|
بسم الله الرحمن الرحيم
اخوتى واخواتى الاعضاء والمشرفين سوف انقل لكم هذه اليوميات وارجو منكم ان تتابعوها جيدا فيها الكتير والكثير من المشاكل الزوجية التى يترتب عليها هدم المنازل وخراب البيوت هذه اليوميات مكتوبة فى قالب فكاهى مضحك ولكنى لا اريد منكم الضحك فقط اريد منكم ايضا ان تتخذوا من دروسها تجربة لكم ولكى ننفذ الحكمة التى تقول ( ابدأ من حيث انتهى الآخرون ) ولا يجب عليك ان تقع فى اخطاء الآخرون ولذك ........ اعلم جيدا ان معظمكم طلبة وطالبات ولم تخوضوا تجربة الزواج من قبل ولكنى اود ان تتعلموا جزء من هذه الحياة المجهولة لديكم حتى تتجنبوا بعض المشاكل التى من الممكن ان تقعوا فيها فى المستقبل لن اطيل عليكم ونبدأ اليوميات بالحلقة الاولى ......... |
-( 1 )
انتهيت من ارتداء ملابسي _ و أنا أخفف الخطي_ حتى لا أوقظ حرمي المصون من نومها الهانئ .. فالساعة الآن السادسة والنصف صباحا ولا يزال أمامها ست ساعات من النوم اللذيذ . خانني الحذر فارتطمت قدمي _ أثناء لبس الجورب _ بالسرير فأصدرت صوتا خجولا ولكنه كان كافيا لإيقاظ ذلك البلبل النائم ليسمعني زقزقته المحببة .... هو أنت ما تعرفش تلبس من غير ماتصحينى .... آ آ آ ... أسف جدا غصب عنى رجلى خبطت في السرير .... طيب ما تخرج تلبس بره .... ألبس بره فين في الشارع مثلا .... نعم ... إنت بتتريق على .... لأ لأ بس ألبس فين .... ما تلبس في الصالة إنت مش عارف إنى نايمه الساعة ثلاثة وسهرانه بأبنك طول الليل وسيادتك نايم بتشخرررررررررر .... طيب خلاص من بكره حلبس في الصالة ...... .... .. وصلت إلى مكان عملى وجلست إلى مكتبى و أنا أتميز من الغيظ ... بعد قليل وصل زميلى وألقى السلام فأجبته باقتضاب سألنى زميلى .... خير مالك شكلك متضايق .... أبدا مفيش .... إسمع أنا عندى ليك خبر حلو .... يارب سترك ما انا عارف اخبارك .... عندى ليك عروسه .... عروسه !!!! يا أخى أنا ناقص .... إسمع بس دى لقطه .... طيب ما تتجوزها سعادتك .... لا دى أصلها مطلقة ولا تصلح لى انا لسه ما دخلتش دنيا . وهى مش عايزه منك حاجه .... مش عايزه منى حاجه إزاى امال حتتجوزنى علشان اعملها نوم العازب ؟ :D .... لا مش القصد دى يا سيدى عايزه تتجوز بنظام المسيار .... آآآآآآه انا سمعت عن الموضوع ده لكن ده حقيقى .... ايوه حقيقى ما انا بقولك أهو .... انت بتتكلم بجد .... ايوه دى جارة والدتى .... يعنى معديه الثمانين .... لا لا اصبر بس دى صغيره يدوب اربعين .... اكبر منى يعنى ، لكن انا اصلا حتجوز ليه ما انا متنيل متجوز .... لا يا ريس دا انت حتبقى ديك البرابر .... ديك !!!! إيه تشبيهات الفرارجيه دى .... لا لا انا قصدى انك حتكون اخر دلع .... والله الواحد يفكر بدأت أفكر و أفكر إنه عرض يستحق التفكير فعلا فلأخذ وقتى قليلا ( يتبع ) مهم جدا رأيكم وتعليقاتكم فى هذه المسألة وياترى اكمل والا لاء؟؟؟ |
عايزنا نعلق على ايه
مش لما نشوف الاول هيفكر في ايه للأسف دلوقتي من حالنا الناس بقت تفكر بالطريقة دي ربنا يستر على الأجيال اللي جاية وميضيعوش زي ما أجيالنا ضاعت |
|
طبعا كمل يا استاذ بورسعيدي
يعني هو اصلا المفروض م يفكرش في الموضوع ده اصلا يرفضه من غير ما يفكر بس يلا اما نشوف هو هيقول ايه وشكرا عالموضوع |
هههههههههههههههههههههههه حسبى الله ونعم الوكيل
ايه يا مجدى ده انت شكلك ناوى تتعور هنا خلى بالك بقى بس بصراحة الست دى بتستهبل يعنى ايه يغير فى الصالة وكمان صاحبه ده بيستهبل اكتر منها عشان جايبلو جوازة سودة هههههههههه ربنا يستر عليك يا اسد المنتدى يللا حضر الشاش والميكروكروم. |
لا لا لالالالالالالالالالالالالالالالالالالالالالالالا
اللي بيحصل دة لو ماكانتش النهاية مرضية انا مع اختي نغم |
وتوضح مدى قبح المراة اثناء قيامها من النوم
|
أستاذ بورسعيدي
موضوع شكله كده جامد و أول مرة أشوفه بس حضرنتك تعرف النكتة اللي بتقول واحد بيكلم نجار صعيدي بيقولوه عاوزك تعمللي كرسي شوانتاتيه قالوه يعني إيه كرسي !!!!!!! ممكن أسأل يعني لو ما فيهاش حاجة تتضايق يعني و أنا عارف إني هبقى صعيدي في الآخر هوه يعني إيه؟ """"""عايزه تتجوز بنظام المسيار""""" سواء تمت الإجابة أو ما تمتش سواء فهمتها أو ما فهمتهاش أرجو من حضرتك تكمل :) |
اقتباس:
<span style=\'color:purple\'>روح يا شيخ الله يسامحك ههههههههههههه طب ايه رأيك بقى انك ربنا حيوعدك بواحدة تطلع كل اللى اتقال ده فى الحلقة عليك وميرسى يا استاذ بورسعيدى هيا حلوة مووووت يلا وربنا يستر بقى |
موضوع كويس يا استاذ بورسعيدي
ان شاء الله اتابع معاكم انا كمان كتبت موضوع قبله علطول في بيت الطالبات اسمه يوميات اتنين مخطوبين |
موضوع جميل وشيق كعادتك يا استاذ بورسعيدى
وفى انتظار البقية |
شكراااااااااااااااااااااااا
الموضوع جميل اوي |
اقتباس:
|
اقتباس:
ايه يا عم الكلام ده ماالناس كلهابتقوم م النوم متنرفزة بس انا شخصيا عادى بالنسبة لى تعرف بقى نفسى اشوفكوانت قايم م النوم شكلك ايه وانا مع عصفورة فى الدعوة اللى دعتها عليكههههههههههههههههههههه طبعااحنا بنهزر كلنا هنا اخوات . |
اقتباس:
يا اينشتاين والله مكنتش اعرف سنه بجد سامحونى طبعا هو اشتاذنا كلنا. |
بجد تسلم ايدك على المشكله الشيقه اللى انت بتعرضها
جزاك الله كل خير |
ننتظرك يا عبقري الأدب
أ/ بورسعيدي |
السلام عليكم
لقد غمرتمونى بهذا الكم الجميل من الردود الذى يشجعنى ان اكمل بسرعة بسرعة شكرا لكم جميعا جميعا وانا سعيد جدا بتواجدكم معى الحلقة الثانية حالا بس انا مش عايز مناقشاتكم حول الموضوع تتقلب على نزاع بين البنات والشباب لان الموضوع لسه فيه الكثير من الاحداااااااث |
( 2 )
فى المساء كنت جالسا اتصفح الجريدة بينما تشاهد حمامة السلام المذبوح مسلسلا الى جوارى اخذت اقلب فكرة الزواج فى عقلى ، ما تأثير ذلك الزواج على البيت والاطفال ستكون صدمه كبيرة ، كيف ستكون صورتى امام الاهل والاقارب ، كيف ساواجه كل تلك العواصف ؟ ولكن ما الداعى لان يعرف احد بذلك سيقتصر الامر على زيارة او زيارتين كل اسبوع ، من الممكن ان اخفى الامر تماما ، وحتى لو علمت الحمامة بالموضوع فستكون احرص الناس على الا يعلم به مخلوق حتى لا تشمت الاعادى _ وما اكثرهم _ فيها لماذا احرم نفسى من كل راحة ؟ اليس من حقى ان اجدد حياتى واعيش سعادة مفتقده ؟ آآآآه ما أجمل مثل هذا الزواج بدون تحمل اى مسئولية سرح بى الخيال واخذت ارسم تفاصيل تلك الاوقات الجميلة التى ساقضيها مع شهرزادى الجميلة اصل الى منزلها فى الموعد المضروب _ بالتاكيد لن تتصل بى على الموبايل وانا على بعد 100 متر لتطلب منى احضار رنجه وحفاظات وصابون سادخل الى ذلك المنزل الشاعرى لاجد الهواء مشبعا بعطر انثوى جميل واضاءة من الشموع الخافته بينما شهرزاد تقبل فى قميص وردى رائع لتصب فى أذنى همسات الحب والشوق الى اللقاء نجلس لتناول اجمل الطعام _ الذى لم اقض نصف عمرى فى جمعه من الاسواق _ فتضع شهرزاد حبات الفاكهة باصابعها اللدنة فى فمى مباشرة ثم..... إنت يا اخيناااااااااااااااااااااااااااا انتفضت كمن صفعت قفاه على حين غره وانا ابسمل مرتعبا وقلت وقلبى يدق بعنف من الهلع ..... فى إيه بتصرخى ليه كده يا ست انتى ..... عماله اكلمك وانت سرحان ومش حاسس ، سرحان فى ايه ان شاء الله ( وهى ترفع حاجبا يضارع قوس النصر شموخا ) رددت متلعثما ..... لا مفيش ..... مفيش !!! امال لو فيه كان حصل ايه .... طيب سعادتك عايزه ايه بالضبط ..... ابدا عايزه سعادتك تقول حتاكلوا ايه بكره ( اللهم لا حول ولاقوة الا بك ) ..... اى حاجه تعمليها ..... لا يا سيدى ما تقليش اى حاجه ، قول عايزين تاكلوا ايه علشان الخدامه ( لفظ تطلقه على نفسها من باب اذلالى ) تعملهولكم ..... خلاص رز واى خضار مع لحمه .... طيب قوم فك الستائر ( ما انكدك يا امرأه ) .... ستائر إيه .... ستائر الجيران ( بتهكم بغيض ) حتكون ستائر ايه ستائر الشقه علشان توديهم يتغسلوا ولا عايز امك اما تيجى يوم الجمعه تقول على مش نظيفه :angry: .... الستائر نظيفه وزى الفل احنا مش لسه غاسلينهم من شهرين .... شهرين ؟؟؟؟؟؟ طبعا هو انت دارى بحاجه ، لا ده كان من ست شهور وانا من شهرين عماله اقولك تفكهم وانت كل يوم ليك حجه ( لا فائدة من هذا النقاش لأنهين تلك المهمة طلبا للرحمة .... آآآآآه اكيد لن أفك أى ستائر فى منزل شهرزاد ) ;) احضرت السلم وتعلقت على الجدران كسعدان فار من ملاحقة حراس جبلاية القرود - و خيالات لقاءات شهرزاد تطوف بخيالى تعلق طرف بنطال بيجامتى الساقط دوما من وسطى بتاثير أتساع رباطه بطرف حديدة السلم يا ساتر طاخ بوم تيشششششششش تكومت على الارض والسلم فوقى وبقايا فازة ورد سقطت فوقها تتناثر حولى قمت وعظامى تصرخ بالالم بينما اقبل العصفور مرفرفا مغردا ..... يا لهوىىىىىىىىى الفازه الغاليه اللى حيلتنا اتكسرت صرخت ..... فازة ايه مش تتطمنى عليا الاول ..... اطمن عليك !!! ما انت واقف زى الحصان اهو انت بيجرالك حاجه .؟؟ ..... مش ممكن اكون اتكسرت من الوقعه ..... الفازه اللى اختى جايباها لينا من بره هى اللى اتكسرت ( ويحك يا أمرأة لأعجلن لك العقوبة ولأاحرقن قلبك ، لأتزوجن مسيارا او مقعادا ، نعم لأ تزوجن ثم لأتزوجن ثم .........لأتزوجن ) ( يتبعن ) |
هو ده الشغل ايوه كدة
خلينا نستمتع من تاني يا بطل فلنرى من سيتزوج بسرعة شوية استاذي |
يااااااااااااااااااااااااااااااااااه ازاى فاتنى كل ده ده انا وحشة خالص سمحنى بورسعيدى اليومين دول عندى ظروف لكن ان شاء الله هتابع رغم انى ضد الزواج الثانى الا لضرورة واعتقد لم تتوفر الضرورة هنا بس هننتظر اقولك على سر وحشتنى قصصك وحكاياتك التى تجمعنا حولك على مائده واحدة واكرر شكرى ليك استاذى كم كنت مفتقدة هذا الجو واشعر بالوحدة ولكن الحمد لله احلى صحبه مع شهريار ...يارب دايما ................ |
ههههههههههههههههههه
جميله جدا بل منتهى فى الجمال بس مش ملاحظين ان انتوا متحاملين على العصفوره شويه بس الصراحه ربنا يكون فى عونه |
اه فيه شويه تحامل علي المراه
اكيد زوجها ايضا ليس بملاك... ولكن فلنقل ان هذا اسلوب القصه...ممكن يكون فيه شويه مبالغه لان معتقدش ان فيه وضع كده في الحقيقه وفي انتظار باقي اليوميات |
يا جماعة القضية الان ليسة من المتحامل على من
القضية الان هى ان نتعلم من تلك المواقف والدروس الى سوف تقابلنتا فى حياتنا الزوجية وانا باتكلم بالنيبة عندكم انتم لانى اعلم انكم مازلتم طلبة وطالبات واتمنى ان تتعلموا ان تبدؤوا من حيث انتهى الاخرين ومن الخطا ان تبدأوا من حيث بدأ الاخرون فهذه مضيعه للوقت وننتظر البقية واعاهدكم ان تجدوا فيها مايسركم شكرا لمتابعتكم جميعا |
حقيقى هايل وطريقة سردك للقصة مبهرة جدا يا استاذ مجدى
يللا انا هستنى اعرف هيعمل ايه الزوج المسكين ده بعد كده ياريت تكمل بسرعة اليك خالص تحياتى والى الامام يا اسد المنتدى . |
الاسلوب رائئئئئئئئئئئئئئئئئئئئئئئئئئئع مش حاجة جديدة عليك
استاذ بور سعيدي كاني بتفرج علي التلفزيون بدون مبالغة |
انا اول يوم ادخل هنا بس بجد طريقة كلامكو مع بعض
عجبتنى موووووووووت :) :) :) :) :) :) |
كده يا اسد المنتدى تفوقت فعلا على استاذ عبد الله مهدى زى ما قلتلك من قبل
الا انى شايفة زوجى هو نصى التاني يعنى انا ....ومهما حصل استحالة هيشوف منى حاجة وحشة مهما شوفت منه وحش وانا قد كلامى وعارفة بقول ايه بجد احتار ردى يوصف تميزك يا اسد المنتدى |
اظن ان دي عينة صغيرة من مشاكل المرأة العصرية
و اللي بتطالب بالمساواة |
شكرا يا اسلام لمرورك
ملحوظة المرأةالتي تطالب بالمساواة لا تعرف عن الاسلام شئ رحمة |
اقتباس:
مرسى جدا على مرورك وزوقك |
اقتباس:
نورتينى ياست الكل انتى ايه حكايتك مع الاستاذ عبد الله مهدى طبعا انا مش ناسى كلامك عنه وهذا ثناء لا اقدر على تحملة يا بنت المعمورة جميل ان تبحثى دائما عما يسحد زوجك فهو بالطبع سيتمسك بك ولن يفعل ابدا مثل بطل قصتنا طالما تراعى الله فيه وستجدى دروس كثيرة فى هذه اليوميات تؤهلك اكثر واكتر للتعرف على مايزعل زوجك والابتعاد عنها ابقى معنا |
اقتباس:
بلاش نفتح قضية المساواة هنا لان اهدافى من سرد هذا المسلسل ذكرتها سابفا انتظروا الحلقة الجديدة بعد دقائق |
( 3 )
فى الصباح التالى لموقعة ذات الستائر الخالدة ، تحاملت على نفسى رغم الألام المبرحة وتوجهت إلى عملى وصلت مبكرا عن المعتاد ولبثت انتظر زميلى صلاح والذى ساق الى فرصة لقاء شهرزادى الرائعة وصل صلاح فاستقبلته مهللا مقسما عليه ان يكون إفطاره على حسابى ، تقبل الدعوة شاكرا واسرعت انا بفتح الموضوع .... ها يا ابو صلاح قل لى بالتفصيل إيه موضوع العروسة اللى عاوزه تتجوز مسيار .... إيه ؟ الفكرة عجبتك ؟ .... والله نشوف بس هى إيه ظروفها .... اللى أعرفه من الوالدة إنها دكتورة عيون ، ومطلقة من سبع سنين وما بتخلفش ، وهى مرتاحة ماديا ومن عيله كويسه .... ما شاء الله طيب وإيه اللى خلاها تفكر فى الجواز بعد الفترة دى من ساعة ما أطلقت .... هى بتقول إنها مش محتاجة لفلوس ولا بيت لان كل ده عندها هى بس نفسها فى ونيس قلت وأنا افرك يدى حماسا و جزلا والعب حاجباى .... لا.. إطمن إن كان على ونيس فهى حتشوف ونيس عمرها ما حلمت بيه .... بس خذ بالك هى عايزه راجل محترم وما يبهدلهاش يعنى عايزه حياة هادئة .... يا سيدى إحنا أساس الاحترام ، على البركه إن شاء الله ، بس أتقدم إزاى .... سيبنى أكلم الوالدة وأحدد لك ميعاد .... تسلم يا أبو صلاح بس أمانة ما تتأخر على .... ولا يهمك ، و أنا أقدر أتأخر فى البيت شنت حرمى المصون هجماتها اليومية المعتادة وكانت تصرخ باعلى صوتها ولكنى لم اكن اسمع سوى موسيقى سيمفونية شهرزاد و أنا أمنى النفس باللقاء سمعتها تصرخ مجلجلة .... إتفضل يا سيدى العشا جاهز يلا كلوا خلصونى نظرت إليها بعيون حالمة وقلت .... لا مش حاكل أصلى شبعان .... شبعان !! من إمتى إن شاء الله دا انت عمرك ما تنسى بطنك .... أصلى كلت فى الشغل .... كلت فى الشغل !! آآآآآه ما احنا أصلنا بنلاقى الفلوس و ......... إستمرت تهدر كقاطرة تكتسح كل ما أمامها لكننى لم اسمع حرفا مما تقول فى اليوم التالى بشرنى وجه السعد صلاح بأن والدته قد رتبت اللقاء فى بيتهم غدا حيث أن العروس تقيم معها أمها فقط وليكون لقاء تعارف فقط فإذا تم القبول أتممنا الخطوات بالتقدم رسميا كدت أطير فرحا لدرجة إننى أحتضنت صلاح على كرهى الشديد لرائحته أستأذنت من رئيسى مدعيا وجود ظروف طارئة و أتصلت بقاطرتى و أبلغتها أننى سأتأخر لان لدى عملا خارج المكتب إستقليت السيارة و قد وضعت خطتى لاجهز نفسى .... فغدا لا بد أن أكون أجمل شهريار ( يتبع ) :huh: |
كويس ان انت حطيتها
بكرة أبقى أقراها لاني مش قادر اقرأ حاجة دلوقتي استاذي |
ليه مالك ؟؟
اكيد الجبس زانق على رجلك ياراجل فى حد يجبس رجلة فى الحر ده كنت أجل للشتاء ههههههههههه منتظرك اليلة ان شاء الله |
هايل يا اسد المنتدى فكم ابدعت سردا
ومنتظرين باقى الحلقات والف سلامة يا استاذ زيزو. |
يا مسهل انا حاسة انه هيتصدم فى العروسة التانية
لان اللى ملهوش خير فى مراته الاولانية ملهوش نصيب فى مراته التانيه ههههههههههه الله يبارك يا اسد المنتدى والى الامام |
اقتباس:
ومين عالم كتير مش بينجحوا فى الجوازة الاولى وينجحوا فى الثانية كل شيئ راح يبان وموعدنا الان مع الحلقة الجديدة |
(4)
توجهت إلى صالون تجميل رجالي معروف ، كنت دائما اسخر من أن يتردد رجل على صالون تجميل ، ولكن لا بأس أنا كالجميع أنتقد في العلن ما يمكن أن أفعله في السر دخلت إلى المكان متحرجا فأستقبلنى شاب يرتدى قميصا أحمر يلتصق بجسده وقد عقص أسفل شعره بصورة منفرة تحاملت على نفسي ... فكل شئ يهون من أجلك يا شهر ..... آهلين أستاذ أؤمر ..... والله كنت عايز أعرف إيه الحاجات اللي عندكم .... كل شئ أستاذ قصات جديدة ، صبغات ،بيرمنانت ، ، حمام مغربى ،تنظيف بشرة ، مانيكير وباديكير ،تدليك ، إزالة شعر بالليزر .... لا ... لا .. مش للدرجة دى أنا عايز قص شعر وتنظيف بشرة وحمام مغربى .... حاضر أستاذ قضيت ساعتين لتنظيف البشرة وقص الشعر وعمل حمام زيت وخففت شاربى ونزعت ثلاث شعرات بيضاء تظهر كلها في الجانب الأيسر منه فقط لأبدو وكاننى فرغت لتوى من شرب كوب من اللبن دخلت الى الحمام المغربى وخرجت منه وانا أحس اننى مخلوق جديد مررت بمحل ملابس فخم ودفعت مبلغا مهولا لشراء بدلة فيرساتشى وقميص وربطة عنق لانفان وأزرار قميص كريستيان ديور عرجت على محل أحذية خرجت منه حاملا حذاء كلاركس انجليزى فخم وصلت الى منزلى الرافل في آي السعادة والهناء ودخلت مخففا الخطى على انجو من المهالك ولكن سرعان ما انطلق المدفع الرشاش .... اهلا ...اهلا .... حمدا لله على السلامه ما بدرى .... الله يسلمك .... انت فين طول اليوم عماله اكلمك على الموبايل .... اصلى حطيته على الصامت من ساعة الصلاه ونسيت ارجعه ( كذبة صغيرة ) ... وكنت فين ده كله .... ما انا قلت لك حتأخر .... تتأخر 7 ساعات ؟ الساعه دلوقتى 11 ، وإيه اللى انت عامله في شعرك ده ... إيه حلقت شعرى ... اول مره تحلق بالشكل ده ، عاملى قصة زى ما تكون شاب صغير .... وهو انا عندى 90 سنه ما انا شاب صغير .... صغييييير .... طب النغه يا ختى النغه ... النغه !!!! بقولك إيه انا جاى تعبان وعلى اخرى .... وده إيه اللى في إيدك ده ؟ ورينى ( وهجمت على ما أحمله هجمة مظفرة ) أتسعت عيناها وهتفت ....إيه كل الحاجات دى .... أصل بكره حقابل مستر لارى اليسون جاى من امريكا وده صاحب شركة كبيرة وبيدور على وكيل له هنا واحنا عايزين ناخذ الوكالة ( مجموعة أكاذيب ) .... طيب وده لازم تلبسله جديد في جديد حتى الشرابات .... لازم اكون في احسن مظهر .... طيب ما انت عندك بدله جديده بقالها شهر بس .... لا ...... متنفعش الوانها متنفعش .... ليه إن شاء الله قلت وقد قررت ان انفس عن نفسى و أستفزها ......طيب خلاص شارى بدله اتجوز بيها ..... هئ هئ هئ هئ هييييييييييييييييييييييييييييييييييييييييييييييييي ييييييييئ ... بتضحكى عليه إن شاء الله .... تتجااااااوز هئ هئ ... تتجوز بايه يا حسره روح يا خويا إتجوز واللى أخذته القرعة تاخذه ام الشعور ( ويحك يا أمرأة قطع الله سم لسانك تالله ما نطق لسانك صدقا سوى أنك قرعه ، ولولا إنى أخاف على تسريحتى لأنلتك ما تستحقين ) صبرا فغدا تنالين الجزاء ( يتبع ) . |
طيب دلوقتي بقوا اتنين
هعلق على الاتنين ازاي ورجلي بتوجعني |
السلام عليكم
جزاكم الله خيراََ انا في شدة الشوق للمتابعة الحاجات الحلوة دي متطلعش غير من استاذ بور سعيدي |
شكرا يا بورسعيدى
|
السلام عليكم الموضوع مهم جدااااااااااااااااااااا فى هذه اليوميات 3 عناصر الزوجة - الزوج - الزوجة الثانية سؤال يطرح نفسة ...لماذا اصبحت الزوجة بهذه الصورة ...؟؟ الم تكن هى نفسها تلك الفتاه الرقيقة التى رضى بها الزوج عندما تقدم الى خطبتها...؟؟ اذن هو الذى شارك فى هذا التحول الذى طرأ على شخصيتها ...ولكن كيف...؟ السؤال الثانى الذى يطرح نفسه لماذا اقبل الزوج على فكرة الزواج الثانى هنا فى هذة اليوميات ..؟؟ رغم انه لم يفكر من قبل حديث صديقه اليه هل لانها زيجة بدون اى مسؤليات ..هذا بالاضافة الى انه سوف يستنشق ريحق السعادة بدون اى اعباء السؤال الثالث الذى يطرح نفسه ولماذا لجأت المراة ( الزوجة الثانية ) رغم توافر كل الامكانات لديها الى الارتباط ثانية ..؟؟ اعتقد لانها تريد الرجل الذى تشعر معه بالقوة ..وانها تستطيع به ان تقهر من يقف امامها ..ومن هنا فالرجل الذى تخيل ان زواجة مجرد متعة فقط فقد اخطأ التقدير لان زوجتة الثانية ان لم تشعر معه بالامان وان بجانبها رجل يستطيع يحقق لها الامان فقد تتركة ولكن للاسف بعد ان يكون كلا منهم ( الزوج - الزوجة - الزوجة الثانية ) قد خسر كثيرا... وها انا فى انتظار البقية اسعدتنا استاذ بورسعيدى بيومياتك المتميزة ولك منى كل التقدير لشخص الكريم ولمجهودك الذى تسعى من خلاله لعرض مشاكل قد يقع فيها الكثير من الشباب بدافع البحث عن الحب ........... |
طول عمرك منطقية يا مهرة
|
مش هكرر كلامى بس يا استاذ مجدى والله بجد هايل
وكمان راى مهرة موضوعى والله بجد ومستنيين الباقى.. الى الامام يا اسد المنتدى. |
شكرا لكم جميعا
سعدت جدا بآرائكم البنائة مهرة :- لم يرد فى القصة ان الزوجة الثانية اقبلت على الزواج طلبا فى تحقيق الان والحماية ولكن هى كانت تعانى من الوحده كما انه من الممكن ان تكون الحياة الزوجية فى بادئ الامر سعيدة ثم تتغير لاسباب كثيرة منها اختلافات الطبائع والاطوار بين الطرفين ولو صح كلامك لما سمعنا عن رغبة الزوج فى الزواج من اخرى ولما سمعنا عن محكمة الاحوال الشخصية ولما سمعنا عن الطلاق والنفقة والحضانه والشقة من حق الزوجة الخ الخ .... والسؤال الذى يطرح نفسة الان اذا كانت الزوجه ( الاولى) بهذه الطبائع وبهذا الاسلوب فهل من حق الزوج ان يبحث عن سعادته من جديد ام لا ؟ وللحديث بقية وللقصة بثية ان شاء الله |
شكرا استاذ بورسعيدى على تعليقك وفى انتظار البقية |
( 5 )
اليوم يومك يا شهريار من الذي قال إن للرجال فترتي مراهقة واحدة عند بلوغه مرحلة الشباب المبكر وأخرى في الخمسين وما حولها ؟ من قال هذا كذاب اشر ...... نعم فأنا اشهد أن الرجل ليكون مراهقا في العشرين والثلاثين والأربعين .... فما الرجل الا مراهق دائم أبدى كنت أحدث نفسي بكل هذا منذ الساعات الأولى لصباح ذلك اليوم السعيد الذى سأحظى فيه بمقابلة حبى الجديد ، فقلبى يخفق بشده وأحس بنفس الإحساس الذي خامرني يوم أشارت لى ابنه الجيران من النافذة بموافقتها على مقابلتي فوق السطح أثناء إذاعة فوازير رمضان حتى نأمن أعين العوازل نعم أشعر بأننى هائم في عالم ملون سعيد يعد بسعادة دائمة لا ينغصها منغص لا أذكر كيف مرت الساعات في ذلك اليوم ولا اذكر كم أنفقت من الوقت أمام المرأة أتأكد من أناقتى وتناسق ملابسى ، وكم انفقت من الوقت اتخيل شهرزاد وهى تنظر الى الارض بخفر ووجنات متورده عند اللقاء حانت اللحظة المنتظرة فأنا أقف أمام الباب أحمل علبة الشيكولاته الأنيقة التى حرصت على ابتياعها من أشهر وأغلى محلات البلد تنفست بعمق وسميت الله وطرقت الباب لتفتحه إمرأة طويلة القامة في سن متقدمة توقعت أن تكون حماتى المستقبلية عرفت بنفسى فقادتنى الى الصالون لأجد هناك أم صديقي صلاح ترحب بي متهللة جلست تحت نظرات حماتى المتفحصة واخذنا نتبادل حديث تعارف وسؤال عن الأحوال أدارته أم صلاح بحنكة وخبرة مضت دقائق و أنا بأنتظار أن تدخل شهرزاد حاملة صينية الشراب تتعثر من الحياء لم يحدث هذا أبدا دخلت شهرزاد بخطوة واثقة وتوجهت الى مباشرة ومدت يدها مصافحة فصافحنها مرتبكا متفاجئا جلست أمامى مباشرة واضعة ساقا على ساق وعينيها تتفحصانى بلا مواربة هى ذات جسد ممتلئ قليلا ولكنه امتلاء مقبول أحبه فى النساء من الواضح انها استعدت للقاء أيضا فقد تركت طرحتها تنزلق إلى منتصف شعرها مظهرة شعرا ناعما يميل الى الحمرة وقد أعتنت برسم عينيها بطريقة جذابة و تضع مكياجا خفيفا يشى مع ملابسها بذوق رفيع كنت أبحث عن بداية لطرف الحديث عندما فا جئتنى بسؤال صادم .... حضرتك متجوز مش كده ؟ اسقط في يدى من توقيت السؤال فأجبت متلعثما ... أيوه بس لى ظروف خاصة ... إيه هى زوجتك مريضه ولا ست واحده مش بتكفيك يا للداهية إنها جريئة جدا وهذا ما لم اتوقعه .... لا مش كده بس يعنى هى مهملة في بيتها ولا تهتم بى إطلاقا و ... .... عموما دى حريتك لكن لازم تعرف إنى دكتورة ولى مركزى الاجتماعى ولا يمكن اتجوز في الخفاء .... يعنى إيه .... يعنى من حقى ان الناس تعرف انى متجوزه مش معقول تدخل وتخرج من غير الناس ما تعرفك .... أكيد طبعا .... طيب لى كام سؤال إنت عارف إن ده زواج ومهم فيه الصراحة والوضوح قلت وقد بدات أتخذ موقفا متحفزا ... أكيد تفضلى .... هل تعانى من اى أمراض مزمنه قلت بانفعال ... لا انا صحتى كويسه ... هل تدخن ... لا الحمد لله .... هل تلعب رياضه ... يعنى ... بلعب كوره مره في الأسبوع .... طيب ليك هوايات .... ايوه طبعا بحب القراءة والافلام الاجنبيه ... كويس دى حاجه مشتركه بيننا بس لازم تعرف انى ست لها شخصية مستقلة ... بمعنى ؟ ... يعنى ممكن أسافر بره في الأجازة مثلا ولن انتظر موافقتك فانا لست صغيرة ... لا مشكلة دخلت خادمة تحمل صينية عليها اكواب العصير الذى تناولته لأخفف من جفاف حلقى ، وانا مرتبك امام نظرات شهرزاد الجريئة التى مالبثت أن قالت ... طيب أكيد عايز تسالنى عن حاجات معينة ( آآآه فعلا لا بد أن أسألها ....... عن شئ ما ) ( يتبع ) |
| جميع الأوقات بتوقيت GMT +2. الساعة الآن 12:49 PM. |
Powered by vBulletin® Version 3.8.11
Copyright ©2000 - 2025, Jelsoft Enterprises Ltd.