|
(((((( قصة عضو ))))))
بسم الله الرحمن الرحيم كل يوم بيسجل معانا عضو جديد في المنتدي ويوم بعد يوم بيبتدي يظهروا الاعضاء المميزين وبتبقي معرفتنا للاعضاء المميزين دول سطحيه منبقاش عارفين عنهم غير الاسم والعنوان وبنبقي عارفين ان العضو ده مميز مثلا في ردوده او مواضيعه او في قسمه اذا كان مشرف بس منعرفش حاجه عن حياته الخاصه ولا زكرياته ولا طفولته ولا حتي قصة حياته وعشان نكمل الحته الي ناقصه دي تابعونا في حلقات متجدده من برنامج (((((( قصة عضو )))))) وحتي نعرف ادق التفاصيل....ادق التفاصيل......ادق التفاصيل ايضا كان معكم محمد ناصر من داخل زكريات كل عضو:) |
متابع ان شاء الله
في امان لله |
فكرة جميلة منتظر
ده انا حتى بفكر اكتب مزكراتى :d |
اها فكره حلوه اوى
|
انا عندى رأى الموضوع ده رائع
ياريت يتقفل فيه الردود عشان نسهل على الاعضاء متابعة الموضوع |
حلوه اوى الفكره ديه
|
اية دة يامحمد
هى هنا ؟؟ |
فكرة جميلة اووووووووى متابعة باذن الله |
فكرة حلوة اوي
متابعة ومستنية ادق التفاصيل..ادق التفاصيل..ادق التفاصيل بحب اقولها الكلمة دي:d |
حلو اووووووووووووووى فكرة بجد مميزة
واحنا مستنين الجديد فى الموضوع او (أدق التفاصيل) |
لذيذة الفكرة دى ف انتظار اول عضو يلا عايزين نعرف ادق التفاصيل وعشان نتأكد اننا هانعرف ادق التفاصيل كل عضو معاه 3 سنين يخلص فيهم ولو محتاج زيادة مفيش مشاكل :049gc0: |
بجد لذيذه الفكره ..
يللا ابتدوا بقى .. قبل ما الاسبوعين الاجازه يخلصوا .. |
فكرة جميله جدا وانا متابعه معاكوا الموضوع
|
بسم الله الرحمن الرحيم
كان يا ما كان كان في عضوه اسمها (((Sharp Nails))) عضوه لا تعرف لزعل طريقا ولا سبيلا لاتخشي في الحق لومة لائم تمتاز بالطيبه المحدوده يعني من الاخر طيبه مع الي طيب معاعها وتتنرفذ مع الي يتنرفذ معاها سجلت (((Sharp Nails))) في يوم 27\8\2008 وكان اول موضوع ليها اسمه (((الحمام الذكي)))) :d طبعا اول موضوع باين من ريحته:d وده كان اقتباس صغير من موضوعها اقتباس:
اقتباس:
الجزء الاول (هسميها يا نسمه الطفوله المشرده):d زمان لما كنت طفلة زماااااااااان بقى قول الزمان يرجع يازمان اوعى وانا عندى 4 سنين تقريبا الحاجة الى فكراها من الفترة دية ماماتى يوم ما رجعت من المستشفى ومعاها اخويا البابى كان لسة مولود وانا اعتبرته العروسة بتاعتى كنت بقى من البنات الى بتحب العرايس والعبط دة وفاكرة شكله اووى كلن مقرف. المهم يعنى فاكرة برضه انى صحيت تانى يوم وفتحت التلاجة لقت شيكولاتة عشان الناس الى هتيجى تبارك للبابى بس انا اكلتها هو دة الى انا فكراه من المرحلة دية نيجى بقى لاول يوم فالمدرسة فكراه كأنه امبارح بالظبط مكنتش طايقة المدرسة وفضلت اعيط وازعق فالميس بتاعتى وفاكرة انى قلعتها الطرحة ((( حلوه الحركة دي يا نسمه مش بقولكوا طفوله مشرده))):d بتاعتها وجريت ورا مامتى بس ماما اخدتى فى جنب كدة وقالى لو قعدى كويسة هجبلك عروسة من عند عمو فؤاد الله يمسيه بالخير زمانه مات وشبع موت المهم يعنى انا مردتش وفضلت اعيط واقولها خدينى معاكى راحت قرستنى المهم مجتش غير بكدة وروحت اتلميت فى فصلى وفى اخر اليوم ماما جت خدتنى واحنا مروحين اشترتلى عروسة من عند عمو فؤاد بس ملحقتش اتهنى بيها لما روحتت سبتها عالسرير وكان اخويا الى لسة مولود دة كان كبر شوية تقريبا ساعتها اخد البتاعة قطعلها شعرها بقت قرعة الحمد لله فاكرة يوميها فضلت اعيط كتير بس مش فاكرة حاجة بعد كدة لحد اولى ابتدائى كان عندى واحدة صحبتى كنا كل يوم الصبح نبدل الجزم مش فاهمه لية انا البس جزمتها وهى تلبس جزمتى وفاكرة برضه موقف انها مرة اخدت جزمتى وروحت بيها وانا فضلت اعيط كأنى حافية مثلا وراسى والف سيف مروحش غير بجزمتى والناس مبقتش عارفة تجبلى البت منين لحد ما جت اختى كانت اكبر منى ب3 سنين كانت معايا فالمدرسة قالتى خلاص مش مهم بكرة تخديها منها بس مش فاكرة بقى من اول اولى ابتدائى لحد يجى 5 كدة الزاكرة مفقودة هنا بس فاكرة بقى اللعب والذى منه كنت طفلة متشردة بنزل العب فالشارع مع جرانى هو كان واحد بس من اولى ابتدائى لحد خامسة برضه علمنى اسوق العجلة الله يمسيه بالخير برضه واول ما سوقت العجلة بقى كنا كل يوم نلف المدينة بالعجل منتهى التشرد بس بقى جيت عزلت من الحتة دية فى اعدادى وروحت حتة تانية بصراحة فترة الاعدادى دية واقعة من حسباتى خالص مش فاكرة فيها حاجةمش فاكرة بس غير يوم كنت فى تالتة اعدادى ساعتها وكان فاليوم دة جايلنا المدرسة وفد يابانى او صينى مش فاكرة بظبط المهم المدرسة فضلت يجى اسبوع فى حالة تنضيف ونبيض الحيطان ونسقى الجنينة ونجيب تباشير ملون ونحط الزينة وخلينا المدرسة عروسة وبلالين وحطينا المشاية الحمرة دية ((ريد كاربت))وفى اليوم بقى الى كانو الناس دول جاين فيه جاتلى الميس بتاعت الاقتصاد المنزلى كانت صحبتى قالتى يانسمة تعالى اعملى معايا بسكوت عشان نقدمه للضيوف مش عارفة اية الى بلانى بالبلوة دية قعدنا انا وهى وبنتين كمان نعجن بقى وندخل الفرن ونطلع مالفرن لحد ما اتقلينا احنا جنب الفرن بس والله كان طعمه حلو وحتى الراجل الصينى او اليابانى(((او الفليبيني يا نسمه كلهم شبه بعض))):d كان معجب بيه اوى وقعد ياكل منه وقالنا فالاخر ممكن صورة تذكارية بالانجلش طبعا عشان محدش يقولى مش عارفة اية بس .. نروح عالثانوى بقى اولى ثانوى كانت عسولة اوى كنت فاشلة فيها وبايعة القضية جداا ومكنتش بحضر حصص انا كنت مصاحبة المدرسة كلها من الغفير للمدير المدير كان اسمه مستر جهاد كان يطلع يلاقينى انا وصحابى قعدين فالحوش يقولنا بتعلوا اية هنا انا عشان كنت مصحباه كنت بلاغيه فالكلام وادخله مكتبه ويقعد فى حاله كدة والله كان راجل طيب الله يمسيه بالخير هو كمان بس لسة ممتش لسة شباب المهم يعنى كنت فى سنة اولى دية مكنتش بزاكر فيها غير قبل الامتحانات المهم كان معايا فالفصل ولاد وانا كنت قاعدة فى الصف الى جنبهم فمرة يوم امتحان الالمانى مش هنسى اليوم دة ابداااا كان المانى مستوى رفيع مش تخين فالولد الى كان قاعد جنبى كان عمال يبص فى ورقتى وينقل ومنرفزنى اوى وانا كان فى حجات مش حلاها وهو حاللها فقولت لنفسى طب هات وخد بس مينفعش ياخد ومش يدينى (فكيكه من يومك يا نسمه:) )فقولتله ماتخد الورقة احسن راح قايلى ياريت اصلى مش شايف كويس قالى بدلى الورق هنقل الى انتى حلاه وارجعلك ورقتك تانى قولت ماشى ش مشكلة وروحت مبدلة الورقة معاه وياريتنى ما عملت المصيبة دية الواد الله....يهديه بقى مطرح ماهو قاعد نقل الى عاوزة من الورقة بتاعتى وادى صحبه الى وراهه ورقتى ينقل منها _الله عالمنظر_وبقيت حاسة انى هتقفش وهروح فى داهية والورقة بتاعتى عمالة تلف عالولاد كلها لقيته بيقولى متخافيش هنعمل احلى واجب معاكى وانا بقيت بتشال وبتحط وعايزة ورقتى وهعيط عليها وفضلت اقوله هاتهالى زى ما ودتها هناك مليش دعوة لحد ما المستر الى كان واقف شافنا بنتكلم راح مزعقلنا وبقيت عاملة زي الكتكوت الى وقع فى المية والمستر بقت عينه علينا طب هجيب ورقتى ازى والورقة النصيبة الى معايا مش بتعتى ولو شاف اسم الواد هروح فى داهية المهم الحمد لله المستر جاتله مكالمة هاتفيه خرج برة الفصل روحت رمياله ورقته وادنى ورقتى تانى وجاية ابص فالورقة لقيت الى مكنتش حلاه اتحللى وبالوان مختلفة بقى وخطوت مختلفة وهيصة والورقة بقت سلطة بس الحمد لله فالاخر جبت فالامتحان دة 29 من 30 ((بالنصب طبعا))كان يوم مرهق اوى تابعونا في الجزء التاني من شارب نايلز في مرحله ما بعد اولي ثانوي |
لا بجد جميلة اوى الطفولة المشردة بتاعتك يا نسومة
ومواقفك جميلة بس يابنتى انت فاقدة الذاكرة ولا ايه تلت اربع عمرك ناسياه منتظرين باقيت قصتك وجزاكم الله خيرا على الموضوع يااخ محمد |
اقتباس:
بجد نسمة ادتنى امل فى ذاكرتى كده انا كويسة اوى عسل يا نسمة بجد و طفولتك اعسل طبعا |
بسجل متابعة ربنا يوفقكم..... |
هههههههههههه ايه يابنتى الذاكرة الحديدية دي
عمالة تكروتي ابتدائي ف اعدادي كدة انتى عايزة سطرين بالظبط ونوصل للحظة دي واضح انهم عايزين يشوقونا للموضوع فبداو بعضوة ناسية نص تفاصيل حياتها مكملة وامرى لله |
زي العسل والله بجد ضحكتيني كتير بعد ما كنت مكتئبه
شكرا ليكي ومستنيين باقي القصه |
طفزلة لذيذة يانيسو
ادتيني امل اني اكتب حاجة عن طفولتي كان فيها احداث مهمة وفاكراها اكتر من الكروته بتاعتك دي:d |
اقتباس:
طيب يا ستي يلا ورينا هتعملي ايه :049gc0:مش عايزاكي تفوتي حاجه والاااااااا :stickjo4::stickjo4: |
اقتباس:
ونص كلامك مش فكره خلينا معاكي لاخر القصه هانت فاضل سنتان ونص هوا يعدوا:) بس حقيقي انت شرانيه بيقولوا عليكي طيبه ليه مش عارفه أنا ؟؟ (( مش أوي يعني)) شرانيه نص نص |
ايه ده يا نسومة منتهى التشرد
واختيار موفق لأول موضوع بصراحة :) بص بصراحة قصة روعة ومنتظرين الجزء التاني |
والله احرجت لية كدة يامحمد شردتنى عالفضائيات
على فكرة انا مش فاكرة تمن حياتى يادوبك فاكرة كيلو الا تمن :d |
هههههههههههههههههههههههههههههههه
لا يا جاعة تشرد ايه دي نسمة كده كويسة جدا كده خلي الطابق مستور متابع يا نسمة بجد منتهي التشرد هههههههههههههههههههههههه |
بتغشى يا نسمة اخص عليكى الف خصاية:slap1qk6: بقى كدة انتى تغشى اخص عليكى الف خصاية:slap1qk6: كدة ينفع اخص عليكى الف خصاية:slap1qk6: و قال انا اللى كنت فاكرة انك يا ما هنا يا ما فى البدرشين:mad: يا جماعة اخص عليها الف خصايةD: و بعدين ايه مش فاكرة مش عارفة ناسية و مش عارفة ايه دة كلام و بعدين الميس ذنبها ايه يعنى تقلعيها الطرحة مش كدة عيب انا علمتك كدة:slap1qk6: الخص عليكى الف خصاية:) بس كفاية |
كانت بصراحة سنة كله غش حتى العملى معتقتوش يلا اايام سودا وراحت لحالها
وبعدين كبرت شوية وروحت تانية ثانوى اكيد بس كنت مبتديه السنة دية بحماس اوى وكنت حاطة مجموع منزلش عنه ابدا كنت دايما اقول لنفسى لازم اجيب 98%وفضلت ازاكر طول السنة دية نزلت مدح فالكتب وكل حاجة قطعت الدنيا فالسنة دية بس لما كنت بروح المدرسة بقى مكنتش بشوف الفصل يمكن كمان كنت بتلخبط فيه من كتر ما انا مش بزوره كنت انا وتلاتة صحابة كنا عملين جروب كدة ولينا مكانا الخاص محدش يقعد فيه غيرنا فى ملعب البساكت وانا بصراحة كنت شرانية شوية ومكنتش بحب العيال بتوع ابتدائى سن الرخامة بقى ومكنتش بطيقهم فمرة لقينا بنتين قعدين فى مكانا روحت انا روحت قولتلهم قومى يلا ياموزة منك ليها دة مكانا وكانوا عيال رخمة وتنحة كدة الله يمسيهم بالخير برضه فضلوا يقوحوا معايا ويقولى لا مش هنقوم وانا راسى والف سيف ليقوموا وقولتلها مش هتقومى يعنى طيب انا هروح اندهلك مستر جهاد((المدير صاحبى))راحت العيال خافت وقامت بادبها كنت مفترية اوى عالاطفال عدت سنة تانية دية بطول والعرض وبكل حاجة وجت الامتحانات كانت فترة وحشة بقى الفترة دية انا من النوع الى مش بيتوتر بس كان عندى انتمتى متوترة جداا مكنتش ببقى طيقاه قبل الامتحان احنا اصلا مكناش بنمتحن فى مدرستنا كنا بنروح مدرسة تانية كانت مدرسة ولاد بس واعوذ بالله من دية مدرسة ومن عيالها كانوا اشباح يرعبوا عشانهم مكنتش بحب الامتحانات المهم يعنى امتحانات تانية دية كانت بالنسبالى زي لفل الحمد لله وجينا فى اخر يوم ركزوا فالحتة دية اخر يوم الصبح قبل ما ندخل كان معانا ولد فى الفصل اسمه طارق وكان مظبط مع بنت كدة فالمهم يعنى ولاد المدرسة الى احنا بنمتحن فيها كانوا بيغيروا من طارق دة وحبوا يأدبوه راحوا اتصلوا بالبت بتاعته راح هو الرجوله اخدته وراح يتخانق معهم بعلوده طبعا اتبهدل والعيال دية كانت يعة عالاخر مش زي بتوعنا ولادنا كانوا نسمة كدة((( ههههه ماباين يا نسمه بامارة لما اخدوا منك ورقة الامتحان وكل الفصل ختم عليها:))))المهم ياعينى الولاد دول كان معاهم كانزات مقطعنا كدة راحوا شرحوا طارق دة بيها ودخل الامتحان بدمه كان اخر يوم يوم زفت على دماغنا كلنا بس جة يوم بقى النتيجة كان يوم مرعب اوى بالنسبالى اول مرة اعيش الجو دة وقاعدة عالنت بقى عمالة احاول ادخل انا واخواتى وقطتى كانت معايا وفضلت قاعدة كتير وفالاخر الساعة 3 كدة انتمتى اتصلت بيا وكانت جابتهالى وقالتى انى جبت 98%مبقتش مصدقة ودانى وقعدت اقولها كان 93 تقولى 98 اقولها لا انا جبت كام تقولى يابنتى 98 قعدت اصوت بقى وكدة فرحة بقى وعملنا بالوا فالبيت كان اول مرة الرقم دة يدخل العيلة كلها من عيلة بابا وعيلة ماما وبعد الفجر لقيت الاتصالات بتنهال عليا مدرسينى بقى وقريبنا والذى منه وفضلت صاحية اليوم دة معرفتش انام فيه خالص وبعدها سافرت بقى اعيش حياتى ورجعت للهم تانى بسرعة دروس بقى وزفت وكدة جيت بقى فى نص تالتة لقيت نفسى زهقت من المزاكرة ومليش نفس ازاكر وجالى انهيار عصبى بقى روحت ملقتش حاجة تفرفشنى غير انى ادخل النت بقى وانسى الدنيا عطرت فيكوا وفى منتداكوا دة وفضلت بقى اتعرف عالناس الى هنا لحد ما لقيت اسماء ((طمعانة فى رضاك يارحمن))وبعدين اتصحبت عليها موت وبقينا روح واحدة ومن محاسن الصدف انى فى اجازة نص السنة بتاعت تالتة مدرستى كانت ملطعة معسكر لاسكندرية عند اسماء يعنى قولت بس فرصة اروح اشوفها وكدة سارفت اسكندرية وقضيت اول يوم مع صحابى وتانى يوم مع صحابى برضه بس جالى تلفون من مامتى وقالتى ان قطتى اتجوزت القط بتاع واحد معايا فالفصل بس ماما ومامته صحاب فالحمد لله بقينا نسايب وقال اية كمان القطة حامل فرحت اوى بصراحة لانى كنت بعتبرها بنتى كدة المهم جيت تالت يوم قابلت اسماء فمكتبة اسكندرية واديتنى مدلية من الى هما قلب واتقسم نصين دول مش عارفة بقى هتعرفوها ولا اية المهم وانا اديتها خاتم وكانت احلى ذكرى بصراحة وبعدين للاسف روحت بقى البيت وبعدين بعد شهرين قطتى ولدت اربع قطط نونو خالص كانوا قمر قمر بس كان فيهم واحد اسود ولا نعرف جة منين مع انها بيضا وجوزها ابيض والتلاتة التانين بيض الا ياعينى دة كان اسود بس كان مايص مياصة كان بيحب يدلع اوى المهم يعنى فضلوا القطط دية معانا لحد ما قعدت تكبر يوم ورا يوم وبعدين بقى بهدلولنا اللشقة كانوا كل يوم الصبح يصحوا يخربشوا فالصالون كانوا بيحبوه اوى فماما حلفت ليمشوا الاسود دة سافر القاهرة عند واحدة كدة وبنوتة بيضا بعناها لمحل قطط بخمسين جنية اضحك علينا والولد والبنت البيض ادتهم لانتمتى وهما دلوقتى ماشاء الله جيلهم بابى فالسكة المهم فضلت القطة الام معايا لان دية روحى اصلا كنت بموت فيها كانت كل يوم تصحينى الفجر احطلها اكل تاكل وتشرب وتدخل البلاكونة تقعد فالشمس وتيجى الساعة 10 كدة افتحلها الباب بتنزل تلعب فالحوش وتطلع كمان ساعاتين كانت كل يوم على كدة بس جة يوم كان يوم وحش اوى نزلت الضهر واستنى فيها تطلع مش بتطلع ولقيت العصر ادن وهى مطلعتش قعدت انادى عليها مالبلكونة مش بترد عليا( ياااه انتوا كنتوا بتكلموا بعض كمان) ولا بتبصلى خالص فنزلت انا واخويا ندور عليها مش لقنيها قعدت اعيط كأن بنتى ضاعت منى كان يوم وحش اوى مش هنساه وبعدين بعد يومين معدين من قدام محل القطط الى جنب بيتنا الاقيلكوا القطة ياحببتى فى القفص روحت قولت للست دية بتاعتى قالتى لا دية واحدة جابتهالى وقالتى انها بتاعتها وعاوزة تبيعها والقطة طبعا بتاعتى وانا عرفاها كويس وحتى هى عمالة تصوت وعاوزة تطلعلى بس الست الله يسمحاها مش رديت تدهالى روحت قولت لماما وبابا اننا نشتريها منها وروحت عشان اشتريها لقيت الست مشتها كان هاين عليها ابطحها بقفص ومن ساعتها وانا معرفش عن القطة دية حاجة وبعددين اختى الكبيرة اتجوزت وبرضه كنت مرتبطة بيها اوى لقيت نفسى بقى الدنيا بتفضى من حوليا بنتى واتسرقت ومعرفش عنها حاجة واختى مشيت واختى التانية فى طب وطبعا دية ممنوع اللمس او الاقتراب كل الهرج والمرج دة اثر على ثانويتى فجت الامتحانات بقى وكانت امتحانات بشعة كدة ومقذذة حتى اتظلمت فالتصحيح ماعلينا اقولكوا على اخر يوم فالامتحانات برضه كنا بنمتحن فالمدرسة الشؤم دية كانت مدرسة وحشة كنت بكرهها المهم يعنى بقى خلصنا اخر امتحان( كويس ان طارق مضربش تاني:)) وخرجنا بقى وواقفين مع بعض وكدة وببص كدة الاقيلكوا عربية عمالة تتشقلب وتعمل حركات واية كان منظر بلمت ساعتها وبلمت اكتر لما قيت الى سايق العربية الولد الى كان جارى الى علمنى سواقة العجل فكرينه حسيت رركبى سابت ساعتها وكنت خلاص هعيط وكان منظر العربية معجون يرعب يعنى كل دة عشان كانوا عمالين يخمسوا بالعربية ويعملوا افشخنات وحركات مش عارفة اية سر اخر يوم فالامتحانات بتاعت الثانوية ان تحصل مصيبة فيه المهم يعنى بقى العيال طلعوا مالعربية الى متعور والى مغمى عليه والى نفوخه مفتوح ومناظر بقى المهم محدش مات يعنى. انتظروا نسمه وهيا في غرفة العمليات.................. في كل جمله تتكلم عن القطه :d اتلاقي القطه مبسوطه عشان اترحمت منك :d هو خلاص فاضل جزء واحد ونرميها بره :stickjo4: ونجيب حد تاني تابعونا |
مش عارف ليه الموضوع قلب قطط كده مرة واحدة "لدرجة نسيت هو الكلام كان علي إيه" :p:p:p بس ماشاء الله الذاكرة حديد أما نشوف إيه اللي هيحصل:049gc0::049gc0: متابع اقتباس:
اقتباس:
:d:d:d |
الله الله الله الله
بجد بجد قصة جامدة وانا اقول هي مسمية شارب نيلز ليه عشان القطة ام اربع قطط قولتيلي يا نسمة بقى كنتي متشردة وانتي صغيرة ؟؟ هههههههههههههههه الله بجد اسلوبك حلو جدا وطبعا دا شئ مش جديد علينا استمروا موضوع جميل جدا وتسلم يا محمد على الفكرة الرائعة دي :) |
هههههههههههههههه أيون صح هى دى نسمة اللى أعرفها بس نسمة هو انتى كان طولك كام وانتى صغيرة؟؟ بس بسم الله ما شاء الله ناسية عمرك كله يا نسمة :d هنسميكى نسمة تشرد :romarioxp6: على فكرة يا جماعة البت دى بتجرى ورا القطط فى الجامعة :d بجد أسلوبك جامد وجميل على الآخر منتظرة الجزء الأخير :slap1qk6: |
اقتباس:
هههههههههههههه ....................................... بجد حلوه اوى حكايتك دى يانسمه وعجبانى اوى حكاية القطط دى متابعه الجزء الأخير والموضوع جميل جداااااااااا |
يامحمد خلينى ارد عليهم
والله مش حيشنى غيره |
متــــــــــــــــابع
|
حلوه
بس مش عندي وقت اقرا بقية الردود ادوني فرصه 75 سنه كده |
فين باقي رحلة الكفاح التشردي :d
يلا عاوزين نعرف هي ماتت في اخر القصة ولا لاء:d |
لا بجد موضوع جاااااااااااااج موووووووووووووووت
بس ايه التشرد دة يا بت يا نسمه ال نسمه ال كدة اسمك مش لايق عليكى خاااااااااااااالص:d |
اقتباس:
ايمي انا عاملة اقتباس مخصوص عشان اقولك الكلمتين دول انا صعبان عليا اوي القطة الي في التوقيع بتاعك :d بقالها كام يوم كدا بتلف حوالين نفسها مش عارفة نسمة سكتالك ازاي :d انا بهدي النفوس |
اقتباس:
أنا بقى عاملة إقتباس مخصوص علشان أقولك ..الكلمتين دول كانوا لسه على لسانى:p وبجد يا نسمة لازم تورينا التشرد على البت اللى مشعلئة القطة دى .. ماتسكتلهاش يا نسمة أنا بقى مش بهدى النفوس .. أنا بهوى على الفحم :d |
عاوزين بقيت القصه يا نسمه ياللا
|
اقتباس:
لا ياستى انا مخلصة كتابى من الجلدة للجلدة قولى لمحمد هو الى معطله الطباعة قال اية بيعمل دعاية ويسخنلى الكتاب :av4056bb7jp3::av4056bb7jp3: |
هههههههههههههه ايه ده يا بنتى ايه التشرد ده بجد :slap1qk6: و لا القطط نفسى اجيب واحده بس شكلى حشيل الفكره دى يحسن تهرب منى زيك كده :rolleyes: يلا بس جميله فعلا :romarioxp6: فى رعايه الله |
نسمة واخدة فاصل طويل اوي
:p فين باقي القصة ايه النهاية دي ؟؟ كملوا بقى عاوزين نعرف اخرتها ايه |
اقتباس:
عاوزين نعرف ايه اللى حصل ياللا |
يت بقى فى نتيجة تالتة كانت ليلة زى ال..جبت النتيجة لقيت درجاتى متشحورة وكل مادة ناقصة فيها كتير وفالاخر المجموع عمل 94 بالمستوى الرفيع قعدت متنكدة بقى وقرفانة وزهقانة وحالى كرب ونكدت على نفسى وعلى اهلى وعلى مدرسينى كله يعنى مسبتش حد غير لما نكدت عليه وبعدين اكتشف فالاخر انى التالتة عالمدرسة كان نفسى اضرب نفسى بالقباقيب بعد المهرجان الى عملته دة وطلعت مالترتيب برضه مع انى فى تانية كنت الاولى بس بقى سبحان مغير الاحوال
وكان نفسى بقى اضرب نفسى قباقيب وجزم وشباشب وكل حاجة لما طلعت نتيجة التنسيق كنت نايمة ساعتها _على طول نايمة اصلى_ولقيت اختى الى فى طب دية دية اكبر منى ب3 سنين جيه تصحينى من النوم وتدينى ورقة وانا بتنرفز جداا لما حد يصحينى من النوم ومسكت الورقة كدة وعمالة اقولها مصحيانى من النوم اقرأ ورقة روحى العبى فى حتة قالتى اقرى بس وفوقى كدة المهم فوقت وقومت وببص كدة لقيت خير اللهم اجعله خير مكتوب كلية الالسن جامعة عين شمس وطبعا الكلية دية كانت حلم حياتى مقلكوش بقى عملت اية ومش هقول المهم بقى روحت عملت التنسيق الداخلى بتاع الكلية وعملت لغة اول انجلش والتانية المانى جالى انجلش لغة اولى والمانى تانية بس لقيت نفسى كدة مش ليا مزاج للالمانى قولت انا اخدت فى اعدادى فرنساوى وفى ثانوى المانى خلينى اجرب لغة جديدة فالكلية العب بيها قولت اسبانى واخترته لقيت الناس كلها بتقولى دة وحش ومش جايب تمنه حولت عبري ((اسرائيلى يعنى))لقيت الناس كلها بتقولى هتتاخدى امن دولة قولت لا وعلى اية احول بكرمتى مع انى كنت اعرف جمله بالعبرى احب اقولهالكوا((رجحانوم يافيش بتحوم))اظن فهمتونى محدش يسألنى يعنى اية عشان هقولكوا معرفش بس انا مرة زماااااااااان سمعت البرغوتى بيقولها وهما بيعتقلوه والجملة لزقت فى نفوخى مش عاوزة تطلع وبعدين قولت ماله الايطالى يمكن اترحل على ايطاليا واكل المكرونة بقى والبيتزا وهتنغنغ فالاخر استقريت على الايطالى وخلته واتكلت على الله ولقيته حلو والله ممتع اوى وبعدين بقى دخلت الجامعة وروحت الكلية اولى فولة بقى ولسة صغنونة وبركب الباص بتاع الكلية ويودينى لحد باب الجامعة بس اخر النهار مش بيجلنا الجامعة بيزلنا شوية لازم نروحله سرايا القبة عشان على كوتشه نقش الحنة فبركب المترو بقى تلت محطات بحس انى فالمولد ((انا والمترو)) دة قصة تاينة بقى المهم جيب بقى قابلت العيال بتوع النت الى عندى فالجامعة قابلت بنت كانت معانا فالمنتدى كان امها بيرو ((عبير))وبعدين قابلت منه الى هى مشرفة فلاسفة تحت التمرين وقابلت مها اسيل رزق وكمان هدير ديرو وهدير ماجدولين ودكتور سارة وجيجو الرهينة وفتاة الاسلام ونهال حبى واعتزازى كريازى لايدى النت بيتحيقلى دول بس يارب ما اكون نسيت حد كل ما ببقى عاوزة ازوغ من محاضرة اروح لمها نتشمس انا وهى فى اداب عندها وبقى صاحبت الكلية كلها الحمد لله والباقية تأتى وعرفت من كل الاقسام حبة من صينى والمانى وكورى واسبانى وايطالى بس دول الاقسام الى صاحبت منها وعملتلى شلة محندقة كدة على قدى وكل يوم ناكل من عند ميدو شاورمتوا تجنن وتوتة توتة خلصت الحدوتة حلوة ولا جميلة بقى ؟؟ وبتنتهى عند انى بكتبلكوا القصة الى ملهاش لزمة دية وسلام عليكم ورحمة الله وبركاته وبكده رمينا نسمه في اقرب محطه ونستضيف عضو تاني وتابعوا اول حلقاته من الغد ان شاء الله |
اخيرا هرد عليكوا هوريكوا بقى التشرد على اصوله
اقتباس:
وبجد بجد انا كدة فعلا ومكنتش واخدة بالى انى مفقوسة اوى كدة دول الكلمتين الكلوين الى قولتهم فى حقى يامحمد اقتباس:
بس انتى عرفانى بفتكر يوم وانسى مليون هو انا مخى دفتر يعنى بلا هم ياشيخة انا ماشية على مبدأ النسيان هو دوايا اقتباس:
انا اصلا عايزة عمرة نفوخى شكمانه وقع اقتباس:
انتى مش غريبة يابوسى انا بفتكر اساميكوا بالعافية |
يا سيدي
يا سيدي والله بجد قصة حياتك جميلة يا بت يا نسمة يلا عقبال ما تنزلي الجزء التاني ان شاء الله منها :) |
اقتباس:
زي بطوط كدة:d اقتباس:
ورينا ياايمى اكيد بقى هتقوللنا كنت بزاكر عاللمبة الى بجاز وانام عالحصيرة والحجات دية صح اقتباس:
وانا الى قولت ان انتى الى هتنصفينى ماشى يا.......... لينا ميل يلمنا :slap1qk6: |
اقتباس:
ماشى ياشريف لينا حساب اظن شردتك خلاص :stickjo4: اقتباس:
ركزى عشان مش تهيسى اقتباس:
يامحمود القطط دية روحى انا ممكن اكتب عنهم بالايام والليلالى اقتباس:
دية عدوى بقى وكانت منتشرة فالجيل اقتباس:
امال يانيدو انتى فاهمه الاسم دة مجبتوش من فراغ اقتباس:
اقتباس:
ماشى يامها انا تشرد يامتشردة انتى اقتباس:
ماهو مال سايب اقتباس:
ياخونة يادزم اما اشوفك انتى كمان اقتباس:
انا على فكرة بقت مركتى نسمة تشرد مبقاش يحوق فيا مش بقيت ازعل اقتباس:
احرجت حقيقى اقتباس:
انا نيسو نستينى ستك يابت وتاج راسك :slap1qk6: يلا يانيدو مستنية بتاعتك |
اقتباس:
قصتك حلوة يا تشرد ضحكتينى عليكى كتيييير مسلية اوى :d يلا اللى بعده :romarioxp6: |
الحلقه التانيه هند ( بشمهندسة المنتدي) قصة حياتي ... ههههههه جبي التايها يعني كان يا ما كان في سالف العصر والاوان يحكي ان .. ان وان .. بداية كدا انا مولودة في السعودية( ربنا استجاب لدعوة اختي الكبيرة ) اصلها ربنا يكرمها كانت بتقول لماما انا نفسي اجيب مروحة واطلع ربنا واقوله يا رب البيبي يطلع بنت ( كانت بتحبني الله يمسيها بالخير من قبل ما اتولد كمان يلا ربنا يسامحها ( فيها شئ لله من صغرها ) انا بقى حياتي متنقلة شوية في السعودية وشوية في مصر وشوية في مصر وشوية في السعودية كدا يعني .. ( هتقولوا ايه الفرق ) هقولكم ولا اعرف المهم ندخل في المهم ... كل الي فكراه من حياتي قبل ما ادخل المدرسة اني كنت طفلة شقية جدا ( انا الصغيرة بقى ) .. ومش كنت سايبة اي حتة في البيت في حالها ( لازم انكش في كل حاجة واطلع كل حاجة من مكانها) وماما بتحكيلي لحد دلوقتي .. بتقولي زمان لما كنتي صغيرة لما كنا نسمع صمت في البيت وهدوء نعرف انك بتعملي مصيبة ... كانوا بيتجهوا تلقائيا للمطبخ .. ويلاقوني بكل براءة عاملة حفلة وسط الدقيق والرز وعايشة حياتي .. لحد دلوقتي على فكرة ( انا الي بطلع الحاجات الي ضايعة في البيت) يعني تشرد الطفولة جه بفايدة الحمد لله طبعا احنا طول السنة كنا في السعودية .. ما عدا شهر ونص هو بس الي كنا بننزل مصر فيه .. كانوا شهر ونص بالنسبة ليا انا هو منتهى الحرية .. في ناس بقى وعيال بتعلب في الشارع ودي تعتبر مناظر جديدة بالنسبة ليا يا سلااااااااااااااااام كان عندنا قوانين في البيت .. تنزلي تلعبي من العصر لحد اذان العشا وترجعي علاطول ويا سلام لو اتأخرت نص ساعة ولا حاجة.. كانوا بيبعتوا ابن البواب ينادي عليا .. وادخل الشقة وانا مترقبة بقى هيقولوا ايه .. مش كنت بديهم فرصة صراحة .. كنت بقول ( ضرب لأ ) ... مع ان الحمد لله مش في ضرب يعني ولا حاجة .. بس هو دا الي كان في بالي .. او كنت معتقدة انها جملة الشفاعة.. كبرت الحمد لله وجه اليوم الي هروح فيه المدرسة وبابا كان مصمم اني ادخل وانا صغيرة .. دخلت وانا عندي خمس سنين ونص .. اتشغلت بدري بدري ومش اخدت حقي في الاستمتاع بالبطالة والقعاد في البيت ... انا طول عمري غير كل الاطفال .. يعني كل العيال وهما داخلين اولى ابتدائي يعيطوا اول يوم .. الا انا ... انا كنت فرحانة اوي ... وماما هي الي قعدت تعيط .. لاني اصغر واحدة بقى وكنت عاملة حس في البيت وهي هتبقى كدا لوحدها فترة الصبح ... الحمد لله كنت متفوقة في اولى ابتدائي ... مع اني كنت مطلعة عين ماما في المذاكرة .. وكانت بتجري ورايا في البيت عشان احل الواجب ... هههههههههه والله كانت ايام حلوة ... وياريته كان واجب صعب مثلا.. انا لحد دلوقتي فكارة واجب اولى ابتدائي دا بتاع القراءة بالذات.. كنا بتعلم الحروف العربي .. والواجب عبارة عن انك تلون الحرف الي اخدته في اليوم دا.. وتكتب الحرف عشر مرات ولا مش فاكرة كام مرة .. هو دا الواجب بتاعي الي كنت بكرهه وكنت شايفة اني خلاص بقى مش في حد قدي في الواجبات والارهاق وكتيييييييير يا عيني .. وماما تتحايل عليا .. يا بنتي اقعدي اعملي الواجب .. وانا اجري وهي تجري ورايا لحد الساعة 9 بليل خلاص اشطب من كتر الجري واقولها ماما انا عاوزة اناااااااااااااام .. وكباية اللبن .. و هب اقلب ... على السرير وانااااااام لحد تاني يوم .. ومع ذلك كنت بطلع الاولى دايما مش عارفة ازاي.. في المدرسة بقى كنت الحمد لله فضيحة .. كل اخبارنا كانت عند المدرسات .. لدرجة اني رحت قلت لمرة لابلة الحساب ... يا ابله دا بابا اشترى لينا امبارح اتاري وقعدت العب مع اخويا ههههههههههههههه مش عارفة كنت هموت واقولها كدا ... وفي مرة كانت حصة كدا الميس قعدت تسأل كل واحدة فينا مامتك بتشتغل ايه ووالدك بيشتغل ايه وجه دوري .. والدك بيشتغل ايه يا هند .. دكتور ... طيب ومامتك ... ماما ؟؟؟ وقعدت افكر شوية .. مش عارفة انا اقولها انها ربة منزل ووقتها كنت عيلة بقى مش عارفة الكلمة دي ... مش عارفة انا ايه جه على بالي وقتها .. واتهبلت في نافوخي .. قلتلها اه ماما ؟؟ ماما بتغسل اطباق ... ههههههههههههههه.. انا فاكرة يومها رجعت احكي لماما قعدت تضحك عليا وعلى هبلي ... |
| جميع الأوقات بتوقيت GMT +2. الساعة الآن 10:20 AM. |
Powered by vBulletin® Version 3.8.11
Copyright ©2000 - 2025, Jelsoft Enterprises Ltd.