جبت من الآخر أحلى حاجة :d

ربنا يوفقك
..

جزاكم الله خيرا

ها بدأتوا دروس ولا لسه 😂

انا بدأت كل المواد ماعدا انجلش وفرنساوى

وانتى

ياشباب انا جديد هنا, اول مرة اعمل اكونت ودي اول مشاركة :d
انا ان شاء الله دفعة 2018 السنادي..
كان عندي بس سؤال او استفسار وعايزكوا تكلموني فيه يعني وتناقشوني وكدة..

دلوقتي انا علمي علوم تمام .. عندي 7 مواد .. 3 لغات و4 علوم.. وباخد دروس في كل المواد دي.

هل هقدر اوفق من حيث المذاكرة مع كل دول؟
يعني العربي منهج كبير, الانجليزي كذلك, الفيزياء تقيلة, الكيمياء كذلك.. الاحياء كويسة بالنسبالي.. الجيولوجيا الي سمعته انها رخمة.. الفرنساوي كويس بالنسبالي برضو.
هل هقدر اذاكر كل دول عادي؟ مش هاجي في النص واضطر ابطل مذاكرة فيزياء فترة معينة عشان ورايا مذاكرة عربي وكيمياء مثلًأ؟ او ابطل الانجليزي فترة عشان عندي مذاكرة احياء وجيولوجيا لازم اخلصهم؟

عشان الموضوع ده لما بفكر فيه بتعب ومش عارف هعمل ايه.

انا لسة هبدأ اول درس يوم 5 وباقي الدروس يوم 15..

اهلا بانضمامك يا دكتر احمد ☺ البوابة نورت بوجودك
عشان 7 مواد 3 لغات و2 تخصص و2 علمي ف بنشعر في الاول ان المواد كتييرة جداا وتقيلة ومستحيل نقدر عليها ولو ذاكرنا مواد بنيجي على مواد وصعب نقدر نستحمل الكم الرهيب دا .
كل دا طبيعي تفكر كدا وبالذات انك لسا مدخلتش في السنة وجربت مذاكرة المواد مع بعضها
الموضوع بسيط جدا وابسط زي من اعتقادك بكتير .كل الحكاية مجهود منك وحرص منك انك تذاكر الدرس بعد الرجوع للبيت فورا .. واهتمام بامتحان الدرس وتذاكر ليه كانه امتحان اخر السنة.. وبالطريقة دي هتلاقي انك بتخلص كل حاجه ف يومها ..ف مفيش شئ بيتراكم وبالتالي مش بتيجي على مادة اكتر من مادة .لان مستحيل تذاكر المواد كلها ف يوم واحد..هو كل يوم مادتين تلاته بالكتير.. . اياك تشيل هم الموضوع دا ..ادخل بقلب جامد ..ذاكر اللي وراك اول باول وخلصه ..توكل على الله وهيعينك وييسرلك امورك ..كفاية ان طلبك للعلم عبادة ❤
ومتنساش ان كل حرف بتذاكره ليه فايدة كبيرة مفيش حاجه بتروح هباء
بس كنزك طول السنه انك تذاكر اول باول و دا اللي بيفرق بين الطلبة

الفيزيا
متعدوش حرف فيها بدون ما تفهموه كويس جدا .. تركيز عالي في الحصة .. مفهمتش اسأل المستر مرة واتنين وعشرة .. مفهمتش فهم الدرس لنفسك وذاكره اكتر من مرة ..مفهمتش اسمع مدرس واتنين وتلاته ..حل الواجب كله ..حل اسئلة الكتاب الخارجي كلها .. دور على مصدر تاني حل منه على الدرس تاني ...واوعدكم انها هتبقا ألذ مادة
عندكم مستر محمد عبد المعبود -- ميكروبيديا -- مستر عزت ف مدرسة على الهواء -- مستر عبد الرحمن اللباد
كل دول ناس على اليوتيوب بيشرحوا كويس جدا جدا

السلام عليكم
انا مش عارفه أذاكر جيولوجيا احنا أخدنا اول باب والمستر عاملنا امتحان يوم الاحد ذاكرت وحليت اسئلة يوم الاحد والاثنين دلوقتى النهارده روحت احل اسئلة تانى لقيت نفسى مش فاكره ولا كامة ولاحرف حتى
حسيت نفسى عندى زهايمر حد يساعدنى بسرعة:o

وعليكم السلام ورحمة الله وبركاته
كل دا طبيعي جدا والله كلنا كنا كدا ..امال هتعملي ايه لما يعدي 5 او6 شهور على الابواب وتيجي تحلي عليها تلاقي نفسك مش فاكرة ولا حرف ولا كانك اخدتيها ؟؟ هتكتئبي ؟
دا طبيعي جدا وبالذات ان دا لسا اول باب و لسا اول تجربة ليكي ف مادة بتحتاج حفظ وتكرار
كل ما عليكي انك تكرري كتير وتحلي كتير ..هتنسيها عشرين مرة .. بردو ارجعي كرري و حلي على اللي بتاخديه تاني اوعي تستسلمي .. لو عملتي كدا مع كل اللي بتنسيه المادة ف اخر السنة هتبقى بالنسبة ليكي اسهل مادة
وحاولي تربطي معلومات الباب بمواقف ليكي او بعلامات او بمفاتيح عشان تفتكريها بسرعه او
اتبعي اسلوب الرسومات او اسلوب الاغاني

جزاكى الله خيرا حاضر مش هستسلم
على فكرة اسلوب الاغانى دا جربته فى تانية ونفع معايا جدا
وكمان جربت الربط بس مش كتير
لكن الرسومات بصراحه مجربتوش
شكراااا:022yb4::022yb4:

تمام يا حبيبتي
ربنا يوفقك يارب و تحققي اللي بتتمنيه ❤💋

احلى حاجه في الدنيا والله ❤
ربنا يبارك فيكي يا دكتورة 😍