مني الرجال ..؟

لكن فين شفتوني ..؟

كنتوا عيال.!!
بناتي رضية ونجية ماتوا وراحوا

وأنا اللي قعدت.

طيِّب يا زمان..!!

إ

إوعى تعيش يوم واحد بعد عيالك

إوعى يا عبد الرحمان.



في الدنيا أوجاع وهموم أشكال والوان.

الناس مابتعرفهاش.

أوعرهم لو حتعيش

بعد عيالك ماتموت.
ساعتها بس ..

حاتعرف إيه هوّه الموت.!!



أول مايجي لك .. نط


لسه بتحكي لهم بحرى حكاية

فاطنة وحراجي القط..؟
آ.. باي ماكنت شقي وعفريت

من دون كل الولدات.

كنت مخالف..

برّاوي..

وكنت مخبي في عينيك السحراوي

زي الحداية ..

تخوي ع الحاجة .. وتطير .

من صغرك بضوافر واعرة .. ومناقير.

بس ماكنتش كداب.

وآديني استنيت في الدنيا

لما شعرك شاب..!!
قِدِم البيت.

اتهدت قبله بيوت وبيوت.

وأصيل هوه..

مستنيني لما أموت..!!

تمللي حاجات.


حاتيجي العيد الجاي؟

واذا جيت

حاتجيني لجاي؟

وحتشرب مع يامنة الشاي .؟؟


حاجي ياعمة وجيت..

لالقيت يامنة ولا البيت ..!!
قدمتها لكم : اختكم وحيدة

http://sl.glitter-graphics.net/pub/970/970471pflqklgbzk.gif (http://www.gulfson.com/vb/)

_GUIDE_
19-10-2008, 06:09 PM
جميلة اوى
عبد الرحمن الابنودى شاعر كبير
ومعروف بكلامه الناقد واسلوبه الرائع فى الالقاء والشعر
شكرا ليكى مرة تانية

aquavia
20-10-2008, 10:49 PM
الله يرحم الجميع أحياء و أمواتا
و الأعمار بيد الله و محدش عارف مين ح يموت قبل مين
فمش المفروض الواحد يتمنى الموت
فممكن الست الكركوبة دى تستفيد من عمرها الكبير فى التقرب لله اكثر فكده الميت حول يبقى ليهم فايده

بس فى الأول و فى الآخر قصيدة
شكرا جزيلا أصل أنا سمعت عنها كتير و عمرى ماقرأتها قبل دلوقت

وحيدة شكلى
21-10-2008, 02:13 AM
أخى الكريم : مشكور
على مرورك وردك على الموضوع
لك منى كل الود والأحترام
هذه القصيده باللهجة الصعيدية
وهى تصور بعضاً من الحياة فى الصعيد
الجوانى .
أخى: اقرأ القصيدة مرة أخرى
وتمعن فى كلماتها ، ترى المغزى الحقيقى منها.

أختك : وحيدة

وحيدة شكلى
21-10-2008, 02:21 AM
أخى الكريم الأستاذ / جوده..... الموقر
لقد سعدت بمرورك على متصفحى
وردك السريع على هذه القصيده
للخال ( عبد الرحمن ) ، فهى من القصائد
المعروفة لدى شاعرنا الكبير ، والمطلوبة دائماً
فى كل البلدان العربية . وفى مصر بالأخص .
لك منى كل التحيات ، وبكل اللغات .
أختك:::: وحيدة

أحمـدنجـم
21-10-2008, 02:49 AM
ناقلة عبقرية لشاعر عبقري للغة عبقرية وجو عبقري وقصة عبقرية ولكنة عبقرية .. وصعيد عبقري وأبنودي عبقري وخال عبقري شكراً لكل العباقرة الذين قدمتيهم لنا .. تقبلي مروري

وحيدة شكلى
21-10-2008, 08:30 PM
أخى العزيز الأستاذ الكبير ..... أحمد نجم
تحية معطرة بوروود الياسمين والنرجس
لك كل الود والأحترام لشخصك النبيل
( عاشق للصعيد ولهجته ). هكذا سميتك
كنت انتظر مرورك على متصفحى .
مشكور أخى الكريم
ودمت لى بتشجيك الدائم ، فى هذا المنتدى العظيم.
تقبل تحياتى .
أختك ::: وحيدة
http://sl.glitter-graphics.net/pub/555/555005b9k4gc7kqe.gif (http://www.gulfson.com/vb/)

_GUIDE_
21-10-2008, 08:54 PM
:unsure:جوده مين :huh:
هغيره الاسم حاضر :)

وحيدة شكلى
21-10-2008, 09:55 PM
هههههههههههههههههه
أسفه ،اصل ثقافتى هندى على صعيدى
سامحنى ، ممكن الاسم الحقيقى .

_GUIDE_
21-10-2008, 10:03 PM
..............
جودى :d

aquavia
22-10-2008, 01:28 AM
أخى الكريم : مشكور
على مرورك وردك على الموضوع
لك منى كل الود والأحترام
هذه القصيده باللهجة الصعيدية
وهى تصور بعضاً من الحياة فى الصعيد
الجوانى .
أخى: اقرأ القصيدة مرة أخرى
وتمعن فى كلماتها ، ترى المغزى الحقيقى منها.

أختك : وحيدة



هل تقصدينى أنا؟؟؟
على العموم أنا تقريبا شفت المغزى الحقيقى منها
و هو إن الست يامنه مش شايفة لحياتها معنى بعد ما كبرت و ولادها ماتوا وبتنصح الأبنودى إنه مايخافش من الموت و مايعملش حساب لبكرة لأن الموت راحة و أهون من الحياة يعد وفاة الأحبة

ولا فى مغزى تانى يا أخت وحيدة؟
و على فكرة أنا ماعيبتش فى القصيدة هى حلوة بصراحة