على فكرة دى كانت تانى حصة ليا معاه، باقى الجروب كان معاه من الإعدادية أصلاً، وعشان كده أنا ولا عارف "أقرا" المدرس كويس وأعرف إيه المطلوب منى عشان أكون ماشى صح مع نفسى ومع مادتى ومع مدرسها!، وكمان ولا هو عارف شكل قعدتى فى الدرس بتبقى إزاى، أنا مش بحب الكلام الكتير والدوشة فمش بتكلم إلا نادراً أو وقت اللزوم أو الحاجة المُلحة، هو ممكن يفتكرها فشل أو نقص القدرات أو عدم ثقة فى المادة، بس لعل الشدّة إللى هو عملاهالى دى تكون خير ليا بعد كده، لإنى فهمت هو عايز إيه وفهمت كمان إنى مهما بذلت مجهود لسه عندى حاجة أعلى تستحق إنى أعملها وبعد كده أبقى أستنى الثناء.

شكراً ليك :)

أنا فعلاً بخوف نفسى زيادة عن اللازم، وأنا أصلاً بيضايقنى جداً إنى أكون حاطط إيدى على الغلط أو العيب ومقدرش أصلحه بسهولة، وفكرة حضرتك جميلة فعلاً وأنا يمكن هحتاجها وهلاقى تأثيرها على نفسى قبل المدرس كمان، هلاقي العشر أسئلة الزيادة دول إدونى خطوة زيادة وثقة إنى أقدر أبقى أقوى من المستوى إللى هو عامله للجروب كله...وأنا فعلاً بحاول أشيل أى رهبة جوايا وأكون بجح لإن ده الحل الوحيد، وأنا واثق إنه ممكن يحصل إن شاء الله بس هياخد وقت

شكراً ليكى :)

شكراً جداً وأكيد هستفيد بكلام حضرتك، وإن شاء الله فيه إمتحان أصلاً يوم الخميس فى نفس المادة، وهو ده تعويضى ورد إعتبارى وإثبات الذات بإذن الله

بحتاجها بشكل فعلى أكتر من مجرد إقتناعى بأى حاجة جوايا وأسميها ثقة، شكراً :)

بص يا احمد احسن حاجة تعملها علشان تتفوق ومتبقاش مش مركز فى الحصة او فى الدرس هو انك قبل ما تروح الدرس تذاكر اللى هتاخده طبعا مش تقعد تذاكره بالساعتين وكدة لا هى كلها نصف ساعة تذاكر الدرس وتاخد منه الفكرة العامة وتعيد عليه وكدة يعنى بحيث انك تروح الدرس تبقى عارف من الاول الدرس بيتكلم على ايه ولو هتقولى طيب مش لازم اروح الدرس لما انا هذاكره فى البيت. لا طبعا انت لما تذاكره الاول فى البيت هتروح تلاقى نفسك فاهم 80% او اكتر ولو الاستاذ سأل سؤال مهما كان صعب خليك واثق من نفسك وركز اوى وماتتوترش وانت هتلاقى نفسك جاوبت السؤال اجابة نموذجية واصاحب على طلبة شاطرين وذاكر كتير دى كلها سنتين وتخش كلية لو انت فى ثانوى ومهما الشيطان خوفك وكدة وحسيت انك متوتر صلى واقرأ القران ومتخليش الكلام ده يخش عليك تانى وحل اسئلة كتير وعلى فكرة لما تعمل الفكرة اللى انا قلتلك عليها هتطلع من الدرس فاهمه 1000% ويا سلام لما ترجع من الدرس وتذاكره تانى فى السريع وتحل اسئلة الاضواء والوسام والكتاب المدرسى او اى حاجة عندك وتشد حيلك وتسهر وما تاخدش الحكاية ببساطة والله ان شاء هتطلع من اوائل الجمهورية ان شاء الله وهما اصلا مش زايدين عنك حاجة
وربنا يوفقك