|
اقتباس:
بس حكاية ان العميد يهدم الكافتيريا لا طبعا لان الكافتيريا ما زالت موجوده وبعدين ده كافتيريا للجامعة كلها مش لصيدلة بس وبالنسبة للصورة اللي محمود حاطها ده صورة متصوره عن مدرج 3 واللي في الصورة من ورا ده صورة لبنتين قاعدين في شباك مدر ج 3 وبص يا دكتور محمود هتفضل كل شويه تقارن بين كليتك وكلية تانيه في جامعه تانيه يبقى الافضل تحول للكليه التانيه ومش كل شويه تقارن امال هتعمل ايه لما تدخل الترم التاني وتاخد organic chemistry ودكتور كامل يشرحلك وتطلع مش فاهم اي حاجه واي استفسار برده انا موجووووووووود............ |
يا جماعة عاوزين تعاون وياريت كل حد فى صيدلة طنطا يدخل علشان نفيد ونستفيد لاننا كلنا فى الاخر اخوات وياريت الغايب يعلم الحاضر وشكرااا على من يتعاون وجزاكم الله كل خير مقدماا وياريت نكون ايد واحدة لما ندخل الكلية سلامى وتحياتى للجميع
|
ا كيد طبعا يا دكتور ساره عايزين تعاون من الجميع وطبعا اكيد المنتدى هنا مفتوح للجميع لاي اسئله او اي استفسار
واكيد اي حد عايز معلومات انا او غيري موجودين علشان نقدر نوصل اي معلومه |
gd
ايه يا دكتور مصطفى حضرتك متعصب كده ليه وانا لا عملت مقارنه ولا اى حاجه انا بتكلم عن حاجات شفتها بعنيا وسمعتها وحتى لو بعمل مقارنه ما كلنا مزايا وعيوب فانا بوضح للناس الصوره وعلى العموم ميرسى اوى انك رديت وافدتنى عن الحاجات اللى انا تقلت عليك فيها بس عشان خاطرى انت باين انك اضايقت وده اللى لاحظه كمان التعليق اللى قالك فيه المستخدم اننا لازم نتعاون وانا فى الاول والاخر اسف لو كنت ضايقت وعلى فكره الصوره اللى عند مدرج 3 لولد وبنت مش بنتين:(
|
اه نسيت اقولك حاجه يا دكتور مصطفى لو انا كتبت حاجه بعد كده هتعصبك متبقاش تعلق عليها وانا والله كان كلامى موجه للدكتوره ريهام وده للعلم وبس
|
يا جماعة نتعصب لية واحنا داخلين الكلية يا جماعة الحكاية مش مستهلة ربنا معانا يارب وعلى فكرة لازم نكون اكتر من كدة ولا اية يا جماعة وشكراا يا دكتور مصطفى على سعة استعابكم لنا وربنا يزيدك وياريت تبلغ الناس الم معاك علشان يدخلوا وكل واحد يشوف صاحبة وندخل عاوزين نكون احسن الدفع فى مصر بعلمنا وتقديرتنا كل واحد لازم يبدا من نفسة وياريت نكون هادين وبلاش عصبية بسرعة ماشى يا دكاترة وبالتوفبق دنيا واخرة سلام
|
هو انا لوحدى الى بنادى فى المنتدى كلنا لازم نتعاون الى عندة سؤال يقول ولو حتى اى حد فى صيدلة يفدنا ولا اية يا جماعة يلا بالتوفيق فى الدارينوالختام سلام
|
امرى لله معى ربنا واتنين مليكة وربنا يعمل الى فية الخير ان شاء الله لكن وراكو وراكو لحد ما الكل يدخل المنتدى ومش هياايس ابدااا يلا والله حرام
|
المشكله يا دكتور ساره اننا مش بندخل فى وقت محدد مع بعض فلو نقدر حتى نتفق على وقت ممكن بسيط نضمن فيه اننا نبقى موجودين فيه يبقى احسن
|
اوكية وانا مع الراى دة هواحسن وقت كل واحد يقول راية ويقول لصحابة وكدة وانا ممكن اعمل استطلاع لكدة وبالتوفيق باذن الله
|
السلام عليكم ورحمة الله وبركاته
أسماء المواد وتوزيع الدرجات للفرقه الاعدادية بكلية الصيدلة جامعة طنطا هنا يمكنك من الرابط التالي معرفة المواد التي سيتم دراستها في كلا الترمين الاول والثاني وتوزريع الدرجات في كل مادة عملى وشفوي وتحريري وكذلك ساعات الدراسة في كل مادة واللــــــــــــــــــــــــــــــــــــــــــه الموفق http://www.tantapharmacy.org/courses/pre/ واي استفسار عن اي حاجه انا تحت امـــــــــــــــــركم والامـــــــر لله سبحانه وتعالى وحده |
موضــــــــــــوع لابـــــــــــــــــــــ منه ــــــــــــــــــــــد للطلبة الجدد
اهلا ومرحبا بكم في بيتكم الثاني واسرتكم الثانيه في كليــــــــــــــــــــــ الصيدلة ــــــــة جامعــــــــــــــ طنطا ــــــــــة عالم جديد ........ وامل مشرق هتكون عبارة عن ترحيب بالطلبة الجدد والكلية عبارة عن ايه وليه هما اختاروها وهل هما احسنوا الاختيار وهل الكلية زى ما هما سمعوا عنها بره واللى منتظرهم فى بيت الرعب اللى هما داخلين عليه ده وايه الافكار والاشاعات اللى سمعوا عنها والتساؤلات اللى عاوزة اجابات وايه المتاعب اللى هتواجهم بالاضافة لمرحلة اعداد نفسى كويس وبعد كده قبل الدراسة نبدأ نتكلم عن كل مادة الاول هنقول لهم مبروك الافراج من سجن الثانوية العامة وطبعا دلوقتى انت فرحن وحقك انت طالب جايب على الاقل 97 % والمفروض الناس من دلوقتى بتقول لك يا دكتور وفى البيت فخورين بيك وانت حاسس انك عملت حاجة كويسة ووصلت للي انت عايزه وطبعا دى اول اجازة تاخدها كلها فسح وفرح وسفر وهدايا ولبس علشان النجاح طبعا ده كله حقك خصوصا بعد ما تعرف بعد كده ان تقريبا غالبية الطلبة اللى بيذاكروا من الاول تقريبا كمان بياخدوا اول اسبوع من الكلية على سبيل الفسحة ويبدأوا يفكروا يذاكروا بعد تاني او تالت اسبوع انا فى البداية مش عاوز احبطك بس انا هقول لك حاجة علشان متبقاش اتصدمت او تخدعت زى ما معظمنا حصل معاه انت مفكر نفسك خرجت من سجن عبارة عن اوضة صغيرة انت دلوقتى اعتبر نفسك فى سجن عبارة عن بيت كامل ناس كتير مفكرة ان هى طالما وصلت لمرحلة الجامعة ودخلت كلية محترمة يبقى خلاص كده على العكس تماما انت كده بدات اول خطوة علشان تحقق الهدف ده ولسه حتى مكملتش اول خطوة الكلية صعبة واصعب من الثانوى بكتير وبرضو مش مسحيلة ومش وحشة والدراسة فيها مش وحشة بس انا عاوز اشيل من دماغك فكرة انك كده حققت اللى عليك وان الباقى سهل الباقى صعب جدا بس انت اعمل نص مجهودك فى الثانوى وانا اضمن لك باذن الله تجيب تقديرات كويسةمن جيد جدا لامتياز دلوقتى هنسال بعض انت ليه دخلت كلية صيدلة وايه الميزة اللى فيها ؟؟؟؟؟ اكيد موضوع ليه دخلت انت احسن واحد تجاوب عليه بس يعنى غالبا لانى كنت فى يوم من الايام مكانك او مكانها انى مش بحب الطب والطب مواله كبير ومش مضمون وليه قدامى عشر سنين اقل حاجة قبل الماجستير لان طبعا فى جيش عن ناس كتير وبعد الماجستير ربنا يسهل لى وافتح عيادة وطبعا مش هبقى مشهور غير يمكن بعد الدكتوراه والله اعلم هخدها ولا لاء فطب لو انت مش غاوى من الاول طب ودماغك فيه يبقى متدخلش حتى لو مجموعك كبير لان صيدلى عادى جدا افضل من دكتور فاضل غير كمان ان طب حاليا تقريبا العائد لا قيمة له حوالى 200 جنيه وانت لو واقف فى صيدلية مش بتاعتك وصيدلية مستواها اى كلام هتاخد حوالى 300 اقل حاجة يعنى وباقل مجهود ويمكن كمان حسب ما باسمع مرتبك فى الشغل بيكون اعلى من مرتب الطبيب فى وقت التكليف طبعا غير ان صيدلة مجالات السفر والشغل فيها اكبر بكتير وعائدها المادى عادة بيكون كويس وده اللى بيخلى الناس تحسدنا دى كلها حاجات لما تحط صيدلة قدام طب ترجع صيدلة عن طب فى وقتنا الحاضر ده غير ان عدد الدكاترة بقى اوفر قوى قوى غير ان المريض لازم لما يروح الطبيب لازم يروح بعدها للصيدلى انما المريض ممكن جدا يروح للصيدلى من غير ما يعدى على طبيب كمان من الحاجات المهمة اللى بترجح كفة صيدلة عند الطالب لو هو بيحب الكيميا واحيانا كتيرة وهنا امثلة كتيرة لو بيحب الرياضيات بس خايف من رياضة اتنين او اهله عاوزين يبقى دكتورة فبيختار احسن فرصة قدامه لانه ملوش فى البيولوجى قوى وبيختار صيدلة اللى تعتبر كلية شيك فى نظره ومستقبلها وتقيمه لها افضل من طب وعلى فكرة ناس كتيرة اعرفها كانوا عاوزين يدخلوا هندسة ولما النصيب جابيهم صيدلة وشافوا زمايلهم فى هندسة وخصوصا هندسة شبين والمنصورة والقاهرة واسكندرية دول يعني الاول قالوا الحمد لله على النعمه اللي احنا فيها طبعا فى ناس دخلت علشان المجموع جابها هنا ودى بتبقى ناس مخنوقة من الكلية جدا لو كانوا اصلا من البداية مش عاوزين يدخلوها اقول لكم حاجة انا اعرف واحد والله قعد فى طب اربع سنين ومقدرش يكمل وبعدها حول صيدلة علشان كان مستخسر المجموع بتاعه وفى ناس الاتنين مجموعها وميولها وفى طبعا ناس مجموعها يجيب طب وبتدخل صيدلة لانها شيفاها احسن ودول ناس انا بحترم فيهم حسن تقدير لهم للامور ولانهم شايفين المستقبل قدامهم بطريقة كويسة طيب ليه طنطا افضل من اى كلية تانية فى صيدلة ؟؟؟؟؟ انا مقدرش اقول انها افضل بس بالنسبة للجامعات الاقاليم اللى حواليها تعتبر افضل واعرق صيدلة فيهم يعنى اولا المشهور قوى فيها موضوع الكلينكال وهو انك تقدر تشخص بعض الامراض من غير ما المريض يروح للدكتور ده الى معروف للناس بالنسبة لى انا كطالب ان اى حاجة بتتقال فى المحاضرة بنسبة كبيرة بتعرف تجيبها يمكن المادة العلمية كبيرة جدا ومعقدة بس الامتحانات عموما بالنسبة لى لو انت ذاكرت من الورق المنهج كنت هتحل فيهم كويس جدا على حين بعض الكليات الاخرى زى المنصورة المنهج سهل بدرجة اكبر من عندنا بس نظام امتحانات معقد جدا اكتر من عندنا بجد الدكاترة عندهم فى الامتحانات يعنى هقول no comment طبعا نظام المذاكرة وهتذاكر منين هنقوله بس فى بعد كده ان شاءالله دلوقتى نيجى انت حالتكم هتبقى عاملة ازاى فرحان بالكلية الجديدة وفخور بيها اولا هتحس انك كده فى حالة نشوة ونشاط وعاوز تعمل كل حاجة تفيدك فى كليتك ومهنة المستقبل وعاوز تستفيد من كل حاجة هتتقال وده برضو هنتكلم عنها يمكن فى حلقة تانية موضوع انك هتستفاد ايه من الكلية والواقع عامل ازاى علشان عادة انت بتدخل الكلية باوهام مش هتفوق منها غير تانى سنة اولا انت فى الكلية اللى يمكن بيخليك تحس انك بعد الثانوى قدمت رسالتك خلاص فى الحياة انك هتبقى مستريح نفسيا لانهم كمان هما عادة فى البيت بيكونوا حاسين انك قطعت شوط المهم فى المبارة والباقى عاوز درجة اقل من المجهود هيبقى لك درجةحرية اكبر تروح وتلعب وقت الدراسة وتخرج ويمكن وقت الامتحانات كمان وهتصاحب ناس كتير وتتعرف على اشكال واصناف من الناس من بلاد مختلفة وهتحس بعد فترة ان الدفعة كلها اصحابك والكلية هتغير من شخصيتك تماما حتى لو انت شخصية انطوائية الكلية فى خلال ترم وبعد ما يخلص لو انت استجبت للتغير ده هتتحول للعكس تماما وده مش وحش انك يبقى لك علاقات كويسة مع ناس كتير وتعرف ناس كتير اكيد احسن ما يكون لك صاحب واحد او اتنين او حتى عشرة غير ان قدرتك على الاعتماد على نفسك هتزيد وهتتعلم حاجات كتيرة عن الحياة فى خلال الخمس سنين وهتتبدل حاجات كتيرة صدقنى وهتتعرض لصدمات وحالات اكتئاب يعنى هتشوف حاجات كتير فى الكلية كمان عاوز اقول لك حاجة الكلية المرحلة الوحيدة اللى انت هيسمح لك انك تعيش حياتك لسبب بسيط ان قبلها كان الثانوى ومرحلة الحرمان الاجبارى بعدها الجيش والشغل ومحاربتك علشان تستقر وتكون اسرة ومرحلة الحرمان الاجبارى برضو بس هيكون نابع منك مش من شخص تانى يعنى الكلية من الاخر ذاكر وعيش حياتك مش تعيش حياتك وطنش للدراسة اكيد انت مش هتنجح كده من غير اى مجهود فى كلية صعبة والمناهج فيها ضخمة زى عندنا مرة تانية بقول لك انت اخترت اختيار صح هتتعب اه فى الكلية شوية بس هتحس صدقنى انك اخترت صح لما تعرف بعد كده الفرق بينك وبين اللى دخل طب واسنان مع احترامى ليهم طبعا المرة الجاية ان شاء الله هنتكلم عن احلامك كطالب جديد والواقع وده مرضتش اخليه فى اول مره علشان متحولش من الكلية ولا حاجه فخليك متفائل شوية اما عن المذاكرة ومعلومات عن كل مادة زى ما قلنا هنخليها قبل الدراسة برضو الحلقة الجاية هنتكلم عن الانشطة الطلابية اللى عادة انت بتدخل ومفيش فى دماغك حاجة جوا الكلية غير الدراسة بس وان الانشطة دى زى حصص الرسم والمجال الزراعى والصناعى فى المدرسة فعاوز اشيل الفكرة الخطا دى من دماغك ونعرفك الحقيقة وانتظرونــــــــــــــــــــــــــــــــــــــــــ ـــــــــــــــــــــــــــــــــــــــــا |
يلا على انتظار باذن الله
|
بجد يا دكتور مصطفى معلومات مثمره جدا وافادتنى زى العاده والله هو مكنش ف اوهام ولا حاجه بس الواحد بيبقى حابب يدخل افضل حاجه مش اكتر وانا واثق ان صيدله طنطا جامده اووووووووووووووووى
|
كمان موضوع الانشطه ده انا كنت ضرورى هسالك فيه بس يارب قسم الانشطه اللى انا عاوزه يبقى موجود فى الكليه انا كان امنيتى ادخل معهد فنون مسرحيه فيا ترى المجال ده موجود
|
| جميع الأوقات بتوقيت GMT +2. الساعة الآن 04:07 PM. |
Powered by vBulletin® Version 3.8.11
Copyright ©2000 - 2025, Jelsoft Enterprises Ltd.