انا لسه مشترك في المنتدى جديد لانه جامد جدا ويفيد اي طالب عاوز يعرف معلومات عن كلية سياحه وفنادق بس انا ليا استفسار وياريت ترد عهليا ضروري انا طالب بكلية تربيه عام قسم رياضه جامعة الزقازيق انا لسه في سنه اولى وانا علمي رياضه وجايب 92% في الثانويه بس ربنا موفقنيش في الكليه وضاعت كده عليا سنه وعاوز احول لكلية سياحه وفنادق جامعة حلوان ياريت ترد عليا بسرعه وتقولي ينفع احول ولا لا ولو ينفع احول ياريت تقولي ايه الاجراءات وياريت تقولي ازاي اقدر اتواصل مع الكليه يعني لو ارقام تليفونات او ايميلات ياريت الرد بسرعه لان انا فعلاا محتاج لحد يفيدني ضروري وشكرا على مجهوداتك الرائعه

هي الدراسة كلها بالانجليزي
وفيه كام لغة في الكلية دي؟؟؟؟
ارجو الرد بسرعة وشكراااااااااااااااا

الدراسة فى قسم ارشاد سياحى فقط هى اللى بالانجليزى ماعدا فى سياحة وفنادق المنصورة فمواد التاريخ والاثار كلها بالعربى لكن فى الجامعات التانية الدراسة بالانجليزى .

وبتاخدى لغتين من بينهم انجلش وانتى بتختارى اللغة التانية ماعدا فى سياحة وفنادق المنصورة فمفيش لغة تانية غير ايطالى

اهلا بيكي معانا....
انا سألتلك وقالولي ف كلية السياحة ف المنيل وتروحي شئون الطلبة تسألي هناك ومدتها تقريبا سنتين...
وربنا يوفقك

ازيكم يا جماعة
انا بس كنت عايزة اسال عن سياحة و فنادق اللى فى اسكندرية فيها لغات ايه -- و ايه احسن لغة هناك ؟
و يفضل انى اخد كام لغة فيها ؟؟
و قسم ارشاد فيها باخد المواد كلها بالانجليزى ولا لا (عشان تفرق معايا)

و هو اساسا فيه سياحة و فنادق عربى و واحدة انجليزى و لا ايه ؟
و لو فيه ايه الفرق بينهم ؟.

معلش سؤال متخلف :d
بس انا مش فاهمة معلش

اه طبعا فيه سياحة وفنادق انجليزى زى ما فى تجارة انجليزى بس سياحة وفنادق انجليزى موجودة فى جامعة حلوان بس وبمصاريف 3000 جنية تقريبا .

ومش بتفرق كتير فى سوق العمل لكن بتفرق فى ناحية الدراسة , يعنى مثلا خريج سياحة انجليزى بيبقى فاهم الدراسة كلها بالانجليزى وبالتالى مش هيحتاج كورسات فى الانجليزى لما يتخرج لكن سياحة عربى لو كان الانجلش بتاعه قليل اعتقد بنسبة كبيرة هيتخرج مش محترف فى الانجليزى تماما

يعنى من الاخر سياحة انجليزى هتخرجك حلو فى الانجليزى وكمان هتاخد فكرة او خلفية اساسية عن اللغة التانية , يعنى بتفرق فى اللعة وممكن تديلك اولوية شوية فى الشغل بعد التخرج وده من وجهة نظرى .

وياريت محدش ينسى ان مفيش حد بيشتغل فى كليتنا دى الا لما يكون معاه لغة كويسه وده لو انت عايزة وظيفة محترمة .

شكراااااااا على ردك

طيب هو هناك فيه لغات ايه ؟؟؟
و ايه اسهل لغة فى رأيك ؟

لو قصدك سياحة وفنادق حلوان ففيها لغات كتير بالاضافة الى الانجليزى زى الفرنساوى والالمانى ولغات تانية ممكن تسألى هناك ومعظم كليات السياحة فى مصر فيها لغات كتير ماعدا المنصورة ففيها ايطالى بس .

اسهل لغة من رأيى هى الايطالى وبرضو الاسبانى خفيف شوية اما الالمانى فزى ما بيقولوا انها لغة خشنة صعبة شوبة عايزة ممارسة كتير , والفرنساوى صعب الى حد ما لان فى قواعد كتير وصعب تاخدية كلغة تكلمى بيها سياح اجانب

ونصيحة عن تجربة باريت متدرسيش الايطالى والفرنساوى مع بعض لان هيحصل تداخل جامد جدا بينهم يعنى لازم تختارى واحد من الاتنين اذا كنتى ناوية على واحدة منهم .

شكراااااااااااا جدا على اهتمامك

السلام عليكم .. كنت عايزه اعرف في لغات ايه تاني غير دول ؟ في برتغالي ؟؟

ايه ده ياخوانا
فى ناس كتير قالولى ان قسم ارشاد متعب للبنات و احسن انى اشوف قسم غيره :(
طب انا محتاسة -- ممكن تقولولى ايه افضل قسم هناك ؟؟؟

بوصي يا ريد فلاور
اللي بيقولوا قسم ارشاد متعب للبنات بيقولوا كده على اساس انه كله رحلات و شمس وحر وبهدلة والكلام ده
بس في بنات بتدخله بردو لو انتي حباه ادخليه
نيجي بقى للقسم الاحسن بالنسبالك لو مش هتدخلى ارشاد
في نظري انه سياحة لانه بتتجه ليه معظم البنات ( مع اني انا دخلته :d )
وده بياهلك لانك تشتغلي في مكاتب سياحية وشركات طيران مع اختلاف التدرج الوظيفي زي حجز تذاكر او اعمال ادارية او مضيفات حجات كتير يعني وكويسة جدا وطبعا شركات الطيران الكبيرة في مصر بتدفع فلوس كويسة قد تتعدى 1000 جنيه انما شركات السياحة بتبدا من 450 جنيه
اما قسم فنادق ده ابعدي عنه :d
اتمنى اكون افدتك

طيب سؤال غبى معلش
هو الارشاد ده مينفعش يكون فى مكان ثابت يعنى استقر فى بلد واحدة و اشتغل فى الحاجات اللى فيها
ولا هو دايما بكون انا اللى مسئولة عن فوج معين و بنظمله البرنامج بتاعه كله فى كذا مكان مش جزء منه ؟؟؟

معلش انا عارفة انه سؤال غبى بس انا مش فاهمة اوى !