بوابة الثانوية العامة المصرية - يابنات المنتدى اتحدوا ؟؟

للا

اقتباس:

بسم الله الرحمن الرحيم
السلام عليكم و رحمة الله و بركاته

يا بنات انا هعرض مشكلتي
بس بالله عليكم لما تقروها اوعوا حد يكرهني او يلعني .. انا بلعن نفسي لوحدي يعني .. مش عايزه حد يقطم و يكسر في مجاديفي اكتر مانا مكسراها
انا ممكن اطول في كلامي و مش بعيد كلامي يبقى ملعبك و محدش يفهم منه حاجه بس اهو اخفف عن نفسي
مبدئياً انا بقالي 3 سنين مش بكلم شباب على النت .. انا داخله النت من ييجي حوالي 5 سنين كده
كنت اول سنتين فيه بكلم شباب كتير اوي و مش كنا بنتكلم في حاجه عيب او كده كان كل كلامنا بينحصر في السلام و الحاجات اللي موجوده اليومين دول في البلد و كده
المهم انا عشان مرتبطه عاطفياً بس اللي مرتبطه بيه مش بكلمه ولا بيني و بينه اي اتصال بنحب بعض بالنظرات بس و كمان هو مصاحب اخويا اوي و اخويا بيحبه و بيستأمنه المهم قلت في نفسي ازاي اكون بحب واحد و الواحد ده بيحبني و اكلم شباب عالنت , و كمان ازاي يكون اهلي مديني ثقه و مخليني ادخل عالنت براحتي و اخون انا ثقتهم دي و اكلم شباب , ايه اللي انا بعمله ده , انا غلطانه , و قلت كمان كفايه اني بغضب ربنا اني اكلم واحد معرفوش ولا هو يعرفني و بيني و بينه مسافات كتير , و قعدت اقرا فتاوي كتير على موقع طريق الإسلام و لقيت ان الشات مع الولاد حرام لإن ده نوع من الخلوه
المهم غيرت ايميلاتي و مش اديتها لحد غير صحباتي البنات اللي واثقه فيهم بس , و ابتديت اقرب من البنات الصالحات اللي معايا في الشغل و المدرسه و بقيت اكلمهم على الايميل
المشكله ان فيه بنات من الصالحات دول وقفت جنبي و دايماً بتقف جنبي في كل المواقف , بس للأسف دلوقتي مش بعرف اكلمها لإنها مش بقت تدخل نت و مش بقينا نتكلم كتير لإنها اتخطبت خلاص و مشغوله مع خطيبها بقى و سابت الشغل فمش عدت بشوفها :(
و هي اللي كانت دايماً تحمسني عشان ابطل الحاجات الوحشه اللي بعملها و بجد كانت صالحه بكل ما تحمل الكلمه من معنى و حتى دي حمستني اني بطل اغاني خالص , و فعلاً بطلتها فتره بس رجعت تاني لإن نفسي أماره بالسوء
المهم كنت بطلت خالص اكلم شباب , و كان ليا واحده صاحبتي من اعدادي اخلاقها فاسده و كتير اوي اهلي نصحوني ابعد عنها , لإنها بتكلم شباب و بتخرج معاهم و بتشرب سجاير و مش قادره اقول بلاوي افظع من كده عشان مش تاخدوا فكره وحشه عني , لإن انا و صدقوني مش بعمل حاجه من اللي هي بتعمله
المهم انا اهلي نصحوني اني ابعد عنها , و فعلاً بعدت عنها لفتره طويله جداً يمكن سنه و شويه
و رجعت لها تاني , مش انا اللي رجعت لها بالظبط , لأ هي اللي رجعت لي و حاولت تقنعني انها بطلت كل الكلام اللي كانت بتعمله ده و فعلاً خدعتني لإنها كانت ادامي مش بتعمل حاجه من دي و عامله زي الملاك , لكن الواحد ممكن يخدع واحد بس لوقت طويل و مايخدعش الناس كلها وقت قصير , رجعت تاني , و اكتشفت ان هي لسه زي ما هي و يمكن بقت ألعن من الأول و أكتر بجاحه من الأول , و عشان افضل معاها قعدت تقولي لازم تساعديني انتِ واحده صالحه و انا كل اصحابي ناس فاسده و أفسد مني , قلت لها طب و ايه اللي جابرك تفضلي معاهم ما تسيبهم ان شالله يولعوا حتى , مش راح يفيدوكي في حاجه , المهم و لإني مسلمه و هي مسلمه زيي , وقفت جنبها بس للأسف مش كانت بتستمع لنصايحي ولا بتمشي باللي ربنا بيقوله و اللي هو بحاول اوصلهولها , بس للأسف لا حياه لمن تنادي .. و كل صحباتي الصالحات بعدوا كلهم لظروف الدنيا , الدنيا بتفرق بقى فمش كان ادامي غيرها , فضلت مصحباها من ورا اهلي , و عارفه انه حرام , و كل لما اقفل معاها بعد مكالمه او ارجع للبيت بعد خروجه معاها احس ان ضميري مأنبني , لما بكون ماشيه معاها في الشارع ببقى مكسوفه من نفسي , خايفه حد يشوفني يعرفها ياخد عني نفس فكرتها .. و للأسف هو ده اللي حصل
المهم كانت عازماني اني اخرج معاها في شم النسيم اللي فات
و بعدين خرجت معاها انا و هي و مامتها .. سابتني مع مامتها و مش قعدت معايا و راحت قعدت مع اصحابها الولاد و بجد شوفت فجور بمعنى الكلمه , و كان فيه واحد صاحبها كل شويه ييجي و يقف جنبي انا و مامتها و يقول كلام قلة ادب و يمشي فانا اتنرفزت لإن الناس هتقول عني بنت مش كويسه و كده فكنت قاعده باكل و معايا بيبسي .. و الولد ده جه فقمت راميه البيبسي في وشه .. و زعقت له لدرجة ان الناس كلها اتلمت و كنت هقوم اضربه لإني متعلمه جودو .. بس هو جري زي الأهبل ..
المهم هي جت و قعدت تقولي ايه اللي انتي عملتيه ده الولد ده اخويا ده بيقف جنبي ده بيساعدني ده بيدافع عني .. زي ماتكون بتتكلم عن المحامي بتاعها فسبتها و مشيت
المهم اتصلت بيا بعد الحكايه دي بييجي يومين و اعتذرت لي و انا زي الهبله بالظبط سامحتها ..
المهم البنت دي طلعت كلام وحش على مامتها و قالت انها بتخون باباها مع واحد جارهم فأنا دايماً بروح اقول لمامتها عن الغلطات اللي بتعملها و لما بتقلع الحجاب و احنا خارجين بقول لمامتها فتبثور في وشي و تقولي انا بلبس الحجاب عشان خايفه من بابا مش بمزاجي فبستغرب و اقولها يعني مش خايفه من ربنا ولا بيتهيألي؟ فمش بترد
المهم فأنا رحت قلت لمامتها انها قالت عنها كذا و لما هي عرفت معاملتها بدأت تتغير معايا عشان باباها ضربها كأنها صح و بقت كتير تزعق في وشي و تقولي انتِ شايفه كل اللي بعمله غلط و بقت تكدب عليا كتير
لحد ما في يوم كنت عندها في البيت و سرقت من شنطتي 90 جنيه كنت وقتها لسه قابضه من شغلي و حطيت جزء بسيط من المرتب في الشنطه عشان اشتري حاجات و انا راجعه البيت
المهم انا كنت بسألها في صيغة سؤال فين الـ 90 جنيه لقيتها ثارت في وشي و من يومها مش بتكلمني
فقلت احسن انها جت منها لإنها بجد اتلمت على واحده مش كويسه و افسد منها و سمعت عنها كلام وحش
فسبتها بس هي عشان تنتقم ادت رقمي للولد اللي رميت البيبسي في وشه و اتصل بيا عالموبايل و قعد يكلمني كلام قلة ادب فمش كان في ايدي غير اني اغير الخط عشان ارتاح من خلقته
المهم لما انا سبتها , ابتديت ارجع اكلم شباب عالنت تاني
مش كده وبس لأ انا كمان بقيت اقول لهم اسراري اللي مش بقولها لأي حد غير اقرب الناس ليا ..
و واحد من اللي بكلمهم بقى بيكلمني في حاجات خارجه كمان !! بس انا الشخص ده عملت له جنور و مش بقيت اكلمه .. بس لسه بكلم ناس تانيه .. مش عارفه ايه اللي انا بعمله ده
انا حاسه إنه أنا مش أنا .. أنا حاسه اني بقيت شيطان في هيئة انسان
ما كل الناس بتمر بلحظات ضعف .. و كتير منهم بيعديها بسلام .. اشمعنى انا اللي افضل كده و اخسر حاجات كتيره اولها اخلاقي و مبدأي ؟؟
انا حاسه اني في سنه تالته ثانوي مش هفتح كتاب ولا هذاكر .. همتي في شغلي و مذاكرتي راحت في الهوا ..
كل حاجه راحت .. حتى اخلاقي بتروح مني ..
مش عشان كل صحباتي بعدوا عني ابقى كده .. انا حاسه اني وحشه
هو انا بقرب من ربنا ولا ببعد .. انا ايه اصلاً؟ انا ولا حاجه
هو انا بصلي قيام الليل كل يوم عشان ايه؟ عشان ادعي ربنا و يستجيب ليا
هو انا بقرا قرآن ليه؟؟
انا والله فكرت اسيب كل الصلاه كمان بس افتكرت كلمه لواحد في مقام والدي و يعتبر مربيني و ربنا يرجعه بالسلامه
كان دايماً يقولي (يابنتي .. لو مريتي بضعف اوعي تسيبي صلاتك و تنسي ربك .. ده اختبار من ربنا .. ده امتحان من ربنا .. اوعي تنسي ربنا ابدا , انتِ كأنك في لجنه لما بتمري بضعف و ربنا بيمتحنك .. شوفي انتي بتستعدي لامتحان الدنيا ازاي .. اهو المشاكل اللي بنمر بيها دي زي امتحان الدنيا .. بس دي امتحان للاخره و العبره باللي هينجح فيه و يعديه صح)
يا جماعه انا وحشه اوي و مستاهلش اني اكون صاحبه لبنت صالحه .. مستاهلش اهلي اللي بيحبوني .. مستاهلش حبيبي اللي مش عايز يكلمني عشان مش يسوأ سمعتي و انا اللي بسوأها بايدي .. مستاهلش اخويا الكبير اللي نفسه ابقى دكتوره زيه .. مستاهلش اي حاجه من دي ابدا
سامحوني و اعذروني طاله

ازيك عامله ايه بصي انا هقولك رايي الخاص انا في عندي بنوته زميله ليا كانت بتكلم ولاد علي النت وكتير قوي وفي حاجات خارجه وهي كانت مبسوطه بكده الصراحه بس انا لما عرفت كده تخيلت اختي مكانها او انا يعني بالتاكيد مرضلهاش حاجه زي كده او ارضي لنفسي حاجه زي كده مع اني معرفهاش ولا هي تعرفني بس رحت اكلمها وادردش معاها سمعت انا مكالمه ما بينها ومابين ولد علي الموبايل وكان عاوز يسيبها لانه حاسس ان ملابسها ضيقه ومعرفش ايه كلام عبط بيقولهولها عشان ايه يفلسع منها وكلهم كده وحياتي قلتلها انا ممكن اساعدك وحكيتلي كل حاجه عنها زي يا عيني ما صدقت ولقت طوق نجاه قدامها وطلعت من البحر اللي كانت هتغرق فيه قالتلي كل حاجه عنها وبقولك مع انها متعرفنيش ولا اعرفها قلتلها عاوزه تبطلي اللي انتي بتعمليه ومترجعيلهوش تاني خالص قالتلي اه قلتلها خلاص اول حاجه تعمليها هي النيه تبقي فعلا ناويه انك متغضبيش ربنا تبقي ناويه ان اللي ياخدك يلاقيك من غير اي غبار عليكي نهائي اه غلطتي صلحي الغلطه دي وانسيها قلتلها عاوزه زوج واولاد وبيت وتربي وتكبري لازم تغيري اسلوب حياتك للافضل من كده بكتير عاوزه جنه تلاقي نفسك عايشه عيشه كويسه هنيه ومرتاحه فيها ولا تدخلي جهنم اللي ما هتعرفي تطلعي منها طبعا ردها كله عاوزه تبقي انسانه عاديه زيها زيز اي بنت محترمه قلتلها خلاص قومي اتوضي وصلي واقعدي اشكي لربنا بذنوبك كلها اللي انتي عملتيه غلط في حق ربنا اقعدي اشكي لغايه ما ترتاحي كده وتهدي وانتي لو حاسه بالغلط فعلا هتلاقي نفسك بتعيطي وتعبانه هي دي دموع ندم فعلا بعدها بقي اديتني جيع ايميلاتها وباسوورداتها وغيرتهالها كلها طبعا ايدتهوملي علي اساس انها فعلا ناويه تتوب وموش ناويه تعررف الاشكال اللي مابتعرفش ربنا دي ورحت قلتلها الولد اللي انتي بتكلميه دا يقدر يشوف اخته بتعمل كده يبقي هو سمحلك بكده ليه وفعلا بدات تصلي قلتلها صومي وقلتلها اول ما تفكري انك عاوزه ترجعي للايميل تاني والشات اقعي استغفري ربنا كتير لغايه ما تنسي خالص حكايه الشات وفعلا عملت الكلام دا ومبقتش بتعمل كده خالص لانها خافت من ربنا اولا وبعد كده سمعتها ولو اهلها اكتشفوا حاجه زي كده منظرها وهتبقي مكسوفه هي بس محتاجه نيه موش اكتر انوي انك متعمليش كده عشان خايفه فعلا من غضب ربنا عليكي لانك متضمنيش تموتي وانتي بتكتبي رساله لواحد منهم صح ارجو ان كلامي يعجبك ومكونش طولت عليكي