انجدووووووونى
 

النهارده كان اول محاضره ميكانيكا لاولى علوم طبيعيه ومش فهمت حاجه لانها متجهات ونا مش فهماها من السنه الى فاتت ياريت الى كتبها وفهمها ينزلها بالشرح لانى مش عارفه اذاكر منين ومش فاهمه اصلا عشان اذاكر

انت مش فاهمة متجهات امال المحااضرات الجيه تعملي ايه فيها احسن حاجة تحولي الي قسم تاني اوي حولي كليه تانية

انا حاطه الموضوع عشان الى عنده حاجه تفدنى يقولى مش للتريقه وعموما انت عايزنى احول ايه جيولجيا الى مالهاش مستقبل ولا اروح حقوق انا جايبه 382 فى الثانويه انت جايب كام عشان التأليس دا كله

انت احسن حاجة انك تروحي لمدرس الرياضيات بتاع الثانوية وتخليه يشرحلك الجزء اللي يفيدك احسن
وانا والله محتار في الإنجليزي اللي بندرسه ده يعقد والفاظ غريبة
وجربي تذاكري وتقراي مرة واتنين وهكذا ...
وربنا يوفقنا جميعا

مرسى ياجماعه جدا لمعلوماتكم( بغض النظر عن التريقه الى حصلت )انا جبت كتاب السنه الى فاتت وبتابع منه وشكرا مره تانيه

اهلا بيكى يا اية معانا ف الكلية و ف المنتدى
على فكرة انا كنت زيك كده ف اول مجاضرة ميكانيكا لانى مكنتش بحب المتجهات ف ثانوى و مكنش ينفع احضر ف مجموعة تانية عشان نفس الدكتور هو اللى بيدى مجموعتين و التالتة كانت فى نفس ميعادى و الدكتور كان بياخد الغياب .. اسمه دكتور اسماعيل ( يا رب ميكونش هو اللى بيديكى ) و الحمد لله لحسن حظى ( بتريق على نفسى ) انه كان بيدينى الترمين بس متقلقيش من حاجة خالص حاولى تقرى المحاضرة مرة كمان او لو تقدرى تحضريها مع دكتور تانى يكون احسن او تشوفيها من كتاب ثانوية عامة زى ما انتى عملتى بس حتلاقى نفسك متلغبطة شوية بسبب الانجليزى و العربى بالرغم من انك بتقرى نفس الكلام ب معلش عبال ما تتعودى و كلنا كنا ف الاول كده مش عارفين نفهم حاجة بالانجليزى بس بالتعود ان شاء الله حتلاقى الموضوع بقا عادى جدا وسهل و مش بتحتاجى تترجمى لان الكلمات بتكرر كتير و الكتاب لما ينزل ممكن يفيدك شوية
سورى انى طولت عليكى معلش انا رغاية شوية بس انا حسيت انك قلقانة اوى فحبيت اطمنك شوية و صدقينى والله المشكلة دى قابلتنا كلنا اول ما دخلنا .. انت بس متزعليش نفسك و لو حبيتى تسألى عنى اى حاجة حتلاقى كله هنا ف خدمتك انتى تؤمرى بس

ربنا يخليكى هو الى خلانى مش فهمت ان هو عطى محاضرتين مرتبطين ببعض ونا مش حضرت اول محاضره والمحاضره التانيه روحت متاخره فدا الى خلانى متوتره ومش فاهمه انا مش عارفه اسمه ايه بصراحه بس يارب مايكونش اسماعيل

انا اكتشفت ان كل الناس مش فاهمه فرحت اوى ان العيب مش فيا الحمدلله بس الدكتور هو الى مش بيفهمنا

اسمه ايه الدكتور اللى بيديكى يا اية ؟؟؟

مش عارفه اسمه بس كمان بتاع البحته مش فاهمه منه برضوا وكمان العيا ل الى جنبى اسمه مصطفى فهمى تعرفيه

ممكن يكون صح كلامك انا بتابع دلوقت مع سكشن الرياضه معيدين ميه ميه بس ياخساره وقتهم صغير وبالنسبة للكتب انا معرفش حد اكبر منى فى الكلية بس فى ورق نزل فى المكتبة بتاع كيميا حلو مستنيه تنزل الرياضه كمان لان هى اكتر ماده مخوفانى ربنا يستر ادعيلى

اه طبعا اعرف مصطفى فهمى لانه كان بيدينى السنة اللى فاتت الترم الاول وفعلا مش حتفهمى منه حاجة خالص لانه مش بيعرف يوصل المعلومة للطالب غير انه بيكلم انجليزى كتير .. احب بس اعرفك معلومات عنه دكتور مصطفى فهمى ده كان عميد سابق للكلية وعمل مشاكل و نزلوه دكتور تانى و معروف عنه الشدة مع الطلبة و مفيش تهاون ف المواعيد او الهزار ف محاضرته و خلى بالك لازم تحضرى محاضرته لانه بياخد الغياب و بيراجعه و بيفضل ينادى على اسم اسم يعنى مينفعش حد يكتبلك اسمك ومتكونيش حاضرة لانه حيتمسح و هو بيهتم جدا بالحوار ده .. فى حاجة تانية بس مش لازم اقولك عليها عشان متتخضيش يمكن تعرفيها لوحدك احسن ... اسألى يا اية على دكتورة ايمان حمد الله بتدى حد من المجموعات التانية ولا لأ لانها دكتورة شاطرة وحتفهمى منها كويس ده بالنسبة للبحتة و يا رب تلاقيها بتدى وميكونش ميعاد محاضرتها ف ميعاد محاضراتك زى ما عملوا فينا السنة اللى فاتت و كنا محتارين بينها عشان نفهم وبين مصطفى فهمى عشان الغياب
ربنا معاكى ويوفقك ان شاء الله

فعلا يا اية .. ترافل عندها حق ف الكلام ده لانه بيحصل كتير جدا وده المنتشر و تلاقيهم هما ف الاخر فاهمين و بيذاكرو و جايبين تقديرات و عن تجربة الكلام ده

اه انا سمعت عن دكتورة ايمان 3\4من الدفعة بيحضرولها المدرج بتاعها بتبقى الناس فوق بعض مجموعتى فى ناس كتير مش بيحضروا لكدتور مصطفى وبيرحولها عشان بيكون نفس المعاد بس انا عملت خطه عشان الغياب هحضر معاه اول ساعه وهما الاتنين بيعملو بريك مع بعض فى البريك اروح عند دكتور ايمان لانها بجد سمعت انها جامده

بجد شكرا ليكم جدا وشكر خاص لtravelوlovely girlبجد اجدع بنتين هنا ربنا يوفقوا فى الكلية الى ملهاش اول من اخر بس انا بحبها وان شاء الله هجتهد وبعد نتيجه نص السنة هحط تقديراتى فى كل المواد (وخاصة الرياضة ) وجنبها شكر ليكم لانى سمعت كلمكم ودلوقتى فهمت كل الى مش كنت فاهماه بجد انا سعيده جدا انى ابتديت امشى فى الكلية واحل مسائل وكدا ونفسى اتفتحت انى اذاكر

اكتر من 3/4 الدفعة كمان يا اية بيحضرولها لانها بتفهم الطلبة كويس و طبعا المدرج بيبقى مليان على اخره
و فعلا احنا كنا بنعمل كده نحضر جزء مع مصطفى فهمى و جزء معاها بس مصطفى فهمى كان ساعات بيعملنا مفاجات زى انه ياخد الغياب بعد البريك او ياخده قبليه ويراجعه بعده بحيث ان محدش يزوغ
ربنا معاكى ان شاء الله


لا شكر على واجب يا اية احنا كلنا اخوات و ف خدمة بعض .. شوية وحتلاقى نفسك ماشية كويس اوى ف الكلية
و ربنا يفتح نفسك ع المذاكرة اكتر و اكتر و احنا معاكى يا رب

ههههههه ساعه وصل ch2لاسحر ولا شعوذه دى ناس عجيبه عارفه انا لما نويت اذاكر لقيت بيبان بتتفتحلى خالى جالى من يومين وقالى لو فى حاجه وقفه معاكى فى الكليه قوليلى فى اتنين صحابى معيدين فى علوم وهخليهم يشرحولك الى انتى عايزاه فرحت اوى وقررت انى استغلهم ابشع اسغلال ههههه بالنسبه للنت اه انا بعد كتير بس عشان لسه مافيش مذاكره ولا كتب بس لما الكتب تنزل مش هعد كتير ان شاء الله وربنا يسهل