|
الامتحان جيد للطالب فوق المتوسط - و الوزير الحالى أفضل وزير فى العقد الأخير
السلام عليكم
أولا هذه ليست أخلاق طلبه ثانيا وزير التربيه و التعليم خريج هندسه عين شمس بتقدير امتياز يعنى احسن من اى طالب هنا على الاقل من الناحيه العلميه و الاكاديميه ثالثا امتحان النهرضه الطالب فوق المتوسط يجيب فيه 21 السؤال من الاول للثالث سهلين بس محتاجين وقت فى الحل حوالى ساعه و نص للطالب اللى هو يعنى بطىء أوى كده يبقى معاك 19 درجه من 25 السؤال الرابع أ - موجود زيه فى الكتب بس حيأخد وقت شويه يعنى لو طالب عادىممكن يأخد فيه باقى النصف ساعه يبقى كده معاه 22 درجه أنا قلت الطالب فوق المتوسط يجيب 21 على اعتبار انه ممكن يتلغبط فى رقم أو اتنين فينقص درجه فى المتوسط ====== السؤال الرابع ب حله فى حوالى نص صفحه بس الصيغه بتاعه السؤال موجهه للطالب الذكى و غالبا السؤال ده طلبه علمى رياضه حتعرف تحله بسهوله فيبقى 3 درجات للطالب المتميز ( حوالى 12% من الامتحان ) ========= و هو د ه الكلام و بالمناسبه انا طالب فى بكاليروس هندسه قسم اتصالات و السنه بتاعتى برضه 2004 - مان الامتحان صعب الفرعين و الناس قعدت تصوت و تلطم كالعاده و الحمدلله أنا جبت 50 و فى رياضه اتنين جبت 49 عشان مكنتش مركز فى امتحان الميكانيكا اخر ماده قيريت بقى يا اما تتكلموا بأدب أو احترام أو اما مش تتكلموا خالص الويزر ده من وجهه نظرى أفضل وزير جه فى العقد الاخير ( بدءا من سنه 1995 لما تم جعل الثانى و الثالث الثانوى ثانوى عام ) اما بقى اللى بيقول مش عارف حل نص الامتحان و سؤال و لا اتنين فده سورى طالب فاشل و غير كده كمان عيب و حرام بجد جوه الخنقه و الاعصاب اللى انتوا عاملينه ده بجد كده انتوا بتوزترزا من بعض ممكن طالب شاطر و يجيى فى الامتحان يعيط بس عشان شاف اسئله صعبه يتوتر ميعرفش يحل أو يغمى عليه |
ويريت عشان محدش يرد و يعمل نافسه حكيم زمانه - أو حد تانى يرد بقله أدب
لو انت مكان الوزير حتعمل ايه !!؟ هل حتأمر بوضع امتحان سهل جدا كل الطلبه تحله!!!؟ كل الطلبه يعنى تخش هندسه و طب و هما اصلا مستواهم ضعيف ( لأن الامتحان سهل فاللى حيحله الطالب اللى هو بالكاد بيقدر يستوعب الرياضه ) و يخرج لينا جيل من المهندسين و الاطباء الفشله !!!! و لا الامتحان كله صعب !! محدش يقدر يحله و لا حتى المتميز و لا من ده على ده و زى ما وضحت هو بس س3 درجات للطالب المتميز و باقى الامتحان ينفع كله للطالب المتوسط و فوق المتوسط بس أنا حاطط احتمال لأن أى حد يتلغبط فى ارقام أو خطوه أو حاجه =========================== |
الامتحان كان كويس بس انا التوتر ضيعنى
انا حليت الامتحان لما روحت |
للفوق متوسط كويس انك قولتها بس هو صعب اوى وكان عوزا وقت اكبر بتقول لو طالب متوسط يحل سؤالين فى الساعتين وكدة نبق وقعنا 5%من المجموع ياريت لو سمحت تتكلم عن نفسك انا مظونش انك معانا فى نفس السنة لان الية فى الهم غير الى مش فيه انتة مش بتشوف اللجن زى الطين واحنا اعدين ميتين على كل درجة بتوقع مننا ولمعلومتك الطلاب الى فوق متوسط وقعين بردو مطلعين النواتج معظمها غلط
|
و معلومه تالته كمان طلبه ثانويه عامه اللى بيقفوا الفيزياء و الكيمياء و يجيبوا مش عارف
100% و 99% معظمهم بيدخل هندسه و منهم اللى بيدبلر أول سنه و تانى سنه و منهم اللى بيجب مقبول و اللى بيشيل مواد ده لأن نظام الثانوى العام أصلا غلط لازم الامتحانات تبقى كلها تفكير انت لما تواجهك مشكله فى الشغل حتروح تشوف زيها فى دليل تقويم التلميذ و لا الكتاب المدرسى !!!! و لا لازم تفكر فيها و تحاول تضيف لمستك انت عليها بجد لو منكم حد اتكتبله يخش علوم أو تربيه أو هندسه أو طب أو صيدله أو اداب حتى حيكتشف أد إيه انتوا اصلا بتتعلموا غلط فنحمد ربنا و عيب أوى الشتيمه العمال على بطال فى الوزير ديه و اللى عايز ينتحر و اللى مخنوق و أتمنى لو الموديراتورز هنا شافوا الموضايع ديه يلغوها لأن التهييج و ثقافه العياط و الزعيق ده أسلوب الطالب الفاشل و ده بيأثر على زميله التانى و نفسى حد يعاقب الأهالى على الجريمه اللى بيرتكبوها فى حق أولادهم بجد ربوا عندهم حاله نفسيه غريبه ده انا شفت حد كان حيضرب بنته عشان محلتش كويس فى الامتحان طب ديه حتعرف تحل فى الامتحانات الجايه ازاى !!! يا جماعه ديه عمليه تعليميه تربويه مش حرب !! |
أمتحان زباااااااااالة اصلا هو كان ساهل بس يتحل في 3 ساعات مش اتنين
|
مسحت الكلام كله
|
اسف انا كنت مضايق بس علشان حسستنا ان احنا مأثرين
|
ونبى خليك فى حالك وفى جامعتك
|
انت اصلا حاطت ايدك فى المية الباردة لما يكون طالب امل اهلة الوحيد ويطلع بكام غلطة يبقي حرام اما سياتك مش مجرب حرقة الدم دى عشان يتتغر بنفسك وعامل نفسك البيه الفهيم فى الرياضة فحس بينا بقي يااخى
|
ProfVip خلاص يا حبيبي انتا عبقري ................. اتكلم عن نفسك امتحان سنة 2004 انا جبت فيه 50 و انا مغمض هو ده امتحان
و ده امتحان 2010 اصعب امتحان ثانوية عامة لغاية الوقتي |
اقسم بالله وزير محترم وامتحاناته محترمه ربنا يخليه لنا علشان ينضف التعليم
والكلام اللى بيتقال انه امتحان صعب دا كدب لان الطالب الفاشل هيقول ايه غير كدا |
احنا لازم نطالب بموضوع ساعة كمان دى احنا كدة هنضيع فى الكميا
|
يا عمر مش صعب بس محتاج وقت اكتر
|
قوم ولعلك شمعه هههههههههههههههههه
|
اوكى محتاج وقت بس انا مش عجبنى الناس اللى عماله تشتم فى اول وزير محترم وبيشتغل صح
هو احنا بنكره النعمه |
متفق مع صاحب الموضوع كلى الأتفاق
يجب ان يكون مستوى الامتحان فى حد معين لا يقل عنه ويحتوى على نقاط كثيره بها تفكير وتحتاج الى عقل الطالب هى البلد ده عايزه ايه ما فبش حاجه اسمها الامتحان سهل او صعب ده مقاييس وما ينفعش ينزل عتها الامتحان ده مستقبل بلد شوف كام مهندس وكام طيب ؟؟ فيه كام ابداع وشوف مستوى كليات الهندسه والطلبه الى فيها ؟؟؟ حاجه مفزعه يجب ان يكون هناك تقويم شامل من خلال الامتحان ويجب ان يكون الامتحان مقياس لفهم الطالب وادراكه لمعلوماته العلميه البحته وتجريده من ادوات الحفظ المبهمه دون فهم كل ده علشان بلدناااااااااااااااا تبقى احسسسسن ويتم نصنيف الطلاب على مدى قدراتهم واستيعابهم للماذه العلميه وقدرتهم على خلق مجتمع متكامل يتحقق فيه المساواه من خلال توزيع الافراد على المهن المناسبه ؟؟ |
اقتباس:
أنا مش عاوز أظلم حد الامتحان الصراحه مستواه للطالب المتميز حيقفله الطالب فوق المتوسط يجيب من 20 الى 22 الطالب العادى ممكن يجيب من 17 الى 19 ده معناه ان الطالب العادى يقدر يجيب 76% يعنى جيد جدا و ديه نسبه متألقه بمقياس التعليم السليم يعنى فيه احتمال شديد لو كل الامتحان بنفس المستوى ده إن تنسيق هندسه مثلا ينزل إلى 88% مثلا الا بقى لو كان فيه لجان بتغش ( كالعاده للاسف ) فكده التنسيق بتاع هندسه ممكن ينزل بس الى 90% فصدقونى ده لمصلحتكم إنتم إعملوا اللى عليكم و ذاكروا بتركيز و لما يجى امتحان صعب مش تنهار ولا تعيط بالعكس افرح من جواك لسببين : 1-ده معناه انك بتتعلم صح و مطلوب منك تفكر فى الامتحان 2- التنسيق حينزل و بالتالى مش تقلق أوى من ضياع الكليه اللى تتمناها 3-ممكن تكون معاك فرصه انك تحل احد الاسئله الصعبه و تجيب درجه كويسه أنا عارف ان اللى ايده فى المياه مش زى اللى فى النار و عيطت بعد امتحان الفرنسااوى بتاعنا و جبت فيه 47.5 سنه 2004 - 2005 بس بعد كده اكتشتف انى فعلا كنت غبى و ان ده هو الامتحان اللى فعلا يقدر يفرق بين مستوى الطلبه بالمناسبه السنه بتاعتنا كان الامتحان الرياضه و الفرنساوى بس هما اللى صعبين جدا ==================== حاجه تانيه انا عاوز اوجهها كرساله من الموضوع ميصحش ابدا تشتم فى حد ديه غيبه و نميمه عاوز توجه رساله للويزر أو لأى مسئول بإحترام و بذوق توصلها ===================== إنت نفسك جزء من البلد يا تزيد فى بواظنها و خرابها لما تشوف عيوب نفسك الأول و تتكلم عنها و تحاول تصلحها لكن حنفضل نقول الحكومه غلط الوزير غلط ( بالمناسبه أنا مش حزب وطنى بل على العكس أنا من أكتر المؤيدين للإخوان المسلمين لكن انصافا للحق ) حنقعد نقول ديه الامتحانات صعبه - ده الوزير كذا مش كويس - ده اصل الموظف مرتشى - ده اصل المهندس خيبان و مش بيعرف يصمم العماره و لا بيعرف يصمم الكوبرى - ده اصل الدكتور فاشل و مش بيعرف يوصف الدواء كويس- ده اصل احنا عندنا فساد رشوه بطاله تأخير فى سن الزواج - طلاق - بلا -بلا -بلا طب ما ياحبيبى انت جزء من البلوه الكبيره ديه و حتى لو نظام التعليم غلط و العالم كله غلط ارتقى بنفسك و صلحها و حاول تبقى انت الصح حاول تبقى انت زويل أو مشرفه بعلمك مشلازم بشهادتك مش لازم تدخل طب عشان تبقى دكتور مصطفى محمود و لا دكتور نبيل فاروق - أينشتين نفسه الدكتور بتاعه كان بيقول عليه غبى دكتور مصطفى محمود عمل تأجيل لدراسته فى الطب لمده خمس سنوات اللى عندنا لو طالب أجل فى هندسه سنه يقولوا فاشل و مش بيعرف يذاكر عندنا دكتور فى كليه هندسه دبلر سنتين و اترفد من كليه هندسه و دخل كليه علوم و جاب تقدير جيد جدا اتعين فى كليه علوم معيد و بعدين اتعين فى قسم رياضه وفيزياء كليه هندسه و فيه نابغين محترمين فى مجالات كتيره زى الأستاذ وائل الابراشى مثلا و هكذا و على المقابل ناس كانت بتجيب تقديرات عاليه فى ثانوى و دخلت هندسه و طب و صيدله و اتبهدلت على الاخر و ضاعوا اخر ضياع وشربوا حشيش و بقوا بيمشوا مع بنات و الكلام ده كله و مستقبلهم ضاع بجد لو عاوزنى اضربلك امثله ناس انا عايشتهم و قعدت معاهم و سمعتهم قاوموا لحظات اليأس و الفشل بدو نما يشتموا و لا يزعقوا و لا يضربوا و لا يلعنوا مش حنخلص كلام عنهم النهرضه فانا بقول شيلوا اليأس من على دماغكم لو عاوز تبقى العلامه أو النابغ - زهره الامه - حتقدر بس انت انوى و ان شاء الله ربنا هو اللى حيوفقك |
كلام محترم الله ينور عليك
|
اقتباس:
نورهــا مستنيك وفى عيونة دمعة انا عارف ان في ناس بتعشق الاغنيه دي لو حد عايزها يبعتلي مسج خاص وانا هبعتلوا اللينك يحملها ههههههههه معلش اصل انا بحب اساعد الناس ولو حد كمان عايز ورده او فايزه اوك تحت امرك بس محدش بقى يقولي نجاة انا مليش في القديم |
اقتباس:
أولا أنا حليت الامتحان كله بالكامل بعد أما وصلنى فى أقل من نص ساعه و ده طبيعى لأنى طالب كليه هندسه مش عشان أتمنظر و لا أقول إنى عبقرينو إسئل عن عبدالرحمن أبوطالب فى هندسه القاهره الحمد لله سمعتى الطيبه سابقانى لأنى بحب الخير لزمايلى و كل الناس ثانيا قله الادب يا استاذ فى اسلوبك ( يتداس عليك وعلى ز.. بال ... ) - (س اصلك ... وتستاهل .... ما انت المفروض ... علشان انت اساسا .... واوعى تفهمني غلط هههههههههههه) و اسلوب زمليك فى موضوع رساله الى الوزير و الشتايم اللى مش عارف ازاى الموديراتورز ساكتين عنها يريت لو حنتكلم يبقى بالمنطقو بالاخلاق عموما انا مش حارد عليك لسببين : 1- اولا انا الحمدلله مؤدب و مش باشتم حد اطلاقا لأن دينى قبل أى شىء لا يسمح لى بذلك 2-إنت أخويا الصغير و أنا مش أتمنى لأخويا أبدا أى حاجه وحشه و حأعتبرها زله لسان من أى حد بيشتمنى فى الموضوع - و على الرغم من انى كنت واثق انى حاتشتم و على الرغم انى عندى امتحان فى ماده نظم التشغيل و الميكروبروسيسر يبوم الاحد لكن انا قلت من اولوياتى انى اهدى طلبه تانى ثانوى اخواتى و اوعيهم ببعض من خبرتى ثالثا يريت تقول الطريقه اللىتفرق بيها بين الطالب المذاكر كويس جدا و اللى مذاكر نص نص و اللى مش مذاكر خالص يريت !!! |
يا ابني انت فاكرني ايه انا مجموعي في ثالثه اعدادي 98 % انا مش فاشل بس احنا تظلمنا ثانيا دي ... مش شتيمه يا عم
|
تسلم كلامك صح وميه ميه
|
لو سمحت ابعتلي اميلك من فضلك علشان عايز اتكلم معاك والله في موضوع مهم جدا وانسى لو كنت انا غلط او اسلوبي كان وحش
ده من الظلم واللي بيقول روح ذاكر بلا خيابه انا مش فاهم انت بتتكلم على الاغنيه؟؟ لو على الاغنيه انا بهزر لو على الكلام اللي انا كاتبه دي حريه شخصيه |
يعني ايه واحد يبقى قاعد في امتحان الانجليزي معاه موبايل بيترجم منه ؟؟ ويجي يقول الامتحان سهل ده الشاطر بالنسبالك يا عموررر
ويا بروف؟؟؟؟ |
اقتباس:
لأنك تبقى شايف الغلط و ترفض انك تحاول اهداء النصح و محاوله تغير الخطأ الى الصواب بألفاظ و معانى زى ( و أنا مالى - ابعد عن الشر و غنيله - الباب اللى يجيلك منه الريح سده و استريح - يعم فكك - الخ ) و أنا ياشباب و الله مش عايز أضايقكم و مش قلت الامتحان سهل و لا من الكتاب المدرسى كله ولا الكلام ده أنا قلت رأيى بمنتهى الحياديه فليه اللى شايف كلامى غلط مش يرد بنقاط واضحه بدل التجريح و الاهانه ديه ============================ يعنى هل يصح نشر اليأس بين الطلبه اللى داخل يقول لا للتعليم و اللى داخل يقول عندك عقد فكها على حد غيرنا - و اللى بيقول مش حيكمل الماده http://www.thanwya.com/vb/showthread.php?t=216971 ===== هل هو ده المطلوب ياشباب انا بحاول اهديكم و اتمنالكم كل خير و اتمنى كل طالب حتى اللى بيجيب 50% يبقى مبدع فى مجال بيحبه حتى لو كان الفيزياء أو الكيمياء أو الاليكترونيات أو الكومبيوتر المهم انه مش يستسلم لليأس و يبقى مبدع و بالنسبه للى مذكور عن الغش فى الامتحانات أيوه موجود و أناشفته بعينى أنا فى تالته اعدادى طلبت مدير المنطقه التعليميه يجى عشان يراقب على مدرسه النهضه الاعداديه لكم الغش اللى انا كنت بشوقفه من مراقبين بتسلم النموذج الاجابه - و بنفسى فى امتحان الانجليزى سبت الامتحان فى نص اللجنه و نزلت قطعت الورق اللى كانوا بيغشوا منه فىالحمام و بقيت ارميه زى المجنون من شباك المدرسه و اقطعه -و اخر يوم فى الدراسات الاجتماعيه روحت فى عربيه الدفاع المدنى عشان الاهالى كانوا مستخلفنلى ================================= يا شباب لو عايزين واقع اجمل غيروا من نفسيكم ابدأوا بيها الأول =================================== |
profvip
ابعت اميلك لو سمحت والله انا لازم اكلمك علشان افهمك وجهة نظري انا وكتير اوي اتظلمنا |
أنا أسفة جدا بس انا مش معاك خالص في رأيك و في موضوعك أولا أنا كنت مرحلة أولي دفعة 2004 يعني زيك و انا معاك ان امتحان 2004 مكنش سهل بس هو كان في أفكار أكتر من السنين الي كانت قبلة بس امتحان السنادي فعلا أصعب و لما تيجي تقول ان الطالب العادي يجيب 17 أو 19 من 25 يعني كدة دة امتحان فاشل لأنة أكتر من نصف الطلبة أدبي و الي داخلين يحلوا الامتحان دة مش ناويين أصلا و لا علي طب و لا هندسة بس لما يجيي افكار تراكميية و معظم المسائل اللي بتيجي مجاش حاجة شبهها بأفكار أخري زي امتحان 2004 بس المسائل كانت مختلفة شكلا و مضمون و متحكمش علي امتحان و انت مش قاعد في جو امتحان وانا كنت قدام لجنة ثانوية عامة النهاردة و مش شقت اللي حصل النهاردة في السنة بتاعتي لما تقول ان الطالب العادي ينقص 4% في نصف فرع الرياضة فقط يبقى حراااااااااااااام و ظلم مش عدل و لا عدل الوزير و حضرتك طالب هندسة فاحكم من وجهة نظر طلبة مرحلة أولي أدبي و علمي دب مش رياضة 2 عشان تقول كدة و الوزير يا سيدي علي عينا و علي راسنا بس مش علي حساب انهيار طلبة و أولياء أمور حاطيتلهم امتحانات يوميا تفتكر دة كان علي ايامك ولا انا غلطانة
ربنا يكرمكم يا جماعة كلكم و يوفق أختي في الامتحانات هي و اللي زيها اللي تعب و بيتصدم بقرارت وزير جديد يظهر ان معندوش اي ثانوية عامة السنادي و حرام بجد الدفعة دي جربوا فيها البدع فارحمونا بقى من كدة كل شوية وزير يعملهم حاجو جديدة عشان يقرفونا |
اقتباس:
و فيه غش للركب كمان و ده من زمان من زمان جدا مش فى عهد الوزير الحالى و بالمناسبه أنا من المفترض كراجل متحمس للاخوان انى اكره الدكتور بدر لأنه كان متعنت جدا ضد الاخوان لكن انا متفق معاه فى سياسته التعليميه و دورنا اننا نشارك فى فضح اللجان اللى فيها غش و نقول لأ للغش لو شفت زميلك بيغش قول لمراقب اللجنه اطلب مسئول و ابعتله و قول انا طالب و حصثل فى اللجنه الفلانيه غش ساعتها تبقى انت فعلا جبت الخير لزمايلك لأنهم بالتالى حيذاكروا بدل ما يعتمدوا على الغش بس احنا كده خرجنا من نقطه مناقشه الامتحان الى نقطه تانيه هى الغش و كأننا عايزين نعلق صعوبه الامتحان على اى قشه يا شباب يريت نتكلم بموضوعيه لو فيه سلبيات نناقشها و انا معاك 100% فيه غش بيسبب عدم توازن فى التنسيق و نسب النجاخ و ربنا عالظالم و المفترى و كل اللى بيسبب و بيشارك فى موضوع الغش و هو ده اللى نقوله فعلا حسبى الله و نعم الوكيل لكن لو اتكلمنا عن نظام الامتحان و توزيعه و الدرات على كل سؤال حنلاقى فيه انصاف كامل و تام و ربنايوفقكم يا شباب و ان شاء الله تتعوض ليكم فى الجبر و يجيى امتحان سهل |
تحية وتقدير .. للراجل اللى حاطط الموضوع
انا طالب فى تانيه ثانوى ونظام الامتحانات عجبنى الى اقصى الحدود امتحان العربى لا يوجد شيىء صعب .. امتحان الانجليزى فى اسئلة للطالب المتميز بس معظمه للطالب المتوسط .. امتحان الجبر كله اسئله معتاده .. ما عدا طبعا الجزئيتين فى الرابع والخامس .. علشان المتميز بس هو اللى يقفل الامتحان ..( تفكير صح ) ومستغرب لأقصى الحدود من الضجه اللى بتحصل كل يوم ... مستغرب بجد وللراجل صاحب الموضوع بلاش تتعب نفسك علشان قليل جداا اللى هيستوعبك وللراجل ( princooo ) بلاش قلة ادب وبلاش تتكلم علشان الموضوع ده مش مكانك .. فى جروب ع الفيس بوك عايزين يعيدوا المتحانات روح شارك فيه ... يارب كل الامتحانات تبقى على نفس النظام |
اقتباس:
قولهم مجموعك في اخر شهاده ليك تالته اعدادي انا مش بقول حليت وحش انا بقول كنا ممكن نجيب اكتر من كده بكتير ثانيا مليش في الفيس بوك والله ده انت اللي عارفه تروح فيه انت |
بصم يا جماعة على راى معظم الناس الامتحان للطالب المتميز و صعب
الوزير دة دمر احلام معظم الجمهورية و شوفم بقى كل الناس اكيد بتدعى و مش عارف اية اللى هيستفادة من كدة ؟؟؟؟؟؟؟؟؟؟؟؟؟؟؟؟؟؟؟؟؟؟؟؟ |
اقتباس:
* امتحان الانجليزي 30% للطالب المتميز يعني معناه ان الناس هتنجح و تجيب في درجات مش قد كدة الامتحانين محتاجين وقت أكتر هما مش صعبين جدا الاتنين بس محتاجين تفكير أكتر فدة بيأخد و قت |
اقتباس:
الحمدلله أول رأى مضاد يكون بهدوء و موضوعيه و ربنا يوفق اختك ان شاء الله و تدخل الكليه اللى نفسها فيها و تجيب تقديرات كويسه فيها كمان ان شاء الله كلام حضرتك سليم إن بمقياس ثانويه عامه حيبقى فقد فى الرياضه الطالب المتوسط حوالى 3% من المجموع الكلى او لو حنتكلم بمقياس السنتين فهو حيبقى فقد من 1.5% إلى 2% ده للطالب المتوسط اللى هو فى الغالب ممكن يكون طالب ادبى أو علمى علوم فزق المتوسط و ده ممكن يكون سىء عليهم بس الكلام ده حيكون على أدبى كله أو علمى علوم كله و بالتالى تظل نسبه النجاح و التنسيق الخاص بيهم واحد و عموما أنا مش حأقارن بين امتحان 2004 و 2010 على الرغم انى واثق ان نفس الافلام بتاع النهرضه حصلت و الناس خرجت تعيط و بتاع الخ و فاكر ان الجبر كان فيه تفكير المهم يعنى نقطه تانيه حضرتك اتكلمتى عنها بخصوص اولياء الامور ديه اكبر غلطه اولياء الامور بيرتكبوها فى حق اولادهم يا ولي الامر ابنك مستواه كده ( أدخله طب أو هندسه أو حتى حقوق ) بالعافيه و هو مش يستاهلها !!! و لكن قدراته العقليه قد تمكنه من انه يكون بارز و انسان متميز فى كليه تانيه لو كلمتى اى طالب علمى رياضه كلمتى والده اووالدته اكيد اكيد نفسها ابنها او بنته تدخل هندسه على الرغم تعالى شوفى بلاوى هندسه عندنا طلبه بتدبلر و بتعيط و تقول والله لو كنت دخلت علوم قسم كيمياء اللى باحبه كنت جبت امتياز و بقيت معيد و واحد تانى يقول يريتنى كنت دخلت حاسبات و معلومات و اتخصت فىالمجال اللى بأعشقه السوفت وير بتاع الكوميبوتر و بقيت مهندس اد الدنيا مش ادبلر و شوفى ده هندسه بتاع 100% فالخلاصه ان اللى بيعمله اولياء الامور ده غلط تماما معاك ان الاب يخاف على بنته و ابنه و يزعله لو حل وحش و كده لكن مش للدرجه ديه البكاء و العياط و و الخ انما فاكر ان والدى زعق لأختى بعد امتحان الفيزياء بتاع ثانوى عام و قعدت تغيط عشان كانت حلت وحش جدا جدا و جابت فى الاخر تقريبا 97.9 التراكمى و دخلت طب القاهره و كانت جايبه فى الفيزياء 41 طب يا جماعه ما ده منطقى ليه نوتر الطلبه و نزعق فيهم و نشخط انت عليك الاساب خللى ولادك يذاكورا و يحاولوا و كل ماده حتختبر جزء معين من الذكاء لدى الطالب و فى النهايه يدخل الكليه اللى هو عايزيها مش اللى الاهل يجبروه عليها |
السلام عليكم
*princoooo أولا و لا يهمك و الله انا عارفانكم مضغوطين عشان جو الامتحانات و صدقنى مش مستاهله اى اعتذار و ربنا يوفقك ان شاء الله ثالثا انا قلت الطالب المتوسط يقدر يجيب 17 دهاقل اقل الاحتمالات معناها ان الطالب كان متوتر معرفهش يوصل للسؤال الخامس أ ( لأن النهايات فى السؤال الخامس أ سهله لحد ما ) و لغبط فى أرقام فى الامتحان الأساسى لكن لو عرف يحل أول تلات أسئله بدون توتر و وصلللارقام النهائيه سليمه وبص مثلا للسؤال الرابع ملقهاشقدراته توصله حيحل النهايه الاولى فى السؤال الخامس أ و عليها درجه و نص يعنى كده يبقى 20 و نص فطالب أدبى أو علمى علوم لو قاعد مركز ممكن يجيب 20 و نص يعنى حيبقى ضاع منه 1% و ربع ( تراكمى ثانويه عامه ) لو حاول شويه فى تانى نهايه فى الجزء الرابع أ حيجيبها برضه بس محتاجه تفكير شويه و بالتالى يبقى 22 تعليقى النهائى انا من الناس اللى بأحب أعمل امتحان للطلبه تميز بين المستوبات لكن ندى وقت مناسب للطلبه لأنه كده احنا معرفنهاش نفرق بين الطالب اللى مش عارف مثلا حل الاسئله المتميزه و الطالب اللى عارف ( أو ممكن يعافر فيها ) بس الوقت مش كفاه لذلك انا شايف ان امتحان النهرضه كان يبقى ليه مثلا 3 ساعات كويس جدا و بالتوفيق |
المشكله ان الدكتور احمد زكى بدر
ربنا يديله الصحه يارب حاطط ايده فى الميه البارده و مش حاسس باى حاجه هو مثلا لو عنده ابن و جاب مجموع وحش مش هيدخله كليه خاصه او يبعته يدرس فى الخارج انما الناس اللى حاطه امل على ولادها هو مش حاسس بيهم المشكله ان اصبح مفيش عدل فى التعليم كل واحد معاه فلوس يدخل كليه خاصه و خلاص يحققوا العدل فى التعليم و كل واحد ياخد حقه و بعدين يصعب الامتحان زى ما هو عايز و ربنا يستر عليا السنه الجايه فى تانيه ثانوى |
ربنا يستر فى الجبر يللا نقوم نذاكر و ربنا معانا كلنا هو الامتحان كان حلو بس كنت عاوزه وقت كمان و اللجن عندنا صعبه اوى بس فى بنات كتير بيغشو hand free يعنى حرام و كمان الورقه بتاعتى كانت مقطوعه و مفيش ورق و مكنتش عارفه اعمل ايه فى الاول يللا بقى هنعمل ايه
|
و الله العظيم الوقت لو كان 3 ساعات كنت هقفله كله
|
اون لاين ازاي وانا بكلمك
على العموم انا غلطاتي هقولهالك من غبائي اتلغبط في واحده نها ملهاش دعوه بالسهوله والصعوبه أ - ب مش بيطلعوا معايا خالص في السؤال الثالث السؤال الرابع في مسـأله معلقه معايا مفيش امتحان في السنوات اللي فاتت كان كده وانا حليت امتحان 2004 ده في ثلث ساعه ومكنش عندي ولا غلطه لا يا جماعه احنا اتظلمنا كل ده علشان الكليات الخاصه تشتغل للمره المليون حسبي الله ونعم الوكيل |
بجد انت عندك حق في انة احسن وزير جة لغاية دلوقتى وهو نفسة يغير التعليم للاحسن بس التغير ميجيش مرة واحدة ولا انتوا رايكوا اية وبعدين كل طالب من حقة يحلم بدخول كلية اللى عايزها من غير ماتحكم علي حد انة فاشل لمجرد انة ماحلش امتحان وبطريقة دي تقتل طموحاتة واحلامة وتخلية مايحولش يذاكر تاني احنا بس محتاجين شوية تشجيع:078111rg3::078111rg3::078111rg3:
|
مع احترامى لصاحب الموضوع بس على فكرة فى حاجة اسمها أدب الحوار وأكيد سمعت عنها يعنى مش تدخل تشتم فينا وتتهمنا وتضيع تعبنا طول السنة بكلمة واحدة وبمنتهى الهدوء وبعدين وزير ايه اللى بتتكلموا عنه ده بس علشان ما ياخدش مننا حسنات على الفاضى كنا فضلنا لحد الصبح نوصفهولك هو وأسلوبه وواضح اصلا انك مش متابع اى حاجة وقلت تتسلى فدخلت لقيت امتحان تفاضل فقلت تقول كلمتين لو سمحت قبل ما تتكلم خلى بالك من كلامك وما تحاولش تجرح حد وأعرف انت بتقول ايه قبل ما تتكلم وكمان انت بتتكلم عن تلات اربع درجات اللى هينقصهم الطالب فوق المتوسط وكأنهم حاجة عادية جدا هو انت ما تعرفش ان الدرجة الواحدة بتبقى كارثة فى الثانوية العامة انت أكيد لأنك بتقول انك فى هندسة
وأحب اقولك ان لو كلامى ضايقك معلش لو كان فيه اى حاجة تجرح بس بجد كلامك ده بجد فيه ظلم كبير اوى لينا إحنا تعبنا وبصراحة مش ناقصين أى حد يكمل علينا ولا يمحى مجهودنا ده المدرسين نفسهم ماعملوش كده |
معلومه انا حليت كويس بس كلامك استفزنى يالا مستنيه ردك
|
i want to say that measuring our brain level can't happen with that damned education as there may be a genius student in electronics but because of forgetting the idea of a particular question he loses the chance to enter the faculty where he can improve their skills so we have to know that the minister isn't mistaken our great problem is stupid lessons , ill-skilled teachers & stupid ways of entering faculties we need to measure our skills by an exam in the field you want to learn not to make all those exams control our dreams & make egypt lose its chances to have new intellectuals
|
أعزائى الطلاب والطالبات /
اسمحوا لى افكركم ببعض الامور 1- ان الله لا يضيع أجر من أحسن عملا 2-من جد وجد ومن زرع حصد 3-لا يستوى طالب يعمل بجد واجتهاد مع طالب كسلان وشغلته الامتحانات صعبة واحنا مظلموين والشكوى الدائمة ولأسباب طبيعية ان اى امتحان لازم يفرز ويميز المتفوق من المتوسط من اللى ما لوش فى الدور أصلا 4- يا جماعة انتوا اكيد سمعتوا زمان عن عبارة لم ينجح احد اللى انقرضت اليومين دول ولم يكن ينجح فى الماضى الا اللى يستاهل النجاح أما الأن كل اللى بيعدى على الثانوية بيخدها بعد ما كانت لصفوة الطلاب وبس والمجتهدين الذين يعملون ليل نهار. 5- يا جماعة ذاكروا البلد محتاجة لكم عاوزين طب وهندسة وصيدلة وتربية وكله له دور بيقوم بيه عايزين فرحة النجاح والتفوق بتاعة زمان العملية مش مجموع عالى وفى الاخر زى قلته والمعادلة دى معروفة كويس التنسيق بيرتفع وبينخفض حسب المجاميع والامتحان الصح اللى بفرز المستويات الصح ودا بيكون فى مصلحة الشطار واللى خايب وكسلان مالوش مكان والتعليم المهنى له عطشان وعجبى ؟؟؟؟؟ |
اقتباس:
You are right Mena We need new ways but when ,why,how God only knows |
اقتباس:
ياشبا اقروا الردود بتاعتى كلها يا أستاذه أنا برد على الشباب اللى بيشتموا بألفاظ نابيه أنا مستغرب ازاىتبقى موجوده فى منتدىمحترم زى ده أكيد أنا مش أقصد حضرتك ولا حضرتك اللى بيتكلم بأدب و أبدا يا استاذه mylife أنا مش متضايق من كلام حضرتك و لا حاجه و الله انتوا زى اخواتى انا بتمنالكم الخير و انكم تبقوا شخصيات مفيده لمجتمعكم لكطن تعالى كده بصى معايا قارنى بين موقفين 1- زعيق و شخيط و شتيمه فىالوزير و حسبى الله ده وزير تييت ابن تييت و انت تييت و مشعارف ايه 2- نشر مواضيع عن تزايد حالات البكاء و الصراخ و الدموع 3- نشر مواضيع تدعو الى التصبيط و يا جماعه انا مش حاكمل 4- الترهيب فىمستوى الامتحان و ده كله صعب و موقف تانى 1- التأنى فى مقارنه الامتحان واستخراج المقاييس التى تحدد كل مستوى بأسلوب عادل و منصف 2- الدعوه الى التفائل يا طلبه ده الصعب صعب على الكل و ان شاء الله التنسيق حيقل و ينزل و يا أستاذه أنا كنت زيك فى ثانوى و عارف معنى الدرجه و الدرتين و عيطت فى امتحان الفرنساوى لما جبت 47 و نص عشان كان برضه عندى نفس التوهمات و انى مش حأعرف ادخل هندسه و بتاع و اكتشفت فى الواقع بتاع الكليه ان اللى يدخل كليه و يبقى ناجح فيها حتى لو دخل معهد بس بقى معيد فى المعهد أحسن من اللى يخش هندسه و يسقط بالسنه و الاتنين و يجيب تقديرات اى كلام أما بالنسهب لموضوع بأتسلى فلأ أنا مش بأتسلى و اعتبار لأنى هندسه و قسم اتصالات و اليكترونيات أكتر قسم بياخد رياضه و فيزياء حليت الامتحان بالكامل و حاولت انى اضع تحليل شامل عادل فيه و طلبت من الناس انها تناقشنى لربما كنت أخطأت فى توزيع الدرحات على مقاييس الفهم و يريت يا استاذه mylife تدعيلى و تدعى لدكتور بدر بالهدايه لو كنا غلطانين من وجهه نظر حضرتك و يريت بجد يا شباب منتعاملش كأننا أعداء أنا فىالنهايه أخوكم الكبير و و الله خايف عليكم ونفسى مصر تبقى ديه نجمه لامعه و تبقوا نتوا احسن شباب و ان الاساتذده يرجعلها هيبتها و احترامها و مركزها الاحتماعى نفسى و نفسى و نفسى بس ده مش حيتحقق بالزعيق و النظر و السب و كده لازم نبقى موضوعييين و جزلكم الله خيرا |
اقتباس:
ولى كل الشرف ان حضرتك رديت فى موضوع خاص لى و زى ما بيقول مستر محمد البلد محتاجه كل التخصصات مش هندسهو طب بس هما اللى ناجحين و الله اوائل جموهريه بيدخلوا عندنا و يجيبوا مقبول و يدبلروا يا شباب النجاح فى انك تحط خطه و ترسمها لنفسك مش تتقيد بكلام الاهل المستقبل واسع و كبير و ان شاء الله تقدروا تنفذوا طموحاتكم |
اقتباس:
لكن الخطأ ليس فادحا بنسبه كبيره جدا جدا على الأقل هناك لمحه مشرقه من بين حطام اليأس حاول دائما أن تنظر لنصف الكوب المليان 1-لو الدروس مش كويسه و مش بتشجع على الفهم حاول تفهم و تستوعب - تدور على الانترنت - تقرى فى مراجع ن المكتبه 2- لو الاساتذه مش شطار ( ولو انى اعتقد ان هناك فئه كبيره من الاساتذه العظماء ) فحاول تعتمد على نفسك أو تذهب لمدرس أخر ( للأسف حل الدروس الخصوصيه لكن ما باليد حيله 3- اما بالنسبه لطريقه التقييم ان واحد شاطر فى الاليكترونكس و ميعرفهش يحل عشان نسى فكره المسئله طب ما هو ده قصور يا استاذى مينفعهش مثلا تبقى فى موقع عمل مثلا على حفار بترول و مطلوب منك لو حصلت مشكله لا قدر الله انه فيه بئر حتنفجر ( معناها موت كل العمال و حريق هائل الخ ) لازم ساعتها تحدد بمنتهى الدقه و المرونه ( بمساعده الكومبيوتر طبعا و الادوات ) العمق المطلوب اللى حيتم الردم من عنده و العمق الاخر اللى حيتم كسر خرطوم الحفر ( لأن الخرطوم بيكون بالملايين فانت يهمك انقاذه ) الخ و لو ضربت ليك امثله من الواقع العملى كتير حتلاقى انه مينفعهش تنسى أنا عارف فى الواقع العملى فيه مراجع و كتب و انترنت تقدر ترحعله لكن دايما لازم يكون ذهنك حاضر - و بالمناسبه طريقه التقييم عن طريق الامتحانات التحريريه يتم العمل بها فى معظم دول العالم و جامعات عريقه فى امريكا مثل mit لكن اللى ممكن اكون متفق معاك فيه هو خطأ شنيع لنظام التقييم باليوم الواحد ممكن الطالب يكون تعبان فى اليوم ده أو عنده ظروف ليه يتحمل نتيجه و مصيره الشهاده بتاعته كلها بيوم واحد أما عن تطوير التعليم كمنظومه فان شاء الله الكلام ده يكون على ايد الجيل الجاى و ربنا يوفقكم |
اللى ايده فى المية مش زى اللى ايده فى النار
|
اقتباس:
قد يكون هناك فرد قدراته متوسطه فى الرياضيات لكن قوى فى الكيمياء مثلا او الاحياء يبقى ده مثلا يناسبه كليه علوم أكتر من هندسه يبقى هنا الامتحانات قدرت تفرق بين الطلبه للاصلح ليها و انا ابدا مش بقول نقتل الاحلام بالعكس يا استاذه نرمين لو حضرتك ركزتى فى كل ردودى أنا قلت يرب اللى بيجيب 50% حاببب يشتغل فى مجال الهندسه طالما هو عنده اراده و صبر حيقدر ممكن يدخل معهد المطريه و منها هندسه او هندسه خاصه أو حتى يتعلم لوحده و ينفذ هو الابداعات انا بس بقول ان الامتحان لازم يكون بيفرق بين المستويات و باوضح الكلام ده فى نقاش هادىء متحضر من غير زعيق و كنت بس بألوم اخواتى الصغيرين انهم شتموا و لعنوا و قالوا الفاظ مش تصح فى مواضيع سابقه مش أكتر و لا أقل |
| جميع الأوقات بتوقيت GMT +2. الساعة الآن 02:17 AM. |
Powered by vBulletin® Version 3.8.11
Copyright ©2000 - 2025, Jelsoft Enterprises Ltd.