ايه دا انتا منوفي يا ميدو ؟!!

لا اله الا الله .. ليه كدا يابني ؟!

انتا منين اصلا من المنوفية ؟

انا اللي اعرفه ان شبين الكوم عندكوا فيها كل حاجة ..

عموماً ماعلينا .. انتا أهم حاجة تدرب في الاجازة

عشان التدريب فعلا مهم جدا .. سواء كنت هاتتخصص ادارة او محاسبة

ياعم عرفنا وربنا انك من المنوفية :friendsxs3: .. !!

هاقولك على حاجة .. حبك للادارة اتس اوكي مافيهوش مشاكل ..

بس في سنة اولي مش هاتقدر تحدد . ليه ؟

لإنك لسه عضمك طري .. الادارة اللي انتا خدتها او لسه بتاخدها في الترم الاول دا مش حاجة

دي مجرد مبادئ ومداخل للتنظيم .. يعني مش حاجة ..

انتا عندك في الترم التاني لسه هاتاخد اقتصاد وفي تانية هاتدعك صح زي مانا مدعوك كدا !

فا لسه .. اللي بيحدد بنسبة 60% .. هوا بعد مابتخلص سنة تانية بتبقي بدأت ترسم لنفسك ميولك

وطبعا ميولك دي لازم تتناسب معا تقديرك .. ماهو انتا مش تروح تجيب تقدير مقبول وتقولي اخش ادارة !

بالنسبة بقي للتدريب .. انتا ممكن تنزل في اي بنك .. وانتا وحظك في القسم اللي هاتقع فيه

انا كان حظي اما روحت موبينيل اني اترميت في التسويق .. واستمتعت بيه والله

أي نعم كان مرمطة وطلوع ونزول .. بس اهو الواحد بيستفاد ..

وبعدين المرمطة في الحتت النضيفة احسن من المرمطة في الحتت المنيلة ..

ومعلش تاعبك معايا ياصحبى ..

برده ماقولتليش منين من المنوفية ؟؟؟؟؟ :blush:

الله يرحم ايام زمان .. كنت عمال تقولي انا هابقي معيد وهاجيب تقدير ! .. سبحان مغير الاحوال !!

التدريب عمره ماهيديك خبرة .. كل اللي هايعملهولك التدريب انه هايديك اولولية في الحتة اللي هاتشتغل فيها

عشان كدا اما تيجي تدرب حاول تدي اللي عندك .. وافضل اسمع وخد منهم

عشان انا ربنا كان رازقني بشوية ناس هناك .. كل واحد عاملي فيها منصح افندي !!

بس بيني وبينك فادوني جامد ..

تاني حاجة بتستفيدها من تدريبك .. انك بتاخد على جو العمل ..

عشان جو الدراسة اللي في الجامعة غير جو العمل نهااااائياً

كويس اوي .. وابقي شوفلي شغل معاك .. اهو احتياطي برده :p

مااشى ياعمى

بس انا قلتلك انا من شبين الككوووووم


يعنى احسن النووس


لو موافق تشتغل قهوجى زبال اى حاجة كده .. مكانك موجووود ..^_^

على فكرة ممكن تشغل مدرب سباحة كماان ...:p

السلام عليكم ورحمة الله وبركاته

انا كمان باحب الادارة اكتر من المحاسبة
ونفسى تكون تخصصى بس اللى قلقنى
انهم بيقولوا ان فرص شغلها ضعيفة جدا
ونا نفسى اشتغل مش عايزة اتخرج واتركن
وفى نفس الوقت مش باحب المحاسبة اوى وغير كدا هاقضى حياتى كلها ارقام:angry2:
سمعت الدكتور بيقول كل اللى تخصصوا فى ادارة عادوا سنة رابعة تانى عشان يدرسوا محاسبة هل ده ينفع ولا هو عشان دكتور محاسبة بيقول كدا:abdoog8:


وبعدين ايه رايكم فى القسم الغلبان اللى اسمه التامين:(

أعوذ بالله .. لا ياعم انا مالي .. شكراً

والله انا سألت البشر اللي متخرجين اللي اعرفهم ..

كلهم أجمعوا على إن قسم التأمين صعب ومابيشغلش حد الا ..

الواسطة الجامدة اوي اوي اوي .. ويكون تقديره عالي ..

وشغله محدود في نطاق شركات التأمين ..

عشان كدا هوا فعلا قسم غلبان .. ويتيم كمان !!

وكله شغل رياضة وخنقة .. وهيا مش ناقصة !

تحية منى لاحلى شباب شباب تجارة .... انا عن نفسى عجبنى قسم الادارة حتى الدكاترة بيقولولنا ان الادارة مرتبتها احسن بس ناس كتير خوفونى وقالولى مجال الشغل قليل ومحتاج وسطة ...فى قسم عندنا اسمة اكتوارى بس معرفش دة ممكن يشتغل اية بعد كدة وتقريبا كدة الى يدخل لازم يكون علمى رياضة

ياما قولنا كتير في القسم دا .. بس هوا قسم صعب جدا

والسنة دي قابلين فيه 17 واحد بس

بعد اذنك يا باشا
انا لسه في سنة اولي ونفسي انزل تدريب في نصف السنة مش مهم اتدرب فين
بس انا عايز اعرف اعمل ايه عشان اتدرب

ده تبع جامعة ايه انا كنت علمى رياضه فى ثانوى عام
انا بحب الاداره لكنى بحب المحاسبه اكتر
بالنسبه للشغل فمجال الشغل فى المحاسبه كبيير قوى لكن مرتباتها بتبقى متوسطه
انما فى اداره فى قسم التسويق اللى بيتخرجوا منه و بيشتغلوا مندوبى مبيعات بيخدوا مرتبات حلوه قوى
لكن بالنسبه لى لاما احاول اشتغل سمسار بورصه فى شركات السمسره اللى فى القاهره و الاسكندريه
او ادخل قسم المحاسبه و اخد سنتين بكارليوس بعد اما اخلص و اشتغل فى الجهاز المركزى للمحاسبه اعلى جهة محاسبه فى البلد دى يعنى شغلانه جامده موووت يارب حلمى يتحقق و اقدر اشتغل فى الجهاز ده

هو القسم كويس بس فرص عمله قليلة جدا

بس انتا لو ناوي تتفوق وتبقى معيد ف الكلية مثلا

ربنا معاااااااااااك

القسم ده هينفعك باذن الله

انا يا جماعة نفسي انزل تدريب في اي مكان مش عارف اعمل ايه لو حد عنده خبره في الموضوع ده يفيدني انا لسه في سنة اولي
هو في تدريب في نص السنة ولا لاء

هو مفيش حد بيرد ليه هو انا مش زي اي واحد هنا محتاج مساعدة

ماهو على حسب انتا عايز تدرب في انهي مجال .. هل مجال ادارة ولا مجال محاسبة

لو انتا عايز محاسبة .. عندك مكاتب المحاسبة على قفا من يشيل ..

لو عايز ادارة .. عندك الشركات .. بيدربوك في اقسام الانتاج والتسويق والحاجات اللي زي كدا

بس اولا ً واخيراً .. الواسطة ثم الواسطة

لو عندك واسطة هاتمشي زي الفل .. لو ماعندكش هاتتعب

خاصة لو كنت رايح تدرب في شركة اسمها كبير او اي بنك ..

هوا مش خبرة اوي .. انا الحمدلله في اجازة الصيف اللي فات روحت موبينيل واتدربت في الفرع الرئيسي هناك .. وماقولكش على المتعة اللي انتا بتبقي فيها وانتا هناك .. الناس كلها بتقعد تشتم في موبينيل عشان شبكتها والكلام دا كله .. لكن والله العظيم اللي بيشتم فيها دا ماشافش الشركة ذات نفسها .. لإن لو شافها هايخاف يخشها اصلا من نضافتها !! .. وسبحان الله تدريبي دا كان فاتحة خير عليا .. لإني على اول السنة دي فوجئت انهم باعتنلي جواب وبيقولولي ان فيه جلسات مكثفة لشرح المبادئ التسويقية .. بمعني اصح حاجة كدا زي الكورسات التدريبية بس تابعة للشركة ذات نفسها .. والجلسات دي معمولة للناس اللي كانوا بيتدربوا في الاجازة .. فالحمدلله نصيبي كان كويس في الحكاية دي ..

هاقولك على حاجة .. دائما المستجدين بيبقوا فاكرين ان التدريب دا بيبقي حاجة الكلية بتوفرهالك زي كلية التربية كدا .. لكن الفكرة دي غلط طبعاً .. التدريب في كليات التجارة في اي جامعة اتخلقت في مصر مبني على واسطتك في الجهة اللي انتا عايز تروح تدرب فيها .. يعني لو عندك واسطة في بنك معين هاتروح تدرب فيه .. لو ماعندكش مش هاتعرف .. لو عندك واسطة في شركة مثلا زي فودافون هاتروح .. لو ماعندكش مش هايدخلوك من بوابة الشركة اصلا !! .. فهيا المسألة كلها معتمدة اعتماد كلى على الواسطة بتاعتك .. طبعا الكلام اللي فات دا مبني على الشركات والبنوك اللي ليها سمعتها .. لكن مكاتب المحاسبة مش محتاجة .. روح لأي مكتب محاسبة وقولهم انا عايز اتدرب .. هاتتلاقي يقولك اوكي ماشي .. ويقعد يديلك في الليستة بتاعة الالتزام والحضور ومواعيد المجي والانصراف والكلام دا كله .. طبعاً هاتتخنق في الاول جامد لإنك مش واخد على كدا .. بس هما تلات او اربع ايام وهاتاخد على الالتزام وهاتعيش الحياة .. كفاية احساسك من جواك انك بقيت راجل ذات مسئولية .. فحكاية بقي ان التدريب في اول السنة او اخر السنة او نص السنة دي مش مشكلة .. لو عايز تدرب في اي وقت هاتدرب .. ان شالله حتى لو كان اثناء الدراسة ذات نفسها .. زيي كدا اهو .. اديني طالع عيني في المرواح والمجي .. بس هاعمل ليه كل دا في سبيل اني اتعرف هناك لإنك ساعة مابتتعرف في المكان اللي انتا فيه بيبقي ليك الاولوية انك تشتغل فيه بعد تخرجك .. ودا اللي انا بطمح ليه .. واكيد دا برده طموحك

عموما ربنا يوفقك .. بس الاهم من التدريب وكل حاجة .. تقديرك ثم تقديرك ثم تقديرك .. ركز في مذاكرتك وامتحاناتك الاول وبعد كدا ابدأ بص للتدريب والكلام دا ..