انا علي ايامي كان كل كتب الانجليزي الخارجيه متجاوبه ف نفس الكتاب مش فاكره اوي كنت بستخدم ايه هتلاقوه ف المشاركات السابقه بس غالبا surprise
the best :d
الزهايمر اشتغل لاني بعدانه عن الثانويه بقالي عمر :022yb4:(الحمدلله يعني ):d

شكرا على موضوعك الاكترمن رائع انا بس هستغل انك موجوده .. وهسأل عن تنظيم الوقت .. وفى حاجة كمان لفتت نظرى وهيا " كورسات التنميه البشريه " لو كنتى اتكلمتى عنهم قبل كدة يا ريت رابط الصفحه ولو متكلمتيش ابقى اتكلمى لاننا بنستفاد بخبرتك جامد :)

لا هو انا لو اتكلمت هفتكر الصفحه الموضوع لو كان طفل كان زمانه بدأيتكلم :d
بالنسبه لتنظيم الوقت فانت اللي هتقدر تعمل كده وده هيبقي متماشي مع ارادتك يعني مثلا اللي بيزاكر عشان يدخل طب مش هيدي وقت زي اللي بيزاكر عشان يدخل معهد:d
انا تقريبا الثانويه العامه ويمكن الجامعه كمان يومي ما هو الا مدرسه او جامعه دلوقتي كورسات او دروس ومزاكره تصل الي ما شاء الله من المده بس ده ليه ؟
اقولك ليه :d
لاني وبلا فخر بطيئه وبحب التكرار انتحر يعني:d لا بعوض البطئ بكثره ساعات المزاكره والتكرار الكتير بيثبت سواء بالحفظ بالورقه والقلم او حل الاسئله ولما بتيجي تراجع بيكون فاكر كويس
لكن لو ربنا مديك ف قدراتك انك تنجز الكميه المطلوبه باتقان ف وقت قليل وتحقق التارجت بتاعك :022yb4:باقي الوقت المتبقي حلال فيك تقوي مهاراتك تتسلي براحتك
اما بالنسبه لكورسات التنميه البشريه كنت بسمع ع اليوتيوب للدكتور الفقي وهتلاقي فيه كورسات تقريبا تبع رساله وما شابه بينظموا حاجات زي كده
وميزه التنميه البشريه انها بتقوي شخصيتك من جواك وغالبا اللي بيديها بيبقي دارس ما يسمي بالسيكولوجي :022yb4:قسم عندنا فعين شمس بيدرسه اساتذه الطب النفسي فيه منهم بيتجه للمجال ده وفيه ناس ف المجال ده مش من طب بس كويسين
ربنا يوفقكوا :d

باين ان الموضوع قديم جدا .. مفيش حل غير انى ادور فيه وخلاص ^_^ .. بس كنت عاوز اسال برضو بالنسبه لكلمات الانجلش ايه افضل طريقه لحفظها وتثبيتها .. وكمان بالنسبه لموضوع تعدد المدرسين ف الماده ؟

افضل طريقه للحل والتثبيت هي الورقه والقلم وانك تبدا تحل قطع كتير فهتلاقي كلمات فهتفتح القاموس فهتقوي نفسك بمعني انك بعد ما حفظتها بتطبق
اما بقي تعدد المدرسين انا كنت باخد مع كزا واحد ف نظامنا القديم فمقدرش اقولك وحش :022yb4: ومعظم اللي كانوا بيعددوا ف طب وصيدله
بس فيه برده كانوا بيعددوا بغباء وملحقوش تجاره :blush:
الفكره ان الاستاذين يبقوا عباقره فتستفاد من الاتنين
او بيكملوا بعض لو حسيت ان ده كويس بس مش بيديك كل حاجه
واهم حاجه تكون بتزاكر اول باول مش تحرق نفسك نزول ومتبقاش انت بتزاكر اصلا
وتحل كتير تطبق علي اللي بتزاكره اول باول
بس ومتخافش وتتوكل علي الله سبحانه وتعالي

إن شاء الله ^_^ .. معلش بس هستغلك شويتين كمان لو مفيهاش راخامه ^_^ .. اكبر مشكله كانت بتواجهنى جدول المذاكره .. اسمع دايما ان ناس بتحط جدول للاسبوع وجدول للشهر كلو وكدة .. حاولت اعمل كدة بس مكانش بيظبط جامد فياريت تقوليلنا طريقتك ف عمل الجدول ونظام المذاكره وكدة .. والتمسيلى اى عزر معلش .. نادر ما بلاقى حد اسألو وجوايا اسأله كتير صراحه بس مش هزود عليكى تانى :)

انت مستغرب ليه ان جدول المزاكره بيبوظ ده من شيم العظماء :d
قولي ليه؟
لان الناس اللي بيبقي حلمها كبير بتكلف نفسها مالا طاقه لها به
بتحط حاجات كتير علي وقت قليل وده اكبر غلط ;) غالبا مبينفذش وبيضيع وقت يندم ع الجدول اللي منفذوش :d
اما بقي الحل انك متكتبش جداول كده وتحطها قدام عنيك تزغللك الرؤيه
خليها ف دماغك بمعني ابدا زاكر شويه بالماده السهله لو انت مكتئب واقطع فيها جز كويس حسيت بالملل تعمل ايه :dقوم افتح التلاجه خيارايه كده وارجع تاني :d وامسك ماده تانيه
ولو انت من النوعيات اللي بتمسك 3 ف اليوم فهتقلل ساعات القاعده ف الماده
بس ف الواقع هتلاقي نفسك ممكن تمسك ماده واحده ف اليوم :d وده برده شغال وبياكل عيش يعني الناس اللي بتزاكر الماده قبل درسها عشان تستفاد بتخلي اليوم اللي قبل الدرس مزاكره للماده بتاعه بكره ف الدرس ساعات كتير كنت بعمل كده بس براجع القديم كله وبحل الواجب كمان وبكده ده برده اسلوب كويس للمراجعه المستمره
اللي اقصده ان فيه اكتر من طريقه تنظم بيها وقتك حسب انت من انهي نوع بتاع الماده الواحده ولا الاتنين ولا ال3
المهم انك تطبقه صح وتبعد عن المشتتات الفيس بوك والاصحاب وما شابه :022yb4:انا وانا ف ثانوي مكنتش اعرف يعني ايه فيس بوك ده مكنتش اعرف بتاع ايه :d
ولا كان ليا صحبات خروجات وتضييع وقت ولا كدا
فرتب امورك والغي المشتتات وقرب من ربنا واستعين بيه
واي حاجه انا ف الخدمه :d
لا تتقيل ولا حاجه انتوا اخواتي الصغيرين :d بس عايزه اعرف هل حد من اللي قروا الموضوع من قبل كده دخل كليات كويسه ولا ايه طمنوني عليكوا علطول

موضوع جميل :)
جاري التطبيق :d

بارك الله فيكي ^^

حلوه فكره التلاجه دى :d وإن شاء الله اقدر انفز الكلام دة

عندك حق في كلامك

ربنا يوفقكوا جميعا :d

لو سمحتى انا فى درس الرياضه صحابى يتكلموا ويهزروا غصب عنى بهزر معاهم والنتيجه ساعات بلاقىحاجاتمش فاهماها وكمان انا نفسى ابقى متفوقهجدا فى الانجليزى ممكن تقوليلى ازاى وكمان انانفسى اكون دكتوره ازاى اوصل لحلمى

بصي انا مكنتش بحب اخد درس فمجموعه فيها صحباتي :d لا وكمان ايه صحباتي مكنوش بيهزروا دول كلهم كانو مجموعهم فتانيه من 99 فالميه الي 99.8 في نفس الرنج بتاعي ساعتها وجاولت اوفق المواعيد فمجموعه تانيه ميكونش العيال اللي فيها بيبصوا لبعض ومتغاظين من بعض عشان انا مكنتش صاحبه مبدا خليني فدرس العيال الحريته كنت بتخنق منهم :d\
وبردوا مكنتش بختار مجموعه يكون فيها ضحك وفرفشه انا كنت بختار مجموعه عارفه ان البنات اللي فيها عايزه تحقق حلم عالي بس بتجتهد جامد فكانوا بيشجعوني بعكس الدحيحه بيخبوا او مبيظهروش
نصيحتي ليكي لو ينفع تغيري المجموعه وتطلبي من المستر كده كان بها لان الهزار ده عارفاه بيضيع وقت وهيشتتك وحرام تضيعي حلمك
:022yb4:المهم اصلا يكون الاستاذ كويس لان اللي بيسمح بالهزار غالبا بيبقي مش قوي فشوفي لو في احسن منه روحيله وريحي نفسك من اللي ممكن يعطلوكي
كنت هقلك الحل التاني متنخرطيش معاهم بس بصراحه انا برجح انك تبعدي عنهم خالص خصوصا لو انتيمه وكده بيضيعوا وقت والله انتي اولي بيه انا عن نفسي مكنتش بحب جو الصحوبيه فالدراسه نهائيا الي الان حرام تضيعي حلمك وف الاخر الناس بتتفرق
والرياضه محتاجه تركيز فشوفي يا تسيبلهم المجموعه يا تشوفي مستر احسن ومتتكسفيش من حد حلمك اهم
الانجليزي بقي حسب تاسيسك ده اولا ثانيا حسب انتي بتعمليله ايه دلوقتي يعني زمايلي كانوا بيسيبوا القطع ويحلو باقي الاسئله وهم بيزاكروا انا كنت بموت فحل القطع وتخمين معاني الكلمات
الانجليزي محتاج فهم وحفظ الجرامير والكلمات كويس اوي وتحلي كتير واقري الموضوع من اوله كنت كاتبه اسامي كتب وحاجات كنت بلجأ لها ساعتها بس انا دلوقتي رايحه 3 طب ونسيت الاسامي :022yb4:
اما بقي انك تبقي دكتوره فده مش بعيد عن ربنا خالص الثانويه العامه زيها زي أي سنه دراسيه عاديه جدا الناس هي اللي مهولاها ومصعباها عليكوا عادي جدا شويه كتب لو اتفهمو كويس واتحفظووا كويس واؤكد علي اتحفظوا دي لان المصحح يحب ان يري نسخه من الكتب وطبعا الفهم مهم لانك لو مفهمتيش مش هتحفظي :d زاكرتي حلي بقي حلي كتب كتير :d حليتي لازم تكوني مع احسن مدرسين فالمنطقه والمناطق المجاوره معروفين هتلاقي الدحيحه كلهم عندهم جيل ولا جيل بيروحوا كليات القمه ودي نقطه مهمه المدرس بيشغلك :d روحتيله ابعدي عن المواويل كلهااااا فيس بيت اصحاب مشاكل تبقي حياتك مزاكره * مزاكره :022yb4: بس مع ده كله تكوني متفائله اصله عادي هي دي المزاكره اصلا مش وصفه للثانويه اللي بيطلع الاول علي ابتدائي بيعمل كده واللي بيطلع الاول علي حضانه بيعمل كده :022yb4: اوعي تسمحي للياس ولا الاحباط انه يهوب نحيتك بقدر الامكان طول السنه بتاعت 3 ثانوي دي
ارضي ربنا والديكي حافظي علي الصلاه وورد القران انا كنت بحط الفواصل بين المزاكره قرايه قران
:dعملتي ده كله روحي امتحني وانتي متوكله علي الله وراضيه بقضاء الله ونتيجته مهما كانت
:022yb4:حققتي حلمك ودخلتي طب برافوا عليكي يبقي ربنا عايزك هنا وهيساعدك هناك وشايلك لحاجه مهمه هتعرفيها بكره لما تبقي طبيبه
:( دخلتي كليه تانيه متزعليش لان برده ربنا بعدك عن شر وشايلك الخير فمكان اخر
:022yb4:وربنا يوفقك واي سؤال لاي حد انا فالخدمه

الف الف مبروك يا دوك
عندي سؤال هو الافضل ان ناخد كل درس في يوم ولا نجمع الدروس في كام يوم وباقي الايام فاضية للمذاكرة