|
اسعار و سوق الغاز … و العلاقه بين مصر و اسرائيل في الغاز
اسعار و سوق الغاز … و العلاقه بين مصر و اسرائيل في الغاز http://www.turkpress.co/sites/defaul...1%D8%B3_22.jpg https://fbcdn-sphotos-c-a.akamaihd.n...e24bec9ed13731 النهارده حنتكلم مع بعض حكايه الغاز الطبيعي و سوقه و قصه مصر و اسرائيل. الغاز الطبيعي ده تقريبا لحد التسعينات كان منتج ثانوي من انتاج البترول. و كنا في بعض الحقول نحرقه بطريقه فنيه متخصصه عشان ما يولعش و يعمل حريقه كبيره. كتير من حقول البترول في العالم بيطلع معاها غاز طبيعي و اسمه الغاز المرافق او بالإنجليزي أسوشتيد جاس. في بعض الأحيان كنا ناخذ الغاز اللي طالع ده و بدل ما نحرقه نعيد ضخه في الحقل عشان نحافظ علي ضغط البترول اللي طالع. امريكا طلعت في عام ١٩٣٨ قانون اسمه قانون تنظيم الغاز الطبيعي (المصدر). في الأربعينات بدأت امريكا تبني شبكه ضخمه من الأنابيب لنقل الغاز من الحقول في جنوب امريكا (تكساس مثلا) للمستهلكين في الشمال. و ظهر في امريكا سوق لبيع الغاز الطبيعي. فبدأت الشركات المنتجه تبيع الغاز للمستهلك. لكن كانت الاسعار رخيصه جدا لان الغاز كان لسه وقتها منتج ثانوي زايد عن الحاجه. الانتاج الرئيسي كان البترول. مشكله الغاز الطبيعي انه غاز. لذلك ملوش سوق عالميه او نقول انه اخد وقت طويل عشان يبقي فيه سوق عالمي. ليه؟ لانه غاز. البترول سهل قوي تحطه في سفينه و تنقله لأي ميناء في العالم و تبيعه. لذلك في سوق عالمي للبترول. الغاز صعب تحطه في سفينه و تنقله. صعب تمسكه و حجمه كبير. لازم تنقله في انابيب مخصوصه لحد المستهلك. و بالتالي الشركه اللي بتبيع لازم تبيع للمستهلك اللي خط الأنابيب واصل له. متقدرش الشركه دي مثلا تقول انا مش عاجبني السعر اللي المستهلك ده بيشتري بيه لذلك انا حاخد الغاز بتاعي و أبيعه بره امريكا مثلا. مينفعش. و ده تعريف انه مفيش سوق. السوق يتطلب ان يبقي عند البائع و المشتري اختيارات و قدره علي عدم البيع او الشرا لو السعر غير مناسب. دي اساسيات وجود اي سوق. كمان اساسيات وجود سوق انك تقدر تبيع لو عاوز تبيع. طب لو انا شركه في تكساس و بأطلع غاز و عاوز تبيع في أوروبا متقدرش لانك متقدرش توصل السلعه للمستهلك و بالتالي مفيش سوق عالميه. في بس سوق محليه حوالين خط الأنابيب. https://fbcdn-sphotos-e-a.akamaihd.n...3642432baef72d http://almesryoon.com/images/3c203f5...46daf2e6aa.jpg فضلت الأمور كده لحد السبعينات وبعدين أيه اللى حصل . يتبع |
تابع فضلت الأمور كده لحد السبعينات وبعدين أيه اللى حصل . في الوقت ده امريكا طورت تكنولوجيا انتاج الغاز الطبيعي المسال (المصدر ). معناها ايه؟ فكر كده انك تعمل تلاجه كبيره قوي تبرد الغاز لدرجه حراره ناقص ١٦٠ درجه مئويه. الغاز عندها بيتحول لسائل. و بالتالي فجأه الغاز السائل ده بقي سهل نقله. صحيح لازم سفينه مخصوصه و مينا مخصوصه تقدر تتعامل مع الحراره المنخفضة قوي دي لكن اسهل بكتير من الغاز. ببساطه حجم الغاز المسال واحد علي ٦٦٠ من حجمه و هو غاز (فاكر الكيميا بتاعه ثانوي؟) و بالتالي اسهل نقله و تخزينه (المصدر ). في السبعينات و الثمانينات بدأت الشركات الأمريكيه تعمل محطات لتسييل الغاز المستخرج في ماليزيا و اندونيسيا و الجزائر في السبعينات. الغاز المسال بتاع ماليزيا و اندونيسيا كان بيروح اليابان. الغاز المسال بتاع الجزائر كان بيروح امريكا و أوروبا (المصدر ). طيب انت ممكن تسأل ليه امريكا بتجيب غاز من الجزائر طالما عندها غاز كثير و خطوط انابيب؟ سؤال مهم. الاجابه انه لو تفتكر قلنا ان لو انت مستهلك و قاعد علي خط الأنابيب بتاع شركه غاز معينه ملكش اي اختيار غير انك تشتري منها. ده طبعا مش سوق حره. و وقتها امريكا بدأت تحرر سوق الغاز و البترول و اسعار الطاقه كلها كانت بتزيد (اخر السبعينات هو وقت الثوره الايرانيه و بعد حرب ٧٣ و الزيادات الكبيره في اسعار الطاقه). فالمستهلكين في شمال شرق امريكا (الصناعي) شافوا انهم ممكن مع الوقت أرخص لهم يجيبوا غاز من الجزائر. و انه بالرغم ان الغاز الامريكي لسه رخيص لكن ممكن يخلص و ممكن يغلى و هم مش عاوزين يبقوا تحت رحمه منتج واحد بس، لذلك استثمروا في الغاز الجزائري و بنوا مينا مخصوصه قرب بوسطن لاستقبال الغاز الجزائري. https://scontent-iad.xx.fbcdn.net/hp...87&oe=5589AB4C https://modo3.com/thumbs/fit630x300/...8%B9%D9%8A.jpg في نفس الوقت في الثمانينات، روسيا بدأت تعمل خط انابيب الغاز من روسيا لاوروبا. أوروبا كانت وقتها عاوزه تسيب الفحم و النووي و عاوزه تستخدم الغاز الطبيعي زي امريكا لانه انظف كثير للبيئة. روسيا وقتها كانت بتدي الغاز لاوروبا بأسعار بسيطه لانه برضه التركيز كله كان علي البترول. و الأنابيب كمان كانت معموله بتكنولوجيا اوروبيه و الاتحاد السوفيتي وقتها كان محتاج اي فلوس. لكن مع التسعينات و مع القرن الجديد، العالم كله بدأ يقع في غرام الغاز لانه نظيف و رخيص. و كمان تكنولوجيا تسييل الغاز تطورت قوي و بقت اسهل. لكن فضل العالم فيه سعرين للغاز. في سعر الغاز المنقول بالأنابيب و سعر مختلف خالص للغاز المسال. الغاز المسال أغلي بكثير من المنقول بأنابيب. ليه؟ لانه بيتكلف اكثر بكثير. اولا لازم محطه لتسييل الغاز و دي بتتكلف مليارات. و كمان لازم سفن مخصوصه لنقل الغاز المسال. و دي كمان بتتكلف مليارات. بالتقريب كده لو عاوزين نعمل محطه زي محطه دمياط لتسييل الغاز و هي بتنتج ٥ مليون طن غاز في السنه تكاليفها حتكون (المصدر ): ١,٨ مليار عشان حفر آبار الغاز في البحر المتوسط. ٦٥٠ مليون عشان نعمل وحدات التحكم في الغاز تحت البحر. ٣٠٠ مليون لنقل الغاز من الحقل في المتوسط لحد دمياط. ٦٥٠ مليون لمعالجه الغاز لان بيبقي فيه شوائب. ٦ مليار عشان محطه تسييل الغاز (تكنولوجيا امريكيه متخصصه و لا توجد بلد تانيه في العالم بتعرف تعملها) ١,٦ مليار عشان نعمل مينا مخصوصه للتصدير ١ مليار عشان السفن المخصوصة لنقل الغاز المسال. ١ مليار عشان نعمل مينا تستقبل الغاز المسال و ترجعه غاز تاني. المجموع حوالي ١٣ مليار دولار تكاليف رأسماليه عشان تنتج ٥ مليون طن في السنه. طبعا اي مستثمر حيبقي عاوز الفلوس دي ترجع. و بالتالي مفيش مستثمر حيحط الفلوس دي الا اذا كان عنده مشتري جاهز بعقد طويل. لو حولنا التكاليف دي لتكاليف انتاج كل الف متر مكعب (انظر التحويلات في صفحه ٨ من المصدر السابق ). حنلاقي ان تكلفه انتاج الألف قدم مكعب من الغاز المسال تقريبا ٧-٨ دولار. طبعا المنتج محتاج هامش ربح كمان. و بالتالي الغاز المسال بيتباع بحوالي ١٢-١٦ دولار لكل الف قدم مكعب (المصدر ). طبعا احنا في مصر بنقول ايه العالم المفتريه دي. يعني عامل هامش ربح ٤-٨ دولار في كل الف متر مكعب. يتبع |
تابع طبعا احنا في مصر بنقول ايه العالم المفتريه دي. يعني عامل هامش ربح ٤-٨ دولار في كل الف متر مكعب. يعني ٣٠-٥٠٪ هامش ربح. ايه الافترا ده؟ طبعا لاحظ ان السعر لا علاقه له بالتكلفة. السعر له علاقه بالمستهلك يقدر يدفع ايه و محتاج السلعه و لا مش محتاجها و هل عنده اختيارات و لا مفيش اختيارات. و ببساطه لان الانتاج محتاج رأسمال كبير جدا محدش حينتج الا اذا كان ضامن عايد مجزي جدا. و لو محدش أنتج يبقي مفيش غاز! http://s.alriyadh.com/2006/01/01/img/011119.jpg طبعا الغاز المنقول في انابيب أرخص بكثير. لانه لا في سفن مخصوصه و لا محطه تسييل غاليه و لا اي حاجه من دي. تقريبا كده تكلفه انتاج الغاز المنقول في انابيب حوالي دولار تقريبا في الشرق الأوسط. و ربما يصل لثلاثة دولار لكل الف قدم مكعب (المصدر ). و سعره في امريكا حوالي ٣-٤ دولار للغاز في الأنابيب. و بيحدد ده سوق اسمه سوق هنري هب موجود في جنوب امريكا و معظم الأنابيب بتطلع منه لباقي امريكا (المصدر ). لكن ده في امريكا و دي سوق بقي فيها منافسه عاليه جدا بتقلل الاسعار. فكده العالم انقسم قسمين. جزء قريب منه غاز ممكن يتنقل بأنابيب و بالتالي ياخد غاز انابيب. زي مثلا أوروبا من روسيا و زي شمال امريكا من جنوبها. و القسم التاني بعيد عن اقرب مكان فيه غاز و بالتالي مضطر يشتري غاز مسال بسعر اعلي بكثير. و دي حاله خاصه جدا في العالم ان نفس السلعه بقي ليها سعرين مختلفين جدا في العالم لان السوق مختلفة و تكنولوجيا النقل مختلفه. مصر و اسرائيل نوصل بقي لبيت القصيد. ايه موضوع مصر و اسرائيل. يتبع |
نوصل بقي لبيت القصيد. ايه موضوع مصر و اسرائيل. في عام ٢٠٠٥ احتفلت مصر و اسرائيل بأن اسرائيل حتستورد غاز من مصر (المصدر ). اي بلد معندهاش غاز بلد قدامها حل من أتنين. اما تشتري غاز بالأنابيب من بلد قريبه منها. و ده حيبقي أرخص. او تشتري غاز مسال و ده زي ما شوفنا أغلي بكتير. اسرائيل عندها مشكله اكبر من اي بلد. او الحقيقه مشكلتين. الاولي ان كل دول الجوار المفروض مقاطعاها. يعني المفروض متقدرش تلاقي غاز في انابيب. حتي الغاز المسال صعب في حاله اسرائيل. ليه؟ و دي مشكلتها التانيه ان معظم دول انتاج الغاز المسال في العالم دول اسلاميه. يعني لا قطر و لا ماليزيا و لا إندونيسيا حيصدروا غاز مسال لإسرائيل. و زي ما شوفنا الغاز المسال مينفعش يتسرب مثلا و لا يتبعت في الضلمه. لانه محتاج سفن مخصوصه و موانئ مخصوصه و استثمارات كبيره. لذلك مصر بقت لقيه بالنسبه لإسرائيل. إنقاذ ما بعده إنقاذ ان مصر تصدر غاز لإسرائيل أساسا. لان من غيره اسرائيل لازم تحرق فحم او بترول و ده مضر بالصحه و البيئه. بالمناسبه لما مصر قطعت الغاز عن اسرائيل في ٢٠١٢ اضطرت اسرائيل تستخدم الفحم (المصدر ). المفروض في ظروف زي دي مصر تاخد اسعار رهيبه للغاز بتاعها. لان البديل هو غاز مسال من امريكا الوسطي او افريقيا سعره لن يقل عن ١٢ دولار للألف قدم. و لكن مصر باعت الغاز لإسرائيل بسعر اقل من دولار للألف قدم مكعب. اي نعم. و للدقه بسعر ثلاثه ارباع دولار لكل الف قدم مكعب فقط لا غير. http://elbadil.com/wp-content/upload.../99.jpg?c63277 المقاله الاصليه اللي نشرت الخبر (المصدر ) و فيه سعر بيع الغاز المصري لإسرائيل. و الأرقام فيه لا تقبل الشك و منشوره في النيويورك تايمز. و ايضا تأكدنا من وسائل الاعلام وقت رفع هشام قنديل لسعر الغاز المصري المصدر للأردن لحوالي دولار لكل الف قدم . و مما يثير الشك ان ذات الأرقام كانت منشوره في دراسه أعدتها الغرفه التجاريه المصريه الأمريكيه بعد ثوره يناير، ثم اختفت الدراسه تماماً (المصدر ) كما اختفت كذلك ذات الاسعار المنشوره علي موقع جمعيه الغاز و البترول المصريه (المصدر ). يعني هذا ان الحرامي يريد اخفاء جريمته! تعني هذه الاسعار أن مصر باعت الغاز لإسرائيل باقل من سعر إنتاجه البالغ ٢-٣ دولار لكل الف قدم. اي ان المواطن المصري قدم دعما للمواطن الاسرائيلي يبلغ ٢ دولار لكل الف قدم مكعب كما ساهم في الحفاظ علي البيئه و الصحه في اسرائيل. و هي دوله دخل المواطن فيها حوالي ١٠ اضعاف نظيره المصري! الاسوء هنا هو ان روسيا في عام ٢٠٠٥ كانت تبيع الغاز لأوكرانيا بسعر ٥-٦ دولار لكل الف قدم مكعب (المصدر ) من خلال خط الأنابيب الروسي لأوكرانيا. و أوكرانيا دوله فقيره أفقر كثيراً من اسرائيل و تربطها مع روسيا روابط ثقافيه ضخمه! بينما مصر كانت تحتفل ببيع الغاز لإسرائيل بسعر تلات ارباع دولار لكل الف قدم مكعب! ثم بعد ذلك يقولون ان من باع لم يكن علي علم بالقوانين و يطلع براءه! و تورط المخابرات المصريه و كل اجهزه الامن القومي في بيع الغاز لإسرائيل هو شيئ ثابت لا شك فيه (المصدر ). و دور عمر سليمان في هذا واضح و مع ذلك يقول البعض انه بطل! ربما بطل في التفريط في حقوق الشعب المصري! و العجيب ان في حيثيات حكم براءه مبارك من تصدير الغاز لإسرائيل يقول القاضي ان المخابرات العامه كانت تاخد نصيب من تصدير الغاز لإسرائيل لتمويل عمليات بعيدا عن الموازنه! يعني المخابرات بتسمسر و ده طبعا يفسر ليه كانت عاوزه تصربع الصفقه و البيع لإسرائيل. طيب السؤال في صفقه زي دي واضح فيها ان السعر قليل جدا جدا بالنسبه للاسعار العالميه. طيب ايه الوضع دلوقتي؟ يتبع |
تابع طيب ايه الوضع دلوقتي؟ اللطيف ان الغاز المصري قل و اسرائيل اكتشفت حقول جديده في البحر المتوسط و دلوقتي مصر عاوزه تستورد غاز من اسرائيل. جميل. كله بيزنس. المفروض بقي ان الغاز ده يبقي بنفس سعر لما اسرائيل كانت بتستورد من مصر. مش كده؟ لا طبعا. اسرائيل حتصدر الغاز لمصر بسعر ١١ دولار لكل الف قدم مكعب (المصدر ). اي نعم. ٧ مليار متر مكعب في السنه. اضرب في ٢٧ عشان تحول لقدم مكعب. اقسم علي ١٠٠٠ عشان يبقي للألف قدم مكعب. اضرب في ١٥ عشان ١٥ سنه. و السعر هو ٣٠ مليار دولار. يعني ١١ دولار لكل الف قدم! يعني الغاز اللي مصر صدّرته بسعر اقل من دولار لما السعر في العالم كان ٦ دولار حنستورده بسعر ١١ دولار لما السعر في العالم بقي ٣ دولار (بص علي الرسم البياني للسعر في العالم في المصدر ده). https://jawdablog.files.wordpress.co...ng?w=670&h=447 و بالتالي الشك فيه عمولات هو شك يجب التحقيق فيه. فهمنا ليه اي حد بيفهم في اقتصاديات الغاز لازم يتجنن مش بس من الخيانه و لكن من الاستهبال الرهيب الذي يحدث للشعب المصري! |
الناتج القومي المحلي
الناتج القومي المحلي http://alghad.com/file.php?fileid=23...658&height=400 سنتناول اليوم مفهوم الناتج القومي المحلي. و حنحاول نفهم أهميته ايه و ازاي نحسبه. اي اقتصادي في العالم عاوز يدرس بلد لازم اول حاجه يفهمها هي الناتج القومي المحلي. ده اهم معيار للحكم علي اقتصاد اي بلد في العالم. و دي اول حاجه تبص عليها لو عاوز تقيم اي بلد من ناحيه الاقتصاد. ما هو الناتج القومي لأي بلد؟ هو مجموع القيمه المضافه لكل السلع و الخدمات المنتجه او المقدمه في الدوله في خلال مده معينه. طيب ايه الكلام الكبير ده. انت قلتم كلام بسيط. تعالوا ناخد مثل نفهم بيه قصه القيمه المضافه دي. ناخد انتاج العيش. عشان تنتج عيش الفلاح محتاج يشتري حبوب بجنيه مثلا. الفلاح اشتري الحبوب و زرع قمح. طلع القمح باعه ب ٢ جنيه و نص. الفلاح ده عمل قيمه مضافه في الاقتصاد مقدارها جنيه و نص. الفرق بين القمح اللي باعه و الحبوب اللي اشتراها. طيب. المطحن اشتري القمح ب ٢,٥ جنيه. طحن القمح. باعه دقيق ب ٣,٥ جنيه. المطحن عمل قيمه مضافه جنيه واحد. الخباز اشتري الدقيق ب ٣,٥ جنيه. و باعه ب ٥ جنيه. الخباز عمل قيمه مضافه في الاقتصاد بالفرق بينهم يعني عمل ١,٥ جنيه. طيب نفرض الراجل اللي عمل الحبوب من الأصل عمل الحبوب بدون اي مجهود لانها طلعت من القمح القديم اللي عنده. يعني بياع الحبوب عمل قيمه مضافه بجنيه. طيب الناس اللي اشترت العيش كلته و انبسطت. خلاص مفيش قيمه تانيه مضافه لان العيش كان المنتج النهائي خلاص. يبقي ايه مجموع القيم المضافه اللي اتعملت في كل الاقتصاد؟ جنيه من بتاع الحبوب + ١,٥ من الفلاح + جنيه من المطحن + ١,٥ من المخبز. يعني خمسه جنيه المجموع. اللي هي بالضبط سعر المنتج النهائي. لذلك بنقول ان الناتج القومي المحلي هو مجموع قيمه السلع و الخدمات النهائيه التي تباع او تقدم في الدوله. طبعا الهدف انك تعد بس قيمه السلع النهائيه او القيم المضافه فقط هي انك متعدش الحاجه مرتين و تلاته نتيجه الخطوات الوسيطة في اي اقتصاد. و الا نبقي حنعد الجنيه بتاع الحبوب اربع مرات مع ان المفروض نعدها مره واحده فقط. فهمنا دي؟ سهله. العلاقه المستخدمة لحساب الناتج القومي المحلي: يتبع |
تابع العلاقه المستخدمة لحساب الناتج القومي المحلي: http://mostasmer.com/wp-content/uplo...-1-640x426.jpg طيب تعالوا نفهم ازاي بنحسب الناتج القومي: الناتج القومي = قيمه السلع النهائيه (فهمناها دي) + مصروفات الحكومه + الاستثمارات + التصدير – الاستيراد. نفهم دي شويه. فهمنا قيمه السلع النهائيه. ايه موضوع مصروفات الحكومه؟ يعني الحكومه عملت طريق صرفت عليه مليون جنيه. الطريق ده منتج نهائي. أتكلف مليون. يبقي الاقتصاد دخل له قيمه مضافه مليون. ملاحظه: العاده طبعا في الدول المحترمه ان محدش بيشتري من الحكومه. يعني محدش بيشتري طريق من الحكومه. لذلك منعرفش ايه سعر الطريق اللي الحكومه عملته. فمنقدرش نعامل الطريق زي العيش او الطماطم اللي سعر المنتج النهائي معروف. لذلك بنحط تكلفه الطريق و ليس سعره في حساب الناتج القومي. لكن في بلد زي مصر الحكومه بتبيع و الجيش بيبيع و زيطه طبعا. الاستثمار هو شراء معدات بغرض الاستثمار. يعني تشتري معدات لمصنع بمليون جنيه يبقي ده منتج نهائي و يتحسب ان الناتج القومي زاد مليون جنيه. نرجع لمثال العيش. حسبنا القيمه المضافه بخمسه جنيه. بس لو استوردنا الحبوب يبقي لازم نخصم الجنيه بتاع الحبوب. ليه؟ لان القيمه المضافه بتاعتها محصلتش في الدوله. طيب لو عملنا بالقمح بدل العيش عملنا تورته و صدرناها بمائتي جنيه يبقي عملنا قيمه مضافه مائتي جنيه بدل الخمسه (المصدر ). ناخد مثلا بدل العيش بلد بتنتج طيارات مقاتله. سعر الطياره الاف ١٦ حوالي عشرين مليون دولار (المصدر ). وزن الحديد في الطياره حوالي عشره طن (المصدر ). سعر طن الحديد حوالي ٦٠٠ دولار (المصدر ). يعني الطياره فيها حديد تمنه ٦ الف دولار. لكن بتتباع بعشرين مليون دولار! احسب انت بقي القيمه المضافه في الطياره المقاتله. و طبعا السبب ان السعر عالي هو المعرفه العاليه التي بدونها لا تستطيع ان تحول شويه حديد لطياره مقاتله. بالمناسبه صناعه الدواء مشابهه لصناعه السلاح و الطيران من ناحيه القيمه المضافه العاليه لان فرق الدواء داخل فيه كيماويات تقريبا ببلاش لكن بيتباع بأرقام عاليه جدا لان المعرفه اللي فيه مرتفعه جدا. وضحت. الناتج القومي المحلي للفرد: يتبع |
تابع الناتج القومي المحلي للفرد: http://pnn.ps/wp-content/uploads/201...ck-400x330.jpg طيب اخر حاجه و بعدين نأخذ أمثله. لما نقسم الناتج القومي المحلي الكلي علي التعداد يطلع رقم هو متوسط الناتج القومي للفرد في الدوله. طبعا الدوله الغنيه متوسط انتاج الفرد فيها عالي جدا. و بالعكس الدوله الفقيره. لان في النهايه الناتج القومي هو قيمه مضافه تدخل في جيوب الناس. طبعا مش لازم يكون في عداله. ممكن كل الناتج داخل لفرد واحد. و لذلك في طرق لقياس عداله التوزيع حنفهمها بعدين. ازاي دوله تبقي غنيه؟ ان أفرادها يعملوا قيمه مضافه عاليه. يعني ينتجوا سلع غاليه و يصدروها و يستوردوا اقل. الموضوع واضح جدا. لذلك اهم شيئ ينظر له الاقتصاديون عند تقدير اقتصاد دوله مقارنه لآخري هو متوسط الناتج القومي المحلي للفرد و معدلات نموه كل سنه. يعني لا سعر الصرف و لا الديون و لا كل ده له اعتبار اذا لم يكن الفرد ينتج! نقول كمان. ممكن مثلا تبيع غاز للعالم زي مصر زمان و تبقي عملت قيمه مضافه الفرق بين سعر التصدير و تكلفه الانتاج. و بعدين تاخد فلوس الغاز تستثمرها و تشتري بها معدات فتدخل الفلوس مره كمان في خانه الاستثمار. و بعدين لو الاستثمار ده عمل عائد و ربح يصبح قيمه مضافه جديده، و هذه “عجله” الاقتصاد الحقيقيه. أمثله: https://fbcdn-sphotos-a-a.akamaihd.n...01236887_o.jpg انظر الشكل . و به متوسط الناتج القومي للفرد لمجموعه من الدول. اخترنا الا تكون مصر منهم عشان لا يصعب حالنا علينا اكثر ما هو. حنلاحظ حاجات مهمه: ١- متوسط الناتج القومي للفرد في السعوديه و الامارات و الكويت الان هو ذاته كما كان في عام ١٩٨٠! هذا طبعا فشل في اداره الاقتصاد. و السبب هو سعر البترول الذي انهار في التسعينات فانهارت معه متوسطات الانتاج الفردي في الخليج. https://fbcdn-sphotos-g-a.akamaihd.n...82b3d3b83d2846 ٢- تلاقي ان بلد زي امريكا بها معدلات نمو متسارعه في متوسط انتاج الفرد. و ان النمو فيها مثل القطار الذي لا يقف. (لاحظ ان الناتج القومي يخصم الاستيراد. لذلك كل الكلام ان امريكا تستورد كثير هو كلام من لا يفهم. هي تستورد سلع ذات قيمه منخفضه و تنتج سلع عاليه القيمه المضافه) طبعا هناك دول مثل قطر و النرويج ذات متوسط انتاج للفرد اعلي من امريكا و لكن طبعا عدد سكان امريكا كبير جدا مما يجعلها اكبر اقتصاد في العالم. حتلاقي طبعا متوسط انتاج الفرد قليل في الصين لكن العدد كبير جدا. ٣- تلاقي دوله مثل النرويج. كانت فقيره مثل دول الخليج في السبعينات. و لكن استغلت عايد البترول في الانتاج و التصنيع و التكنولوجيا. لذلك متوسط دخل الفرد الان اعلي بكثير من الثمانينات عكس السعوديه و الامارات مثلا. ٤- تلاقي دول غير بتروليه مثل تركيا و ماليزيا. و هما كأنهما يتنافسان معا. تقريبا الدخل فيهما متقارب جدا و يتحرك بذات الوتيره. دا موضوع الناتج القومى المحلى |
الحلقه الاولي: التضخم و أسبابه و حالته في مصر
تبسيط مفاهيم الاقتصاد. الحلقه الاولي: التضخم و أسبابه و حالته في مصر التضخم ببساطه معناه ارتفاع الاسعار نتيجه لازدياد البنكنوت مع المواطنين و قله السلع المعروضه. يعني لو فيه اربع أشخاص فجأه بقي مع كل واحد منهم ١٠٠ جنيه لان البنك المركزي طبع فلوس و اداهم و كل واحد منهم عاوز يشتري بهم فانوس رمضان مثلا. لكن المحل فيه ٣ فوانيس فقط. حيحصل ايه؟ البياع أكيد في وقت حيجيله ٢ عاوزين يشتروا نفس الفانوس. او حيخلص عنده الفوانيس و لسه بيجي ناس يطلبوها. البياع حيلاحظ انه في طلب كبير فطبيعي انه يرفع السعر. و بالتالي يحصل ارتفاع في الاسعار فيحصل تضخم لان الناس معاها فلوس اكثر من حجم السلع و الخدمات المعروضه في السوق. http://static.jbcgroup.com/amd/pictu...effaf209a0.jpg مثال كمان لما الحكومه تزود المرتبات لكن كميه السلع الموجوده في الاسواق ثابته. طبيعي انه علي طول الاسعار تزيد لان بقي فيه فلوس اكثر بتطارد نفس السلع. طيب هل البياع ده بقي كده حرامي لانه بيرفع السعر؟ الحقيقه لا. ليه؟ لان سعر اي حاجه المفروض هو التوازن بين العرض و الطلب و هذا قانون يرتقي لمرتبه قوانين الفيزيا و الطبيعه. حاولت مجتمعات كثيره انها تفرض قوانين تمنع زياده الاسعار و حتي فرض عقوبات القتـــل لمن يرفع الاسعار. و فشلت كل هذه التجارب. من العراق لامريكا لمصر. ليه؟ لان المفروض انه لا يسن قانون يتحدي قوانين الطبيعه. يعني مينفعش تقول قانون انه لازم كل بني آدم يتحدي الجاذبيه و يطير مثلا! لذلك اي حكومه تقول الرقابه علي الاسعار و عقوبات صارمه ضد المخالفين هي حكومه تضحك عليك. و كل الدول التي حاولت تطبيق تسعيره انتهي الامر انها عملت سوق سودا. ليه؟ لان التاجر اللي عارف انه فيه طلب كبير علي سلعه محدوده و انه لازم يبيعها بسعر مفروض من الحكومه مش حيبيع او يبيع لقله محدوده محتاجه و مستعده تدفع اكثر. و بالتالي حصل انه السلعه شحت اكثر في السوق و سعرها بقي اعلي من حتي بدون التسعيره! طيب ازاي حكومه تعالج التضخم؟ يتبع |
تابع طيب ازاي حكومه تعالج التضخم؟ http://1.bp.blogspot.com/-wGi163d2l5...00/2459254.jpg هما طريقتين: ١- زياده الانتاج. فتزيد السلع في الاسواق فتقل الاسعار. و هذا منهج الولايات المتحده مثلا التي تعتمد علي الانتاج الوفير او ما يطلق عليه بلد الوفره. بالعكس امريكا تشجع الناس علي الاستهلاك الكثيف مثل البوفيه المفتوح. ٢- تقليل الفلوس الموجوده في السوق. و بالتالي السيطره علي الاسعار. التضخم الحالي في مصر: التضخم الان في مصر عالي جدا و وصل اعلي من 14٪. يعني السلع كل سنه بيزيد سعرها 14٪. و كان التضخم قل جدا وقت مرسي حتي وصل ٤٪. لكن عاد مره اخري للزياده . المصدر ده فيه بيانات التضخم في مصر. و احنا عاوزينكم كل ٣ شهور تدخلوا علي الموقع في المصدر الاول و تتعلموا تقروا بيانات التضخم. و بالمناسبه هذه البيانات يصدرها البنك المركزي و يراجعها البنك الدولي و يتم نشرها. لاحظ انه في تقلبات موسميه يعني الاسعار في مصر بتقل في الشتا عاده مثلا لذلك انظر للمتوسط السنوي. https://fbcdn-sphotos-c-a.akamaihd.n...6b6f5cf81d32ae ليه التضخم بيزيد في مصر دلوقتي و ليه ده موضوع خطير؟ التضخم بيزيد في مصر دلوقتي للأسباب التاليه: ١- مفيش استثمار و بالتالي مفيش انتاج. زياده الانتاج محتاجه استثمار. مش بتحصل لوحدها. الاستثمارات الاجنبيه قليله جدا الان (المصدر ده – ستلاحظ أيضاً في المصدر ان الاستثمار الأجنبي تضاعف وقت انتخابات مرسي ثم عاد للانخفاض مره ثانيه لأكثر من النصف). و الاستثمارات المحليه ضعيفه. و حتي وقت مبارك كان معظم الاستثمارات الاجنبيه رايحه في انتاج غاز و بترول. طيب الاجانب و خائفين من مصر. ليه الاستثمار المحلي ضعيف؟ لان سعر الفايده عالي جدا. https://dotmsrstaging.s3-eu-west-1.a.../1241573_p.jpg اي مستثمر محلي عاده بيقترض من البنك عشان يستثمر. نادر جدا انه واحد معاه كاش كبير عشان يحطه في استثمار. الغني بيبقي غني عشان عنده موجودات و أصول (بيوت عقارات مصانع محلات) و غيره. محدش بيشيل فلوسه كلها كاش. طيب انا البنك او مشروع التفريعه قناه السويس بيديني فايده ١٢٪. فايده عاليه جدا احلي من اي استثمار فيه مخاطر و وجع دماغ. لذلك مفيش مستثمر عادي حيستثمر. لازم يكون مستثمر غير عادي! يعني مستثمر عنده مشروع يجيب اكثر من ١٢٪ في السنه بدون مخاطر. و في بلد مثل مصر ده لازم يكون مستثمر واصل لأعلي المستويات… كوسه يعني. لكن مشكله الكوسه انها بتخلي طبقه محدده غنيه و بقيه الشعب بعيد عنها. و بالمناسبه لها تعريف علمي اسمه “الاقتصاد الاقصائي”. المصدر ده فيه اهم دراسه علميه عن لماذا تفشل الدول ذات الاقتصاد الاقصائي. لذلك لو انت عاوز تحفز الاستثمار المحلي المفروض تقلل سعر الفايده! بس ازاي. احنا سمعنا في التلفزيون انك لو قللت سعر الفايده بيحصل تضخم! يتبع |
تابع بس ازاي. احنا سمعنا في التلفزيون انك لو قللت سعر الفايده بيحصل تضخم! ايوه حقيقي. ليه؟ لان المستثمر لما بياخد قرض عشان يستثمر مش بيزود الانتاج علي طول. ده لسه يبني مصنع و يجيب عمال و يديهم مرتبات من غير ما يبقي فيه انتاج. معني كده انه جزء من الاستثمار بيروح في مرتبات. يعني بيدخل السوق قبل ما يزيد الانتاج، يعني زي ما اتعلمنا يعمل تضخم. و هذا ما يسمي في علم الاقتصاد “الضغوط التضخميه للنمو”. يعني اي مجتمع لازم يتقبل شويه تضخم لفتره محدده خلال النمو. الحرفنه في قياده البنك المركزي انها تعمل توازن بحيث انه الضغوط التضخميه تبقي في حدود المقبول. في مصر بقي قفلوا الباب ده من اصله و راحوا يشحتوا. و رفع سعر الفايده و بالتالي بيقولك انت لازم تكون حبيبي و في الشله بتاعتي عشان تعمل استثمار. طبعا ده بيقلل نمو الاقتصاد و بالتالي توقع نمو الاقتصاد في مصر لا يزيد عن ٣٪ خلال السنين القادمه! يعني التضخم اعلي بكثير من كل النمو و نسبه نمو تجعل مصر تتخلف اكثر مقارنه بالهند و الصين و تركيا و زامبيا و غانا اللي بيعملوا ١٠٪ في السنه (المصدر ). ٢- البنك المركزي بيطبع بنكنوت و الحكومه بتزود معاش العسكريين! عشان يدفع الفايده بتاعه مشروع القناه ( بدل ما ياخد قرض دولي ب ٢٪ راح واخد قرض محلي ب ١٢٪ عشان يمول مشروع حيجيب ١٢٪ عايد و يعتبر هذا ذكاء!) فطبعا لازم يطبع بنكنوت . http://4.bp.blogspot.com/-bnW_jPQB62...n_forecast.jpg https://fbcdn-sphotos-a-a.akamaihd.n...f38c9f8526baac و طبعا عشان نرضي الجيش و القضا و الشرطه نزود مرتباتهم. فاكيد يحسوا بانتعاش. و يحسوا الحياه حلوه لكن التضخم طبعا مع مرور الوقت حيشفط كل الإحساس ده. و التضخم ده زي ما شوفنا في الاول بياخد وقت بالذات في بلد زي مصر مفيش فيها بيانات اسعار واضحه. ٣- رفع الدعم عن الطاقه لدفع فايده ١٢٪ علي مشروع القناه. يعني الحكومه مباشره ترفع الاسعار و الباقي قادم. مثل السكك الحديديه و المترو و خلافه. لذلك نقول ان السياسه الاقتصاديه للسيد السيسي هي سياسه اقصائيه: ١- تركيز الاستثمار في يد قله. ٢- إرضاء مجموعات معينه بجعلهم يتخيلون ان معهم فلوس كثيره. ٣- رفع الاسعار لدي بقيه الناس. طبعا بيعملوا كده بشكل تدريجي. يعني رفع الدعم كان تدريجي و بيقلل طباعه البنكنوت لانه بيدفع جزء من الفايده علي مشروع القناه. لكن السياسه واضحه تماماً اتجاهها هو اقصائي بشكل اكبر بكثير من ايام مبارك. |
تبسيط مفاهيم الاقتصاد. الحلقه الثانيه: البورصة
تبسيط مفاهيم الاقتصاد. الحلقه الثانيه: البورصة نتعرض اليوم للبورصة او بشكل عام سوق رأس المال. اولا ما هي البورصة؟ البورصه في الحقيقه هي سوق لتبادل السلع. يعني مثلا في امريكا توجد بورصه اللحمه و بورصه القمح و بورصه لمعظم السلع الاستهلاكيه في شيكاجو مثلا. يعني اي سوق يذهب له باعه و مشترون لتبادل السلع يمكن ان يطلق عليه بورصه. و الهدف من تجميعها في سوق هو ان يكون هناك مكان و زمان محدد يتقابل فيه البائع و المشتري. و كمان ان تكون هناك شفافيه في الرقابه علي التعاملات. يعني كل حاجه عيني عينك امام الناس. في سوق مخصوصه لتبادل اسهم الشركات و هو تعريف خاص للبورصه. http://www.alboslanews.com/UploadedFiles/2016823615.jpg معني السهم و كيف تبدأ الشركات يعني ايه سهم في شركه؟ ببساطه سهم في شركه هو ملكيه جزء من الشركه. يعني مثلا شركه أبل الأمريكيه متقسمه ملكيتها لحوالي ٦٠٠٠ مليون سهم. كل سهم قيمته حوالي ١٠٠ دولار وفقا لسعر البورصه (المصدر ). ما معني ان إنسان يملك سهم في شركه أبل؟ معناها انه يملك واحد علي ٦٠٠٠ مليون من الشركه. يعني ايه يملك الشركه او جزء منها؟ يعني بالضبط ما قلته. هو يملك السهم يعني يملك واحد علي ٦٠٠٠ مليون من الشركه بكل موظفيها بعمالها بديونها بارباحها، كل حاجه. طيب مش احنا عارفين انه ستيف جوبز عمل أبل و يملك أبل. أيه موضوع ٦٠٠٠ مليون سهم ده؟ اي شركه في العالم المحترم عشان تتوسع تحتاج استثمارات. فاكرين لما قلنا في الحلقات الماضيه ان النمو يحتاج استثمار. طيب ستيف جوبز ما كانش عنده في الثمانينات الا شويه أفكار. و طبعا محتاج فلوس عشان ينفذ الأفكار دي. فيقوم رايح لمستثمرين اسمهم “مغامر رأسمالي” يعرض عليهم أفكاره و يطلب التمويل. طيب التمويل ده في مقابل ايه؟ بيكون في مقابل انه لو نجحت الشركه يتحول تمويلهم لأسهم ملكيه في الشركه. يعني مثلا يلم ١٠٠ مليون دولار في مقابل ان المستثمرين دول يتملكوا ٥٠٪ من الشركه و ستيف مثلا يتملك الباقي. و طبعا هنا العقد شريعه المتعاقدين. يعني لو أفكار ستيف جوبز قويه جدا و هو مش محتاج فلوس كثير يبقي حيديهم فقط ٢٠٪ من ملكيه الشركه و هكذا. [استطراد: لا يوجد في أي مكان في الشرق الأوسط سوق للمغامرة الرأسمالية. موجود فقط في امريكا طبعا و بعض أوروبا. وهناك مطالبات بأقامه سوق للمغامرة الرأسمالية في مصر و تمويله من بعض عوائد الغاز الطبيعي و جزء من عوائد قناه السويس و يكون لهذا التمويل مجلس أمناء يحدد كيفيه الاستثمار و حجمه و يختاره نواب الشعب مثل الحساب السيادي في النرويج – و هدف ذلك تحفيز الشباب علي الابتكار و أقامه سوق تتيح لشباب مصر تطوير شركات تنمو لتصبح مثل علي بابا الصينيه او أبل الأمريكيه. لكن هدف النظام الحالي ليس تشجيع الشباب بل تركيز الأموال في يد الجيش فقط كما اتضح من مشروعتفريعه قناه السويس الذي يهدف لتشغيل الشركات الاماراتيه و القوات المسلحة] طيب ازاي بعد كده تبقي أبل شركه كبيره؟ بعد ان تصدر الشركه اول انتاج لها و تبدأ الوقوف علي رجلها و تحقق بعض الأرباح يأتي المستثمرون و يطالبون بإطلاق الشركه في بورصه الأسهم. ليه يعملوا كده؟ لأنهم عاوزين يحققوا ربح من استثمارهم و عاوزين يجيبوا فلوس و يدوروها في شركات جديده و هكذا. و بورصه الأسهم هي السوق التي تبيع فيها و تشتري حصص الملكيه في الشركات. لذلك من الطبيعي ان هؤلاء الملاك لو عاوزين يجيبوا أموال سائله مقابل حصتهم في الشركه انهم يروحوا سوق الأسهم. http://www.investir-en-tunisie.net/i...les/bourse.jpg طيب ليه يستنوا لما الشركه تنجح؟ لان طبعا هم عاوزين يعظموا أرباحهم و يجيبوا اعلي مكسب. و محدش عاوز يشتري شركه فاشله. لذلك دور المستثمر الرأسمالي المغامر هو دور رئيسي في حركه التنميه. لانه بياخد مخاطره عاليه في شركه عباره عن فكره فقط. و معظم مخاطراته تفشل و يعتمد علي انه فقط جزء صغير ينجح و يغطي كل الفشل. كذلك هو مستثمر بيطور معرفه عاليه و قدره علي تحديد اي فكره ممكن تنجح او عندها امكانيه النجاح (المصدر ). طيب الشركه باعت اسهم في البورصه. ايه اللي يحصل بعد كده؟ يتبع |
تابع طيب الشركه باعت اسهم في البورصه. ايه اللي يحصل بعد كده؟ اولا. الناس اللي اشترت أسهم في الشركه تحولوا لملاك. يعني من حقهم يختاروا مجلس الاداره بالتصويت لو لهم أغلبيه مثلا. او تغيير مجلس الاداره. ثانيا. كثير من الشركات تقوم كل فتره تطرح اسهم جديده في الشركه. و ده بيحصل بكذا طريقه. ممكن مثلا ستيف جوبز نفسه يبيع جزء من حصته في أبل. و ممكن كمان انه يحافظ علي حصته بس بدل ما في ٦٠٠٠ مليون سهم تقوم أبل منزله كمان ٤٠٠٠ مليون سهم و تبيعهم في البورصه. طيب ليه تعمل كده؟ لان الشركه مثلا عاوزه تتوسع و محتاجه فلوس في توسع جديد. فتقوم بايعه أسهم جديده. طيب أستني شويه. قبل ما الشركه تعمل كده كان كل مالك سهم يملك واحد علي ٦٠٠٠ مليون من الشركه. دلوقتي بقي كل واحد يملك واحد علي عشره الاف مليون من نفس الشركه. يعني كده الشركه ضحكت علينا؟ لا. خد بالك. بعد لما الشركه نزلت اسهم جديده المفروض انها معاها دلوقتي رأسمال جديد و حتتوسع. و بالتالي قيمتها تزيد و أعمالها تزيد. طبعا في مخاطره. و طبعا لو ملاك الأسهم مش مقتنعين بخطه الشركه في التوسع حيبيعوا الأسهم و بالتالي سعر السهم حيقل لان في عرض كبير و طلب قليل. جميل. دلوقتي عرفنا معني سهم. http://www.egynews.net/wp-content/up...9%8A%D8%A9.jpg هل البورصه مقياس لنجاح السياسه؟ كثير من المصريين و الحقيقه معظم الناس في العالم ينظرون للبورصة انها مقياس للأداء السياسي او الاقتصادي. طيب تعالوا نفهم الكلام ده. زي ما شرحنا فوق الهدف من البورصه هو سوق لتبادل الأسهم. الهدف من الأسهم هو تكوين رأسمال للاستثمار. زي ما وضحنا الشركه بتبيع أسهم و تبيع ملكيه بغرض انها تتحصل علي رأسمال من السوق و من الناس عشان تاخد الفلوس دي و تستثمرها. طبعا ده احسن مليون مره من الاقتراض لانه مفيش فائده تندفع. انت مجرد بتبيع أفكار للمستقبل. ده الهدف الرئيسي للبورصه بالنسبه للشركات. طيب بالنسبه للشخص العادي اللي بيشتري أسهم في شركه، ايه هدفه؟ هدفه انه يختار شركه ستنجح في المستقبل و يزيد سعره الأسهم التي اشتراها حتي تزيد ثروته. سهله جدا. يعني انا عاوز اشتري سهم بجنيه و أبيعه بعد ١٠ سنين بمائه جنيه و اعمل مكسب. و علي فكره ده هدف الشركه كمان. لانها لما تنزل اسهم في السوق عاوزه تبيع الأسهم دي بأعلي سعر ممكن عشان تجيب اكبر رأسمال ممكن. لذلك لما سعر السهم بيزيد كل الناس تستفيد: الشركه و المالك. ازاي سعر السهم يزيد؟ قانون العرض و الطلب. انه يكون ناس كتير عاوزين يشتروا بأي سعر و ناس قليله عاوزين يبيعوا. و ده طبعا بيحصل لو الشركه ناجحه و الناس عندها امل كبير في مستقبل الشركه. لذلك معظم الناس عاوزه تحافظ علي الأسهم اللي تمتلكها. لذلك يقال ان سوق الأسهم كلها عباره عن توقعات المستقبل. انت تحافظ علي الأسهم التي تملكها لانك تظن ان قيمتها سترتفع في المستقبل. و انت تظن ان قيمتها سترتفع في المستقبل لان عندها أفكار قويه او ان فيها اداره قويه او انها فتحت أسواق جديده او ان هناك مشاريع جديده ستحقق أرباح ضخمه، الخ. طيب ايه علاقه ده بالسياسه؟ يتبع |
تابع طيب ايه علاقه ده بالسياسه؟ http://www.sfaxeco.net/MTDsfaxeco/up.../05/bourse.jpg طبعا في علاقه. لو مثلا الدوله فيها سياسات اقتصاديه ناجحه فبالتالي تتوقع ان شركات هذه الدوله ستحقق أرباحا كبيره في المستقبل. طيب هل ممكن اسعار الأسهم تزيد في بلد سياساتها الاقتصاديه فاشله او فيها حرب اهليه او فيها فساد؟ طبعا. لو مثلا شركات الدوله دي مستفيده من الفساد او تستفيد من الحرب الآهليه فطبعا أرباحها تتوقع انها تزيد و بالتالي سعر أسهم الشركات يزيد. لذلك ممكن جداً ان أسعار الأسهم في دول ديكتاتوريه شديده الفساد و فيها انعدام عداله كامل ان تحقق ارتفاعات و قياسيه أيضاً. انظر مثلا لشركه المعموره للتنميه العقارية في العراق و شركه بغداد للمشروبات. هذه بلد (العراق) يحدث بها انفجارات بشكل يومي و مع ذلك حققت تلك الشركتان ارتفاعات قياسيه جذبت رؤوس أموال من حول العالم (المصدر ). و كذلك ممكن ان تحقق شركات قائمه علي الفساد ارتفاعات قياسيه في البورصه مثل انرون مثلا في امريكا حتي اكتشفت (المصدر ). لذلك نحن نخطأ جدا عندما نقول ان ارتفاع الأسهم دليل مثلا علي ان الاقتصاد علي الطريق السليم. هو دليل فقط ان الشركات التي ارتفع سعر سهمها يوجد توقع بين المستثمرين انها ستحقق أرباحا مستقبليه لأي سبب من الأسباب و قد تكون أسبابا سيئه جدا. كذلك نخطأ كلنا عندما نقول ان سعر البورصه هو هدف في حد ذاته. إطلاقا. الهدف هو جذب رؤوس الأموال للشركات حتي تنمو و تتوسع. سعر السهم هو وسيله لتحقيق تلك الغايه لكن ليس غايه في حد ذاته. يعني لو اسعار الأسهم زادت جدا في بلد ما لكن هذه البلد لا توجد بها شركات جديده و الشركات لا تضع استثمارات جديده و لكن كل ما في الامر ان تلك الشركات مثلا ستحقق أرباحا اكثر بسبب ارتباطها بالنظام الجديد و حصولها علي تسهيلات احتكاريه مثلا ثم ستأخذ تلك الأرباح و لا تستثمرها، إذن انعدم الغرض من سوق الاسهم الذي هو في الأساس سوق رأسمال كما شرحنا. للتوضيح بمثال تم تسجيل ٢٧٥ شركه جديده في بورصه نيويورك في عام ٢٠١٤ بمعدل شركه كل يوم عمل تقريبا (المصدر ). قارن ذلك ب ٨ شركات في الهند (المصدر ). قارن ذلك بشركه واحده في مصر طوال الفتره من ٢٠١٠-٢٠١٤ و تعمل في مجال الاسمنت و هو مجال استهلاكي لا علاقه له لا بتكنولوجيا و لا غيره (المصدر ). فهمنا علاقه البورصه بالسياسه؟ طيب مش فيه بايع و مشتري؟ ازاي بقي البورصه تعمل فلوس للاقتصاد الحقيقي طالما فيه واحد كسبان و واحد خسران؟ فكره السؤال ده هي انه واحد بيبيع سهم لواحد ثاني. لنفرض البائع اشتري من زمان بسعر منخفض جدا و بالتالي كسبان فلوس كثير. معني كده الشاري خسران. و بالتالي الاقتصاد الحقيقي لم يتأثر. الكلام ده غلط جدا. تعالوا نفهم ليه. الكلام ده معتمد علي نظريه ان كل شيئ في الدنيا لعبه صفريه يعني المجموع صفر و لو واحد كسبان أكيد الثاني خسران. بينما الحقيقه ان مهمه الاقتصاد هي توليد ممارسات تخلق مكاسب للجميع. و للاسف يظن معظم العرب و المصريين ان الاقتصاد عباره عن شراء حزمه بقدونس و الفصال في سعرها! ازاي ده يحصل؟ يتبع |
تابع ازاي ده يحصل؟ مفهوم ازاي اللي اشتري واطي من ٣ سنين مثلا و باع عالي انه كسبان. سهله. اللي اشتري عالي ممكن يكون له أهداف مختلفه. مثلا هو مستعد يقعد مع الشركه دي ٢٠ سنه لقدام و يخلي السهم معاه المده دي كلها. سهم شركه زي أبل مثلا في واحد اشتراه في ١٩٩٧ بسعر ٢ دولار و باعه في سنه ٢٠٠٠ بسعر ١٢ دولار. يعني كسب ١٠ دولار في ٣ سنين. حيبقي سعيد جدا. لكن اللي اشتراه منه في ٢٠٠٠ بسعر ١٢ دولار و باعه في ٢٠١٥ بسعر ١٢٠ دولار عمل ١٠٠ دولار علي السهم و ضاعف فلوسه اكثر من ٥ مرات و ان كان في وقت أطول. لكن الاول أخد مخاطره عاليه جدا لانه لو كان انتظر سنه و باع في ٢٠٠١ بدل من ٢٠٠٠ كان حيبيع برضه بسعر ٢ دولار و يبقي ما معلش اي حاجه. لذلك الناس البائع و المشتري ممكن يبقي لهم أهداف مختلفه بمدد زمنيه مختلفه و بقدرات مختلفه علي تحمل المخاطره. و ممكن جدا لو كلهم أذكياء ان يحققوا أهدافهم. في حالتنا هنا البائع عنده قدره عاليه علي المخاطره لكن عاوز يحقق ربح كبير سريع لانه مثلا محتاج فلوس بعد ٣ سنين للزواج مثلا. و في الأغلب لا يفعل ذلك بكل فلوسه و لكن بجزء يخصصه للمغامرة. الشاري هنا هو مثلا شخص عنده ٤٥ سنه وقت الشراء سنه ٢٠٠٠ و يريد الادخار للمعاش في عام ٢٠١٥ و دي كل فلوسه لذلك يريد تقليل المخاطر. https://scontent-a-lga.xx.fbcdn.net/...8d&oe=553DF4DB لذلك في الغرب اول سؤال يسألونك إياه عندما تريد ان تستثمر ما هي أهدافك و ما هو الوقت الذي تريد ان تحقق فيه هذه الأهداف. http://www.moheet.com/gallery/2011_2012/14/148138.jpg طيب ليه البورصه المصريه زادت و بعدين نزلت جامد مؤخراً؟ ببساطه لان بورصات المنطقه كلها نزلت نتيجه لانهيار اسعار البترول. فبالتالي الثقه في ان شركات المنطقه ستنمو أرباحها بقي اقل لان هذه منطقه تعتمد بشكل أساسي علي البترول. عوائد اقل للبترول معناها ان الحكومات العربيه تشتري اقل و تدفع اقل و بالتالي الفلوس تقل و أرباح الشركات تقل. في عده عوامل للارتفاع السابق علي الانخفاض في اسعار الأسهم المصريه: ١- ثقه المستثمرين ان الشركات المرتبطة بالقوات المسلحة ستحقق أرباحا كبيره بحكم الارتباط السياسي. ٢- تدفق أموال رجال اعمال. أعادوا فلوسهم للبورصه بعد إخراجها من مصر فى عهد الاخوان . لاحظ ان هذه أموال تودي لارتفاع لكن لا تودي لاستثمار او لزياده راس المال. بدليل انه و لا واحد منهم مثلا اسس شركه جديده في مصر! ٣- رغبه خليجيه في ضخ أموال في البورصه المصريه لإظهار الصعود. ٤- التضخم! جديده دي. ازاي التضخم يخلي البورصه تزيد. ببساطه لان التضخم كما شرحنا في الحلقات السابقه معناه زياده الاسعار. الشركات و بالذات الشركات “الواصله” سياسيا تستطيع بسهوله استغلال مناخ ارتفاع الاسعار لرفع الاسعار كثيراً و زياده أرباحها. فمثلا شركه أسمنت. داخل لها غاز و عندها عمال و موظفين و تنتج أسمنت. نفرض الحكومه زودت سعر الغاز علي الشركه ١٠٪. الشركه دي تقدر تزود سعر الاسمنت ٢٠٪ علي المستهلك و كمان تقدر تماطل العمال انها لا تزيد مرتباتهم بالرغم ان اسعار كل حاجه بتزيد . لذلك تلاقي اسعار اسهم شركات الاسمنت زادت مع ان سعر الغاز زاد عليها! فهمنا ليه البورصه زادت و ليه بتقل دلوقتي؟ نتمني نكون الأمور وضحت. |
| جميع الأوقات بتوقيت GMT +2. الساعة الآن 01:16 AM. |
Powered by vBulletin® Version 3.8.11
Copyright ©2000 - 2025, Jelsoft Enterprises Ltd.