طيب شكرا ليك استاذ فامبير علي المعلومات
ليه استفسار اخر
واحده صاحبتي جايبه 145 جيد يعني بس جايبه في القانون 7 واترفعت طبعا ل10
هي ممكن بكده تحول انتظام ولا ايه
وفي التخرج هتاخد درجات الرافه ولا لا
سؤال اخر
هو اللي شايل ماده او اتنين مش بياخد في السنه التانيه في المادتين دول غير درجه النجاح وبس ولا عادي بياخد درجاته عادي
كانه اول مره يمتحنها
ارجو الايضاح

اكيد طبعا تحول .. طالما مكتوبلها تحت في النتيجة تقدير وفيه كلمة (جيد) يبقي تحول

لكن لو فيه كلمة (مقبول) او (منقول بمادة ) او (منقول بمادتين) يبقي مالهاش تحويل

اللي شايل مادتين بس يبقي ناجح ويفضل شايلهم للسنة الجايه وبيمتحنهم في السنة اللي بعديها عادي جدا زي مانتي عارفه

بس اما بييجي يحسبوا الدرجة بقي .. بيبقي اقصي حاجة بتتحسبله هيا 13 من 20 .. يعين مقبول

مهما ان جاب اعلي من كدا مش هايتحسبله .. حتى لو جاب العشرين من عشرين .. هايتحسبله 13 برده

ودا بيقي عقابا ليه عشان هوا شايل المادة يعني

من فضلك انا شايل مادتين و مستخدموليش درجات الرأفة و جايب 7 و 6 فيهم

مع العلم فى واحد صاحبى جايب 7 بس فى مادة واحدة و اترفت له من 7 الى 10

شكراً على الافادة

اناللاسف الشديد جايبة 127 يعني مقبول
وجيد من 130 ياتري فيه درجات رأفة ترفعني واجيب جيد
مع اني جبت في البيزنس 7 واترفعت ل10
ياتري ممكن اجيب جيد ولا لأ وازاي احصل علي درجات الرأفة دي وامتي؟؟؟؟؟؟؟؟؟؟؟؟؟؟؟؟؟؟؟؟؟

اهئ اهئ اهئ اهئ اهئ اهئ

موضوع بجد روعة

ربنا يكرمك يارب ويجعله فى ميزان حسناتك

وربنا يهدينا جميعا


على فكرة انا لسة حدخل كلية السنة دى ان شاء الله وربنا يستر



و اهم حاجة يكون كل واحد ف حالة

استفسارك بينقسم لجزئين .. قسم مختص بيك وقسم مختص بصاحبك

القسم المختص بيك .. دا ياسيدي هايبقي كالآتى

دلوقتى قانون الرأفة بيقول ايه ؟؟؟

ان كل طالب ليه 4 درجات فقط بيتم استخدامهم في حالات تحويل الحالة من راسب الى ناجح أو من مقبول الى جيد

طبعا القاعدة دي مش سداح مداح كدا اهو .. لا ليها قواعد جزئية

القواعد الجزئية دي هيا حاجتين :

1- ان الأربع درجات عمرهم مايتحطوا في مادة واحده

2- ماينفعش نحط درجات رأفة الا للمادة اللي يبدأ تقديرها من ضعيف فيما فوق (من 7 لغاية 9)

بتطبيق القواعد دي على حالتك مش هايجوز لييييه ؟؟

انتا جايب في مادة 7 .. ومادة تانية كمان 6

في المادة الاولانية يحق ليك انك تاخد التلات درجات بتوعك من الاربع درجات بتوع الرأفة (يعني متبقيلك درجة)

المادة التانية لا يحق ليك لسببين :

1- ان رصيد الاربع درجات مش متبقي منهم الا درجة واحده

2- ان تقديرك في المادة دي ضعيف جدا (واحنا قولنا ان درجات الرأفة مش بتحط الا من بداية 7 لغاية 9)

3- الاربع درجات عمرهم مابيتحطوا في مادة واحده

هاتيجي انتا تقولي حاجة بديهية جدا دلوقتي

طب ليه بتوع الكنترول الوحشين مادوليش التلات درجات بتوعي في المادة اللي جايب فيها 7 .. وكنت ساعتها نجحت فيها وطلعت السنة الجايه بمادة واحده ؟؟

هاقولك اطلع فوق وبص في القاعدة اللي لونها أزرق وانتا تعرف

القسم التاني بقي اللي بيخص صاحبك :

دا فعلا يحق ليه انه ياخد التلات درجات ليه ؟

اطلع فوق وبص في القواعد اللي كاتبهالك وطبقها عليه بنفسك وانتا هاتلاقي ان كلامي سليم

والله تصدقي زعلتلك .. كدا انتي للأسف مش هاتكملي في المجموعة المميزة

يالا خيرها في غيرها بقي وربنا أرادلك كدا

بصي ياستي .. مبدأيا مش هاينفع انك تجيبي جيد .. ليه ؟

لان انتي كنتي شايلة مادة اصلا (البيزنيس) واترفعتلك وجيبتي فيها 10

يعني استخدمتي 3 درجات من رصيد الاربع درجات بتوعك ..

ومع ذلك بعد ماتم استخدامهم مجموعك فضل برده في حيز الـ 127 ..

وبالتالي مش هاينفع لإن انتي عايزالك كمان 3 درجات تانيين عشان تجيبي الـ 130

عارفه لو انتي ماكنتش شايلة البيزنيس دا وكنتي جايبه في التوتال 127 ؟ ..

كان زمانهم حطولك الـ 3 درجات الرأفة على الـ 127 وجيبتي جيد

عشان ساعتها مجموعك هايبقي 127 + 3 رأفة = 130 (تقدير جيد)

يارب تكون المعلومة وصلت .. وعموما نصيبك كدا وماتزعليش وارضي بما قسمه الله لك

بس شدي حيلك السنة الجايه عشان تقيلة وعايزة مذاكرة جامد .. وربنا ان شاء الله يوفقك

ربنا يخليك يا سوما .. والف شكر على مرورك ونورتي الموضوع

ميرسي جدا يا فامبير علي التوضيح

بس انا عاوزة اعرف هو اللي جايبين في مادة 7 ليه مترفعوش ل10 تلقائيا زي كده
واللي مترفعوش هيترفعوا ازاي

وانا لما جبت النتيجة كانت الدرجة قبل التعديل 7 وبعدى التعديل 10 (وفي نفس الوقت ليا اصحابي جابو 7 قبل التعديل و7 بعد التعديل)

فهل ده ممكن يكون كان خطأ من الكنترول ولسه ليه درجات الرافة؟؟؟؟؟؟؟؟؟؟؟؟

والله انا لاول مرة في حياتي احس بالفشل والندم الفظيع ده بعد مادخلت المجموعة المميزة وشوفت النتيجة
مع اني كنت بذاكر كويس وفي الترم الاول جبت تقدير جيد وقولت انشاء الله هشد حيلي الترم اللي جاي بس للاسف حصلت ظروف وكنت تعبانة جدا وماكنتش قادرة ادخل الامتحانات
وانا بحمد ربنا علي كل شئ وعلي اني جبت تقدير صافي وقدر الله وماشاء فعل

((وقل لن يصيبنا الا ماكتب الله لنا))

من المؤكد انهم شايلين مادتين تانيين معا المادة اللي جايبين فيها 7 دي .. وغالبا ممكن يكون جايبين فيها 8

عشان كدا بيدوا الاولوية للمادة اللي فيها 8 .. فياخدوا درجتين رأفة وتترفع تبقي 10

ويتبقي درجتين رأفة تانيين .. عشان كدا هوا دا السبب اللي خلا مادة الـ 7 دي ماتترفعش

زائد ان احنا قولنا ان الرأفة بتتحط في حالة تغيير الحالة ..

سواءا من رسوب لنجاح او من شيل مواد لصافي او تغيير التقدير من مقبول لجيد

لكن لو مادتين متشالين واحده 8 والتانية 7 دا ماينفعش ومش هايحطوا حاجة

عشان دا منافي للقاعدة اللي بتقول ( في حالة تغيير الحالة )

لإن في الحالة دي حتى لو اتحطلهم درجات رأفة دا مش هيخليها تطلع صافي او ناجح او تغيير تقدير

لكن لو هوا مادة واحده شايلينها وجايبين فيها 7 ..

يبقي دا ماينفعش ولازم يروحوا الكنترول ويشوفوا ايه الموضوع بقي لإن دا حقهم

لان في الحالة دي هايتم تغيير الحالة من (منقول بمادة) لـ (صافي)

مانا زي ماقولتلك هما بيبقوا 4 درجات رأفة وبيتسحب منهم على حسب المواد اللي متشالة

لو هما شالين مادة تانية معا مادة الـ 7 دي يبقي مش هايتحط درجات رأفة وفي الحالة دي يبقي الكنترول صح

لو هما شايلين مادتين معا مادة الـ 7 دي .. وواحده من المادتين دول فيهم 8 ..

يبقي بيرفعوا الـ 8 يخلوها 10 وتطلع السنة اللي بعدها بمادتين وبيتكتبلها (منقول بمادتين)

لو هما شايلين مادة واحده بس اللي هيا الـ 7 دي .. في الحالة دي يحق ليهم الرأفة غصب عن اي حد

vampire ... بروفّ والله ،،، شكلك خبرة كبيرة فـ توجارة
كلامك صح مية المية >> بس فيه حاجة .. اللى بيدبّلّرفـ مادة ويمتحنهآ السنة اللى بعدها بياخد بس درجات فـ حدود 12 مش 13 يعنى ما بيشوفش جيد .
أنآ بس كنت عاوز أسألك >> أنآ جيبت فــ القانون التجارى 10 .. مع انها أكتر مادة حرتت فيها وكان متهيألى ما انزلش عن 15
خليل فيكتور ده شكله فاكس .. وانا بفكّــر أئد إلتمآس >> ولا إشترى دماغى واحلق للحوار
تحياتى ،،

ههههههههه .. انتا تلاقيك كنت يا مجموعة "د" يا مجموعة "ز"

عموما فعلا خليل فيكتور السنة دي بهدل العيال في الدرجات .. مش عارف في ايه بجد

وبرده ليا صحابي كانوا حالين كويس جدا وعملوا زيك وجابوا الـ 10

انا عن نفسي جايب فيها 16 والحمدلله ..

بس صراحة كدا ومن الاخر .. الالتماسات حواراتها فاكسة زي مانتا قولت

لإن شوف كام بني ادم حوالي 12 الف .. احتمال كام في الميه انك تطلع تكون غلطان في الدرجات

وبعدين الالتماس دا بيعملوا مجرد مراجعة على الدرجات مش اكتر .. يعني اعادة تصحيح انسى !!

ياعم ارضى بما قسمه الله لك .. واحمد ربنا انك نفدت منها وخلاص

وعموما .. لو كنت مجموعة "ز" يبقي انتا زميلي .. ولو كنت مجموعة "د" يبقي هاتبقي زميلي

عشان انا هاحول السنة دي ان شاء الله

بص ياا اابو الزمل انا طااااااالب لسة خارج من ثااانوى وشوفت موضوعك اللى بالعربى كدة دخل دماااغى وكانت ايام امتحانات

ومينفعش ارد عليك ولا اية رايك !!!!!

المهم جرت الايااام وخلصت الثانوية العامية يااا ابو الزمل وانا ادينى فااضيلك من الاخر موضوعك بعض الكلام فيه صح والتانى

غلط

من ناحية المذاكرة انا اعتقد ومتاكد انها هاتكون صبااااح تكبير الدمااااااغ واخر طناااش وعلى كيفك لان السبب بعد الكلية مش

هتلاااااااقى يوم وااحد فااضى لانة هيكون فى جواااااز وشغل وعياااال واخر قرف يعنى من الاخر الكلية هى اجمل سنين العمر

ومن نااحية البنات كلامك صح 70% بس يااااا ابو الزمل لو سبنا البنات احنا هانضيعو فين الورق والتلخيصااااااات والتوقعات والكلام

دة كلة مينفعش من غير البنات صح ولا اية رايك !!!!!!!

ومن حيث كلامك للبنات دة كلام خااص بيهم ملنااش دعوة ..

المهم شكرا يااااااا عم على الكلام الحلو دة


انا محمود حودة اسكندرانى طول عمرى نفسى ادخل كلية التجارة لية مش عارف والله !!!!!!!

برنس يابني والله .. نورتني .. ونورت القسم كله

ممكن اعرف التحويل لانتظام بيبدء امتي