بوابة الثانوية العامة المصرية - حصري خوارزمي 2012 تالته كمبيوتر منهج جديد + حل التمارين + حل تمارين الكتاب المدرسي +

اقتباس:

المشاركة الأصلية كتبت بواسطة اشرقت الانوار (المشاركة 4888303)

أرجو أن تشرح لي Frame work ضروري ولا أريد الإنتظار فأنا محتاجة التوضيح حاليا وجزاكم الله خيرا وجعلة في ميزان حسناتك

دي الحصة العاشرة سوف تجد باقي الموضوع في هذا الرابط

http://www.thanwya.com/vb/showthread.php?t=463887

الحصة العاشرة
بسم الله توكلنا على الله
الفصل الثاني : مقدمة للفجوال بيزك
لغة الفجوال بيزك : دي من اشهر لغات البرمجة (وخلي بالك لغات البرمجة دي مجموعة أوامر وتعليمات بتكتب بحروف انجليزية وقواعد محددة حسب كل لغة وبعد ذلك تحول الى لغة الآلة اللي بيقدر الكمبيوتر يفهمها )
طيب يا استاذ بلال يعني ايه لغة الآلة اللي بيفهمها الكمبيوتر ؟
بص معايا يا واد يا نور فاكر فيلم يانا يا خلتي ؟ آه فاكره .
طيب فاكر اللقطه بتاعت جمايكا؟
http://www.mediafire.com/conv/93b9c5...4f65d21d6g.jpg

وعمك جمايكا دا كان ما بيعرفشي غير كلمتين صح؟ آه صح كان بيقول ايه ( صح ... ويزيزاماما ... ) أهو الكمبيوتر برضه كده مبيعرفشي غير كلمتين ، الصفر والواحد وبس .
واي برنامج لازم ينكتب باللغة البرمجة وبعد كده تتحول الى مجموعة اصفار و واحيد بواسطة برنامج اسمه المترجم Compiler علشان يقدر الكمبيوتر يفهم الاوامر دي ويستجيب لها.

وخلي بالك لغة VB دي من ضمن حزمة فيجوال استوديو اللي بتكون موجودة على CD واحد، وكائنيات التوجيه يعني انها تستخدم لإنشاء تطبيقات ويندوز زي برنامج الرسام والآلة الحاسبة والدفتر، وكمان مواقع الويب وتطبيقاته. والبرامج دي بتكون موجه بحدث .
يعني تستجيب للمستخدم عند قيامه بسلوك مثل تحريك مؤشر الفأرة والضغط بزر الفأرة ووالضغط على مفتاح في لوحة المفاتيح، وكمان ممكن تحرك النافذة وتصغرها وتكبرها وتبدل بين النوافذ وتغير اللون بتاع النص والخلفية يعني بتغيير السمات اللي بتميز النافذة.
طيب يا أستاذ بلال هي حزمة فيجوال ستوديو مفيهاش غير لغة الفيجوال بيزك بس ؟
لأ طبعا دي كمان معها لغة C++ (سي بلس بلس ) و C# (سي شارب) وخلي بالك ان لغة السي من اشهر لغات البرمجة وأقدمهم، وكمان في لغة Java جافا بتاعت تطبيقات الويب .

طيب يعني ايه تطبيقات الويندوز او النوافذ Windows Applications يا بنت يا آلاء ؟
برافوا دي التطبيقات اللي بتعتمد على نوافذة رسومية
( يعني فيها ازرار زي الاغلاق والتكبير ) وكمان بتستخدم الفأرة ولوحة المفاتيح وغيرها من وحدات الادخال زي القلم الضوئي وخلافه.
يجي واحد يقولك هو في حاجه متعتمدشي على الفأرة ولا النوافذ ؟

طبعاً كان في حاجه اسمها Dos من خمستاشر عشرين تلاتين سنة ، النظام دا شكله كان كده
http://www.mediafire.com/conv/f667a2...0343cb5b6g.jpg

عبارة عن شاشة سودة لا فيها ايقونات ولا فارة ولا حاجه انت اللي بتكتب الأوامر بإيدك
ولو غلطت تعيد الكتابة وحاجه قرف في قرف
بالتأكيد دا اياميها كان اختراع تقريبا في 1982 لحد 1995 لأن الويندوز ايامها ما كانشي حلو وتعبان خالص خالص خالص
كانت كل لغات البرمجة تعتمد على الطريقة الهيكلية ولا بتعتمد على الكائنات أي الادوات والازرار ولا النوافذ زي لغة C ولغة Basic بيزك فقط
بس على فكرة البرامج ايامها كانت تمتاز بصغر حجمها وقوتها وسرعتها.
بس كانت صعبه في كتابة اكوادها.

نجي بقى لحاجه غلسه بس انا عايزكم تركزوا معايا ....
يعني ايه تصنيف Class ؟
بص معايا الاول للصورة دي

http://www.mediafire.com/conv/8b44c0...7aa2f66e6g.jpg
ايه اللي فهمتوا من التخطيط دا ........
برافوا يا آلاء ان السيارات أنواع منها الرياضية ومنها العائلية ومها الجيب ومنها الصغيره والكبيره وخلافه بس في النهاية كل ما سبق هو في الاصل سيارة ....
يعني بالرغم من الاختلاف بينهم بس كلهم سيارات. حلو كدا
التصنيف Class هو السيارة (وممكن تقول السيارة الاصلية او المصممه على الورق مثلاً) وتقدر تطلع من أي سيارة موديلات لسيارات آخرى بأشكال وبأنواع مختلفة .
يعني التصنيف دا يعتبر الشكل الاول والاساسي لأي كائن.
وانا باخد من التصنيف الاساسي مجموع صفات(يعني خصائص ) ووسائل واحداث وأقدر اطلع اكتر من كائن من التصنيف دا وبأشكال متنوعه.
بص خلي بالك لغة البرمجة لا تسمح لك بأن تستخدم التنصيف الاساسي وكمان مش بتحجز له مكان في الذاكرة، ولكن تسمح لك بأن تأخد خصائصه وأحداثه ووسائل (يعني توريث)وتطلع أكتر من كائن.

يعني من الآخر التصنيف دا كود جاهز لنافذة مثلاً انت بتاخد الكود دا وبتعدل فيه ... بتعديلك دا يبقى انت طلعت كائن .زي نافذة Mycomputer..... ود فكره مبسطة قريبه للصح .......

طيب في حد يعرف يا ولاد معنى كلمة كائن Object في لغات البرمجة؟
ايوه برافوا الكائن هو شئ موجود فعلاً ومستقل زي النافذة بتاعة Mycomputer أو أي نافذة آخرى وممكن برضوا الازرار بتاعة تكبير النافذة زي اللي النافذة دي بالضبط . يعني من الآخر الكائن هو أي أداة ممكن تقابلها زي النافذة والازرار ومربعات الكتابة وخلافه.

http://www.mediafire.com/conv/cd62e1...31e301356g.jpg

الصور اللي قدامك دي مجموعة الدوائر دي كانئات أو أدوات . والنافذة نفسها كائن
دي يعني ان الكائن ممكن يتكون من عدة كائنات .

طيب خلي بالك معايا انت طبعا عرفت ان الكائن اللي هو الاداة ممكن يكون نافذة او زرار او مربع كتابة او شريط تمرير.
طيب في تلت حاجات عايزك تعرفه ، اي كائن يعني اداة ليها تلت حاجات هما :
1. خاصية 2. حدث 3. وسيلة

الاول الخاصية : الخاصية هي السمات يعني الحاجات اللي بتميز الاداة عن أداة أخرى، زي كدا
http://www.mediafire.com/conv/bb765a...8124de3e6g.jpg

الكائن أو الزرار اللي على اليمين أكبر من اللي على الشمال ( يبقى على كدا ان الطول والعرض خاصية )
الزرار اللي على اليمين لون بنفسجي واللي على الشمال لونه أخضر ( يبقى لون الزر خاصية )
الزرار اللي على اليمين لون كتابته اصفر واللي على الشمال لون كتابته ازرق (يبقى لون الكتابه دي خاصية )
الكتابة اللي على الزرار الي على اليمين Button2 واللي على الشمال Button1 (يبقى الكتابة اللي على الاداة تعتبر خاصية )
ثانياً الاحداث : ودي بقى الفعل اللي بيقع على الكائن زي ضغطت الفارة ولازم يكون ليه استجابة معدة مسبقاً. لو مفهمتش بص للمثال دا
http://www.mediafire.com/conv/3e31fd...f0caa93b6g.jpg

لو واحد رفع سلاح في وشك وقالك سلم نفسك يا عتريس المكان متحاصر اقف مكانك ؟
مش دا حدث او فعل وقع عليك ..... ايه استجابتك اللي انت عملتها .. بالطبع عملت زي الاخ دا وروحت رافع اديك لفوق ...............
هو دا الحدث ( سلم نفسك اقف مكانك) والاستجابة (رفعت اديك)
طيب ازاي لغة البرمجة بتعمل كدا بص معايا شايف النافذة دي
http://www.mediafire.com/conv/311531...e882273b6g.jpg

طيب ان لو ضغطت على الزرار 1 ، والزرار 2 والزرار 3 ضغط بالزرار الشمال للفارة .
دا يبقى حدث ايه المفروض يحصل
ها تعرفي يا بنت يا آلاء ايه اللي حيحصل ؟

1. الزرار 1 حيقفل النافذة . صح
2. الزرار 2 حيكبر النافذة. صح الصح .
3. الزرار 3 حيصغر النافذة في شريط المهام. صح تمام وبرافوا عليكي.
خلي بالك بالرغم من ان الضغط كان واحد، الا ان الاستجابه كانت مختلفة عارف ليه ؟
لأن الكود اللي جوه كل كائن من التلاته ، بيشتغل عند وقوع الحدث عليه وبينفذ الاوامر اللي جواه .

ثالثاً الوسائل : دي وصف للسلوك اللي بيعمله الكائن زي مثلا نافذة My computer و مربع الحذف دا
http://www.mediafire.com/conv/935e78...6e2af2656g.jpg

طيب المربع اللي على اليمين تقدر تكبره ؟ لأ طبعا عارف ليه ؟
الاول انت عارف يعني ايه وسيلة يعني سلوك الكائن بيقدر يعملها زي التحرك والتكبير والتصغير والنسخ ولاقص واللصق .
وممكن سلوك يناسب كائن زي التكبير بيناسب النافذة اللي على الشمال ولا يناسب كائن آخر زي النافذة اللي على اليمين.
ها فهمتوا حاجه ولا لأ؟

نكمل يله يا ولاد
ندخل بقى في الشغل التقيل
حد يا ولاد يعرف يعني ايه اطار العمل دوت نت فرام ورك .net Framework ؟
بص معايا الاول عايزكم تصلوا علي النبي .
اطار العمل .net framework دا من انتاج شركة ميكروسوفت وهيه اللي انشئته وبتوفره بشكل مجاني مع نسخ الويندوز . حلو كدا يا واد يا نور
طيب وايه لزمته يا استاذ بلال ؟
بص يا عم الدوت نت دا هو اللي بيدعم تشغيل البرامج اللي انت بتعملها باللغات الكائنية التوجيه .
يعني لو انت عملت برنامج بلغة فيجوال بيزك بما انها من لغات البرمجة كائنية التوجيه، لما بتخلص البرنامج وجيت تشغله ، تشغله على اي نظام تشغيل وخلاص ؟ طبعا لأ لازم يشتغل على نظام يدعم الدوت نت زي طبعا نظام ويندوز XP و 7 و 8 .
وممكن نقول على الدوت نت انه عباره عن مكتبة عملاقة من الاكواد او الاوامر والتي تدعم عمل وتشغيل البرامج المكتوبة بلغات البرمجة كائنية التوجيه.

المكتبة دي بتكون متقسمة الى وحدات صغيره ، وحدة بتدعم تطبيقات النوافذ ووحدة بتدعم تطبيقات الويب ووحدة بتدعم تطبيقات الموبايل ووحدة بتدعم الشبكات وهكذا

يبقى نسنتج من دا ان الدوت نت بتعمل حاجتان مهمتان :
الاولى : تساعد على انشاء التطبيقات ( ويب – نوافذة – موبايل – شبكات )
الثانية : توفر بيئة لعمل تلك البرامج بصورة صحيحة.

طيب يا استاذ بلال هو الدوت نت بيتكون من ايه ؟
بصي يا آلاء اطار اعمل دوت نت بيتكون من :
1. بيئة التشغيل CLR Common language Runtime
ودي شغلتها تجميع كل الاوامر المكتوبة في برنامج بأكثر من لغة برمجة دوت نت داخل اطار عمل واحد أثناء الترجمة.
يعني انت ممكن تكتب جزء من برنامج بلغة وجزء آخر بلغة تانية وعند التنفيذ توفر بيئة التشغيل بيئة لعمل البرنامج كائنه مكتوب لغة واحدة.

2. مكتبة تصنيفات النظام System Class Libraries
خلي بالك بيئة الدوت نت بتكون متحمله بأكتر من 5 الآلاف فئه Class جاهزه .
بتساعدك فى إنشاء التطبيقات المختلفه ، عارف ازاي بتقدملك كل الاكواد التى يتكرر تنفيذها وتخلي دماغك مركزه في المطلوب من البرنامج و تخلي التفاصيل الفرعيه لفئات الدوت نيت .
زي انت لما تيجي تكتب كود تلاقي البرنامج بيساعدك .
ازي بيساعدك كمان شويه تعرف .

3. مترجمات Compilers
ودي شغلتها تحول الاوامر المكتوبة الى اوامر مكتوبة بلغة اسمها لغة التجميع ثم تحول من لغة التجميع الى لغة الآلة اللي هيه صفر و واحد.
اللي مفهمتشي حاجه ترفع ايدها يا وبنات ؟

http://www.mediafire.com/conv/a478d3...f86293d46g.jpg
الحمد لله كلكن فهمتمن الدرس !!!!!!!!! ولا واحده رفعها ايدها
طيب تحبوا اعيد الدرس دا تاني ؟؟؟ عادي انا تحت امركم !!!!!!!!
يا نهار اسود دا ناوي يعد تاني حد يلحقهم يا جماعه الراجل دا شكله معندوش عيال ولا ايه ...........

http://www.mediafire.com/conv/efd797...f3225f7e6g.jpg
كفاية يا استاذ بلال انا تعبت احنا جسمنا ورم من الكلام النظري دا امتى نشتغل عملي ؟

http://www.mediafire.com/conv/ff690e...70be5df36g.jpg
طيب خلاص متعيطوش خلاص كل دا علشان فهمتوا !!!!!!!!!
تعالى بقى ندخلوا في الشغل العملي بقى
كل اللي جاي بقى عملي وشغل فيديو
ترن ترن ترن ترن ترن

http://www.mediafire.com/conv/d19e2e...86dd70486g.jpg
الحصة للأسف خلصت نكمل من الحصة اللي جاية ان شاء الله