يامها يعني انتي عيدتيها قبل كده ودي تالت محاوله ليكي ولا ايه لاني انا اخدتها مره واحده بس من سبع سنين وبيقولولي مفيش اعاده خالص لو عدتيها مره بعدها عرفيني وقوليلي عملي ايه كمان ايه موضوع انه ممكن تاخد بكالورويس وتقدم في كليه تانيه مش فاهمه ؟الى وصل لحاجه يعرفنا

ازاى تكوني ادبي وخريجه تجاره وتدخلي صيدله ولا علوم هل ده ينفع؟يعني انا اداب انجلش ممكن ادخل صيدله ؟ ماتفهمونا ياجدعان

السلام عليكم
مش انا اللى قولت يامونى ده عضو هنا اللى قال كده وانا بسال ينفع لو حد ادبى يدخل علوم وفقا لكلامه لكن انا مش عارفة
وياريت لو حد عرف انه ينفع الاعادة يقول لانى سالت وقالوا ماينفعش

يا جماعه أعتقد ان الحل الوحيد ان احنا ناخد الدبلومه الأمريكيه وبعدها ندخل كليه عمليه كويسه تناسب طموحتنا ورغباتنا
هى مكلفه حوالى 17 ألف جنيه مصرى فى السنه وطبعا مستواها أكبر بكتير من مستوى الثانويه العامه وكلها بالانجليزى
ومعترف بها من جميع دول العالم وممكن تدخل بها كليه فى مصر او فى اى مكان فى العالم

السلام عليكم
ازيك ياصقر اخبارك ايه هى الدبلومة دى تنفع لو كنت اصلا ادبى وعاوزة ادخلها علشان ادخل كلية علمية و لا لها شروط معينة
ياريت لو تفهمها كويس تبلغنى بها

الدبلومه دى هى الثانويه العامه الأمريكيه ومالهاش علاقه بالسن ولا كنتى أدبى أو علمى فى الثانويه العامه والتفاصيل هحاول ابعتها لكي

ايه ياجماعه مفيش جديد؟ محدش وصل لحاجه؟مها انتي ودكتور محمد موصلتوش لحاجه؟ هو كان قال انه لما هيرجع مصر هيروح يسال ومن ساعت مارجع منعرفش عنه حاجه. وهنفضل نكلم نفسنا على الموقع ده كده على الفاضي ولا ايه حد يرد عليا؟موضوع الدبلومه الامريكيه ده صعب قوي لان المبلغ جامد خصوصا ان في غيرنا بيتعلم في العيله مش هناخد فرصتنا وفرصه غيرنا؟ اريد حلالالالالالالالالالالالالالا

الدبلومه الأمريكيه هتكلف فى حدود 25 ألف فى السنه يعنى غاليه برده بس لو فيه حد حالته الماديه كويسه اعتقد ياخدها افضل أو يدخل كليه خاصه زى الصيدله أو الطب فى جامعه أكتوبر او msa بس انا شايف ان الناس كلها نامت خالص

كمان أنا سألت فى الإمارات فى إمارة الشارقه على امكانية اعادة الثانويه العامه هناك قالوا تجيب شهادة أخر سنه دراسيه حضرتها فى مصر وتكمل الباقى ولما قلت انى واخد الثانويه العامه فى مصر وأخدت كليه كمان بس انا عايز أعيد الثانوى هنا قالوا مينفعشى مش مسموح لحد اعاده الثانويه العامه الا فى حاله انه لم يأخدها قبل كده بعد كده اتصلت بوزارة التربية والتعليم فى إمارة دبى قالوا نفس الكلام وواحد هناك بلغنى انى معرفشى حد انى واخد الثانويه والكليه فى مصر بس لو اتعرفت هيعملوا لى مشاكل

انا أرفت وتعبت من البحث عن الموضوع ده . عايزين نشوف لها حل

ايه يا جماعه ليه مفيش أى مشاركات

كلكم نسيتم حلمكم ولا ايه عايزين نرجه نشارك تانى ونقرر ازاى نوصل صوتنا للمسئولين فى البلد دى

لازم نعمل حاجه بدل ما نفضل كل يوم ندخل نقرأ فى الموضوع ونخرج تانى

عايزين نفكر نعمل ايه
وياريت المشاركات كلها ترجع تانى وما نفقدشى الأمل ممكن لو طالبنا بحقنا فى إعادة الثانويه العامه نحصل عليه
بس نطالب بدل ما احنا قاعدين كده وساكتين

ايه يا جماعه محدش بيدخل على الموضوع ليه فين مها ومنى ومحمد محدش بيدخل وبيقول أى حاجه ليه

عايزين نعمل أى حاجه

هو أنا هفضل أكلم نفسى كل يوم على الموقع ده ولا ايه

محدش بيدخل ليه

يا جماعة انا نفسيتى تعبت بسبب الموضوع ده وبجد هموت والاقي حل انا سالت في مديرية الجيزة التعليمية وقالولي ينفع علي فكرة واضح ان كل الموظفين شغالين بمزاجهم
تجيب شهادة من الادارة اللي انت تابع ليها انك نجحت في اولى ثانوى بعدين تدخلسنة تانية
وانا فعلا جبت الشهادة دي
يعنى موجودة اهي .. وسالت في المدرسة قالولي علي كتابة الاستمارات اروح اكتب الاستمارة... ازاي في ادارة عابدين دي قالو مينفعش
بالنسبة للامريكان دبلومة نفسي فيها جدا ع الاقل دماغي هتشتغل بس للاسف غالية اوي عليا
ياريت بجد كل اللي مهم يقول وكلنا نجرب نقدم السنة الجاية ونشوف يمكن المحاولة تنجح
كل ده برضة كلرام ومحدش خد خطوات فعلية
وانا معرفتش اخد خطوات فعلية السنة دي
ياريت لو في حد مهتم يقولي وده اميلي
cute2_dodo_85 علي الياهو

السلام عليكم
ازيكم ياجماعة انا موجودة والله بس مش عارفة هنعمل ايه
مفيش غير اننا نقدم طلب جماعى ويمكن يتوافق عليه
وتعالى نتكلم كلنا على الميل علشان نوصل لحل
ايميلى نفس اسمى على الموقع
وياريت لو حد منكم من اسكندرية نشجع بعض
ا

ايه ياجماعه فينكم ؟ انا بقترح ان حد يكونلنا جروب على الفيس بوك اكيد هنلاقي ناس هناك كتير ولما نتجمع هناك نقدر نتكلم اكتر وافضل ويمكن نقدر نوصل صوتنا بس حد يعمله لاني معرفش اعمل واحد اعملوه وابعتولي انضم معاكم انا زهقت وحياتي ملهاش طعم ولا معني يعني لما اخد دكتوراه في الادب الانجليزي هعمل ايه للناس يعني هفيد مجتمعي ازاي يعني باسلوب الكتابه ولا بمشاعر الشخصيه ااااااااااااااااه ارجوكم الحل. بعدين الي مسافر بره ممكن ياخدها من اي حته بره دي فرصه بس متعرفش حد انك واخدها قبل كده

يامها بعتلك كتير قوي على الميل وكل ما ادخل مش بلاقيكي فاتحه ومش بلاقي منك اي رد لا انتي ولا الدكتور محمد حاولوا تعملو الجروب الي قلتلكم عليه

يا أخت منال انا فكرت فى موضوع الجروب ده قبل كده وكنت هعمله بس لما بدأت الثورة فى مصر فضلت إنى أجله لبعدها لأن الناس كلها مشغوله بالثورة والمظاهرات و من ضمن الناس دول أكيد فيه كتير عايزين يعيدوا الثانويه العامه من تانى والكل الوقتى مهتم بموضوع الثوره فالأفضل ان احنا نأجله شويه انا هعمله ان شاء الله بس لما الأمور تهدى بس شويه فى مصر وفيه قانون الثانويه العامه الجديد كان بيتم اعداده من قبل الحكومه القديمه اللى قدمت استقالتها . لما نشوف الحكومه الجديده أو الحكومه الانتقاليه هتعمل ايه هتمشى فى نفس الموضوع ولا لأ . لو الحكومه الجديده اتكلمت عن موضوع تطوير التعليم وده أكيد طبعا فإن شاء الله كلنا هنقدم طلب جماعى وكلنا نمضى عليه ونذكر الأسماء والرقم القومى كمان ونبعته لسيادة الوزير الجديد .

وان شاء الله انا عندى خطه كويسه للضغط على الحكومه علشان يعطوا فرصه لإعادة الثانويه العامه .

السلام عليكم
ياريت نجهز للجروب ده ولما الدنيا تهدا ان شاء الله نعمله بس موضوع اننا نقدم شكوي فيها الرقم القومي اعتقد انها مش هتنفع لان محدش بيبص في شكاوي وهتترمي في اي درج واذا حصل وبصوا فيها يبقي هيتابعونا بالرقم القومي وهيمنعوا اعادتها لينا باي طريقه . احنا كل الموضوع اننا خايفين نعيدها من وراعم بس مع الاسف البلد دي محدش بياخد حقه فيها الا لو مشي غلط. بنت عمتى عادتها بس قدمت في مدرسه في بلد ارياف تبع طنطا وكانت وعايداها معايا 2007 ولما روحت سالت على الاعاده قالولي قفلناها وقالولها كمان كده بس هيه راحت قدمت من وراهم ومتكشفتش ودلوقتي متخرجه من صيدله واستلمت تكليف وعايشه تمام

والله بنت عمتك حظها حلو جدا . انصح منك كنت المفروض تعملى زيها كان زمانك فى صيدله الوقتى . الخوف اللى لو قدمنا من وراهم وقعدنا ندرس 3 سنين وفى الاخر اكتشفوها نعمل ايه ؟؟؟؟؟؟

شوفى لو عددنا كبير هناخد حقنا والله لو فضلنا نطالب بيه دايما أهم حاجه ما نتكاسل

انا هعمل الجروب ان شاء الله بس بعد اما الدنيا تهدى بس لأن فى كل الأحوال الوقتى محدش هيستجيب

انا كنت بعت لمستشار القانونى اللى موجود على الموقع ده وقالى احنا فى انتظار القانون الجديد لما نشوف هيسفر عن ايه

ده اميلى egyptianfalcon85 على الياهو للتواصل

السلام عليكم
يا جماعه انا مش شايفه حد بيتحرك خالص الكل بيطالب بمطالبه واحنا ساكتين.الدستور دلوقتي بيتغير هنستنا لامتى. قانون عدم اعادة الثانوية ده لازم يتعدل ودلوقتي وقتها.انا حاولت ابعت لمنى الشاذلي بس تقريبا بتستخدم شبه نت مش مشتركه انا فيها فمعرفتش ابعت.حد يحاول يبعتلها على ايميل البرنامج. الي قدرت عليه اني اخدت ايميل وائل غنيم من على موقعه بتاع الفيس وبعتله طلب يوصلهولها ومش عارفه وصله ولالا لانه ماردش عليا. ممكن حد يتحرك ويحاول يوصل الصوت لاي مسؤل. حد يحاول يبعت لمني او لمحمود سعد ولا اي حد يسمع صوتنا. اتحركوا شويه ارجوكم

مخنوق بجد ومش بنطق ولا عارف ارد.. مخنوق عشان مستقبلي في عيني بقا مش ولابد
 

والله موضوع اعاده الثانويه دا فكـرت فيه كتـير
ولو اني مستصعب المذاكره من تـاني بس الواحد لما يفكر انه حيعيش بقيت حياته زي ماهوا كدا
بيحس بحـاله نفسيه زي الزفت .. انـا مخلص اداب انجـلش وقدمت في كل المجـالات
من غير اي فايده وبقول الحمد لله مفيش لسه نصيب يعني
حتـي موضوع التدريس فشلت فيه لاني لاقيته مش بيجيب همه حتي لو برا مصر
وطبعا الكليات والاكادميات العسكريه والوظائف المرموقه محتاجين وسايط انا مش ادها
بس انا عندي فكره كدا مش عارف تبقي صح ولا غلط عن اعاده الثانويه
ان الواحد ياخد شهاده الاعداديه ويقدمـ بيها في المدرسه الثانويه ويدخل اولي ثانوي من تاني
وهمـا تلات سنين الثانوي كدا كدا كانوا ضايعين والواحد ولا لاقي شغله ولا مشغله
بس نصيـحه للكـل بجد مووضوع المذاكره دآ مش سهل وممكن بعد ما نعيدهـا نجيب نفس المجموع
مهيـا فقر بقــا والي ليه نصيب في حاجه لازم يشوفهـا..
بس انا ديمـا حاسس ان ربنـا بيعوض الناس يعني الي حصلته ظروف في الثانويه دآ اكيد ربنا حيعوضه خير
والي قدم في وظيفه احلامـه الي قعد يخطط ليهـا وجه واحد ميستحقهاش خدها بواسطه اكيد ربنا حيعوضه
الواحد لما بيفكر كدا ويجيبها يمين وشمـال و بما اني ولد بقول الوقت الي حضيعه في الثانوي تلات سنين ولو دخلت طب ست سنين دا لو مدبلرتش سنه ع الاقل يعني حضيع من عمري عشر سنين !!!
ليييييه هوا الواحد عنده كـام عشر سنين في عمره
الواحد يعمـله مشروع احسن ويحاول يدور ع شغلانه اي كلامـ وخـلاص علي ما ربنا يفرجهـا
وادينـا نزلنا في الثوره وانضربنـا واتهزقنـا .... يارب بس البلد حالنا يتصلح
وعلي فكره مش شرط الي متخرج من اداب او تربيه انه يشتغل مدرس
انا واحد صحبي خريج خدمه اجتماعيه وشغال في البترول وواحد تاني خريج اداب انجلش شغال في البنك الاهلي وواحد تالت خريج حقوق شغال في المحكمه واعرف واحد مخلص هندسه وقاعد مش لاقي شغل
نبقي ندخل ولادنـا بقا الكليات الي حلمنـا بيهـا
لاننـا لو دخلنـاها احنـا بعد اعاده الثانويه مظنش حيكون فينـا حيل نتجوز ونخلف
دا رايء الشخصي انما اي حد واثق من نفسه في المذاكره خلاص يحاول يدخلها تاني بدل ما يعيش طول حياته ندمـان لانه حاسس ان دا مش مكانه ولا عارف يتاقلمـ
ولا منه عارف يعيش ويمشي في مجاله ولا منه خدها وريح نفسه ودخل حاجه كويسه
بجـد ربنـا يوفق الجميـع ويقدرنـا ع نظـام التعليم الفاشل المصري
حسبي الله ونعمـ الوكيـل

نفس مشكلتك نفسى اعيدها
لكن بصراحة مش عايزة اعيدها من اول سنة اولى
اعيدها من اول سنة تانية المرحلة الاولى و الثانية
بجد انا تعبانة نفسيا جدااااااااا

هى الدبلومة الامريكية دى كام سنة ..؟؟

وبعدين يعنى
 

الكلام دا جميل جدا ..............

والله احنا شكلنا هنفضل نلف وندور حولين نفسنا كدا كتير ............... ياريت نحدد ميعاد نتكلم فيه كلنا مثلا فى غرفة شات خاصة فى اى مكان ....

ايه الالغاز دية يعنى ينفع ولا لا

يا جماعة معكم اخوكم احمد مصطفي خريج تجارة القاهرة 2010 وكنت قد نويت ان اعيد الثانوية العامة هذا العام ولكني فوجئت مثلكم ان هناك قانون يحول دون تحقيق وانا اري انا هذا القانون غير دستوري لذلك قرت ان اتخذ خطوة جديه تجاه هذا الامر وهي رفع قضية بالطعن في دستورية هذا القانون بالمحكمة الدستورية العليا وبعد قراءة تعليقاتكم الخاصة بهذا الموضوع ازداد اصراري علي الخوض في هذا الامر كما قررت ان اتحمل تكاليف هذه القضية طواعية مني وكل ما اريده منكم شيئان:
1-ان نقوم بحشد اكبر عدد من المتضررين من هذا القانون ليكون صوتنا مسموعا لدي المسئولين
2-ان نتواصل معا في اقرب وقت ممكن او ان نتقابل جميعا لتنسيق ما يجب علينا فعله
ولمن يرغب منكم في التواصل معي فيمكنه الاتصال بي من خلال الوسائل التالية:
0168693097
sameh_2010_5***********

السلام عليكم
احنا هانعمل صفحة على فيس بوك اسمها السماح باعادة الثانوية العامة
المهتم بالموضوع ياريت يشترك ويدعو اصدقاؤه

احنا عملنا مجموعة على الفيس بوك عشان نجمع نفسنا عليها
http://www.facebook.com/pages/%D8%A7...75299405860966

لا حياة مع الياس ولا حياة بلا امل