|
طيب بص يا احمد اصلى انا بنت ولما بسمع كلام الناس بيقولو زيها زى تجارة وانتى حتقعدى بعدها فى الشارع .فاية رايك
|
حضرتك ممكن تلاقي موضوع بعنوان : دخلت حاسبات و معلومات ... طب تعال ...
الموضوع ده ح يأكد إن خريج الحاسبات مش زيه زي خريج تجارة ... |
طب انت لما تخشى طب بيطرى
هتلاقى الشغل على ودنه حاسبات ممكن تشتغلى وانت قاعده فى بيتك زى الفل وشغلها مهم ومطلوب وعلى فكره ما فيش وجه مقارنه بينها وبين البيطرى واللى بيقول انها زى تجاره واجهيه وكلميه هو يعرف ايه عن الكليه قبل ما يتكلم ومايهمكيش كلام الناس عشان دى مصلحتك ومحدش هاينفعك لما تفشلى فى البيطرى وبرضه ارجعى شوفى ميولك انت مياله لايه بالظبط؟؟؟؟ وحددى وعشان خاطرك هاقولك شويه كلام عن الكليه اولا المناهج عالميه يعنى الكلام اللى انت هتدرسيه هو هو اللى بياخده بتاع امريكا والصين والمانيا ثانيا الاعداد بتاعه الخريجين قليله جدا ففرص العمل المحترم وحطى تحتها 100 خط متوفره ثالثا اقسامها كلها مطلوبه جوه مصر وبراها رابعا الدراسه مننتهى المتعه ما فيش بعد كده ركزى واختارى بعقلك ده مستقبلك انت ونسيبنا من كلام الناس اللى جايبنا ورا والبنت زى الولد خصوصا فى حاسبات ومعلومات وربنا معاكى يا رب يا جيرسى ويهديكى للطريق الصح ولو عايزه حاجه انا متواجد سلام |
شغل الواقع الافتراضي في مصر طبعاً مش ح تلاقي , لان تكنولوجيا الواقع الافتراضي لسه جديدة ... و دي معلومات عنها يا باشا ...
تكنولوجيا الواقع الافتراضي ظهرت في عام 1993 على يد مجموعة من المهندسين الامريكان المتخصصين في التكنولوجيا .. كان الواقع الافتراضي أياميها مطبقينه على جهاز أتاري و عصيان joystick ... طبعاً جهاز الأتاري يعتبر أساس لظهور أجهزة الألعاب المتقدمة بعد كده ... التكنولوجيا دي تطورت بعد كده و اصبح ليها خبراء و مهندسين كتيير ... لغاية لما عملوا جهاز البلاي ستيشن الأشهر في العالم في بداية الألفية الجديدة أو قبليها بشوية ... كان البلاي ستيشن نازل أياميها حجمه كبير و تقيل ... لكنهم طوروا فيه و ادخلوا عليه تكنولوجيا الواقع الافتراضي ... لكن برمجة التكنولوجيا دي كانت بسيطة جداً و كانت تكنولوجيا الثري دي لسه بسيطة و مكنتش واقعية ... طبعاً قبل البلاي ستيشن ما ينزل , كان اتعمل الجزء الأول من فيلم الماتريكس و اللي ساعد على انتشار التكنولوجيا دي في أمريكا و أوروبا كلها .... ( طبعاً مصر متعرفش يعني ايه اتاري أساساً أياميها ... ) و مع التطور , بدأت التكنولوجيا دي تتوسع في ما بين 2003 و 2004 ... و ظهرت أجهزة ألعاب متقدمة جداً و التكنولوجيا بتاعتها أعلى و أنقى ... فظهر جهاز البلاي ستيشن المحمول , و ظهرت اجهزة الاكس بوكس ... و تطورت اجهزة النينتيدو و الجيم بوي اللي ظهروا في فترة التسعينيات ... و بتطور الواقع الافتراضي , تطورت تكنولوجيا الثري دي و الفور دي لأقصى حد .... و حتبدأ تكنولوجيا الواقع الافتراضي تنتشر أكتر من الأول و بأفضل حال .. و أحد المهندسين المؤسسين للتكنولوجيا دي قال : الواقع الافتراضي هو تجيسد لواقعنا الحقيقي ... فهو مشاعر و أعصاب و تفكير ... و نتمنى أن ندخل الجسد فيه ... ليصبح هذا الواقع هو كوكب أرضي آخر لكنه إفتراضي ... ( الكلام دا قاله لما بدأوا يعملوا التكنولوجيا دي ) .. و في عام 2000 قال نفس الراجل : اصبحنا الآن نعيش في واقع افتراضي ... فالانترنت أتاح لنا الدردشة و المحادثة مع أشخاص معظمهم إفتراضيين ... حتى الانترنت اعتبرناه عالم افتراضي .... واقعنا الآن ليس كله افتراضي , فالجسد هو ما تبقى من الواقع الحقيقي ... دي يعني نبذة بسيطة عن الواقع الافتراضي ... و دلوقتي التكنولوجيا دي بنحاول نطبقها في مصر ... و من أهم تطبيقاته في مصر : السيميلاتور ( و الجهاز ده طبعاً مستورد ) ... جزاكم الله كل خير |
يعنى اتوكل على الله وادخلها
اصلى خاااااااااااااااااااااااااايفة انها تكون زى تجارة لان مفيش حد عندنا دخلها قبل كدة.طيب هى كلها رياضة ورياضتها صعبة |
ايه الكلام الجامد ده
ربنا يحميك يارب يا نهار ابيض بجد الموضوع ده جميل اوى بس لو الواحد امريكانى والله بزعل اوى على احنا فيه فى البلد دى عشان احنا ماشيين وراهم وياريتنا ماشيين ده احنا بنزحف واحنا اصلا عمى مش بنشوف فاكيد قدامنا طريق طويييييييييل علشان بس نقربلهم للاسف الشديد ربنا يتولانا ويرحمنا برحمته يا رب |
ياى جسرسى قولنا ملهاش دعوه بتجاره
ولو هى زى انت ما بتقولى مكنش بنوع التجاره اللى مترميين فى كل حته غلبوا فى البحث عن وظيفه بالنسبه للرياضه انا اعرف ان فيها رياضه زى بتاعه الثانويه العامه بس التركيز بتاعك كله يبقى على اجزاء البرمجه وانا فرحان ان انت مجبتش سيره البيطرى على لسانك عشان انت مقامك اعلى من كده بكتير وتوكلى على الله بس خلى بالك حاسبات مش كليه نظريه ترمى موادها طول السنه وتذاكرى اخر اسبوعين وتروحى تجيبى جيد لا مش كده خالص ولازم تذاكرى كويس وتجيبى اعلى تقدير تقدرى عليه عشان الشركات تقبلك بدون تفكير وتوكلى على الله وربنا معاكى يارب |
ياجماعه انا احتمال كبير انى اقعد فى ثانوية العامه للسنه الخامسه
واعيد على ماده واحدة بفكر جديا انى استفيد بالسنه واخد كرسات والسنه الجايه ان كان لينا عمر هاقدم فى الاكاديميه البحريه حاسبات ومعلومات بحيث انى يكون مستوايا اعلى من اللى فى سنى تنصحونى ابتدى بكورسات ايه مع انى ابيض يدوبك كلام نظرى قريته فى كتاب عن علم البرمجيات ارجو المساعده ضرورى وينفع لو اخدت كورسات اشتغل فى الوقت الحالى مبرمج كدا لغايه السنه الدراسية الجايه |
حضرتك فى مواضيع كتير داخل المنتدى عن الكورسات
تقدر تدور على اللى يناسبك وتقدر طبعا تسال استاذنا كلنا eng.alios انا متاكد انه هايفيدك |
والله ياباشا اسال فين انا دورت كتير اوى
ومش لاقى اى مساعده من اى حد ولو لقيت كل واحد يقول كلام غير التانى وانا فى حيره شديدة |
بص انا بصراحه لو مكانك اروح اسال فى الكليه ذات نفسها
عشان تجيب من الاخر |
أولاً : انا مش استاذ و لا حاجة ... انا لسه طالب زيي زيكم ...
ثانياً : حضرتك مستعجل يا أخ فيوز .... لكن ح اقول لك على اللي بشوفه يعني ... انت ممكن تبدي من دلوقتي كورسات لغات يعني كورسات إنجليزي و جنبه أي لغة تانية بالتوازي مع بعض كده ... أما كورسات البرمجة فانت ممكن تبديها بعد ما تخلص أولى , لأن أولى مش ح تاخد فيها برمجة خالص , أولى ح تاخد فيها يادوبك مقدمات عن الكمبيوتر و عن لغة السي كبداية ( لغة السي دي اللي انت كنت بتدرسها في تالتة اعدادي ) ... انت تستعجل على اللغات , لكن البرمجة سيبها شوية ... جزاكم الله كل خير |
انا بقيت فى حيره دلوقتى
ايه الحل واحد يقولى ابتدى بكورس الجافا عشان المستقبل للجافا وواحد تانى مهندس يقولى كورس شبكات وفلاش والفوتوشوب وواحد تالت يقولى كورس سى شارب او الفيجوال بيسك |
لا بص ابتدي باللغات .. لان ده اساس شغلك يا معلم ...
مش حتشتغل الا باللغة ... |
فعلا الكلام ده صح
واصلا كل واحد لازم يظبط الانجليزى بتاعه حتى من قبل ما يدخل الكليه |
| جميع الأوقات بتوقيت GMT +2. الساعة الآن 07:07 PM. |
Powered by vBulletin® Version 3.8.11
Copyright ©2000 - 2025, Jelsoft Enterprises Ltd.