السلام عليكم ورحمة الله
طبعا كلنا سمعنا عن كلية الطب لانها حلم وامل لكل شباب الثانوية العامة
طبعا فهي كلية من كليات القمة زي مابيقولوا
اليكم حكاية طالب دخل كلية الطب
طبعا جاب في تانية ثانوي مجموع عالي بلاش نقول عليه
كان حلمه هو وصاحبه الانتيم انهم يدخلوا سوا كلية الصيدلة
المهم اتجدعن قوي وذاكر وجيه في تالتة ثانوي وجاب مجموع اكبر الحمد لله
افراح عارمة في البيت والاهل الكل جاي يبارك الدكتووور الدكتوور زي مايكون داخل انتخابات
المهم جائت اللحظة الحاسمة؟
انه مكتب التنسيق سحب الظرف للرغبات والاتفاق انه داخل صيدلة
المهم والده كتب له البيانات الاساسية وسابلة الطوابع كي تكون هذه رغبته
المهم قعد يفكر بين الطب والصيدلة (الشخليلة ولا اليويو)
المهم وصل لقرار وان الطب فيه فلوس وبريستيج افضل من الصيدلة وفيه ابداع وخدمة للبشرية
وان الصيدلي زي مابيقولوا يعد كدة هاينسي الصيدلة ويقف يبيع بس
المهم توكل علي الله ولزق الطوابع طب انه الطب
طبعا صاحبة زعل منه فترة واعتبرها خيانة
راح قدم في مكتب التنسيق
المهم كانت الفرحة العرامة بدخوله كلية الطب
طبعا ماهو استخسر المجموع وكمان اول دكتور في العائلة
تلقي التهاني من الاهل والاصحاب

يتبع يتبع00000000

في الفترة اللي قبل دخول الكلية
فاضل شهر والناس بقي بتقابله يادكتوووور يادكتووور
طبعا بقي الاحلام ابتدت تيجي في دماغة
البالطو الابيض والسماعة والمستشفي
وقال اية بقي هايلاقي المستشفي فيها الاتي
دكتور ماشي مع تلاثة طلاب وبيمروا علي المرضي والمستشفي فاضية ونظيفة
ويقوله اتفضل يادكتور شوف اتفضل اسمع بالسماعة
المهم سال عن اسامي المواد اللي في سنة اولي
حتي مش عارف ينطقهم فسيولوجي هستولوجي بايو تشريح
طبعا تشريح
المهم جاب كتب من واحد صاحبة
وخدمة وادالة عظم طبعا مانمش طول الليل
ووالدة قاله يانا ياالراجل دة في البيت
يتبع

ايه يا دكتور انت بتحكى لمين

مشكور

د/ احمد
نتمنى المزيد

<div class='quotetop'>إقتباس(عاشق الجمال @ Aug 7 2006, 01:47 AM) [snapback]183660[/snapback]</div>اولا بشكرك علي مرورك يا استاذي
ثانيا اللي عايز يسمع ويستفيد يمكن يغير راية عن كلية الطب
او يكون فكرة صحيحة عن هذه الكلية

وحانت اللحظة الحاسمة
رايح اول يوم الكلية طبعا مانمتش طول الليل بحلم بايه اللي هايحصل بكرة
وراح الدكتور الكليه بطقم جديد بقي ومتشيك علي سنجة عشرة
طبعا رايح متاخر كعادته راح المدرج لقي ناس واقفين برة
سال محاضرة ايه دي ياجماعة قالوا له محاضرة هستولوجي
اية هستولوجي يعني ايه
طبعا هو مش فاهم ولا هما
المهم المحاضرة الاولي خلصت ومحضرهاش
المحاضرة التانية فسيولوجي
طبعا هو مش عارف يعني ايه
دخل دكتور قال السلام عليكم
وبعدين قعد ساعة يرطم بالانجليزي ولا احنا فاهمين حاجة
وفين وفين ساعة ماقال اية قرانيه (ومااتيتم من العلم الا قليلا)
ساعتها المدرج كله سقف وصفر وقعدنا كلنا نتكلم
ساعتها الدكتور لغي المحاضرة
يتبع


انتظروا اول يوم في المشرحة :blink:

متابعين يا دكتور

هتخوغنا ليه بس فعلا انا لما عرفت اسماء المواد اتخضيت
منتظرين اول يوم بالمشرحه علشان انا منتطر اليوم ده اوى أكيد هيبقى ممتع جدا

<div class='quotetop'>إقتباس(fethaghors @ Aug 7 2006, 11:32 PM) [snapback]184878[/snapback]</div>متشكر لمرورك يادكتور وان شاء الله انتظرو الحلقة اللي جاية

موضوع جميل ومبشر الحقيقة :D
انا علمى رياضة على فكرة

ونننتظر باقى الحلقات :rolleyes:

54959ونزل جدول السكاشن وقال ايه مكتوب فيه مشرحة يوم الاحد والثلاثاء
طبعا قعدت احلم بيوم الاحد
وطبعا نزلت اشتريت بالطو ابيض وايه كنت سعيد جدا كل شوية اقوم البسة وابص في المراة
المهم حانت اللحظة الحاسمة
جاء يوم الاحد وصممت اني اروح بدري بقي المرة دي
المهم فيه كارنيه لطلبة الفرقة الاولي بيدخلوا بيه المشرحة
اول مادخلت طبعا كانت عنيا بتبحلق شمال ويمين
وطبعا بيني وبينكم ماكنتش خايف لكن كان ليا زمايلي خايفين
دخلنا من الباب في طرقة طويلة علي الجانبين فيه زي معرض( لجارات) ودي عبارة عن عبوة زجاجية كبيرة في داخلها اجزاء من جسم الانسان يعني النصف الاسفل لوحده الجزء العلوي راس واحد محفوظة في سائل بداخله
وكان فيه مفاجاة جنين ميت في هذه الجارات
وطبعا مش عايز اقولكم علي الريحة الفظيعة اللي شمتها اول مادخلت ودي مش ريحة الجثث للاسف زي رية وسكينة
دي كانت ريحة مادة الفورمالين اللي بتحفظ فيه الجثث
المهم واحنا ماشيين في الطرقة سامع وانا ماشي بنات عمالين يغمي عليهم
واللي بتعيط واللي منقرفة قوي
كل دة مادخلناش القاعة اللي فيها الجثث
وطبعا كل ماامشي جنب بنت مغما عليها اعمل نفسي مش واخد بالي لانهم للاسف طخان جدا بالنسبة لي
ايوة انا وزني 59 ك
وهي شوفوا كام بقي
وحانت اللحظة الحاسمة لحظة مادخلنا القاعة
دخل الدكتور طبعا قاللنا اللي مش لابس البالطوا يلبسة
وكشف عن الجثة وطبعا هابقي احكيلكم اية اللي حصل
يتبع

حقيقى جميلة يا دكتور احمد

وننتظر باقى اليوميات والى الامام دائما

<div class='quotetop'>إقتباس(نغم البحر @ Aug 8 2006, 06:18 PM) [snapback]185699[/snapback]</div>متشكر لمرورك يااحلي نغم

شكرا يا د. احمد

وننتظر المزيد

وحانت اللحظة الحاسمة
الدكتور كشف الغطاء عن الجثة طبعا
الكل كان مزهوول
وطبعا الرائحة ماتتوصفش
المهم طبعا اننا كنا حوالي 100 طالب
حول طرابيزة صغيرة
يعني تقدر تقول اكاد اكون شايف طشاش
والزميلات المحترمات لهم نصيب الاسد لانهم طبعا معاهم حصانة ولو قربت منهم تروح في داهية
ممكن تلبس في جوازة تخليص حق
طبعا هما لافين حول الجثة الدكتور قعد يشرح
والجثة عبارة عن انسان نايم
والجلد متشال من الجزء المراد رؤيته
يعني لوالقدم تكون متشرحة علشان نشوف العضلات اللي تحتها والاعصاب والاوعية
المهم الدكتور ورانا العضلات واساميها
طبعا مكنتش شايف قوي
جيبت كرسي ووقفت عليه
ماشوفتش بردة من عدد الناس اللي في الدور التاني
جيبت طرابيزة وحطيت عليها كرسي
ماشفتش بردة علشان الناس اللي في الدور التالت كانوا كتيير
اعمل اية اعمل اية
ممكن حد يوقلي؟
يتبع0000000؟

شكرا قوي يا دكتور

انا كمان حمر بالحاجات دي من اول السنة

اصل انا السنة الجاية في اعدادي اسنان

ياعم اسلام اسنان دي دلع خالص
وبعدين انت لو دخلت المشرحة هيبقي عظم بس مش عالجثة خالص

أنا معاك يا دكتور في اللي أنت قولته







بس ياريت تحكي الأيجابيات اللي في الموضوع وبعض السلبيات لأنه طبعا مش كله سلبيات

وأنا باقول الكلام ليك يا دكتور عشان ترغب اللي عايزين يدخلوا الكلية فيها مش تخوفهم منها

وبعدين أسمحلي يا دكتور حكاية أن ماحدش فاهم حاجة من الكلام دي بتكون في الأول بس لكن هو بالكتير شهر وكل المصطلحات تبقى سهلة وبسيطة لأن أي حاجة لازم طبعا في أولها تكون صعبة وأظن أنك موافقني في الكلام دة

لأن أنا نفسي جاتلي عقدة نفسية أول مادخلت الكلية بس بعدين عادي جدا



أخوك خالد داخل تانية طب بشري

اهلا بيك يا د/ خالد
والله انا سعيد بمرورك
بس والله انا بقول الكلام دة للي داخل كلية الطب علشان يعرف بس ان لو هو ماكافحش واتعلم
متحدش هايقوله تعالا انت مش بتحضر ليه او بتشوف ليه
يعني ايجابيات الكليه اظن معروفة لانها اسمي مهنه في البشرية
ثانيا بخصوص محدش فاهم حاجة بتبقي فترة في الاول ياريت بس الطالب ماتطولش معاه هذه الفترة يعني مايقعدش لحدال20%
وشكرا

شكرا على هذا الكلام الرائع
وعلى العموم انا عارف كتير منه بس فى كلام كتير مكنتش عارفه.
اعرفكم بنفسى::::الاسم : هيثم ابراهيم رجال.
المهنة::::::::::::طالب.
السنة الدراسية::داخل سنة اولى.
الكلية::::::::::::الطب.
الجامعة:::::::::المنصورة.
الامنية ::::::::: ربنا يسترها معانا وربنا يوفقنا.
اتمنى ان تكمل هذه الحلقات المثيرة
وشكرا............................................. .............

اهلابيك يا هيثم
وان شاء الله ربنا يوفقك في طب المنصورة
ليا بنت خالتي معاك في سنة اولي
بس المنصورة صعبة شوية
ذاكر كويس

ردك طبعا متميز يا د/ أحمد( مع أني مش باحبذ حكاية الألقاب دي)

بس أنا من رأيي يا دكتور يعني أن أنت تعرض المشكلة وتعرض الحلول بتاعتها عشان بس ماحدش يتعقد خصوصا يعني أن أحنا معانا في المنتدى ناس كتيرة داخلة طب زي هيثم وفيثاغورث وغيرهم وغيرهم

بس هي دي الفكرة اللي أنا كنت عايز أوصلهالك يا أحمد (وخليها أحمد وخالد و كدة يعني طبعا لو سمحتلي يا د/ أحمد)
وبعدين أنا من اللي سمعته أن طب بيطري أصعب كتير من طب بشري

وربنا مع الجميع

الصراحة مافيش ياخالد حاجة سهلة
لكن صعوبة طب بيطري انه بيدرس كائنات كتيير
لكن اللي عرفته من اصحابي
ان حتي اسامي العضلات والشرايين والاوردة واحد سواء في الانسان اوالحيوان

أنا فعلا أعرف ان الى بيدرسوه فى بيطرى ميختلفش كتير عن بشرى

والله يا أحمد أنا باقول اللي سمعته

يمكن فعلا زي ما انت بتقول كدة أن الصعوبة في زيادة الكمية والمواد

وانت ماقولتليش يا عم أحمد أنت في سنة كام

وأنت يا فيثاغورث ماقولتش أنت هاتدخل عين شمس ولا القاهرة

أنا دخلت خلاص
عين شمس
هو أحمد فى ايه ؟

انا في اخر سنة طب طنطا
يعني فاضلي ان شاء الله 3 شهوور واخلص ادعولي

ياااااااااااااااااااااااااااااااااااه
3 شهور
انا فاضلى 6 سنين بإذن الله.
ربنا يوفقك
عايزينك دكتور ناجح.
بس لا تترك هذا المنتدى الجميل .
وعايزينك تضع كل النصائح الطبية التى تفيد الجميع.

<div class='quotetop'>إقتباس(haitham2005 @ Aug 15 2006, 11:01 AM) [snapback]190574[/snapback]</div>انا بشكرك يا دكتور وربنا ان شاء الله يوفقك
ماتخافش السنين بتعدي بسرعة

أن شاء الله من الأوائل يا دكتور/أحمد


ويا ريت ماتسيبش المنتدى زي ماهيثم طلب منك

وربنا يصبرنا لحد ما نوصل سنة سادسة طب


بس أسمحلي أحييك يا أحمد أنك في سنة سادسة ولسة فاكر ذكريات سنة أولى


وليا سؤال هي سنة سادسة كام شهر بالظبط عشان ناس بتقول سنة وناس بتقوول سنة ونص

شكرا والى الامام

شكرا ليكم جميعا
لخالد
ولعاشق الجمال
ان شاء الله ربنا يسهل والظرووف ماتجبرنيش اني اسيب المنتدي
وبالنسبة لسنة سادسة دي بتبدا في شهر 11 وتنتهي في شهر1
يعني سنة ونص
اما بالنسبة لاني فاكر الزكرياات لانها فيها فعلا معاناه جامدة قوي
وان شاء الله هاحكي لكم الشفوي

أحكي يا أحمد على الشفوي

وأنا ممكن لو سمحتلي أحكي عن العملي بتاع الAnatomy بس

ياريت يا خالد والله
وباذن الله ادوني مهلة بس مشغول اليومين دول بس

يا راجل أذا كان التفكير والكتابة هايعطلوك عن المذاكرة بلاش منهم دلوقتي

المذاكرة أهم دة أنت في البكالوريوس يعني أكيد مش فاضي

أمال هاتطلع الأول أزاي

وعلى العموم هانت هي كلها 3 شهور وتخلص خالص

يلا ربنا معاك



<div class='quotetop'>إقتباس(fethaghors @ Aug 14 2006, 09:44 AM) [snapback]189372[/snapback]</div>على العموم أنا ليا أصحابي في عين شمس طب برضه بس دفعتي (داخلين سنة تانية)

وأن شاء الله ممكن أشوفك هناك يا هشام

السلام عليكم
هبدا اليوم في رواية عن امتحانات كلية الطب
انهاردة اول يوم في الامتحانات
انه يوم امتحان مادة الفسيولوجي
رايح الامتحان خايف طبعا مش مذاكر قوي الصراحة يعني
استلمت ورقة الاسئلة نظام غرييب شوية
قريت الاسئلة كانت اختيار من متعدد واكمل
المهم الاختيارات دي كانت صعبة جدا
الصعوبة تكمن في وجود مترادفات يعني اختار الكلمة الادق حاجة غريبة انا اصلا مذاكر علي خفيف يعني قشوور
وهو عامل اختبار لغة عربية
المهم دة كان 20% فزي ماتقولوا ماقلقتش كانت درجاته بسيطة بس كان فيه كافتريا تحتينا كانت مشغلة اغنية لعمرو دياب كانت بتقول ااااااااااااااااااه بعد الليالي
انتظروا اول يوم شفوي
مسخرة
يتبع

السلام عليكم
أختكم أسماء في صيدلة الإسكندرية و خلصت إعدادي و رايحة أولى
على فكرة أنا بحمد ربنا من أول يوم دخلت فيه الكلية دي لإني جبت مجموع كبير أوي في ثانوي و مع ذلك رفضت كلية الطب على الرغم من ان أخويا خلص رابعة و رايحة خامسة طب ان شاء الله.... الرفض ماجاش من صعوبة الطب لإن كل كلية و أكيد ليها مشاكلها و حسناتها بس الفكرة في الرفض كانت عشان طول مدة الدراسة.... صعوبة وجود الشغل بعد انهاء الدراسة .... تعرض البنات أثناء الدراسة للكشف على رجالة و ده أكيد بيسبب إحراج كبير :rolleyes: .... و طبعا ده غير الاسباب المتعلقة بالمستقبل زي الإرتباط و الجواز و غيره ................يا أحمد جميل منك أوي انك بتدخل على السايت ده و متابع مع إخواننا الغلابة المعذبين في الثانوية العامة و جميل منك أوي برده انك بتكتب عن الكلية دي مع إنو صدقني طب صعبة و امتحاناتها متباعدة جدا في جامعة إسكندرية بس صيدلة مش هينة أبدا و اللي يشد على نفسه في المذاكرة في أي كلية ينجح و يرتب كمان....... :D .... أكيد طبعا بما إنك خلصت كل السنين دي بتبص لسنة أولى على إنها كانت سهلة جدا أنا أعرف ان تالتة صعبة جدا فارما و ميكرو و أرف جامد أوي ده غير رابعة اللي بيدرسو فيها رمد و أنف و أذن و غيره (ربنا يحفظنا جميعا) :rolleyes:

يا ريت تتابع الموضوع و تورينا عملت ايه في كل السنين :D و ادعيلي بالنجاح يا دكتور

سؤال هام للولاد فقط....... لو انت عيان أوي حاتروح لدكتور و لا لدكتورة ؟؟؟؟؟؟؟؟؟؟؟؟؟ حاتستريح لمين أكتر؟؟؟؟؟ أنا شخصيا بفضل الدكتور

مشكور يا دوك ميدو يا حبي موضوع جميل وانتظر لك الباقي


الحمد لله رايح اعدادي صيدلة :P :D

وهكون مع هيثم في الجامعة الباين لاني منصورة :D

يلا ربنا يعدلها ونعمل حاجا ان شاء الله

<div class='quotetop'>إقتباس(*muslima* @ Aug 24 2006, 10:02 PM) [snapback]200410[/snapback]</div>اولا سعيد بمرورك جدا يادكتورة
ثانيا انا افضل اكشف عند دكتور لان للاسف مش لاقي دكتورة شاطرة علي الاقل من النادر لما تلاقي دكتورة شاطرة عمليا ولس نظريا
بالنسبة لاصعب سنة كانت رابعة لانها مواد صغيرة لكن امتحانتها جات غلسة
ابقي تابعي لسة فيه امتحانات غريبة

<div class='quotetop'>إقتباس(*muslima* @ Aug 24 2006, 10:02 PM) [snapback]200410[/snapback]</div>اولا سعيد بمرورك جدا يادكتورة
ثانيا انا افضل اكشف عند دكتور لان للاسف مش لاقي دكتورة شاطرة علي الاقل من النادر لما تلاقي دكتورة شاطرة عمليا ولس نظريا
بالنسبة لاصعب سنة كانت رابعة لانها مواد صغيرة لكن امتحانتها جات غلسة
ابقي تابعي لسة فيه امتحانات غريبة

محمد البري
حبيب قلبي وبس
بدون تعليق

عندك حق يا دكتور أحمد (خايفة أقول أحمد بصراحة) :blink:
أنا بفضل الدكاترة الرجالة بحس انهم متفرغين أكتر لشغلهم و حريصين عليه أكتر من الستات و دي من أهم الاسباب اللي خلتني دخلت صيدلة ........
ربنا معاك يا محمد صيدلة كلية تمام

متابعين معاك و لو اني عارفة ان الشفوي حايبقى تحفة :D :D :D

اليوم هو اول امتحان شفوي في الكلية
رايح مذاكر بس ماعرفش هادخل لمين من الاساتذة
بيخوفونا من دكتور اسمه السروجي
المهم اسمع انه كان عميد الكلية سنة70
وراجل كبيير ومعقد وبيديك القلم تحط صفر لنفسك
المهم رحت يومها مستحمي ومذاكر ومزبرنشق
طول الطريق بنهزر انا واصحابي
رحت لاقيت رقمي مع الدكتور السروجي
كنت هامووت
المهم كنا حوالي 20 عنده
الناس كلهم خلصوا الا لجنتنا لسة اول واحد بيمتحن عنده
المهم الواد خرج بنساله سالك في اية قالنا هما 3 اسئلة
واحد يخرج والتاني يدخل نفس الاجابة
المهم دخلت للراجل دة لاقيت راجل كبيير قوي اسمر قصير جدا
لابس حمالات علي البدلة
المهم قالي بص عايز اسالك سؤال من 60ولا 3اسالة كل سؤال من20
اختيار صعب المهم قلتله بلاش مجازفة 3 اسئلة
قالي السؤال الاول 00000000؟ عارف ولا مش عارف اقوله عارف
يقولي يابني ماتتعبنيش معاك عارف ولا مش عارف اقوله عارف
يقولي هانشوف
السؤال التاني 00000000000 عارفة اقوله ااه يقولي ماتتعبنيش معاك
المهم السؤال التالت 000000000 عارفة اقوله ان شاء الله
قالي يلا جاوب
اجاوب يقوم قايل انت مذاكر من اين اقوله من كتاب القسم يقولي وراحت فين الكتب الكبيرة
المهم جيت في اخر سؤال فنسيت حته لاقيته بيقولي ياعم قول نسيت جلا من لايسهوا
قاللي الوحيدة اللي ماتعبتنيش هي البت دي وشاور علي واحدة قاعدة قلتله واديتها الفول مارك
قاللي يابني مابديش لحد الفول مارك
المهم قاللي قوم
دخل واحد صاحبي من اصحاب الرؤس العالية
قاله نسبة مادة كذا في الدم قد اية
قاله40 قاله اربعين اية قاله 30 قاله مشع عارز رقم عايز تمييز
قاله200 لتر
قالله ليه دة دم الانسان كله5لتر اية دة دم فيل
انت بتشتغل اية ميكانيكي سيارات
قعد يشتم فينا كلنا انت هاتطلع طعمجي وانت عربجي وانت ميكانيكي
اطلعوا ياغجر كلكم برة
واحنا بنضحك هههههههههههه
رئيسة القسم دخلت له بتقوله وريني الدرجات قالتله اية يادكتور دة انت بتحطها من جيبك
قالها اعملكط اية عيال اغبية اعلي واحد جايب 9 من 60
دة كان انا والحمد لله
المهم قالتله ارفع الدرجات شوية
والحمد لله جبت فيها تقدير ازاي مااعرفش
يتبع

أحنا عندنا كانوا بيهزقوا برضه بس ماكنش فيه طعمجي وميكانيكي وسباك

أنا يوم الشفوي بتاع التشريح اللي هي أول مادة شفت دكتور لابس شبشب وبنطلون قماش ومطلع القميص برة وعنده بتاع 60سنة برضه

أول ماشفته من برة قبل ما أدخل قلت يارب يارب مادخلش للدكتور دة والحمد لله أنا دعائي مقبول على طول

طبعا دخلت لقيته في وشي بس الحمد لله طلع راجل كويس (مش أوي يعني)

بس كانت جمبنا دكتورة على طول كدة تقول للي بيدخلولها بعض ما يخلصوا: قوم قوم يا غبي قوم يا حمار

دة في واحد قالتله (معلش سوري في اللفظ اللي هاقوله دة) بس والله هي اللي قالتله كدة: قالتله قوم يلعن أبو شكلك وطبعا كله مسخسخ من الضحك

جميله اوى اليوميات يادكتور احمد وياريت تكملها
وربنا مايحرمنا من حضورك الجميل

<div class='quotetop'>إقتباس(ميتاب @ Aug 30 2006, 04:37 PM) [snapback]205932[/snapback]</div>ميرسي لحضورك ياميتاب وجزاكي الله خيرا علي الدعاء
بس اني اكمل او ماكملش معلش مش هاقرر دلوقت

جميلة اليوميات دى خصوصا انها فيها مواقف كوميدية

الله يكون ف عونكم يا دكاترة ما كنتش متخيل ان الوضع غريب بالشكل ده

دكتور احمد انا هاسألك سؤال

هتاخد كام لما تتخرج وامتى مرتبك هيزيد ويا ترى هيزيد قد ايه

سؤال مؤلم اهو

<div class='quotetop'>إقتباس(اينشتاين @ Aug 31 2006, 08:59 AM) [snapback]206583[/snapback]</div>

بصراحة يا دكتور روووووووووووووووووووووووعة


و ربنا يستر ع الطب من الاشكال دي

انه يوم امتحان التشريح
جاي مذاكر كويس الحمد لله
واستلمت ورقة الاجابة
قريتها ففيه سؤال عارفه كويس قلت ابتددي بيه علشان يشجعني
اذ بي افوجأ اني مش فاكر ولا كلمة من السؤال دة المهم قلت خش علي بعده
مش فاكر مش فاكر مش فاكرررررررررررررررررررررر
اعمل ايه بقي قعدت اضحك والله
المهم سميت الله وباعصاب هادية جدا جبت الامتحان من تحت لفوق المهم سؤال سؤال كدة حليته والحمد لله افتكرت
تاني يوم بقي امتحان المشرحة
مسخرة هههههههههههههههههه
بندخل الصبح بدري حاطين في طرقة طويلة طربيزات صغيرة وعلي كل طرابيزة جزء من الجتثة وعلينا نقول اية دة واسم الحاجة دي اية
المهم فيه واحد قوامي وواحد ورايا ولما نخلص الدكتور يقول change ونغير
المهم اللي قدامي الدكتور يقول شينج الواد مش عارف حاجة يقول بصوت عالي بليييلة بليييلة
واحنا نضحك الدكتور يقوله بس يابني يقوله اطردني احسن هههههههههه
المهم جاء امتحان الشفوي لاقيت واحد صاحبي خارج بقوله عملت اية قاللي
انا قلتلها باللي عملتيه دة انتي كدة خسرتي دكتور
يتبع