فكره حضرتك جميله جدا

شكرا

جزاك الله خيرا على الموضوع الرائع

اما بقى بالنسبة للاستعدادات اللي قبل الامتحانات فماما و بابا مش بيكونوا شدين عليا ولا حاجة و بيجبولي شكولاتة و حاجات حلوة و ساعات كمان بابا بيخليني اقعد اتفرج معاه على التليفزيون او نخرج علشان مش تكون اعصابي مشدودة رغم ان هما ممكن يكونوا قلقانين و لكن مش بيحاولوا يحسسوني ان في امتحانات و لا معسكرات و الحاجات اللي بسمع عنها من اصحابي لاني اصلا من النوع اللي بيقلق جدا و بيقعدوا يقولولي ان طالما الواحد ذاكر يبقى خلاص مش يهمه حاجة
لان انا شايفة ان الشد و الحاجات ديه ممكن تخليني مش اعرف اجاوب حتى لو انا عارفة الاجابات
ده حتى امتحانات السنة اللي فاتت كنت داخلة الامتحان و انا مش قلقانة خالص على عكس قبل كده

و شكرا لحضرتك على الموضوع الرائع

مش كفاية يا ميراج عاوزين مشاركتك تكون فعالة أكثر من كده الموضوع محتاج لقطاع عريض من الأعضاء ..

شكراً ليكي اختي الفاضلة .. وعلى فكرة سبب من أسباب نجاح الموضوع دا هو تواجدك الدائم .. وفعلاً اتمنى أن هذا الموضوع يفيد الكل بإذن الله .. أما بالنسبة للايجابيات اللي بتقولي عليها دي .. ايه رأيك لو استمرت على طول .. يعني السؤال بطريقة تانية .. هل نفسنا الأهل يحققوا كل طلباتنا على طول ؟:049gc0:خدي بالك من الإجابة .. كويس
طب هسأل شوية أسئلة : ويارب تجاوبوا عليها ..
السؤال الأول : هي اللغة الفصحى بتخنق في الموضوع دا ؟ يعني نخلي الكلام كله بالعامية ؟
السؤال الثاني : هو احنا ليه بنذاكر ؟ جاوبوا بصراحة من غير ذواق..
السؤال الثالث : ايه اللي مش عاجبك في بيتك في فترة المراجعة والامتحانات .. ؟ قول الصراحة ومن غير ذواق ..

شكراً آية لك وشكراً لوالديك الكرام .. السلوك اللي بابا وماما بيتبعوه معاكي اسلوب سليم نفسياً .. وخصوصاً انتي من النوع اللي القلق بيكون سلبي بالنسبة ليكي .. أصل في انواع من القلق بيكون إيجابي .. بس مش في كل الحالات ونستنتج من كلام آية حاجة مهمة جداً :
لازم الأب والأم يعرفوا نفسية ابنهم جداً ويتعاملوا معاه من خلال المعرفة دي .. ويراعوا الفروق الفردية والنفسية اللي بين الأبناء
ونستنتج برضه حاجة مهمة جداً من كلام آية :
(إن الله لا يضيع أجر من أحسن عملا)
فالطالب طالما عمل اللي عليه لازم يحسن توكله على الله ويكون متيقن إن ربنا لا يضيع أجر المحسنين أبداً ..
والسؤال الآن المهم لآية :
آية .. بابا أو ماما حد فيهم قالك .. لازم تذاكري وتتفوقي ليه ؟ يعني ايه السبب عشان تاخدي الشهادة .. ؟ عاوز إجابة صريحة جداً

اولاً شكراً على رأيك في الموضوع
ثانياً : بالنسبة لردودك على الأسئلة :
خلاص هنمشيها عامية عشان تبقى أسهل على الكل لأننا عاوزين نحقق الفايدة بإذن الله تعالى..
بالنسبة بقى للإجابة التانية .. لمستقبل أفضل :: ايه رأيك لو كانت نيتك مثلاً من غير مثالية .. عشان اكون أديت فرض عليا في طلب العلم .. ايه رأيك في السبب دا للمذاكرة وبعدين بقى ييجي موضوع المستقبل واي سبب تاني ..
الإجابة التالتة : صارح والديك برغبتك .. بلاش خجل .. بس استخدم أسلوب مقنع .. يعني اطلب منهم مثلاً انهم يسيبوك تعتمد على نفسك في موضوع المذاكرة وميفرضوش عليك المذاكرة قولهم والله أنا عارف انكم خايفين عليا بس أنا كبرت وعارف مصلحتي .. بس خد بالك انت هتتحمل مسئولية الكلام دا .. يعني أكيد لو قصرت هتيجي فوق دماغك ودماغهم هما كمان للأسف .. يعني يوم ما تطلب الطلب دا لازم تكون على قدر المسئولية

بنت الإسلام .. جزاك الله خيراً على المرور وسأحاول التنويع بين الفصحى والعامية بإذن الله تعالى ..
أنا أتفق معك أن لكل مرحلة عمرية السبب الخاص بها في المذاكرة ولكن هنا يتضح دور الوالدين في بث فرضية العلم لدى أبنائهما .. "طلب العلم فريضة" يجب أن نعلم أننا نؤدي فريضة ويجب أن نعلم لماذا فرض الله علينا هذه الفريضة ..
أما بالنسبة لاهتمام اسرتك البالغ بيكي فهذا أمر طبيعي من أسرة محبة لابنتها .. وستعلمين أن هذا الأمر طبيعي عندما تصبيحن أماً بإذن الله تعالى ستشعرين أن أملك الوحيد في الحياة هم أبناؤك فلذات أكبادك التي تمشي أمامك على الأرض ..

والسؤال الآن الذي يطرح نفسه للجميع ...

بالفصحى .. ما نيتك وأنت تذاكر ؟ ما نيتك عند دخول الامتحان؟ هل أعلمتك الأسرة أن طلب العلم فريضة ؟ إن كانت الإجابة نعم .. فهل أنت مقتنع ؟ وإن كانت الإجابة لا .. هل تريد أن تقتنع ؟

هيا .. في انتظار الإجابات لتدخل الكنترول .. هيا ..

انا اصلا بابا و ماما مش بيقعدوا يقولو لي ذاكري لكن بيقولولي ان انا اللي لازم اكون عارفة مصلحة نفسي لان النجاح ده ليا انا و ماما دايما بتقولي ان البنت المسلمة لازم تبقى متفوقة و لازم تعمل شغلها بضمير و ان العلم ده فريضة و ان انا لازم اتفوق علشان اقدر اعمل حاجة للاسلام و لنفسي كمان

فعلا موضوع الدروس الخصوصية ده موضوع مهم

انا اصلا مش كنت باخد دروس من قبل ما اعرف المنتدى و عمري ما اخدت لا دروس و لا مجموعات و ان شاء الله مش ناوية اخد بس بردو المنتدى حلو جدا و بيشجع اكتر على اني استمر في الفكرة دي كفاية المدرسين اللي فيه و حتى الجو فيه لما الواحد بيكون مخنوق و لا حاجة بيحس انه كانه قاعدة في بيته و في ناس حاسين بيه و كتير جدا بحس انه بيعطيني همة و نشاط علشان اكمل مذاكرة

و بجد يعني الكلام ده من قلبي بجد مش مجاملة بجد شكرا لكل القائمين على المنتدى و شكرا لحضرتك على الموضوع الرائع