على حسب كلام الأهرام التحويل للكليات الغير مناظرة متاح .. ياااارب
 

كتب ـ محمد حبيب‏:‏ أعلن الدكتور هاني هلال وزير التعليم العالي والدولة للبحث العلمي أمس نتائج تنسيق الطلاب المصريين الحاصلين علي الشهادات المعادلة من الدول العربية والأجنبية‏,‏


حيث تم قبول‏5‏ آلاف و‏50‏ طالبا وطالبة بالجامعات‏,‏ واستنفد‏1385‏ طالبا رغباتهم دون ترشيحهم الي احدي الكليات‏.‏
وصرح السيد عبد الحميد سلامة الوكيل الأول بوزارة التعليم العالي المشرف العام علي مكتب التنسيق بأن الترشيح الي الكليات جاء من خلال الحد الأدني المعلن لكل شهادة علي حدة وفقا لمجموع درجات الطالب الاعتباري وترتيب الرغبات والنسبة المقررة لكل شهادة في ضوء قرارات المجلس الأعلي للجامعات‏.‏ وأضاف أن موقع التنسيق الالكتروني سوف يبدأ من الثلاثاء المقبل في تلقي رغبات الطلاب للتحويل الي كليات مناظرة أو غير مناظرة لتقليل حالات الاغتراب ويستمر حتي السبت‏18‏ سبتمبر‏.‏

المصدر : جريدة الاهرام

بتاريخ :
08/09/2010

http://www.ahram.org.eg/283/2010/09/08/27/37814.aspx


معنى كده ان فيه تحويل لكليات غير مناظرة :) والاهرام جريدة حكومية مش هتجيب حاجة من عندها :)

نتمنى يكون صح يا ندى


يا رب


بالتوفيق إن شاء الله

يااااااارب يا استاذة ام شاهندة .. دعواتكم معانا :)

بصو يا جماعة انا طالبة انظلمت السنة اللى فاتت فى التحويل الغير مناظر وكنت شهادة معادلة .............ودفعت 1000 جنية ..........وماحولوش ليا.... وعلى فكرة مش انا بس دة كل التحويل الغير مناظر ا ترفض.....فانصحكم قبل ما تدفعو الالف جنية اسالو حد انتم واثقين منه انكم تدفعو وتضمنو التحويل ولا لاة .....زلانكم مش لاقين فلو مسكم فالشااااارع .....وانا بنصحكم وخلاص علشان ما يحصلش معاكم زى ما حصل معانا........

مهوا يا ندى التحويل لكلية غير مناظرة هيبقى بمجموع أقل مش بمجموع أكبر زي التحويل لكلية مناظرة
ويارب يلطفوا يحال الشهادات المعادلة السنة دي لإنهم ظلموهم وضيعوا مستقبل أغلبهم
قولي يارب يا ندى

وربنا إن شاء الله هيختارلنا الخير دايمًا .

الهي يطمنك ياختي :) :) طب التحويل اترفض ليه ؟؟ كده من غير اسباب ؟؟؟ انتي كنتي كلية ايه اصلا وطلبتي تحويل لكلية ايه ؟؟

ايوة مانا عارفة انو لازم يكون المجموع اقل .. انا جالي طب بيطري ومعنديش استعداد اكمل في الكلية دي .. فانا عايزة احويل علوم .. والحمد الله مجموعي غطي كليات علوم كلها .. ربنا يسهل يااااااااارب

ازاي يعني ؟؟؟!!! يعنى أنا اتقبلت في طب الإسماعليه ذنبي ايه بقا إن شاء الله إنهم حاطيتوا ككلية غير مناظرة ؟
يعني اللى زيي وراح كلية ملهاش نظير ( حسب تصنيف الوزارة ) يفضل قاعد فيها بقية عمره ليه إن شاء الله ؟؟؟!!! لا مش معقول أكيد يا جيرسي فيه مخرج بالذات للى واقع ف المطب ده إن مافيش ولا كلية مناظرة ليها
مع إنى مش فاهمة ايه الفرق بين طب ده وباقي طب مصر وهوة كمان واخد مجموع أعلى من الصعيد

ده أنا ليسا مداومتش عشان يقبلوا التحويل ولا ميقبلوش
ياااااااااااااااارب لطفك يا جبار يا كريم يارب :(:(:(

الخبر فى المصرى اليوم بيوضح ان التحويل هيبقى ورقى مش الكترونى ودا اللينك
http://www.almasryalyoum.com/news/%D...82%D9%85%D8%A9
وإلي ذلك قرر مكتب التنسيق فتح باب تحويلات تقليل الاغتراب للطلاب الحاصلين علي الشهادات المعادلة العربية والأجنبية اعتبارا من يوم الثلاثاء 14 سبتمبر الحالي،علي أن يستمر تلقي طلبات التحويل لمدة خمسة أيام تنتهي يوم 18 من الشهر نفسه.
وأشار «سلامة» إلى إن الأوراق المطلوبة هي صورة بطاقة الترشيح، وصورة تحقيق شخصية، وصورة من إيصال التنسيق. بس مش موضح انه للكليات المناظرة او غير مناظرة بس عند ملء البيانات والرغبات على موقع التنسيق ظهرت رساله انه لا يجوز التحويل الا للمناظرة فقط. اتمنى من كل قلبى انها تكون لغير المناظرة لانه سيقع ظلم كبير على طلاب الشهادات المعادله كلهم, ربنا يوفق الجميع

هههههههههههه ........هما رفضو تحويل الكل للكليات الغير مناظرة والله بجد ما بضحكش عليكم بحجة ان مفيش مكان فى الكلية اللى محولين ليها مع ان الكلية اللى كنت عايزة احول ليها كان عددها قليل ومجموعى جايبها.....اما التحويل المناظر كلة اتقبل حتى لو مجموعك ما جبش محافظتك بناء على كلام سيادة الوزير لانه قال كدة للتحويل المناظر بسى الكلام عرفناة بعد ما نتيجة التحويل طلعت ........فسؤالى هنا بدام مش عايزين يحولو لينا اخدو مننا فلووووووس لية من الاول؟؟؟؟؟؟

فعلا يا ندى علوم أحسن من طب بيطرى ، ربنا يوفقك يارب وتحققى فيها نفسك
أنا واحدة صحبتى كانت جايبة شبه مجموعك وكنا كلنا حاطنلها أمل في هندسة وهيا بسم الله ماشاء الله ف الرياضه كويسة جدا ! لكن الوزير مش عارفة أقول بس عنه ايه والله ؟ معندوش أولاد وعارف شعور الآاباء لما أحلام ولادهم تتحطم لا وكمان وهما ملهمش ذنب وجايبين مجاميع ؟

وجالها برضو طب بيطري ف اسيوط

الله يعينها ويصبرها ويارب اللى زيك و زيها ربنا ينصرهم وربنا مش بيضيع تعب حد
وتبقوا علماءنا ف الخارج من كلية علوم اللى دايما بيطلع منها علماءنا اللى بيشرفونا برة :)

انا معاكى فعلا هو يكون كلامهم منطقى امتى . لوالطالب قضى فيها سنه مثلا لأن ساعتها ممكن نقول ان التحويل ممنوع علشان طبيعة المواد الدراسيه فيها مختلفه عن باقى الكليات وبالتالى لايمكن التحويل اما من البداية واقبل ماادرس ولا اعمل اى حاجه يمنع الطالب من التحوبل؟ ازاى؟؟؟؟؟؟؟

معنى كلامك ان ولا طالب في التحويل الغير مناااااااااظر اتقبل ؟؟؟؟؟؟؟؟؟

مهوا التحويل اتعمل عشان خاطر الفلوس ولا ايه :d

طالبة من الامارات .. انا اللي اعرفو عن مشكلتك في التحويل ان جامعة اسماعلية اصلا ليها لوايح وقوانين تختلف عن بقيت الجامعات المصرية .. عشان كدا من شروط التحويل ان يكون في اتفاق في لوايح الجامعتين اللي هتحولي ما بينهم .. بس هيا دي المشكلة

مش مهم الفلوس بس نحول :) ماهم كده كده واخدينها .. :)

ده امتى الكلام ده يا مستر ؟؟ هو التحويل فتح لسة ؟؟؟ بتهيالي ده هيفتح يوم التلات اصلا والموقع هيفتح يوم التلات ولا ايه ؟

دا لو كان الطالب اشتغل فيها مده مثلا اما فى حالة طالبه من الامارات هى لسه مادخلتش اساسا

البيانات الاساسيه والرغبات 48

الله يفتح على حضرتك .. ده اللى فعلا محيرنى ومجننى ! بس اللى مطمنى إنهم كاتبين الكلام ده ( إنها مش مناظرة ) في دليل التنسيق بتاع المصريين حملة الشهادة الثانوية العامة المصرية

وبتهيألي مشفتوش في الدليل بتاعنا

بس يمكن مش مكتوب لإن مكنش فيه قبل كده تقليل اغتراب لينا

أنا بجد مش قادرة أتصور إنهم ممكن يقولولي ممنوع التحويل

مع إنى ليسا مدرستش خالص يبقى فرقت ايه زي ما حضرتك بتقول

ده بعد الشر لو عملوا فيا كده معناها ايه ؟ إن السنة دي راحت عليا :( !!!!!!!!!!!!!!!!!

لا يارب ربنا ياخد بإيدنا جميعا يارب

وف الحقيقة انا شفت موضوع هنا ف المنتدى للدكتور D.abdullah كان عايز يحول من طب اسماعيلية لعين شمس

والموضوع ده كان السنة اللى فاتت

مش عارفة والله هل نفع يحول ولا لاء لو حد من الأعضاء يعرف هوة حول ولا لاء ؟ :( ؟

انا من رأى ان طب بيطرى احسن من علوم انتى تعرفى انك بعد التخرج ممكن تفتحى صيدليه زى الصيدلى بالظبط بس يكون فيها نسبه من الادويه البيطريه وتبقى دكتورة اد الدنيا اما العلوم صعبه جدا وفرصها مش زى فرص الطب البيطرى بعد التخرج .الرأى يرجع ليكى دا مستقبلك انتى

نععععععععععععععععععععععععععععععععععععععععععععععععع ععععععععععععم !

انا ايه اللى خلانى اكتب اسماعيلية انا كنت كتبت الصعيد ارحملي :(



يا جماعه معلش مش فاهمة الكلام ده اتمنى حد يفهمني من فضلكم بالله عليكم :(

بالنسبة لطب الاسماعيلية انا كنت عايزة اروحة بسى نصحونى بعدم كتابته لانه يختلف من حيث كليات الطب على مستوى الجمهورية لانه بيتهيالى اللى بيروحه بيقعد فية ال7 سنين هناك نظام الدراسة مختلف وممكن تدخلى على موقع الجامعة وتشوفى نظام الدراسة هناك عاملة اية لانه اعتقد نظام ساعات معتمدة وزى ما ندى قالت جامعة قناة السويس بتختلف شويتين عن بقية الجامعات ..........اما بقى ربنا يوفقكم يا كليات غير مناظرة وتحويلكم يتقبل لان السنة اللى فاتت ناس اشتكت من عدم قبزل التحويل بتاعهم ....فممكن مكتب التنسيق يبصلكم السنادى بعين العطف

لو حصل فعلا ومنعوكى من التحويلى حاولى تروحى وزارة التعليم العالى وتعملى التماس للوزير اوتقابلى حد من مكتبه واكيد ربنا هيبقى معاكى اكيد ان شاء الله هيبقى فى مرونه متقلقيش

بس المشكلة يا مستر إن الكلية دي لو مكنتش رغبة الطالب فعلا بيبقى مش متقبل أنه يكون في طب بيطرى

خاصة إن تقريبا يا ندى كنتي عايزة تدخلي هندسة ، واهي علوم فيها اقسام شبه الهندسة

مع العلم انها فعلا بيقولوا صعبة ودراسة كبيرة

ليا واحد قريبي كان فيها وآخر ما زهق حول تجارة

بس بالنسبة ليا ادخل علوم احسن من بيطري مش عارفه ليه بصراحة بس مش حابه بيطري

فكري يا ندى كويس وفكري ف راي الأستاذ mrabdelhady وربنا يوفق الجميع يارب

يا طالبة الامارات انتى فاهمة الكلام غلط انتى ينفع تحويلى من طب الاسماعلية لاى طب تانى لان التحويل بتاعك اسمة تحويل مناظر حتى لو مجموع مش جايب مجموع كلية الطب التانية اللى عايزة تروحيها وبيديلك 3 خيارات ساعة التحويل وبتكتبى فيهم الطب اللى قريب من محافظتك مثلا لو ساكنة فى اسيوط وانتى جاتلك كليتك الاسماعلية بتكتبى فى التحويل طب اسيوط وبعدين المنيا وبعدين مثلا سوهاج..................... ارجو انى اكون وصلتلك المعلومة صح........ واى استفسار انا تحت امركم

منا مكنتش أعرف والله الموضوع ده ، وكمان مش منوهين عنه في الدليل بتاعنا خالص ، وإلا أنا مكنتش كتبتها
وأنا فعلا دخلت على الموقع بتاع الجامعه وشوفت فيديو عن النظام هناك وعرفت شوية عن الأمريكان سيستم اللى مطبق فيه واستخرت وعندي إحساس قوى بالرغبة في النقل

غير كده إنى عرفت انه مينفعش أنقل طول الـ7 سنين وده طبعا هيبقى صعب عليا لإن المنصورة أقرب

المشكلة إن أهلى مش معايا هما في الإمارات ، ومش هعرف أتصرف كده لوحدى
يارب يقبلونى مش عايزة أبدأ حياتى الجامعية بالطريقة دي :)

شكرًا جداً لحضرتك ولـجيرسى على المعلومات القيمة وربنا يقدملنا الخير يارب .

يمكن يا دكتورة فى حاجات بتتفرض على الواحد مبيحبهاش بس لازم يتأقلم عليها اهم حاجه المنفعه المستقبليه طول العمر. ليه واحد زميلى دكتور بيطرى فاتح صيدليه ومعاه توكيل دواء معين وبسم الله ما شاء الله وليه واحد خريج علوم كيمياء دايخ على عيادات الاطباء كمندوب للادويه .النقاش لا يفسد للود قضيه بس ندى هىاللى تقرر

بس مكتوب في دليل تقليل الاغتراب للمصريين الـى واخدين الثانوية في مصر إن :

ملحوظة هامة:
تعتبر الكليات والمعاهد التالية هي كليات فريدة ليس لها مناظر، والتحويل منها أو إليها يخضع لنظام التحويل لكليات غير مناظرة، وهذه الكليات هي:
1. كلية الطب بالإسماعيلية.
2. كلية الهندسة الإلكترونية بمنوف.
3. كلية البترول والتعدين بالسويس.
4. المعهد العالي للتكنولوجيا ببنها.
5. المعهد العالي للطاقة بأسوان.



فعشان كده أنا قلقانة جدا لإنه منصوص عليها أهو ضمن الكليات التى تخضع لنظام التحويل الغير مناظر

ولا رأي حضرتك ايه ؟

يا جماعة انا عارفة ان كلية طب بيطري كلية كويسة ومستقبلها كويس .. بس اللي مخليني رافضاها الاسباب التالية : :)

اولا انا بترعب من الصرصار تخيل حضرتك ابقى دكتورة مسؤولة عن مزارع وانا الحيوانات والحشرات بشتى انواعها اصلا بتشكلي عقدة من وانا صغيرة ..

ثانيا : الكلية اصلا مكانتش على بالي وجاية الرغبة ال 44 والوحيدة اللي كانت هتتقبل لو متقبلتش كان جالي استنفاذ رغبات

ثالثا : انا الصدمة في الكلية دي خلتني اكرهها لاني مكنتش متوقعاها بالمرة لاني جايبة 95 في المية ومتوقعتهاش ابدا وكان نفسي في هندسة .. اول ما شفت النتيجة كانت اول كلمة قلتها انا هحول منها

رابعا بقى وده الاهم : كون انك مصدوم في حاجة ومش عايزها مع انك عارف انها كويسة مش هتفرق معاك .. عمرك ما هتيجي في يوم وتدي في الكلية دي حاجة من وقتك وجهدك .. وتفكر انك تنجح فيها وبتقدير .. ده بالنسبالي شبه مستحيل

مش هقدر ادي في الكلية دي اي حاجة من وقتي وجهدي غير في حالة انهم قفلو باب التحويل لكليات غير مناظرة ساعتها مش هيبقى قدامي الا هيا وهرضى بقسمة ربنا .. لكن الفرصة تبقى قدامي واضيعها عشان ادمر نفسي في حاجة انا كارهاها ده مستحيل

هو مبروك ليكوا طبعا

بس مش حرام الظلم ده لما يبقي في تقليل اغتراب للثانوي العام وللشهادات المعادلة

واحنا الدبلومات لا ،،

احنا فينا ناس كتير احسن من الثانوي العام

انا في الاعدادية الاول علي مدرستي وجايب 95% يعني كان بايدي ادخل ثانوي عام مستريح جداا

حرام والله الي بيحصل ده ،، انا حاسس اني بشحت حقي ..

يعني لما ادخل هندسة المنصورة علي 0.4% كانت ممكن تدخلني عين شمس

مش حراااااام

ياه دا انتى عملتى مذكرة واولا وثانيا وثالثا انتى متعقدة جدا جدا فكرى بس بهدوءوان شاء الله يكون التحويل مفتوح لغير المناظرة وتحولى علوم .اللهم امين

يا طالبة الامارات معلشى انا كان نفسى ابسطك بسى بدام الكلام موجود صريح يبقى اكييييييييد للكل وما بالك الكلام دة موجه لطلاب الثانوية المصرية يبقى اكييييييييييييد انتم زيهم وامر كمان بسى ما تياسيش واسالى فى جامعة قناة السويس والمنصورة لان اسماعلية الطب هناك جامد عايز شغل وحضطرى تسكنى فى المدينة الجامعية لانك بنت وبتوع طب فى المدينة بيقعدو اعتقد 5 فى الاوضة وصعب المزاكرة بالعدد دة .....واقصى عدد للطلبة وكل المدن الجامعية كدة فى مصر........فاسالى لان المنصورة انسب ليكى على الاقل تروحى وتيجى فى البيت وحتزاكرى باستقرار .........وحولى تبع التحويل الغير مناظر استهبليلهم يعنى يمكن مكتب التنسيق يقدر يفيدك ودة اكيد وما تساليش اى موظف وخلاص لالالالالا لازم واحد فاهم ..... على اعتيار انك عايزة تحولى منه للمنصورة.......بسى ما تدفعيش الفلوس الا لما تتاكدى انك حيقبلوكى ارجو ان كلامى يكون وصلك لان نظامك يختلف شوية عن التحويل الغير مناظر لانه منوهين عن كليتك فى كتاب تقليل الاغتراب

فوضت أمري لرب العالمين ، معنيش حاجة تانية أعملها هعمل ايه بس :)
بس فيه طالب هنا السنة اللى فاتت كان كاتب موضوع عن التحويل وهوة جاله طب اسماعليه وقدم تحويل لعين شمس
نفسي بس اعرف هل قدر يحول ولا لاء

العضو هوة dr.abdullah

مش عارفه يقدر حد يوصله ولا لاء ؟

وكان برضو شهادة معادلة

يارب رحمتك .. شكرا لـحضرتك وجزاك الله خيراً :)

شكرا علي الخبر

اللى افتكرة فعلا ان عبدالله كان شهادة معادلة فعلا وكاان جالة طب الاسماعيلية فعلا السنة اللى فاتت بسى معرفشى تحويلة قبل ام لالالالالالالالالا