حطوات النقل (تقليل الاغتراب) للشهادات المعادله 2010
 

:التحويل من كلية الى كلية مناظرةفقط{لا يشترط بلوغ الحد الأدنى }


يعني طالما انت جبت مجموع الكلية تقدر تحول من الكلية اللي ترشحت فيها الى أي كلية زيها في مصر

مثال:

لو جبت هندسة قنا ( 393.54875 ) وعاوز تحول لهندسة طنطا ( 399.2375 )

مفيش أي مشاكل عادي جدا


ثانيا: متطلبات التحويل:

1- بطاقة الترشيح ( اللي طبعتها من النت )


2- صورة البطاقة الشخصية أو صورة من الجواز


3- صورة ايصال مكتب التنسيق ( اللي مكتوب فيها المجموع الاعتباري )


4- 4) حواله بريديه بمبلغ 2000 جنيه باسم وزارة التعليم العالي.... هتروح اقرب مكتب بريد ويوجد مكتب بريد بجوار مكتب التنسيق وقولو عايز حواله حكوميه باسم وزارة التعليم العالي هياخد منك مبلغ 2020.5 جنيه 2000 طبعا الي هي الحواله و 20.5 لمكتب البريد


ثالثا: خطوات التحويل ( للكليات المناظرة فقط ):

التحويل عند مكتب التنسيق اللي موجود في المدينة الجامعية بجامعة القاهرة بالجيزة

1- اذهب الى مبنى رقم10-

2- هيديك ورقة تملي بياناتها ( المجموع الاعتباري, الاسم , نوع الشهادة......الخ )

ومن البيانات هتلاقي 5 رغبات للتحويل لازم تكتب 3

3- النتيجه بعد 10ايام

4- النتيجه هتروح بجواب على البيت علشان كدة لازم تكتب العنوان بالتفصيل

رابعا: مبروك عليك التحويل!!!!!!!!!!!!!!!!!!!!! وبالقبول ان شاء الله

ههههههههههههههههههههههههه جامدة موووووووووووت ونص دي .. ما كانو خلوها واحد وشيرين ولا اتنين وشيرين ولا تلاتة وشيرين :p


بس واضح ان مبدا تكافؤ الفرص بين الطلاب المصريين مطبق عالي اوي السنادي ..يعني الطالب اللي درس في مصر متاح ليه كليات غير مناظرة ومناظرة زي ما يحب .. والتحويل بتاعو مبيصرفش المصاريف دي كلها .. والملف بتاعو بيشتريه بمبلغ عادي .. انما طالب الشهادة المعادلة عشان جاي من بره يبقى يشيل بقى محدش قالو يدرس بره .. ملف ب 500 جنيه والتحويل ب 2000 جنيه ولكليات مناظرة فقط .. والتنسيق العالي .. ماحنا بنسافر عشان نرجع ندفع تمن الغربة بردة .. صحيح الغربة مرة ..

لنا الله والله العظيم

كان الله فى عونكم


ربنا معاكم

بالتوفيق للجميع

انا كتبت رغبة وحدة بس مش 3 ناس قالولي هناك كده

فعلا هيا المطلوبة رغبة واحدة

لا والسنة دي 2000 :d

ربنا يستر يارب

انتو طيب هتعملوا ايه ؟ هتروحوا الكلية اللى ظهرت ف التنسيق ولا هتروحوا الكلية اللى حولتوا ليها ولا هتستنوا نتيجة التحويل
ولا هتعملو ايه بس :( ؟

يا جماعة معلش قين رقمين للايصال واحد في ورقة ايصال التنسيق مكتوب باللون الاحمر والتاني في ورقة الرغبات اكتب اي واحد ...................؟؟؟؟؟؟؟؟؟؟؟؟؟ بااااااريت الرد بسرعة
مع امنياتي للجميع بالتوفيق ...........

+
بعد القبول بالكلية اذا كانت نظرية بتدفعي 1500 جنيه ولو عملية 3000 جنيه مقابل "خدمات"

انا هروح الكلية اللي محول ليها على ما النتيجه تبان

خدمات ايه دي ان شاء الله كمان :) بالنسبة للشاي فانا مبشربش اي منبهات :p

ايه طبيعة الخدمات دي بالظبط اللي في الكلية العملية ؟؟؟ يعني هيا هتزيد ايه عن اللي مقدمين بالطريقة العادية ؟؟

الرقم اللي موجود في بطاقة الترشيح

وانا هقعد ف البيت

احضرى فى الكليه اللى انتى محوله اليها طالما تحويل مناظر كل التحويلات هتتقبل ان شاء الله تعالى ولو كان فى مشكله فى التحويل كان الموظف قال للمتقدم للتحويل . ربنا يوفقكم جميعا

هههههههههههههههههههه
أنا عن نفسي هروح للكلية اللي اتقبلت فيها منعا للإحراج

أهلا بحضرتك من تـــانى :)

بس أنا بجـد محتاره !

أصل المشكلة إنى خايفة أروح الكلية اللى كتبتها في التحويل وبعد ما أتعود عليها وأتأقلم تيجي - لا قدر الله -

نتيجة التحويل مش كويسة ، فطبعًا كده هتعقد جدًا وهيبقى صعب أغير الكلية

غير كده إن أصلا الكليتين ( اللى محوله منها واللى محوله إليها ) مش قريبين مني

يعني هيبقى صعب كل يوم أروح واجي لحد ما النتيجة تبان

وبعدين أنا أتحرج أدخل الكلية طب هدخلها ازاي وبطاقة الترشيح مش نفس الكلية؟!

أدخل بأي مسمى ؟

وف نفس الوقت قلقانة جدًا بشأن المحاضرات اللى هياخدوها

وانى لو روحت الكلية بعد إعلان النتيجة طبعًا هايكون الكل اتعود وأنا ليسا مش عارفة أي حاجة :(


أفيدونى ماذا أفعل ؟


بس الكليات دي بعيدة اوى ! هنروح ازاي ونسكن ازاي ؟

اعتقد انه مفيش حل تاني غير كدة... انا كليتي بتبعد عني تقريبا ساعة ونص... وربنا يقدرني...أنا هحضر اول يوم وهشوف الوضع، وإذا مقدرتش هقعد في البيت وهستنى نتيجة التحويل .

ربنا يوفق حضرتك إن شاء الله ، وربنا يعيننا كلنا يارب :)

ربنا يوفقك ويوفقنا كلنا إن شاء الله... وعسى أن تكرهوا شيئا وهو خير لكم، وإن شاء الله يكون الظلم اللي حصلنا خير لينا بإذن الله .

انا محول من هندسة طنطا لم لاسكندرية ورحت سألت الكلية هنا في اسكندرية وقالوا ممكن تداوم عندنا لمدة اسبوعين لغاية ما النتيجة تطلع

شكرااااااااااااااااااااااااااااااااااااااااااااااا ااااااااااااااااااا

أنا بردو نفس المشكلة جالي طب اسيوط و حولت القاهرة بس انا باة مش هقعد فالبيت

أنا هروح على طول طب القاهرة لحد مالنتيجة تظهر و لو جت النتيجة القاهرة يبقى خير و بركة اما لو جت كلية تانية يبقى استفدنا بردو من المحاضرات و كده اصل ده طب مينفعش فيه نقل المحاضرات زي باقي الكليات

انصحك تروحي و انشاءالله تجيلك الكلية اللي انت عايزاها

انا جالي حاسبات ومعلومات اسماعيلية وروحت قدمت تحويل طلبو مني اني اكتب 3 رغبات كتبتهم كدة
1- حاسبات القاهرة
2- حاسبات عين شمس
3- حاسبات حلوان

قالولي النتيجة كمان 10 ايام طب انا دلوقتي ممكن احضر فييين بقى ؟؟ ولو روحت مثلا حاسبات القاهرة هيدخلوني ولا لا ؟؟

ايه اخبار التحويل للكليات الغير مناظرة للشهادة الانجليزية
 

فتحين با التحويل بدون شرط المجمون للكليات المناظرة طب والغير مناظرة ظرفها ايه رغم ان الدليل ابو 500 جنية بيقول انى ممكن احول الى اى كلية لو مجموعى يسمح

احضر فى المكان الأسهل لك


لكن لن تجدوا انتظام فى الدراسة قبل أسبوع أو أكثر
يكون وقتها نتائج التحويلات ظهرت


ربنا معاكم

انا جالي طب اسنان المنيا و روحت حولت لعين شمس او القاهره
وكنت متردد جدا اني اروح عين شمس لانها اقرب جامعة ليا ( تقريبا 10 دقايق بالعربية ) بس لما روحت لقيتهم كاجوال خالص ومحدش بيقولي رايح فين و جاي منين :d
بس انا بجد مش قادر اعرف ليه كل ده .. يعني المفروض ان السنة دي سنة الفراغ و كلنا كنا متوقعين حاجه غير كدا خااالص بس طبعا مصر بلد المفاجات و محدش يقدر يقول غير كدا بعد ما شوفتا مهزلة التنسيق و اللي حصل لكتير مننا ..
انا بجد مش فاهم هما ناويين يعملو ايه في الكليات السنة دي .. يعني لما اكتر من نص الشهادات المعادلة يدخل جامعات خاصة و اصلا مفيش دفعة من مصر السنة دي .. الجامعات الحكومية هتعمل ايه ؟؟؟!!!
وبعدين كلو كوم و طابور العيش قصدي التنسيق كوم تاني ..
يعني الناس دي مش عارفه انهم عاملين مصايب في الطلبة كلهم فا يجيبو موظفين زيادة ولا لازم نحارب عشان نعرف نوصل .. دا على الاقل كانو عملو شباك رجال و شباك سيدات بدل المهزلة اللي حصلت دي ..
وبعدبن دول كمان بياخدو مننا فلوس امال لو كنا احنا اللي هناخد منهم كانو عملو ايه ؟؟
بجد حسبي الله و نعم الوكيل .. منهم لله ..