الحكاية اكبر من الحاجات اللى بتتكلموا فيها والاكانت المشكلة دى اتحلت من زمان جدا وكانوا كل البنات لبسوا نقاب او كل الولاد بطلوا يبصوا للبنات واتحلت لكن المشكلة مشكلة ثقافة بنتعلمها من واحنا اطفال ان البنت لو اتكلمت مع ولد بيكون فى مشكلة كده اعتقد لو الامور مشيت بطبيعتها هيكون الوضع افضل ومش هتكتر الحاجات دى يعنى مش معقول يكونوا اطفال لسه ماجابوش عشر سنين ولو ولد طلب من بنت قلم كل المدرسة تتكلم ويعتبروها جريمة زمان كانوا الاطفال بيلعبوا مع بعض عادى ولاد وبنات ولما بيعدوا مرحلة الطفولة خلاص مافيش بينهم كلام تانى وعشان كده ماكانش فى الافكار السودة واى ولد كان بيعتبر اى بنت اخته لانه مااترباش على فكرة ان اى ولد مش ممكن يكون بينه واى بنت الا افكار مش كويسة ودى الفكرة الراسخة دلوقت واللى لازم مجتمعنا يتخلص منها تخيلنا فى موقف من اللى بيحصلوا دلوقت ولد دايق بنت وحاول ولد تانى يدافع عنها من ناحية انها زى اخته هل هيعدى الامر عادى الناس كلها هتفضل تقول هو عاوز ايه اشمعنا ده دافع عن دى يعنى دلوقتى التربية فى مجتمعنا بقت مقسومة نصين والاتنين غلط وطبيعى اى حد هيقرا كلامى دلوقت هياخده من منظور غلط لان دى التربية اللى اتربينا عليها وكلنا اتربينا بطريقة من الطريقتين دول ناس اتربت ببعد كامل يعنى الولد مالوش دعوة نهائى البنت لان الولد لو كلم البنت دى جريمة عظمى واكيد فى حاجة غلط ياسلام ولو ولد دخل فصل فيه بنات وقال سلام عليكم وهم فى ابتدائى تبقى مصيبة وطبعا التربية دى كله فاكر انها حل سحرى وطريقة عبقرية وده اكبر غلط لان احنا لما نفضل نحجب الولد عن البنت فى سن الطفولة زى مابيقولوا كده الممنوع مرغوب هيفضل الولد عنيد وعاوز يعرف ايه سبب المنع ده وهيبقى تفكيره دايما سئ وشهوانى وعمره ماهيقدر يتعامل ان اى بنت زيها زى اخته

اما الطريقة التانية فى التربية فهى الانفتاح العشوائى يعنى الاهل يربوا ابنائهم تربية غلط مايقولوش ده عيب ولاحرام او مايهتموش بيه اجتماعيا ويطلع عنده عقد نفسية وده برده بيطلع اسوا من النوع الاولانى لان الاولانى بيكون عارف الغلط فبيحاول يمنع نفسه عنه لحد كبير بس دايما بتكون عنده مشاكل نفسية وغالبا بيصاب بانفصام فى الشخصية اما ده فمش بيحاول يمنع نفسه نهائى وبيضر الناس معاه مش بس بيضر نفسه وانا شايفة ان الطريقتين دول فى التربية غلط غلط غلط

المشكلة عمرها ماهتتحل باللبس ده ممكن يكون سهل فى اماكن زى القرى او منطقة زى عندنا كده كلنا بنطلع حابين الحجاب من نفسنا وبرده بنطلع فاهمين ان كل ماكان اللبس محترم اكتر كل ماكان اللبس اجمل بس ده كله من نفسنا ماينفعش حد يجبر حد عليه ممكن تجبر واحدة تلبس محترم هتبقى مدايقة ومش هتحس بقيمة الاحترام ده وهتحاول تعمل اى حاجة غلط كنوع من العند والمشاكل هتزيد بشكل اكبر مما كلنا نتصور يعنى فكرة ان الحل باللبس دى غلط تماما انا مش بدافع عن البنات على فكرة انا الحمد لله بلبس خمار لكن عمرى ماقلت لواحدة من زمايلى بتلبس بنطلون ضيق انتى لابسه كده ليه

طب الحمدلله كنت خايفة كلامى مايتفهمش او يتفهم غلط:)

طيب انا متفقة معاك ف ان التحرش مش شرط بالايد وانو مجرد ما الولد يبص يبقى ع طول التحرش حصل بس بالمنطق اللى انت بتتكلم بيه ده يبقى كل الشعب متحرش سواء بنات او صبيان!!!!!!
وعشان كده ده اللى ح يرجعنى للكلام اللى انا قلته ازاى بقي نتحكم حتى ف النظرة دى؟
برده بالايمان وتقوية الصلة مع ربنا ف نظرات غصب عننا بس الحقيقة هى مش نظرات هى المفروض نظرة واحدة بس وبعدين اى نظرة تانية تعتبر تحرش وحرام
صدقنى انا بنت والله العظيم لما بامشى ف الشارع والاقى واحدة بتتعاكس بجد انت ما تعرفش انا بتقطع من جوايا اد ايه؟ حتى ولو هى لابسة وحش بزعلها والله لانى بحس انها ملقتش غير الطريقة دى عشان تلفت نظر الناس ليها خاصة الصبيان وان عقلها او عقل المتحرش مش موجود او بمعنى اصح الصلة مع ربنا صفر
معلش انا طولت بس الموضوع كبير جدا وليه ابعاد واسباب كتيرة :blush:

بس ف حاجة احنا نسينا نقولها
ايه بقى العقاب ؟ يعنى شاب اتحرش ببنت او العكس و بعدين ؟
مفيش عقاب يا جماعة وتقريبا كده ع حسب ما اعرف ان جريمة التحرش عقوبتها من 1-3 سنين بس
ناهيك بقى ده لو اصلا حد راح قدم بلاغ ولا ح يجيب شهود منين!!!!!!!!!!!
انا برده بصيت للموضوع من اتجاه تانى وشايفة ان ده الحل الاسرع واللى ح يخلى اى حد يفكر مليون مرة قبل ما يعمل كده هى ان العقوبة تكون مشددة شوية

مش هقرأ ده كله ولا الردود دي كلها
لكن اللي هيقول الحل في الاخلاق او الرجوع الي الدين يبقي فشل في النقاش
لا انكر ان ده اصل المشكلة لكن احنا عايزين حل عملي توديه لمسئول ينفذه فتنتهي المشكلة
مش مهم الغلط علي مين
المهم معالجة الغلط نفسه وعقاب الغلطانين